Oʻzbekiston Respublikasi Prezidentining
Farmoni
Maʼmuriy islohotlar doirasida transport sohasida davlat boshqaruvini samarali tashkil qilish chora-tadbirlari toʻgʻrisida
Oʻzbekiston Respublikasi Prezidentining 2023-yil 25-yanvardagi “Respublika ijro etuvchi hokimiyat organlari faoliyatini samarali yoʻlga qoʻyishga doir birinchi navbatdagi tashkiliy chora-tadbirlar toʻgʻrisida”gi PF-14-son Farmoni ijrosini taʼminlash maqsadida:
1. Quyidagilar:
Transport vazirligi faoliyatining ustuvor yoʻnalishlari 1-ilovaga muvofiq;
Transport vazirligi tizimidagi muassasalarni qayta tashkil qilish dasturi 2-ilovaga muvofiq;
Transport vazirligining tashkiliy tuzilmasi 3-ilovaga muvofiq;
Transport sohasini raqamlashtirishning ustuvor yoʻnalishlari 4-ilovaga muvofiq;
Transport sohasini tubdan isloh qilish boʻyicha “yoʻl xaritasi” 5-ilovaga muvofiq;
Transport vazirligining xususiy sektorga oʻtkaziladigan funksiyalari roʻyxati 6-ilovaga muvofiq tasdiqlansin.
2. Transport vazirligi tuzilmasida quyidagilar:
Transport vazirligi huzuridagi Temir yoʻllarda yuk va yoʻlovchilar tashish xavfsizligini nazorat qilish inspeksiyasi hamda Yoʻl-qurilish ishlari sifatini nazorat qilish inspeksiyasi negizida Transport vazirligi huzurida Transport nazorati inspeksiyasi tashkil etilsin hamda unga Transport vazirligining 269 ta shtat birligi oʻtkazilsin;
Transport vazirligi huzuridagi Avtomobil transporti xodimlarining malakasini oshirish va qayta tayyorlash instituti hamda Oʻzining temir yoʻllariga ega boʻlgan yuridik shaxslarning temir yoʻl transporti xodimlari malakasini oshirish va ularni qayta tayyorlash markazi negizida taʼlim muassasasi shaklida Transport vazirligi huzurida Transport sohasi kadrlarini qayta tayyorlash va malakasini oshirish instituti tashkil etilsin;
“Oʻzavtotranstexnika” ilmiy-ishlab chiqarish markazi” DUK “Transport ilmiy-tadqiqot markazi” MCHJ etib qayta tashkil etilsin;
Transport vazirligi huzurida xodimlarining umumiy cheklangan soni 36 shtat birligidan iborat boʻlgan davlat muassasasi shaklidagi yagona integrator “Raqamli transport” markazi tashkil etilsin.
Belgilansinki, “Raqamli transport” markazi Davlat budjeti va qonunchilik hujjatlari bilan taqiqlanmagan boshqa manbalar hisobidan moliyalashtiriladi. Bunda, 2024-yildan boshlab Oʻzbekiston Respublikasi Davlat budjetidan har yili 20 mlrd soʻm mablagʻ ajratiladi.
3. Belgilansinki, Transport vazirligi amaldagi vazifalari va funksiyalari bilan bir qatorda:
avtomobil yoʻllari va yoʻl xoʻjaligi masalalari boʻyicha normativ-huquqiy hujjatlar loyihalari, shuningdek, Xalqaro muhandislar-konsultantlar federatsiyasi (FIDIC) amaliyoti va hujjatlari asosida avtomobil yoʻllari va yoʻl xoʻjaligi sohasidagi texnik jihatdan tartibga solishga doir normativ hujjatlarni ishlab chiqadi;
avtomobil yoʻllari tarmogʻini rivojlantirish va takomillashtirish istiqbollarini belgilaydi, avtomobil yoʻllarini rivojlantirish davlat dasturlarini shakllantiradi;
yoʻl xoʻjaligi sohasida investitsiya va davlat-xususiy sheriklik loyihalarini amalga oshirish boʻyicha takliflar ishlab chiqadi;
yoʻl xoʻjaligi sohasida ishlab chiqiladigan normativ-huquqiy va texnik jihatdan tartibga solish sohasidagi normativ hujjatlar roʻyxatini tasdiqlaydi hamda ushbu hujjatlar loyihalarini Transport vazirligi huzuridagi ilmiy-texnik kengashda koʻrib chiqadi.
4. Belgilansinki:
a) Transport vazirligi huzuridagi Transport nazorati inspeksiyasi avtomobil, temir yoʻl, suv, elektr transporti, metropoliten va yoʻl xoʻjaligi sohalarida nazorat funksiyalarini amalga oshiruvchi respublika ijro etuvchi hokimiyat organi hisoblanadi;
b) Transport nazorati inspeksiyasiga quyidagi vazifalar yuklatiladi:
avtomobil, temir yoʻl, suv, elektr transporti va metropolitenda tashish xavfsizligini taʼminlash yuzasidan oʻz vakolati doirasida davlat nazoratini amalga oshirish;
avtomobil yoʻllari va sunʼiy inshootlarni qurish, rekonstruksiya qilish va taʼmirlashda shaharsozlik toʻgʻrisidagi qonunchilik hujjatlari hamda texnik jihatdan tartibga solish sohasidagi normativ hujjatlar talablariga rioya etilishi ustidan nazoratni amalga oshirish;
Oʻzbekiston Respublikasining xalqaro shartnomalarida nazarda tutilgan avtomobilda xalqaro tashishlarni amalga oshirish shartlariga rioya etilishini nazorat qilish;
yuk va yoʻlovchilarni tashishda haydovchilarning hamda lokomotiv brigadalari ishchilarining mehnat va dam olish rejimini nazorat qilish;
respublika hududida (Davlat chegarasi orqali oʻtkazish punktlari bundan mustasno) avtotransport vositalarining ruxsat etilgan vazn va gabarit parametrlariga rioya etilishini nazorat qilish;
temir yoʻl infratuzilmasi obyektlari va harakat tarkibini roʻyxatdan oʻtkazish orqali ularni hisobga olish va yagona reyestrni yuritish;
v) Transport nazorati inspeksiyasiga oʻz vazifalarini amalga oshirishi uchun quyidagi vakolatlar beriladi:
avtomobilda yuk va yoʻlovchi tashish, temir yoʻl, suv, elektr transporti, metropoliten hamda yoʻl xoʻjaligi sohasida maʼmuriy huquqbuzarliklar toʻgʻrisidagi ishlarni koʻrib chiqish va maʼmuriy jazo choralarini qoʻllash;
avtotransport vositasida yuk va yoʻlovchilar tashish qoidalarining buzilishi vizual kuzatuv yoki maxsus moslama yordamida aniqlanganda, avtotransport vositasini yuk va yoʻlovchi tashishni nazorat qilish boʻyicha statsionar va mobil postlarda tekshirish uchun toʻxtatish.
5. Quyidagi nazorat tadbirlarini Tadbirkorlik subyektlarining huquqlari va qonuniy manfaatlarini himoya qilish boʻyicha vakilning ruxsatisiz, uni xabardor qilmasdan, “xavfni tahlil etish” tizimini qoʻllamagan holda (moliyaviy-xoʻjalik faoliyatiga aralashmagan holda) amalga oshirishga ruxsat etilsin:
Transport vazirligi huzuridagi Fuqaro aviatsiyasi agentligi tomonidan fuqaro aviatsiyasi tashkiloti va korxonalarida parvozlar xavfsizligiga rioya etilishi yuzasidan Xalqaro fuqaro aviatsiyasi tashkilotining (IKAO) standartlarida belgilangan rejali va toʻsatdan tekshiruvlar oʻtkazish;
Transport nazorati inspeksiyasi tomonidan avtomobil transportida yuk va yoʻlovchilarni tashish qoidalariga rioya etilishini tashish jarayonida reydlar oʻtkazgan holda nazorat qilish.
Belgilansinki, Transport nazorati inspeksiyasi Tadbirkorlik subyektlarining huquqlari va qonuniy manfaatlarini himoya qilish boʻyicha vakilni xabardor qilib, “xavfni tahlil etish” tizimini qoʻllamagan holda temir yoʻl transportida harakat va tashishlar xavfsizligi, yuk va yoʻlovchilarni tashish qoidalari hamda yoʻl qurilishi obyektlarida qonunchilik hujjatlari talablariga rioya etilishi boʻyicha tekshiruvlarni oʻtkazadi.
6. Transport vazirligiga:
Oʻzbekiston Respublikasi bilan avtomobilda xalqaro tashishlar sohasida xalqaro shartnomalar mavjud boʻlmagan xorijiy davlatlarning vakolatli organlari bilan oʻzaro kelishilgan shartlarda yuklarni avtomobilda xalqaro tashishga ruxsatnomalar ayirboshlash;
xalqaro transport xizmatlari bozorida milliy manfaatlarni himoya qilgan holda Oʻzbekiston Respublikasi hududiga kirishda xorijiy davlatlarning tashuvchilariga yuklarni avtomobilda xalqaro tashishga ruxsatnomalarning milliy tashuvchilar ehtiyojidan ortiqchasini realizatsiya qilish huquqi berilsin.
7. Belgilansinki, Transport vazirligi huzuridagi Fuqaro aviatsiyasi agentligi amaldagi vazifalari va funksiyalari bilan bir qatorda:
aviatsiya maʼmuriyati vakolatlari doirasiga kiradigan fuqaro va eksperimental aviatsiya havo kemalari parvozlarining xavfsizligini taʼminlash boʻyicha Oʻzbekiston Respublikasining aviatsiya qoidalarini ishlab chiqadi va tasdiqlaydi;
