Oʻzbekiston Respublikasi Fan va texnika davlat qoʻmitasiga yuklatilgan vazifalarni amalda roʻyobga chiqarish maqsadida Vazirlar Mahkamasi qaror qiladi:

1. Ilova qilinayotgan Oʻzbekiston Respublikasi Fan va texnika davlat qoʻmitasi toʻgʻrisidagi Nizom hamda Respublika ilmiy-texnika va patent-litsenziya axboroti toʻgʻrisidagi Nizom tasdiqlansin.

2. Oʻzbekiston Respublikasi Fan va texnika davlat qoʻmitasi zimmasiga avval belgilangan funksiyalarga qoʻshimcha ravishda fan va texnikani rivojlantirish istiqbollarini ishlab chiqishni tashkil etish, har yilgi rivojlanish istiqbollarini shakllantirish, respublika budjetidan ajratiladigan mablagʻlar loyihalarini tayyorlash hamda fan va texnika sohasida davlat buyurtmalarini taqsimlash yuklatilsin.

3. Oʻzbekistonning taraqqiyot istiqbolini belgilash qoʻmitasining Ilmiy-texnika axboroti va texnika-iqtisodiy tadqiqotlar ilmiy-tadqiqot instituti Oʻzbekiston Respublikasi Fan va texnika davlat qoʻmitasiga berilsin.

4. Oʻzbekiston Respublikasi Fan va texnika davlat qoʻmitasi Ilmiy-texnika axboroti va texnika-iqtisodiy tadqiqotlar institutini Respublika ilmiy-texnika va patent-litsenziya axboroti markazi tarkibidagi Ilmiy-texnika axboroti davlat jamgʻarmasi qilib qayta tashkil etsin.

5. Respublika ilmiy-texnika va patent-litsenziya axboroti markazi xodimlarining eng koʻp soni Oʻzbekistonning taraqqiyot istiqbolini belgilash qoʻmitasining Ilmiy-texnika axboroti va texnika-iqtisodiy tadqiqotlar ilmiy-tadqiqot institutini hamda Iqtisodiyot va normativlar ilmiy-texnika institutini hisoblash markazi bilan birga saqlash uchun nazarda tutilgan mablagʻlarni va ularning xodimlari sonini qisqartirish hisobiga tegishli mehnatga haq toʻlash fondi bilan birgalikda 325 nafardan iborat qilib (xizmat koʻrsatuvchi xodimlar bunga kirmaydi) belgilansin.

6. Oʻzbekiston Respublikasi Moliya vazirligi respublikaning Respublika ilmiy-texnika va patent-litsenziya axboroti markazini saqlashni nazarda tutuvchi 1992-yilgi budjetiga tegishli oʻzgartishlar kiritsin.

7. Oʻzbekistonning taraqqiyot istiqbolini belgilash qoʻmitasi Oʻzbekiston Respublikasi Fan va texnika davlat qoʻmitasi bilan kelishgan holda ikki hafta muddat ichida Ilmiy-texnika axborot va texnika-iqtisodiy tadqiqotlar ilmiy-tadqiqot institutining asosiy fondlari, mol-mulki va moddiy boyliklarini 1992-yil 1-yanvardagi holatiga koʻra, shuningdek, pul mablagʻlarini Respublika ilmiy-texnika va patent-litsenziya axboroti markazi balansiga oʻtkazsin.

8. Oʻzbekiston Respublikasi FTDQning Respublika ilmiy-texnika va patent-litsenziya axboroti markazi zimmasiga Oʻzbekistonning taraqqiyot istiqbolini belgilash qoʻmitasi faoliyatini axborot bilan taʼminlash va unga nashriyot-matbaa xizmati koʻrsatish funksiyasi yuklatilsin.

9. Vazirliklar, idoralar, hokimliklar, shuningdek, konsernlar, uyushmalar, korxonalar rahbarlari zimmasiga, idoraviy boʻysunishi va mulkchilik shaklidan qatʼi nazar, davlat ilmiy-texnika siyosatini amalga oshirish, Oʻzbekiston Respublikasi FTDQning qarorlari va yoʻriqnomalarini ijro etish masʼuliyati yuklatilsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari oʻrtoq M. Q. Qoraboyev zimmasiga yuklatilsin.

1. Oʻzbekiston Respublikasi Fan va texnika davlat qoʻmitasi (Oʻzbekiston Respublikasi FTDQ) Oʻzbekistonning ijtimoiy-iqtisodiy rivojlanishini taʼminlashga qaratilgan davlat ilmiy-texnika siyosatini shakllantiruvchi va amalga oshiruvchi organ hisoblanadi.

