Vazirlar Mahkamasi qaror qiladi:

1. Jahon iqtisodiyoti va diplomatiya Universitetining ilova qilinayotgan Ustavi tasdiqlansin.

2. Belgilansinki, quyidagilar:

rektorning birinchi oʻrinbosari Universitet rektorining tavsiyasiga binoan va Vazirlar Mahkamasining Raisi bilan kelishilgan holda Oʻzbekiston Respublikasining Bosh vaziri tomonidan lavozimga tayinlanadi va lavozimdan ozod etiladi;

yoʻnalishlar boʻyicha rektor oʻrinbosarlari va Universitet tarkibiy boʻlinmalarining, shuningdek, uning tarkibiga kiruvchi muassasa va tashkilotlarning rahbarlari amaldagi qonunchilikka va uning Ustaviga muvofiq shartnoma asosida Universitet rektori tomonidan tayinlanadilar.

3. Oʻzbekiston Respublikasi Moliya vazirligi Universitet faoliyati uchun zarur boʻlgan budjet mablagʻlarini bevosita Universitetga ajratishni amalga oshirsin. Budjet ajratmalari bir oʻqituvchi hisobiga besh talaba toʻgʻri kelishi — 1:5 nisbatidan kelib chiqqan holda belgilansin.

Oʻzbekiston Respublikasi Prezidentining “Jahon iqtisodiyoti va diplomatiya Universitetini tashkil etish toʻgʻrisida” 1992-yil 23-sentabrdagi Farmoniga binoan barpo etilgan Jahon iqtisodiyoti va diplomatiya Universiteti xalqaro munosabatlar, davlatlararo va tashqi iqtisodiy aloqalar, diplomatiya, xalqaro huquq va xalqaro jurnalistika sohasida yuqori malakali kadrlar tayyorlash boʻyicha bosh muassasa boʻlib hisoblanadi.

1. Jahon iqtisodiyoti va diplomatiya Universiteti (keyingi oʻrinlarda “Universitet” deb ataladi) yuridik shaxs hisoblanadi, mustaqil balansga, bank muassasalarida oʻzining hisob-kitob, valyuta va boshqa schyotlariga, gerbli muhrga, yumaloq muhrga, shtampga, emblemaga, tovar va firma belgilarga va oʻz faoliyati uchun zarur boʻlgan boshqa alomatlar va rekvizitlarga ega boʻladi.

Universitet oʻz faoliyatini Oʻzbekiston Respublikasi qonunchiligiga va mazkur Ustavga muvofiq amalga oshiradi.

Universitetning toʻliq nomi quyidagicha:

oʻzbek tilida — Jahon iqtisodiyoti va diplomatiya Universiteti;

ingliz tilida — University World Economy and of Diplomacy;

rus tilida — Universitet mirovoy ekonomiki i diplomatii.

2. Universitetning asosiy vazifalari quyidagilardan iborat:

xalqaro munosabatlar, diplomatiya, Jahon iqtisodiy va savdo aloqalari, xalqaro huquq va xalqaro jurnalistika sohasida malakali mutaxassislar, tarjimon-sinxronchilar tayyorlash;

valyuta-kredit va moliyaviy munosabatlar, menejment, marketing va savdo reklamalari, investitsiya faoliyati, xalqaro va savdo, bojxona va maʼmuriy huquq, shuningdek, hozirgi zamon siyosiy va iqtisodiy rivojlanishining muhim yoʻnalishlari sohasida davlat va tijorat tuzilmalari boshqaruv kadrlarini bosqichma-bosqich tayyorlash va qayta tayyorlash;

xalqaro iqtisodiy va siyosiy-huquqiy munosabatlarning oʻtkir muammolari sohasida fundamental va amaliy ilmiy-tadqiqotlarni tashkil etish va muvofiqlashtirish, ularning natijalarini respublikaning turli siyosiy tuzilmalari amaliy faoliyatlariga joriy etish;

