364-сон 06.07.2022. Sport hakamlariga malaka toifasini berish boʻyicha davlat xizmatlari koʻrsatishning maʼmuriy reglamentini tasdiqlash toʻgʻrisida

Hujjat kuchini yo‘qotgan " " 01.01.2026

Oʻzbekiston Respublikasi Vazirlar Mahkamasining

qarori

Sport hakamlariga malaka toifasini berish boʻyicha davlat xizmatlari koʻrsatishning maʼmuriy reglamentini tasdiqlash toʻgʻrisida

LexUZ sharhi

Mazkur qaror Oʻzbekistan Respublikasi Vazirlar Mahkamasining 2025-yil 7-avgustdagi 500-sonli “Jismoniy tarbiya-sport tashkilotlarining trener-oʻqituvchilari va yoʻriqchi-uslubchilari hamda sport hakamlariga malaka toifalarini berish tizimini takomillashtirish chora-tadbirlari toʻgʻrisida”gi qaroriga asosan 2026-yil 1-yanvardan oʻz kuchini yoʻqotadi.

Oʻzbekiston Respublikasi Prezidentining “Davlat xizmatlari koʻrsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari toʻgʻrisida” 2021-yil 24-iyuldagi PF-6269-son Farmoniga muvofiq sport hakamlariga malaka toifasini berish boʻyicha davlat xizmatlari koʻrsatish tizimini yanada takomillashtirish maqsadida Vazirlar Mahkamasi qaror qiladi:

1. Sport hakamlariga malaka toifasini berish boʻyicha davlat xizmatlari koʻrsatishning maʼmuriy reglamenti ilovaga muvofiq tasdiqlansin.

2. Belgilansinki, ushbu qaror bilan tasdiqlangan maʼmuriy reglamentga muvofiq koʻrsatiladigan davlat xizmatidan foydalanish uchun jismoniy shaxslar faqat davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali murojaat qiladilar.

3. Oʻzbekiston Respublikasi Sportni rivojlantirish vazirligi Adliya vazirligi bilan birgalikda bir oy muddatda davlat xizmatlari markazlarining xodimlari ishtirokida ushbu qaror bilan tasdiqlangan maʼmuriy reglamentni amalda qoʻllashning samaradorligi va natijadorligi darajasini oshirishga yoʻnaltirilgan oʻquv seminarlari tashkil etilishi va oʻtkazilishini taʼminlasin.

Oldingi tahrirga qarang.

4. Oʻzbekiston Respublikasi Raqamli texnologiyalari vazirligi huzuridagi “Raqamli hukumat loyihalarini boshqarish markazi” davlat muassasasi, Sportni rivojlantirish vazirligi Adliya vazirligi bilan birgalikda:

(4-bandning birinchi xatboshisi Oʻzbekiston Respublikasi Vazirlar Mahkamasining 2023-yil 28-dekabrdagi 688-sonli qarori tahririda — Qonunchilik maʼlumotlari milliy bazasi, 29.12.2023-y., 09/23/688/0996-son)

sport hakamlariga malaka toifasini berish boʻyicha davlat xizmati YIDXP orqali amalga oshirilishini taʼminlasin;

YIDXPda davlat xizmatlari koʻrsatilishining har bir bosqichida murojaatlarning koʻrib chiqilishini kuzatib borish tartibini joriy etsin;

davlat xizmatlarini koʻrsatish uchun yigʻimlarning davlat xizmatlari koʻrsatilganligi uchun toʻlangan davlat bojlari va yigʻimlar summasi hisobini yurituvchi Yagona billing tizimi orqali elektron tarzda toʻlanishini taʼminlasin.

5. Adliya vazirligi:

davlat organlari va boshqa tashkilotlar tomonidan davlat xizmatlari koʻrsatilishining belgilangan tartibi bajarilishi yuzasidan ular faoliyati boʻyicha, shu jumladan, YIDXP orqali doimiy nazorat oʻrnatsin;

ushbu qaror bilan tasdiqlangan maʼmuriy reglamentning talablarini buzganlik uchun davlat organlari va boshqa tashkilotlar mansabdor shaxslariga nisbatan belgilangan tartibda maʼmuriy jazolarni qoʻllasin.

6. Sportni rivojlantirish vazirligi boshqa manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

7. Mazkur qarorning bajarilishini nazorat qilish Oʻzbekiston Respublikasi sportni rivojlantirish vaziri A.I. Ikramov hamda Oʻzbekiston Respublikasi adliya vaziri R.Q. Davletov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2022-yil 6-iyul,

364-son

Vazirlar Mahkamasining 2022-yil 6-iyuldagi 364-son qaroriga
ILOVA

Sport hakamlariga malaka toifasini berish boʻyicha davlat xizmatlari koʻrsatishning maʼmuriy reglamenti

1-bob. Umumiy qoidalar

1. Mazkur Reglament sport hakamlariga (keyingi oʻrinlarda — ariza beruvchilar) malaka toifasini berish boʻyicha davlat xizmati (keyingi oʻrinlarda — davlat xizmati) koʻrsatish tartibini belgilaydi.