Oʻzbekiston Respublikasi FTDQ oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oliy Kengash qarorlariga, Prezidentning farmonlari va farmoyishlariga, Vazirlar Mahkamasining qarorlari va farmoyishlariga hamda mazkur Nizomga amal qiladi.

Oʻzbekiston Respublikasi FTDQ Oʻzbekiston Respublikasi Prezidenti huzuridagi Vazirlar Mahkamasiga boʻysunadi.

2. Oʻzbekiston Respublikasi FTDQ faoliyatining bosh vazifalari va yoʻnalishlari quyidagilar hisoblanadi:

ilmiy-texnika taraqqiyotining ustuvor yoʻnalishlarini belgilash hamda moliyaviy, moddiy-texnika va boshqa resurslarni ularni rivojlantirish uchun jamlash;

davlat yoʻli bilan qoʻllab-quvvatlashning iqtisodiy-huquqiy va tashkiliy mexanizmlari tizimini barpo etish va uning mavjud boʻlishini taʼminlash, fan va texnika rivojlanishini ragʻbatlantirish va tartibga solish, fan va texnika yutuqlarini xalq xoʻjaligiga joriy etish;

respublikani ijtimoiy-iqtisodiy rivojlantirish davlat ustuvorliklarini taʼminlash ilmiy-texnika dasturini shakllantirish, roʻyobga chiqarish va boshqarib borish; fundamental tadqiqotlar davlat dasturlarini ishlab chiqishda akademiya, oliy oʻquv yurtlari va tarmoq fanini muvofiqlashtirish; fan va ishlab chiqarish, vazirliklar, idoralar va mahalliy oʻzini oʻzi boshqarish organlari sohasini davlat ilmiy-texnika siyosati doirasida bu organlarning tegishli tuzilmalari orqali muvofiqlashtirish;

fan va ishlab chiqarishning oʻzaro foydali iqtisodiy negizga, bozorga xos boʻlgan oʻzaro munosabatlarga oʻxshash shakllariga asoslangan aloqasini rivojlantirishga har tomonlama koʻmaklashish;

patent-litsenziya xizmati, ilmiy-texnika axboroti tizimini, ilmiy kadrlar tayyorlash va ularni attestatsiyadan oʻtkazishni, ilmiy-texnikaviy loyihalar va dasturlarning davlat ekspertizasini, “fan” tarmogʻi boʻyicha kapital qurilishni oʻz ichiga oluvchi fan va texnika sohasi infrastrukturasini tashkil etish va rivojlantirish;

xalqaro ilmiy-texnikaviy hamkorlikni rivojlantirish strategiyasini ishlab chiqish hamda uni roʻyobga chiqarishda davlat manfaatlarini taʼminlash.

3. Oʻzbekiston Respublikasi FTDQ oʻzi uchun belgilangan vazifalarga muvofiq:

a) respublika Fanlar akademiyasi, tarmoq akademiyalari, vazirliklar va tashkilotlar bilan birgalikda respublikaning ilmiy-texnikaviy imkoniyatlari holatini muntazam tahlil qilish hamda uning rivojlanish tendensiyalarini jahon fani va texnikasining bir qismi sifatida belgilash ishlarini tashkil etishni taʼminlaydi; ijtimoiy-iqtisodiy rivojlantirish muammolarini hal etishga qaratilgan ilmiy-texnikaviy taraqqiyot ustuvorliklarini belgilaydi;

b) fan va texnika rivojlanishi boʻyicha muhim ilmiy-texnikaviy muammolarni hal etish bilan bogʻliq boʻlgan davlat buyurtmalarini shakllantiradi; davlat budjetidan ajratiladigan mablagʻlarga, markaziy manbalardan ajratiladigan moddiy-texnika resurslariga, shu jumladan, valyuta ajratmalari va import boʻyicha yetkazib beriladigan mahsulotlarga boʻlgan ehtiyojni aniqlaydi hamda ularni taqsimlash loyihalarini tayyorlaydi;

v) Oliy Kengash qoʻmitalari, Fanlar akademiyasi, tarmoq akademiyalari, Adliya vazirligi va Moliya vazirligi, shuningdek, boshqa manfaatdor vazirliklar va idoralar bilan birgalikda fan va texnika masalalari boʻyicha Oʻzbekiston Respublikasi qonunlari loyihalarini, ilmiy tadqiqotlarni, tajriba-konstruktorlik ishlarini tashkil etish, joriy etish, ixtirochilik, patent-litsenziya ishlari, kadrlar tayyorlash va ularni attestatsiyadan oʻtkazish masalalari boʻyicha meʼyoriy hujjatlarni ishlab chiqadi;