Universitetning ixtisosini belgilovchi bilimlar tarmoqlari boʻyicha yuqori sifatli darsliklar, oʻquv qoʻllanmalari, oʻquv-uslubiy materiallar va ilmiy ishlar yaratish;

xalqaro iqtisodiy, moliyaviy, davlatlararo tashkilotlar va muassasalar, yetakchi xorijiy ilmiy va oʻquv markazlari, elchixonalar va savdo vakolatxonalari bilan amaliy aloqalar asosida xalqaro munosabatlar, iqtisodiyot, menejment, tashqi iqtisodiy aloqalar, xalqaro huquq, diplomatiya va jurnalistika sohalarida mutaxassislar tayyorlashning jahon tajribalarini oʻrganish, umumlashtirish va ulardan faol foydalanish;

xorijiy mamlakatlarning shunga oʻxshash ixtisosdagi universitetlari bilan ilmiy, madaniy va boshqa amaliy aloqalarni rivojlantirish va mustahkamlash, ular bilan hamkorlik qilish va oʻzaro yordamlashish toʻgʻrisida uzoq muddatli shartnomalar tuzish;

yuqorida qayd qilingan mutaxassisliklar boʻyicha yuqori malakali kadrlar tayyorlashda boshqa mamlakatlarning oʻquv yurtlari, davlat, jamoat va xususiy tuzilmalari, firmalari, banklari bilan oʻzaro hamkorlik qilish;

Universitet talabalari, tinglovchilari va xodimlarining chet ellarda ish oʻrganishlarini taʼminlash;

konsalting xizmatlari koʻrsatish;

innovatsion faoliyatni amalga oshirish, investitsiya dasturlarini ishlab chiqish va ularni tatbiq qilishda yordam koʻrsatish;

bank, sugʻurta faoliyati;

savdo-vositachilik va boshqa xil tijorat faoliyati;

yuqorida koʻrsatilgan yoʻnalishlar boʻyicha tashqi iqtisodiy aloqalar faoliyatini amalga oshirish.

Universitet Oʻzbekiston Respublikasi qonunchiligiga zid boʻlmagan boshqa har qanday faoliyat turlari bilan shugʻullanish huquqiga egadir.

3. Kadrlar quyidagi mutaxassisliklar boʻyicha tayyorlanadi:

xalqaro munosabatlar;

xalqaro huquq;

xalqaro iqtisodiy munosabatlar;

xalqaro jurnalistika.

Universitetni bitiruvchilarga quyidagi ixtisosliklar beriladi:

quyidagi sohalar boʻyicha fan bakalavrlari:

xalqaro munosabatlar;

xalqaro huquq;

xalqaro iqtisodiy munosabatlar;

xalqaro jurnalistika;

sinxron tarjima;

quyidagi sohalar boʻyicha fan magistrlari:

huquq va diplomatiya;

jahon iqtisodiyoti.

Universitetni tamomlab, fan magistri darajasini olganlarga oliy va oʻrta oʻquv yurtlarida tegishli fanlardan dars berish huquqi beriladi.

Respublika ehtiyojlaridan va Universitetning ustavi vazifalaridan kelib chiqqan holda boshqa mutaxassisliklar boʻyicha ham kadrlar tayyorlashni amalga oshirish mumkin.

4. Universitet huzuridagi Boshqaruv instituti yuqori malakali mutaxassislar tayyorlashni hamda ijtimoiy, siyosiy tizimlar, valyuta-kredit va moliyaviy munosabatlar, menejment, marketing va savdo reklamasi, bojxona va maʼmuriy huquq sohasidagi hamda hozirgi zamon siyosiy va iqtisodiy rivojlanishining boshqa yoʻnalishlari boʻyicha davlat muassasalari, korxonalari, jamoat tashkilotlari va tijorat tuzilmalarining boshqaruv kadrlarini qayta tayyorlashni taʼminlaydi.

Institut shartnoma asosida faoliyat koʻrsatadi hamda oʻquv mashgʻulotlarining turli xil zamonaviy usullari va shakllari (kompyuter texnikalari, zamonaviy axborot texnologiyalari bilan ishlash, muammoli bahslar, amaliy oʻyinlar oʻtkazish va boshqalar) dan foydalanish bilan oʻqitishning samaradorligi va amaliy yoʻnalishini taʼminlaydi, oʻquv fakultativlari va kurslarini tugatganligi va tegishli mutaxassislik hamda ixtisoslik berilganligi haqida diplomlar va guvohnomalar beradi.