2. Ushbu Reglamentda quyidagi asosiy tushunchalar qoʻllaniladi:

vakolatli organlar — Oʻzbekiston Respublikasi Sportni rivojlantirish vazirligi, Qoraqalpogʻiston Respublikasi Sportni rivojlantirish vazirligi, viloyatlar va Toshkent shahar sportni rivojlantirish bosh boshqarmalari;

sport hakami — sport turi qoidalariga hamda sport musobaqasi toʻgʻrisidagi nizomga (reglamentga) rioya etilishini taʼminlash uchun jismoniy tarbiya yoki sport tadbiri tashkilotchisi tomonidan vakolat berilgan, maxsus tayyorgarlikdan oʻtgan va tegishli malaka toifasini olgan jismoniy shaxs;

malaka komissiyasi — sport hakamlariga tegishli malaka toifasini berish toʻgʻrisida qaror qabul qilish yoki asoslangan rad javobini berish uchun vakolatli organ tomonidan tashkil etiladigan komissiya.

3. Davlat xizmati Davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali vakolatli organ tomonidan koʻrsatiladi.

4. Sport hakamlariga quyidagi malaka toifalari beriladi:

xalqaro toifali sport hakami;

milliy toifali sport hakami;

birinchi toifali sport hakami;

ikkinchi toifali sport hakami;

uchinchi toifali sport hakami;

sport boʻyicha hakam.

5. “Xalqaro toifali sport hakami” malaka toifasi sport turi boʻyicha tegishli xalqaro sport tashkiloti tomonidan beriladi.

6. “Milliy toifali sport hakami” malaka toifasini olish uchun belgilangan muddat va talablardan oldin “Xalqaro toifali sport hakami” malaka toifasini qoʻlga kiritgan sport hakamining toifasi “Milliy toifali sport hakami” malaka toifasidagi hakam hisoblanadi.

7. “Milliy toifali sport hakami” malaka toifasi Oʻzbekiston Respublikasi Sportni rivojlantirish vazirligi tomonidan beriladi.

8. “Birinchi toifali sport hakami”, “Ikkinchi toifali sport hakami”, “Uchinchi toifali sport hakami”, “Sport boʻyicha hakam” malaka toifalari Qoraqalpogʻiston Respublikasi Sportni rivojlantirish vazirligi, viloyatlar va Toshkent shahar sportni rivojlantirish bosh boshqarmalari tomonidan beriladi.

9. Davlat xizmatlari markazlari va vakolatli organ oʻrtasidagi axborot almashinuvi elektron raqamli imzoni (keyingi oʻrinlarda — ERI) majburiy tartibda qoʻllash orqali faqat idoralararo oʻzaro elektron bogʻlanish yordamida amalga oshiriladi.

10. Davlat xizmati koʻrsatish ushbu Reglamentga 1-ilovaga muvofiq sxema boʻyicha amalga oshiriladi.

2-bob. Davlat xizmati koʻrsatish tartibi

1-§. Murojaatlarni shakllantirish va yuborish

11. Ariza beruvchi davlat xizmatidan foydalanish uchun Davlat xizmatlari markaziga oʻzi kelib murojaat qiladi yoki davlat xizmatlaridan elektron tarzda foydalanish uchun YIDXPda roʻyxatdan oʻtadi.

12. Ariza beruvchi oʻzi kelib murojaat qilgan taqdirda Davlat xizmatlari markazi xodimi ariza beruvchi nomidan, YIDXP orqali murojaat qilgan taqdirda esa, mustaqil ravishda ushbu Reglamentga 2-ilovaga muvofiq shakldagi tegishli soʻrovnomani elektron ravishda toʻldiradi.

Soʻrovnomaga ariza beruvchi faoliyat yuritayotgan tashkilot tomonidan berilgan mazkur Reglamentga 3-ilovaga muvofiq shakldagi malaka toifasini berish toʻgʻrisida taqdimnoma ilova qilinadi.

Ariza beruvchilardan ushbu bandda koʻrsatilmagan maʼlumotlarni hamda boshqa hujjatlarni talab qilish qatʼiyan taqiqlanadi.

13. Soʻrovnomaga ariza beruvchi toʻgʻrisida maʼlumotlar kiritilib, unga ilova qilinadigan hujjat rasmiylashtirilgandan soʻng ariza beruvchi uni identifikatsiya qilishning zamonaviy vositalari bilan (elektron imzo, daktiloskopiya, yagona identifikatsiya tizimidagi login va parol, mobil-ID va boshqalar) tasdiqlaydi.

