Mamlakatimizda iqtidorli yoshlarning tashabbuslarini qo‘llab-quvvatlash borasida amalga oshirilayotgan ishlarni yanada jadallashtirish, ularni ilmiy-texnik faoliyatga keng jalb qilish, iqtidorli yoshlarning, jumladan, olis hududlarda istiqomat qilayotgan yigit-qizlarning bilim, ko‘nikma va malakasini oshirish, innovatsion g‘oyalarini amaliyotga tatbiq etish hamda hayotda o‘z o‘rnini topishiga ko‘maklashishga qaratilgan ishlarni tizimli tashkil etish maqsadida Vazirlar Mahkamasi qaror qiladi:

1. Iste’dodli yoshlarni qo‘llab-quvvatlash “Ulug‘bek” jamg‘armasining (keyingi o‘rinlarda — Jamg‘arma) oliy organi — Konferensiyasi tomonidan Jamg‘armaning yangilangan tuzilmasi 1-ilovaga muvofiq tasdiqlanganligi ma’lumot uchun qabul qilinsin.

2. Quyidagilar Jamg‘arma faoliyatining asosiy yo‘nalishlari etib belgilanganligi inobatga olinsin:

iqtidorli yoshlarni izlab topish, iste’dodini ro‘yobga chiqarish va ularni qo‘llab-quvvatlashga ko‘maklashish;

davlat va nodavlat tashkilotlari bilan hamkorlikda iqtidorli yoshlarni aniqlash hamda ularni ilmiy-texnik faoliyatga keng jalb etish tizimini yo‘lga qo‘yishda ishtirok etish;

iqtidorli yoshlarning, jumladan, Jamg‘arma tomonidan o‘tkazilgan tanlovlar g‘oliblari, Prezident granti va nomli stipendiyalar, “O‘zbekiston uchun 100 g‘oya” loyihasi sovrindorlarining ilmiy-texnik ishlanmalari, g‘oya va tashabbuslarining amaliyotga joriy etilishini qo‘llab-quvvatlash;

davlat va nodavlat tashkilotlar bilan hamkorlikda “Mirzo Ulug‘bek vorislari” respublika tanlovini tashkil etish, shuningdek, soha mutaxassislarini jalb etgan holda iqtidorli yoshlarni maqsadli o‘qitish;

iqtisodiyot tarmoqlarining ehtiyojlarini hisobga olgan holda zamonaviy talablarga javob beradigan yuqori malakali mutaxassislar zaxirasini shakllantirishda qatnashish;

ilm-fan va ta’limga oid risolalar, bukletlar va boshqa adabiyotlarni nashr etish va tarqatish.

3. Innovatsion rivojlanish vazirligi, Yoshlar ishlari agentligi, Oliy va o‘rta maxsus ta’lim vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining 2022-yildan boshlab har yili iqtidorli yoshlarni kashf qilish va ularni qo‘llab-quvvatlashga qaratilgan “Mirzo Ulug‘bek vorislari” respublika tanlovini (keyingi o‘rinlarda — Tanlov) o‘tkazish to‘g‘risidagi taklifi ma’qullansin.

Belgilansinki:

a) Tanlovning:

1-bosqichi fevral-mart oylarida tuman (shahar)larda o‘tkaziladi va unda eng yuqori natijaga erishgan har bir tuman (shahar)dan 5 nafardan nomzodlar 2-bosqichga yo‘llanma oladi;

2-bosqichi aprel oyida Qoraqalpog‘iston Respublikasi, viloyatlar va Toshkent shahrida o‘tkaziladi hamda Qoraqalpog‘iston Respublikasi, viloyatlar va Toshkent shahrida har biridan eng yuqori natijaga erishgan 20 nafar yosh navbatdagi bosqichga yo‘llanma oladi;

3-bosqichi may oyida o‘tkaziladi va unda eng yuqori natijaga erishgan 100 nafar yosh tanlovning respublika bosqichi g‘olibi deb topiladi;