5. Universitet huzuridagi diplomatiya kurslari oliy maʼlumotli mutaxassislardan diplomatiya va konsullik xizmatlari uchun kadrlar tayyorlashni va qayta tayyorlashni amalga oshiradi.

6. Universitetda kadrlarni tayyorlash va malakasini oshirishning quyidagi turlaridan foydalaniladi:

kollejda kunduzgi oʻqish (bakalavr) — 3—4 yil, ixtisoslashtirilgan maktablarda kunduzgi oʻqish (magistr) — kollejni tugatgandan soʻng 2—3 yil, diplomatiya kadrlarini kurs boʻyicha tayyorlash va qayta tayyorlash, aspirantura (doctor of philosophy), doktorantura (doctor of science), boshqaruv institutida kunduzgi oʻqish va oʻqishning boshqa shakllari.

7. Universitet oʻz oldiga qoʻyilgan vazifalarni amalga oshirish uchun quyidagi huquqlarga ega boʻladi:

oʻz huquq doirasiga kiritilgan va Oʻzbekiston Respublikasi qonunchiligiga va mazkur Ustavga zid kelmaydigan zarur qarorlarni qabul qilish va ishlarni amalga oshirish;

professor-oʻqituvchilar, ilmiy, oʻquv-yordamchi va maʼmuriy-xoʻjalik sohasi xodimlarining, talabalar, tinglovchilar, doktorantlar va aspirantlarning maʼnaviy imkoniyatlaridan unumli foydalanishni taʼminlay oladigan mehnatni tashkil etish va ragʻbatlantirish shakllarini belgilash;

ilmiy-pedagogik ishlarga yuqori malakali olimlar va mutaxassislarni shartnoma asosida qabul qilishni amalga oshirish, shuningdek, yetakchi oʻquv markazlarining vakillarini, shu jumladan, chet eldan jalb qilish;

Vazirlar Mahkamasi va Oliy attestatsiya komissiyasiga va Oʻzbekistonning boshqa muassasalariga siyosiy-huquqiy va iqtisodiy munosabatlar sohasidagi yangi yoʻnalishlar boʻyicha kadrlar tayyorlashga boʻlgan talablarni hisobga olib, oliy oʻquv yurtlari mutaxassisliklari va ixtisosliklari roʻyxatiga, ilmiy xodimlar mutaxassisliklari nomenklaturasiga oʻzgarishlar kiritish haqida takliflar taqdim etish;

oʻquv rejalari va dasturlarini mustaqil ravishda tasdiqlash, maxsus kurslar, fakultetlar mavzuini, professor-oʻqituvchilar tarkibining oʻquv, ilmiy, uslubiy ish koʻlamlari meʼyorlari va hajmlarini belgilash;

Universitetning ixtisosliklari boʻyicha, shu jumladan, shartnoma asosida ilmiy markazlar, kollejlar, institutlar, litseylar, ilmiy-tadqiqot, noshirlik muassasalari va tashkilotlari, kengashlar, boʻlimlar, laboratoriyalar tashkil etish;

ham vaqtinchalik, ham doimiy ishlovchi ijodiy, ishlab chiqarish va boshqa jamoalarni shakllantirish, shuningdek, ustav vazifalarini hal etish uchun alohida fuqarolarni jalb qilish;

qabul qoidalarini, talabalarni (shu jumladan, xorijliklarni) oʻqitishga, shuningdek, Universitetning ilmiy va boshqa ishlariga shartnomaviy narxlarni tasdiqlash;

shtat jadvalini tasdiqlash va oʻrtacha maoshlar hamda rahbarlar va mutaxassislar, oʻqituvchilar va talabalar sonining oliy oʻquv yurtlari uchun belgilangan nisbatlarini hisobga olmagan holda shartnomaviy maoshlar, shu jumladan, erkin almashtiriladigan valyutadagi maoshlar belgilash;

xodimlarning mehnatiga haq toʻlash shakllari va tizimini aniqlash, mehnatga haq toʻlash uchun mablagʻlardan foydalanish yoʻnalishlarini tanlash, jamoa va har bir xodimning mehnat ulushini hisobga olgan holda ish haqi fondini taqsimlash;

uskunalar, priborlar va qurilmalarni, materiallar va adabiyotlarni balansdan balansga oʻtkazish yoki sotish, eskirgan va yaroqsiz holga kelib qolgan asosiy vositalarni balanslardan chiqarib tashlash;