Ariza beruvchi tomonidan soʻrovnomani ERI bilan tasdiqlash talab etilmaydi.

14. Ariza Davlat xizmatlari markazlari orqali taqdim etilganda murojaatchidan bazaviy hisoblash miqdorining bir baravari miqdorida yigʻim undiriladi.

Ariza YIDXP orqali taqdim etilganda, murojaatchidan Davlat xizmatlari markazlari orqali murojaat etganda toʻlanadigan summaning 90 foizi miqdorida yigʻim toʻlanadi.

15. Toʻlovlar summasi quyidagi tartibda taqsimlanadi: ariza koʻrib chiqish uchun toʻlov summasining:

a) Davlat xizmatlari markazlariga oʻzi kelib murojaat qilganda:

20 foizi — Oʻzbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamgʻarmasining shaxsiy hisobvaragʻiga oʻtkaziladi;

qolgan mablagʻlar:

“Birinchi toifali sport hakami”, “Ikkinchi toifali sport hakami”, “Uchinchi toifali sport hakami”, “Sport boʻyicha hakam” malaka toifalari uchun — toʻliq ravishda Qoraqalpogʻiston Respublikasi Sportni rivojlantirish vazirligi, viloyatlar va Toshkent shahar sportni rivojlantirish bosh boshqarmalarining maxsus hisobvaragʻiga oʻtkaziladi;

“Milliy toifali sport hakami” malaka toifasi uchun — toʻliq ravishda Oʻzbekiston Respublikasi sportni rivojlantirish vazirligining maxsus hisobvaragʻiga oʻtkaziladi;

b) YIDXP orqali murojaat qilinganda:

10 foizi — Oʻzbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamgʻarmasining shaxsiy hisobvaragʻiga oʻtkaziladi;

11,75 foizi (shundan 0,5 foizi — yagona billing tizimi orqali davlat xizmati koʻrsatilganda) Axborot-kommunikatsiya texnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maxsus hisobvaragʻiga oʻtkaziladi;

qolgan mablagʻlar:

“Milliy toifali sport hakami” malaka toifasi uchun — toʻliq ravishda Oʻzbekiston Respublikasi sportni rivojlantirish vazirligining maxsus hisobvaragʻiga oʻtkaziladi.

16. Ariza beruvchilar davlat xizmatlaridan foydalanishdan uni koʻrsatishning har qanday bosqichida bosh tortish huquqiga ega. Ariza beruvchi davlat xizmatlaridan foydalanishdan bosh tortganda, uning soʻrovnomasi koʻrilmasdan qoldiriladi.

Bunda hujjatlar koʻrib chiqilganligi uchun toʻlangan yigʻim summasi qaytarilmaydi.

Ariza beruvchining nomzodini vakolatli organning malaka toifasini berish uchun toʻlangan yigʻim summasi ariza beruvchining yozma murojaatiga asosan toʻligʻicha vakolatli organ tomonidan ariza beruvchiga qaytariladi.

Bundan ariza beruvchi sport hakamlariga tegishli malaka toifasini berish toʻgʻrisida qaror qabul qilish yoki asoslangan rad javobini berish boʻyicha malaka komissiyasidan (keyingi oʻrinlarda — Malaka komissiyasi) muvaffaqiyatli oʻta olmagan holatlar mustasno.

17. Ariza beruvchi Davlat xizmatlari markaziga kelib murojaat qilganda Davlat xizmatlari markazi 10 daqiqa mobaynida arizani qabul qiladi, ariza raqami va sanasini ariza beruvchiga yuboradi yoki davlat xizmati koʻrsatishni rad etadi, shuningdek ariza qabul qilinganda uning soʻrovnomasi Markaz xodimi tomonidan toʻldirilib, ariza beruvchi tomonidan tasdiqlangandan soʻng barcha hujjatlar 10 daqiqa mobaynida vakolatli organga elektron shaklda yuboriladi.

18. Davlat xizmati koʻrsatishni rad etish uchun quyidagilar asos boʻladi:

ariza beruvchi tomonidan soʻrovnomada haqiqiy boʻlmagan, soxta va notoʻgʻri maʼlumotlar koʻrsatilishi;

davlat xizmatlari koʻrsatish uchun yigʻimni toʻlamaslik (bundan murojaat qilingan vaqtda maʼlumotlar qayta toʻgʻrilangan holatlar mustasno);

sport hakami malaka toifalarini olish uchun belgilangan muddatdan oldin soʻrovnoma taqdim etilishi;

mazkur Reglamentga 4-ilovaga muvofiq sport hakamlari malaka toifasini olish uchun lozim boʻlgan talablarni bajarmasdan soʻrovnoma berilishi.

Davlat xizmatlari koʻrsatishni boshqa asoslar boʻyicha rad etish taqiqlanadi.

