Oʻzbekiston Respublikasi Prezidentining
Qarori
Davlat oliy taʼlim muassasalariga moliyaviy mustaqillik berish chora-tadbirlari toʻgʻrisida
Oliy taʼlim tizimida amalga oshirilayotgan islohotlar samaradorligini oshirish, davlat oliy taʼlim muassasalarining moliyaviy barqarorligini taʼminlash, moddiy-texnika bazasini mustahkamlash masalalarini mustaqil hal etish, ilmiy-tadqiqot faoliyatiga mablagʻlarni jalb etish imkoniyatini kengaytirish hamda oliy taʼlim muassasalari oʻrtasida raqobat muhitini rivojlantirish maqsadida:
1. Moliyaviy mustaqillik berilayotgan davlat oliy taʼlim muassasalari roʻyxati 1-ilovaga muvofiq tasdiqlansin.
2. Moliyaviy mustaqillik berilayotgan davlat oliy taʼlim muassasalariga 2022-yil 1-yanvardan boshlab quyidagi masalalar boʻyicha mustaqil qaror qabul qilish vakolati berilsin:
taʼlim xizmatlari bozoridagi talabni inobatga olgan holda toʻlov-kontrakt asosida oʻqitish qiymatini belgilash;
talabalarning toʻlov-kontrakt mablagʻlarini toʻlash muddatlarini belgilash va uzaytirish;
taʼlim jarayoniga zamonaviy pedagogik texnologiyalarni qoʻllay oladigan va ilmiy izlanish olib boradigan mahalliy hamda xorijiy professor-oʻqituvchi va mutaxassislarni shartnoma asosida jalb qilish;
oʻquv-ilmiy jarayonlarga jalb etilgan xorijiy yuqori malakali mutaxassislar mehnatiga haq toʻlash miqdorlarini bozor konyunkturasidan kelib chiqib belgilashga oid qarorlar qabul qilish;
professor-oʻqituvchilar shtat birliklarini kiritish meʼyorlarini ishlab chiqish;
oʻz mablagʻlari hisobidan talabalar uchun stipendiya va grantlar ajratish;
xorijiy davlatlardan oʻquv va ilmiy adabiyotlar, darsliklar hamda oʻquv qoʻllanmalarni mualliflik huquqi boʻlgan ishlab chiqaruvchilardan toʻgʻridan-toʻgʻri xarid qilish;
boʻsh turgan bino va inshootlarda pullik xizmatlar koʻrsatish tartibini belgilash;
avtotransport vositalarining yoʻl bosish yillik limiti va ularga xizmat koʻrsatish talablarini belgilashi.
3. Shunday tartib oʻrnatilsinki, unga muvofiq moliyaviy mustaqillik berilayotgan davlat oliy taʼlim muassasalari quyidagilarni nazarda tutuvchi moliyalashtirish tartibiga oʻtkaziladi:
barcha taʼlim yoʻnalishlari va bosqichlari boʻyicha bir talaba uchun toʻgʻri keladigan oʻrtacha xarajat miqdori hisoblab chiqiladi;
davlat buyurtmasi (davlat granti) asosida kadrlar tayyorlash uchun Davlat budjetidan ajratiladigan mablagʻlar Vazirlar Mahkamasi tomonidan belgilangan tartib asosida bir talabaga toʻgʻri keladigan oʻrtacha xarajat miqdoridan kelib chiqib belgilanadi;
davlat granti asosida taʼlim olayotgan talabalar uchun budjet mablagʻlari boʻysunuvi boʻyicha tegishli vazirlik va idora hamda oliy taʼlim muassasasi oʻrtasida imzolanadigan bitim asosida ajratiladi (bundan maqsadli mablagʻlar, shu jumladan stipendiya toʻlovlari, yetim bolalar va ota-ona qaramogʻidan mahrum boʻlgan bolalarning ijtimoiy himoyasi uchun qonunchilikda belgilangan mablagʻlar, oliy taʼlimdan keyingi taʼlim xarajatlari hamda Oʻzbekiston Respublikasi Prezidenti va Vazirlar Mahkamasining alohida qarorlari asosida ajratiladigan boshqa mablagʻlar mustasno);
davlat granti asosida taʼlim olayotgan talabalar uchun ajratilgan budjet mablagʻlari (bundan maqsadli mablagʻlar mustasno) oliy taʼlim muassasasining budjetdan tashqari mablagʻlari boʻyicha shaxsiy gʻazna hisobvaragʻiga oʻtkaziladi va hisobot davri oxirida mablagʻlarning qoldigʻi oliy taʼlim muassasasi ixtiyorida qoldiriladi;
davlat buyurtmasi sifatida ajratilgan mablagʻlar hamda toʻlov-kontrakt mablagʻlari boʻyicha daromadlar va xarajatlar smetasi tegishliligi boʻyicha yuqori turuvchi vazirlik va idorada roʻyxatdan oʻtkaziladi hamda ulardan foydalanish Budjet tashkilotlarini rivojlantirish jamgʻarmasi uchun belgilangan tartibga oʻxshash tartibda amalga oshiriladi. Bunda, moliya yili davomida daromadlar va xarajatlar smetasiga kiritiladigan oʻzgartirishlar Moliya vazirligi bilan kelishilmaydi;
toʻlov-kontrakt asosida oʻqitish qiymati bir talaba uchun toʻgʻri keladigan oʻrtacha xarajat miqdoridan kelib chiqib, biroq oliy taʼlim muassasasini oʻzini oʻzi toʻliq moliyaviy taʼminlash, istiqbolda rivojlantirish hamda taʼlim xizmatlari bozoridagi oʻzaro raqobat asosida belgilanadi.
