Oʻzbekiston Respublikasi Prezidentining
Qarori
Birlamchi tibbiy-sanitariya yordamini aholiga yaqinlashtirish va tibbiy xizmatlar samaradorligini oshirish boʻyicha qoʻshimcha chora-tadbirlar toʻgʻrisida
2022-yil 18-mart kuni oʻtkazilgan Oʻzbekiston Respublikasi Prezidentining sogʻliqni saqlash sohasi vakillari bilan “Tibbiyotdagi islohotlar — inson qadri uchun” mavzusidagi ochiq muloqoti doirasida belgilangan vazifalar ijrosini taʼminlash maqsadida:
1. Quyidagilar:
Aholiga koʻrsatilayotgan birlamchi tibbiy-sanitariya yordamining sifatini yaxshilash, tibbiyot xodimlarini qoʻllab-quvvatlash va faoliyati samaradorligini oshirish boʻyicha chora-tadbirlar dasturi 1-ilovaga muvofiq;
Birlamchi tibbiy-sanitariya yordami muassasalaridan uzoq masofada joylashgan mahallalarda 2022-yil davomida mahalla tibbiyot punktlarini tashkil etish jadvali 2-ilovaga muvofiq tasdiqlansin.
2. Sogʻliqni saqlash vazirligi (B. Musayev, A. Inoyatov) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Oʻzbekiston Respublikasi Prezidentining 2020-yil 12-noyabrdagi PF-6110-son Farmoni bilan tasdiqlangan oilaviy shifokor punktlari va oilaviy poliklinikalarni tashkil etish jadvaliga muvofiq 2022-yilda 136 ta yangi oilaviy shifokor punktlari va oilaviy poliklinikalar hamda 2023-yilda yana 140 ta yangi oilaviy shifokor punktlari va oilaviy poliklinikalar faoliyatini yoʻlga qoʻyish choralarini koʻrsin.
3. Belgilansinki:
oilaviy shifokor punktlari va oilaviy poliklinikalar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining asoslangan takliflariga muvofiq mahalliy budjet mablagʻlari hisobidan Sogʻliqni saqlash vazirligi bilan kelishgan holda tashkil qilinadi;
hududlarda oilaviy shifokor punktlari tarmogʻini yanada kengaytirish uchun 2023-yil 1-yanvardan boshlab joylardagi oilaviy poliklinika filiallari negizida oilaviy shifokor punktlari tashkil etiladi;
oilaviy shifokor punktlari, oilaviy poliklinika va tuman (shahar) koʻp tarmoqli markaziy poliklinikalarida kunduzgi statsionar ish vaqti soat 20:00 ga qadar uzaytiriladi hamda ularda ishlovchi tibbiyot xodimlari uchun 2022-yil 1-iyundan boshlab qoʻshimcha ustama haqi belgilanadi;
2022-yil 1-maydan boshlab birlamchi tibbiy-sanitariya yordami muassasalaridan olis masofada joylashgan mahallalarda mahalla tibbiyot punktlari tashkil etiladi;
aholining profilaktik tibbiy koʻriklari, skrining dasturlar va patronaj xizmati faqat Sogʻliqni saqlash vazirligi tomonidan tasdiqlangan tartibga muvofiq va belgilangan muddatlarda amalga oshiriladi, boshqa tashkilotlarning ushbu jarayonga aralashuviga yoʻl qoʻyilmaydi.
4. 2022-yil 1-iyuldan boshlab olis va chekka hududlarda oilaviy shifokor punktlari va oilaviy poliklinikalar shifokorlari uchun “Qishloq shifokori” dasturi takomillashtirilsin. Bunda, yangilangan “Qishloq shifokori” dasturi doirasida:
Oldingi tahrirga qarang.
olis va chekka hududlardagi oilaviy shifokor punktlari va oilaviy poliklinikalarda faoliyat yuritayotgan barcha shifokorlar oylik ish haqiga qoʻshimcha 2 million soʻm miqdorida har oylik ustama belgilanadi hamda ularga oʻzi ishlayotgan olis va chekka hududdan ipoteka krediti asosida uy-joy sotib olishda uy-joy qiymatining 50 foizigacha qismi, biroq bazaviy hisoblash miqdorining 500 barobaridan oshmagan miqdorda mahalliy budjet mablagʻlari hisobidan qoplab beriladi;
(4-bandning ikkinchi xatboshisi Oʻzbekiston Respublikasi Prezidentining 2023-yil 20-yanvardagi PQ-12-sonli qarori tahririda — Qonunchilik maʼlumotlari milliy bazasi, 21.01.2023-y., 07/23/12/0041)
olis va chekka hududlarda uzluksiz uch yil ishlagan shifokorlar klinik ordinaturaga test sinovlarisiz qabul qilinadi.
Qoraqalpogʻiston Respublikasi Vazirlar Kengashi va viloyatlar hokimliklari bir oy muddatda oilaviy shifokor punktlari va oilaviy poliklinikalardagi shifokorlarga boʻlgan talabni mahallalar kesimida aniqlash, shifokorlarni jalb etish va ehtiyojga koʻra kelgusida ularga uy-joy ajratish choralarini koʻrsin.