1, 2 va 3-bosqichlar g‘oliblari tegishlicha bazaviy hisoblash miqdorining 5, 10 va 20 baravari miqdorida bir martalik pul mukofoti va diplom bilan taqdirlanadi;

respublika bosqichi g‘oliblari Jamg‘arma tomonidan tashkil etiladigan maqsadli o‘quv kurslarida bepul tahsil oladi. O‘qishni muvaffaqiyatli tamomlagan yoshlar hududlar bo‘yicha ishlab chiqarish tashkilotlari va tadbirkorlik subyektlariga ixtiyoriylik asosida biriktiriladi hamda “Yoshlar akademiyasi” va “Kelajak liderlari klubi”ga jalb etiladi;

b) tanlov Jamg‘arma tomonidan Innovatsion rivojlanish vazirligi, Yoshlar ishlari agentligi, Oliy va o‘rta maxsus ta’lim vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda o‘tkaziladi;

v) tanlovning 1 va 2-bosqichlariga tayyorgarlik ko‘rish va uni o‘tkazish, ushbu bosqich g‘oliblarini taqdirlash bilan bog‘liq xarajatlar mahalliy budjetning qo‘shimcha manbalaridan belgilangan tartibda ajratilgan mablag‘lar hisobidan qoplanadi.

4. “Mirzo Ulug‘bek vorislari” respublika tanlovini o‘tkazish tartibi to‘g‘risidagi nizom 2-ilovaga muvofiq tasdiqlansin.

5. Innovatsion rivojlanish vazirligi Tanlovga tayyorgarlik ko‘rish va o‘tkazish, uning respublika bosqichi g‘oliblarini taqdirlash bilan bog‘liq xarajatlarni har yili, shuningdek, Jamg‘armada ilm-fan rivojlanishining istiqbolli yo‘nalishlariga mos zamonaviy laboratoriya hamda innovatsion kichik bosmaxonani tashkil etish xarajatlarini Innovatsion rivojlanish vazirligining Ilm-fanni moliyalashtirish va innovatsiyalarni qo‘llab-quvvatlash jamg‘armasi mablag‘lari hisobidan qoplab borsin.

6. Jamg‘armaning Innovatsion rivojlanish vazirligi, Yoshlar ishlari agentligi, Fanlar akademiyasi, Oliy va o‘rta maxsus ta’lim vazirligining manfaatdor vazirlik va idoralar hamda boshqa tashkilotlar bilan birgalikda ikki oy muddatda “Iste’dodli yoshlar axborotnomasi” ilmiy-amaliy elektron jurnalini hamda “Mirzo Ulug‘bek vorislari” elektron portalini tashkil etish to‘g‘risidagi taklifi ma’qullansin.

Bunda, “Mirzo Ulug‘bek vorislari” elektron portalida iste’dodli yoshlarning elektron bazasi shakllantiriladi, o‘quv kurslari bitiruvchilarining reytingi joriy etilib, innovatsion g‘oyalari va ilmiy-texnik ishlanmalari baholab boriladi.

7. O‘zbekiston Respublikasi Oliy Majlisi huzuridagi Fuqarolik jamiyati institutlarini qo‘llab-quvvatlash jamoat fondi mablag‘larini boshqarish bo‘yicha Parlament komissiyasining ushbu jamoat fondiga 2022-yilning 1-fevralidan boshlab Jamg‘armani saqlab turish va uning faoliyatini samarali tashkil etish uchun davlat subsidiyasi ajratish to‘g‘risidagi taklifi ma’lumot uchun qabul qilinsin.

