Hujjat kuchini yo‘qotgan " " 29.04.2026

Oʻzbekiston Respublikasi Vazirlar Mahkamasining

qarori

Issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilish xarajatlarining 50 foizini qoplash tartibi toʻgʻrisidagi nizomni tasdiqlash haqida

LexUZ sharhi

Mazkur qaror Oʻzbekistan Respublikasi Vazirlar Mahkamasining 2026-yil 28-apreldagi 206-sonli “Agrar va oziq-ovqat sohalarini davlat tomonidan qoʻllab-quvvatlash tizimini tubdan takomillashtirish chora-tadbirlari toʻgʻrisida”gi qaroriga asosan oʻz kuchini yoʻqotgan.

Respublikada issiqxona xoʻjaliklarini zamonaviy ilmiy yondashuvlar asosida rivojlantirish va ularning faoliyatini samarali tashkil etish uchun qulay sharoit yaratish, qishloq xoʻjaligi ekinlari hosildorligini oshirish maqsadida, shuningdek, Vazirlar Mahkamasining “Issiqxona xoʻjaliklari va meva-sabzavotlarni eksport qiluvchi korxonalarning faoliyatini qoʻllab-quvvatlashga doir qoʻshimcha chora-tadbirlar toʻgʻrisida” 2023-yil 27-oktabrdagi 567-son qaroriga muvofiq Vazirlar Mahkamasi qaror qiladi:

1. Quyidagilarni nazarda tutuvchi Issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilish xarajatlarining 50 foizini qoplash tartibi toʻgʻrisidagi nizom ilovaga muvofiq tasdiqlansin:

issiqxona xoʻjaliklariga xorijdan jalb qilinadigan malakali agronom, entomolog va laboratoriya mutaxassislari roʻyxatini shakllantirish hamda malakali agronomlar “yashil reyestri”ni yuritish tartibi;

issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilish xarajatlarining 50 foizini qoplash uchun subsidiya ajratish boʻyicha talab etiladigan hujjatlar, ularni koʻrib chiqish hamda subsidiya ajratish toʻgʻrisidagi qarorni qabul qilish tartibi;

issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilinishi yuzasidan monitoring yuritish.

2. Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasi (J. Xodjayev) (keyingi oʻrinlarda — Hukumat komissiyasi) bir oy muddatda 2024-yilda xorijdan malakali agronom, entomolog va laboratoriya mutaxassislarini jalb qilish xarajatlarining 50 foizi qoplab beriladigan issiqxonalarning manzilli roʻyxatini tasdiqlasin.

3. Oʻzbekiston Respublikasi Qishloq xoʻjaligi vazirligi Hukumat komissiyasi tomonidan tasdiqlangan roʻyxatga muvofiq “Agrosubsidiya” axborot tizimiga kiritilgan issiqxona xoʻjaliklariga oʻz vaqtida subsidiya ajratilishini nazorat qilib borsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov va J.A. Xodjayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 10-iyul,

410-son

Vazirlar Mahkamasining 2024-yil 10-iyuldagi 410-son qaroriga
ILOVA

Issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilish xarajatlarining 50 foizini qoplash tartibi toʻgʻrisida

NIZOM

1-bob. Umumiy qoidalar

1. Mazkur Nizom issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilish xarajatlarining 50 foizini qoplash tartibini belgilaydi.

2. Issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilish xarajatlarining 50 foizini, biroq bir oyga bir nafar mutaxassis uchun 1 ming AQSH dollari ekvivalentidan oshmagan qismini Oʻzbekiston Respublikasining respublika budjetidan Qishloq xoʻjaligi vazirligi huzuridagi Agrosanoatni rivojlantirish agentligiga (keyingi oʻrinlarda — Agentlik) har yili ajratiladigan mablagʻlar doirasida Agrosanoatni rivojlantirish va qoʻllab-quvvatlash davlat maqsadli jamgʻarmasi (keyingi oʻrinlarda — Jamgʻarma) mablagʻlari hisobidan qoplash uchun subsidiya ajratiladi.

