Avtomobillar va qishloq xoʻjaligi texnikasi uchun shinalar ishlab chiqarishda foydalaniladigan kard toʻqimasini ishlab chiqarish boʻyicha respublikaning oʻz xom ashyo bazasini yaratish, shuningdek, Fargʻona kimyoviy tola zavodi zaminida kaprolaktamni qayta ishlovchi zavodni foydalanishga topshirilishini taʼminlash maqsadida Vazirlar Mahkamasi qaror qiladi:

1. Maʼlumot uchun qabul qilinsinki, “Oʻzkimyosanoat” uyushmasining Fargʻona kimyoviy tola zavodi “Xema Balke Dyurr” (Germaniya) firmasi bilan yiliga 7 ming tonna polmamid-6 tovar mahsulotini, shu jumladan 3,5 ming tonna shina kard toʻqimasini ishlab chiqaruvchi qiymati 102,4 mln Germaniya markasi boʻlgan texnologiya liniyasini yetkazib berish boʻyicha kontrakt tuzgan. Bu kontraktning amalga oshirilishi respublikaning mazkur mahsulotga boʻlgan ehtiyojini toʻliq qondirishni va yuqori likvidli tovarni eksport qilishni taʼminlaydi.

2. 1997-yil oktabri polivmid-6 va shina kard toʻqimasi ishlab chiqarishlarini qurish hamda foydalanishga topshirish muddati etib belgilansin.

“Xema Balke Dyurr” firmasi tomonidan amalga oshiriladigan loyihalashtirish va asbob-uskunalar, metall konstruksiyalarni yetkazib berish jadvaliga 1-ilovaga* muvofiq rozilik berilsin.

Oʻzbekiston Respublikasi pudrat loyiha va qurilish tashkilotlari tomonidan amalga oshiriladigan asosiy texnologik ishlab chiqarishlar, yordamchi obyektlar hamda muhandislik kommunikatsiyalari korpuslarini qurish jadvali 2-ilovaga* muvofiq tasdiqlansin.

3. “Oʻzsanoatxoʻjalikqurilish” davlat korporatsiyasi, “Oʻzmontajmaxsusqurilish” uyushmasi buyurtmachi — “Oʻzkimyosanoat” uyushmasi Fargʻona kimyoviy tola zavodi bilan birgalikda tasdiqlangan jadvalning soʻzsiz bajarilishini taʼminlasinlar.

4. Belgilab qoʻyilsinki, loyiha boʻyicha xarajatlarni mablagʻ bilan taʼminlash 3-ilovaga* muvofiq:

“GERMES” agentligi sugʻurta qoplashi hisobiga Germaniya AKA banklar konsorsiumi krediti, bu kontrakt qiymatining 85 foizini tashkil qiladi;

Oʻzbekiston Respublikasi Moliya vazirligi, vakil qilingan bank tomonidan Respublika valyuta fondi mablagʻlari hisobiga milliy valyutada belgilangan tartibda ochadigan krediti hisobiga amalga oshiriladi.

Kreditlarni va ular boʻyicha foizlarni milliy valyutada toʻlash 1999-yildan boshlab besh yil mobaynida shina kard toʻqimasini sotishdan olingan daromadlar hisobiga amalga oshiriladi.

5. Tashqi iqtisodiy faoliyat milliy banki:

bir oy muddatda Germaniya AKA banklar konsorsiumi bilan kredit bitimni belgilangan tartibda rasmiylashtirsin;

olinayotgan kredit resurslar bilan Fargʻona kimyoviy tola zavodini oʻz vaqtida mablagʻ bilan taʼminlashni amalga oshirsin,

6. Moliya vazirligi mazkur loyiha uchun olinayotgan kreditlar boʻyicha Hukumat kafolatini imzolashga vakil qilinsin.

7. Adliya vazirligi Germaniya tomoni talabnomalariga muvofiq Hukumat kafolatlari boʻyicha yuridik xulosani belglangan tartibda rasmiylashtirsin.

8. Davlat soliq qoʻmitasi, “Oʻzbekiston temir yoʻllari” kompaniyasi “Oʻzavtotrans” korporatsiyasi Fargʻona kimyoviy tola zavodi buyurtmanomasi boʻyicha keltirilayotgan asbob-uskunalar va moddiy resurslar boj hujjatlarining oʻz vaqtida rasmiylashtirilishini (uch kundan ortiq emas) va belgilangan joyga toʻsiqsiz yetkazib berilishini taʼminlasin.

9. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosari Yu.F. Paygin zimmasiga yuklansin.