Vazirlar Mahkamasi Sogʻliqni saqlash vazirligi va Moliya vazirligi bilan birgalikda bir oy muddatda yangilangan olis va chekka hududlar roʻyxatini tasdiqlasin.
5. 2022-yil 1-sentabrdan boshlab shifokorlarning yakka tartibda oilaviy shifokorlik faoliyatini yuritishga ruxsat berilsin.
Belgilansinki:
yakka tartibda oilaviy shifokorlik faoliyatini yuritish uchun alohida tibbiyot muassasasi ochish talab etilmaydi va ushbu toifadagi shifokorlarga oʻz uyida yoki ijaraga olingan binoda tibbiy xizmatlar koʻrsatishga ruxsat beriladi;
yakka tartibdagi oilaviy shifokorlarga oʻziga biriktirilgan aholiga bepul koʻrsatilayotgan xizmatlar uchun toʻlov Davlat tibbiy sugʻurtasi jamgʻarmasi orqali beriladi;
yakka tartibda oilaviy shifokorlik faoliyatini yuritish tajribasi dastlab 2022-yil yakuniga qadar Sirdaryo viloyatida, keyinchalik esa bosqichma-bosqich boshqa hududlarda joriy etiladi.
Sogʻliqni saqlash vazirligi (B. Musayev) Moliya vazirligi (T. Ishmetov) bilan birgalikda uch oy muddatda yakka tartibdagi oilaviy shifokorlik faoliyatini yuritish talablari va uning faoliyatini moliyalashtirish tartibini tasdiqlasin hamda amaliyotga joriy qilsin.
6. Tuman (shahar) koʻp tarmoqli markaziy poliklinikalarida davlat tomonidan kafolatlangan bepul tibbiy xizmat turlaridan tashqari xizmat turlarini pullik asosda tashkil etishga ruxsat berilsin.
Belgilansinki, pullik xizmatlardan kelib tushgan mablagʻlarning 75 foizgacha boʻlgan qismi tuman (shahar) koʻp tarmoqli markaziy poliklinikalarining tibbiyot xodimlarini ragʻbatlantirishga yoʻnaltiriladi.
7. 2022-yil 1-avgustdan boshlab oilaviy shifokor punktlari va oilaviy poliklinikalarning ish samaradorligini baholash boʻyicha yangi reyting tizimi joriy qilinsin. Bunda:
hududda ortiqcha vazndan xalos boʻlish, toʻgʻri ovqatlanish tamoyillariga rioya etish, jismoniy faollikni oshirish, infarkt, insult, qandli diabet, onkologiya kabi kasalliklarning oldini olish boʻyicha koʻrsatkichlar asosiy mezonlar boʻladi;
har olti oyda ijobiy koʻrsatkichlarga erishgan tibbiyot xodimlari ragʻbatlantiriladi hamda eng yaxshi natija koʻrsatgan tibbiyot muassasasi mukofot va qimmatbaho sovgʻalar bilan taqdirlanadi;
ushbu tizim 2022-yilda Toshkent shahrining Olmazor tumanidagi 11 ta hamda Namangan viloyatining Uychi tumanidagi 12 ta oilaviy shifokor punkti va oilaviy poliklinikalarda, 2023-yildan boshlab bosqichma-bosqich barcha hududlarda joriy etiladi.
Sogʻliqni saqlash vazirligi (B. Musayev) Moliya vazirligi (T. Ishmetov) bilan birgalikda uch oy muddatda har bir hudud aholisining tibbiyot koʻrsatkichlaridan kelib chiqib, oilaviy shifokor punktlari va oilaviy poliklinikalarning ish samaradorligini baholash boʻyicha yangi reyting tizimini ishlab chiqsin va amaliyotga joriy qilsin.
8. 2022-yil 1-sentabrdan boshlab tibbiyot tizimi rahbarlarining xalq deputatlari mahalliy Kengashlari hamda mahalla fuqarolar yigʻinlarida hisobot berish tartibi joriy qilinsin.
Belgilansinki:
tuman (shahar) koʻp tarmoqli markaziy poliklinikasi, oilaviy poliklinikalar hamda oilaviy shifokor punktlari mudirlari mahalla fuqarolar yigʻinlarida;
tuman (shahar) tibbiyot birlashmalari rahbarlari xalq deputatlari tuman (shahar) Kengashlarida;
viloyat sogʻliqni saqlash boshqarmalari boshliqlari xalq deputatlari viloyat Kengashlarida hisobot beradi.
9. Sogʻliqni saqlash vazirligi (O. Fozilkarimov) 2022-yil 1-oktabrga qadar birlamchi tibbiy-sanitariya yordami muassasalaridagi tibbiy jihozlarni xatlovdan oʻtkazsin. Bunda:
nosoz tibbiy jihozlarni aniqlab, ularni soz holatga keltirish yoki yangisiga almashtirish uchun zarur mablagʻlarni hisob-kitob qilish;
