Oʻzbekiston Respublikasi Prezidentining 2019-yil 3-oktabrdagi “Oʻzbekiston Respublikasida kadrlar siyosati va davlat fuqarolik xizmati tizimini tubdan takomillashtirish chora-tadbirlari toʻgʻrisida”gi PF-5843-son Farmoni ijrosini taʼminlash, shuningdek, respublika davlat organlari va tashkilotlarida kadrlar maʼmuriyatchiligining zamonaviy usullarini ilgʻor xalqaro standartlarga muvofiq joriy etish maqsadida:

1. Quyidagilar:

Oʻzbekiston Respublikasi Prezidenti huzuridagi Boshqaruv samaradorligi agentligining tashkiliy tuzilmasi 1-ilovaga muvofiq;

Oʻzbekiston Respublikasi Prezidenti huzuridagi Boshqaruv samaradorligi agentligi toʻgʻrisidagi nizom 4-ilovaga muvofiq tasdiqlansin.

2. Oʻzbekiston Respublikasi Prezidenti huzuridagi Boshqaruv samaradorligi agentligi (keyingi oʻrinlarda — Agentlik) direktoriga quyidagi huquqlar berilsin:

Agentlikning markaziy apparati va filiallari tuzilmasini xodimlarning belgilangan cheklangan soni hamda mehnatga haq toʻlash fondi doirasida tasdiqlash va oʻzgartirishlar kiritish;

Agentlikka yuklangan vazifalar ijrosini taʼminlash doirasida malakali va yuqori malakali mutaxassislarni, shu jumladan xorijda yashayotgan vatandoshlarni Agentlikning rahbar lavozimlariga va maslahatchilar sifatida jalb qilish;

Agentlik qoshidagi Davlat xizmatini rivojlantirishni qoʻllab-quvvatlash jamgʻarmasi (keyingi oʻrinlarda — Jamgʻarma) mablagʻlari hisobidan Agentlik xodimlari uchun lavozim maoshlariga (tarif stavkalariga) ustamalar va boshqa ragʻbatlantiruvchi toʻlovlarni belgilash.

3. Quyidagilar Agentlik faoliyatini moliyalashtirish manbalari etib belgilansin:

Oʻzbekiston Respublikasi Davlat budjeti mablagʻlari;

Jamgʻarma mablagʻlari;

xorijiy (xalqaro) moliya institutlari va boshqa xorijiy donorlarning texnik koʻmak vositalari va grantlari;

qonunchilikda taqiqlanmagan boshqa manbalar.

4. Belgilansinki:

Agentlik direktori uch nafar oʻrinbosarga, shu jumladan, bir nafar birinchi oʻrinbosarga ega boʻlib, ular Oʻzbekiston Respublikasi Prezidenti Administratsiyasi rahbari tomonidan lavozimga tayinlanadi va lavozimidan ozod etiladi;

Agentlik direktori maqomi, mehnatga haq toʻlash, tibbiy va transport xizmati koʻrsatish sharoitlariga koʻra Oʻzbekiston Respublikasi Prezidenti Administratsiyasi departamenti boshligʻining birinchi oʻrinbosariga, uning oʻrinbosarlari esa Oʻzbekiston Respublikasi Prezidenti Administratsiyasi departamenti boshligʻining oʻrinbosariga tenglashtiriladi;

Agentlik xodimlariga Oʻzbekiston Respublikasi Prezidenti Administratsiyasi xodimlari uchun belgilangan moddiy ragʻbatlantirish va mehnatga haq toʻlash, tibbiy xizmat koʻrsatish shartlari tatbiq etiladi.

6. Oʻzbekiston Respublikasi Prezidenti maslahatchisi Sh.D. Kudbiyev ikki oy muddatda Davlat xizmatini rivojlantirish agentligini zimmasiga yuklatilgan vazifalarni bajarish uchun zarur kasbiy bilim va amaliy koʻnikmalarga ega yuqori malakali mutaxassislar bilan toʻldirishni taʼminlasin.

7. Agentlikka quyidagi vakolatlar berilsin:

davlat fuqarolik xizmati toʻgʻrisidagi qonunchilik hujjatlarining soʻzsiz bajarilishini, shu jumladan davlat fuqarolik xizmatchilarining huquqlari va qonuniy manfaatlariga rioya etilishini zarur hollarda huquqni muhofaza qiluvchi va nazorat organlari xodimlarini jalb qilgan holda oʻrganish;

davlat organlari va tashkilotlariga davlat fuqarolik xizmati sohasida ishlarni takomillashtirish boʻyicha koʻrib chiqilishi majburiy boʻlgan koʻrsatmalarni belgilangan tartibda kiritish;

davlat organlari va tashkilotlari mansabdor shaxslariga davlat fuqarolik xizmati toʻgʻrisidagi qonun hujjatlari, davlat fuqarolik xizmatchilarining huquq va qonuniy manfaatlari buzilishiga yoʻl qoʻymaslik toʻgʻrisida yozma ogohlantirish eʼlon qilish;