(2-bandning birinchi xatboshisi Oʻzbekiston Respublikasi Vazirlar Mahkamasining 2025-yil 23-apreldagi 255-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/255/0376-son)

Bunda subsidiya uchun talab etiladigan mablagʻlar Oʻzbekiston Respublikasi Qishloq xoʻjaligi vazirligining buyurtmanomasiga asosan Iqtisodiyot va moliya vazirligi tomonidan har yili Oʻzbekiston Respublikasi Davlat budjeti parametrlarida nazarda tutiladi.

Oʻzbekiston Respublikasining respublika budjetidan ajratilgan mablagʻlar hisobi Iqtisodiyot va moliya vazirligining axborot tizimida Agentlik uchun ochilgan shaxsiy gʻazna hisobvaragʻida yuritiladi.

3. Ushbu Nizomda quyidagi asosiy tushunchalardan foydalaniladi:

issiqxona xoʻjaliklari — sanoat usulida issiqxona xoʻjaliklarida qishloq xoʻjaligi mahsulotlarini yetishtiruvchi fermer xoʻjaliklari, dehqon xoʻjaliklari, agroklasterlar va boshqa yuridik shaxs maqomiga ega boʻlgan qishloq xoʻjaligi subyektlari;

malakali agronomlar “yashil reyestri” — Oʻzbekiston Respublikasi Qishloq xoʻjaligi vazirligining rasmiy veb-saytida eʼlon qilib boriladigan xorijdan jalb qilinadigan malakali agronom, entomolog va laboratoriya mutaxassislari roʻyxati;

mutaxassis — agronom, entomolog yoki laboratoriya mutaxassisligi yoʻnalishida oliy taʼlim tashkilotini tugatgan, issiqxona xoʻjaligi faoliyati boʻyicha kamida 5 yillik ish tajribasiga ega boʻlgan hamda malakali agronomlar “yashil reyestri”ga kiritilgan xorijiy mutaxassis;

subsidiya — issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilish xarajatlarining qoplab beriladigan qismi;

talabgor — issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilgan qishloq xoʻjaligi subyekti;

“Agrosubsidiya” AT — Oʻzbekiston Respublikasi Qishloq xoʻjaligi vazirligining “Raqamli qishloq xoʻjaligi” yagona integratsiya platformasi tarkibiga kiruvchi hamda qishloq xoʻjaligi ekinlarini yetishtirish uchun imtiyozli kreditlar va subsidiyalarni ajratish, mahsulot yetishtiruvchilarga shaffoflik tamoyili asosida xizmatlar koʻrsatish imkoniyatlarini taʼminlab beradigan axborot tizimi.

4. Issiqxona xoʻjaliklariga xorijdan malakali mutaxassislarni jalb qilish xarajatlarining 50 foizi ushbu Nizomga 1-ilovaga muvofiq sxema boʻyicha qoplanadi.

5. Subsidiya “V” va undan yuqori toifalardagi tadbirkorlik subyektlarining barqarorlik reytingi darajasiga ega issiqxona xoʻjaliklariga beriladi.

Bunda tadbirkorlik subyektlarining barqarorlik reytingi darajasidan kelib chiqqan holda toifalarga subsidiya miqdori quyidagi nisbatlarda taqdim etiladi:

“AAA” toifa — subsidiya miqdorining 100 foizi;

“AA” toifa — subsidiya miqdorining 90 foizi;

“A” toifa — subsidiya miqdorining 80 foizi;

“VVV” toifa — subsidiya miqdorining 70 foizi;

“VV” toifa — subsidiya miqdorining 60 foizi;

“V” toifa — subsidiya miqdorining 50 foizi.