4. Belgilansinki, moliyaviy mustaqillik berilayotgan davlat oliy taʼlim muassasalarida:
asosiy vositalarni ijaraga berishdan tushgan mablagʻning 1 foizi — Davlat aktivlarini boshqarish agentligining hududiy boʻlinmalari huzuridagi davlat mulki ijara markazlariga, qolgan qismi — elektron savdo maydonchasi operatoriga toʻlangan toʻlov chegirilgandan keyin mazkur oliy taʼlim muassasasining budjetdan tashqari rivojlantirish jamgʻarmasiga yoʻnaltiriladi;
asosiy vositalar va tovar-moddiy boyliklarni (bundan yer, bino, inshootlar, jumladan operativ boshqaruvga berilgan bino va inshootlar hamda oʻquv-ilmiy laboratoriya jihozlari mustasno) sotishdan tushgan mablagʻlar toʻligʻicha oʻz ixtiyorida qoldiriladi;
moliyaviy nazorat tadbirlarini xolisona va mustaqil oʻtkazadigan ichki audit va moliyaviy nazorat xizmati tashkil etiladi;
mablagʻlarning sarflanishi yuzasidan yuqori turuvchi vazirlikka (idoraga) har chorakda belgilangan tartibda hisobot beriladi;
Davlat budjetidan ajratilgan mablagʻlar, xarid qilingan tovarlar va xizmatlar, amalga oshirilayotgan loyihalar hamda tasarrufidagi mablagʻlar, moddiy boyliklar va mulkdan foydalanish toʻgʻrisidagi boshqa maʼlumotlar oʻz rasmiy veb-saytlariga muntazam joylashtirib boriladi;
mablagʻlardan oqilona va samarali foydalanish, jumladan xodimlar mehnatiga haq toʻlash va stipendiya toʻlovlarini oʻz vaqtida hamda toʻliq amalga oshirish uchun javobgarlik tegishli oliy taʼlim muassasasi rahbari zimmasiga yuklanadi.
5. Oʻzbekiston Respublikasi Prezidentining 2019-yil 11-iyuldagi “Oliy va oʻrta maxsus taʼlim tizimiga boshqaruvning yangi tamoyillarini joriy etish chora-tadbirlari toʻgʻrisida”gi PQ-4391-son qaroriga asosan oʻzini oʻzi moliyalashtirish tizimiga oʻtayotgan oliy taʼlim muassasalariga berilgan vakolat va huquqlar ushbu qarorga muvofiq moliyaviy mustaqillik berilayotgan davlat oliy taʼlim muassasalariga tatbiq etilsin. Bunda:
moliyaviy mustaqillik berilayotgan davlat oliy taʼlim muassasalari yuridik shaxs maqomiga ega boʻlgan budjet mablagʻlarini oluvchi davlat tashkiloti hisoblanadi;
talabalarni toʻlov-kontrakt asosida oʻqitish qiymati oliy taʼlim muassasasi tomonidan taʼlim xizmatlari bozoridagi talab va taklifdan kelib chiqib, biroq tegishli yoʻnalish boʻyicha davlat oliy taʼlim muassasalarida belgilangan bazaviy toʻlov-kontrakt qiymatidan uch baravardan ortiq boʻlmagan miqdorda belgilanadi;
bakalavriat taʼlim yoʻnalishlari, magistratura va klinik ordinatura mutaxassisliklari kesimida qabul shartlarida toʻlov-kontrakt qiymati tabaqalashtirilgan miqdorlarda belgilanishi mumkin.