davlat organlari va tashkilotlari rahbarlariga davlat fuqarolik xizmati toʻgʻrisidagi qonun hujjatlari buzilishi, ularni keltirib chiqaruvchi sabab va sharoitlarni bartaraf etish boʻyicha koʻrib chiqilishi majburiy boʻlgan taqdimnomalar kiritish;

oʻz vakolatiga kiruvchi masalalar yuzasidan davlat organlari va tashkilotlaridan statistik, tahliliy materiallar, xulosalar va boshqa maʼlumotlarni soʻrash va olish;

davlat organlari va tashkilotlarining davlat fuqarolik xizmati masalalarini koʻrib chiqish bilan bogʻliq majlislari, yigʻilishlari va hayʼat majlislarida ishtirok etish;

oʻziga yuklatilgan vazifalarni amalga oshirish uchun, zarur hollarda, davlat organlari, nodavlat notijorat tashkilotlar, yetakchi loyiha institutlari, ilmiy muassasalar va boshqa tashkilotlar, shuningdek, xalqaro tashkilotlar, chet el kompaniyalarining rahbarlari va mutaxassislarini jalb qilish, ishchi guruhlar tuzish;

davlat organlari, shu jumladan mahalliy davlat hokimiyati organlarining davlat fuqarolik xizmati sohasidagi qonunchilikka zid hujjatlarini toʻxtatish yoki bekor qilish toʻgʻrisida Oʻzbekiston Respublikasi Prezidenti Administratsiyasiga va Vazirlar Mahkamasiga takliflar kiritish;

oʻz vakolatiga tegishli boʻlgan masalalar boʻyicha xalqaro darajada Oʻzbekiston Respublikasi manfaatlarini qonunchilik hujjatlarida belgilangan tartibda ifodalash;

oʻziga yuklatilgan vazifalarni bajarishda davlat organlari, nodavlat notijorat tashkilotlari, yetakchi loyiha institutlari, ilmiy muassasalari va boshqa tashkilotlar, tadbirkorlik subyektlari, shuningdek, xorijiy davlatlarning Oʻzbekiston Respublikasidagi diplomatik vakolatxonalari va konsullik muassasalari, xalqaro tashkilotlar, chet el kompaniyalari hamda mutaxassislari bilan ish yozishmalarini olib borish, tadbirlarni tashkil etish va hadli kelishuvlarni tuzish orqali oʻzaro hamkorlik qilish hamda toʻgʻridan-toʻgʻri aloqalar oʻrnatish va saqlash;

davlat fuqarolik xizmati sohasida Oʻzbekiston Respublikasining xalqaro shartnomalarini tuzishda ishtirok etish;

oʻz vakolatiga kiruvchi masalalar boʻyicha idoralararo tusdagi xalqaro shartnomalarni belgilangan tartibda tuzish;

oʻz faoliyati bilan bogʻliq masalalar boʻyicha zarur tashkiliy-huquqiy shaklda yuridik shaxs maqomiga ega boʻlgan yoki yuridik shaxs maqomiga ega boʻlmagan loyiha ofislarini tashkil etish, ularning faoliyatini muvofiqlashtirish va moliyaviy taʼminlash (budjet, budjetdan tashqari mablagʻlar, davlat ishtirokidagi korxonalarning mablagʻlari, xorijiy davlatlar, xalqaro va xorijiy hukumat hamda nohukumat tashkilotlari, chet el kompaniyalari, tashkilotlari va jamgʻarmalarining grantlari, texnik koʻmagi va boshqa tashqi begʻaraz koʻmak mablagʻlari, qonunchilikda taqiqlanmagan boshqa mablagʻlar);

zarur hollarda oʻz vakolatiga kiruvchi masalalar boʻyicha tegishli davlat organlari xodimlarini jalb qilgan holda oʻrganish oʻtkazish;

oʻz vakolatiga kiruvchi masalalar boʻyicha davlat organlari va tashkilotlarining maʼlumotlar bazasidan va axborot tizimlaridan real vaqt rejimida bepul va toʻsqinliksiz foydalanish.

8. Maʼlumot uchun qabul qilinsinki, davlat organlari va tashkilotlarining kadrlar boʻlinmalari respublikada kadrlar siyosati va davlat fuqarolik xizmatining zamonaviy tamoyillarini joriy etishda eng muhim boʻgʻin hisoblanadi.

Quyidagilar davlat organlari va tashkilotlari kadrlar boʻlinmalarining asosiy vazifalari etib belgilansin:

zamonaviy axborot-kommunikatsiya texnologiyalaridan foydalangan holda kadrlarni saralab olish va joy-joyiga qoʻyishning maksimal darajada shaffof va adolatli tartibini joriy etish;

muvaffaqiyatli xorijiy tajribadan kelib chiqqan holda menejmentning zamonaviy tizimlari asosida kadrlar bilan ishlash mexanizmini takomillashtirish;

kadrlarni boshqarish sohasida xodimlar tarkibining son va sifat xususiyatlari davlat organlari va tashkilotlari oldida turgan vazifalarga muvofiq kelishiga erishish va uni saqlab qolishga yoʻnaltirilgan siyosatni shakllantirish va amalga oshirish;