8. Quyidagilar Jamg‘arma faoliyatini moliyalashtirish manbalari etib belgilanganligi inobatga olinsin:

O‘zbekiston Respublikasi Oliy Majlisi huzuridagi Fuqarolik jamiyati institutlarini qo‘llab-quvvatlash jamoat fondi tomonidan har yili ajratiladigan davlat subsidiyasi;

jismoniy va yuridik shaxslarning homiylik xayriyalari;

xalqaro moliya institutlari va xorijiy tashkilotlarning grantlari;

xo‘jalik faoliyati va shartnoma asosida xizmatlar ko‘rsatishdan tushadigan mablag‘lar;

qonunchilik hujjatlarida taqiqlanmagan boshqa manbalar.

9. “Olmaliq kon-metallurgiya kombinati” aksiyadorlik jamiyatining Jamg‘armaga homiylik xayriyasi sifatida 1 ta xizmat avtotransport vositasi va 1 ta avtobus ajratish to‘g‘risidagi taklifi ma’qullansin.

10. Davlat aktivlarini boshqarish agentligi, Qurilish vazirligi va Toshkent shahar hokimligining:

Toshkent shahri, Mirzo Ulug‘bek tumani, Movarounnahr ko‘chasi, 24-uy manzilida joylashgan Bo‘sh turgan obyektlardan samarali foydalanishni tashkil etish markazining Toshkent shahar hududiy boshqarmasi bino va inshootlariga (keyingi o‘rinlarda — obyekt) Jamg‘armani tekin foydalanish huquqi asosida joylashtirish;

Jamg‘armaning samarali faoliyat olib borishi uchun obyektda mukammal ta’mirlash hamda zamonaviy tarzda jihozlash ishlarini amalga oshirish to‘g‘risidagi takliflariga rozilik berilsin.

11. Davlat aktivlarini boshqarish agentligi Toshkent shahar hokimligi bilan birgalikda bir oy muddatda Jamg‘armani belgilangan tartibda obyektga joylashtirilishini ta’minlasin.

12. Belgilansinki, obyektda mukammal ta’mirlash va zamonaviy tarzda jihozlash ishlarini amalga oshirish doirasida:

Toshkent shahar hokimligi “Yagona buyurtmachi xizmati” injiniring kompaniyasi — buyurtmachi funksiyasini bajaradi;

bosh loyiha va bosh pudrat tashkilotlari qonunchilik hujjatlarida belgilangan tartibda tender (tanlov) savdolari asosida aniqlanadi;

mukammal ta’mirlash va jihozlash ishlari bilan bog‘liq xarajatlar Vazirlar Mahkamasining zaxira jamg‘armasi hisobidan amalga oshiriladi.

Bunda, obyektda o‘quv auditoriyalari, zamonaviy laboratoriya, kutubxona tashkil etish, kichik innovatsion bosmaxona faoliyati uchun shart-sharoitlar yaratish hamda lift o‘rnatish lozimligi inobatga olinsin.

13. Toshkent shahar hokimligi Moliya vazirligi va Qurilish vazirligi bilan birgalikda Jamg‘arma qoshida tashkil etiladigan o‘quv kurslarida tahsil oladigan iste’dodli yoshlarni yotoqxona bilan ta’minlash masalasini atroflicha o‘rganib chiqib, ikki hafta muddatda Vazirlar Mahkamasiga asoslangan taklif kiritsin.

14. Moliya vazirligi obyektni mukammal ta’mirlash va zamonaviy tarzda jihozlash ishlarini qisqa muddatda yakunlash uchun asoslangan hisob-kitoblarga muvofiq Vazirlar Mahkamasining zaxira jamg‘armasidan buyurtmachiga zarur mablag‘ ajratilishini ta’minlasin.

15. Mazkur qarorning bajarilishini nazorat qilish O‘zbekiston Respublikasi innovatsion rivojlanish vaziri I.Yu. Abdurahmonov zimmasiga hamda Vazirlar Mahkamasining Yoshlar, jamoat tashkilotlari, mahalla va oilani qo‘llab-quvvatlash masalalari kotibiyatiga yuklansin.

