Oʻzbekiston Respublikasi Prezidentining
Farmoni
Shartnomaviy munosabatlarni tubdan takomillashtirish chora-tadbirlari toʻgʻrisida
Fuqarolik-huquqiy munosabatlarni yanada takomillashtirish, ayrim shartnomalarni tuzishda oʻrnatilgan sunʼiy cheklovlarni olib tashlash, shuningdek, shartnomaviy munosabatlarda axborot tizimlaridan foydalanish uchun zarur shart-sharoitlar yaratish maqsadida:
1. Adliya vazirligi, Iqtisodiy taraqqiyot va kambagʻallikni qisqartirish vazirligi hamda Monopoliyaga qarshi kurashish qoʻmitasining 2021-yil 1-dekabrdan quyidagilarni bekor qilish haqidagi taklifiga rozilik berilsin:
tijorat banklariga yetkazib berilgan mahsulot (bajarilgan ishlar, koʻrsatilgan xizmatlar) uchun toʻlovlarni uchinchi shaxslar hisobidan qabul qilishga qoʻyilgan taqiqni;
davlat ulushi 50 foiz va undan yuqori boʻlgan xoʻjalik yurituvchi subyektlarning mahsulotlarni yetkazib berish (ishlarni bajarish, xizmatlarni koʻrsatish) toʻgʻrisida tuziladigan shartnomalarida majburiy ravishda oldindan toʻlovni belgilashga doir talabni;
qishloq xoʻjaligi va chorvachilik mahsulotlari yetishtiruvchilari va tayyorlov tashkilotlari oʻrtasida tuziladigan shartnomalarda majburiy ravishda avansni belgilashga doir talabni.
Taʼkidlansinki, ushbu bandning uchinchi va toʻrtinchi xatboshilarida nazarda tutilgan oldindan toʻlov va avans shartnoma taraflarining kelishuviga muvofiq belgilanadi.
2. Jismoniy shaxslarga qarz shartnomalarini notarial tasdiqlash orqali chet el valyutasida oʻzaro qarz berish va qaytarib olishga ruxsat berilsin.
Adliya vazirligi Moliya vazirligi bilan birgalikda ikki oy muddatda qarz shartnomasini notarial tasdiqlaganlik uchun hamda qarz shartnomasidan kelib chiqadigan pul summasini undirish boʻyicha ijro xatlarini yozib berganlik uchun undiriladigan davlat boji miqdorini ikki baravar kamaytirishni nazarda tutuvchi qonun loyihasini Vazirlar Mahkamasiga kiritsin.
3. Shunday tartib oʻrnatilsinki, unga koʻra, 2022-yil 1-yanvardan:
a) sud hujjatlari va boshqa organlar hujjatlarini ijro etishda mol-mulkni realizatsiya qilish boʻyicha elektron onlayn auksionda sotuvga qoʻyilgan mol-mulk uni sotishdan tushgan pul mablagʻlari hisobidan auksion gʻolibiga qarzlarsiz va taqiqlardan yechilgan holda topshiriladi. Bunda, mol-mulkni sotishdan tushgan pul mablagʻlari yetarli boʻlmaganda qarzdorlikni toʻlash majburiyati uning sobiq egasi — qarzdor zimmasida qoladi.
Auksion gʻolibi tomonidan mulkni qabul qilib olmaslikning quyidagi hollarida zakalat puli auksion gʻolibi murojaat qilgan kundan boshlab uch ish kuni ichida qaytarib berilishi shart:
auksionda sotilgan mol-mulk auksion obyektining koʻrsatilgan texnik tavsiflariga mos kelmasa;
mol-mulk auksionda sotilgunga qadar uchinchi shaxslarning egaligiga oʻtib ketgan boʻlsa va bu holat auksion yakunlanganidan soʻng aniqlansa;
b) shartnomaning tarafi ikkinchi tarafdan shartnoma boʻyicha majburiyatlarni toʻla yoki qisman bajarishini qabul qilgan yoxud shartnomaning amal qilishini boshqacha tarzda tasdiqlaganda, ushbu shartnomani keyinchalik haqiqiy emas deb topishni talab qilishga, agar bunday talab halollik prinsipiga zid boʻlsa, haqli emas;
v) xoʻjalik yurituvchi subyektlar tomonidan davlat xaridlari bilan bogʻliq tuziladigan shartnomalarda majburiy ravishda korrupsiyaga qarshi qoʻshimcha shartlar belgilanadi.
Shartnomaning tarafi va u tomonidan jalb qilingan shaxslar (yordamchi pudratchi tashkilotlar, agentlar va taraflar nazorati ostidagi boshqa shaxslar) tomonidan korrupsiyaga qarshi qoʻshimcha shartlarga rioya etilmaganda, ikkinchi taraf shartnomani bir taraflama toʻxtatib turishga, bekor qilishga hamda zararni qoplab berishni talab qilishga haqli boʻladi;