davlat organlari va tashkilotlarning mehnat resurslariga boʻlgan ehtiyojlarini davlat organlari va tashkilotlari oldida turgan vazifalarga, ularni rivojlantirish strategiyalariga, shuningdek, mehnat bozoridagi oʻzgarib borayotgan tashqi va ichki konyunkturaga mos ravishda qanoatlantirish;

davlat organlari va tashkilotlari xodimlari uchun mansab pogʻonalaridan koʻtarilishda mehnat faoliyatini axloq-iroda sifatlari, iqtidori va koʻnikmalarini obyektiv baholashga asoslangan teng imkoniyatlar yaratish;

kadrlar salohiyatini doimiy rivojlantirish va maksimal toʻliq ishtirok etishini taʼminlash asosida davlat organlari va tashkilotlari oldida turgan vazifalarga erishishda har bir xodimning shaxsiy hissasini oshirishda koʻmaklashish;

davlat fuqarolik xizmatchilarida yuksak kasbiy odob-axloqni, korrupsiyaga qarshi turish madaniyatini va unga toqat qilib boʻlmaydigan munosabatni shakllantirish boʻyicha taʼsirchan choralarni koʻrish;

muntazam asosda kadrlarning professional darajasini oshirish, bunda ularning uzluksiz taʼlim olishini (sohaga oid va yuqori malakali mutaxassislarni jalb qilgan holda), shu jumladan xorijda tashkil etish.

9. Davlat xizmatini rivojlantirish agentligi Tashqi ishlar vazirligi, Investitsiyalar va tashqi savdo vazirligi, Moliya vazirligi hamda Oʻzbekiston Respublikasi Prezidenti huzuridagi Davlat boshqaruvi akademiyasi bilan birgalikda uch oy muddatda davlat organlari va tashkilotlarining oʻrta va quyi boʻgʻinidagi eng istiqbolli xodimlarning kamida 1000 nafarini 3 oydan 6 oygacha boʻlgan muddatda Koreya Respublikasi, Birlashgan Arab Amirliklari, Yevropa mamlakatlari va boshqa rivojlangan xorijiy davlatlarga stajirovkaga bosqichma-bosqich yuborish boʻyicha besh yilga moʻljallangan dastur ishlab chiqilishini taʼminlasin.

Belgilansinki:

xorijiy stajirovkani oʻtayotgan shaxslarga, stajirovka oʻtayotgan mamlakatdagi Oʻzbekiston Respublikasi elchisi mehnatiga haq toʻlash miqdorining 60 foizi miqdorida oʻrtacha oylik ish haqi toʻlanadi;

xorijiy stajirovkani oʻtash uchun yuborilayotgan shaxslar hamda Agentlik va yuborayotgan davlat organi yoki tashkiloti oʻrtasida tomonlarning majburiyatlari, shu jumladan yuborilayotgan shaxs tomonidan stajirovka tugagandan soʻng davlat organi va tashkilotida kamida ikki yil ishlab berish majburiyati bayon etilgan kontrakt tuziladi;

mazkur bandni amalga oshirish bilan bogʻliq xarajatlar Jamgʻarma mablagʻlari, xorijiy (xalqaro) moliya institutlari va boshqa donorlarning texnik koʻmagi va grantlari hisobidan qoplanadi.

10. Agentlikning Oʻzbekiston Respublikasi Prezidenti huzuridagi Davlat siyosati va boshqaruvi akademiyasi qoshida davlat fuqarolik xizmatchilarini qayta tayyorlash va malakasini oshirish, shuningdek, yangi kompetensiyalarni oʻrgatishni tashkil etish maqsadida ilgʻor jahon standartlari asosida jihozlangan Davlat fuqarolik xizmatchilari malakasini oshirish markazini tashkil etish toʻgʻrisidagi taklifiga rozilik berilsin.

Oʻzbekiston Respublikasi Vazirlar Mahkamasi va Davlat xizmatini rivojlantirish agentligi ikki oy muddatda ushbu bandning amalga oshirilishini taʼminlash boʻyicha tashkiliy chora-tadbirlar toʻgʻrisidagi takliflarni kiritsin.

11. Agentlik Toshkent shahri, Islom Karimov koʻchasi, 43-uy, 1-korpus manzili boʻyicha joylashtirilsin.

12. Oʻzbekiston Respublikasi Iqtisodiyot va moliya vazirligi Agentlik taʼminoti uchun Oʻzbekiston Respublikasi Davlat budjeti parametrlari doirasida har yili zarur budjet mablagʻlarini nazarda tutsin, shuningdek, markaziy apparat uchun 6 dona hamda filiallar uchun 14 dona, shu jumladan 18 dona shaxsiy biriktirilgan xizmat yengil avtomobillarini saqlash uchun limit belgilansin. Bunda mazkur limit talablari Agentlikka homiylik va grant mablagʻlari hisobidan berilgan avtomobillarga nisbatan tatbiq etilmaydi hamda ushbu avtomobillarni saqlash xarajatlari Agentlik xodimlari mablagʻlari hisobidan qoplanadi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda Davlat xizmatini rivojlantirish agentligi filiallarini joylashtirish va ularga har bir hududga 1 dona avtotransport hisobidan xizmat avtotransport vositalari xarid qilish uchun zarur boʻlgan pul mablagʻlari ajratilishini taʼminlasin.