Sogʻliqni saqlash sohasi uchun Davlat budjetidan ajratilgan mablagʻlar hisobidan tibbiy jihozlar hisobini va nazoratini yuritish boʻyicha elektron dastur (platforma)ni 2022-yilda Sirdaryo viloyatida tajriba tariqasida joriy etish hamda tajriba natijalari boʻyicha 2023-yildan boshqa hududlarga bosqichma-bosqich tatbiq etish choralarini koʻrsin.
Moliya vazirligi (T. Ishmetov) xatlov natijasidan kelib chiqib, tibbiy jihozlarni (fizioterapevtik, laborator, tekshiruv va boshqalar) soz holatga keltirish yoki yangilash uchun zarur mablagʻlarni ajratish boʻyicha taklif kiritsin.
10. Sogʻliqni saqlash vazirligi (B. Musayev):
Axborot texnologiyalari va kommunikatsiyalarini rivojlantirish vazirligi (Sh. Shermatov) bilan birgalikda 2022-yil 1-noyabrga qadar davlat tomonidan aholiga bepul koʻrsatiladigan tibbiy xizmatlar va beriladigan dori vositalari hajmi toʻgʻrisidagi maʼlumotlarni taqdim etish imkonini beruvchi mobil ilovani yaratsin va amaliyotga joriy qilsin;
Moliya vazirligi (T. Ishmetov) bilan birgalikda 2022-yil yakuniga qadar Andijon, Buxoro va Xorazm viloyatlaridagi tibbiyot oliy taʼlim muassasalari klinikalarining neyroxirurgiya boʻlimlari negizida yuridik maqomga ega boʻlmagan hududlararo neyroxirurgik markazlarni tashkil etsin.
11. Oʻz mahallasida sogʻlom turmush tarzini targʻib qilgan, shaxsiy namuna koʻrsatgan tibbiyot xodimlari va jamoatchilik vakillari uchun “Xalq salomatligi posboni” koʻkrak nishoni taʼsis etilsin.
Sogʻliqni saqlash vazirligi (B. Musayev) ikki oy muddatda “Xalq salomatligi posboni” koʻkrak nishoni toʻgʻrisidagi nizom loyihasini tasdiqlash uchun belgilangan tartibda Vazirlar Mahkamasiga kiritsin.
12. Shunday tartib oʻrnatilsinki, unga muvofiq 2022-yil 1-iyundan boshlab qon bilan bevosita ishlayotgan davlat tibbiyot muassasalari xodimlarini gepatit “V” kasalligiga qarshi bepul emlash amaliyoti joriy etiladi.
Sogʻliqni saqlash vazirligi (B. Musayev) Moliya vazirligi (T. Ishmetov) bilan birgalikda mazkur bandda nazarda tutilgan chora-tadbirni amalga oshirish uchun zarur mablagʻlarning Davlat budjeti hisobidan ajratilishini taʼminlasin.
13. Sogʻliqni saqlash vazirligi (B. Musayev) Moliya vazirligi (T. Ishmetov), Davlat tibbiy sugʻurtasi jamgʻarmasi (F. Sharipov) bilan birgalikda har yili 1 000 nafargacha imtiyozga ega boʻlmagan, uzoq yillar davomida davlat tibbiyot muassasalarida mehnat qilayotgan bemor tibbiyot xodimlariga Davlat tibbiy sugʻurtasi jamgʻarmasi mablagʻlari hisobidan yuqori texnologik operatsiyalarni oʻtkazish amaliyotini yoʻlga qoʻysin.
Sogʻliqni saqlash vazirligi (B. Musayev), Davlat tibbiy sugʻurtasi jamgʻarmasi (F. Sharipov) ikki oy muddatda mazkur bandda nazarda tutilgan tibbiyot xodimlarini davolashga yuborish tartibini tasdiqlasin.
14. Sogʻliqni saqlash vazirligi manfaatdor vazirlik va idoralar bilan birgalikda bir oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
15. Mazkur qarorning ijrosini samarali tashkil qilishga masʼul va shaxsiy javobgar etib sogʻliqni saqlash vaziri B.A. Musayev, sogʻliqni saqlash vazirining birinchi oʻrinbosari A.Sh. Inoyatov, sogʻliqni saqlash vazirining oʻrinbosari O.R. Fozilkarimov, Davlat tibbiy sugʻurtasi jamgʻarmasi ijro etuvchi direktori F.R. Sharipov, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari belgilansin.
Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti maslahatchisining birinchi oʻrinbosari L.N. Toʻychiyev zimmasiga yuklansin.
Amalga oshirilayotgan chora-tadbirlar natijadorligi yuzasidan 2022-yil 1-noyabrga qadar Oʻzbekiston Respublikasi Prezidenti Administratsiyasiga axborot berilsin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2022-yil 25-aprel,
PQ-215-son
Oʻzbekiston Respublikasi Prezidentining 2022-yil 25-apreldagi PQ-215-son qaroriga
1-ILOVA
Aholiga koʻrsatilayotgan birlamchi tibbiy-sanitariya yordamining sifatini yaxshilash, tibbiyot xodimlarini qoʻllab-quvvatlash va faoliyati samaradorligini oshirish boʻyicha chora-tadbirlar
DASTURI