Fuqaro aviatsiyasi xalqaro tashkiloti standartlarini Oʻzbekiston Respublikasi aviatsiya qoidalariga tatbiq etish boʻyicha qaror qabul qiladi;
Fuqaro aviatsiyasi xalqaro tashkiloti standartlari (SARPS/PANS/SUPPS) va Oʻzbekiston Respublikasi aviatsiya qoidalari amaliyoti oʻrtasidagi sezilarli farqlarni aniqlaydi va Oʻzbekiston Respublikasi Aeronavigatsiya maʼlumotlari toʻplamida eʼlon qilish tartibini ishlab chiqadi va amalga oshiradi.
Oldingi tahrirga qarang.
8. Milliy transport kommunikatsiyalari orqali xalqaro va mintaqaviy tranzitni rivojlantirish boʻyicha takliflarni ishlab chiqish hamda mamlakatning tranzit salohiyatidan samarali foydalanish maqsadida 7-ilovaga muvofiq tarkibda Oʻzbekiston Respublikasi tranzit salohiyatini rivojlantirish boʻyicha idoralararo kengash tashkil etilsin.
Oʻzbekiston Respublikasi tranzit salohiyatini rivojlantirish boʻyicha idoralararo kengashning asosiy vazifalari etib quyidagilar belgilansin:
milliy transport kommunikatsiyalari orqali tranzit tashuvlarini koʻpaytirish hamda yoʻlboʻyi infratuzilmasini xalqaro standartlar asosida rivojlantirish boʻyicha takliflar ishlab chiqish;
respublika hududi boʻylab oʻtuvchi tranzit yoʻlaklarining raqobatbardoshligini oshirish yuzasidan takliflar tayyorlash;
tranzit bilan bogʻliq normativ-huquqiy hujjatlarni xalqaro normalar va talablarga muvofiqlashtirish, tranzit erkinligi tamoyili asosida tranzit tartibotlarini soddalashtirish boʻyicha vakolatli davlat organlari va tashkilotlariga koʻrsatma berish;
Jahon bojxona tashkiloti tavsiyalariga muvofiq tranzit tartib-taomillarini takomillashtirish, tranzit yoʻriqnomalarini tasdiqlash va raqamli texnologiyalaridan foydalangan holda davlat organlarining tranzit yoʻnalishidagi faoliyatini muvofiqlashtirish;
Jahon savdo tashkilotiga aʼzo davlatlarning tranzit tashuvlari bilan bogʻliq boʻlgan murojaatlari, takliflari va soʻrovnomalarini koʻrib chiqish va ushbu tashkilotga aʼzo davlatlarni Oʻzbekiston Respublikasida amalda boʻlgan tranzit tartibotlari toʻgʻrisida xabardor etib borish.
(8-band Oʻzbekiston Respublikasi Prezidentining 2026-yil 19-yanvardagi PF-5-sonli Farmoni tahririda — Qonunchilik maʼlumotlari milliy bazasi, 19.01.2026-y., 06/26/5/0051-son)
9. Tashqi ishlar vazirligi Transport vazirligi bilan birgalikda ikki oy muddatda Oʻzbekiston Respublikasining Xitoy Xalq Respublikasi, Qozogʻiston Respublikasi, Ozarbayjon Respublikasi, Eron Islom Respublikasi va Latviya Respublikasidagi elchixonalarida transport masalalari boʻyicha maslahatchi lavozimini joriy etish choralarini koʻrsin.
10. Vazirlik va idoralar 2023-yil yakuniga qadar axborot xavfsizligi talablariga rioya etgan holda davlat xizmatlarini koʻrsatish uchun zarur boʻlgan transport sohasiga oid elektron maʼlumotlar almashinuvini tashkil etish maqsadida 8-ilovaga muvofiq idoraviy axborot tizimlari va maʼlumotlar bazasini Transport vazirligining axborot tizimlari bilan integratsiya qilsin.
11. Transport vazirligi manfaatdor vazirlik va idoralar bilan birgalikda 2023-yil 1-sentabrga qadar jamoat transportida tashuvlar sifatini yaxshilash va xizmatlar jozibadorligini oshirish hamda sogʻlom raqobat muhitini shakllantirish maqsadida tashuvchilar reytingini joriy etish yuzasidan qaror loyihasini Vazirlar Mahkamasiga kiritsin.
12. Davlat aktivlarini boshqarish agentligi Transport vazirligi va Toshkent shahri hokimligi bilan birgalikda bir oy muddatda Transport nazorati inspeksiyasini maʼmuriy islohotlar doirasida boʻshayotgan binolarga begʻaraz joylashtirishni taʼminlasin.
13. Oʻzbekiston Respublikasi Prezidentining ayrim hujjatlariga 9-ilovaga muvofiq oʻzgartirishlar kiritilsin.
14. Oʻzbekiston Respublikasi Prezidentining 2020-yil 6-maydagi “Oʻzbekiston Respublikasi Transport vazirligining markaziy apparati tuzilmasiga oʻzgartirish kiritish toʻgʻrisida”gi PQ-4705-son qarori oʻz kuchini yoʻqotgan deb hisoblansin.
15. Transport vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
16. Mazkur Farmonning ijrosini samarali tashkil qilishga masʼul va shaxsiy javobgar etib transport vaziri I.R. Maxkamov belgilansin.
Farmon ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2023-yil 14-iyun,
PF-94-son
Oʻzbekiston Respublikasi Prezidentining 2023-yil 14-iyundagi PF-94-son Farmoniga
1-ILOVA
Transport vazirligi faoliyatining ustuvor yoʻnalishlari
Quyidagilar Transport vazirligi faoliyatining ustuvor yoʻnalishlari hisoblanadi:
a) integratsiyalashgan yagona transport tizimi shakllantirilishini inobatga olgan holda iqtisodiyot va aholining transport xizmatlariga boʻlgan ehtiyojlarini maksimal darajada qondirishga yoʻnaltirilgan yagona davlat yoʻl-transport siyosatini ishlab chiqish va amalga oshirish;
b) transport va yoʻl xoʻjaligi sohasida normativ-huquqiy hujjatlar va texnik jihatdan tartibga solish sohasidagi normativ hujjatlarning ishlab chiqilishi va tasdiqlanishini tashkil etish;
v) jamoat transporti tizimini kompleks rivojlantirish, transport xizmatlari sifati, ommabopligi va xavfsizligini taʼminlash, aholining jamoat transportidan foydalanish darajasini oshirish choralarini koʻrish;
g) transport va logistika xizmatlari bozorini rivojlantirishni ragʻbatlantirish, ularning barcha toifadagi isteʼmolchilar uchun ommabopligini taʼminlash, shuningdek sohaga investitsiyalarni jalb etishga yoʻnaltirilgan muvozanatlashgan tarif siyosatini olib borish;
d) transport xizmatlari bozorida sogʻlom raqobat muhitini shakllantirish, mulkchilik shaklidan qatʼi nazar transport korxonalari faoliyat yuritishida teng sharoitlarni yaratish choralarini koʻrish;
e) respublikaning tranzit siyosatini ishlab chiqish va amalga oshirish, milliy transport tizimining jahon transport tizimiga integratsiyasini chuqurlashtirish, logistika tizimini takomillashtirish;
j) transport va yoʻl xoʻjaligi sohasida davlat-xususiy sheriklikni rivojlantirish va mamlakat investitsiyaviy jozibadorligini oshirish, shuningdek, davlat dasturlarini shakllantirgan holda avtomobil yoʻllari tarmogʻini rivojlantirish va takomillashtirish istiqbollarini belgilash;
z) foydalanuvchilar manfaatlarini hisobga olgan holda samarali transport infratuzilmasini rivojlantirishning kompleks yechimlarini ishlab chiqish;
i) transport va yoʻl xoʻjaligi sohasida davlat nazoratini amalga oshirish, fuqaro aviatsiyasi va eksperimental havo kemalaridagi halokatlar va baxtsiz hodisalar, shuningdek, metropoliten, temir yoʻl va suv transportidagi avariyalar hamda halokatlar boʻyicha tekshiruvlarni tashkil etish va amalga oshirish;
k) transport tizimini raqamlashtirish hamda sohaga ilgʻor axborot texnologiyalarini joriy etish hisobiga transportning barcha turlarini integratsiya qilish hamda foydalanuvchilar uchun interaktiv xizmatlar koʻlamini kengaytirish;
l) transport va yoʻl xoʻjaligi sohasidagi xalqaro va hududiy hamkorlikni rivojlantirish hisobiga xalqaro transport xizmatlari bozorida Oʻzbekiston Respublikasining milliy manfaatlarini taʼminlash;
m) joriy va istiqbolli ehtiyojlarni inobatga olgan holda taʼlimning zamonaviy innovatsion usul va standartlarini tizimli ravishda joriy etish, transport va yoʻl xoʻjaligi sohasida kadrlar tayyorlash, qayta tayyorlash va ularning malakasini oshirish tizimini takomillashtirish.
Oʻzbekiston Respublikasi Prezidentining 2023-yil 14-iyundagi PF-94-son Farmoniga
2-ILOVA
Transport vazirligi tizimidagi muassasalarni qayta tashkil etish
DASTURI