2-bob. Xorijdan jalb qilinadigan malakali mutaxassislar roʻyxatini shakllantirish

6. Talabgor Agentlikning tuman (Quvasoy shahar) loyiha ofisiga xorijdan jalb qilinadigan malakali mutaxassisning davlati va uning shaxsini tasdiqlovchi hujjatning nusxasi, oliy taʼlim tashkilotini tugatganligi toʻgʻrisidagi hujjat va unga tenglashtirilgan boshqa hujjatlarning nusxalari, xorijdan jalb qilinadigan malakali mutaxassis bilan tuzilgan mehnat shartnomasining nusxasi, mehnat faoliyati davri, telefon raqami haqidagi maʼlumotlarni taqdim etadi.

Agentlikning tuman (Quvasoy shahar) loyiha ofisi uch ish kuni ichida xorijdan jalb qilinadigan malakali mutaxassislar toʻgʻrisidagi maʼlumotlarni umumlashtirgan holda Agentlikka yuboradi.

Agentlik uch ish kuni ichida xorijdan jalb qilinadigan malakali mutaxassislar toʻgʻrisidagi maʼlumotlarni koʻrib chiqadi va umumlashtirgan holda Oʻzbekiston Respublikasi Qishloq xoʻjaligi vazirligiga taqdim etadi.

Oʻzbekiston Respublikasi Qishloq xoʻjaligi vazirligi besh ish kuni ichida Agentlik tomonidan taqdim etilgan maʼlumotlarni oʻrganib chiqadi hamda oʻrganish natijalariga koʻra oʻzining rasmiy veb-saytidagi malakali agronomlar “yashil reyestri”da xorijdan jalb qilinadigan malakali mutaxassislar roʻyxatini eʼlon qilib boradi.

Bunda malakali agronomlar “yashil reyestri”dagi xorijdan jalb qilinadigan malakali mutaxassislar roʻyxati har oyda yangilab boriladi.

7. Yer maydoni 1 gektardan 10 gektargacha boʻlgan va sanoat usulida qishloq xoʻjaligi mahsulotlarini yetishtiruvchi issiqxona xoʻjaligi tomonidan mavsum davrida xorijdan 1 nafar malakali mutaxassis (agronom yoki entomolog yoxud laborant) jalb etiladi.

Bunda tutash hududlarda joylashgan va umumiy maydoni 10 gektardan oshmaydigan bir necha issiqxona xoʻjaliklari oʻzaro kelishuv asosida xorijdan jalb qilingan malakali mutaxassis xizmatidan foydalanishi mumkin.

3-bob. Subsidiya ajratish boʻyicha ariza bilan murojaat qilish

8. Issiqxona xoʻjaliklariga xorijdan malakali mutaxassislarni jalb qilish xarajatlarining 50 foizini qoplash uchun subsidiya ajratishga koʻmaklashuvchi tuman (Quvasoy shahar) ishchi guruhi (keyingi oʻrinlarda — tuman (Quvasoy shahar) ishchi guruhi) har bir tumanda mazkur Nizomga 2-ilovaga muvofiq namunaviy tarkibda tashkil etiladi.

9. Talabgor xorijdan malakali mutaxassisni jalb qilgandan soʻng bir oy ichida tuman (Quvasoy shahar) ishchi guruhiga “Agrosubsidiya” AT orqali issiqxona xoʻjaligiga xorijdan malakali mutaxassisni jalb qilish xarajatining 50 foizini qoplash uchun subsidiya ajratish boʻyicha oʻzining shaxsiy identifikatsiya raqami, joylashgan joyi (pochta manzili, elektron manzili), xizmat koʻrsatuvchi tijorat banki va hisobvaragʻi koʻrsatilgan ariza bilan murojaat qiladi hamda arizaga quyidagilarni ilova qiladi:

xorijdan jalb qilinadigan malakali mutaxassisni ishga qabul qilish toʻgʻrisidagi buyruqni ichki ishlar organlarining migratsiya va fuqarolikni rasmiylashtirish boʻlinmalarida hisobga qoʻyilganligi toʻgʻrisidagi maʼlumot;