Universitetga ajratilgan mablagʻlar yoki oʻzining xususiy jamgʻarmalari hisobidan davlat yoki tijorat korxonalarining zarur asbob-uskunalarini va moddiy resurslarini sotib olish, ijaraga olish, ularga buyurtma berish;

oʻziga tegishli boʻlgan mol-mulkka, maʼnaviy va boshqa mulklarga, xoʻjalik yuritish va boshqa faoliyat natijasida olingan mahsulotlarga, daromadga, shuningdek, amaldagi qonunchilik bilan yoʻl qoʻyilishi mumkin boʻlgan boshqa asoslar boʻyicha olingan mulkka egalik qilish, ulardan foydalanish va ularni tasarruf etish;

oʻz nomidan shartnomalar tuzish, shaxsiy mol-mulkka egalik qilish va egalik qilmaslik huquqlariga ega boʻlish, sudda, hakamlar sudi va xolislik sudida daʼvogar va javob beruvchi boʻlish;

Universitet oldida turgan vazifalarni hal etish maqsadida ittifoqlarga, uyushmalarga va boshqa birlashmalarga ixtiyoriylik asosida kirish;

Oʻzbekiston Respublikasida va chet ellarda yuridik shaxs huquqiga ega boʻlgan, shuningdek, tijorat tusidagi korxonalar, tashkilotlar, muassasalar, shuningdek, filiallar, boʻlinmalar, vakolatxonalar taʼsis etish;

Oʻzbekiston Respublikasi davlat hokimiyati va boshqaruvi yuqori organlari tomonidan qabul qilingan tashqi siyosat va iqtisodiy dasturlar, bitimlar va qarorlar loyihalarining ilmiy, iqtisodiy huquqiy ekspertizasini oʻtkazish;

tashqi iqtisodiy faoliyatni amalga oshirish, Oʻzbekiston Respublikasida ham va chet ellarda ham xorijiy sheriklar bilan bitimlar tuzish va boshqa yuridik aktlarni imzolash;

Oʻzbekiston Respublikasida va chet ellarda, respublika va xorijiy tashkilotlar bilan birga qoʻshma korxonalar va muassasalar tashkil etish;

turli jamgʻarmalar tashkil etish iqtisodiy, ilmiy-texnikaviy va ijtimoiy taraqqiyot jamgʻarmalari, moddiy ragʻbatlantirish jamgʻarmasi, valyuta ajratmalari jamgʻarmasi va Universitetni rivojlantirishga yordam beruvchi boshqa jamgʻarmalar. Koʻrsatilgan jamgʻarmalarning mablagʻlari musodara qilinmaydi, ular kelgusida foydalanish uchun toʻplab borilishi mumkin;

kapital qurilishni va asosiy fondlarni qayta qurishni amalga oshirish;

moddiy bazani, sogʻlomlashtirish, davolash-profilaktika, madaniy, maishiy, kommunal muassasalarini va boshqa muassasalarni, umumiy ovqatlanish korxonalari va tashkilotlari tarmoqlarini rivojlantirish;

Oʻzbekiston Respublikasida va chet ellarda oʻz faoliyatini amalga oshirish uchun korxonalar, shuningdek, turli xildagi koʻchar va koʻchmas mol-mulklarga egalik qilish va ularni oʻzidan soqit qilish, ularni ijaraga olish va berish;

budjet mablagʻlari bilan bir qatorda ishlab topilgan va boshqa shaxslardan hamda tashkilotlardan olingan mablagʻlarni oʻz xohishiga koʻra Universitetning moddiy-texnika bazasini rivojlantirishga, mehnat haqi toʻlashga, moddiy ragʻbatlantirishga, talabalarning, xodimlarning va taklif etilgan mutaxassislarning turar joy-maishiy sharoitlarini yaxshilashga, shuningdek, mazkur Ustavda koʻzda tutilgan ijtimoiy va boshqa vazifalarni hal qilishga sarflash;