6. Moliyaviy mustaqillik berilayotgan davlat oliy taʼlim muassasalarida quyidagilar kuzatuv kengashlarining asosiy vakolatlari etib belgilansin:
oliy taʼlim muassasasining uzoq va oʻrta muddatli strategik rivojlantirish dasturini tasdiqlash, xalqaro eʼtirof etilgan tashkilotlar reytingining yuqori oʻrinlaridan joy olish boʻyicha maqsadli chora-tadbirlarni belgilash hamda uning amalga oshirilishini nazorat qilib borish;
oliy taʼlim muassasasining oʻrta muddat uchun shakllantiriladigan biznes-rejasi hamda daromadlar va xarajatlar parametrlarini tasdiqlash, ularning ijrosini muhokama qilish;
taʼlim yoʻnalishlari, mutaxassisliklar hamda ixtisosliklar boʻyicha toʻlov-kontrakt asosida oʻqishga qabul parametrlarini belgilash toʻgʻrisida qaror qabul qilish;
oliy taʼlim muassasasi oldiga qoʻyilgan vazifalar ijrosi, maqsadli koʻrsatkichlarga erishish holati boʻyicha rektor va prorektorlar faoliyatini oʻrganish hamda axborotini eshitish;
oliy taʼlim muassasasining ichki audit va moliyaviy nazorat xizmatiga moliyaviy nazorat oʻtkazish uchun qoʻshimcha topshiriq berish hamda nazorat tadbirlarining natijasi yuzasidan hisobot olish;
oliy taʼlim muassasasini rivojlantirish va uning moliyaviy faoliyati bilan bogʻliq masalalarni hal etish, shu jumladan nodavlat notijorat tashkiloti koʻrinishida maqsadli kapital jamgʻarmasini shakllantirish;
ilm-fan va innovatsiyalarni rivojlantirishning ustuvor yoʻnalishlaridan kelib chiqib, oliy taʼlim muassasalarining innovatsion va boshqa jamgʻarmalar mablagʻlarini sarflash tartibi va yoʻnalishlarini mustaqil belgilash;
oliy taʼlim muassasasi rahbari va xodimlari hamda professor-oʻqituvchilari faoliyatiga baho berish, ular faoliyatining samaradorligini baholash mezonlarini (KPI) tasdiqlash;
oliy taʼlim muassasasi hamda ular huzuridagi taʼlim va ilmiy muassasalarning rahbari va xodimlari, professor-oʻqituvchilari, shuningdek, xorijiy mutaxassislar uchun mehnatga haq toʻlash miqdori va samaradorlik mezonlariga asoslangan ragʻbatlantirish tartibini mustaqil belgilash;
oliy taʼlim muassasasining budjetdan tashqari rivojlantirish jamgʻarmasi mablagʻlaridan foydalanish tartibini, shu jumladan xarajatlarning taqsimlanish ulushini mustaqil belgilash.
7. Oliy va oʻrta maxsus taʼlim vazirligi (A. Toshkulov) Axborot texnologiyalari va kommunikatsiyalarini rivojlantirish vazirligi (Sh. Shermatov) bilan birgalikda uch oy muddatda davlat oliy taʼlim muassasalari talabalari uchun elektron shartnomalar tuzish, toʻlov-kontrakt asosida oʻqitish xarajatlarini onlayn toʻlash va mablagʻlar hisobini yuritish boʻyicha yagona axborot tizimini (keyingi oʻrinlarda — Axborot tizimi) ishlab chiqsin hamda Moliya vazirligi va Markaziy bankning axborot tizimlari bilan integratsiya qilinishini taʼminlasin.
Belgilansinki, Axborot tizimiga ulanish idoraviy boʻysunuvidan qatʼi nazar, barcha davlat oliy taʼlim muassasalari uchun majburiy hisoblanadi.
Oldingi tahrirga qarang.
Axborot tizimini amaliyotga joriy etish, qoʻllab-quvvatlash va oliy taʼlim muassasalariga shartnoma asosida xizmat koʻrsatish vazifasi Oliy taʼlim, fan va innovatsiyalar huzuridagi Raqamli taʼlim texnologiyalarini rivojlantirish markaziga yuklatilsin.