T/r

Chora-tadbirlar nomi

Amalga oshirish shakli

Bajarish muddati

Moliyalashtirish manbalari

Ijro uchun masʼullar

I. Normativ-huquqiy bazani takomillashtirish

1.

Tuman (shahar) koʻp tarmoqli markaziy poliklinikalarida davlat tomonidan kafolatlangan bepul tibbiy xizmat turlaridan tashqari pullik asosda tashkil etiladigan tibbiy xizmatlar roʻyxatini tasdiqlash.

Bunda, pullik xizmatlardan tushayotgan mablagʻlarning ochiqligi va shaffofligini taʼminlash, ularning hisobini yuritish va foydalanish ustidan samarali nazorat tizimini yaratish. Zarur xollarda, pullar tushumini monitoring qilish maqsadida maxsus axborot tizimini yaratish.

Sogʻliqni saqlash vazirining buyrugʻi

2022-yil iyun

-

Sogʻliqni saqlash vazirligi

(B. Musayev),

Moliya vazirligi

(T. Ishmetov)

2.

Aholining profilaktik tibbiy koʻriklari, skrining dasturlari va patronaj xizmatini oʻtkazishning yangilangan tartibini belgilash. Bunda:

18 yoshdan 40 yoshgacha boʻlgan shaxslarning profilaktik koʻriklari;

xavf guruhiga mansub aholining skrining koʻriklari;

alohida eʼtiborga molik aholi kontingentlarining uyda koʻriklari va patronaji tartibi nazarda tutiladi.