Oʻzbekiston Respublikasi Kambagʻallikni qisqartirish va bandlik vazirligi tomonidan berilgan Oʻzbekiston Respublikasi hududida mehnat faoliyatini amalga oshirish huquqini beruvchi tasdiqnomaning nusxasi;

(9-bandning uchinchi xatboshisi Oʻzbekiston Respublikasi Vazirlar Mahkamasining 2025-yil 7-noyabrdagi 709-sonli qarori tahririda — Qonunchilik maʼlumotlari milliy bazasi, 10.11.2025-y., 09/25/709/1027-son)

xorijdan jalb qilinadigan malakali mutaxassis bilan tuzilgan mehnat shartnomasining nusxasi;

xorijdan jalb qilinadigan malakali mutaxassisga ish haqi toʻlash uchun tijorat bankidagi hisobvaragʻidan mablagʻ koʻchirilganligi toʻgʻrisidagi hujjatning nusxasi.

Talabgor arizadagi maʼlumotlar va ilova qilingan hujjatlarning toʻgʻriligi uchun javobgar hisoblanadi.

Talabgordan ushbu bandda nazarda tutilmagan boshqa hujjatlarni talab qilishga yoʻl qoʻyilmaydi.

4-bob. Talabgorning murojaatini koʻrib chiqish va subsidiya ajratish

10. Tuman (Quvasoy shahar) ishchi guruhi har yili 1-fevralga qadar:

ushbu Nizomning 9-bandida nazarda tutilgan talablarga muvofiq talabgorlar tomonidan taqdim etilgan hujjatlarni oʻrganib chiqadi;

oʻrganish natijalariga koʻra talabgorlarning manzilli roʻyxatini shakllantiradi;

talabgorlarning manzilli roʻyxatidan kelib chiqqan holda ularga subsidiya ajratish toʻgʻrisidagi xulosalarni rasmiylashtirgandan soʻng “Agrosubsidiya” AT orqali talabgorlarning manzilli roʻyxatini va xulosalarni koʻrib chiqish uchun Agentlikka yuboradi.

Talabgorlarning manzilli roʻyxatini shakllantirishda quyidagi mezonlar inobatga olinadi:

issiqxona obyektlari soz holatda ekanligi;

issiqxona xoʻjaliklari amalda faoliyatini samarali yoʻlga qoʻyib, yil davomida kamida bitta mahsulot turini yetishtirayotganligi;

“V” va undan yuqori toifadagi tadbirkorlik subyektlarining barqarorlik reyting darajasiga ega issiqxona xoʻjaligi ekanligi;

yer maydoni 1 gektardan 10 gektargacha boʻlgan va sanoat usulida qishloq xoʻjaligi mahsulotlarini yetishtiruvchi issiqxona xoʻjaligi tomonidan xorijdan malakali mutaxassisning jalb qilinganligi.

11. Tuman (Quvasoy shahar) ishchi guruhi aʼzolari talabgorlarning manzilli roʻyxatini shakllantirishda quyidagilarga shaxsan masʼul hisoblanadi:

tuman (Quvasoy shahar) hokimi — ishchi guruh faoliyatini tashkil qilishga va ishchi guruh tomonidan talabgorning subsidiya ajratish toʻgʻrisidagi arizasini muddatida va toʻliq oʻrganilishiga hamda rasmiylashtirilgan hujjatlarning toʻgʻriligiga;

tuman (Quvasoy shahar) hokimining qishloq va suv xoʻjaligi masalalari boʻyicha oʻrinbosari — subsidiya ajratish toʻgʻrisidagi hujjatlar oʻz vaqtida rasmiylashtirilishi va muvofiqlashtirilishiga;