(7-bandning uchinchi xatboshisi Oʻzbekiston Respublikasi Prezidentining 2023-yil 3-iyuldagi PF-107-sonli Farmoni tahririda — Qonunchilik maʼlumotlari milliy bazasi, 04.07.2023-y., 06/23/107/0441-son)
Oldingi tahrirga qarang.
8. Oliy taʼlim, fan va innovatsiyalar vazirligi boʻysunuvida oliy taʼlim muassasasi mavjud boʻlgan vazirlik va idoralar bilan birgalikda:
(8-bandning birinchi xatboshisi Oʻzbekiston Respublikasi Prezidentining 2023-yil 3-iyuldagi PF-107-sonli Farmoni tahririda — Qonunchilik maʼlumotlari milliy bazasi, 04.07.2023-y., 06/23/107/0441-son)
xalqaro moliya tashkilotlarini jalb qilgan holda 2022-yil yakuniga qadar davlat oliy taʼlim muassasalarida bozor mexanizmlariga asoslangan biznes jarayonlarini joriy etish, ularni xususiylashtirish, ular faoliyatiga korporativ boshqaruvni joriy etish hamda toʻliq moliyaviy mustaqillik berish orqali taʼlim sifatini oshirish boʻyicha Vazirlar Mahkamasiga taklif kiritsin;
oliy taʼlim muassasasi hamda bitiruvchilar oʻrtasida uzviy aloqa oʻrnatish, ularning kelgusi professional faoliyati, erishgan yutuqlari va tajribalarini oʻz rasmiy veb-saytlarida joylashtirib borish, ular bilan talabalar oʻrtasida aloqa oʻrnatish, mahorat darslari tashkil etish yuzasidan zarur choralar koʻrsin. Bunda, bitiruvchilarning kelgusida erishgan yutuqlari oliy taʼlim muassasasi rahbari faoliyatining eng muhim samaradorlik koʻrsatkichlaridan biri hisoblanadi;
oliy taʼlim muassasalari rahbarlarining fuqarolarga taʼlim xizmatlari koʻrsatish qamrovi va sifatini oshirish, taʼlim jarayonini ilgʻor oliy taʼlim standartlariga muvofiqlashtirish borasida amalga oshirilgan ishlar hamda raqobatbardosh mutaxassislar tayyorlash boʻyicha belgilangan koʻrsatkichlarning bajarilishi yuzasidan ommaviy axborot vositalari orqali keng jamoatchilikka muntazam ravishda hisobot berib borishini taʼminlasin.
9. Tibbiyot oliy taʼlim muassasalariga ularning klinikalarida moddiy-texnik bazani mustahkamlash, shuningdek, kapital va joriy taʼmirlash ishlarini amalga oshirish uchun oʻzlarining budjetdan tashqari mablagʻlari hisobidan zarur mablagʻlar sarflashga ruxsat berilsin.
10. Quyidagilar maʼlumot uchun qabul qilinsin:
davlat oliy taʼlim muassasalari Soliq kodeksiga muvofiq soliq toʻlashdan ozod etilganligi;
moliyaviy mustaqillik berilayotgan davlat oliy taʼlim muassasalariga qonunchilikda oliy taʼlim muassasalari uchun nazarda tutilgan soliq imtiyozlari tatbiq etilishi;
moliyaviy mustaqillik berilayotgan davlat oliy taʼlim muassasalariga ijtimoiy soliqning 12 foiz miqdordagi stavkasi qoʻllanilishi.
Belgilansinki, Oʻzbekiston Respublikasi Prezidentining 2021-yil 30-sentabrdagi “Xizmatlar sohasini qoʻllab-quvvatlashga oid qoʻshimcha chora-tadbirlar toʻgʻrisida”gi PF-6318-son Farmoni 3-bandida nazarda tutilgan bojxona bojidan ozod qilish boʻyicha imtiyoz oʻquv hamda ilmiy laboratoriya jihozlari, maxsus asbob-uskunalar, oʻquv, ilmiy-metodik adabiyotlar, oʻqitishning texnik vositalari, multimedia mahsulotlarini olib kiruvchi barcha yuridik shaxslarga nisbatan tatbiq etiladi.
Oliy va oʻrta maxsus taʼlim vazirligi, Xalq taʼlimi vazirligi, Maktabgacha taʼlim vazirligi boshqa manfaatdor vazirlik va idoralar bilan birgalikda ikki oy muddatda bojxona bojidan ozod qilinadigan tovarlar roʻyxatini shakllantirsin hamda Vazirlar Mahkamasiga takliflar kiritsin.