1. Ushbu Nizom Iste’dodli yoshlarni kashf qilish hamda ularni qo‘llab-quvvatlashga qaratilgan “Mirzo Ulug‘bek vorislari” tanlovini (keyingi o‘rinlarda — Tanlov) o‘tkazish tartibini belgilaydi.

2. Tanlov 16 yoshdan 25 yoshgacha bo‘lgan iqtidorli yoshlar, jumladan, olis hududlarda istiqomat qilayotgan yigit-qizlar, uyushmagan yoshlar, “Mehribonlik uylari” tarbiyalanuvchilari orasidan iqtidorli yoshlarni izlab topish va ularni o‘zlari qiziqqan sohalarga yo‘naltirish, ilmiy-texnik ijodkorligi va ixtirochiligini rag‘batlantirish, innovatsion faolligini oshirish va qo‘llab-quvvatlash maqsadida har yili o‘tkaziladi.

3. Tanlovni tashkil etish bo‘yicha mas’ullar Iste’dodli yoshlarni qo‘llab-quvvatlash “Ulug‘bek” jamg‘armasi, Yoshlar ishlari agentligi, Innovatsion rivojlanish vazirligi, Oliy va o‘rta maxsus ta’lim vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari (keyingi o‘rinlarda — Tashkilotchilar) hisoblanadi.

4. Tanlovda ishtirokchilarning salohiyatini baholash va g‘oliblarni aniqlash uchun Tashkilotchilar tomonidan tasdiqlangan tegishli vazirliklar, idoralar va tashkilotlar vakillari, mutaxassislar hamda olimlar a’zo bo‘lgan kamida yetti kishidan iborat tarkibda Tanlov komissiyasi (keyingi o‘rinlarda — Komissiya) tuziladi.

5. Tanlov ishtirokchilarining salohiyatini baholash va g‘oliblarni aniqlash uchun Komissiya a’zolari orasidan uning raisi va kotibi saylanadi.

6. Tanlovda O‘zbekiston Respublikasining barcha hududlaridan 16 dan 25 yoshgacha bo‘lgan barcha iqtidorli yoshlar qatnashish huquqiga ega.

7. Tanlovda ishtirok etish istagida bo‘lgan iqtidorli yoshlar maxsus veb-sayt orqali ro‘yxatdan o‘tadi.

8. Tashkilotchilar tanlov boshlanishidan bir oy oldin o‘z rasmiy veb-saytiga arizalarni shakllantirish, ro‘yxatdan o‘tkazish va topshirish tartibi, muddati va talablari ko‘rsatilgan e’lonni joylashtiradi.

9. Tashkilotchilar Tanlov ishtirokchilarini tanlovning talab va shartlari to‘g‘risida xabardor qiladi, tanlov yakunlari bo‘yicha g‘oliblarga xabar beradi va ularni taqdirlashni tashkil etadi.

10. Komissiya kotibi ro‘yxatdan o‘tgan iqtidorli yoshlarning ma’lumotlarini umumlashtirib, Komissiya a’zolariga taqdim etadi.

11. Tanlovda ishtirok etish istagida bo‘lgan yoshlar quyidagi talablarga javob berishi lozim:

O‘zbekiston Respublikasining fuqarosi bo‘lishi;

aniq bir g‘oya yoki loyihaga ega bo‘lishi;

IQ test natijasi 110 balldan past bo‘lmasligi;

tanlovlarda g‘olib bo‘lganligi to‘g‘risidagi diplom, sertifikat yoki tavsiyanomaga ega bo‘lishi.

12. Tashkilotchilar va homiylik qiluvchi tashkilotlar xodimlarining hamda Komissiya a’zolarining yaqin qarindoshlari Tanlovda ishtirok etish huquqiga ega emas (ular o‘zini o‘zi rad qilgan holatlar bundan mustasno).