19. Ariza beruvchi YIDXP orqali murojaat qilganda soʻrovnoma avtomatik tarzda vakolatli organga yuboriladi.

2-§. Malaka toifalarini berish tartibi

20. Malaka toifasi “Sport boʻyicha hakam” malaka toifasidan boshlab beriladi.

21. “Sport boʻyicha hakam” malaka toifasiga ega boʻlgan shaxsga navbatdagi malaka toifasi beriladi. Bunda “Sport boʻyicha hakam” malaka toifasiga ega boʻlmagan shaxsga “Uchinchi toifali sport hakami” malaka toifasini, “Uchinchi toifali sport hakami” malaka toifasiga ega boʻlmagan shaxsga “Ikkinchi toifali sport hakami” malaka toifasini, “Ikkinchi toifali sport hakami” malaka toifasiga ega boʻlmagan shaxsga “Birinchi toifali sport hakami” malaka toifasini, “Birinchi toifali sport hakami” malaka toifasiga ega boʻlmagan shaxsga “Milliy toifali sport hakami” malaka toifasini berish taqiqlanadi.

22. “Sport boʻyicha hakam” malaka toifasi maxsus tayyorgarlikdan oʻtgan va Oʻzbekiston Respublikasi hududida oʻtkazilgan sport musobaqalarida hakamlik qilgan Oʻzbekiston Respublikasi fuqarolariga beriladi.

23. “Uchinchi toifali sport hakami” malaka toifasi “Sport boʻyicha hakam” malaka toifasiga ega boʻlgan, Oʻzbekiston Respublikasi hududida oʻtkazilgan sport musobaqalarida hakamlik qilgan Oʻzbekiston Respublikasi fuqarolariga beriladi. Bunda “Sport boʻyicha hakam” malaka toifasi berilganiga kamida 1 yil oʻtgan boʻlishi lozim.

24. “Ikkinchi toifali sport hakami” malaka toifasi “Uchinchi toifali sport hakami” malaka toifasiga ega boʻlgan, Oʻzbekiston Respublikasi hududida oʻtkazilgan sport musobaqalarida hakamlik qilgan Oʻzbekiston Respublikasi fuqarolariga beriladi. Bunda “Uchinchi toifali sport hakami” malaka toifasi berilganiga kamida 2 yil oʻtgan boʻlishi lozim.

25. “Birinchi toifali sport hakami” malaka toifasi “Ikkinchi toifali sport hakami” malaka toifasiga ega boʻlgan, Oʻzbekiston Respublikasi hududida oʻtkazilgan sport musobaqalarida, shu jumladan, Oʻzbekiston Respublikasi chempionati hamda kubok maqomiga ega boʻlgan sport musobaqalarida hakamlik qilgan Oʻzbekiston Respublikasi fuqarolariga beriladi. Bunda, “Ikkinchi toifali sport hakami” malaka toifasi berilganiga kamida 2 yil oʻtgan boʻlishi lozim.

26. “Milliy toifali sport hakami” malaka toifasi “Birinchi toifali sport hakami” malaka toifasiga ega boʻlgan, Oʻzbekiston Respublikasi hududida oʻtkazilgan sport musobaqalarida, shu jumladan, Oʻzbekiston Respublikasi chempionati hamda kubok maqomiga ega boʻlgan sport musobaqalarida hakamlik qilgan Oʻzbekiston Respublikasi fuqarolariga beriladi. Bunda “Birinchi toifali sport hakami” malaka toifasi berilganiga kamida 2 yil oʻtgan boʻlishi lozim.

27. Tegishli malaka toifasini olish uchun mazkur Reglamentga 4-ilovaga muvofiq sport hakamlari malaka toifasini olish uchun lozim boʻlgan talablar bajarilishi zarur.

28. Vakolatli organning masʼul xodimi soʻrovnoma va faoliyat yuritayotgan tashkilot tomonidan malaka toifasini berish toʻgʻrisidagi taqdimnoma kelib tushgan kuni tegishli malaka toifasini berish toʻgʻrisidagi qaror qabul qilish yoki asoslangan rad javobini berish uchun malaka komissiyasiga kiritadi.

Malaka komissiyasi 1 oyda bir marta chaqiriladi.

29. Vakolatli organ ikki ish kuni ichida taqdim etilgan hujjatlarni koʻrib chiqish natijalari boʻyicha malaka toifasini berish toʻgʻrisida qaror qabul qilish yoki asoslangan rad javobini berish uchun malaka komissiyasiga kiritadi.

Malaka komissiyasi kotibi malaka toifasini berish toʻgʻrisida qaror qabul qilish yoki asoslangan rad javobi berilgan kunda malaka komissiyasining qarori loyihasini bayonnoma koʻrinishida tayyorlaydi.