g) yuridik shaxslar va yakka tartibdagi tadbirkorlar tomonidan soliq va bojxona toʻlovlari boʻyicha qarzdorlik toʻlanmaganda, soliq yoki bojxona organlari bankka toʻlovchining hisobvaraqlaridagi qarzdorlik summasiga teng miqdordagi pul mablagʻlarini muzlatib qoʻyish va ularni oʻttiz kalendar kunidan soʻng undirish toʻgʻrisidagi farmoyishni bu haqda toʻlovchini xabardor qilgan holda yuboradi.
Xabarnoma olingan paytdan boshlab oʻttiz kalendar kun ichida toʻlovchi tomonidan ushbu farmoyish ustidan sudga shikoyat qilingan taqdirda, mijozning hisobvaragʻidan pul mablagʻlarini chiqarish yoki chiqarmaslik sudning qaroriga muvofiq amalga oshiriladi;
d) kommunal soha, energiya bilan taʼminlash, aloqa xizmati, yoʻlovchi va yuklarni tashish va boshqa shu kabi katta ijtimoiy ahamiyatga ega boʻlgan sohalarda tabiiy monopoliya subyektlari tomonidan ishlab chiqilgan ommaviy shartnomalar monopoliyaga qarshi kurashish organi bilan kelishilganidan soʻng isteʼmolchilar bilan tuziladi.
4. Namunaviy shartnomalarni qonunosti hujjatlar bilan tasdiqlash amaliyoti bekor qilinsin, qonun bilan toʻgʻridan-toʻgʻri taraflar uchun majburiy boʻlgan namunaviy shartnomalar tasdiqlanishi nazarda tutilgan hollar bundan mustasno.
5. Quyidagilar:
Fuqarolik-huquqiy tusdagi shartnomalarni tuzish va majburiyatlarni bajarishdagi munosabatlarni yanada takomillashtirish boʻyicha chora-tadbirlar rejasi 1-ilovaga muvofiq;
Fuqarolik-huquqiy tusdagi shartnomalar namunalarini ishlab chiqish boʻyicha “yoʻl xaritasi” 2-ilovaga muvofiq tasdiqlansin.
6. Adliya vazirligi, Axborot texnologiyalari va kommunikatsiyalarini rivojlantirish vazirligi, Markaziy bank va Savdo-sanoat palatasining elektron tijoratda elektron savdo maydonchalari orqali mahsulotlar oldi-sotdisi amalga oshirilayotganda va boshqa sohalarda bitimlar tuzishda eskrou tizimini joriy etish toʻgʻrisidagi taklifi maʼqullansin.
7. Fermer xoʻjaliklari va tayyorlov tashkilotlariga kontraktatsiya shartnomalarini axborot tizimlaridan foydalangan holda elektron shaklda tuzish va roʻyxatdan oʻtkazish tavsiya etilsin.
Qishloq xoʻjaligi vazirligi Axborot texnologiyalari va kommunikatsiyalarini rivojlantirish vazirligi bilan birgalikda uch oy muddatda kontraktatsiya shartnomalarini axborot tizimlaridan foydalangan holda elektron shaklda tuzish va roʻyxatdan oʻtkazish uchun zarur shart-sharoitlarni yaratsin.
8. Oliy sud sudlar tomonidan shartnomaviy-huquqiy munosabatlardan kelib chiqadigan nizolarni koʻrib chiqishda hamda shartnomalar shartlarini sharhlashda qonunchilik hujjatlarini qoʻllash boʻyicha sud amaliyotini tizimli ravishda, lekin kamida yarim yilda bir marta, tahlil qilsin va natijasi yuzasidan yagona huquqni qoʻllash amaliyotini shakllantirish uchun sudlarga tegishli koʻrsatmalar berib borsin.
9. Davlat boshqaruvi organlari, mahalliy ijro etuvchi hokimiyat organlari hamda kommunal soha va boshqa shu kabi sohalarda aholiga tovarlar yetkazib berish va xizmatlar koʻrsatishni amalga oshiruvchi davlat korxonalari ikki oy muddatda aholi va tadbirkorlik subyektlari bilan shartnomalar tuzishda axborot tizimlaridan keng foydalanish chora-tadbirlarini ishlab chiqsin va tasdiqlasin.
10. Moliya vazirligi davlat xaridlari boʻyicha maxsus axborot portalida xarid qilish tartib-taomillari ustidan jamoatchilik nazoratini yanada kuchaytirish maqsadida davlat buyurtmachilari tomonidan tuzilgan shartnomalar reyestriga:
