304-сон 17.05.2021. 2021-yil hosili uchun ekilgan boshoqli don hosilini oʻz vaqtida va sifatli oʻrib-yigʻib olishni tashkil etish chora-tadbirlari toʻgʻrisida

Hujjat kuchini yo‘qotgan " " 15.02.2025

O‘zbekiston Respublikasi Vazirlar Mahkamasining

qarori

2021-yil hosili uchun ekilgan boshoqli don hosilini o‘z vaqtida va sifatli o‘rib-yig‘ib olishni tashkil etish chora-tadbirlari to‘g‘risida

LexUZ sharhi

Mazkur qaror O‘zbekistan Respublikasi Vazirlar Mahkamasining 2025-yil 7-fevraldagi 67-sonli “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida”gi qaroriga asosan o‘z kuchini yo‘qotgan.

Respublikada koronavirus pandemiyasi davrida ichki bozorda don va un mahsulotlari barqaror mavjud bo‘lishini ta’minlash, aholiga arzon va sifatli oziq-ovqat mahsulotlari yetkazib berish hamda 2021-yil boshoqli don ekinlari hosilini qisqa muddatlarda nes-nobud qilmasdan o‘rib-yig‘ib olishni maqbul muddatda sifatli tashkil etish maqsadida Vazirlar Mahkamasi qaror qiladi:

1. G‘alla yetishtirish, xarid qilish va sotishga bozor tamoyillarini keng joriy etishni muvofiqlashtiruvchi Respublika kengashi (keyingi o‘rinlarda — Respublika kengashi):

jahon bozori konyunkturasi va mintaqaviy birjalarda kutilayotgan don narxlari hamda xo‘jaliklarning don yetishtirish xarajatlari tahlilidan kelib chiqib don va un mahsulotlari narxi keskin oshib ketishining oldini olish choralarini ko‘rsin;

Qoraqalpog‘iston Respublikasi Vazirlar Kengashi, viloyatlar va tuman (Quvasoy shahar) hokimliklarining takliflaridan kelib chiqib ichki bozorda don va non narxlari barqarorligini ta’minlash tadbirlarini amalga oshirish uchun 2021-yil hosilidan davlat resurslariga tovar va urug‘lik don xarid qilish hajmini 1-ilovaga muvofiq amalga oshirsin.

2. Qoraqalpog‘iston Respublikasi Vazirlar Kengashi, viloyatlar va tuman (Quvasoy shahar) hokimliklari, O‘zbekiston Respublikasi Qishloq xo‘jaligi vazirligi, Ichki ishlar vazirligi, Favqulodda vaziyatlar vazirligi, Transport vazirligi, Moliya vazirligi huzuridagi Qishloq xo‘jaligini davlat tomonidan qo‘llab-quvvatlash jamg‘armasi, O‘zbekiston fermer, dehqon xo‘jaliklari va tomorqa yer egalari kengashi, “O‘zagroservis” aksiyadorlik jamiyati va uning hududiy filiallari, “O‘zdonmahsulot” aksiyadorlik kompaniyasi hamda don korxonalari rahbarlari g‘alla o‘rim-yig‘imi mavsumida g‘alla o‘rish kombaynlaridan, don tashish uchun jalb etiladigan barcha turdagi transport vositalaridan samarali foydalanishni, shuningdek, don qabul qilinadigan shoxobchalar, xirmon maydonlari, don tozalash mashinalarining uzluksiz ishlashini va boshqa moddiy-texnika resurslaridan unumli foydalanishni tashkil etsin.

3. O‘zbekiston Respublikasi Qishloq xo‘jaligi vazirligi, Qoraqalpog‘iston Respublikasi Vazirlar Kengashi, viloyatlar va tumanlar hokimliklari, “O‘zdonmahsulot” aksiyadorlik kompaniyasi va uning joylardagi don korxonalari, g‘allachilik klasterlari rahbarlari, Vazirlar Mahkamasi huzuridagi Agrosanoat majmui ustidan nazorat qilish inspeksiyasi 2022-yil hosili uchun boshoqli don ekinlari urug‘ligining o‘z vaqtida va sifatli jamg‘arilishini ta’minlasin. Bunda urug‘lik don sifatining kafolatli bo‘lishini ta’minlash maqsadida urug‘lik g‘allani o‘rish uchun alohida o‘rim-yig‘im otryadlarini shakllantirsin hamda urug‘lik donning alohida saqlanishini tashkil etsin.

4. “O‘zdonmahsulot” aksiyadorlik kompaniyasi Vazirlar Mahkamasi huzuridagi Davlat zaxiralarini boshqarish qo‘mitasi, Agrosanoat majmui ustidan nazorat qilish inspeksiyasi bilan birgalikda “O‘zdonmahsulot” aksiyadorlik kompaniyasi tizimidagi elevator va don qabul qiluvchi va qayta ishlovchi korxonalardagi mavjud don “nol”ga tozalanishi va xatlovdan o‘tkazilishini ta’minlasin hamda tovar don (bug‘doy)ni xatlovdan o‘tkazish natijalari haqida 2021-yil 15-iyunga qadar Vazirlar Mahkamasiga ma’lumot bersin.