T/r

Qayta tashkil etilayotgan tashkilotning amaldagi toʻliq (rasmiy) nomi

Tashkil etilayotgan tashkilotning taklif qilinayotgan toʻliq (rasmiy) nomi

Tashkil etilayotgan tashkilotning faoliyatiga oid qoidalar va izohlar

1.

Transport vazirligi huzuridagi Temir yoʻllarda yuk va yoʻlovchilar tashish xavfsizligini nazorat qilish inspeksiyasi.

Negizida Transport vazirligi huzuridagi Transport nazorati inspeksiyasi tashkil etilmoqda.

Transport vazirligi huzuridagi Transport nazorati inspeksiyasi:

a) avtomobil, temir yoʻl, suv, elektr transporti, metropoliten hamda yoʻl xoʻjaligi sohalarida nazorat funksiyalarini amalga oshiruvchi respublika ijro etuvchi hokimiyat organi hisoblanadi;

b) avtomobil, temir yoʻl, suv, elektr transporti, metropolitenda tashishlar xavfsizligini taʼminlash hamda yoʻl xoʻjaligi boʻyicha qonunchilik hujjatlariga rioya etish yuzasidan oʻz vakolati doirasida davlat nazoratini amalga oshiradi.

Transport vazirligi huzuridagi Transport nazorati inspeksiyasi faoliyatini tashkil etish masalalari Vazirlar Mahkamasi qarori bilan belgilanadi.

2.

Transport vazirligi huzuridagi Yoʻl-qurilish ishlari sifatini nazorat qilish inspeksiyasi.

3.

Transport vazirligi huzuridagi Avtomobil transporti xodimlarining malakasini oshirish va qayta tayyorlash instituti.

Negizida Transport vazirligi huzurida taʼlim muassasasi shaklida Transport sohasi kadrlarini qayta tayyorlash va malakasini oshirish instituti tashkil etilmoqda.

Transport sohasi kadrlarini qayta tayyorlash va malakasini oshirish instituti avtomobil, temir yoʻl, havo, daryo va elektr transporti, metropoliten, shuningdek, yoʻl xoʻjaligi sohalari kadrlarini qayta tayyorlash va ularning malakasini oshirish boʻyicha taʼlim muassasasi hisoblanadi.

Transport sohasi kadrlarini qayta tayyorlash va malakasini oshirish instituti faoliyatini tashkil etish masalalari Vazirlar Mahkamasi qarori bilan belgilanadi.

4.

Transport vazirligi huzuridagi Oʻzining temir yoʻllariga ega boʻlgan yuridik shaxslarning temir yoʻl transporti xodimlari malakasini oshirish va ularni qayta tayyorlash markazi

5.