tuzilgan shartnomalar hamda ularga oʻzgartirish kiritish toʻgʻrisidagi qoʻshimcha kelishuvlar boʻyicha barcha hujjatlar va axborotlar;
shartnomaning amal qilish muddati tugaganda, shartnoma bajarilganda yoki u bekor boʻlganda, davlat buyurtmachisi tomonidan shartnomaning bajarilishi yuzasidan hisobot majburiy ravishda joylashtirib borilishini taʼminlasin.
11. Monopoliyaga qarshi kurashish qoʻmitasi Adliya vazirligi bilan birgalikda uch oy muddatda tabiiy monopoliya subyektlari tomonidan ishlab chiqilgan ommaviy shartnomalarni isteʼmolchilarning huquqlariga rioya etilganligi, taraflarning tengligi tamoyillariga muvofiqligi nuqtai nazaridan tahlil qilsin hamda zaruratga koʻra ommaviy shartnomalarni qaytadan ishlab chiqish yuzasidan takliflarni Vazirlar Mahkamasiga kiritsin.
12. Investitsiyalar va tashqi savdo vazirligi Adliya vazirligi bilan birgalikda Oʻzbekiston Respublikasi Hukumati bilan tuziladigan energetika, kon-metallurgiya, aloqa sohasidagi investitsiya shartnomasi loyihalarini ishlab chiqish va kelishish bosqichida yetakchi xalqaro konsalting va yuridik kompaniyalarni jalb qilish hamda ularni moliyalashtirish manbalarini aniqlash boʻyicha takliflarni bir oy muddatda Vazirlar Mahkamasiga kiritsin.
13. Oliy va oʻrta maxsus taʼlim vazirligi 2022/2023 oʻquv yilidan boshlab oliy taʼlim muassasalarida oʻqitish boʻyicha shartnomalarning axborot tizimlaridan foydalangan holda elektron shaklda tuzilishi amaliyotini yoʻlga qoʻysin.
14. Adliya vazirligi:
Markaziy bank bilan birgalikda uch oy muddatda elektron tijoratni amalga oshirishda eskrou tizimidan foydalanish qoidalarini belgilovchi normativ-huquqiy hujjat loyihasini Vazirlar Mahkamasiga kiritsin;
Savdo-sanoat palatasi bilan hamkorlikda axborot tizimi orqali shartnomalarni imzolash, saqlash va joʻnatish boʻyicha xizmatlarni koʻrsatish sohasiga tadbirkorlik subyektlarini keng jalb qilish boʻyicha tadbirlarni amalga oshirsin.
15. Oʻzbekiston Respublikasi Prezidentining ayrim farmonlari 3-ilovaga muvofiq oʻz kuchini yoʻqotgan deb hisoblansin.
16. Adliya vazirligi:
a) Korrupsiyaga qarshi kurashish agentligi hamda Savdo-sanoat palatasi bilan birgalikda ikki oy muddatda xoʻjalik yurituvchi subyektlar tomonidan shartnomalar tuzishda qoʻllash uchun tavsiyaviy xarakterga ega boʻlgan korrupsiyaga qarshi qoʻshimcha shartlarni ishlab chiqsin va eʼlon qilsin;
b) uch oy muddatda shartnomalar namunalarini “yurxizmat.uz” maxsus axborot portaliga joylashtirsin va ularni qonunchilikka kiritiladigan oʻzgartirishlardan kelib chiqib nazorat holatida yuritsin;
v) manfaatdor vazirlik va idoralar bilan birgalikda:
ikki oy muddatda namunaviy shartnomalarni tasdiqlash toʻgʻrisidagi qonunosti hujjatlarni xatlovdan oʻtkazib, ushbu Farmonga nomuvofiq boʻlgan qonunosti hujjatlarni oʻzgartirish yoki bekor qilish yuzasidan tegishli takliflarni ularni qabul qilgan organga kiritsin;
uch oy muddatda qonunchilikka ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
17. Mazkur Farmonning ijrosini samarali tashkil qilishga masʼul va shaxsiy javobgar etib adliya vaziri R.Q. Davletov belgilansin.
Farmon ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2021-yil 14-sentabr,
PF-6313-son
Oʻzbekiston Respublikasi Prezidentining 2021-yil 14-sentabrdagi PF-6313-son Farmoniga
1-ILOVA
Fuqarolik-huquqiy tusdagi shartnomalarni tuzish va majburiyatlarni bajarishdagi munosabatlarni yanada takomillashtirish boʻyicha
CHORA-TADBIRLAR REJASI