g) fundamental tadqiqotlar davlat dasturlarini ishlab chiqishni va roʻyobga chiqarishni hamda erishilgan natijalardan foydalanishni muvofiqlashtirishni taʼminlaydi; respublikani ijtimoiy-iqtisodiy rivojlantirishning davlat ustuvorliklarini ilmiy-texnikaviy taʼminlash dasturlarini shakllantirish, roʻyobga chiqarishni muvofiqlashtiradi va tartibga soladi;

d) yangi texnologiyalar va ishlab chiqarishlarni davlat yoʻli bilan qoʻllab-quvvatlashni taʼminlovchi uchinchi tomon sifatida innovatsiyalar egalarining ularning isteʼmolchilari bilan oʻzaro munosabatlarining bozor shakllari rivojlanishiga koʻmaklashadi;

e) patent-litsenziya xizmati, ilmiy-texnika axboroti tizimi organlarining faoliyatiga, ularning idoraviy boʻysunishidan qatʼi nazar, ilmiy-pedagogik kadrlarni tayyorlash, qayta tayyorlash va ularni attestatsiyadan oʻtkazishga uslubiy rahbarlikni amalga oshiradi; ilmiy-texnika taraqqiyotining eng muhim yoʻnalishlari boʻyicha tahliliy axborot tayyorlanishini taʼminlaydi; ilmiy-texnika yutuqlari targʻib qilinishini tashkil qiladi, ilmiy-texnika axboroti organlarining noshirlik faoliyatini muvofiqlashtiradi;

j) xorijiy mamlakatlar bilan ilmiy-texnikaviy hamkorlik sohasida vazirliklar va idoralar faoliyatini muvofiqlashtiradi; korxonalar va tashkilotlarning xorijiy yuksak texnologiyalardan foydalanish, qoʻshma ishlab chiqarishlar va korxonalar tashkil etish toʻgʻrisidagi takliflarini tezroq roʻyobga chiqarishga koʻmaklashadi; Oʻzbekiston Respublikasining xalqaro ilmiy-texnika tashkilotlarida va diplomatik missiyalarda vakillik qilishini taʼminlaydi; ilmiy-texnika yutuqlarini chet elda targʻib qilishni tashkil etadi, ularning tashqi bozorda olgʻa tomon harakat qilishiga koʻmaklashadi; litsenziyalarni sotish ishlariga rahbarlik qiladi; oʻz vakolati doirasida olimlar va mutaxassislarning chet el xizmat safarlariga borishini tashkil etadi;

z) xalq xoʻjaligi tarmoqlarining ilmiy-texnikaviy darajasini, imkoniyatlardan foydalanish samaradorligini vaqti-vaqti bilan kompleks tahlil qilishni amalga oshiradi; ilmiy-tadqiqot, loyiha-konstruktorlik va texnologik tashkilotlarni saralab davlat tekshiruvidan oʻtkazadi, zarur xollarda ilmiy muassasalar faoliyati yoʻnalishini oʻzgartirish, kam samara beruvchi tashkilotlar va muassasalarni tugatish toʻgʻrisida takliflar kiritadi; vazirliklar va idoralarning yangi tashkilotlar tashkil etish toʻgʻrisidagi takliflarini koʻrib chiqadi va ular boʻyicha qaror qabul qiladi;

i) kompleks ilmiy tadqiqotlarni loyiha-konstruktorlik va texnologik ishlarni bajarish, xalq xoʻjaligida innovatsiyalarni koʻlamli oʻzlashtirish paytida fan va texnika sohasidagi ulkan yutuqlar uchun Oʻzbekiston Respublikasining mukofotlarini taʼsis etish va faxriy unvonlarini berishni ishlab chiqadi hamda bu haqda belgilangan tartibda taklif kiritadi;

k) Oʻzbekiston Respublikasi FTDQ tomonidan taqsimlanadigan davlat budjet mablagʻlaridan oqilona foydalanish; fan va texnika sohasida davlat buyurtmalarining ijrosi; davlat dasturlarining amalga oshirilishi; ilmiy-texnika axboroti va patent-litsenziya xizmati organlari ishi, ilmiy-texnikaviy hamkorlik toʻgʻrisidagi hukumatlararo bitimlar boʻyicha Oʻzbekiston Respublikasi majburiyatlarining rivojlanishi ustidan nazoratni amalga oshiradi.

