PQ-5009-сон 26.02.2021. Oʻzbekiston Respublikasi qishloq xoʻjaligini rivojlantirishning 2020-2030-yillarga moʻljallangan strategiyasida belgilangan vazifalarni 2021-yilda amalga oshirish chora-tadbirlari toʻgʻrisida

O‘zbekiston Respublikasi Prezidentining

qarori

O‘zbekiston Respublikasi qishloq xo‘jaligini rivojlantirishning 2020 — 2030-yillarga mo‘ljallangan strategiyasida belgilangan vazifalarni 2021-yilda amalga oshirish chora-tadbirlari to‘g‘risida

O‘zbekiston Respublikasi Prezidentining 2019-yil 23-oktabrdagi “O‘zbekiston Respublikasi qishloq xo‘jaligini rivojlantirishning 2020 — 2030-yillarga mo‘ljallangan strategiyasini tasdiqlash to‘g‘risida”gi PF-5853-son Farmoni ijrosini ta’minlash maqsadida:

1. O‘zbekiston Respublikasi qishloq xo‘jaligini rivojlantirishning 2020 — 2030-yillarga mo‘ljallangan strategiyasi doirasida 2021-yilda:

1) oziq-ovqat xavfsizligi bo‘yicha davlat siyosatini ishlab chiqish va joriy etish yo‘nalishida:

a) shakllangan dehqonchilik ko‘nikmalari, tuproq-iqlim sharoiti, suv ta’minotidan kelib chiqib, respublikaning barcha tumanlarining hududlari muayyan turdagi mahsulotlar yetishtirishga bosqichma-bosqich ixtisoslashtiriladi. Bunda:

qishloq xo‘jaligi ekinlarini joylashtirishda asosiy e’tibor uning hosildorligi, eksportbopligi, yaxlit maydonlarda yetishtirilishiga qaratiladi;

kooperatsiya va klaster tizimi asosida mahsulot yetishtirish, uni qayta ishlash, saqlash va ichki hamda tashqi bozorlarga sotish tizimi yo‘lga qo‘yiladi;

b) Qoraqalpog‘iston Respublikasi Vazirlar Kengashi va viloyatlar hokimliklari Qishloq xo‘jaligi vazirligi bilan birgalikda meva-sabzavot mahsulotlari eksportini oshirish uchun kamida bitta tuman hududini organik qishloq xo‘jaligi mahsulotlari yetishtirishga ixtisoslashtirsin;

v) Vazirlar Mahkamasi bir hafta muddatda mavjud ekin maydonlaridan samarali foydalanish, 2021-yil hosili uchun qishloq xo‘jaligi ekinlarini oqilona joylashtirish bo‘yicha hukumat qarorini qabul qilsin. Bunda, joriy yilda paxta maydonlarini 33,6 ming gektarga va g‘alla maydonlarini 40 ming gektarga qisqartirish hamda 320 ming gektar yerlarni foydalanishga kiritish hisobiga oziq-ovqat va ozuqa ekinlari maydonlari 193,6 ming gektarga kengaytiriladi;

g) Bog‘dorchilik va issiqxona xo‘jaligini rivojlantirish agentligi 2021-yil 1-apreldan boshlab Qoraqalpog‘iston Respublikasi hamda viloyatlarda hudud ixtisosligidan kelib chiqib, tuman hokimliklari zaxirasidagi yaxlit holda 300 gektargacha yer maydonlarida plantatsiya usulida intensiv bog‘ va tokzorlar barpo etish va yetti yil muddatda to‘lash sharti bilan aholiga sotish tizimini yo‘lga qo‘ysin.

Qoraqalpog‘iston Respublikasi Vazirlar Kengashi va viloyatlar hokimliklari yangi bog‘ va tokzorlar barpo etishga qishloq xo‘jaligida foydalanilmayotgan ochiq yer maydonlari, zaxirada turgan hosildorligi past bo‘lgan paxta va g‘alladan qisqargan maydonlar, yaroqsiz va iqtisodiy jihatdan samarasiz deb topilgan bog‘lar joylashgan yer maydonlari ajratilishini ta’minlasin;

d) kooperatsiya shartlarida qishloq xo‘jaligi mahsulotlarini yetishtirish uchun yoshlarga foydalanishga kiritiladigan yer maydonlari ijaraga beriladi, shuningdek, fermer xo‘jaliklari hamda boshqa qishloq xo‘jaligi korxonalarining ekin maydonlari ikkilamchi ijaraga beriladi;