T/r

Tadbirlarning nomlanishi

Amalga oshirish shakli

Amalga oshirish muddatlari

Masʼul ijrochilar

Vazirlik va idoralardan

Vazirlar Mahkamasidan

1.

Sud hujjatlari va boshqa organlar hujjatlarini ijro etishda mol-mulkni realizatsiya qilish boʻyicha elektron onlayn-auksionlarni tashkil etish va oʻtkazish tartibini takomillashtirish boʻyicha takliflar ishlab chiqish, shu jumladan:

gʻolib nomiga chiqarilgan bayonnomani elektron almashinuv tizimi orqali kadastr, bank, notarial idoralar va majburiy ijro boʻlimlariga yuborgan holda yutib olingan mol-mulkka egalik qilish huquqini avtomatik ravishda rasmiylashtirish tizimini joriy qilish;

elektron auksion savdo oldi va savdo jarayonlarini avtomatlashtirish, jumladan zakalat pulini inson omilisiz qaytarish tizimini yoʻlga qoʻyish;

elektron onlayn-auksion jarayonini ochiq va shaffof tashkil etish tartibini takomillashtirish.

Vazirlar Mahkamasi qarori loyihasi

2021-yil 1-noyabr

Davlat aktivlarini boshqarish agentligi

(Ortiqov),

Bosh prokuratura

(Yoʻldoshev),

Adliya vazirligi

(Davletov)

J. Qoʻchqorov,

D. Xolmurodov

2.

Qarz shartnomalarini notarial tasdiqlash boʻyicha quyidagilarni nazarda tutuvchi takliflarni ishlab chiqish:

jismoniy shaxslarga qarz shartnomalarini notarial tasdiqlash orqali chet el valyutasida qarz berish va qaytarib olishga ruxsat berish;

qarz shartnomasini notarial tasdiqlanganlik uchun hamda qarz shartnomasidan kelib chiqadigan pul summasini undirish boʻyicha ijro xatlarini yozib berganlik uchun amaldagi davlat boji miqdorini ikki marotaba kamaytirish.

Qonun loyihasi

2021-yil 1-dekabr

Adliya vazirligi

(Davletov),

Markaziy bank

(Zoxidov),

Moliya vazirligi

(Ishmetov)

D. Kalandarov,

M. Yakubov

3.

Oʻzbekiston Respublikasining “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi va “Masʼuliyati cheklangan hamda qoʻshimcha masʼuliyatli jamiyatlar toʻgʻrisida”gi qonunlariga xoʻjalik jamiyatining ijro etuvchi organi tomonidan yirik bitimlar yoki affillangan shaxslar bilan bitimlar tuzish tartibi buzilishi natijasida jamiyatga zarar yetkazilganda va bunda jamiyat direktorining, boshqaruv aʼzolarining yoki ishonchli boshqaruvchining aybi isbotlanganda, ular jamiyatning kreditorlarga yetkazgan zarardan kelib chiqadigan majburiyatlari boʻyicha jamiyat bilan bir qatorda subsidiar tarzda oʻz mulklari bilan javob berishini nazarda tutuvchi oʻzgartirish va qoʻshimchalar kiritish.

Qonun loyihasi

2021-yil 1-dekabr

Adliya vazirligi

(Davletov),

Davlat aktivlarini boshqarish agentligi

(Ortiqov)

J. Qoʻchqorov,

D. Xolmurodov

4.

Elektron tijoratni hamda boshqa sohalarda oldi-sotdini amalga oshirishda eskrou tizimidan foydalanish qoidalarini belgilash.

Normativ-huquqiy hujjatlar loyihalari

2021-yil 1-dekabr

Adliya vazirligi

(Davletov),

Markaziy bank

(Zoxidov),

Savdo-sanoat palatasi

(Jasimov),

Axborot texnologiyalari va kommunikatsiyalarini rivojlantirish vazirligi

(Sadikov)

O. Umarov,

Sh. Rajabbayev

5.