5. 2021-yil hosili uchun ekilgan g‘allani o‘z vaqtida va sifatli o‘rib-yig‘ib olishga ko‘maklashuvchi respublika ishchi guruhining tarkibi 2-ilovaga muvofiq tasdiqlansin.

Respublika ishchi guruhi (G‘aniyev) quyidagi vazifalarning bajarilishiga ko‘maklashsin:

2021-yil g‘alla hosilini qisqa muddatda nes-nobud qilmasdan o‘rib-yig‘ib olishni tashkil etish;

yanchilgan donni tashish va qabul qilish uchun yetarli miqdorda yoqilg‘i moylash materiallari zaxirasini yaratish;

ichki bozorda don narxlari barqarorligini ta’minlash tadbirlarini amalga oshirish uchun boshoqli don xarid qilish bo‘yicha tuzilgan kontraktatsiya shartnomalarining bajarilishi va qabul qilingan don uchun o‘z vaqtida hisob-kitoblar amalga oshirilishi yuzasidan monitoring olib borish;

xo‘jaliklar ixtiyorida qoladigan qo‘shimcha g‘allani tashkiliy-huquqiy shaklidan qat’i nazar, don qabul qiluvchi va qayta ishlovchi korxonalarda va g‘allachilik klasterlariga ichki bozorda shakllangan narxlarda sotishni tashkil etish va sotilgan g‘alla uchun o‘z vaqtida hisob-kitob qilinishi yuzasidan monitoring yuritish;

boshoqli don ekinlari pishib yetilishidan kelib chiqib, zarurat bo‘lgan hollarda, g‘alla o‘rim-yig‘imida qatnashadigan yuqori unumli g‘alla o‘rish kombaynlari respublikaning bir hududidan ikkinchi hududiga o‘tkazilishini tashkil etishda amaliy yordam ko‘rsatish.

6. O‘zbekiston Respublikasi Davlat statistika qo‘mitasi Iqtisodiy taraqqiyot va kambag‘allikni qisqartirish vazirligi, Qishloq xo‘jaligi vazirligi, “O‘zdonmahsulot” aksiyadorlik kompaniyasi bilan birgalikda:

g‘alla yetishtirish va ichki bozorda don narxlari barqarorligini ta’minlash tadbirlarini amalga oshirish uchun boshoqli don xarid qilish hajmlari to‘g‘risida taqdim etilayotgan statistik hisobotlarning ishonchliligi bo‘yicha qat’iy nazorat o‘rnatsin;

tashkiliy-huquqiy shaklidan qat’i nazar, barcha don qabul qiluvchi va qayta ishlovchi korxonalardagi va g‘allachilik klasterlari bilan birgalikda haqiqatda qabul qilingan don bo‘yicha statistik hisobot ma’lumotlari belgilangan tartibda Vazirlar Mahkamasiga kiritib borilishini va hisobot ma’lumotlarini buzib ko‘rsatish holatlari aniqlangan taqdirda, aybdor shaxslarga nisbatan qonunchilik hujjatlarida nazarda tutilgan javobgarlik choralari ko‘rilishini ta’minlasin.

7. “O‘zagroservis” aksiyadorlik jamiyati 2021-yil hosili uchun ekilgan boshoqli don ekinlari o‘rim-yig‘imida qatnashadigan yuqori unumli g‘alla o‘rish kombaynlarining ikki smenada to‘xtovsiz ishlashini ta’minlash uchun zarur chora-tadbirlarni belgilasin.

Vazirlar Mahkamasi huzuridagi Agrosanoat majmui ustidan nazorat qilish inspeksiyasi “O‘zagroservis” aksiyadorlik jamiyati bilan birgalikda 2021-yil 20-mayga qadar 2021-yil g‘alla o‘rimi mavsumida qatnashadigan mavjud g‘alla o‘rish kombaynlari mulk egalari tomonidan to‘liq ta’mirdan chiqarilib mavsumda to‘xtovsiz ishlashi uchun ehtiyot qismlar zaxirasi yaratilishini hamda Agrosanoat majmui ustidan nazorat qilish inspeksiyasining maxsus sertifikatlari asosida qabul qilinishini ta’minlasin.

8. Qoraqalpog‘iston Respublikasi Vazirlar Kengashi va viloyatlar hokimliklari O‘zbekiston Respublikasi Ichki ishlar vazirligi, Milliy gvardiya hamda Favqulodda vaziyatlar vazirligi bilan birgalikda yo‘llarda g‘alla o‘rim-yig‘imida qatnashadigan texnikalarning harakatlanishi xavfsizligini ta’minlash, yetishtirilgan hosilning talon-taroj qilinishiga va nobud bo‘lishiga yo‘l qo‘ymaslik hamda yong‘inlar kelib chiqishining oldini olish yuzasidan zarur chora-tadbirlar amalga oshirilishini ta’minlasin.