Bunda, Qishloq xo‘jaligi vazirligi Bandlik va mehnat munosabatlari vazirligi, O‘zbekiston fermer, dehqon xo‘jaliklari va tomorqa yer egalari kengashi, Yoshlar ishlari agentligi bilan birgalikda:

yoshlar uchun ekin maydonlari, avvalo, aholi yashaydigan qishloq hududlariga yaqin yerlardan tanlanishiga, konturlar yaxlitligi saqlanishiga hamda yoshlarni qishloq xo‘jaligi mahsulotlari yetishtirishga o‘rgatish uchun tajribali agronomlar jalb qilinishiga;

yerlarni ekishga tayyorlash va ekinlarga ishlov berish uchun zarur bo‘lgan qishloq xo‘jaligi texnika va mexanizmlari, suv hamda ish qurollari bilan ta’minlashga;

yetishtirilgan qishloq xo‘jaligi mahsulotlarini ichki va tashqi bozorlarda sotishga ko‘maklashsin;

2) qulay agrobiznes muhitini va qo‘shilgan qiymat zanjirini yaratish yo‘nalishida shunday tartib o‘rnatilsinki, unga ko‘ra bir tumanda uchtagacha paxta-to‘qimachilik klasterlariga fermer xo‘jaliklari bilan shartnoma asosida faoliyat yuritishiga va fermer xo‘jaliklariga ushbu klasterlar bilan paxta xom ashyosini yetkazib berish bo‘yicha ixtiyoriy ravishda fyuchers shartnomalarini tuzish huquqi beriladi.

Qishloq xo‘jaligi vazirligi Adliya vazirligi, Iqtisodiy taraqqiyot va kambag‘allikni qisqartirish vazirligi, Moliya vazirligi, “O‘zto‘qimachiliksanoati” uyushmasi, Paxta-to‘qimachilik klasterlari uyushmasi, O‘zbekiston fermer, dehqon xo‘jaliklari va tomorqa yer egalari kengashi bilan birgalikda bir oy muddatda agroklasterlarni tashkil etish, ularga yer maydonlari ajratish, ular faoliyatining asosiy kafolatlarini va qo‘llab-quvvatlashni nazarda tutuvchi tartib va taomillarni ishlab chiqib, Vazirlar Mahkamasiga kiritsin;

3) yer va suv resurslaridan oqilona foydalanish yo‘nalishida:

a) yerning bozor qiymatini baholash hamda keyinchalik undan garov ta’minoti sifatida foydalanish amaliyoti tizimli yo‘lga qo‘yiladi. Bunda, Qishloq xo‘jaligi vazirligi, Bog‘dorchilik va issiqxona xo‘jaligini rivojlantirish agentligi birinchi navbatda, bog‘, tok va issiqxona joylashadigan maydonlarning bozor qiymatini aniqlash va garov ta’minoti sifatida foydalanish tartibini ishlab chiqib, Vazirlar Mahkamasiga kiritadi;

b) Qoraqalpog‘iston Respublikasi va viloyatlarda 2021-yilda qayta foydalanishga kiritiladigan va o‘zlashtiriladigan yer maydonlarining prognoz ko‘rsatkichlari 1-ilovaga muvofiq tasdiqlansin;

v) Suv xo‘jaligi vazirligi Qishloq xo‘jaligi vazirligi bilan birgalikda mavjud suv infratuzilmasini yaxshilashni nazarda tutuvchi 2021 — 2023-yillarga mo‘ljallangan chora-tadbirlarni belgilasin. Bunda:

1 758 km kanal, 443 km lotok, 329 ta gidrotexnika inshootlari, 1 899 km kollektor-drenaj, 728 km yopiq gorizontal va vertikal drenaj, 1 896 ta meliorativ kuzatuv quduqlari va boshqa obyektlarni qurish va rekonstruksiya qilish;

5 026 km magistral kanal, 45 595 km melioratsiya tarmoqlarini ta’mirlash va tiklash, 518 ta nasos agregatlari hamda 807 ta elektrodvigatellarni yangilash;

suv resurslaridan foydalanishni onlayn rejimda nazorat qilish, gidrologik postlarni raqamli texnologiyalar asosida avtomatlashtirilgan uskunalar bilan jihozlash, sug‘orishda suvni tejaydigan texnologiyalarni joriy qilish nazarda tutiladi;

4) qishloq xo‘jaligi tarmog‘ini qo‘llab-quvvatlashga yo‘naltirilgan davlat xarajatlarini bosqichma-bosqich diversifikatsiya qilish yo‘nalishida:

Oldingi tahrirga qarang.

(1-band “4” kichik bandining “a” kichik bandi O‘zbekiston Respublikasi Prezidentining 2023-yil 10-noyabrdagi PF-193-sonli Farmoniga asosan chiqarilgan — Qonunchilik ma’lumotlari milliy bazasi, 11.11.2023-y., 06/23/193/0844-son)

b) 2021-yil 31-dekabrga qadar mahalliy urug‘chilik xo‘jaliklaridan sertifikatlangan qishloq xo‘jaligi ekinlari urug‘lari va ko‘chatlarini sotib olgan qishloq xo‘jaligi mahsulotlari yetishtiruvchilarga sotib olingan urug‘ va ko‘chatlar qiymatining 20 foizigacha Davlat budjetidan qoplab beriladi;

v) limon yetishtiriladigan issiqxonalar barpo etishda muqobil energiya (tabiiy gazga nisbatan) orqali ishlaydigan isitish tizimini xarid qilish xarajatlarining bir qismini davlat budjetidan qoplash tartibi joriy etiladi.