Elektron tizimda shartnomalarning tuzilishi, oʻzgartirilishi, bekor qilinishi va ularning saqlanishi tartibini ishlab chiqish.

Vazirlar Mahkamasi qarori loyihasi

2021-yil 1-dekabr

Monopoliyaga qarshi kurashish qoʻmitasi

(Sharaxmetov),

Axborot texnologiyalari va kommunikatsiyalarini rivojlantirish vazirligi

(Sadikov)

J. Qoʻchqorov,

D. Xolmurodov

6.

Tovar-xom ashyo birjalarida hisob-kitob-kliring operatsiyalarini oʻtkazish tartibini yanada takomillashtirish boʻyicha takliflar ishlab chiqish, bunda:

tovarlarning narxini sunʼiy ravishda oshirilishiga qarshi choralarni belgilash;

oldindan kelishish va til biriktirishlarni aniqlash va ularga chek qoʻyish boʻyicha choralarni koʻrishni nazarda tutish.

Vazirlar Mahkamasi qarori loyihasi

2021-yil 1-dekabr

Monopoliyaga qarshi kurashish qoʻmitasi

(Sharaxmetov),

Adliya vazirligi

(Davletov)

J. Qoʻchqorov,

D. Xolmurodov

7.

Fuqarolik-huquqiy tusdagi namunaviy shartnomalarni tasdiqlash toʻgʻrisidagi qonunosti hujjatlarni xatlovdan oʻtkazish va ularni qabul qilgan organlarga qonunosti hujjatlarni oʻzgartirish yoki bekor qilish boʻyicha tegishli takliflarni kiritish.

Takliflar

2021-yil 1-noyabr

Adliya vazirligi

(Davletov),

manfaatdor vazirlik va idoralar

D. Kalandarov,

M. Yakubov

8.

Davlat xaridlari boʻyicha maxsus axborot portalida oʻtkaziladigan xaridlarning ochiqligini quyidagilar orqali taʼminlash:

davlat buyurtmachilari tomonidan tuzilgan shartnomalar reyestriga tuzilgan shartnomalar hamda ularga oʻzgartirish kiritish boʻyicha qoʻshimcha kelishuvlarga oid barcha hujjatlar va axborotlarni;

shartnomaning amal qilish muddati tugaganda, shartnoma bajarilganda yoki u bekor boʻlganda davlat buyurtmachisi tomonidan shartnomaning bajarilishi yuzasidan hisobotni joylashtirib borish.

Tashkiliy chora-tadbirlar

2021-yil 1-noyabr

Moliya vazirligi

(Ishmetov),

“Oʻzbekiston respublika tovar-xom ashyo birjasi” AJ, davlat buyurtmachilari

J. Qoʻchqorov,

D. Xolmurodov

9.

Oʻzbekiston Respublikasining “Elektron raqamli imzo toʻgʻrisida”gi Qonuniga chet davlatlarning elektron raqamli imzolar kalitlari sertifikatlarini Oʻzbekiston Respublikasi hududida tan olish boʻyicha qoidalarni kiritish.

Qonun loyihasi

2021-yil 1-dekabr

Axborot texnologiyalari va kommunikatsiyalarini rivojlantirish vazirligi

(Sadikov),

Tashqi ishlar vazirligi

(Kamilov),

Adliya vazirligi

(Davletov)

O. Umarov,

Sh. Rajabbayev

10.

Oʻzbekiston Respublikasi hududida chiqarilgan elektron raqamli imzolar kalitlari sertifikatlarini chet davlatlarida tan olinishi yuzasidan takliflar ishlab chiqish va Vazirlar Mahkamasiga kiritish.

Tashkiliy chora-tadbirlar

2021-yil 1-dekabr

Axborot texnologiyalari va kommunikatsiyalarini rivojlantirish vazirligi

(Sadikov),

Tashqi ishlar vazirligi

(Komilov),

Investitsiyalar va tashqi savdo vazirligi

(Voitov)

O. Umarov,

Sh. Rajabbayev

11.

Aholi va tadbirkorlik subyektlari bilan shartnomalar tuzishda axborot tizimlaridan keng foydalanish boʻyicha chora-tadbirlarni ishlab chiqish va tasdiqlash.

Tashkiliy chora-tadbirlar

2021-yil 1-noyabr

Adliya vazirligi

(Davletov),

vazirlik va idoralar, mahalliy ijro etuvchi hokimiyat organlari, aholiga tovarlar yetkazib berish va xizmatlar koʻrsatishni amalga oshiruvchi davlat korxonalari

O. Umarov,

Sh. Rajabbayev

12.