Transport vazirligi huzuridagi “Oʻzavtotranstexnika” ilmiy-ishlab chiqarish markazi” DUK

Transport vazirligi huzuridagi “Transport ilmiy-tadqiqot markazi” MCHJ etib qayta tashkil etilmoqda.

Transport vazirligi huzuridagi “Transport ilmiy-tadqiqot markazi” MCHJ transport sohasida texnik jihatdan tartibga solish sohasidagi normativ hujjatlarni ishlab chiqish, ilmiy tadqiqotlar, tajriba-sinov, loyihalash va ekspertiza ishlarini oʻtkazish, standartlash, sertifikatlashtirish va transport tizimini modellashtirish ishlarini amalga oshiradi va boshqa tijorat xizmatlarini koʻrsatadi.

Transport vazirligi huzuridagi “Transport ilmiy-tadqiqot markazi” MCHJ faoliyati oʻrnatilgan tartibda tasdiqlanadigan Ustav bilan belgilanadi.

Oʻzbekiston Respublikasi Prezidentining 2023-yil 14-iyundagi PF-94-son Farmoniga
3-ILOVA
Transport vazirligining tashkiliy tuzilmasi

Transport vazirligi

“Transport va logistikani rivojlantirish muammolarini oʻrganish markazi” DM

Qoraqalpogʻiston Respublikasi Transport vazirligi va hududiy transport boshqarmalari

“Oʻzaeronavigatsiya” markazi DUK

Avtomobil yoʻllari qoʻmitasi

Transformatsiya ofisi*

Fuqaro aviatsiyasi agentligi

Toshkent davlat transport universiteti

Transport situatsion markazi*

Transport sohasi kadrlarini qayta tayyorlash va malakasini oshirish instituti

Transport ilmiy-tadqiqot markazi

Media markaz*

Transport nazorati inspeksiyasi

“Raqamli transport” markazi DM

“Oʻzavtovokzalservis”

Professional taʼlim muassasalari

(3 ta texnikum)

“Oʻzavtotransservis”

“Toshkent metropoliteni” DUK

* Zaruratga koʻra transport vaziri buyrugʻi bilan yuridik shaxs tashkil etmagan holda tashkil qilinadi va tugatiladi hamda Transport vazirligi huzuridagi Transport va logistikani rivojlantirish jamgʻarmasi tomonidan moliyalashtiriladi.
Oʻzbekiston Respublikasi Prezidentining 2023-yil 14-iyundagi PF-94-son Farmoniga
4-ILOVA
Transport sohasini raqamlashtirishning ustuvor yoʻnalishlari
Quyidagilar transport sohasini raqamlashtirishning ustuvor yoʻnalishlari hisoblanadi:
a) raqamli texnologiyalarni qoʻllagan holda respublika ichida yoʻlovchi va yuk oqimini oʻrganish orqali transportning barcha turlarini oʻz ichiga oluvchi Respublika transport modelini ishlab chiqish;
b) transportning barcha turlari harakatini hamda yoʻlovchi va yuk tashish qoidalariga rioya etilishini onlayn kuzatish tizimini yaratish;
v) transport va yoʻl xoʻjaligi sohasida maʼlumotlarni yigʻish, saqlash va tahlil qilish imkoniyatini beruvchi “Big Data” texnologiyasini joriy etish hamda uni transport xizmatlari bilan bogʻliq vazirlik va idoralar bilan integratsiya qilish;
g) xalqaro yuk tashuvlarida innovatsion texnologiyalarni (e-Permit, e-CMR) joriy etish hamda xorijiy/koʻp tomonlama ruxsatnomalarni milliy tashuvchilar orasida taqsimlash va foydalanish jarayonlarini toʻliq avtomatlashtirish;
d) transport sohasiga axborot-kommunikatsiya texnologiyalarini joriy etishda davlat-xususiy sheriklik asosidagi loyihalarini amalga oshirish;
e) transport xizmatlari foydalanuvchilariga qulayliklar yaratish va shaffoflikni taʼminlash maqsadida, transport sohasida koʻrsatiladigan elektron xizmatlar ulushini oshirish;
j) transport tizimi korxonalari faoliyatiga axborot texnologiyalarini keng joriy etish ishlarini muvofiqlashtirish hamda transport sohasidagi raqamlashtirish loyihalarini ishlab chiqish, monitoringini amalga oshirish va idoralararo muvofiqlashtirish;
z) transport xizmati foydalanuvchilari bilan qayta aloqa oʻrnatish, transport sohasidagi islohotlarni keng jamoatchilikning taklif va eʼtirozlari asosida amalga oshirish maqsadida “Mening transportim” mobil ilovasini ishga tushirish.
Oʻzbekiston Respublikasi Prezidentining 2023-yil 14-iyundagi PF-94-son Farmoniga
5-ILOVA
Transport sohasini tubdan isloh qilish boʻyicha
yoʻl xaritasi

T/r

Chora-tadbirlar nomi

Amalga oshirish shakli

Ijro muddati

Masʼul ijrochilar

I. Transport sohasida tizim tashkilotlari va soha korxonalarini transformatsiya qilish hamda davlat boshqaruvini samarali tashkil etish

1.

Transport sohasi kadrlarini qayta tayyorlash va malakasini oshirish instituti faoliyatini tashkil qilish.

Normativ-huquqiy hujjat loyihasi

2023-yil iyul

Transport vazirligi,

manfaatdor vazirlik va idoralar

2.

Transport nazorati inspeksiyasi faoliyatining huquqiy mexanizmlarini belgilash.

Bunda:

Transport vazirligining Temir yoʻl transportida avariya va halokatlarni tekshirish boshqarmasi, Avtomobil tashuvlarini nazorat qilish boshqarmasi, Daryo transporti boʻlimi hamda hududiy boshqarmalarning avtomobilda tashishlar xavfsizligini taʼminlash boʻlinmalarining vazifa va funksiyalari hamda vakolatlari Transport nazorati inspeksiyasiga oʻtkazilishi;

Temir yoʻllarda yuk va yoʻlovchilar tashish xavfsizligini nazorat qilish inspeksiyasi hamda Yoʻl-qurilish ishlari sifatini nazorat qilish inspeksiyasining vazifa va funksiyalari hamda vakolatlari Transport nazorati inspeksiyasiga oʻtkazilishi;

ilgʻor xorijiy tajriba asosida Transport nazorati inspeksiyasi faoliyatini tashkil etish nazarda tutiladi.

Normativ-huquqiy hujjat loyihasi

2023-yil iyul

Transport vazirligi,

manfaatdor vazirlik va idoralar

3.

Temir yoʻl transporti sohasini rivojlantirish va isloh qilish. Bunda:

temir yoʻl transporti xizmatlarini koʻrsatishda xususiy sektorga teng huquqli sharoitlar yaratish orqali raqobat muhitini rivojlantirish;

tarif siyosatini takomillashtirish va uni shaffofligini taʼminlash;

biznes-jarayonlarni raqamlashtirish va avtomatlashtirish;

sohadagi normativ-huquqiy bazani takomillashtirish nazarda tutiladi.