Qishloq xo‘jaligi vazirligi (J.A. Xodjayev) Moliya vazirligi (T.A. Ishmetov) bilan birgalikda bir oy muddatda sertifikatlangan qishloq xo‘jaligi ekinlari urug‘lari va ko‘chatlari qiymatining, shuningdek limon yetishtiriladigan issiqxonalarni barpo etishda muqobil energiya orqali ishlaydigan isitish tizimini xarid qilish xarajatlarining bir qismini qoplash tartibini ishlab chiqsin va Vazirlar Mahkamasiga kiritsin;

g) Qishloq xo‘jaligi vazirligi Qoraqalpog‘iston Respublikasi Vazirlar Kengashi va viloyat hokimliklari bilan birgalikda qishloq xo‘jaligi mahsulotlari yetishtiruvchilarning talablari asosida viruslardan xoli, yuqori hosilli sertifikatlangan urug‘ va ko‘chatlarni yetishtirish va yetkazib berish tizimini samarali yo‘lga qo‘ysin;

d) 2021-yil 1-martdan boshlab “Har bir oila — tadbirkor” dasturi doirasida bog‘dorchilik, uzumchilik va limonchilikni rivojlantirish uchun aholiga ajratiladigan kreditlar muddati 3 yildan 7 yilgacha, imtiyozli davr esa 1 yildan 3 yilgacha uzaytiriladi.

Iqtisodiy taraqqiyot va kambag‘allikni qisqartirish vazirligi hamda Moliya vazirligi mazkur kichik bandga asosan ajratiladigan kreditlarni moliyaviy resurslar bilan ta’minlash choralarini ko‘rsin;

5) ilm-fan, ta’lim, axborot va maslahat xizmatlari tizimini rivojlantirish yo‘nalishida:

Qishloq xo‘jaligida bilim va innovatsiyalar milliy markazining tarkibidagi ilmiy muassasalarning yer maydonlarida tadbirkorlik subyektlarini shartnoma asosida jalb qilgan holda sabzavot, poliz va kartoshka, dukkakli, moyli ekinlar, mevali va tok ko‘chatlari yetishtirishni tashkil etsin;

hududlarda shakllangan dehqonchilik ko‘nikmalari va ilg‘or tajribalardan kelib chiqib, mahalliy sertifikatlangan yuqori hosilli va sifatli urug‘chilik hamda ko‘chatchilikni keng joriy etish maqsadida ilmiy-tadqiqot institutlari 2-ilovaga muvofiq tumanlarga biriktirilsin;

6) qishloq xo‘jaligi tarmog‘i statistikasining shaffof mexanizmini yaratish yo‘nalishida Qishloq xo‘jaligi vazirligi quyidagilarni nazarda tutuvchi 2021-yilda sohada axborot texnologiyalarini rivojlantirish choralarini ko‘rsin:

yerdan foydalanuvchilar reyestri bo‘yicha 3 mln gektardan ortiq sug‘oriladigan yerlarning monitoringini yo‘lga qo‘yish;

5 turdagi asosiy qishloq xo‘jaligi ekinlarining (paxta, g‘alla, sholi, kartoshka, moyli ekin) ekilishini kosmik sur’atlar yordamida tahlil qilish;

“ArcGIS” dasturi yordamida qishloq xo‘jaligi yerlarining asosiy va takroriy ekin turlari, hosildorlik darajasidan kelib chiqib, interfaol xaritada kuzatish imkoniyatiga ega yagona axborot bazasini shakllantirish hamda uning milliy geoaxborot tizimi bilan integratsiya qilinishini ta’minlash;

yer maydonlari va tuproq tarkibi to‘g‘risidagi axborotlar, ekinlarni joylashtirish, maqbul agrotexnik tadbirlarni amalga oshirish bo‘yicha va boshqa ilmiy-innovatsion yutuqlar va ilg‘or tajribalarni muntazam taqdim etish;

ustuvor qishloq xo‘jaligi mahsulotlari haqida bozor ma’lumotlarini keng ommaga ochiq taqdim etish;

yagona integratsion platformani axborot xizmatlari bilan boyitish, jumladan kadastr, ob-havo ma’lumotlari, arizalarni elektron rasmiylashtirish tizimi, kreditlash va subsidiyalash, agroxizmatlar, agroskouting xizmati, fitosanitariya xizmatlari, monitoring xizmatlari va boshqa qishloq xo‘jaligi jarayonlarini kuzatish tizimini joriy etish;

milliy geoaxborot tizimi bilan integratsiya qilish, yer va suv resurslari bo‘yicha uzluksiz ma’lumotlar almashinuvini ta’minlash.