Agentlikka va uning tizim tashkilotlariga homiylik va grant mablagʻlari hisobidan berilgan asosiy vositalarini sotishdan tushgan pul mablagʻlari (ushbu pul mablagʻlari hisobidan sotib olingan asosiy vositalarini sotishdan tushgan pul mablagʻlari) toʻliq miqdorda Agentlikning ixtiyorida qoladi va maqsadli ravishda ularning moddiy texnik bazasini mustahkamlash va rivojlantirish, shu jumladan, transport vositalarini xarid qilish uchun yoʻnaltiriladi.

13. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi belgilangan tartibda Davlat xizmatini rivojlantirish agentligi va uning filiallarini yuqori tezlikdagi Internet tarmogʻiga ulanishini, shuningdek, zarur aloqa, jumladan hukumat aloqasi bilan taʼminlasin.

14. Oʻzbekiston Respublikasi Adliya vazirligi Davlat xizmatini rivojlantirish agentligi va boshqa manfaatdor vazirliklar va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

15. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti Administratsiyasi rahbari Z.Sh. Nizomiddinov va Oʻzbekiston Respublikasi Prezidentining maslahatchisi Sh.D. Kudbiyev zimmasiga yuklansin.

1. Ushbu Nizom Oʻzbekiston Respublikasi Prezidenti huzuridagi Boshqaruv samaradorligi agentligi (keyingi oʻrinlarda — Agentlik)ning maqomi, asosiy vazifalari, funksiyalari, huquq va masʼuliyati, faoliyatining tashkiliy asoslarini belgilab beradi.

2. Agentlik oʻz faoliyatida Oʻzbekiston Respublikasi Prezidentiga bevosita boʻysunadi va unga hisob beradi.

3. Agentlik davlat organlari va tashkilotlarida inson resurslarini rivojlantirish hamda xodimlarni boshqarish, shuningdek, boshqaruv samaradorligini oshirish sohasida yagona davlat siyosatini amalga oshirish uchun masʼul boʻlgan vakolatli davlat organi hisoblanadi.

4. Agentlik oʻz nomi yozilgan va Oʻzbekiston Respublikasining Davlat gerbi tasvirlangan muhr va blanklarga, faoliyati uchun zarur boʻlgan shtamp, boshqa atribut va rekvizitlarga, oʻz mustaqil balansiga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasidagi shaxsiy hisobvaraqlariga egadir.

5. Agentlik oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmon, qaror va farmoyishlariga, ushbu Nizomga va boshqa qonunchilik hujjatlariga amal qiladi.

6. Agentlik oʻz vakolati doirasida qabul qilgan qarorlari davlat organlari va tashkilotlari tomonidan ijro etilishi majburiy hisoblanadi.

7. Agentlikning rasmiy nomlanishi:

a) davlat tilida:

toʻliq nomi — Oʻzbekiston Respublikasi Prezidenti huzuridagi Boshqaruv samaradorligi agentligi, qisqartirilgan nomi — Boshqaruv samaradorligi agentligi;

b) rus tilida:

toʻliq nomi — Agentstvo effektivnosti upravleniya pri Prezidente Respubliki Uzbekistan, qisqartirilgan nomi — Agentstvo effektivnosti upravleniya;

v) ingliz tilida:

toʻliq nomi — Agency for Governance Efficiency under the President of the Republic of Uzbekistan, qisqartirilgan nomi — Agency for Governance Efficiency.

8. Agentlik joylashgan joy (pochta manzili): Toshkent shahri, Islom Karimov koʻchasi, 43-uy, 1-korpus.

9. Agentlik tizimiga quyidagilar kiradi:

Agentlikning filiallari;

Rahbar kadrlarni baholash markazi.

10. Agentlik filiallari yuridik shaxs tashkil etmasdan mahalliy ijro hokimiyati organlaridan, boshqa davlat organlari va tashkilotlaridan mustaqil ravishda hamda bevosita Agentlikka boʻysungan holda faoliyat yuritadi.

Agentlik huzurida alohida masalalar boʻyicha loyiha ofislari tuzilishi mumkin.

11. Quyidagilar Agentlikning asosiy vazifalari hisoblanadi:

davlat fuqarolik xizmati sohasida yagona davlat siyosatini amalga oshirish, shuningdek, davlat fuqarolik xizmatini rivojlantirish dasturlari va loyihalarini hamda mazkur sohani takomillashtirish boʻyicha takliflarni ishlab chiqish;

davlat organlari va tashkilotlarining kadrlar siyosati sohasidagi faoliyatini oʻz vakolatlari doirasida muvofiqlashtirish;

davlat fuqarolik xizmatini rivojlantirish jarayonlari va istiqbollarining monitoringi hamda tahlilini amalga oshirish, shuningdek, mazkur sohani takomillashtirish boʻyicha takliflar ishlab chiqish;

davlat fuqarolik xizmati sohasida kadrlarni boshqarish va inson resurslarini rivojlantirishning innovatsion usullarini joriy etish;