Sogʻliqni saqlash vazirining buyrugʻi

2022-yil iyul

-

Sogʻliqni saqlash vazirligi

(A. Inoyatov)

3.

Zamonaviy talab va innovatsion yondashuvlarni inobatga olgan holda, birlamchi tibbiy-sanitariya yordami muassasalari binolarini qurish, kommunikatsiyalar bilan taʼminlash, xonalarning joylashuvi, jihozlanishi boʻyicha maxsus talablar va namunaviy loyihalar ishlab chiqish.

Keyinchalik tibbiyot muassasalari uchun binolar qurish, rekonstruksiya qilish va foydalanishga topshirishda mazkur talablarga rioya qilinishini taʼminlash.

Normativ hujjat

2022-yil iyul

-

Qurilish vazirligi

(B. Zakirov),

Sogʻliqni saqlash vazirligi

(B. Musayev),

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

4.

Bemorlarni kunduzgi shifoxona va uy shifoxona sharoitida davolashning yangilangan mezonlari va tartibini ishlab chiqish va amaliyotga joriy etish.

Sogʻliqni saqlash vazirining buyrugʻi

2022-yil avgust

-

Sogʻliqni saqlash vazirligi

(A. Inoyatov)

5.

Birlamchi tibbiy-sanitariya yordami muassasalari, tuman (shahar) markaziy shifoxonalari faoliyatini belgilovchi idoraviy normativ-huquqiy hujjatlarni qayta koʻrib chiqish va tizimlashtirish.

Sogʻliqni saqlash vazirining buyrugʻi

2022-yil sentabr

-

Sogʻliqni saqlash vazirligi

(A. Inoyatov)

6.

Birlamchi tibbiy-sanitariya yordami muassasalarini tibbiy jihozlar bilan taʼminlash meʼyorlarini qayta koʻrib chiqish va tasdiqlash.

Sogʻliqni saqlash vazirining buyrugʻi

2022-yil sentabr

-

Sogʻliqni saqlash vazirligi

(O. Fozilkarimov),

Moliya vazirligi

(T. Ishmetov)

7.

Qoraqalpogʻiston Respublikasi Sogʻliqni saqlash vazirligi, Toshkent shahar Sogʻliqni saqlash bosh boshqarmasi va viloyatlar sogʻliqni saqlash boshqarmalari, shuningdek, birlamchi tibbiy-sanitariya yordami muassasalari tashkiliy tuzilmasi va nizomini qayta koʻrib chiqish va tasdiqlash.

Normativ-huquqiy hujjat

2022-yil sentabr

-

Sogʻliqni saqlash vazirligi

(A. Inoyatov),

Moliya vazirligi

(T. Ishmetov)

II. Tibbiy yordam koʻlamini kengaytirish va aholiga qoʻshimcha qulayliklar yaratish

8.

Birlamchi tibbiy-sanitariya yordami muassasalaridan uzoq masofada joylashgan mahallalarda 1 002 ta mahalla tibbiyot punktini tashkil etish uchun maxsus konteynerlarni oʻrnatish, infratuzilma yaratish (elektr, suv, oqava suv tizimi, atrofni obodonlashtirish va boshqalar), zarur jihozlar bilan taʼminlash orqali ularning faoliyatini yoʻlga qoʻyish.

Amaliy chora-tadbirlar

2022-yil davomida reja-grafik asosida

Mahalliy budjet mablagʻlari

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari,

Sogʻliqni saqlash vazirligi

(A. Inoyatov)

9.

276 ta yangi oilaviy shifokor punktlari va oilaviy poliklinikalar faoliyatini yoʻlga qoʻyish uchun tegishli binolarni ajratish, taʼmirlash ishlarini oʻtkazish, tibbiy asbob-uskunalar bilan taʼminlash.

Amaliy chora-tadbirlar

2022-2023-yillar davomida reja-grafik asosida

Mahalliy budjet mablagʻlari

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Sogʻliqni saqlash vazirligi

(A. Inoyatov)

10.