Normativ-huquqiy hujjat loyihasi

2023-yil avgust

Transport vazirligi,

Strategik islohotlar agentligi,

Iqtisodiyot va moliya vazirligi,

manfaatdor vazirlik va idoralar

4.

Quyidagilarni nazarda tutuvchi Fuqaro aviatsiyasi sohasida davlat siyosatini yuritish konsepsiyasi loyihasini ishlab chiqish va Vazirlar Mahkamasiga kiritish:

aviatashuvlar bozorida raqobat muhitini rivojlantirish maqsadida barcha rezident aviakompaniyalar uchun aviaqatnovlarni amalga oshirish va infratuzilmadan foydalanishda teng sharoitlar yaratish;

rezident aviakompaniyalarga xalqaro reyslarni amalga oshirishda mahalliy yoʻnalishlarda ham parvozlarni bajarish amaliyotini joriy etish;

mahalliy aviaqatnovlar uchun subsidiya ajratishning mavjud tizimini xususiy rezident aviakompaniyalarga ham keng tatbiq etish orqali yoʻlovchilarga arzon narxlarda aviatashuv xizmatlarini koʻrsatish va ichki aviatashuvlar sonini koʻpaytirishni ragʻbatlantirish;

parvozlar geografiyasini kengaytirish, respublikamizga xorijiy sayyohlar oqimini oshirish va aviatsiya bozorini liberallashtirish maqsadida, “ochiq osmon” rejimi va havo erkinligini qoʻllash uchun xalqaro meʼyorlarga muvofiq aviatsiya hukumatlari oʻrtasida kelishuvga erishish hamda rezident aviakompaniyalar manfaatlarini inobatga olgan holda teng huquqli imkoniyatlar yaratish;

respublika aeroportlarida yoʻlovchilar ehtiyojlaridan kelib chiqqan holda noaviatsion xizmat turlarini kengaytirish uchun zarur sharoitlar yaratish.

Normativ-huquqiy hujjat loyihasi

2023-yil avgust

Transport vazirligi,

manfaatdor vazirlik va idoralar

5.

Oʻzbekiston Respublikasi orqali tranzit yuk tashish hajmini oshirish boʻyicha Milliy tranzit strategiyasini ishlab chiqish.

Normativ-huquqiy hujjat loyihasi

2023-yil dekabr

Transport vazirligi,

Investitsiyalar, sanoat va savdo vazirligi,

Iqtisodiyot va moliya vazirligi,

manfaatdor vazirlik va idoralar

6.

Transport nazorati inspeksiyasining vakolati doirasida transportda yuk va yoʻlovchi tashishni nazorat qilishni kuchaytirish choralarini koʻrish hamda maʼmuriy ishlarni koʻrib chiqish vakolatini Transport nazorati inspeksiyasiga oʻtkazish yuzasidan qonun hujjatlarga oʻzgartirish va qoʻshimchalar kiritish boʻyicha takliflar ishlab chiqish.

Oʻzbekiston Respublikasi qonuni loyihasi

2023-yil oktabr

Transport vazirligi,

Adliya vazirligi,

manfaatdor vazirlik va idoralar

7.

Oʻzbekiston Respublikasi Soliq kodeksiga quyidagilarni nazarda tutuvchi oʻzgartirishlar kiritish boʻyicha qonun loyihasini ishlab chiqish:

vagon va konteynerlarni xarid qilishga yoʻnaltirilgan toʻgʻridan-toʻgʻri investitsiyalar uchun Soliq kodeksida nazarda tutilgan toʻgʻridan-toʻgʻri xususiy chet el investitsiyalari ishtirokidagi yuridik shaxslar uchun qoʻllaniladigan imtiyozlarni tatbiq etish;

xususiy operatorlarni vagonlardan ijara asosida foydalanish boʻyicha tuzilgan shartnomalar doirasida qoʻshilgan qiymat soligʻi toʻlashdan ozod qilish.

Oʻzbekiston Respublikasi qonuni loyihasi

2023-yil oktabr

Transport vazirligi,

Iqtisodiyot va moliya vazirligi,

Adliya vazirligi,

manfaatdor vazirlik va idoralar

8.

Xalqaro moliya institutlari kredit mablagʻlari hisobidan amalga oshirilayotgan loyihalar doirasida Avtomobil yoʻllari qoʻmitasi xodimlari va Transport nazorati inspeksiyasining inspektorlarini Xalqaro muhandislar-konsultantlar federatsiyasi (FIDIC) talablari asosida malakasini oshirish.

Amaliy chora-tadbirlar

Doimiy

Transport vazirligi,

Investitsiyalar, sanoat va savdo vazirligi,

Iqtisodiyot va moliya vazirligi

II. Transport sohasida axborot texnologiyalarini keng joriy etish va raqamlashtirish darajasini oshirish

9.

Yirik xalqaro konsalting kompaniyalarni jalb qilgan holda, transport sohasida koʻrsatilayotgan barcha xizmatlarni auditdan oʻtkazish va raqamlashtirilmagan biznes jarayonlarni aniqlab, xalqaro tajriba asosida transport sohasini raqamlashtirish yagona konsepsiyasini ishlab chiqish.

Amaliy chora-tadbirlar

2024-yil iyul

Transport vazirligi,

Raqamli texnologiyalar vazirligi,

“Oʻzbekiston temir yoʻllari” AJ,

“Uzbekistan airports” AJ,

“Uzbekistan airways” AJ,

manfaatdor vazirlik va idoralar

10.

Mobil aloqa operatorlari bilan birgalikda aholining mobilligini oshirish hamda transport turlarini kengaytirish maqsadida hududlar boʻyicha aholi oqimi toʻgʻrisidagi maʼlumotlarning (shaxsga doir maʼlumotlarni inobatga olmagan holda) idoralararo elektron almashinuvini yoʻlga qoʻyish.

Amaliy chora-tadbirlar

2024-yil mart

Transport vazirligi,

Raqamli texnologiyalar vazirligi,

manfaatdor vazirlik va idoralar

11.

Geoaxborot tizimi (GAT) texnologiyalari asosida transport va yoʻl xoʻjaligi sohasidagi infratuzilma obyektlarining elektron ID-reyestrini yuritish hamda geoaxborot maʼlumotlar bazasini bosqichma-bosqich ishlab chiqish.

Amaliy chora-tadbirlar

2024-yil dekabr

Transport vazirligi,

Kadastr agentligi,

Avtomobil yoʻllari qoʻmitasi

12.

Transport turlari harakati va avtomobil yoʻllarini onlayn kuzatish imkoniga ega transport situatsion markazini tashkil etish.

Amaliy chora-tadbirlar

2024-yil dekabr

Transport vazirligi,

Ichki ishlar vazirligi,

Bojxona qoʻmitasi,

Avtomobil yoʻllari qoʻmitasi

13.

Transport xizmati isteʼmolchilari bilan qayta aloqa oʻrnatish, transport sohasidagi islohotlarni keng jamoatchilik taklif va eʼtirozlari asosida amalga oshirish maqsadida “Mening transportim” mobil ilovasini ishga tushirish.

Amaliy chora-tadbirlar

2023-yil dekabr

Transport vazirligi,

Raqamli texnologiyalar vazirligi,

manfaatdor vazirlik va idoralar

14.