Xoʻjalik yurituvchi subyektlar tomonidan shartnomalar tuzishda foydalanish uchun tavsiyaviy xarakterga ega boʻlgan korrupsiyaga qarshi qoʻshimcha shartlarni ishlab chiqish va eʼlon qilish.

Ijrochilarning qoʻshma qarori

2021-yil 1-noyabr

Adliya vazirligi

(Davletov),

Korrupsiyaga qarshi kurashish agentligi

(Burxanov),

Savdo-sanoat palatasi

(Jasimov)

D. Kalandarov,

M. Yakubov

13.

Tabiiy monopoliya subyektlari tomonidan ishlab chiqilgan ommaviy shartnomalarni isteʼmolchilarning huquqlariga rioya etilganligi, taraflarning tengligi tamoyillariga muvofiqligi nuqtai nazaridan tahlil qilish va natijasi yuzasidan axborot kiritish.

Tahliliy maʼlumot

2021-yil 1-dekabr

Monopoliyaga qarshi kurashish qoʻmitasi

(Sharaxmetov),

Adliya vazirligi

(Davletov),

manfaatdor vazirlik va idoralar

J. Qoʻchqorov,

D. Xolmurodov

14.

Kontraktatsiya shartnomalarini axborot tizimlaridan foydalangan holda elektron shaklda tuzish va roʻyxatdan oʻtkazish uchun zarur shart-sharoitlar yaratish.

Tashkiliy chora-tadbirlar

2021-yil 1-dekabr

Qishloq xoʻjaligi vazirligi

(Xodjayev),

Axborot texnologiyalari va kommunikatsiyalarini rivojlantirish vazirligi

(Sadikov)

Sh. Ganiyev,

T. Rapikov

15.

Bakalavriat taʼlim yoʻnalishlari va magistratura mutaxassisliklariga oʻqitish shartnomalarining axborot tizimlaridan foydalangan holda elektron shaklda tuzilishi amaliyotini yoʻlga qoʻyish.

Tashkiliy chora-tadbirlar

2022/2023 oʻquv yilidan boshlab

Oliy va oʻrta maxsus taʼlim vazirligi

(Toshkulov),

oliy taʼlim muassasalari

B. Musayev,

M. Vaxobov

16.

Sudlar tomonidan shartnomaviy-huquqiy munosabatlardan kelib chiqadigan nizolarni koʻrib chiqishda hamda shartnoma shartlarini sharhlashda qonun hujjatlarini qoʻllash boʻyicha sud amaliyotini tizimli ravishda tahlil qilish va natijasi yuzasidan sudlarda yagona amaliyotni shakllantirish uchun tavsiyalar ishlab chiqish.

Chora-tadbirlar rejasi

2022-yil 1-fevraldan boshlab har yarim yilda

Oliy sud

(Komilov),

Adliya vazirligi

(Davletov),

manfaatdor vazirlik va idoralar

17.

Oʻzbekiston Respublikasining “Xoʻjalik yurituvchi subyektlar faoliyatining shartnomaviy-huquqiy bazasi toʻgʻrisida”gi Qonunida mustahkamlangan davlat organlariga yuklatilgan xoʻjalik shartnomalarini tuzish, bajarish, oʻzgartirish va bekor qilish bilan bogʻliq boʻlgan ishlarni nazorat qilish kabi davlat aralashuvini oʻzida ifoda etuvchi vazifalarni chiqarib tashlash maqsadida, shuningdek, ushbu Qonundagi aksariyat qoidalar amaldagi qonunchilikdagi normalarni takrorlayotganligi bois, uni bekor qilish hamda zaruratga qarab shartnoma majburiyatlarini buzganlik uchun javobgarlik masalalarini Oʻzbekiston Respublikasi Fuqarolik kodeksida toʻliq aks ettirish boʻyicha takliflar ishlab chiqish.

Qonun loyihasi

2021-yil 1-dekabr

Adliya vazirligi

(Davletov),

Bosh prokuratura

(Yoʻldoshev),

Oliy sud

(Komilov),

Qishloq xoʻjaligi vazirligi

(Xodjayev),

Savdo-sanoat palatasi

(Jasimov)

J. Qoʻchqorov,

D. Xolmurodov

18.

Oʻzbekiston Respublikasining Maʼmuriy javobgarlik toʻgʻrisidagi kodeksida debitorlik va kreditorlik qarz muddatlarini oʻtkazib yuborganlik, shuningdek, shartnoma intizomini buzganlik uchun maʼmuriy javobgarlikni bekor qilishni nazarda tutuvchi qonun loyihasini ishlab chiqish.