Olis va chekka hududlardagi davolash-profilaktika muassasalarida shifokorlarga boʻlgan ehtiyojni mahallalar kesimida aniqlash, boʻsh shifokor ish oʻrinlari roʻyxatini shakllantirish va muntazam yangilab borish.

Vakant oʻrinlarga talabgorlar bilan shartnomalar tuzish va ish oʻrni bilan taʼminlash, uy-joy ajratish va ustamalar belgilash.

Amaliy chora-tadbirlar

2022-yil 1-iyuldan boshlab

Mahalliy budjet mablagʻlari

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

11.

Birlamchi tibbiy-sanitariya yordami muassasalarida fizioterapiya xizmatini qayta tiklash maqsadida:

Amaliy chora-tadbirlar

Respublika va mahalliy budjet mablagʻlari

Toshkent shahri Olmazor tumanidagi 15-son oilaviy poliklinikasining zamonaviy fizioterapevtik asbob-uskunalar bilan namunaviy tarzda jihozlash va taqdimot oʻtkazish natijalari boʻyicha barcha birlamchi tibbiy-sanitariya yordami muassasalarini xatlovdan oʻtkazish;

2022-yil aprel-may

Sogʻliqni saqlash vazirligi

(A. Inoyatov)

fizioterapevtik asbob-uskunalar bilan jihozlash jadvalini tuzish va tasdiqlash;

fizioterapevtik asbob-uskunalarni xarid qilish va joylarga tarqatish;

oilaviy shifokor punktlarining amaldagi shtat birliklari doirasida fizioterapiya hamshiralari shtatlarini ajratish.

2022–2023-yillar davomida reja-grafik asosida

Sogʻliqni saqlash vazirligi

(O. Fozilkarimov),

Moliya vazirligi

(J. Abruyev)

III. Kasalliklar profilaktikasi, tibbiy xizmatlar sifati va samaradorligini oshirish

12.

10 million nafar xavf guruhiga mansub aholini yuqumli boʻlmagan kasalliklar xavf omillarini aniqlash boʻyicha skrining dasturlari bilan qamrab olish.

Amaliy chora-tadbirlar

2022-yil davomida reja-grafik asosida

-

Sogʻliqni saqlash vazirligi

(A. Inoyatov),

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

13.

Barcha tuman (shahar) koʻp tarmoqli markaziy poliklinikalarida “Toʻgʻri ovqatlanish va sogʻlom turmush tarzi” xonalarining jihozlanish jadvalini va tibbiy xodimlar vazifalarini belgilash.

Sogʻliqni saqlash vazirining buyrugʻi

2022-yil iyul

-

Sogʻliqni saqlash vazirligi

(A. Inoyatov),

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

Ushbu xonalarda ommaviy targʻibot va skrining tadbirlarini oʻtkazish bilan birgalikda sogʻlom turmush tarzi asoslari boʻyicha individual maslahat berish tizimini joriy etish.

Amaliy chora-tadbirlar

2022-yil davomida reja-grafik asosida

14.

“Tibbiyot brigadasi” tomonidan xonadonlarda salomatlik holatini oʻrganish va kasalliklarning xavf omillaridan kelib chiqib, tegishli maslahat va tavsiyalar berishni yoʻlga qoʻyish, brigadalarni targʻibot materiallari bilan taʼminlash.

Amaliy chora-tadbirlar

2022-yil davomida reja-grafik asosida

-

Sogʻliqni saqlash vazirligi

(A. Inoyatov)

15.

Davolash-profilaktika muassasalarida qon bilan bevosita ishlaydigan kasb egalari roʻyxati va gepatit “V”ga qarshi bepul emlash rejasini tuzish va rejani amalga oshirish.

Reja-jadval

Tasdiqlash — 2022-yil may
Bajarish — 2022-yil

davomida

Sogʻliqni saqlash sohasi uchun Davlat budjetidan ajratilgan mablagʻlar doirasida

Sogʻliqni saqlash vazirligi

(B. Yusupaliyev)

16.