banklar va boshqa moliya muassasalarini tashkil etish, har qanday mamlakatning bank muassasalarida barcha turdagi hisob-kitob va joriy schyotlarni ochish, kredit olish va berish;

reklama-noshirlik va matbaachilik faoliyatini amalga oshirish;

innovatsion va investitsion faoliyatni amalga oshirish;

marketing, menejmentlik, konsalting, audit, injiniring, innovatsion faoliyat, axborot xizmati sohasidagi har xil moliyaviy, tijorat, vositachilik xizmatlarini bajarish;

savdo-vositachilik, savdo-xarid qilish, savdo va eksport-import aʼmollarini, shu jumladan, maʼnaviy mulk obyektlari bilan, tegishli tuzilmalarni yaratish va tashkil etish bilan, amalga oshirish;

ilmiy, ilmiy-texnik, ishlab chiqarish — texnika mahsulotlari, xalq isteʼmol mollari ishlab chiqarish va sotish;

Universitet tomonidan ishlab chiqarilgan mahsulotlar, tovarlar, buyumlarga hamda koʻrsatiladigan xizmatlarga mustaqil ravishda tariflar, narxlar belgilash;

qimmatbaho qogʻozlar ishlab chiqarishni amalga oshirish;

chet ellik olimlar, mutaxassislar, siyosiy va jamoat arboblariga Universitetning faxriy ilmiy unvonlarini berish (Jahon iqtisodiyoti va diplomatiya Universitetining Faxriy fan doktori).

Universitet respublikaning siyosiy va madaniy hayotida, progressiv xalqaro harakatda faol ishtirok etadi. Ilmiy, muhandis-texnik ziyolilar, talaba yoshlarning kuchlarini ijtimoiy hayotni demokratlashtirishga, huquqiy davlat barpo etishga, xalqlarni maʼnaviy va madaniy rivojlantirishga, xalqaro maydonda Oʻzbekistonning obroʻsini oshirishga yoʻnaltiradi. Bu maqsadda Universitet turli jamoatchilik jamgʻarmalari, qoʻllab-quvvatlash harakatlari, shu jumladan, xalqaro harakatlar tashkil etish huquqiga egadir.

8. Universitetga rahbarlik qilishni amaldagi qonunchilikka muvofiq rektor amalga oshiradi va uning butun faoliyati natijalari uchun toʻla javob beradi. U mazkur Ustavdan kelib chiqadigan va Universitet faoliyati bilan bogʻliq boʻlgan barcha vazifalarni hal qilishga haqlidir.

Rektor barcha tashkilot va muassasalarda Universitet nomidan vakillik qiladi hamda kreditlarni taqsimlovchi hisoblanadi. U oʻrinbosarlar va boshqa xodimlar oʻrtasida vazifalarni taqsimlaydi. Oʻz huquq va vazifalarining maʼlum qismini oʻrinbosarlariga beradi.

Rektor Oʻzbekiston Respublikasi Prezidenti huzuridagi Vazirlar Mahkamasi tomonidan lavozimga tayinlanadi va lavozimdan ozod etiladi.

Rektorning birinchi oʻrinbosari Oʻzbekiston Respublikasi Bosh vaziri tomonidan lavozimga tayinlanadi va lavozimdan ozod etiladi.

Rektorning yoʻnalishlar boʻyicha oʻrinbosarlari, tarkibiy boʻlinmalarning, shuningdek, Universitet tarkibiga kiruvchi muassasalar va tashkilotlarning rahbarlari amaldagi qonunchilikka muvofiq shartnoma asosida rektor tomonidan tayinlanadilar.

Universitet faoliyatining samaradorligini oshirishga va uning moddiy-texnika negizini mustahkamlashga yordam koʻrsatish maqsadida Universitet huzurida davlat hokimiyati va boshqaruv organlari, turli siyosiy harakatlar, respublika va xalqaro iqtisodiy va moliyaviy muassasalar, tashkilotlar, tijorat tuzilmalari vakillaridan iborat vasiylar Kengashi tashkil etiladi.