Qonun loyihasi

2021-yil 1-noyabr

Adliya vazirligi

(Davletov),

Bosh prokuratura

(Yoʻldoshev),

Oliy sud

(Komilov),

Moliya vazirligi

(Ishmetov),

Davlat soliq qoʻmitasi

(Kudbiyev)

J. Qoʻchqorov,

D. Xolmurodov

Oʻzbekiston Respublikasi Prezidentining 2021-yil 14-sentabrdagi PF-6313-son Farmoniga
2-ILOVA
Fuqarolik-huquqiy tusdagi shartnomalar namunalarini ishlab chiqish boʻyicha
“YOʻL XARITASI”

T/r

Namunaviy shartnoma loyihasi nomi

Ishlab chiquvchilar

Adliya vazirligiga taqdim qilish muddati

1.

Qarz

Markaziy bank

2021-yil 1-noyabr

Kredit

Ipoteka

Pul talabnomasidan boshqa shaxs foydasiga voz kechish evaziga moliyalash

Bank omonati

Bank hisobvaragʻi

Garov

Kafillik

2.

Sugʻurta

Moliya vazirligi

2021-yil 1-noyabr

Tovarlar yetkazib berish toʻgʻrisidagi davlat kontrakti

Xarid qilish tartib-taomillarida ishtirok etish uchun zarur boʻlgan shartnomalar

Davlat-xususiy sherikchilik toʻgʻrisida shartnomalar

3.

Qurilish pudrati

Qurilish vazirligi

2021-yil 1-noyabr

Loyiha-qidiruv ishlari pudrati

Qurilish mahsulotlarini yetkazib berish

4.

Kontraktatsiya

Qishloq xoʻjaligi vazirligi

2021-yil 1-noyabr

Fermer xoʻjaligi tomonidan yer uchastkasini uzoq muddatli ijaraga olish

Qishloq xoʻjaligi kooperativi (shirkat xoʻjaligi) tomonidan yer uchastkasini uzoq muddatli ijaraga olish

Moddiy-texnika resurslarini yetkazib berish

Qishloq xoʻjaligiga moʻljallangan yerlarni ikkilamchi ijaraga berish

Qishloq xoʻjaligida foydalanishdan chiqib ketgan sugʻoriladigan yerlar va lalmi yerlarni investitsiya shartnomasi yoki davlat-xususiy sheriklik asosida ijaraga berish

Yaylovlar, boʻz yerlar, koʻp yillik dov-daraxtlarniinvestitsiya shartnomasi yoki davlat-xususiy sheriklik asosida ijaraga berish

5.

Oʻrmon fondining foydalanilmayotgan yerlarini davlat-xususiy sheriklik asosida ijaraga berish

Oʻrmon xoʻjaligi davlat qoʻmitasi

2021-yil 1-oktabr

6.

Texnik suv yetkazib berish

Suv xoʻjaligi vazirligi

2021-yil 1-noyabr

Kanallar, sugʻorish va kollektor-drenaj tarmoqlarining sohil boʻyidagi tuproq uyumlari egallagan maydonlardan muddatli (vaqtincha) foydalanish yoki ijaraga berish

Baliqchilik ahamiyatiga ega boʻlgan suv havzalarida (suv omborlarida) xoʻjalik faoliyatini yuritish

7.

Elektr taʼminoti

Energetika vazirligi

2021-yil 1-dekabr

Subisteʼmolchilarga elektr energiyasi yetkazib berish

Tabiiy gaz yetkazib berish

Aholiga suyultirilgan uglevodorod gazini yetkazib berish

Ijtimoiy soha obyektlariga suyultirilgan uglevodorod gazini yetkazib berish

Isteʼmolchiga maishiy gaz ballonini vaqtincha foydalanishga berish

8.

Transport vositalarining ijarasi

Transport vazirligi

2021-yil 1-noyabr

Temir yoʻlda yuk tashish (yuk turlari boʻyicha)

Yoʻlovchi, bagaj va yuk tashish

Shahar atrofi, shaharlararo va xalqaro yoʻlovchilar yoʻnalishlarida xizmat koʻrsatish

Lizing

Transport ekspeditsiyasi

Aeroport xizmatlarini koʻrsatish

9.