2. Meva-sabzavotchilik klasterlari, fermer va dehqon xo‘jaliklari hamda boshqa mahsulot yetishtiruvchilarni qiynayotgan muammolarni o‘z vaqtida bartaraf etish, mamlakatning eksport salohiyatini hamda investitsion jozibadorlikni oshirish maqsadida tajriba-sinov tariqasida 2021-yilning yakuniga qadar faoliyat yuritadigan meva-sabzavotchilik tarmog‘ini qo‘llab-quvvatlash va yanada rivojlantirish Respublika kengashi (keyingi o‘rinlarda Kengash deb yuritiladi) 3-ilovaga muvofiq tarkibda tasdiqlansin.

Kengashning asosiy vazifalari etib:

bir oyda kamida bir marta joylardagi meva-sabzavotchilik tarmog‘iga oid muammoli masalalarni ko‘rib chiqish hamda ularni bartaraf etish;

meva-sabzavotchilik tarmog‘ini rivojlantirish bo‘yicha qabul qilingan qarorlar, shu jumladan O‘zbekiston Respublikasi Prezidentining joylarga tashrifi va yig‘ilishlaridagi topshiriqlari ijrosini ta’minlash;

o‘rganishlar asosida aniqlangan tizimli muammo va kamchiliklarni bartaraf etish maqsadida qonunchilikni yanada takomillashtirish bo‘yicha takliflarni ishlab chiqish belgilansin.

Belgilansinki, Kengashning ishchi organi funksiyasi Qishloq xo‘jaligi vazirligiga yuklatiladi.

3. Qoraqalpog‘iston Respublikasi Vazirlar Kengashi Raisining, viloyatlar hamda tumanlar (shaharlar) hokimlarining qishloq va suv xo‘jaligi masalalari bo‘yicha o‘rinbosarlari faoliyati samaradorligini baholashning asosiy mezonlari etib quyidagilar belgilansin:

qishloq xo‘jaligi ekinlarini joylashtirishda ekin turining hududlar tuproq-iqlim sharoitiga mosligi, hosildorligi, eksportbopligi, yaxlit maydonlarda yetishtirilishini ta’minlash;

har bir tumanda sertifikatlangan urug‘ va ko‘chatlarni yetishtirish hamda yetkazib berish tizimini yo‘lga qo‘yish;

xususiy sektorni keng jalb qilgan holda Organic, Global G.A.P. va boshqa xalqaro tan olingan standartlar talablariga muvofiq sinov laboratoriyalarini tashkil etishga ko‘maklashish;

hududlarning organik mahsulot ishlab chiqarish salohiyatidan foydalanish imkoniyatini oshirish, ilg‘or agrotexnologiyalar, innovatsiyalarni joriy etish;

tuproqni himoya qilish tizimi, pestitsid va o‘g‘itlarni me’yorda ishlatishni va kimyoviy vositalarning ular sifatini ilmiy asoslangan holda qo‘llanilishini nazorat qilish;

hududlarda suv xo‘jaligi infratuzilmasini yaxshilash va suv tejovchi texnologiyalarni keng joriy etish;

xususiy sektorni keng jalb qilgan holda, qishloq xo‘jaligi mahsulotlarini xalqaro talablar asosida, sifat va xavfsizlik ko‘rsatkichlari bo‘yicha to‘liq sinovdan o‘tkazish imkoniyatiga ega bo‘lgan laboratoriyalar, bojxona terminallari va boshqa xizmatlarni yo‘lga qo‘yish choralarini ko‘rish.

4. Quyidagilar:

har bir tumanni qishloq xo‘jaligi ekinlari muayyan turini yetishtirishga ixtisoslashtirishga — qishloq xo‘jaligi vazirining birinchi o‘rinbosari Sh.J. Teshayev;

qishloq xo‘jaligi ekinlari ekilishini hamda yerlarni foydalanishga kiritishni monitoring va nazorat qilishga — qishloq xo‘jaligi vazirining o‘rinbosari M.I. Ro‘zmetov;

mahsulot yetishtiruvchilarni urug‘ va ko‘chat bilan ta’minlashda ilmiy asoslangan tavsiyalarni joriy etishga — qishloq xo‘jaligi vazirining o‘rinbosari A.M. To‘rayev;

qishloq xo‘jaligini barqaror suv resurslari bilan ta’minlash, suv xo‘jaligi infratuzilmasini yaxshilash va suv tejovchi texnologiyalarni keng joriy etishga — suv xo‘jaligi vaziri Sh.R. Xamrayev;

qishloq xo‘jaligi mahsulotlari ishlab chiqaruvchilarni moliyaviy qo‘llab-quvvatlash va qishloq xo‘jaligini moliyalashtirish tizimiga qo‘shimcha mexanizmlar va moliyaviy vositalarni joriy etishga — qishloq xo‘jaligi vazirining o‘rinbosari Sh.Sh. Mirzayev;

qishloq xo‘jaligi va oziq-ovqat bozori monitoringini yuritish tizimiga axborot texnologiyalarini joriy qilishni kengaytirishga — qishloq xo‘jaligi vazirining axborot texnologiyalari bo‘yicha o‘rinbosari Q.A. Yuldashev shaxsan mas’ul etib belgilansin.