Milliy kadrlar zaxirasini boshqarish, Davlat fuqarolik xizmati lavozimlarining davlat reyestrini yuritish, shuningdek, davlat fuqarolik xizmatchilari vakant lavozimlarining yagona ochiq portalini tashkil etish va yuritish;

davlat fuqarolik xizmatchilari faoliyati samaradorligini eng muhim koʻrsatkichlar asosida baholash tizimini joriy etish va ularning natijalarini tahlil qilish, jamoatchilik fikrini oʻrganish hamda davlat organlari va tashkilotlari rahbarlarining ochiq reytingini shakllantirishda ishtirok etish;

davlat fuqarolik xizmatiga malakali va yuqori malakali mutaxassislarni, shu jumladan xorijda yashayotgan vatandoshlar orasidan aniqlash va jalb etish, shuningdek, iqtidorli yoshlar va xotin-qizlarni keng jalb etish boʻyicha tizimli ishlarni olib borish;

kadrlarni davlat fuqarolik xizmatiga tanlov asosida qabul qilishni tashkillashtirish;

davlat fuqarolik xizmati sohasiga axborot-kommunikatsiya texnologiyalarini joriy etish va ularni izchil takomillashtirib borish, davlat fuqarolik xizmatchilari shaxsiy maʼlumotlarining xavfsizligini taʼminlagan holda ular toʻgʻrisidagi maʼlumotlar bazasini shakllantirish;

davlat fuqarolik xizmatchilarining huquqlari va qonuniy manfaatlarini himoya qilishga, shuningdek, ularning mehnat faoliyati va ijtimoiy jihatdan himoya qilinishi uchun tegishli shart-sharoitlar yaratishga koʻmaklashish;

davlat xizmatchilari va mutaxassislarni xorijdagi nufuzli taʼlim, ilmiy va boshqa muassasalarda taʼlim olishini tashkil etishga koʻmaklashish;

davlat fuqarolik xizmati sohasida chet davlatlarning davlat organlari va xalqaro tashkilotlar bilan hamkorlikni amalga oshirish;

davlat organlarida natijaga asoslangan boshqaruv tizimini joriy etish;

hududlarda yangi imkoniyatlarni aniqlash va boshqaruv samaradorligini oshirish.

12. Agentlik oʻz zimmasiga yuklatilgan vazifalarga muvofiq quyidagi funksiyalarni amalga oshiradi:

a) davlat fuqarolik xizmati sohasida yagona davlat siyosatini amalga oshirish, shuningdek, davlat fuqarolik xizmatini rivojlantirish dasturlari va loyihalarini hamda mazkur sohani takomillashtirish boʻyicha takliflarni ishlab chiqish sohasida:

zamon talablari va xalqaro standartlarga muvofiq davlat fuqarolik xizmatini rivojlantirish va davlat fuqarolik xizmati sohasidagi siyosatning asosiy yoʻnalishlarini shakllantirish boʻyicha takliflar tayyorlaydi;

davlat fuqarolik xizmatini rivojlantirishga, xodimlarni boshqarish va inson resurslarini rivojlantirish sohasida ilgʻor xalqaro standartlar va eng yaxshi xorij amaliyotlarini joriy etishga qaratilgan davlat dasturlari hamda loyihalarini ishlab chiqadi va amalga oshiradi;

davlat organlari va tashkilotlarining tashkiliy tuzilmasini ularning boʻlinmalari ishini samarali tashkil etish, bir-birini takrorlovchi vazifa va funksiyalarni bekor qilish nuqtai nazaridan tahlil qiladi va ular faoliyatini optimallashtirish boʻyicha takliflar kiritadi;

davlat fuqarolik xizmati, shu jumladan kadrlarga oid ish yuritish, davlat fuqarolik xizmatchilarining maʼlumotlar bazasini shakllantirish masalalarida davlat organlari va tashkilotlari faoliyatiga uslubiy rahbarlikni amalga oshiradi;

davlat fuqarolik xizmatini rivojlantirish boʻyicha normativ-huquqiy hujjatlar va boshqa hujjatlarning loyihalarini ishlab chiqadi hamda ularni belgilangan tartibda koʻrib chiqish uchun kiritadi;

davlat fuqarolik xizmatini rivojlantirishga oid takliflarni Oʻzbekiston Respublikasi Prezidenti Administratsiyasi, Vazirlar Mahkamasi hamda davlat organlari va tashkilotlariga koʻrib chiqish uchun kiritadi;

davlat fuqarolik xizmatini rivojlantirishga qaratilgan dastur va loyihalarni moliyalashtirish uchun ajratilgan mablagʻlarni taqsimlaydi, ulardan samarali, maqsadli va oqilona foydalanilishini nazorat qiladi;

b) davlat organlari va tashkilotlarining kadrlar siyosati sohasidagi faoliyatini oʻz vakolatlari doirasida muvofiqlashtirish sohasida:

xodimlarni boshqarish va inson resurslarini rivojlantirish, shuningdek, davlat fuqarolik xizmatini rivojlantirishga oid boshqa masalalar boʻyicha davlat organlari va tashkilotlarining kadrlar bilan ishlash boʻlinmalari faoliyatini muvofiqlashtiradi;