Binolar va inshootlar ijarasi

Davlat aktivlarini boshqarish agentligi

2021-yil 1-noyabr

Korxonani ijaraga berish

Mol-mulkni ishonchli boshqarish

Davlat uy-joy fondidagi turarjoyni ijaraga olish

Obyektni baholash

10.

Turistlar va turistik guruhlarni kuzatib borish

Ichki ishlar vazirligi

2021-yil 1-oktabr

Turizm namoyishi obyektida jamoat tartibini saqlash boʻyicha xizmat koʻrsatish

Fuqarolar gavjum boʻladigan joylarda jamoat tartibini saqlash va jamoat xavfsizligini taʼminlash xizmatlarini koʻrsatish

11.

Isteʼmolchilarga ichimlik va oqova suvi xizmatlarini koʻrsatish

Uy-joy kommunal xizmat koʻrsatish vazirligi

2021-yil 1-oktabr

Isteʼmolchilarga transport orqali ichimlik suvi yetkazib berish xizmatlarini koʻrsatish

Issiqlik taʼminoti, issiqlik energiyasi va issiq suv bilan taʼminlash

Koʻp kvartirali uyni boshqarish

12.

Jismoniy shaxslarga maishiy chiqindilarni toʻplash va olib chiqish boʻyicha xizmatlar koʻrsatish

Ekologiya va atrof-muhitni muhofaza qilish davlat qoʻmitasi

2021-yil 1-oktabr

Maishiy chiqindilarni toʻplash va olib chiqib ketish xizmatlarini koʻrsatish

Davlat ekologik ekspertizasidan oʻtkazish

Ovchilik xoʻjaligini yuritish uchun ov qilish joylarini berish

13.

Pullik taʼlim xizmatlarini koʻrsatish

Xalq taʼlimi vazirligi

2021-yil 1-oktabr

Darsliklarni ijaraga berish

Darsliklar va/yoki oʻquv-metodik qoʻllanmalarni bepul foydalanishga berish

14.

Pochta aloqasi xizmatlarini koʻrsatish

Axborot texnologiyalari va kommunikatsiyalarini rivojlantirish vazirligi

2021-yil 1-oktabr

Oʻzbekiston Respublikasi Prezidentining 2021-yil 14-sentabrdagi PF-6313-son Farmoniga
3-ILOVA
Oʻzbekiston Respublikasi Prezidentining oʻz kuchini yoʻqotgan deb eʼtirof etilayotgan ayrim farmonlari
ROʻYXATI
1. Oʻzbekiston Respublikasi Prezidentining “Xalq xoʻjaligida hisob-kitoblar oʻz vaqtida oʻtkazilishi uchun korxona va tashkilotlar rahbarlarining masʼuliyatini oshirish borasidagi chora-tadbirlar toʻgʻrisida” 1995-yil 12-maydagi PF-1154-son Farmonining 1-bandi.
2. Oʻzbekiston Respublikasi Prezidentining “Budjet bilan hisob-kitoblar uchun xoʻjalik yurituvchi subyektlarning masʼuliyatini oshirish chora-tadbirlari toʻgʻrisida” 1996-yil 9-avgustdagi PF-1504-son Farmonining 5-bandi.
3. Oʻzbekiston Respublikasi Prezidentining “Oʻzbekiston Respublikasi Prezidentining baʼzi farmonlariga qoʻshimchalar kiritish toʻgʻrisida” 2003-yil 4-iyuldagi PF-3274-son Farmonining 1-bandi ikkinchi xatboshisi.
Oldingi tahrirga qarang.
(4-band Oʻzbekiston Respublikasi Prezidentining 2025-yil 25-noyabrdagi PF-231-sonli Farmoniga asosan oʻz kuchini yoʻqotgan — Qonunchilik maʼlumotlari milliy bazasi, 26.11.2025-y., 06/25/231/1091-son)
5. Oʻzbekiston Respublikasi Prezidentining “Oʻzbekiston Respublikasi Prezidentining ayrim hujjatlariga qoʻshimchalar kiritish toʻgʻrisida” 2018-yil 12-iyuldagi PF-5476-son Farmoniga ilovaning 2-bandi.
6. Oʻzbekiston Respublikasi Prezidentining “Tovar bozorlarida savdoni yanada erkinlashtirish va raqobatni rivojlantirish chora-tadbirlari toʻgʻrisida” 2018-yil 30-oktabrdagi PF-5564-son Farmoniga 2-ilovaning 1-bandi.

(Qonunchilik maʼlumotlari milliy bazasi, 15.09.2021-y., 06/21/6313/0871-son; 26.11.2025-y., 06/25/231/1091-son)