5. Bosh vazir o‘rinbosari Sh.M. G‘aniyev ikki hafta muddatda:

Qoraqalpog‘iston Respublikasi va viloyatlarda 2021-yilda qayta foydalanishga kiritiladigan va o‘zlashtiriladigan yer maydonlari bo‘yicha viloyatlar va tashabbuskorlar kesimida manzilli ro‘yxatni tasdiqlasin.

6. Qishloq xo‘jaligi vazirligi:

a) 2021-yil 1-avgustga qadar:

Iqtisodiy taraqqiyot va kambag‘allikni qisqartirish vazirligi, Sog‘liqni saqlash vazirligi, Veterinariya va chorvachilikni rivojlantirish davlat qo‘mitasi bilan birgalikda BMTning barqaror taraqqiyot maqsadlarida belgilangan Oziq-ovqat xavfsizligi bo‘yicha mezonlar va boshqa ilg‘or tajribalar asosida xalqaro ekspertlarni jalb etgan holda O‘zbekiston Respublikasining oziq-ovqat xavfsizligi va iste’moli bo‘yicha dasturini;

Ekologiya va atrof-muhitni muhofaza qilish davlat qo‘mitasi, Gidrometeorologiya xizmati, O‘rmon xo‘jaligi davlat qo‘mitasi bilan birgalikda qishloq xo‘jaligiga iqlim o‘zgarishi ta’sirining oldini olish va unga moslashish bo‘yicha harakatlar rejasini ishlab chiqib, Vazirlar Mahkamasiga tasdiqlash uchun kiritsin;

b) ikki oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin;

7. Mazkur qarorning ijrosini tashkil etishga mas’ul va shaxsiy javobgar etib Bosh vazir o‘rinbosari Sh.M. G‘aniyev, qishloq xo‘jaligi vaziri J.A. Xodjayev, Qoraqalpog‘iston Respublikasi Vazirlar Kengashi Raisi va viloyatlar hokimlari belgilansin.

Qaror ijrosini har chorakda muhokama qilib borish, ijro uchun mas’ul idoralar faoliyatini muvofiqlashtirish va nazorat qilish O‘zbekiston Respublikasining Bosh vaziri A.N. Aripov hamda O‘zbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.

O‘zbekiston Respublikasi Prezidenti Sh. MIRZIYOYEV

Toshkent sh.,

2021-yil 26-fevral,

PQ-5009-son

O‘zbekiston Respublikasi Prezidentining 2021-yil 26-fevraldagi PQ-5009-son qaroriga
1-ILOVA

Qoraqalpog‘iston Respublikasi va viloyatlarda 2021-yilda qayta foydalanishga kiritiladigan va o‘zlashtiriladigan yer maydonlarining

PROGNOZ KO‘RSATKICHLARI

				gektar
T/r	Hududlar	2021-yilda foydalanishga kiritiladigan yer maydoni	Shundan:
T/r	Hududlar	2021-yilda foydalanishga kiritiladigan yer maydoni	foydalanishdan chiqqan sug‘oriladigan yerlarni qayta foydalanishga kiritish	cho‘l-adir hududlaridagi lalmi va yaylov yerlarni o‘zlashtirish
1.	Qoraqalpog‘iston Respublikasi	17 000	17 000
2.	Andijon	11 002	685	10 317
3.	Buxoro	40 000	10 000	30 000
4.	Jizzax	28 000	11 555	16 445
5.	Qashqadaryo	45 000	11 000	34 000
6.	Navoiy	20 000	4 018	15 982
7.	Namangan	33 000	4 076	28 924
8.	Samarqand	30 000	3 950	26 050
9.	Surxondaryo	15 000	15 000
10.	Sirdaryo	23 000	17 709	5 291
11.	Toshkent	15 000	9 460	5 540
12.	Farg‘ona	23 000	15 558	7 442
13.	Xorazm	20 000	20 000
JAMI:		320 002	140 010	179 992

O‘zbekiston Respublikasi Prezidentining 2021-yil 26-fevraldagi PQ-5009-son qaroriga
2-ILOVA

Ixtisoslashuvdan kelib chiqib, ilmiy-tadqiqot institutlariga biriktirilgan hududlar