Temir yoʻl infratuzilmasi, harakat tarkibi va temir yoʻl obyektlarini elektron roʻyxatdan oʻtkazish va yagona reyestr tizimini bosqichma-bosqich ishlab chiqish.

Bunda:

birinchi bosqichda umumiy foydalanishdagi temir yoʻllar;

ikkinchi bosqichda vazirlik va idoralarga qarashli temir yoʻllar;

uchinchi bosqichda oʻzining temir yoʻllari va harakat tarkibiga ega yuridik shaxslarni mazkur tizimga kiritish.

Amaliy chora-tadbirlar

2025-yil dekabr

Transport vazirligi,

Raqamli texnologiyalar vazirligi,

manfaatdor vazirlik va idoralar

15.

Qirgʻiziston, Tojikiston, Ozarbayjon va Qozogʻiston davlatlari bilan avtomobilda yuk va yoʻlovchilarni xalqaro tashishga ruxsatnomalarni ayirboshlashda “E-Permit” axborot tizimini joriy etish.

Amaliy chora-tadbirlar

2024-yil dekabr

Transport vazirligi,

Bojxona qoʻmitasi,

Raqamli texnologiyalar vazirligi

16.

“Xavfli yuk” axborot tizimini ishlab chiqish.

Amaliy chora-tadbirlar

2024-yil may

Transport vazirligi,

Bojxona qoʻmitasi,

Ichki ishlar vazirligi,

Davlat xavfsizlik xizmati,

Raqamli texnologiyalar vazirligi

17.

Respublikada yuk tashuvlari va logistika xizmatlarini raqamlashtirish orqali taʼminot zanjiri ishtirokchilari uchun “E-logistika” axborot tizimini ishlab chiqish.

Amaliy chora-tadbirlar

2024-yil avgust

Transport vazirligi,

Bojxona qoʻmitasi,

Ichki ishlar vazirligi

18.

Shaharlararo-viloyatlararo avtobuslarga GPS qurilmalarini oʻrnatish orqali onlayn rejimda harakat jadvallarini kuzatish tizimini joriy etish

Amaliy chora-tadbirlar

2025-yil iyun

Transport vazirligi,

manfaatdor vazirlik va idoralar

19.

Parvoz jadvallarini idoralararo elektron kelishish tizimini ishlab chiqish.

Bunda, parvoz jadvallarini idoralararo kelishishni raqamlashtirish orqali amaldagi ortiqcha byurokratiyadan voz kechiladi.

Amaliy chora-tadbirlar

2023-yil oktabr

Transport vazirligi,

“Uzbekistan airports” AJ

20.

Yoʻlovchi va yuklar toʻgʻrisidagi dastlabki maʼlumotlar tizimini (API/PNR) yagona darcha tamoyili asosida huquqni muhofaza qiluvchi organlarning maʼlumotlar bazasi bilan integratsiyalashtirgan holda xavflarni baholash orqali davlat nazoratini tashkil etish platformasini joriy etish. Bunda:

loyihani davlat-xususiy sheriklik shartlari asosida amalga oshirish imkoniyatini koʻrib chiqish;

Raqamli transport markazini davlat sherigi etib belgilash;

API/PNR maʼlumotlarni qabul qilishda tashuvchilarga har bir yoʻlovchi va yuk uchun yigʻim belgilash koʻzda tutish.

Normativ-huquqiy hujjat loyihasi

2025-yil fevral

Transport vazirligi,

Davlat xavfsizlik xizmati,

Bojxona qoʻmitasi,

Ichki ishlar vazirligi

21.

Temir yoʻl transporti sohasini 2023 — 2025-yillarda raqamlashtirish boʻyicha kompleks chora-tadbirlar dasturini tasdiqlash.

Kompleks chora-tadbirlar dasturi

2023-yil avgust

Transport vazirligi,

“Oʻzbekiston temir yoʻllari” AJ,

manfaatdor vazirlik va idoralar

22.

Temir yoʻl transporti xizmatlarini koʻrsatish jarayonida “Yagona darcha” tizimini yanada takomillashtirish.

Bunda, tizimning tahliliy maʼlumotlarini shakllantirish modulini yaratish.

Qoʻshni davlatlar temir yoʻllari axborot tizimlari bilan elektron tashish hujjatlari almashinuvini yoʻlga qoʻyish.

Amaliy chora-tadbirlar

2023-yil dekabr

“Oʻzbekiston temir yoʻllari” AJ,

Transport vazirligi,

manfaatdor vazirlik va idoralar

23.

Temir yoʻl transportida elektron chiptalar sotish tizimini takomillashtirish.

Bunda:

imtiyozli yoʻlovchilar (talabalar va pensionerlar)ga elektron chiptalar sotish imkoniyatini yaratish;

“Elektron hukumat” tizimining idoralararo integratsiyalashuv platformasi bilan elektron chiptalar sotish tizimini integratsiya qilish.

Amaliy chora-tadbirlar

2023-yil sentabr

“Oʻzbekiston temir yoʻllari” AJ,

Transport vazirligi,

manfaatdor vazirlik va idoralar

24.

Temir yoʻl deposi faoliyatini toʻliq raqamlashtirishni nazarda tutuvchi “Aqlli depo” axborot tizimini ishlab chiqish va amaliyotga joriy etish.

Amaliy chora-tadbirlar

2023-yil dekabr

“Oʻzbekiston temir yoʻllari” AJ,

Transport vazirligi,

manfaatdor vazirlik va idoralar

25.

“Temir yoʻl navigatsiyasi” yoʻlovchi poyezdlar harakatlanishining onlayn monitoringi axborot tizimini yaratish.

Amaliy chora-tadbirlar

2023-yil noyabr

“Oʻzbekiston temir yoʻllari” AJ,

Transport vazirligi,

manfaatdor vazirlik va idoralar

26.

Temir yoʻl transportida sunʼiy intellektdan foydalangan holda meʼyordan ortiq yuk ortilgan yuk vagonlarini aniqlash axborot tizimini yaratish.

Amaliy chora-tadbirlar

2023-yil avgust

“Oʻzbekiston temir yoʻllari” AJ,

Transport vazirligi,

manfaatdor vazirlik va idoralar

27.

Poyezdlarning bajarilgan harakati grafigini tuzish axborot tizimini joriy qilish.

Amaliy chora-tadbirlar

2023-yil sentabr

“Oʻzbekiston temir yoʻllari” AJ,

Transport vazirligi,

manfaatdor vazirlik va idoralar

Oʻzbekiston Respublikasi Prezidentining 2023-yil 14-iyundagi PF-94-son Farmoniga
6-ILOVA
Transport vazirligining xususiy sektorga oʻtkaziladigan funksiyalari
ROʻYXATI

T/r

Funksiya

Vakolatli organ

Funksiyani xususiy sektorga oʻtkazish muddati

1.

Daryo transportida koʻrsatiladigan davlat xizmatlari:

Transport vazirligi

2024-yil 1-chorak

1.1.

kemalarni dastlabki texnik koʻrikdan oʻtkazish

1.2.

kemalarni har yillik texnik koʻrikdan oʻtkazish

1.3.

kemalarni navbatdagi va navbatdan tashqari texnik koʻrikdan oʻtkazish.