9. O‘zbekiston Respublikasi Energetika vazirligi, “O‘zbekneftgaz” aksiyadorlik jamiyati bilan birgalikda yoqilg‘i-moylash materiallarining zarur zaxirasini yaratsin hamda hosilni yig‘ishtirib olish, tashish va tayyorlash bilan band bo‘lgan qishloq xo‘jaligi korxonalari, mashina-traktor parklari va boshqa tashkilotlarga oldindan to‘lovlar asosida belgilangan tartibda yetkazib berilishini tashkil etsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining Agrar va oziq-ovqat sohalarini rivojlantirish masalalari bo‘yicha o‘rinbosari Sh.M. G‘aniyev zimmasiga yuklatilsin.

O‘zbekiston Respublikasining Bosh vaziri A. ARIPOV

Toshkent sh.,

2021-yil 17-may,

304-son

Vazirlar Mahkamasining 2021-yil 17-maydagi 304-son qaroriga
1-ILOVA

Qoraqalpog‘iston Respublikasi va viloyatlarda 2021-yil hosilidan davlat resurslariga tovar va urug‘lik don xarid qilish

HAJMI

				*tonna*
T/r	Hududlar nomi	Jami	Shundan
T/r	Hududlar nomi	Jami	tovar don	urug‘lik don
1.	Qoraqalpog‘iston Respublikasi	90 100	76 850	13 250
2.	Andijon	197 428	178 378	19 050
3.	Buxoro	135 572	120 472	15 100
4.	Jizzax	209 268	177 043	32 225
5.	Qashqadaryo	313 428	270 228	43 200
6.	Navoiy	85 035	75 135	9 900
7.	Namangan	175 978	159 038	16 940
8.	Samarqand	235 400	206 000	29 400
9.	Surxondaryo	203 220	180 020	23 200
10.	Sirdaryo	190 228	168 978	21 250
11.	Toshkent	266 040	238 530	27 510
12.	Farg‘ona	258 528	233 428	25 100
13.	Xorazm	74 200	65 900	8 300
JAMI:		2 434 425	2 150 000	284 425

Vazirlar Mahkamasining 2021-yil 17-maydagi 304-son qaroriga
2-ILOVA

2021-yil hosili uchun ekilgan g‘allani o‘z vaqtida va sifatli o‘rib-yig‘ib olishni tashkil etish bo‘yicha respublika ishchi guruhi

TARKIBI

Sh.M. G‘aniyev	—	O‘zbekiston Respublikasi Bosh vazirning agrar va oziq-ovqat sohalarini rivojlantirish masalalari bo‘yicha o‘rinbosari, Ishchi guruh rahbari
J.A. Xodjayev	—	qishloq xo‘jaligi vaziri, Ishchi guruh rahbari o‘rinbosari
S.S. Nishanbayev	—	ichki ishlar vazirining o‘rinbosari
Sh.J. Teshayev	—	qishloq xo‘jaligi vazirining birinchi o‘rinbosari
O.R. Isakov	—	moliya vazirining o‘rinbosari
I.I. Norqulov	—	iqtisodiy taraqqiyot va kambag‘allikni qisqartirish vazirining birinchi o‘rinbosari
A.X. Qo‘ldoshev	—	favqulodda vaziyatlar vazirining birinchi o‘rinbosari
B.R. Normatov	—	energetika vazirining o‘rinbosari
R.D. Usmanov	—	transport vazirining o‘rinbosari
A.D. Vaxabov	—	Vazirlar Mahkamasi huzuridagi Agrosanoat majmui ustidan nazorat qilish inspeksiyasi boshlig‘i
D.I. Xolmurodov	—	Davlat statistika qo‘mitasi raisining birinchi o‘rinbosari
D.N. Sattorov	—	“O‘zstandart” agentligi bosh direktori
F.J. Po‘latov	—	“O‘zdonmahsulot” aksiyadorlik kompaniyasi boshqaruv raisi
R.M. Xayitov	—	“O‘zagroservis” aksiyadorlik jamiyati boshqaruv raisi
A.A. Isroilov	—	Qishloq xo‘jaligini davlat tomonidan qo‘llab-quvvatlash jamg‘armasi direktori
R.U. Mamatqulov	—	AT “Agrobank” boshqaruvi raisi
B.X. Mamenov	—	Ichki ishlar vazirligi boshqarma boshlig‘ining o‘rinbosari
J.A. Karimov	—	Ichki ishlar vazirligi boshqarma boshlig‘ining birinchi o‘rinbosari
F.A. Abdurahmonov	—	“O‘zKeysservis” QK bosh direktori
S.N. Adilov	—	“O‘zKlaasservis” MChJ direktori
M.M. Irgashxodjayev	—	“Integral agro markaz” MChJ direktori

(Qonun hujjatlari ma’lumotlari milliy bazasi, 18.05.2021-y., 09/21/304/0458-son)