11. Moliya vazirligi Oliy va oʻrta maxsus taʼlim vazirligi hamda boshqa manfaatdor vazirlik va idoralar bilan birgalikda bir oy muddatda:
ichki audit va moliyaviy nazorat xizmatlari uchun davlat oliy taʼlim muassasalari xarajatlarini “UzASBO” dasturiy majmuasi orqali onlayn monitoring qilish imkoniyatini yaratsin. Bunda, xarajatlarni amalga oshirishda yoʻl qoʻyilishi mumkin boʻlgan xato va kamchiliklar boʻyicha “tahlika-tahlil” tizimini yoʻlga qoʻysin;
Oliy taʼlim muassasalarini rivojlantirish jamgʻarmasiga toʻlov-kontrakt mablagʻlari hisobidan ajratmalarning Moliya vazirligi axborot tizimi orqali avtomatik tarzda oʻtkazilishini taʼminlasin.
12. Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga 2-ilovaga muvofiq oʻzgartirish va qoʻshimchalar kiritilsin.
13. Milliy teleradiokompaniya Milliy axborot agentligi hamda Oliy va oʻrta maxsus taʼlim vazirligi bilan birgalikda bir hafta muddatda ushbu qaror maqsadi va vazifalarini ommaviy axborot vositalari orqali keng yoritishga doir maxsus media-reja ishlab chiqsin hamda uning ijrosini taʼminlasin.
14. Oliy va oʻrta maxsus taʼlim vazirligi uch oy muddatda quyidagilarni Vazirlar Mahkamasiga kiritsin:
Moliya vazirligi bilan birgalikda bir talaba uchun toʻgʻri keladigan oʻrtacha xarajat miqdori asosida moliyalashtirish tartibini nazarda tutuvchi qaror loyihasini;
qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflarni.
15. Mazkur qaror ijrosini samarali tashkil qilishga masʼul va shaxsiy javobgar etib oliy va oʻrta maxsus taʼlim vaziri A.X. Toshkulov belgilansin.
Qaror ijrosini muhokama qilib borish, ijro uchun masʼul idoralar faoliyatini muvofiqlashtirish hamda nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti maslahatchisi A.A. Abduvaxitov zimmasiga yuklansin.
Amalga oshirilayotgan chora-tadbirlar natijadorligi yuzasidan Oʻzbekiston Respublikasi Prezidentiga 2022-yil 1-iyul va 2023-yil 1-yanvarga qadar axborot berilsin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2021-yil 24-dekabr,
PQ-61-son
Oʻzbekiston Respublikasi Prezidentining 2021-yil 24-dekabrdagi PQ-61-son qaroriga
1-ILOVA
1-ILOVA
Moliyaviy mustaqillik berilayotgan davlat oliy taʼlim muassasalari
ROʻYXATI
Oldingi tahrirga qarang.
|
1. |
Samarqand davlat chet tillar instituti |
|
2. |
Samarqand iqtisodiyot va servis instituti |
|
3. |
Toshkent davlat yuridik universiteti |
|
4. |
Toshkent davlat iqtisodiyot universiteti |
|
5. |
Toshkent moliya instituti |
|
6. |
Toshkent davlat sharqshunoslik universiteti |
|
7. |
Toshkent farmatsevtika instituti |
|
8. |
Toshkent davlat transport universiteti |
|
9. |
Urganch davlat universiteti |
|
10. |
Oʻzbekiston davlat jahon tillari universiteti |
|
11. |
Andijon mashinasozlik instituti |
|
12. |
Toshkent kimyo-texnologiya instituti |
|
13. |
Samarqand davlat universiteti |
|
14. |
Oʻzbekiston Milliy universiteti |
|
15. |
Toshkent davlat texnika universiteti |
|
16. |
Toshkent tibbiyot akademiyasi |
|
17. |
Qoraqalpoq davlat universiteti |
|
18. |
Qoraqalpogʻiston tibbiyot instituti |
|
19. |
Buxoro davlat universiteti |
|
20. |
Buxoro davlat tibbiyot instituti |
|
21. |
Samarqand davlat tibbiyot universiteti |
|
22. |
Qarshi davlat universiteti |
|
23. |
Termiz davlat universiteti |