2.

Poyezdlarning xavfsiz harakatlanishini taʼminlash boʻyicha texnik tekshirishni tashkil etish va oʻtkazish hamda ularga belgilangan tartibda muvofiqlik sertifikatini berish.

Transport vazirligi huzuridagi Transport nazorati inspeksiyasi

2023-yil 3-chorak

3.

Yoʻl-qurilish materiallari, buyumlari va konstruksiyalarini qonunchilik hujjatlariga muvofiq sertifikatlashtirish ishlarini amalga oshirish.

Mavjud avtomobil yoʻllar va sunʼiy inshootlarning texnik holatini tekshirish, ularnidiagnostika qilish hamda foydalanish koʻrsatkichlarini baholash.

Shartnoma asosida yoʻl qurilishi obyektlarida laboratoriya sinovlarini oʻtkazish.

2024-yil 1-chorak

Oldingi tahrirga qarang.
Oʻzbekiston Respublikasi Prezidentining 2023-yil 14-iyundagi PF-94-son Farmoniga
7-ILOVA
Oʻzbekiston Respublikasi tranzit salohiyatini rivojlantirish boʻyicha idoralararo kengash
TARKIBI

I.R. Maxkamov

—

transport vaziri, Idoralararo kengash raisi

A.Yu. Mavlonov

—

Bojxona qoʻmitasi raisi, Idoralararo kengash raisining oʻrinbosari

A.Ya. Xaydarov

—

iqtisodiyot va moliya vaziri oʻrinbosari

X.F. Teshabayev

—

investitsiyalar, sanoat va savdo vaziri oʻrinbosari

M.A. Madraximov

—

tashqi ishlar vaziri oʻrinbosari

A.T. Rahmatullayev

—

ichki ishlar vazirining birinchi oʻrinbosari

S.E. Xusanov

—

Davlat xavfsizlik xizmati raisi oʻrinbosari — Chegara qoʻshinlari qoʻmondoni

Lavozimi boʻyicha

—

Veterinariya va chorvachilikni rivojlantirish qoʻmitasi raisi

I.K. Ergashev

—

Oʻsimliklar karantini va himoyasi agentligi direktori

B.Q. Yusupaliyev

—

Sanitariya-epidemiologik osoyishtalik va jamoat salomatligi qoʻmitasi raisi

Z.Gʻ. Narzullayev

—

“Oʻzbekiston temir yoʻllari” AJ boshqaruvi raisi

J.O. Umarxodjayev

—

“Uzbekistan Airports” AJ boshqaruvi raisi

J.Yu. Tursunov

—

Transport vazirligi huzuridagi Avtomobil yoʻllari qoʻmitasi raisi

M.A. Omarov

—

transport vazirining birinchi oʻrinbosari, Idoralararo kengash kotibi

Izoh.
Idoralararo kengash kotibiyati funksiyalari Oʻzbekiston Respublikasi Transport vazirligiga yuklanadi.
Idoralararo kengash aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan yoki tegishli funksiyalarni bajarish zimmasiga yuklangan shaxslar kiritiladi.
(7-ilova Oʻzbekiston Respublikasi Prezidentining 2026-yil 19-yanvardagi PF-5-sonli Farmoni tahririda — Qonunchilik maʼlumotlari milliy bazasi, 19.01.2026-y., 06/26/5/0051-son)
Oʻzbekiston Respublikasi Prezidentining 2023-yil 14-iyundagi PF-94-son Farmoniga
8-ILOVA
Transport vazirligining axborot tizimlari bilan integratsiya qilinadigan transport sohasiga oid idoraviy axborot tizimlari va maʼlumotlar bazasida mavjud hamda davlat xizmatlarini koʻrsatish uchun zarur boʻlgan axborot va maʼlumotlar
ROʻYXATI
Oldingi tahrirga qarang.

T/r

Maʼlumotni taqdim qiluvchi idoralar

Maʼlumot nomi

1.

Ichki ishlar vazirligi

Davlat yoʻl harakati xavfsizligi xizmati tomonidan roʻyxatga olingan avtotransport vositalari toʻgʻrisidagi maʼlumotlar;

texnik koʻrikdan oʻtgan avtotransport vositalari toʻgʻrisidagi maʼlumotlar;

“E-maʼmuriy ish” platformasidagi avtomobilda yuk va yoʻlovchilar tashishda aniqlangan huquqbuzarliklar va ularga koʻrilgan choralar toʻgʻrisidagi maʼlumotlar;

avtotransport vositalarini boshqarish huquqiga ega boʻlgan shaxslar toʻgʻrisidagi maʼlumotlar;

Respublikada sodir boʻlgan yoʻl-transport hodisalari va qoidabuzarliklar haqidagi maʼlumotlar.

2.

Iqtisodiyot va moliya vazirligi huzuridagi Soliq qoʻmitasi

Transport xizmatlari bilan shugʻullanayotgan jismoniy va yuridik shaxslar toʻgʻrisida hamda ular tomonidan soliq va boshqa yigʻimlarning toʻlanishi toʻgʻrisida, shuningdek, avtotransport xizmatlari eksporti toʻgʻrisida maʼlumotlar;

transport vositalarining ijara shartnomalari toʻgʻrisida maʼlumotlar;

agregatorlar tizimini “Uztrans” tizimiga integratsiya qilgan holda yoʻlovchilarni yengil avtotransport vositalarida tashish faoliyatida oʻzini oʻzi band qilgan shaxslar toʻgʻrisidagi maʼlumotlar (roʻyxat koʻrinishida);

milliy tashuvchilarning elektron hisobvaraq-fakturalariga muvofiq transport xizmatlaridan olingan daromadlar toʻgʻrisidagi maʼlumotlar.

3.

Kambagʻallikni qisqartirish va bandlik vazirligi

Transport xizmatlarini koʻrsatuvchi korxonalar haydovchilarining mehnat staji, amaldagi ish joyi toʻgʻrisidagi maʼlumotlar.

4.

Iqtisodiyot va moliya vazirligi huzuridagi Bojxona qoʻmitasi

Barcha transport turlarida yuk va yoʻlovchilarni xalqaro tashish toʻgʻrisidagi maʼlumotlar.

5.

Iqtisodiyot va moliya vazirligi huzuridagi Kadastr agentligi

Transport infratuzilmalari va obyektlarini oʻz ichiga oluvchi Yagona geoaxborot maʼlumotlari.

6.

Oʻzbekiston Respublikasi Milliy statistika qoʻmitasi

Barcha transport vositalarida yuk va yoʻlovchi tashish hajmlari toʻgʻrisidagi maʼlumotlar;

sohada koʻrsatilgan xizmatlarning hajmi, yalpi qoʻshilgan qiymati va sohada koʻrsatiladigan xizmatlarga oid boshqa maʼlumotlar;

transport (tashish va saqlash) sohasi va sohaga oid fuqarolik obyektlarini qurishda band aholi soni hamda oʻzlashtirilgan investitsiyalar hajmi;

transport sohasidagi isteʼmol narxlari indeksi va shunga oid boshqa maʼlumotlar.

7.

Sogʻliqni saqlash vazirligi

Tibbiy koʻrikdan oʻtgan haydovchilar toʻgʻrisidagi maʼlumotlar.

