|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
MAʼMURIY-BOShQARUV XODIMLARI SONINI QISQARTIRISh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Boshqaruv apparati tuzilmasini takomillashtirish va uning faoliyati samaradorligini oshirish, maʼmuriy-boshqaruv xodimlari sonini maqbullashtirish maqsadida Vazirlar Mahkamasi qaror qiladi:
1. Oʻzbekiston Respublikasi Vazirlar Mahkamasi komplekslarining, Moliya vazirligining 2003-yil 1-yanvardan boshlab:
vazirliklar, idoralar, davlat qoʻmitalarining hamda ular tasarrufidagi davlat budjeti mablagʻlari hisobiga moliyalashtiriladigan muassasalar va tashkilotlar maʼmuriy-boshqaruv apparati xodimlari sonini 1-ilovaga* muvofiq;
respublika vazirliklari, davlat qoʻmitalari, idoralari va xoʻjalik birlashmalari rahbarlari oʻrinbosarlari lavozimlarini 2-ilovaga* muvofiq;
uyushmalar, konsernlar, korporatsiyalar va boshqa xoʻjalik yurituvchi subyektlarning xoʻjalik hisobidagi faoliyati hisobiga mablagʻ bilan taʼminlanadigan maʼmuriy-boshqaruv apparatini 3-ilovaga* muvofiq qisqartirish toʻgʻrisidagi taklifi qabul qilinsin.
* Ilovalar rus tilidagi matnda berilgan
2. Hududlarning agrosanoat komplekslari kotibiyatlari tuzilmasini tartibga solish maqsadida Qoraqalpogʻiston Respublikasi Vazirlar Kengashi hamda Sirdaryo va Xorazm viloyatlari hokimliklarining koʻrsatib oʻtilgan kotibiyatlarida xodimlar soni 2 nafarga, Buxoro, Jizzax, Qashqadaryo¸ va Navoiy viloyatlari hokimliklarida esa 1 nafarga qisqartirilsin.
3. Vazirliklar, idoralar, davlat qoʻmitalari, uyushmalar, konsernlar, korporatsiyalar, kompaniyalar va boshqa xoʻjalik birlashmalari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:
boshqaruv apparati xodimlari sonini 2003-yil 1-yanvardan boshlab qisqartirish boʻyicha belgilangan topshiriqlarning bajarilishini taʼminlasinlar;
Oʻzbekiston Respublikasi Mehnat va aholini ijtimoiy muhofaza qilish vazirligi hamda uning joylardagi organlari bilan birgalikda boʻshab qoladigan xodimlarni ishga joylashtirish masalalarini qonun hujjatlarida belgilangan tartibda hal etsinlar.
4. Oʻzbekiston Respublikasi Moliya vazirligi:
2003-yil budjetini shakllantirishda budjet tashkilotlarida boshqaruv apparati xodimlari sonining qisqartirilishi munosabati bilan boʻshaydigan mablagʻlarning moddiy-texnikaviy bazani mustahkamlashga va yuqori malakali xodimlarni moddiy ragʻbatlantirishga yoʻnaltirilishini nazarda tutsin;
budjet muassasalari va tashkilotlarining shtat jadvallarini hamda xarajatlar smetalarini roʻyxatdan oʻtkazishni boshqaruv apparati xodimlarining ushbu qarorda belgilangan cheklangan soniga qatʼiy muvofiq holda amalga oshirsin.
5. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2003-yil 7-yanvar,
5-son