9. Ilmiy va oʻquv-ishlab chiqarish masalalarini bamaslahat koʻrib chiqish uchun Ilmiy kengash tashkil etiladi. Uning tarkibiga rektor, uning oʻrinbosarlari, oʻquv va ilmiy tarkibiy boʻlinmalarning, Universitet tarkibiga kiruvchi muassasalar va tashkilotlarning rahbarlari, respublikaning va xorijiy mamlakatlarning yetakchi olimlari va mutaxassislari kiradilar. Ilmiy kengashning raisi Universitet rektori hisoblanadi.

Ilmiy kengash oʻquv jarayonini tashkil etish, ilmiy-pedagogik kadrlar tayyorlash va ularning malakasini oshirish, ilmiy tadqiqotlarni rejalashtirish, manfaatdor ilmiy va oʻquv idoralari, muassasalar va tashkilotlar bilan hamkorlik qilishning barcha masalalari yuzasidan qarorlar qabul qiladi, ilmiy va uslubiy maʼlumotlar va axborotlarni muhokama qiladi, ilmiy ishlarni nashr qilish va saqlashga tavsiya etadi, ilmiy va faxriy unvonlarni berish toʻgʻrisida iltimosnomalar beradi, chet ellik olimlarga, mutaxassislarga, siyosiy va jamoat arboblariga Universitetning faxriy ilmiy unvonlarini beradi.

Ilmiy kengashning qarorlari rektor tomonidan tasdiqlangandan soʻng kuchga kiradi.

10. Universitetda ijro etuvchi organ — rektorat faoliyat koʻrsatadi. Uning tarkibi, vazifalari va faoliyat koʻrsatish tartibi rektor tomonidan belgilanadi. Rektorat Universitet faoliyatining kundalik masalalarini muntazam ravishda koʻrib boradi va ular yuzasidan rektor tomonidan tasdiqlangandan soʻng bajarilishi shart boʻlgan qarorlar qabul qiladi. Rektorat zimmasiga Universitetning barcha boʻlinmalari faoliyatini nazorat qilish va muvofiqlashtirish, oʻquv-tarbiyaviy, ilmiy-tadqiqot, xoʻjalik va boshqa tuzilmalarning amaliy ishlarini tashkil etish va hokazolar yuklatiladi.

11. Kadrlar tayyorlashning asosiy yoʻnalishlariga muvofiq Universitetda markazlar, kollejlar, litseylar, fakultetlar, institutlar, kurslar, kafedralar, boʻlimlar, dasturlar tashkil etiladi, ularning faoliyatiga rektor tomonidan tayinlangan rahbarlar (direktorlar, mudirlar va boshqalar) boshchilik qiladilar.

Universitetning, uning tarkibiy boʻlinmalari, muassasalari, tashkilotlari va korxonalarining tuzilmasi va shtat jadvali rektor tomonidan tasdiqlanadi.

12. Universitetda oʻquv, tarbiyaviy va ilmiy-tadqiqot jarayonlarini samarali tashkil etish uchun zarur shart-sharoitlarni taʼminlovchi oʻquv boʻlinmalari, tahririyat-noshirlik boʻlimi, kutubxona, nashriyot, ilmiy-tashkiliy, muhandis-texnik va boshqa xizmatlar hamda boʻlinmalar tashkil etiladi.

13. Talabalar kontingenti test tanlovi yoʻli bilan butlanadi. Boshqaruv instituti va diplomatik kurslarga qabul qilish tegishli vazirliklar, idoralar, tijorat tuzilmalarining yoʻllanmalari, fuqarolarning, chet ellik yuridik va jismoniy shaxslarning arizalari boʻyicha amalga oshiriladi.

14. Universitetda oʻqish uchun haq toʻlash shartlari talabaga, oʻqishdagi yuqori koʻrsatkichlarni hisobga olib respublika budjetidan ajratilgan kreditlarni toʻliq toʻlashgacha boʻlgan xarajatlarni tabaqalashtirilgan holda qoplashni nazarda tutadi.