4. Oʻzbekiston Respublikasi Fan va texnika davlat qoʻmitasiga quyidagi huquqlar beriladi:

a) davlat ilmiy-texnika siyosatini amalga oshirishni taʼminlash uchun ilmiy-texnikaviy va ekspert kengashlari, vaqtinchalik jamoalar, muhandislik markazlari, kichik va qoʻshma korxonalar, texnopolislar, texnika parklari tashkil etish; innovatsiya jamgʻarmalari, birlashmalar, jamoatchilik va xalqaro tashkilotlarning muassisi va qatnashchisi boʻlish; noshirlik faoliyatini amalga oshirish;

b) ilmiy-tadqiqot, loyiha-konstruktorlik tashkilotlari va korxonalariga ularning roziligi bilan ilmiy tadqiqotlar va ishlanmalar oʻtkazishga davlat buyurtmalari berish;

v) tarmoqlararo yirik ilmiy-texnikaviy dasturlar loyihalarini ishlab chiqish va ekspertizalar oʻtkazish uchun respublika Fanlar akademiyasini, tarmoq fanlar akademiyalarini, Oʻzbekiston Ixtirochilar va ratsionalizatorlar jamiyatini, ilmiy-tadqiqot, loyiha-konstruktorlik va texnologiya tashkilotlarini, oliy oʻquv yurtlari va boshqa muassasalar, birlashmalar va korxonalarni, shuningdek, alohida olimlar va mutaxassislarni jalb etish;

g) Qoʻmita va oʻziga qarashli muassasalar xodimlarini xorijiy ilmiy-tashkiliy va patent-axborot markazlariga stajirovkaga, ish tajribasini oʻrganishga, oʻzaro foydali toʻgʻridan toʻgʻri aloqalar oʻrnatish, patent jamgʻarmalarini shakllantirish uchun yuborish;

d) tarmoqlararo yirik ilmiy-texnikaviy dasturlarni hal etish, muhim xalq xoʻjaligi ahamiyatiga ega boʻlgan muhim yangi texnika, texnologiya va materiallarni ishlab chiqish boʻyicha tanlovlar oʻtkazish;

e) ilmiy-texnika taraqqiyotining respublika uchun ustuvor yoʻnalishlari boʻyicha ilmiy-texnikaviy loyihalar va dasturlar davlat ekspertizasini tashkil etish va oʻtkazish;

j) muzokaralarda ishtirok etish hamda respublika Hukumatining topshirigʻiga koʻra davlatlararo ilmiy-texnikaviy hamkorlik masalalari boʻyicha shartnomalar va bitimlarni imzolash, respublika tadqiqot va konstruktorlik-texnologiya tashkilotlarining oʻzaro foydali munosabatlar asosida yetakchi xorijiy ilmiy va texnika markazlari bilan toʻgʻridan toʻgʻri aloqalar oʻrnatishiga koʻmaklashish, ilmiy kadrlarni oʻqish, stajirovka va ishlash uchun chet elga xizmat safariga yuborish toʻgʻrisida takliflar kiritish;

z) respublika va xalqaro ilmiy-texnika konferensiyalari, simpoziumlar, seminarlar va kengashlar tashkil qilish;

i) vazirliklar va idoralar, Fanlar akademiyasi va tarmoq akademiyalari, konsernlar, uyushmalar va hokimliklar, korxonalar, tashkilotlar va muassasalar, shuningdek, respublika Davlat statistika qoʻmitasidan qoʻmitaga yuklatilgan vazifalarni bajarish uchun zarur boʻlgan materiallarni olish;

k) davlat ahamiyatiga ega boʻlgan muhim ishlarni amalga oshirish bilan bogʻliq boʻlgan ilmiy-tadqiqot va tajriba-konstruktorlik ishlari uchun davlat budjetidan olinadigan mablagʻlar boʻyicha, shu jumladan, chet el valyutasida, tanlovlarning gʻoliblariga berish, shuningdek, belgilangan tartibda olimlar va mutaxassislar mehnatiga, shu jumladan, ilmiy-texnika va ekspert kengashlarida ishlash uchun Oʻzbekiston Respublikasi FTDQ tomonidan jalb qilinadigan chet el olimlari mehnatiga haq toʻlash uchun oʻz tasarrufida zaxiraga ega boʻlish;

l) Qoʻmita vakolatiga kiradigan masalalar boʻyicha vazirliklar, idoralar, ilmiy-tadqiqot muassasalari, loyiha-konstruktorlik tashkilotlari va korxonalarida tekshirishlar oʻtkazish; oʻz vakolati doirasida vazirliklar va idoralar bajarishi majburiy boʻlgan qarorlar qabul qilish.