Malaka komissiyasi Davlat xizmatlari markazlari orqali yoki YAIDXTT orqali ariza beruvchi tomonidan yuborilgan hujjatlarni uch ish kuni ichida koʻrib chiqadi, tekshiradi hamda sport hakamlariga tegishli malaka toifasini berish toʻgʻrisida qaror qabul qiladi yoxud asoslangan rad javobini beradi.

30. Malaka komissiyasining navbatdan tashqari yigʻilishlari taqdim etilgan arizadan kelib chiqib, uning raisi tomonidan chaqiriladi. Malaka komissiyasining navbatdan tashqari yigʻilishi bir ish kuni muddatida chaqiriladi, yigʻilish bayonnoma bilan rasmiylashtiriladi va rais hamda yigʻilishda ishtirok etgan aʼzolar tomonidan imzolanadi.

31. Malaka komissiyasi qabul qilingan malaka toifasini berish toʻgʻrisidagi qaror asosida mazkur Reglamentga 5-ilovaga muvofiq sport hakamlari malaka toifasi toʻgʻrisidagi guvohnoma yoki asoslangan rad javobini berish toʻgʻrisidagi maʼlumotni QR-kod (matrik shtrixli kod) qoʻyilgan holda rasmiylashtiradi hamda uni oʻz ERIsi bilan tasdiqlagan holda bir ish kuni mobaynida Davlat xizmatlari markaziga (oʻzi kelgan holda murojaat qilinganda) yoki ariza beruvchiga (elektron tarzda murojaat qilinganda) YIDXP orqali elektron tarzda yuboradi.

Ariza beruvchi rad javobini olgandan keyin qayta murojaat qilganda, hujjat tekinga navbatdagi malaka komissiyasi yigʻilishida koʻrib chiqiladi, bunda yangi asoslar boʻyicha arizani rad etish taqiqlanadi.

32. Davlat xizmatlari markaziga elektron tarzda malaka toifasini berish toʻgʻrisidagi guvohnoma yoki asoslantirilgan rad javobi toʻgʻrisidagi maʼlumot tushgandan soʻng Davlat xizmatlari markazi oʻn daqiqa mobaynida uni ariza beruvchining elektron manziliga (mavjud boʻlsa) yuboradi va ariza beruvchini bu haqda axborot-kommunikatsiya tizimi (telefon raqami) orqali xabardor qiladi. Davlat xizmatlari markazi ariza beruvchi oʻzi kelib murojaat qilgan taqdirda, ariza beruvchining soʻroviga asosan elektron yoki qogʻoz shaklida ariza beruvchiga taqdim etadi.

3-§. Malaka toifalarini berish boʻyicha malaka komissiyasi

33. Sport hakamlariga malaka toifasini berish boʻyicha Oʻzbekiston Respublikasi Sportni rivojlantirish vazirligi huzurida aʼzolari bir yil muddatga belgilanadigan malaka komissiyasi tashkil etiladi.

Malaka komissiyasi yetti kishidan kam boʻlmagan toq sondan iborat tarkibda barcha aʼzolarning teng huquqliligi asosida tashkil etiladi.

34. Oʻzbekiston Respublikasi Sportni rivojlantirish vazirining oʻrinbosari malaka komissiyasining, Qoraqalpogʻiston Respublikasi Sportni rivojlantirish vazirining, viloyatlar va Toshkent shahar sportni rivojlantirish bosh boshqarmalari boshliqlarining oʻrinbosari — malaka komissiyasining raisi hisoblanadi.

Oʻzbekiston Respublikasi Sportni rivojlantirish vazirligi, Qoraqalpogʻiston Respublikasi Sportni rivojlantirish vazirligi, viloyatlar va Toshkent shahar sportni rivojlantirish bosh boshqarmalari, sport federatsiyalari (uyushmalari) (kelishuv asosida), sport maktablarining rahbarlari hamda vakillari malaka komissiyasiga aʼzo sifatida kiritiladi.

35. Malaka komissiyasi uning aʼzolarining toʻrtdan uch qismi qatnashgan taqdirda vakolatli hisoblanadi.

Malaka komissiyasi aʼzolariga quyidagi talablar qoʻyiladi:

oliy maʼlumotga ega boʻlish;

jismoniy tarbiya va sport sohasida kamida 5 yillik ish tajribasiga ega boʻlish;

jismoniy tarbiya va sport sohasidagi normativ-huquqiy hujjatlar mazmunidan xabardor boʻlish.

36. Malaka komissiyasi raisi va aʼzolari quyidagi hollarda komissiya tarkibidan muddatidan oldin chiqarilishi mumkin:

oʻz arizasiga koʻra;

u bilan tuzilgan mehnat shartnomasi bekor qilingan taqdirda;

zimmasiga yuklangan vazifalarni bajarishda qoidabuzarlikka yoʻl qoʻyganligi aniqlanganda;

vafot etgan taqdirda.