15. Boshqa mamlakatlardan talabalarni qabul qilish shartnoma asosida amalga oshiriladi.

16. Universitet professor-oʻqituvchilar va ilmiy xodimlarning shtat lavozimlarini Oʻzbekiston Respublikasining amaldagi qonunchiligi, xalqaro meʼyorlar va amaliyotga muvofiq mustaqil ravishda belgilaydi.

Ilmiy-pedagog xodimlar lavozimlarini egallash, odatda. shartnoma asosida amalga oshiriladi.

17. Universitetda professor-oʻqituvchilar tarkibi va xodimlarning malakasini oshirishning, shu jumladan, chet ellardagi oʻquv va ilmiy markazlarda ish oʻrganishning turli shakllaridan foydalaniladi.

18. Universitetda Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi talablariga muvofiq dissertatsiyalarni himoya qilish boʻyicha ixtisoslashtirilgan kengashlar tashkil etilishi mumkin.

19. Universitet mol-mulkini oʻzining balansida turgan, shu jumladan, xoʻjalik, tijorat, ilmiy-texnika va boshqa xoʻjalik faoliyati natijasida sotib olingan binolar, inshootlar, asbob-uskunalar va boshqa mol-mulklar tashkil etadi.

20. Universitet mablagʻlari quyidagilar hisobiga shakllanadi:

budjet mablagʻlari;

Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlangan Jahon iqtisodiyoti va diplomatiya universitetida oʻqitish shartlari va toʻlanadigan haq miqdorlari haqidagi Nizomga asosan Universitetda oʻqish uchun toʻlovlar;

talabalarni tayyorlash va mutaxassislarni qayta tayyorlash uchun xarajatlarni qoplash tartibida vazirliklar va idoralar, konsernlar, uyushmalar, korxonalar, tashkilotlar tomonidan Universitet hisobiga oʻtkazilgan mablagʻlar;

ijtimoiy buyurtmalar va ijodiy ishlarni bajarish, mahsulotlarni sotish, Universitet huzurida tashkil etilgan xoʻjalik hisobidagi, tijorat tuzilmalarining ajratmalari boʻyicha xoʻjalik hisobi faoliyatidan, aholiga pulli xizmat koʻrsatishdan olingan daromadlar;

bank kreditlari;

respublika va xorijiy korxonalar, tashkilotlar, tijorat tuzilmalarining, alohida shaxslarning ixtiyoriy badallari;

Oʻzbekiston Respublikasi qonunlari bilan taqiqlanmagan boshqa manbalar.

21. Xoʻjalik, ilmiy-texnika yoki boshqa xoʻjalik hisobidagi faoliyat natijasida olingan, shuningdek, xayriya, homiylik va boshqa tekin badal hisobiga olingan mol-mulk va mablagʻlar Universitetning oʻz mulki hisoblanadi.

22. Budjet boʻyicha va kreditorlar bilan hisob-kitob qilingandan soʻng Universitet tasarrufida qolgan daromad zarur jamgʻarmalarni tashkil etishga sarflanadi. Universitet jamgʻarmalariga oʻtkaziladigan pullarning meʼyorlari, hajmlari va tartibi Universitet rektori tomonidan tasdiqlangan jamgʻarmalar va ulardan foydalanish haqidagi Nizom bilan belgilanadi.

23. Universitet jamgʻarmalari toʻlaligicha Universitet ixtiyorida boʻladi. Ulardan foydalanish haqidagi shoshilinch qarorlar Universitet rektori tomonidan qabul qilinadi.

24. Universitet faoliyatini toʻxtatish Oʻzbekiston Respublikasi qonunchiligi bilan belgilangan tartibda, qayta tashkil etish (qoʻshish, birlashtirish, boʻlish, ajratish, qayta tashkil etish) yoki tugatish shaklida amalga oshiriladi.

25. Ustavga oʻzgarishlar va qoʻshimchalar kiritish Universitet Ilmiy kengashi tomonidan koʻrib chiqiladi va Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlangandan va tegishli hokimlikda qayta roʻyxatdan oʻtkazilgandan soʻng rektor tomonidan amalga kiritiladi.