5. Oʻzbekiston Respublikasi FTDQ Raisini lavozimga tayinlash va lavozimdan ozod qilish Oʻzbekiston Respublikasi Konstitutsiyasiga muvofiq amalga oshiriladi. Qoʻmita Raisining oʻrinbosarlari Oʻzbekiston Respublikasi FTDQ Raisining taqdimnomasi boʻyicha Oʻzbekiston Respublikasi Prezidenti huzuridagi Vazirlar Mahkamasi tomonidan lavozimga tayinlanadilar va lavozimdan ozod qilinadilar.

Oʻzbekiston Respublikasi FTDQ Raisi qoʻmitaga yuklatilgan vazifalarning bajarilishi va u oʻz funksiyalarini amalga oshirishi uchun, shuningdek, oʻziga qarashli tashkilotlar va muassasalar ishi uchun shaxsan javob beradi, Rais oʻrinbosarlarining, hayʼat, ilmiy-texnika kengashi aʼzolari va qoʻmita markaziy apparati tarkibiy boʻlinmalari rahbarlarining javobgarligi darajasini belgilaydi.

Oʻzbekiston Respublikasi FTDQ Raisi Oʻzbekiston Respublikasi vaziri huquqiga egadir.

6. Oʻzbekiston Respublikasi FTDQ oʻz vakolati doirasida Oʻzbekiston Respublikasi qonunlari, Oliy Kengash qarorlari, Prezidentning farmonlari, respublika Vazirlar Mahkamasining qarorlari va farmoyishlari asosida va ularni bajarish yuzasidan, idoraviy boʻysunishi va mulkchilik shaklidan qatʼi nazar, vazirliklar, idoralar, konsernlar, uyushmalar, korxonalar, tashkilotlar va muassasalar. bajarishi majburiy boʻlgan qarorlar va buyruqlar, yoʻriqnomalar chiqaradi.

7. Oʻzbekiston Respublikasi Fan va texnika davlat qoʻmitasida tarkibi Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadigan hayʼat tuziladi.

Hayʼat oʻzining muntazam oʻtkaziladigan majlislarida Oʻzbekiston Respublikasi davlat ilmiy-texnika siyosatini shakllantirish va roʻyobga chiqarish, apparat ishini tashkil etish darajasini oshirish hamda Qoʻmita huquq doirasiga kiruvchi boshqa masalalarni koʻrib chiqadi.

Hayʼat qarorlari Oʻzbekiston Respublikasi Fan va texnika davlat qoʻmitasining qarorlari va buyruqlari bilan hayotga tatbiq etiladi.

8. Oʻzbekiston Respublikasi FTDQ oʻz huquq doirasiga kiruvchi masalalar boʻyicha Oʻzbekiston Respublikasi Oliy Kengashining doimiy ishlovchi qoʻmitalari va komissiyalari, Vazirlar Mahkamasining doimiy organlari, mahalliy boshqaruv organlari bilan oʻzaro hamkorlik qiladi.

9. Oʻzbekiston Respublikasi FTDQ huzurida tarkibida Respublika ilmiy-texnika kutubxonasi boʻlgan Respublika ilmiy-texnika va patent-litsenziya axboroti markazi faoliyat koʻrsatadi.

Respublika ilmiy-texnika va patent-litsenziya axboroti markazi ixtirochilik sohasida davlat manfaatlari himoya qilinishini, fan va texnikada mualliflik huquqlari himoya qilinishini, Oʻzbekiston Respublikasida kashfiyotlar, ixtirolar, sanoat namunalari va tovar belgilaridan samarali foydalanilishini taʼminlaydi.

Respublika ilmiy-texnika va patent-litsenziya axboroti markazi toʻgʻrisidagi Nizom Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadi.

10. Oʻzbekiston Respublikasi FTDQ markaziy apparatining tuzilmasi va xodimlari soni Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadi. Qoʻmita Raisi zarurat boʻlganda tuzilmaga Qoʻmita markaziy apparati xodimlarining belgilangan soni va ish haqi fondi doirasida oʻzgartishlar kiritadi.

Qoʻmita markaziy apparatining shtat jadvali va uning tarkibiy boʻlinmalari toʻgʻrisidagi nizomlar Oʻzbekiston Respublikasi FTDQ Raisi tomonidan tasdiqlanadi.

11. Oʻzbekiston Respublikasi FTDQ yuridik shaxs hisoblanadi, Oʻzbekiston Respublikasi Davlat gerbi tasvirlangan va oʻz nomi yozilgan muhrga ega boʻladi.