RO‘YXATI

T/r	Ilmiy-tadqiqot institutlari	Biriktirilgan hudud	Amalga oshiriladigan chora-tadbirlar
1.	Sholichilik ilmiy-tadqiqot instituti	Quyichirchiq	Institutda yaratilgan “Tarona” sholi navini maydonda shartnoma asosida birlamchi urug‘chiligini tashkil etish.
		Yangibozor, Gurlan, Qonliko‘l	Institutda yaratilgan shimoliy mintaqalarga mos sholi yangi va istiqbolli navlarini shartnoma asosida sertifikatlangan urug‘chiligini tashkil etish.
		Sirdaryo, Jalaquduq, Paxtaobod	Institutda yaratilgan sholining yangi va istiqbolli navlarini Sirdaryo viloyatining tuproq iqlim sharoitlarida ekologik sinovini o‘tkazish, tanlash va shartnoma asosida sertifikatlangan urug‘chiligini tashkil etish.
2.	Sabzavot, poliz ekinlari va kartoshkachilik ilmiy-tadqiqot instituti	Bo‘stonliq, Bulung‘ur, Yangiqo‘rg‘on	Institutda yaratilgan kartoshkaning “Piskom”, “Sarnav” navlarining shartnoma asosida onalik urug‘zorlarini tashkil etish.
		Andijon, Oltiariq	Institutda yaratilgan bodringning “Diyora F1”, “Sardor F1”, “Navbahor F1”, pomidorning “Barlos F1” gibridlarining shartnoma asosida urug‘chiligini tashkil etish.
		Muzrabod	Institutda yaratilgan ukropning “Orom”, karamning “Termiz 2500”, gulkaramning “Istiqlol” navlarining shartnoma asosida urug‘chiligini tashkil etish.
		Mirzaobod	Institutda yaratilgan qovunning “Oqurug‘”, “Zargilobi”, “Saxovat”, tarvuzning “Shirin” navlarining shartnoma asosida urug‘chiligini tashkil etish.
3.	Akademik M. Mirzayev nomidagi bog‘dorchilik, uzumchilik va vinochilik ilmiy-tadqiqot instituti	Oltiariq, Quva, Yangiqo‘rg‘on, Farg‘ona, Asaka, Jomboy, Bulung‘ur, Urgut, Shahrisabz, Kitob, Oltinsoy, Uzun, Sariosiyo	Institut hamda ilmiy-tajriba stansiyalarida jami 5 643,2 ming dona mevali va tok ko‘chatlari tayyorlash, jumladan, urug‘mevali ko‘chatlar 2 332,8 ming dona, danak mevali ko‘chatlar 633,2 ming dona, yong‘oq mevali ko‘chatlar 153,8 ming dona va tok ko‘chatlaridan 2 523,4 ming dona.
		Baxmal, Yakkabog‘	Hududning tuproq-iqlim sharoitlariga mos bo‘lgan istiqbolli navlardan 80 gektar maydonda olma, 50 gektar maydonda olxo‘ri jami 130 gektar maydonda bog‘ barpo qilish.
		Olot	Hududning tuproq-iqlim sharoitlariga mos bo‘lgan istiqbolli navlardan 100 gektar maydonda o‘rik bog‘i barpo qilish hamda noan’anaviy meva-uzum xom ashyolaridan “Livadiya-Buxara” MCHJ bilan hamkorlikda sukat, pastila va boshqa qayta ishlangan mahsulotlarni tayyorlash va sotish tizimini yo‘lga qo‘yish.
		Qamashi, Qumqo‘rg‘on	Limonning yuqori hosilli, kasalliklarga chidamli, eksportbop navlarini yaratish va ishlab chiqarishga joriy etish.
4.	Chorvachilik va parrandachilik ilmiy-tadqiqot instituti	Furqat, Oqdaryo, Olot, Qamashi, Sariosiyo	“Golshtin” naslli qoramolning jinsga ajratilgan urug‘ hamda embrionlari transplantatsiyasini o‘tkazish.
5.	Ipakchilik ilmiy-tadqiqot instituti	Marhamat	Institutda yaratilgan tut daraxtini “Jarariq 7” va “Marhamat 2017” navlarining yangi serhosil ko‘chatlarini ko‘paytirish va uni amaliyotga joriy etish.
6.	Paxta seleksiyasi, urug‘chiligi va yetishtirish agrotexnologiyalari ilmiy-tadqiqot instituti	Respublika hududlarida	Istiqbolli 14 ta o‘rta tolali, 4 ta ingichka tolali g‘o‘za navlari urug‘larini ko‘paytirish, jumladan o‘rta tolali 14 ta elita-urug‘chilik xo‘jaliklarida navlardan mos ravishda 30 gektardan 420 gektargacha urug‘chilik ko‘chatzorini tashkil etish va 4 600 tn elita urug‘lik chigit tayyorlash.
		Surxondaryo viloyati	Jarqo‘rg‘on va Termiz tumanlarida 4 ta elita-urug‘chilik xo‘jaliklarida ingichka tolali navlardan mos ravishda 30 gektardan 120 gektar urug‘chilik ko‘chatzorini tashkil etish va 1 000 tn elita urug‘lik chigit tayyorlash. Moliyaviy manbasi: 1,5 mlrd so‘m davlat grantlari, institutning budjetdan tashqari mablag‘lari va paxta-to‘qimachilik klasterlari mablag‘lari hisobidan.
		Surxondaryo va Toshkent viloyatlari	Surxondaryo va Toshkent viloyatlari paxta-to‘qimachilik klasterlari maydonida g‘o‘za parvarishida olib boriladigan agrotexnik tadbirlarni ilmiy asoslangan tavsiyalar asosida amalga oshirish. Moliyaviy manbasi: 1,5 mlrd so‘m davlat grantlari, institutning budjetdan tashqari mablag‘lari va paxta-to‘qimachilik klasterlari mablag‘lari hisobidan.