|
24. |
Toshkent davlat agrar universiteti |
|
25. |
Guliston davlat universiteti |
|
26. |
Oʻzbekiston davlat jismoniy tarbiya va sport universiteti |
|
27. |
Namangan davlat universiteti |
|
28. |
Fargʻona davlat universiteti |
|
29. |
Geologiya fanlari universiteti |
|
30. |
Andijon davlat universiteti |
|
31. |
Andijon davlat tibbiyot instituti |
|
32. |
Jahon iqtisodiyoti va diplomatiya universiteti |
|
33. |
Toshkent pediatriya tibbiyot instituti |
|
34. |
Toshkent davlat stomatologiya instituti |
|
35. |
Toshkent axborot texnologiyalari universiteti |
|
36. |
Nizomiy nomidagi Toshkent davlat pedagogika universiteti |
|
37. |
|
|
38. |
Toshkent arxitektura-qurilish universiteti |
|
39. |
Samarqand davlat arxitektura-qurilish universiteti |
|
40. |
Soliq qoʻmitasi huzuridagi Fiskal institut |
Izoh:
2023-yil 1-yanvardan boshlab Oliy taʼlim, fan va innovatsiyalar vazirligiga Respublika oliy taʼlim kengashi va Iqtisodiyot va moliya vazirligi bilan kelishgan holda mazkur roʻyxatga qoʻshimcha davlat oliy taʼlim muassasalarini kiritish huquqi beriladi.
(1-ilova Oʻzbekiston Respublikasi Prezidentining 2023-yil 3-iyuldagi PF-107-sonli Farmoni tahririda — Qonunchilik maʼlumotlari milliy bazasi, 04.07.2023-y., 06/23/107/0441-son)
Oʻzbekiston Respublikasi Prezidentining 2021-yil 24-dekabrdagi PQ-61-son qaroriga
2-ILOVA
2-ILOVA
Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga kiritilayotgan oʻzgartirish va qoʻshimchalar
1. Oʻzbekiston Respublikasi Prezidentining 2019-yil 26-avgustdagi “Jismoniy tarbiya va sport obyektlarini qurish, rekonstruksiya qilish, kapital taʼmirlash va jihozlash ishlarini moliyalashtirish tartibini yanada takomillashtirish chora-tadbirlari toʻgʻrisida”gi PF-5787-son Farmoni 6-bandining beshinchi xatboshisi chiqarib tashlansin.
2. Oʻzbekiston Respublikasi Prezidentining 2020-yil 29-apreldagi “Oʻzbekiston Respublikasida yuridik taʼlim va fanni tubdan takomillashtirish boʻyicha qoʻshimcha chora-tadbirlar toʻgʻrisida”gi PF-5987-son Farmoni 16-bandining yettinchi xatboshisi “barcha ajratmalardan” soʻzlaridan keyin “2025-yilga qadar” soʻzlari bilan toʻldirilsin.
3. Oʻzbekiston Respublikasi Prezidentining 2017-yil 16-noyabrdagi “Respublika oliy taʼlim muassasalari bakalavriatiga kirish test sinovlarini oʻtkazish tartibini takomillashtirish toʻgʻrisida”gi PQ-3389-son qarori 4-bandining uchinchi xatboshisidan “hamda oliy taʼlim muassasalarining oshirilgan toʻlov-kontrakt tushumlari (5 foizgacha miqdorda)” soʻzlari chiqarib tashlansin.
Oldingi tahrirga qarang.
(Oʻzbekiston Respublikasi Prezidentining 2025-yil 26-dekabrdagi PF-259-sonli Farmoniga asosan 4-bandning oʻz kuchini yoʻqotish sanasi — 2026-yil 1-yanvar — Qonunchilik maʼlumotlari milliy bazasi, 27.12.2025-y., 06/25/259/1224-son)
5. Oʻzbekiston Respublikasi Prezidentining 2018-yil 7-noyabrdagi “Davlat tibbiyot muassasalari va sogʻliqni saqlashni boshqarish organlari xodimlarini moddiy ragʻbatlantirishni kuchaytirish chora-tadbirlari toʻgʻrisida”gi PQ-4007-son qarori 5-bandining “a” kichik bandi uchinchi xatboshisidan “oliy tibbiyot taʼlim muassasalari hisobvaraqlarida jamlanadigan pullik oʻqish kontraktlari boʻyicha tushumlar, shuningdek,” soʻzlari chiqarib tashlansin.