8.

Qurilish va uy-joy kommunal xoʻjaligi vazirligi

“Shaffof qurilish” milliy axborot tizimining yoʻllarni loyihalash va qurishga oid maʼlumotlari.

9.

Transport vazirligi huzuridagi Avtomobil yoʻllari qoʻmitasi

“Shaffof yoʼl” tizimi maʼlumotlari.

10.

Iqtisodiyot va moliya vazirligi

Sugʻurtalangan avtotransport vositalari toʻgʻrisidagi maʼlumotlar;

transport korxonalarida faoliyat yuritayotgan xodimlar va haydovchilarning sugʻurta maʼlumotlari.

11.

“Oʻzbekiston temir yoʻllari” AJ

Yuk va yoʻlovchi tashishda mavjud tizimlar maʼlumotlari.

12.

“Uzbekistan Airways” AJ

Yuk va yoʻlovchi tashishda mavjud tizimlar maʼlumotlari.

13.

“Toshshahartransxizmat” AJ

Barcha mavjud tizimlar maʼlumotlari.

14.

“Uzbekistan Airports” AJ

Aeroportlarda yuk va yoʻlovchi tashishdagi maʼlumotlar;

uchish, qoʻnish va yoʻlovchilar toʻgʻrisidagi maʼlumotlar.

(8-ilova Oʻzbekiston Respublikasi Prezidentining 2025-yil 21-noyabrdagi PF-223-sonli Farmoni tahririda — Qonunchilik maʼlumotlari milliy bazasi, 22.11.2025-y., 06/25/223/1076-son)
Oʻzbekiston Respublikasi Prezidentining 2023-yil 14-iyundagi PF-94-son Farmoniga
9-ILOVA
Oʻzbekiston Respublikasi Prezidentining ayrim hujjatlariga kiritilayotgan oʻzgartirishlar
1. Oʻzbekiston Respublikasi Prezidentining 2018-yil 27-iyuldagi “Tadbirkorlik subyektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari toʻgʻrisida”gi PF-5490-son Farmoniga 2-ilovaning 24-pozitsiyasi chiqarib tashlansin.
2. Oʻzbekiston Respublikasi Prezidentining 2018-yil 27-noyabrdagi “Oʻzbekiston Respublikasining fuqaro aviatsiyasini tubdan takomillashtirish chora-tadbirlari toʻgʻrisida”gi PF-5584-son Farmonining 14-bandi “a” kichik bandida:
ikkinchi xatboshi quyidagi tahrirda bayon etilsin:
“qonunchilik hujjatlariga muvofiq davlat xizmatlari koʻrsatishdan tushadigan yigʻimlar summasi”;
toʻrtinchi xatboshidagi “5” raqami “20” raqami bilan almashtirilsin.
3. Oʻzbekiston Respublikasi Prezidentining 2023-yil 25-yanvardagi “Respublika ijro etuvchi hokimiyat organlari faoliyatini samarali yoʻlga qoʻyishga doir birinchi navbatdagi tashkiliy chora-tadbirlar toʻgʻrisida”gi PF-14-son Farmonida:
a) 1-ilovaning 7-boʻlimi quyidagi tahrirda bayon etilsin:

“

7. Transport vazirligi

Transport vazirligi

380

380

shu jumladan vazir oʻrinbosarlari soni

3

3

1.

Avtomobil yoʻllari qoʻmitasi

334

334

shu jumladan rais oʻrinbosarlari soni

2

2

2.

Fuqaro aviatsiyasi agentligi

61

61

shu jumladan direktor oʻrinbosarlari soni

1

1

3.

Transport nazorati inspeksiyasi

348

348

shu jumladan boshliq oʻrinbosarlari soni

3

3

”;

b) 2-ilovada:
7.3-kichik bandi quyidagi tahrirda bayon etilsin:
“Transport nazorati inspeksiyasi”;
7.4-kichik bandi chiqarib tashlansin;
v) 2a-ilovada:
7.3-pozitsiyasi quyidagi tahrirda bayon etilsin:

“

7.3

Oʻzbekiston Respublikasi Transport vazirligi huzuridagi Transport nazorati inspeksiyasi

Transport nazorati inspeksiyasi

Inspeksiya “Uztransnadzor”

”;

7.4-pozitsiyasi chiqarib tashlansin.
4. Oʻzbekiston Respublikasi Prezidentining 2019-yil 1-fevraldagi “Oʻzbekiston Respublikasi Transport vazirligi faoliyatini tashkil etish toʻgʻrisida”gi PQ-4143-son qarorida:
a) 1-band oʻz kuchini yoʻqotgan deb hisoblansin;
b) 3-bandning sakkizinchi xatboshisi quyidagi tahrirda bayon etilsin:
“viloyatlar va Toshkent shahar transport boshqarmalari boshliqlari va ularning oʻrinbosarlari — Oʻzbekiston Respublikasi transport vaziri tomonidan viloyatlar va Toshkent shahar hokimlari bilan kelishilgan holda lavozimga tayinlanadi va lavozimdan ozod etiladi”;
v) 1 — 5-ilovalar oʻz kuchini yoʻqotgan deb hisoblansin.
5. Oʻzbekiston Respublikasi Prezidentining 2019-yil 9-dekabrdagi “Yoʻl sohasini boshqarish tizimini yanada takomillashtirishga oid chora-tadbirlar toʻgʻrisida”gi PQ-4545-son qarorida:
a) 2-bandida:
uchinchi xatboshi chiqarib tashlansin;
toʻrtinchi xatboshidagi “Qoʻmita” soʻzi “Transport vazirligi” soʻzlari bilan almashtirilsin.
toʻrtinchi — yettinchi xatboshilari tegishincha uchinchi — oltinchi xatboshilar deb hisoblansin.
b) 3-bandining ikkinchi xatboshisi quyidagi tahrirda bayon etilsin:
“respublika hududida (Davlat chegarasi orqali oʻtkazish punktlari bundan mustasno) avtomobil yoʻllari boʻylab ogʻir vaznli va/yoki yirik gabaritli avtotransport vositalarining harakatlanishi uchun yigʻimlar undirish va ruxsatnomalar berish Qoʻmita tomonidan amalga oshiriladi;”.
6. Oʻzbekiston Respublikasi Prezidentining 2019-yil 4-apreldagi “Toshkent shahridagi metropoliten yer usti liniyasi uchun harakatlanuvchi tarkib vagonlarini xarid qilish” loyihasini amalga oshirish chora-tadbirlari toʻgʻrisida”gi F-5463-son farmoyishining 3-bandi uchinchi xatboshisidagi “LIBORning 6 oylik stavkasiga yiliga 1,5 foiz qoʻshilgan stavkaga teng boʻlgan, shu jumladan bankning qayta moliyalashtirish marjasi yiliga 0,5 foiz boʻlgan” soʻzlari “yiliga 1 (bir) foizga teng boʻlgan” soʻzlari bilan almashtirilsin.
(Qonunchilik maʼlumotlari milliy bazasi, 14.06.2023-y., 06/23/94/0362-son; 22.11.2025-y., 06/25/223/1076-son; 19.01.2026-y., 06/26/5/0051-son)