1. Oʻzbekiston Respublikasi Fan va texnika davlat qoʻmitasi huzuridagi Respublika ilmiy-texnika va patent-litsenziya axboroti markazi, davlat ilmiy-texnika siyosatini amalga oshirish doirasida Oʻzbekiston Respublikasi ilmiy-texnika axboroti va patent-litsenziya faoliyati tizimini shakllantirishni hamda uning ishini muvofiqlashtirishni taʼminlovchi organ hisoblanadi.

Respublika ilmiy-texnika va patent-litsenziya markazi oʻz faoliyatida Oʻzbekiston Respublikasi qonunlariga, shuningdek, patent-litsenziya faoliyati sohasidagi xalqaro huquqiy normalarga, Oliy Kengash qarorlariga, Prezidentning farmonlariga, Vazirlar Mahkamasi, Oʻzbekiston Respublikasi FTDQ qarorlari va farmoyishlariga hamda mazkur Nizomga amal qiladi.

2. Respublika ilmiy-texnika va patent-litsenziya markazining asosiy vazifalari va faoliyat yoʻnalishlari quyidagilar hisoblanadi:

Oʻzbekiston Respublikasi davlat ilmiy-texnika siyosatini shakllantirish va amalga oshirish uchun ilmiy-texnika axboroti va patent-litsenziya faoliyati sohasida takliflar va tavsiyalarni ishlab chiqish;

Oʻzbekiston Respublikasida intellektual imkoniyatlarni rivojlantirishga, kashfiyotlar, ixtirolar, sanoat namunalari va tovar belgilaridan foydalanish samaradorligini oshirishga qaratilgan fan va texnikada mualliflik huquqini himoya qilish tizimi faoliyatini tashkil etish va taʼminlash;

patent-litsenziya faoliyatini tashkil etish va muvofiqlashtirish, Oʻzbekiston Respublikasining davlat manfaatlarini va fuqarolarining huquqlarini himoya qilishni taʼminlovchi patent jamgʻarmasini shakllantirish;

ilmiy-texnika, patent va konyunktura-iqtisodiy axborotning xalq xoʻjaligi ehtiyojlariga va davlat ilmiy-texnika siyosatining tegishli vazifalariga yoʻnaltirilgan axborot tarmogʻi zamonaviy tuzilmalarini shakllantirish;

patent berish ishlarini yuritish va ilmiy-texnika axboroti sohasida ilmiy-tadqiqot, uslubiyat ishlarini tashkil etish va muvofiqlashtirish;

fan-texnika taraqqiyotining tendensiyalarini, xalq xoʻjaligi tarmoqlarida ishlab chiqarishning texnikaviy va tashkiliy darajasini tahlil qilish; “fan” va “ishlab chiqarish” sohalarining innovatsiya jarayonlarida muvofiqlashuvi va oʻzaro hamkorligini takomillashtirish boʻyicha tavsiyalar ishlab chiqish;

patent-litsenziya faoliyati sohasida xorijiy mamlakatlar bilan hamkorlikni tashkil etish va boshqarib borish, Oʻzbekiston Respublikasining xalqaro axborot tizimiga toʻliq kirishini taʼminlash.

3. Respublika ilmiy-texnika va patent-litsenziya axboroti markazi belgilangan vazifalarga muvofiq:

a) Fanlar akademiyasi, tarmoq akademiyalari, tegishli vazirliklar, idoralar, jamoat tashkilotlari bilan birgalikda sanoat va intellektual mulk masalalari boʻyicha Oʻzbekiston Respublikasi qonunlari loyihalarini ishlab chiqadi; patent-litsenziya faoliyati, ilmiy-tadqiqot va tajriba-konstruktorlik ishlarini bajarish, tadqiqotlar natijalarini joriy etish, axborot taʼminotini tashkil etish boʻyicha meʼyoriy hujjatlarni tuzadi;

b) Davlat patent jamgʻarmasini, shuningdek, fan-texnika yutuqlari jamgʻarmasini butlaydi; ilmiy-texnika va patent axboroti banklarini shakllantiradi, tarmoq va hududiy maʼlumot bazalari tashkil etish, ulardan samarali foydalanishni taʼminlash ishlarini muvofiqlashtiradi;

v) mahsulotlarning raqobatga bardoshliligini baholash, jahon bozori va ichki bozorni oʻrganishga, eng avvalo, ilmiy-texnik faoliyat sohasida, shuningdek, Oʻzbekiston uchun ustuvor ahamiyatga ega boʻlgan tarmoqlar boʻyicha oʻrganishga doir patent-konyunktura tadqiqotlari oʻtkazadi;