6. Oʻzbekiston Respublikasi Prezidentining 2018-yil 30-noyabrdagi “Toshkent shahrida Adju universitetini tashkil etish toʻgʻrisida”gi PQ-4041-son qarorida:
b) 5-bandning ikkinchi xatboshisidagi “2019/2020 va 2020/2021” soʻzlari “2020/2021 va 2021/2022” soʻzlari bilan almashtirilsin.
7. Oʻzbekiston Respublikasi Prezidentining 2019-yil 14-maydagi “Oliy taʼlim muassasalariga test sinovlari orqali qabul qilish tizimini takomillashtirish boʻyicha qoʻshimcha chora-tadbirlar toʻgʻrisida”gi PQ-4319-son qarori 3-bandining uchinchi xatboshisi chiqarib tashlansin.
8. Oʻzbekiston Respublikasi Prezidentining 2019-yil 11-iyuldagi “Oliy va oʻrta maxsus taʼlim tizimiga boshqaruvning yangi tamoyillarini joriy etish chora-tadbirlari toʻgʻrisida”gi PQ-4391-son qarorida:
a) 7-bandi quyidagi tahrirdagi oʻn beshinchi xatboshi bilan toʻldirilsin:
“Mazkur bandning “a”, “b” va “v” kichik bandlari moliyaviy mustaqillik berilgan oliy taʼlim muassasalariga tatbiq etilmaydi”;
b) 12-bandning birinchi xatboshisidagi “2022” raqami “2025” raqami bilan almashtirilsin.
9. Oʻzbekiston Respublikasi Prezidentining 2020-yil 7-apreldagi “Tibbiy-sanitariya sohasida kadrlarni tayyorlash va uzluksiz kasbiy rivojlantirishning mutlaqo yangi tizimini joriy etish chora-tadbirlari toʻgʻrisida”gi PQ-4666-son qarori 6-bandining ikkinchi xatboshisi quyidagi tahrirda bayon etilsin:
“Moliya vazirligi 2022/2023 oʻquv yilida sogʻliqni saqlash sohasi uchun 50 nafar menejer mutaxassislarni magistrlik yoʻnalishi boʻyicha davlat granti asosida tayyorlash bilan bogʻliq xarajatlarni qoplash choralarini koʻrsin”.
10. Oʻzbekiston Respublikasi Prezidentining 2021-yil 5-martdagi “Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida”gi PQ-5020-son qarori 15-bandining ikkinchi va uchinchi xatboshilari quyidagi tahrirda bayon etilsin:
“2021/2022 oʻquv yilida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan 100 nafardan xotin-qizlar uchun har yili mahalliy budjetning qoʻshimcha manbalari hamda moliyaviy barqaror davlat oliy taʼlim muassasalari tomonidan ularning Kengashi qaroriga asosan 50 nafargacha xotin-qizlar uchun davlat oliy taʼlim muassasalarining budjetdan tashqari mablagʻlari hisobidan;
2022/2023 oʻquv yilidan boshlab Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan 150 nafardan xotin-qizlar uchun har yili mahalliy budjetning qoʻshimcha manbalari hisobidan qoplab beriladi”.
11. Oʻzbekiston Respublikasi Prezidentining 2021-yil 4-oktabrdagi “Xirurgiya xizmatini transformatsiya qilish, hududlarda jarrohlik amaliyotlari sifatini oshirish va koʻlamini kengaytirish chora-tadbirlari toʻgʻrisida”gi PQ-5254-son qarorining 11-bandi quyidagi tahrirda bayon etilsin:
“11. Sogʻliqni saqlash vazirligi 2022/2023 oʻquv yilida sogʻliqni saqlash sohasi uchun 50 nafar menejer mutaxassislarni magistrlik yoʻnalishida (Master of Nealthcare Administration) davlat granti asosida Toshkent shahridagi Xalqaro Vestminster va boshqa nodavlat oliy taʼlim tashkilotlarida tayyorlash boʻyicha qonunchilikda belgilangan tartibda shartnomalar tuzilishini va bu bilan bogʻliq xarajatlarning mazkur maqsadlar uchun Davlat budjetidan ajratilgan mablagʻlar hisobidan moliyalashtirilishini taʼminlasin”.
12. Oʻzbekiston Respublikasi Prezidentining 2021-yil 12-yanvardagi “Toshkent shahrida “Sankt-Peterburg davlat universiteti” Federal davlat budjeti oliy taʼlim muassasasi filiali faoliyatini tashkil etish toʻgʻrisida”gi PQ-4942-son qarori 3-bandining oltinchi xatboshisidagi va 9-bandining “b” kichik bandidagi “2021/2022” raqamlari “2022/2023” raqamlari bilan almashtirilsin.