tuman (Quvasoy shahar) qishloq xoʻjaligi boʻlimi boshligʻi — xorijdan jalb qilinadigan malakali mutaxassis malakali agronomlar “yashil reyestri”dagi roʻyxatga kiritilganligiga;

tuman (Quvasoy shahar) iqtisodiyot va moliya boʻlimi boshligʻi — talabgorga xizmat koʻrsatuvchi tijorat banki va hisobvaraqlar toʻgʻrisidagi maʼlumotlarning toʻgʻriligiga;

tuman (Quvasoy shahar) soliq inspeksiyasi rahbari — talabgorning soliq hisobotlarini topshirib borishi toʻgʻrisidagi maʼlumotlarning toʻgʻriligiga;

xizmat koʻrsatuvchi tijorat banki rahbari — talabgorning bank hisobvaragʻidan pul aylanmasi toʻgʻrisidagi maʼlumotlarning toʻgʻriligiga;

tuman (Quvasoy shahar) statistika boʻlimi boshligʻi — talabgorning statistika hisobotlarini topshirib borishi toʻgʻrisidagi maʼlumotlarning toʻgʻriligiga;

tuman (Quvasoy shahar) kambagʻallikni qisqartirish va bandlikka koʻmaklashish boʻlimi boshligʻi — talabgor bilan xorijdan jalb qilinadigan mutaxassis oʻrtasida mehnat shartnomasining tuzilganligiga;

tuman (Quvasoy shahar) fermer, dehqon xoʻjaliklari va tomorqa yer egalari kengashi raisi — talabgorning huquqlari va qonuniy manfaatlari buzilmasligiga;

Agentlikning tuman (Quvasoy shahar) loyiha ofisi rahbari — xorijdan jalb qilinadigan malakali mutaxassisga oid hujjatlarning toʻgʻriligiga.

12. Agentlik har yili 20-fevralga qadar:

xorijdan malakali mutaxassisni jalb qilgan talabgorlarga subsidiya ajratish toʻgʻrisidagi xulosalarni va unga ilova qilingan hujjatlarni koʻrib chiqadi;

talabgorlarning manzilli roʻyxatga kiritilganligini tekshiradi;

hujjatlarni koʻrib chiqish natijalariga koʻra talabgorlarga subsidiya ajratish yoki subsidiya ajratishni rad etish haqida qaror qabul qiladi;

talabgorlarning manzilli roʻyxatini Oʻzbekiston Respublikasi Qishloq xoʻjaligi vazirligiga taqdim etadi.

13. Talabgorga xorijdan malakali mutaxassisni jalb qilish xarajatlarining 50 foizini qoplashni rad etish uchun quyidagilar asos boʻladi:

talabgorning oʻz arizasiga asosan;

ushbu Nizomning 9-bandida nazarda tutilgan hujjatlar toʻliq taqdim etilmaganda;

ushbu Nizomning 10-bandida nazarda tutilgan mezonlarga muvofiq kelmaganda;

talabgor tomonidan malakali agronomlar “yashil reyestri”ga kiritilmagan mutaxassis jalb qilinganda;

talabgor tomonidan soxta hujjatlar, notoʻgʻri yoki yolgʻon maʼlumotlar taqdim etilganda;

qishloq xoʻjaligi subyekti tugatilganda.

Ushbu bandda koʻrsatilmagan boshqa asoslar bilan talabgorga subsidiya ajratishni rad etishga yoʻl qoʻyilmaydi.

Agentlik subsidiya ajratishni rad etgan taqdirda, bir kun muddatda talabgorni rad etishning aniq sabablarini koʻrsatgan holda “Agrosubsidiya” AT orqali xabardor qiladi.

Talabgor Agentlikning xabarnomasida koʻrsatilgan subsidiya ajratishni rad etish sabablarini bartaraf etgan holda, xabarnoma yuborilgan kundan eʼtiboran bir oy muddat ichida subsidiya ajratish boʻyicha qayta murojaat qilishi mumkin.