37. Malaka komissiyasi qarorlari ochiq ovoz berish yoʻli bilan qabul qilinadi. Malaka komissiyasi qarori yigʻilishda ishtirok etgan aʼzolarning koʻpchiligi ovoz bergan taqdirda qabul qilingan hisoblanadi. Ovozlar teng boʻlgan taqdirda, malaka komissiyasi raisining ovozi hal qiluvchi ovoz hisoblanadi. Malaka komissiyasi aʼzosi boʻlgan mutaxassisning hujjatlari komissiyada koʻrilganda komissiya aʼzosi boʻlgan mutaxassisning ovozi hisobga olinmaydi.

38. Malaka komissiyasi qarori bayonnoma bilan rasmiylashtiriladi va rais hamda yigʻilishda ishtirok etgan aʼzolar tomonidan imzolanadi.

3-bob. Yakunlovchi qoidalar

39. Davlat xizmatlari markazlari va vakolatli organ oʻz faoliyatini amalga oshirishi natijasida olingan maʼlumotlarning sir saqlanishini taʼminlaydi.

40. Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari va Davlat xizmatlari markazlari ushbu Reglament talablari ijrosi boʻyicha davlat organlari va boshqa tashkilotlarning faoliyati ustidan doimiy nazorat qiladilar va monitoring olib boradilar.

41. Ariza beruvchi malaka toifalarini berish asossiz rad etilganda, shuningdek, malaka toifalarini beruvchi vakolatli organ xodimlarining xatti-harakati (harakatsizligi) ustidan qonunchilik hujjatlarida belgilangan tartibda shikoyat qilish huquqiga ega.

42. Ushbu Reglament talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Sport hakamlariga malaka toifasini berish boʻyicha davlat xizmatlari koʻrsatishning maʼmuriy reglamentiga
1-ILOVA

Sport hakamlariga malaka toifasini berish boʻyicha davlat xizmatlari koʻrsatishning

SXEMASI

Bosqichlar	Subyektlar	Tadbirlar	Bajarish muddatlari

1-bosqich	Ariza beruvchi (Oʻzbekiston Respublikasi fuqarosi)	Davlat xizmatidan foydalanish uchun Davlat xizmatlari markaziga oʻzi kelib murojaat qiladi yoki davlat xizmatlaridan elektron tarzda foydalanish uchun YIDXP orqali ariza topshirish.	Xohishiga koʻra (“Uchinchi toifali sport hakami” malaka toifasini olish uchun “Sport boʻyicha hakam “ malaka toifasi berilganiga kamida 1 yil oʻtgan boʻlishi lozim, shuningdek, ikkinchi, birinchi va milliy toifali sport hakamlari malaka toifasini olish uchun malaka toifasi berilganiga kamida 2 yil oʻtgan boʻlishi lozim)

2-bosqich	Ariza beruvchi (Oʻzbekiston Respublikasi fuqarosi)	Ariza Davlat xizmatlari markazlari orqali taqdim etilganda murojaatchidan bazaviy hisoblash miqdorining bir baravari miqdorida yigim undiriladi. YIDXP orqali taqdim etilganda, murojaatchidan Davlat xizmatlari markazlari orqali murojaat etganda toʻlanadigan summaning 90 foizi miqdorida yigim toʻlanadi.	Ariza shakllantirilgan sanada

3-bosqich	Davlat xizmatlari markazi	Arizani qabul qilish, ariza raqami va sanasini ariza beruvchiga yuborish yoki davlat xizmati koʻrsatishni rad etish.	10 daqiqa mobaynida

4-bosqich	Davlat xizmatlari markazi	Ariza beruvchi Davlat xizmatlari markaziga kelib murojaat qilganda uning soʻrovnomasi vakolatli organga elektron shaklda yuboriladi.	10 daqiqa mobaynida
4-bosqich	Davlat xizmatlari markazi	Ariza beruvchi YIDXP orqali murojaat qilganda soʻrovnoma vakolatli organga yuboriladi.	avtomatik tarzda

5-bosqich	Oʻzbekiston Respublikasi Sportni rivojlantirish vazirligi, Qoraqalpogʻiston Respublikasi Sportni rivojlantirish vazirligi, viloyatlar va Toshkent shahar sportni rivojlantirish bosh boshqarmalari (Vakolatli organ)	Taqdim etilgan hujjatlarni koʻrib chiqish uchun malaka komissiyasiga kiritadi.	Ikki ish kuni ichida

6-bosqich	Oʻzbekiston Respublikasi Sportni rivojlantirish vazirligi huzurida tashkil etilgan sport hakamlariga malaka toifasini berish boʻyicha malaka komissiyasi (Malaka komissiyasi)	Ariza va unga ilovaga qilingan hujjatlarni koʻrib chiqadi. Natijasi boʻyicha ariza beruvchiga tegishli malaka toifasini berish toʻgʻrisida qaror qabul qiladi yoki asoslangan rad javobini beradi.	Uch ish kuni mobaynida