13. Vazirlar Mahkamasining 2009-yil 8-apreldagi “Davlat mulkini ijaraga berish tartibini takomillashtirish chora-tadbirlari toʻgʻrisida”gi 102-son qarorida:
a) 3-band quyidagi mazmundagi oltinchi xatboshi bilan toʻldirilsin:
“2022-yil 1-yanvardan boshlab, oliy taʼlim muassasalarining koʻchmas mulkini ijaraga berishdan tushgan mablagʻning 1 foizi Oʻzbekiston Respublikasi Davlat aktivlarini boshqarish agentligining hududiy boʻlinmalari huzuridagi davlat mulki ijara markazlariga, qolgan qismi esa elektron savdo maydonchasi operatoriga toʻlangan toʻlov chegirilgandan keyin — mazkur oliy taʼlim muassasasining rivojlantirish jamgʻarmasiga yoʻnaltiriladi”;
oltinchi — oʻninchi xatboshilar tegishincha yettinchi — oʻn birinchi xatboshilar deb hisoblansin;
b) Davlat mulkini ijaraga berish tartibi toʻgʻrisidagi nizomning 23-bandi quyidagi mazmundagi oltinchi xatboshi bilan toʻldirilsin:
“oliy taʼlim muassasalarining koʻchmas mulkini ijaraga berishdan tushgan mablagʻning 1 foizi Oʻzbekiston Respublikasi Davlat aktivlarini boshqarish agentligining hududiy boʻlinmalari huzuridagi davlat mulki ijara markazlariga, qolgan qismi esa elektron savdo maydonchasi operatoriga toʻlangan toʻlov chegirilgandan keyin — mazkur oliy taʼlim muassasasining rivojlantirish jamgʻarmasiga yoʻnaltiriladi”;
oltinchi — oʻn toʻrtinchi xatboshilar tegishlicha yettinchi — oʻn beshinchi xatboshilar deb hisoblansin.
14. Vazirlar Mahkamasining 2018-yil 15-fevraldagi “Adliya organlari va muassasalarining moddiy-texnika bazasini mustahkamlash chora-tadbirlari toʻgʻrisida”gi 124-son qarorining 5-bandidan “, shu jumladan Toshkent davlat yuridik universitetida oʻqitishning oshirilgan toʻlov-kontrakt summasini toʻlashdan tushadigan mablagʻlar” soʻzlari chiqarib tashlansin.
15. Vazirlar Mahkamasining 2018-yil 20-fevraldagi “Oʻzbekiston Respublikasi Vazirlar Mahkamasi huzuridagi Davlat test markazi faoliyatini yanada takomillashtirish toʻgʻrisida”gi 130-son qarorining 5-bandidan “oliy taʼlim muassasalarining oshirilgan toʻlov-kontrakt tushumlari (5 foizgacha miqdorda),” soʻzlari chiqarib tashlansin.
16. Vazirlar Mahkamasining 2019-yil 26-fevraldagi 172-son qarori bilan tasdiqlangan Oʻzbekiston Respublikasi Oliy va oʻrta maxsus taʼlim vazirligining Oliy taʼlim muassasalarini rivojlantirish jamgʻarmasi toʻgʻrisidagi nizomda:
a) 4-bandning ikkinchi xatboshisi quyidagi tahrirda bayon etilsin:
“oliy taʼlim muassasalarining toʻlov-kontrakt (shu jumladan, tabaqalashtirilgan toʻlov-kontrakt) shaklida oʻqitishdan tushadigan mablagʻlarining mazkur mablagʻlar boʻyicha moliya yili oxiriga qoldiq (tijorat banklarining depozitlariga joylashtirilgan mablagʻlar ham inobatga olingan holda) qismining 4 foizi miqdoridagi ajratmalar”;
b) 5-banddagi “1-aprelidan” soʻzlari “10-yanvaridan” soʻzlari bilan almashtirilsin.
(Qonunchilik maʼlumotlari milliy bazasi, 25.12.2021-y., 07/21/61/1195-son; 02.04.2022-y., 07/22/188/0259-son, 22.06.2022-y., 07/22/290/0563-son; 04.07.2023-y., 06/23/107/0441-son; 27.12.2025-y., 06/25/259/1224-son)