g) yetakchi tarmoqlardagi texnikaviy daraja hamda keng joriy etishga tavsiya qilinadigan eng muhim fan-texnika yutuqlari toʻgʻrisida rahbar organlarga har oyda bildirishlar tayyorlaydi va taqdim etadi; Oʻzbekiston Respublikasi FTDQ topshirigʻiga koʻra axborotni tanlab tarqatish tizimi boʻyicha materiallarni, alohida tarmoqlar va ishlab chiqarishlarni rivojlantirish yoʻllari toʻgʻrisidagi tavsiyalar bilan birga ularning holati haqidagi tahliliy maʼlumotlarni tayyorlaydi va taqdim etadi;

d) sanoat mulki obyektlariga berilgan vatanimiz va xorijiy talabnomalarning davlat ekspertizasini tashkil etadi va oʻtkazadi, sanoat va intellektual mulk obyektlarining davlat reyestrlarini yuritadi;

e) ilmiy-tadqiqot, loyiha-konstruktorlik va ishlab chiqarish boʻlinmalari tomonidan bajarilgan litsenziyalarii sotish ishlarini olib boradi va takliflar tayyorlaydi, shuningdek, chet eldan litsenziya sotib olish boʻyicha takliflar tayyorlaydi;

j) ekspertizaning sanoat mulki obyektlariga berilgan talabnomalar boʻyicha qaroriga eʼtiroz va shikoyatlarning Appelatsiya kengashi tomonidan koʻrib chiqilishini tashkil etadi, oʻz huquq doirasiga kiruvchi masalalar boʻyicha fuqarolar va yuridik shaxslarning boshqa murojaatlarini koʻrib chiqadi;

z) boshqa tashkilotlar bilan birgalikda axborot texnologiyalari va tizimlarini takomillashtirish, axborotni qayta ishlash va uzatishning avtomatlashtirilgan tizimini yaratish va rivojlantirish, maʼlumotlar bazasi va banklarini generatsiyalash ishlarini olib boradi;

i) sanoat mulkini va ilmiy-texnika axborotini, shu jumladan, patent ishonchnomalari berilgan xodimlarni himoya qilish masalalari boʻyicha mutaxassislar tayyorlashni, ularning malakasini oshirish va attestatsiyadan oʻtkazishni tashkil qiladi; sanoat mulki, uning huquqiy va patent-axborot taʼminoti sohasida ilmiy-tadqiqot ishlarini tashkil qiladi va oʻtkazadi;

k) fan-texnika yutuqlari va ilgʻor ishlab chiqarish tajribasi toʻgʻrisida tarmoqlararo axborot ayirboshlashni tashkil qiladi; fan-texnika yutuqlarini joriy etish boʻyicha vazirliklar va idoralarga, konsernlar, uyushmalar va alohida korxonalarga tavsiyalar ishlab chiqadi; yangilikni joriy etishning iqtisodiy samaradorligi toʻgʻrisidagi maʼlumotlarni umumlashtiradi;

l) ilmiy-texnika targʻiboti ishlarini tashkil qiladi va muvofiqlashtiradi; koʻrgazmalar, kengashlar, seminarlar, tanlovlar va boshqalarni oʻtkazadi;

m) huquqiy muhofaza va sanoat mulki obyektlaridan foydalanish masalalari boʻyicha xalqaro hamkorlikni amalga oshiradi, xalqaro ilmiy-texnika aloqalarini rivojlantirish boʻyicha takliflar ishlab chiqadi;

n) oʻz huquq doirasiga kiruvchi masalalar boʻyicha rasmiy byulletenlar, axborot materiallari, jurnallar va boshqa adabiyotlar nashr etishni tashkil etadi; axborot materiallarini koʻpaytirishni va mikrofilm qilishni amalga oshiradi.

4. Respublika ilmiy-texnika va patent-litsenziya axboroti markaziga quyidagi huquqlar beriladi:

a) ixtirolar, sanoat namunalari, foydali modellar, tovar belgilari, xizmat koʻrsatish belgilariga berilgan talabnomalarni koʻrib chiqish; Oʻzbekiston Respublikasida amal qiluvchi davlat muhofaza hujjatlarini berish va eʼlon qilish;

b) idoraviy boʻysunishi va mulkchilik shaklidan qatʼi nazar, Oʻzbekiston Respublikasi muassasalari va tashkilotlarida bajariladigan ilmiy-tadqiqot va tajriba-konstruktorlik ishlarini davlat roʻyxatidan oʻtkazish;

v) chet elga patent berish va litsenziya faoliyati, fan-texnika yutuqlarini joriy etish ustidan nazoratni amalga oshirish;