13. Tanlov bir yilda bir marta respublika hududlari bo‘yicha bosqichma-bosqich o‘tkaziladi:

1-bosqich — tuman yoki shahar miqyosida;

2-bosqich — viloyat bo‘yicha, shu jumladan, Qoraqalpog‘iston Respublikasida va Toshkent shahri miqyosida;

3-bosqich — respublika miqyosida.

14. Tanlovni o‘tkazish muddatlari:

1-bosqich — fevral-mart;

2-bosqich — aprel;

3-bosqich — may.

15. Tanlovni o‘tkazish tartibi:

1-bosqichda ishtirok etib, eng yuqori natija ko‘rsatgan 5 nafar yosh yigit qizlar Tanlovning tuman (shahar) bosqichi g‘olibi deb topiladi hamda viloyat bosqichiga yo‘llanma oladi;

2-bosqichda ishtirok etib, eng yuqori natija ko‘rsatgan 20 nafar yosh yigit qizlar Tanlovning hududiy bosqichi g‘olibi deb topiladi hamda respublika bosqichiga yo‘llanma oladi;

3-bosqichda ishtirok etib eng yuqori natija ko‘rsatgan 100 nafar yosh yigit qizlar Tanlovning respublika bosqichi g‘olibi deb topiladi.

16. Tanlov Jamg‘arma tomonidan Yoshlar ishlari agentligi, Innovatsion rivojlanish vazirligi, Oliy va o‘rta maxsus ta’lim vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda o‘tkaziladi.

17. Tanlov natijalari bo‘yicha g‘oliblar va ularning salohiyati to‘g‘risidagi ma’lumotlar Komissiya bayonnomasida ko‘rsatiladi va uning a’zolari tomonidan imzolanadi.

18. Tanlovning har bir bosqichi bo‘yicha g‘oliblar test sinovlari yakunlangandan so‘ng bir hafta muddat ichida Tashkilotchilarning rasmiy veb-saytida hamda tele-radiokanallarda e’lon qilinadi.

19. Natijalar Komissiya tomonidan bayonnoma bilan tasdiqlanib, Tashkilotchilarning mas’ul vakiliga taqdim etilganidan so‘ng yakuniy (hal qiluvchi ahamiyatga ega) hisoblanadi va Komissiya qarori bo‘yicha Tashkilotchilar izoh bermaydi.

20. Tanlovning respublika bosqichi g‘oliblarini taqdirlash marosimi natijalar e’lon qilingandan so‘ng 10 kun ichida Tashkilotchilar tomonidan amalga oshiriladi.

21. Tanlovning 1, 2 va 3-bosqichlar g‘oliblari tegishlicha bazaviy hisoblash miqdorining 5, 10 va 20 baravari miqdorida bir martalik pul mukofoti va tegishli diplom bilan taqdirlanadi.

22. Tanlovning 1 va 2-bosqichlariga tayyorgarlik ko‘rish va uni o‘tkazish, ushbu bosqich g‘oliblarini taqdirlash bilan bog‘liq xarajatlar mahalliy budjetning qo‘shimcha manbalari hisobidan qoplanadi.

23. Tanlovning 3-bosqichi g‘oliblari Jamg‘arma tomonidan bazaviy hisoblash miqdorining 20 baravari miqdorida pul mablag‘i bilan mukofotlanadi.

26. Tanlovning respublika bosqichi g‘oliblarining innovatsion g‘oya va ilmiy-texnik loyihalarini xususiy sektor va tarmoq tashkilotlari, yirik korxonalar va tashkilotlar tomonidan moliyalashtirish amaliyoti joriy etiladi.

27. Tanlov to‘g‘risidagi ma’lumotlar va uning natijalari Tashkilotchilar va ularning tizimidagi tashkilotlar rasmiy veb-sayti va boshqa ommaviy axborot vositalarida e’lon qilinadi.

28. Ushbu Nizom talablarini buzganlikda aybdor shaxslar qonunchilikka muvofiq javob beradilar.