Talabgor Agentlikning subsidiya ajratishni rad etish toʻgʻrisidagi qaroridan norozi boʻlgan taqdirda, belgilangan tartibda yuqori turuvchi tashkilotga yoki sudga shikoyat qilish huquqiga ega.

LexUZ sharhi

Qarang: Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi va “Sudlar toʻgʻrisida”gi qonunlari.

14. Oʻzbekiston Respublikasi Qishloq xoʻjaligi vazirligi har yili 1-martga qadar Agentlik tomonidan taqdim etilgan talabgorlarning manzilli roʻyxatini oʻrganib chiqib, Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasiga (keyingi oʻrinlarda — Hukumat komissiyasi) tasdiqlash uchun kiritadi.

15. Hukumat komissiyasi har yili 15-martga qadar talabgorlarning manzilli roʻyxatini tasdiqlaydi.

16. Agentlik Hukumat komissiyasi tomonidan tasdiqlangan talabgorlarning manzilli roʻyxatiga muvofiq oʻn ish kuni ichida talabgorning tijorat bankidagi hisobvaragʻiga subsidiyani oʻtkazib beradi.

5-bob. Xorijdan malakali mutaxassislarning jalb qilinishi natijadorligi yuzasidan monitoring yuritish

17. Tuman (Quvasoy shahar) ishchi guruhi tomonidan hosil yili yakuni bilan issiqxona xoʻjaliklariga xorijdan malakali mutaxassislarning jalb qilinishi natijadorligi boʻyicha monitoring oʻtkaziladi.

Tuman (Quvasoy shahar) ishchi guruhi xorijdan malakali mutaxassislarning jalb qilinishi natijadorligi boʻyicha oʻtkazilgan monitoring natijalari boʻyicha Agentlikka hisobot taqdim etadi.

18. Oʻtkazilgan monitoring natijalariga koʻra, xorijdan jalb qilingan mutaxassis issiqxona xoʻjaligida faoliyat yuritgan davrda hosildorlik oʻtgan yilgi hosildorlikka nisbatan kamida 20 foizga oshmagan yoki kamayib ketgan hollarda (noqulay iqlim sharoitlari va fors-major holatlari bundan mustasno), ajratilgan subsidiya talabgor tomonidan qaytariladi.

Agentlik issiqxona xoʻjaligiga xorijdan malakali mutaxassisni jalb qilish xarajatlarining bir qismini qoplash uchun ajratilgan subsidiyani qaytarish haqida talabgorga ogohlantirish xatini yuboradi.

19. Talabgor ogohlantirish xatini olgan kundan eʼtiboran bir oy muddat ichida ajratilgan subsidiyani Oʻzbekiston Respublikasi Iqtisodiyot va moliya vazirligining axborot tizimida Agentlik uchun ochilgan shaxsiy gʻazna hisobvaragʻiga qaytaradi.

Agar talabgor subsidiyani ixtiyoriy ravishda ogohlantirish xatida koʻrsatilgan muddatda va miqdorda qaytarmasa yoki qaytarishni rad etsa, Agentlik subsidiyani sud tartibida undirish choralarini koʻradi.

6-bob. Yakunlovchi qoidalar

20. Issiqxona xoʻjaliklariga xorijdan malakali mutaxassislarni jalb qilish xarajatlarining 50 foizini qoplash uchun berilgan subsidiyalar toʻgʻrisidagi maʼlumotlar har oyda Agentlikning rasmiy veb-saytida eʼlon qilib boriladi.

21. Subsidiya ajratishda yuzaga keladigan kelishmovchiliklar tomonlar oʻrtasida muzokaralar oʻtkazish orqali hal etiladi.

Bunda taraflar oʻrtasida kelishmovchiliklar muzokaralar oʻtkazish orqali hal etilmagan taqdirda, nizolar sud tartibida hal qilinadi.