7-bosqich	Oʻzbekiston Respublikasi Sportni rivojlantirish vazirligi huzurida tashkil etilgan sport hakamlariga malaka toifasini berish boʻyicha malaka komissiyasi (Malaka komissiyasi)	Navbatdan tashqari yigʻilishlar taqdim etilgan arizadan kelib chiqib, uning raisi tomonidan chaqiriladi. Navbatdan tashqari yigʻilish bayonnoma bilan rasmiylashtiriladi va rais hamda yigʻilishda ishtirok etgan aʼzolar tomonidan imzolanadi.	Bir ish kuni muddatida

8-bosqich	Oʻzbekiston Respublikasi Sportni rivojlantirish vazirligi huzurida tashkil etilgan sport hakamlariga malaka toifasini berish boʻyicha malaka komissiyasi (Malaka komissiyasi)	Qabul qilingan malaka toifasini berish toʻgʻrisidagi qaror asosida sport hakamlari malaka toifasi toʻgʻrisidagi guvohnoma yoki asoslangan rad javobini berish haqidagi maʼlumotni QR-kod qoʻyilgan holda rasmiylashtirish. Sport hakamlari malaka toifasi toʻgʻrisidagi guvohnoma yoki asoslangan rad javobini oʻz ERIsi bilan tasdiqlagan holda Davlat xizmatlari markaziga (oʻzi kelgan holda murojaat qilinganda) yoki ariza beruvchiga (elektron tarzda murojaat qilinganda) YIDXP orqali elektron tarzda yuborish.	Bir ish kuni mobaynida

9-bosqich	Davlat xizmatlari markazi	Elektron tarzda malaka toifasini berish toʻgʻrisidagi guvohnoma yoki asoslantirilgan rad javobi toʻgʻrisidagi maʼlumotni ariza beruvchining elektron manziliga (mavjud boʻlsa) yuboradi va ariza beruvchini bu haqda axborot-kommunikatsiya tizimi (telefon raqami) orqali xabardor qilish. Ariza beruvchi oʻzi kelib murojaat qilgan taqdirda, ariza beruvchining soʻroviga asosan elektron yoki qogʻoz shaklida ariza beruvchiga taqdim etish.	Guvohnoma yoki rad javobi kelib tushgandan soʻng oʻn daqiqa mobaynida

Sport hakamlariga malaka toifasini berish boʻyicha davlat xizmatlari koʻrsatishning maʼmuriy reglamentiga
2-ILOVA

__________________
‎ (sana) ‎

‎

__________________
‎ (raqam) ‎

Sport hakamlariga malaka toifasini berish uchun
‎SOʻROVNOMA

	Sport boʻyicha hakam	Uchinchi toifali sport hakami	Ikkinchi toifali sport hakami	Birinchi toifali sport hakami	Milliy toifali sport hakami
Ariza beruvchi toʻgʻrisidagi maʼlumotlar:
1. F.I.O.:
2. Pasporti yoki identifikatsiyalovchi ID-kartasi maʼlumotlari (seriyasi, raqami, sanasi, kim tomonidan berilganligi):
3. Yashash manzili:
4. Elektron manzili (mavjud boʻlsa):
5. Telefon raqami:
6. Ariza beruvchi hakamning sport turi:
7. Soʻrovnomaga ilova qilinadigan hujjat:	Ariza beruvchi hakam faoliyat yuritayotgan tashkilot tomonidan soʻrovnomaga malaka toifasini berish boʻyicha taqdimnoma

Sport hakamlariga malaka toifasini berish boʻyicha davlat xizmatlari koʻrsatishning maʼmuriy reglamentiga
3-ILOVA

_________________
‎ (sana) ‎

‎

_________________
‎ (raqam) ‎

‎

Sport hakamlariga malaka toifasini berish uchun
‎TAQDIMNOMA

F.I.O.: _____________________________________________________________________________

Tugʻilgan yili va joyi: ________________________________________________________________

Maʼlumoti: _________________________________________________________________________

Ish joyi, lavozimi: __________________________________________________________________

Amaldagi malaka toifasi: _____________________________________________________________

Berilgan vaqti “____” _______________ 20___ y.

Malaka toifasi: _____________________________________________________________________

‎

Talablarni bajarish
Sana	Musobaqalar		Musobaqa maqomi	Lavozimi






Seminardagi ishtiroki
Sana	Oʻtkazilgan joyi		Lavozimi	Imtihon







____________________________________________________ federatsiyasi malaka komissiyasi
^{(sport federatsiyalari (uyushmalari) nomi)}

QARORI

Hakam __________________________ga _____________________toifa berish toʻgʻrisida soʻralsin.
^{(familiyasi, ismi va otasining ismi)}

Respublika hakamlar hayʼati raisi _____________________ / ___________________________ /
		^(imzo)	^{(ismi, familiyasi)}

20 ___ y “___” ___________ _____-son bayonnoma. ________ ________ M.Oʻ.