davlat fuqarolik xizmati masalalarida davlat organlari va tashkilotlariga tushuntirishlar beradi va zarur yordam koʻrsatadi;

davlat fuqarolik xizmati kadrlarini shaffof ravishda va adolatli saralab olish hamda joy-joyiga qoʻyishni taʼminlash, davlat organlari va tashkilotlarining malakali kadrlarga boʻlgan ehtiyojlarini qanoatlantirish boʻyicha uslubiy koʻrsatmalar ishlab chiqadi;

kadrlar tarkibining son va sifat jihatidan davlat organlari va tashkilotlarining maqsadlariga muvofiq kelishiga erishish va uni saqlab qolishda davlat organlari va tashkilotlariga koʻmaklashadi;

v) davlat fuqarolik xizmatini rivojlantirish jarayonlari va istiqbollarining monitoringi hamda tahlilini amalga oshirish, shuningdek mazkur sohani takomillashtirish boʻyicha takliflar ishlab chiqish sohasida:

davlat fuqarolik xizmati sohasida davlat organlari va tashkilotlari faoliyatini tizimli asosda monitoring qiladi, aniqlangan kamchiliklar va nuqsonlarni bartaraf etish choralarini koʻradi;

davlat fuqarolik xizmatini rivojlantirish jarayonlari va istiqbollarini tahlil qiladi va uning natijalari boʻyicha sohani takomillashtirishga qaratilgan takliflarni tayyorlaydi;

davlat fuqarolik xizmatining holati, rivojlanish jarayonlari va istiqbollari, ushbu sohadagi qonunchilik ijrosining borishi toʻgʻrisida axborot-tahliliy materiallar tayyorlaydi;

davlat fuqarolik xizmati statistikasini yuritadi, davlat fuqarolik xizmatchilarining markazlashtirilgan hisobini yuritadi;

axborot-tahliliy materiallarni tayyorlash uchun davlat fuqarolik xizmati sohasidagi statistik hisobot shakllarini ishlab chiqadi;

g) davlat fuqarolik xizmati sohasida kadrlarni boshqarish va inson resurslarini rivojlantirishning innovatsion usullarini joriy etish sohasida:

davlat organlari va tashkilotlari jamoalarida axloqiy-ruhiy holatni oʻrganadi, muhitning yomonlashuviga imkon yaratayotgan sabablar va shart-sharoitlarni aniqlaydi, ularni bartaraf etish boʻyicha takliflar ishlab chiqadi;

kadrlar oʻz salohiyatini toʻla-toʻkis namoyon etishi uchun munosib shart-sharoitlarni yaratishda davlat organlari va tashkilotlariga koʻmaklashadi;

kadrlarning professional sifatlar va xizmatlarni adolatli hamda xolisona baholashga asoslangan lavozim boʻyicha oʻsishida davlat organlari va tashkilotlarida teng imkoniyatlar taʼminlanishi ustidan nazoratni amalga oshiradi;

davlat fuqarolik xizmatchilari faoliyatining samaradorligini eng muhim koʻrsatkichlar asosida baholash uslubiyatini belgilaydi;

davlat fuqarolik xizmatiga innovatsion uslublarni tatbiq qilish, davlat fuqarolik xizmatchilari ishida buyruqbozlikka barham berishning samarali yoʻllari va mexanizmlarini belgilaydi;

d) Milliy kadrlar zaxirasini boshqarish, Davlat fuqarolik xizmati lavozimlarining davlat reyestrini yuritish sohasida:

Milliy kadrlar zaxirasini boshqarish va Davlat fuqarolik xizmati lavozimlarining davlat reyestri yuritilishini taʼminlaydi;

barcha toifalardagi davlat fuqarolik xizmatchilari Davlat xizmati lavozimlarining davlat reyestri bilan qamrab olinganligini tahlil etadi;

Milliy kadrlar zaxirasiga kiritish uchun davlat xizmatchilari toʻgʻrisidagi maʼlumotlar oʻz vaqtida, toʻliq va haqqoniy taqdim etilishi yuzasidan davlat organlari va tashkilotlarining kadrlar bilan ishlash boʻlinmalari faoliyatini muvofiqlashtiradi;

Milliy kadrlar zaxirasi va Davlat fuqarolik xizmati lavozimlarining davlat reyestri yuritilishini yanada takomillashtirish boʻyicha takliflar tayyorlaydi;

davlat fuqarolik xizmatchilari vakant lavozimlarining yagona ochiq portalini tashkil etadi va uning doimiy yangilangan holatda boʻlishini taʼminlaydi;

e) davlat fuqarolik xizmatchilari faoliyati samaradorligini eng muhim koʻrsatkichlar asosida baholash tizimini joriy etish va ularning natijalarini tahlil qilish, jamoatchilik fikrini oʻrganish hamda davlat organlari va tashkilotlari rahbarlarining ochiq reytingini shakllantirishda ishtirok etish sohasida:

davlat fuqarolik xizmatchilari faoliyatining samaradorligini baholash maqsadida foydalaniladigan eng muhim koʻrsatkichlar ishlab chiqilishini taʼminlaydi;

eng muhim koʻrsatkichlarni ishlab chiqish, shuningdek, ularning natijalarini tahlil qilish boʻyicha davlat organlari va tashkilotlari faoliyatiga rahbarlik qiladi va uslubiy yordam koʻrsatadi;

davlat fuqarolik xizmatchilari faoliyati samaradorligining natijalarini tahlil qiladi hamda ularning xolisligi va haqqoniyligini tanlanma tartibda nazorat qiladi;

davlat fuqarolik xizmatchilari faoliyati samaradorligini, fuqarolar va tadbirkorlik subyektlarining davlat fuqarolik xizmatchilari faoliyatidan qoniqish darajasini baholashning zamonaviy uslublaridan foydalanadi, shu jumladan jamoatchilik fikrini oʻrganadi, statistika va ijtimoiy tadqiqotlarni tahlil qiladi;

davlat fuqarolik xizmatchilari faoliyati samaradorligini baholash yakunlari boʻyicha davlat organlari va tashkilotlari rahbarlarining ochiq reytingini shakllantiradi;

j) malakali va yuqori malakali mutaxassislarni, shu jumladan xorijda yashayotgan vatandoshlar orasidan aniqlash va jalb etish, shuningdek, davlat fuqarolik xizmatiga iqtidorli yoshlar va xotin-qizlarni keng jalb etish boʻyicha tizimli ishlarni olib borish sohasida:

istiqbolli mutaxassislar, shu jumladan yoshlar va xotin-qizlar, xorijda yashayotgan vatandoshlar orasida davlat fuqarolik xizmatining ijobiy timsolini shakllantirish chora-tadbirlari amalga oshirilishini taʼminlaydi;

davlat organlari va tashkilotlariga malakali va yuqori malakali mutaxassislarni jalb etish borasida davlat organlari va tashkilotlaridagi ishlar holatini monitoring qiladi;

muhim ilmiy va amaliy tajribaga ega boʻlgan, chet ellardagi nufuzli sanoat, moliya, ilmiy-tadqiqot, taʼlim va boshqa tashkilotlarda ishlayotgan vatandoshlar bilan aloqa oʻrnatadi;

malakali va yuqori malakali mutaxassislarni tayyorlash sohasida rivojlangan xorijiy davlatlar va xalqaro tashkilotlarning nufuzli taʼlim va ilmiy markazlari bilan aloqalarni izchil yoʻlga qoʻyish va ular bilan hamkorlikni rivojlantirishni taʼminlaydi;

ilgʻor xorijiy taʼlim muassasalarida kadrlarni qayta tayyorlash va malakasini oshirish va xorijiy mutaxassislarni jalb etish tizimini takomillashtirish boʻyicha takliflar ishlab chiqadi;

z) kadrlarni davlat fuqarolik xizmatiga tanlov asosida qabul qilishni tashkillashtirish sohasida:

oʻz amaliyoti va ilgʻor xorijiy tajribani hisobga olgan holda davlat fuqarolik xizmatiga saralab olishning asosiy parametrlarini ishlab chiqadi va takomillashtiradi;

davlat fuqarolik xizmatiga tanlov asosida saralab olishni oʻtkazish boʻyicha davlat organlari va tashkilotlarining kadrlar bilan ishlash boʻlinmalari ishini muvofiqlashtiradi;

i) davlat fuqarolik xizmati sohasida chet davlatlarning davlat organlari va xalqaro tashkilotlar bilan hamkorlikni amalga oshirish sohasida:

davlat fuqarolik xizmatini rivojlantirish sohasida chet davlatlarning davlat organlari va xalqaro tashkilotlar bilan Oʻzbekiston Respublikasining xalqaro shartnomalari va qonunchilikda belgilangan boshqa turdagi hujjatlar loyihalarini tayyorlash, tuzish boʻyicha takliflarni kelishadi, Oʻzbekiston Respublikasining xalqaro shartnomalarini tayyorlash va ijro etishda ishtirok etadi;

oʻz vakolatiga kiradigan masalalar boʻyicha chet davlatlarning davlat organlari va xalqaro tashkilotlari, xalqaro moliya institutlari va boshqa xorijiy tashkilotlar bilan belgilangan tartibda hamkorlik qiladi;

davlat fuqarolik xizmatini rivojlantirish uchun xorijiy tashkilotlar tomonidan ajratilgan mablagʻlarni belgilangan tartibda jalb qilish va ulardan foydalanishni tashkil etadi;

davlat fuqarolik xizmatini tashkil etish sohasidagi xalqaro tajribalarni oʻrganadi va Oʻzbekiston Respublikasida ushbu sohani rivojlantirishga doir takliflarni kiritadi;

xorijiy va xalqaro tashkilotlar bilan xalqaro hamkorlikni oʻrnatadi va rivojlantiradi;

k) davlat fuqarolik xizmatiga axborot-kommunikatsiya texnologiyalarini joriy etish va uni takomillashtirish hamda davlat fuqarolik xizmatchilari toʻgʻrisidagi maʼlumotlar bazasini shakllantirish sohasida:

davlat fuqarolik xizmatining yagona elektron axborot-tahliliy tizimi faoliyat yuritishini taʼminlaydi;

