|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
OʻZBEKISTON RESPUBLIKASI OLIY OʻQUV YuRTLARI UChUN TALABALARNI TEST USULIDA TANLASh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Oʻzbekiston Respublikasi Prezidentining “Oʻzbekiston Respublikasi oliy oʻquv yurtlari kunduzgi boʻlimlariga qabul qilish tizimini takomillashtirish toʻgʻrisida”gi Farmoniga muvofiq 1992-yilda talabalarni test usulida qabul qilishning ijobiy yakunlarini eʼtiborga olib, oliy oʻquv yurtlari rektorlari kengashining tavsiyalarini va keng jamoatchilikning istaklarini nazarda tutib, Vazirlar Mahkamasi qaror qiladi:
1. 1993-yilda barcha davlat oliy oʻquv yurtlarida, shuningdek respublikaning ruxsatnomasi boʻlgan oliy oʻquv yurtlarida barcha taʼlim shakllari boʻyicha talabalarni test usuli bilan tanlash joriy etilsin.
2. Test usuli bilan tanlashni amalga oshirish Oliy oʻquv yurtlariga talabalarni tanlab olish respublika markazi zimmasiga yuklatilsin.
3. Vazirlar Mahkamasining 1992-yil 9-apreldagi 181-son qarori bilan tashkil etilgan Oliy oʻquv yurtlariga talabalarni qabul qilish Davlat komissiyasining vakolati 1993-yilga uzaytirilsin.
4. Oʻzbekiston Respublikasi Oliy va oʻrta maxsus taʼlim vazirligi:
bir oy muddatda Respublika markazi bilan birgalikda oliy oʻquv yurtlarining birinchi kurslariga talabalar qabul qilish toʻgʻrisidagi nizomni ishlab chiqsin va uni tasdiqlash uchun Davlat komissiyasiga taqdim etsin, nizomda test sinovlariga qoʻshimcha ravishda baholashning koʻp balli tizimi asosida imtihonlar oʻtkaziladigan xalqaro, ijodiy, adabiy-badiiy va sport yoʻnalishlaridagi fanlar roʻyxati belgilab qoʻyilsin;
Vazirlar Mahkamasining 1992-yil 9-apreldagi 181-son qarorida koʻrsatilgan 19 ta oliy oʻquv yurtida 1992-93 oʻquv yilidan, qolganlarida esa 1993-94 oʻquv yilidan boshlab talabalarning joriy oʻzlashtirishlarini sinash uchun test usullari qoʻllanilishini taʼminlasin.
5. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, oliy oʻquv yurtlarining rektorlari test usulida sinash uchun barcha zarur shart-sharoitlarni taʼminlasinlar, boʻlajak talabalarga maishiy, tibbiy va transport xizmati koʻrsatish bilan bogʻliq masalalarni hal etsinlar.
6. Test oʻtkazish materiallarini avtomatik ravishda ishlov berish uchun Respublika markazida qoʻshimcha ravishda xodimlari soni 12 nafardan iborat boʻlgan kompyuterlashtirilgan tahlil Laboratoriyasi tashkil etilsin.
Respublika markazining shtat jadvali ilovaga* muvofiq tasdiqlansin.
* ilova rus tilidagi matnda berilgan.
7. Oʻzbekiston Respublikasi Istiqbolni belgilash va statistika davlat qoʻmitasi 1993-yilda test oʻtkazish Respublika markazi buyurtmanomasiga muvofiq xorijiy uskunalarni sotib olishga va joriy xarajatlarga valyuta fondidan 3 million AQSh dollari ajratsin, Oʻzbekiston Respublikasi Moliya vazirligi xarajatlarni soʻm bilan qoplashni belgilangan tartibda taʼminlasin.
Oʻzbekiston Respublikasi Tashqi iqtisodiy aloqalar vazirligi Respublika markazi uchun texnika vositalarini yetkazib bersin.
8. Test sinovlarini oʻtkazish bilan bogʻliq boʻlgan barcha chora-tadbirlarni bajarish uchun:
Oʻzbekiston Respublikasi Davlat matbuot qoʻmitasi — test materiallarini, ularning sifati, bezatilishi va muddatlariga qoʻyilgan talablarni hisobga olib, nashr etishni;
Oʻzbekiston Respublikasi Ichki ishlar vazirligi — test usuli bilan sinash joylarida test materiallari saqlanishini va jamoat tartibi saqlanishini;
Oʻzbekiston Respublikasi Aloqa vazirligi — test materiallari joylarga keltirilishini, saqlanishini va ularning maxfiyligini;
“Oʻzbekiston havo yoʻllari” milliy aviakompaniyasi — test usulida sinash materiallari va kuzatib boruvchilarning joylarga yetkazilishini;
Oʻzbekiston Respublikasi Davlat televideniye va radioeshittirish kompaniyasi — aholi keng doiralari orasida oliy oʻquv yurtlariga kirish chogʻida xolislik va adolatni taʼminlashda test usuli bilan sinashning ahamiyatini muntazam tushuntirib borishni taʼminlasinlar.
9. Oʻzbekiston Respublikasi Moliya vazirligi va “Oʻzshartnomasavdo” mazkur maqsadlarga zarur mablagʻ va resurslar ajratsinlar.
10. Toshkent shahar hokimligi Respublika markazini Bobur koʻchasidagi 22a-binoga joylashtirsin.
11. Oliy oʻquv yurtlariga talabalarni qabul qiladigan Davlat komissiyasi test bilan sinash tajribasini umumlashtirib, uni yanada takomillashtirish yuzasidan 1993-yilning oktyabr oyida Vazirlar Mahkamasiga takliflar kiritsin.
13. Qarorning bajarilishini nazorat qilish Bosh vazirning oʻrinbosari oʻrtoq M. Q. Qoraboyev zimmasiga yuklatilsin.
Vazirlar Mahkamasining Raisi I. KARIMOV
Toshkent sh.,
1993-yil 5-fevral,
61-son
