O‘zbekiston banklari uchun malakali kadrlar tayyorlash va qayta tayyorlashni takomillashtirish, bank ishlarini tashkil etishning xalqaro standartlarini ta’minlash hamda moliya va kredit sohasidagi amaliy tadqiqotlarni rivojlantirish maqsadida Vazirlar Mahkamasi qaror qiladi:

1. Jahon iqtisodiyoti va diplomatiya Universitetining, O‘zbekiston Respublikasining bir qancha yetakchi banklarining Yevropa tiklash va taraqqiyot banki, Yevropa hamjamiyatli komissiyasi ishtirokida Xalqaro bank maktabi tashkil etish to‘g‘risidagi taklifi ma’qullansin.

2. Xalqaro bank maktabi quyidagi manzilga joylashtirilsin: Toshkent shahri, Buyuk ipak yo‘li ko‘chasi, 71-uy.

3. Jahon iqtisodiyoti va diplomatiya Universitetiga Maktabga tashkiliy, ilmiy va uslubiy rahbarlik qilishni, uning kadrlar tarkibini shakllantirishni amalga oshirish vazifasi yuklatilsin.

4. Jahon iqtisodiyoti va diplomatiya Universiteti Yevropa tiklash va taraqqiyot banki hamda boshqa muassislar bilan birgalikda, Maktabning 1993-yil 7-sentabrda ochilishini ta’minlash uchun, ta’sisi hujjatlarini, o‘quv rejalari va dasturlarini ishlab chiqsin.

5. Quyidagilar Maktabning asosiy vazifalari etib belgilansin:

xalqaro standartlarga javob beradigan bank xodimlarini tayyorlashni, qayta tayyorlashni va ularning malakasini oshirishni tashkil etish;

bank ta’limi sohasidagi jahon tajribalarini o‘rganish va ulardan foydalanish;

bank xodimlarini tayyorlash va ularning malakasini oshirish borasida xalqaro hamkorlikni rivojlantirish;

bank ishlari masalalari bo‘yicha ilmiy va o‘quv-uslubiy adabiyotlarni tayyorlash, nashr etish, ommalashtirish;

bank ishlarida amaliy ingliz tiliga o‘rgatishni tashkil qilish;

6. Ma’lumot uchun qabul qilinsinki, o‘quv jarayonini sifatli tashkil etish, uning amaliy yo‘nalishini ta’minlash maqsadida Maktab huzurida O‘zbekiston Respublikasi Tashqi iqtisodiy faoliyat milliy bankining o‘quv filiali tashkil qilinadi.

7. “O‘zbekturizm” milliy kompaniyasi, “O‘zbekiston havo yo‘llari” milliy aviyakompaniyasi Maktabda ishlashga taklif etilgan chet ellik mutaxassislarning istiqomat, ovqatlanish va transport xarajatlari uchun MDH fuqarolari uchun ko‘zda tutilgan narxlar bo‘yicha rublda haq olsinlar.

8. Maktabning professor-o‘qituvchilari tarkibi, ilmiy xodimlari va o‘quv-yordamchi xodimlariga O‘zbekiston Respublikasi Prezidentining “Respublika oliy va o‘rta maxsus o‘quv yurtlarining professor-o‘qituvchilari tarkibiga, ilmiy xodimlariga va o‘quv-yordamchi xodimlariga qo‘shimcha imtiyozlar berish haqida” 1992-yil 5-fevraldagi Farmonining amal qilishi tatbiq etilsin.

9. Maktab O‘zbekiston Respublikasi Prezidentining farmon va farmoyishlari, Vazirlar Mahkamasining qaror va farmoyishlari, respublika Oliy Kengashi sessiyalarining materiallari, “O‘zistiqbolstat” davlat qo‘mitasining materiallari bir nusxadan albatta yuboriladigan tashkilotlar ro‘yxatiga kiritilsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari O‘.T.Sultonov zimmasiga yuklatilsin.