7.	Qishloq xo‘jaligi va oziq-ovqat sohasi iqtisodiyoti ilmiy-tadqiqot instituti	Mo‘ynoq	Qoraqalpog‘istonning qurg‘oqchil tumanlarida chorvachilik sohasi va ozuqa bazasini baholash metodologiyasi va indikatorlar tizimini ishlab chiqish. Qurg‘oqchil tumanlarda chorvachilik sohasi va ozuqa bazasini baholash bo‘yicha anketa so‘rovnomasini tayyorlash, so‘rovnomalarni o‘tkazish, ma’lumotlarni tahlil qilish va ma’lumotlar bazasini shakllantirish. Orolbo‘yi havzasidagi mavsumiy ozuqa balansi, ishlab chiqaruvchilar sohasi va bozorlar faoliyatini baholash.
8.	Qorako‘lchilik va cho‘l ekologiyasi ilmiy-tadqiqot instituti	Peshku	Qorako‘l zotli qo‘ylarning seleksiya va naslchilik ishlari, oziqlantirish, cho‘l ozuqabop ekinlar urug‘chiligini rivojlantirish.
9.	Qoraqalpog‘iston dehqonchilik ilmiy-tadqiqot instituti	Chimboy	Sholi yetishtiriladigan yer maydonlarida ekinlar hosildorligini oshirish, qisqa rotatsiyali almashlab ekish tizimiga o‘tish, ekinlar parvarishida resurs tejovchi agrotexnologiyalarni qo‘llashga qaratilgan ishlarni olib borish.
10.	Don va dukkakli ekinlar ilmiy-tadqiqot instituti	Respublika hududlarida	Institutda jami 1 087 tonna super elita urug‘lik tayyorlash, jumladan kuzgi bug‘doyni 28 ta navi 1 000 tn, soyani 10 ta navi 60 tn, kuzgi no‘xatni 2 ta navi 6,0 tn, ko‘k no‘xatni 1 ta navi 3 tn, tritikaleni 7 ta navi 18,0 tn.
		Andijon	Soyaning mahalliy va xorijiy navlarini asosiy ekin sifatida yetishtirish hamda respublikaning tuproq-iqlim sharoitlariga moslashuvchanligini o‘rganish.
		Paxtakor	Soyaning “To‘maris”, “Ustoz”, “Oltintoj”, “Gavhar” mahalliy navlarining elita urug‘chiligini tashkil etish.
11.	O‘simliklar genetik resurslari ilmiy-tadqiqot instituti	Shahrisabz, Zomin, Baxmal	850 gektar maydonga vinobop uzum navlari ko‘chatlarini yetkazish.
		Jarqo‘rg‘on, Qumqo‘rg‘on, Sho‘rchi, Angor, Termiz	Yevropa davlatlaridan olib kelingan 6 xil mevali ekinlarning (olma, nok, gilos, olxo‘ri, shaftoli, behi) 9 turdagi navidan 850 ming dona ko‘chatlar yetkazib berish.
		Yuqorichirchiq	Yumshoq bug‘doyning sariq zang kasalliklariga chidamli hosildor “G‘ozg‘on” va “Vassa” navlari hamda moshning tezpishar, tik o‘suvchi mexanizm yordamida o‘rishga moslashgan, eksport talablariga javob beradigan “Barqaror” navining sertifikatlangan urug‘larini shartnoma asosida yetkazib berish va ishlab chiqarishga joriy etish.
		Qo‘rg‘ontepa	Bug‘doyning hosildor, don sifati yuqori bo‘lgan, zang kasalliklariga chidamli “Hisorak” va “Grom” navlari va moshning eksport talablariga javob beradigan “Barqaror” navining sertifikatlangan urug‘larini shartnoma asosida yetkazib berish va ishlab chiqarishga joriy etish.
12.	Qishloq xo‘jaligini mexanizatsiyalash ilmiy-tadqiqot instituti	Beruniy, Quyichirchiq, Oltiariq, Rishton	Beruniy tumanidagi “Beruniy claster” MCHJning 200 gektar, Quyichirchiq tumanidagi “TST Klaster” MCHJning 300 gektar, Oltiariq tumanidagi “Namza expo art” MCHJning 200 gektar hamda Rishton tumanidagi “Rus-Uzbek tex” MCHJning 300 gektar maydonida shartnoma asosida agrotexnik mavsumlar davomida yangi texnika vositalaridan samarali foydalanishga ko‘maklashish.
13.	Lalmikor dehqonchilik ilmiy-tadqiqot instituti	Baxmal, G‘allaorol, Qamashi	Lalmikor maydonlar uchun boshoqli, dukkakli don, moyli va yem-xashak ekinlari urug‘chiligini yo‘lga qo‘yish, jumladan boshoqli don ekinlarining 16 ta navi — 1,2 mlrd so‘m, dukkakli don ekinlarining 7 ta navi — 60 mln so‘m, moyli ekinlarning 5 ta navi — 150 mln so‘m, yem-xashak ekinlarining 4 ta navi — 50 mln so‘mlik mahsulot 36 ta urug‘chilikka ixtisoslashgan fermer xo‘jaliklariga yetkazib berish.
14.	O‘simliklarni himoya qilish ilmiy-tadqiqot instituti	Paxtachi	Paxta, g‘alla, bog‘, tok va boshqa qishloq xo‘jaligi ekinlarini zararli organizmlar (zararkunanda, kasallik hamda begona o‘tlar)dan himoya qilish uchun uyg‘unlashgan kurash usullarini qo‘llash va joriy etish.
15.	O‘rmon xo‘jaligi ilmiy-tadqiqot instituti	Forish	3 ming gektar maydonda kovul yetishtirishni yo‘lga qo‘yishda ko‘maklashish.