g) patent ishonchnomalari berilgan xodimlarni attestatsiyadan oʻtkazish va roʻyxatga olish;

d) Oʻzbekiston Respublikasi FTDQ roziligi bilan vazirliklar, idoralar, Fanlar akademiyasi, tarmoq akademiyalari, konsernlar, uyushmalar, korxonalar va tashkilotlardan oʻziga yuklatilgan vazifalarni bajarish uchun zarur boʻlgan materiallarni olish;

e) munosabatlarni huquqiy tartibga solish, xalqaro hamkorlik, patent-axborot mahsulotlari, ishlar, xizmatlarga tariflar va baholar belgilash, sanoat mulki va ilmiy-texnika axboroti sohasida idoraviy korxonalarni tashkil etish, qayta tuzish va tugatish masalalari boʻyicha Oʻzbekiston Respublikasi Fan va texnika davlat qoʻmitasiga takliflar kiritish;

j) Oʻzbekiston Respublikasi FTDQ bilan kelishgan holda oʻz huquq doirasiga kiruvchi masalalar boʻyicha rasmiy byulletenlar, axborot materiallari va jurnallar nashr etish;

z) innovatsiyalarni realizatsiya qilishni, yangi buyumlarning boshqaruvchi namunalari va oʻrnatiluvchi turkumlarini tayyorlashni jadallashtirish uchun kichik korxonalar, qoʻshma ishlab chiqarishlar, Vaqtinchalik ijodiy va joriy etish jamoalari tashkil qilish.

5. Respublika ilmiy-texnika va patent-litsenziya axboroti markazi tarkibiga tarkibiy boʻlinmalar sifatida Ilmiy-texnika axboroti davlat jamgʻarmasi (bosh tashkilot) va Patent idorasi kiradi, ularning tuzilmasi va ular toʻgʻrisidagi nizom FTDQ tomonidan tasdiqlanadi.

6. Respublika ilmiy-texnika va patent-litsenziya axboroti markazi direktor tomonidan boshqariladi.

Bosh direktor, uning oʻrinbosarlari, bosh buxgalter Oʻzbekiston Respublikasi FTDQ tomonidan tayinlanadi, Respublika ilmiy-texnika va patent-litsenziya axboroti markazi bosh direktori yuklatilgan vazifalarning bajarilishi uchun shaxsan javob beradi, tarkibiy boʻlinmalar rahbarlarining shaxsiy javobgarligi darajasini belgilaydi.

7. Respublika ilmiy-texnika va patent-litsenziya axboroti markazi huzurida direktor (Ilmiy kengash raisi), direktor oʻrinbosarlari, asosiy boʻlinmalarning rahbarlari, Oʻzbekiston Respublikasi FTDQ vakillari, shuningdek, respublikaning yetakchi mutaxassislaridan iborat tarkibda Ilmiy kengash tashkil etiladi.

Ilmiy kengash tarkibi Oʻzbekiston Respublikasi FTDQ tomonidan tasdiqlanadi.

Ilmiy kengashning asosiy vazifalari quyidagilar hisoblanadi:

davlat ilmiy-texnika siyosatini amalga oshirish doirasida Respublika ilmiy-texnika va patent-litsenziya axboroti markazi faoliyatining asosiy yoʻnalishlarini belgilash;

Respublikada ilmiy-texnika axboroti va patent-litsenziya faoliyati tizimini takomillashtirish chora-tadbirlarini ishlab chiqish;

Respublika ilmiy-texnika va patent-litsenziya axboroti markazi faoliyatining rejalari va hisobotlarini, kadrlar tayyorlash, boʻsh lavozimlarga saylash va boshqa masalalarni koʻrib chiqish.

8. Respublika ilmiy-texnika va patent-litsenziya axboroti markazi oʻz huquq doirasida qarorlar qabul qiladi, buyruqlar va yoʻriqnomalar chiqaradi, ularning bajarilishini tashkil qiladi va tekshiradi.

9. Respublika ilmiy-metodika va patent-litsenziya axboroti markazining tuzilmasi va xodimlari soni Oʻzbekiston Respublikasi FTDQ tomonidan tasdiqlanadi. Respublika ilmiy-texnika va patent-litsenziya axboroti markazi direktori zarurat boʻlganda tuzilmaga xodimlarning belgilangan soni va ish haqi fondi doirasida oʻzgartishlar kiritadi.

10. Respublika ilmiy-texnika va patent-litsenziya axboroti markazi yuridik shaxs hisoblanadi, oʻz nomi yozilgan gerbli muhrga va toʻrtburchak muhrga ega boʻladi.