22. Issiqxona xoʻjaliklariga xorijdan malakali mutaxassislarni jalb qilish xarajatlarining 50 foizini qoplash maqsadida ajratilgan mablagʻlardan maqsadli foydalanish Davlat moliyaviy nazorati inspeksiyasi tomonidan nazorat qilinadi.

23. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilish xarajatlarining 50 foizini qoplash tartibi toʻgʻrisidagi nizomga

1-ILOVA

Issiqxona xoʻjaliklariga xorijdan malakali mutaxassislarni jalb qilish xarajatlarining 50 foizini qoplash

SXEMASI

Bosqichlar	Subyektlar	Chora-tadbirlar	Muddatlar
Bosqichlar	Subyektlar	Chora-tadbirlar	Muddatlar

1-bosqich	Qishloq xoʻjaligi subyekti (keyingi oʻrinlarda — talabgor)	Xorijdan jalb qiladigan malakali mutaxassisni malakali agronomlar “yashil reyestri”dagi roʻyxatga kiritish uchun Qishloq xoʻjaligi vazirligi huzuridagi Agrosanoatni rivojlantirish agentligining (keyingi oʻrinlarda — Agentlik) tuman (Quvasoy shahar) loyiha ofisiga ushbu Nizomning 6-bandiga muvofiq xorijdan jalb qilinadigan malakali mutaxassis toʻgʻrisidagi maʼlumotlarni taqdim etadi.	Ixtiyoriy ravishda
1-bosqich	Qishloq xoʻjaligi subyekti (keyingi oʻrinlarda — talabgor)		Ixtiyoriy ravishda

2-bosqich	Agentlikning tuman (Quvasoy shahar) loyiha ofisi	Xorijdan jalb qilinadigan malakali mutaxassislar toʻgʻrisidagi maʼlumotlarni umumlashtirgan holda Agentlikka yuboradi.	3 ish kuni ichida
2-bosqich	Agentlikning tuman (Quvasoy shahar) loyiha ofisi		3 ish kuni ichida

3-bosqich	Agentlik	Xorijdan jalb qilinadigan malakali mutaxassislar toʻgʻrisidagi maʼlumotlarni koʻrib chiqadi va umumlashtirgan holda Qishloq xoʻjaligi vazirligiga taqdim etadi.	3 ish kuni ichida
3-bosqich	Agentlik		3 ish kuni ichida

4-bosqich	Qishloq xoʻjaligi vazirligi	Agentlik tomonidan taqdim etilgan maʼlumotlarni oʻrganib chiqadi hamda oʻrganish natijalariga koʻra oʻzining rasmiy veb-saytidagi malakali agronomlar “yashil reyestri”da xorijdan jalb qilinadigan malakali mutaxassislar roʻyxatini eʼlon qilib boradi.	5 ish kuni ichida
4-bosqich	Qishloq xoʻjaligi vazirligi		5 ish kuni ichida

5-bosqich	Talabgor	Tuman (Quvasoy shahar) ishchi guruhiga “Agrosubsidiya” AT orqali issiqxona xoʻjaligiga xorijdan malakali mutaxassisni jalb qilish xarajatining 50 foizini qoplash uchun subsidiya ajratish boʻyicha oʻzining shaxsiy identifikatsiya raqami, joylashgan joyi, xizmat koʻrsatuvchi tijorat banki va shaxsiy hisobvaragʻi koʻrsatilgan arizaga tegishli hujjatlarni ilova qilgan holda murojaat etadi.	Ixtiyoriy ravishda, xorijdan malakali mutaxassisni jalb qilgandan soʻng 1 oy ichida
5-bosqich	Talabgor

6-bosqich	Tuman (Quvasoy shahar) ishchi guruhi	Talabgorning arizasini ushbu Nizomning 9 va 10-bandlariga mosligini koʻrib chiqib, manzilli roʻyxatga kiritadi va talabgorga subsidiya ajratish boʻyicha xulosasini Agentlikka taqdim etadi.	Har yili 1-fevralga qadar
6-bosqich	Tuman (Quvasoy shahar) ishchi guruhi		Har yili 1-fevralga qadar