O‘zbekiston Respublikasi Prezidentining 2021-yil 26-fevraldagi PQ-5009-son qaroriga
3-ILOVA

Meva-sabzavotchilik tarmog‘ini qo‘llab-quvvatlash va yanada rivojlantirish Respublika kengashi

TARKIBI

1.	Sh.M. G‘aniyev	—	O‘zbekiston Respublikasi Bosh vazirining o‘rinbosari, Respublika kengashi raisi
2.	J.A. Xodjayev	—	O‘zbekiston Respublikasi qishloq xo‘jaligi vaziri, Respublika kengashi raisining o‘rinbosari
3.	D.S. Kasimov	—	O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil
5.	Sh.J. Raximov	—	O‘zbekiston Respublikasi Bosh prokurori o‘rinbosari
6.	A.A. Kamalov	—	O‘zbekiston Respublikasi Markaziy banki raisi o‘rinbosari
7.	Sh.R. Xamrayev	—	O‘zbekiston Respublikasi suv xo‘jaligi vaziri
8.	I.I. Norkulov	—	O‘zbekiston Respublikasi iqtisodiy taraqqiyot va kambag‘allikni qisqartirish vaziri o‘rinbosari
9.	L.Sh. Kudratov	—	O‘zbekiston Respublikasi investitsiyalar va tashqi savdo vazirining birinchi o‘rinbosari
10.	M.M. Ikramov	—	O‘zbekiston Respublikasi adliya vazirining o‘rinbosari
11.	A.Ya. Xaydarov	—	O‘zbekiston Respublikasi moliya vazirining o‘rinbosari
12.	D.N. Sattarov	—	“O‘zstandart” agentligi bosh direktori
13.	M.M. Mirzayev	—	O‘zbekiston Respublikasi Davlat soliq qo‘mitasi raisining birinchi o‘rinbosari
14.	D.I. Xolmurodov	—	O‘zbekiston Respublikasi Davlat statistika qo‘mitasi raisining birinchi o‘rinbosari
15.	M.O. Saliyev	—	O‘zbekiston Respublikasi Davlat bojxona qo‘mitasi raisi o‘rinbosari
16.	F.K. Umarov	—	O‘zbekiston Respublikasi Davlat soliq qo‘mitasi huzuridagi Kadastr agentligi direktori
17.	A.D. Vaxabov	—	Agrosanoat majmui ustidan nazorat qilish inspeksiyasi boshlig‘i
18.	F.J. Po‘latov	—	“O‘zdonmahsulot” AK boshqaruvi raisi
19.	A.A. Xaitov	—	O‘zbekiston fermer, dehqon xo‘jaliklari va tomorqa yer egalari kengashi raisi
20.	F.D. Qirg‘izboyev	—	O‘zbekiston Respublikasi Qishloq xo‘jaligi vazirligi boshqarma boshlig‘i — Respublika kengashi kotibi

Izoh: Respublika kengashi a’zolari boshqa ishga o‘tgan taqdirda, uning tarkibiga ushbu lavozimlarga yangi tayinlangan yoki tegishli funksiyalarni bajarish yuklatilgan shaxslar kiritiladi.

(Qonun hujjatlari ma’lumotlari milliy bazasi, 27.02.2021-y., 07/21/5009/0164-son; Qonunchilik ma’lumotlari milliy bazasi, 10.06.2022-y., 06/22/150/0516-son; 11.11.2023-y., 06/23/193/0844-son)