Barcha tuman (shahar) tibbiyot birlashmalari rahbarlari, 2 000 dan ziyod ambulator-poliklinika muassasalari mudirlari, 17 mingdan ziyod tibbiyot brigadalari aʼzolari uchun sogʻlom turmush tarzi asoslari va yuqumli boʻlmagan kasalliklar profilaktikasi boʻyicha maxsus seminarlar tashkil etish va oʻtkazish.

Reja-jadval

Tasdiqlash — 2022-yil may
Oʻtkazish — 2022-yil davomida

-

Sogʻliqni saqlash vazirligi

(A. Inoyatov)

17.

Sogʻliqni saqlash tizimi rahbar xodimlari uchun menejment, tibbiy xizmatlar sifatini oshirish, muassasalar faoliyatini tashkillashtirish va tahlil etish yuzasidan amaliy koʻnikmalarni hosil qilish masalalari boʻyicha maxsus kurslarni tashkil etish.

Reja-jadval

Tasdiqlash — 2022-yil may
Oʻtkazish — 2022-yil davomida

-

Sogʻliqni saqlash vazirligi

(A. Inoyatov)

IV. Amalga oshirilgan ishlardan aholining xabardorligini oshirish va ommaviy axborot vositalarida yoritib borish

18.

Tibbiyot tizimi rahbarlarining xalq deputatlari mahalliy Kengashlari, mahalla fuqarolik yigʻinlarida hisobot berish tartibini ishlab chiqish.

Bunda:

tuman (shahar) koʻp tarmoqli markaziy poliklinikalari va oilaviy poliklinikalar hamda oilaviy shifokor punktlari mudirlarining mahalla fuqarolar yigʻinlarida;

tuman (shahar) tibbiyot birlashmalari rahbarlarining xalq deputatlari tuman (shahar) Kengashlarida;

viloyat sogʻliqni saqlash boshqarmalari rahbarlarining xalq deputatlari viloyat Kengashlarida hisobot berishi amaliyotini joriy etish nazarda tutiladi.

Qonun loyihasi

2022-yil iyun

-

Sogʻliqni saqlash vazirligi

(B. Musayev),

Adliya vazirligi

(R. Davletov),

manfaatdor vazirlik va idoralar

19.

Qoraqalpogʻiston Respublikasi Sogʻliqni saqlash vazirligi, viloyatlar va Toshkent shahar sogʻliqni saqlash boshqarmalari qoshida muntazam faoliyat yurituvchi call-markaz tashkil etish.

Amaliy chora-tadbirlar

2022-yil may

-

Sogʻliqni saqlash vazirligi

(B. Musayev),

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

Ushbu markazda fuqarolar va tibbiyot xodimlaridan murojaatlarni qabul qilish, ularni hal etish bilan birgalikda, tizimli takliflardan sogʻliqni saqlash tizimidagi islohotlarni amalga oshirishda foydalanish yoʻlga qoʻyish.

2022-yil davomida

Oʻzbekiston Respublikasi Prezidentining 2022-yil 25-apreldagi PQ-215-son qaroriga
2-ILOVA
Birlamchi tibbiy-sanitariya yordami muassasalaridan uzoq masofada joylashgan mahallalarda 2022-yil davomida mahalla tibbiyot punktlarini tashkil etish
JADVALI

T/r

Hudud nomi

2022-yilda tashkil etiladigan tibbiyot punktlari soni

Shu jumladan:

II chorak

III chorak

IV chorak

1.

Qoraqalpogʻiston Respublikasi

57

40

12

5

2.

Andijon viloyati

10

7

2

1

3.

Buxoro viloyati

122

85

25

12

4.

Jizzax viloyati

61

42

13

6

5.

Qashqadaryo viloyati

95

65

20

10

6.

Navoiy viloyati

109

70

26

13

7.

Namangan viloyati

126

80

32

14

8.

Samarqand viloyati

97

70

17

10

9.

Sirdaryo viloyati

35

23

8

4

10.

Surxondaryo viloyati

160

110

35

15

11.

Toshkent viloyati

39

26

9

4

12.

Fargʻona viloyati

70

48

15

7

13.

Xorazm viloyati

21

11

7

3

Jami

1 002

677

221

104


(Qonunchilik maʼlumotlari milliy bazasi, 25.04.2022-y., 07/22/215/0339-son; 21.01.2023-y., 07/23/12/0041)