7-bosqich	Agentlik	Talabgorga subsidiya ajratish toʻgʻrisidagi xulosani va unga ilova qilingan hujjatlarni koʻrib chiqish natijalariga koʻra talabgorga subsidiya ajratish yoki subsidiya ajratishni rad etish haqida qaror qabul qiladi. Talabgorlarning manzilli roʻyxatini Qishloq xoʻjaligi vazirligiga taqdim etadi.	Har yili 20-fevralga qadar
7-bosqich	Agentlik		Har yili 20-fevralga qadar

8-bosqich	Qishloq xoʻjaligi vazirligi	Agentlik tomonidan kiritilgan manzilli roʻyxatni umumlashtirib Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasiga (keyingi oʻrinlarda — Hukumat komissiyasi) tasdiqlash uchun kiritadi.	Har yili 1-martga qadar
8-bosqich	Qishloq xoʻjaligi vazirligi		Har yili 1-martga qadar

9-bosqich	Hukumat komissiyasi	Qishloq xoʻjaligi vazirligi tomonidan kiritilgan talabgorlarning manzilli roʻyxatini koʻrib chiqib tasdiqlaydi.	Har yili 15-martga qadar
9-bosqich	Hukumat komissiyasi		Har yili 15-martga qadar

10-bosqich	Agentlik	Hukumat komissiyasi tomonidan tasdiqlangan manzilli roʻyxatga muvofiq talabgorning tijorat bankidagi hisobvaragʻiga subsidiyani oʻtkazib beradi.	10 ish kuni ichida
10-bosqich	Agentlik		10 ish kuni ichida

(1-ilova Oʻzbekiston Respublikasi Vazirlar Mahkamasining 2025-yil 23-apreldagi 255-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/255/0376-son)

Issiqxona xoʻjaliklariga xorijdan malakali agronom, entomolog va laboratoriya mutaxassislarini jalb qilish xarajatlarining 50 foizini qoplash tartibi toʻgʻrisidagi nizomga

2-ILOVA

Issiqxona xoʻjaliklariga xorijdan malakali mutaxassislarni jalb qilish xarajatlarining 50 foizini qoplash uchun subsidiya ajratishga koʻmaklashuvchi tuman (Quvasoy shahar) ishchi guruhining

NAMUNAVIY TARKIBI

1. Tuman (Quvasoy shahar) hokimi, ishchi guruh rahbari

2. Tuman (Quvasoy shahar) hokimining qishloq va suv xoʻjaligi masalalari boʻyicha oʻrinbosari, ishchi guruh rahbarining oʻrinbosari

3. Tuman (Quvasoy shahar) qishloq xoʻjaligi boʻlimi boshligʻi

4. Tuman (Quvasoy shahar) iqtisodiyot va moliya boʻlimi boshligʻi

5. Tuman (Quvasoy shahar) soliq inspeksiyasi rahbari

6. Xizmat koʻrsatuvchi tijorat banklari rahbarlari

7. Tuman (Quvasoy shahar) statistika boʻlimi rahbari

8. Tuman (Quvasoy shahar) kambagʻallikni qisqartirish va bandlikka koʻmaklashish boʻlimi boshligʻi

9. Tuman (Quvasoy shahar) fermer, dehqon xoʻjaliklari va tomorqa yer egalari kengashi raisi

10. Agrosanoatni rivojlantirish agentligining tuman (Quvasoy shahar) loyiha ofisi rahbari

(10-band Oʻzbekiston Respublikasi Vazirlar Mahkamasining 2025-yil 23-apreldagi 255-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/255/0376-son)

(Qonunchilik maʼlumotlari milliy bazasi, 13.07.2024-y., 09/24/410/0504-son; 23.04.2025-y., 09/25/255/0376-son; 10.11.2025-y., 09/25/709/1027-son)