‎

Sport hakamlariga malaka toifasini berish boʻyicha davlat xizmatlari koʻrsatishning maʼmuriy reglamentiga
4-ILOVA

Sport hakamlari malaka toifasini olish uchun bajarilishi lozim boʻlgan

TALABLAR

T/r	Musobaqa turlari*	Sport hakami	Uchinchi toifali sport hakami	Ikkinchi toifali sport hakami	Birinchi toifali sport hakami	Milliy toifali sport hakami
1.	Malakaviy musobaqalar	2	2	-	-	-
2.	Tuman (shahar) birinchiliklari	-	4	5	5	-
3.	Viloyat, shahar, tuman chempionatlari	-	3	4	5	-
4.	Respublika miqyosidagi musobaqalar	-	-	-	3	5
5.	Nazorat hakamligi (sport xususiyatiga qarab)	-	-	-	1	2
6.	Hakamlarni tayyorlash boʻyicha seminarlarni oʻtkazish	-	-	-	1	2
7.	Hakamlar kurslari, seminarlari, konferensiyalari, kongresslari va imtihonlarda ishtirok etish	-	1	1	1	2

Izoh:

“Birinchi toifali sport hakami” malaka toifasini olish uchun kamida ikki marotaba musobaqa bosh hakami yoki ikki marotaba bosh kotib boʻlish lozim.

“Milliy toifali sport hakami “ malaka toifasini olish uchun kamida uch marotaba musobaqa bosh hakami yoki uch marotaba bosh kotib boʻlish lozim.

Sportning ayrim turlari boʻyicha mazkur jadvalda belgilangan talablarni bajarish imkoniyati boʻlmaganda tegishli sport federatsiyalari (uyushmalari) bilan kelishilgan holda Oʻzbekiston Respublikasi Sportni rivojlantirish vazirligi tomonidan tasdiqlanadigan alohida talablar qoʻllaniladi.

Sport hakamlariga malaka toifasini berish boʻyicha davlat xizmatlari koʻrsatishning maʼmuriy reglamentiga
5-ILOVA

Sport hakamligi haqidagi

GUVOHNOMA

(tavsifi)

Sport hakamligi haqidagi guvohnoma — sport turi qoidalariga hamda sport musobaqasi toʻgʻrisidagi nizomga (reglamentga) rioya etilishini taʼminlash uchun jismoniy tarbiya yoki sport tadbiri tashkilotchisi tomonidan vakolat berilgan, maxsus tayyorgarlikdan oʻtgan va tegishli malaka toifasini olgan jismoniy shaxslarga beriladi.

Sport hakamligi haqidagi guvohnoma A5 formatdagi oq qogʻozda, sakkiz xil rangdan: matn uchun — qora rang, rasmlar tasviri uchun — yashil, koʻk, sariq, havorang, jigarrang, kulrang va qizil ranglardan, fon uchun — oq rangdan foydalangan holda bosib chiqariladi.

Varaqning chap yuqori qismida Yagona interaktiv davlat xizmatlari portali tasviri, oʻrtasida Oʻzbekiston Respublikasi Davlat gerbi tasviri oʻng yuqori qismida vakolatli organning nomi hamda davlat tilida kirill yozuvi bilan quyidagilar joylashtiriladi:

Sport hakamlari malaka toifasi toʻgʻrisida

GUVOHNOMA

SʼH № 000000

QR-kod joyi

Guvohnomaning chap qismida davlat tilida kirill yozuvida quyidagilar joylashtiriladi:

hakamning familiyasi, ismi, otasining ismi;

sport turining nomi;

malaka komissiyasi qarori yozilgan matn;

vakolatli shaxsning nomi;

Guvohnoma:

tartib raqami ikkita kirill harfidan “SʼH” va olti raqamli sondan iborat boʻlishi;

barcha matn va tasvirlar oq rangli fonda joylashtirilishi;

takrorlanmaydigan raqamlardan, oltita himoyaga ega va ketma-ket oʻzgaruvchi raqamlardan iborat boʻlishi;

yorugʻlik vositasida nusxa koʻchirilishini murakkablashtirish uchun boʻyoqning ochiq ranglaridan iborat boʻlishi lozim;

Guvohnomaning elektron shakli hisobga olish seriyasi, QR-kodi va tartib raqamiga ega boʻladi.

QR-kod guvohnoma pastki qismining oʻng tomoniga joylashtiriladi.

Mazkur guvohnoma qogʻoz yoki elektron shaklda berilishi mumkin.

(Qonunchilik maʼlumotlari milliy bazasi, 07.07.2022-y., 09/22/364/0601-son; 29.12.2023-y., 09/23/688/0996-son)