Milliy kadrlar zaxirasi, boʻsh ish oʻrinlari va lavozimlarni egallash uchun tanlovlar, davlat organlari va tashkilotlari xodimlarining son va sifat tarkibi toʻgʻrisidagi maʼlumotlarning axborot bazasini shakllantiradi;

inson resurslarini boshqarish va kadrlar salohiyati darajasini oshirish milliy axborot tizimini rivojlantirish va takomillashtirishning eng muhim yoʻnalishlarini ishlab chiqadi;

davlat xizmati elektron axborot-tahliliy tizimining boshqa davlat organlari va tashkilotlari axborot tizimlari bilan oʻzaro hamkorligini taʼminlaydi;

davlat xizmatchilari shaxsiy maʼlumotlarining xavfsizligini taʼminlash boʻyicha tizimli choralarni koʻradi;

l) davlat fuqarolik xizmatchilarining huquq va qonuniy manfaatlarini himoya qilish, shuningdek, ularning mehnat faoliyati va ijtimoiy himoyasi uchun munosib shart-sharoitlar yaratishga koʻmaklashish sohasida:

davlat fuqarolik xizmati toʻgʻrisidagi qonun talabini buzgan mansabdor shaxslarni javobgarlikka tortish boʻyicha Oʻzbekiston Respublikasi Prezidenti Administratsiyasi, Vazirlar Mahkamasi hamda davlat organlari va tashkilotlariga takliflar kiritadi;

davlat fuqarolik xizmatchilarining huquqiy va ijtimoiy kafolatlarini mustahkamlash boʻyicha takliflar tayyorlaydi.

m) davlat xizmatchilari va mutaxassislarni xorijdagi nufuzli taʼlim, ilmiy va boshqa muassasalarda taʼlim olishini tashkil etishga koʻmaklashish sohasida:

davlat xizmatchilari va mutaxassislarni xorijda tayyorlash boʻyicha ustuvor va talab yuqori boʻlgan yoʻnalishlarni aniqlaydi hamda taʼlim dasturlarini amalga oshirishga tashkiliy, huquqiy va moliyaviy jihatdan koʻmaklashadi;

davlat xizmatchilari va mutaxassislar salohiyatini oshirishga koʻmaklashish, iqtidorli va istiqbolli yoshlarni, eng avvalo respublika hududlaridagi yoshlarni ragʻbatlantirish maqsadida yetakchi xorijiy va mahalliy olimlar hamda ekspertlarni jalb etgan holda oʻquv kurslari, ilmiy-maʼrifiy va boshqa tadbirlarni tashkil etadi;

xorijiy taʼlim, ilmiy va boshqa tashkilotlar, olimlar va ekspertlar, shuningdek, vatandoshlar bilan hamkorlikda onlayn platformalarga asoslangan masofaviy taʼlim dasturlari, oʻquv kurslari va boshqa taʼlim, ilmiy-tadqiqot va amaliy loyihalarni amalga oshirishga koʻmaklashadi;

n) davlat organlarida natijaga asoslangan boshqaruv tizimini joriy etish sohasida:

davlat boshqaruvida zamonaviy menejment va loyihaviy yondashuv usullarini joriy etadi hamda strategik rejalashtirish asosida maqsadli koʻrsatkichlar tizimini tashkil etadi;

davlat organlarining vazifa va funksiyalarini tashkiliy-huquqiy mexanizmlar, moliyaviy-iqtisodiy va kadrlar resurslari bilan taʼminlanganlik hamda boshqaruv jarayonlarining raqamlashtirilganlik holatini muvofiqlashtiradi;

davlat organlari hududiy boʻlinmalarining bir masala boʻyicha ikki tomonlama gorizontal (hokimlikka) va vertikal (yuqoriga) boʻysunuvni bekor qilish boʻyicha takliflar ishlab chiqadi;

o) hududlarda yangi imkoniyatlarni aniqlash va boshqaruv samaradorligini oshirish sohasida:

hududlarda “oʻsish nuqta”lari va ishga solinmagan imkoniyatlarni aniqlash va ulardan samarali foydalanish boʻyicha takliflar tayyorlaydi;

hududlarni kompleks rivojlantirishga toʻsqinlik qilayotgan tizimli muammolarni aniqlash va ularni bartaraf etish boʻyicha takliflar ishlab chiqadi;

mahalliy ijro etuvchi hokimiyat organlarini yangicha yondashuv asosida aholiga kompleks xizmat koʻrsatuvchi tuzilmaga transformatsiya qilishda uslubiy rahbarlikni amalga oshiradi;

mahalliy ijro hokimiyati organlari bilan doimiy hamkorlik oʻrnatib, hududlarni kompleks rivojlantirish borasidagi davlat siyosatining asosiy yoʻnalishlari hamda ularni bajarishning samarali mexanizmlarini yaratish boʻyicha takliflar ishlab chiqadi;

davlat dasturlari (strategiyalar, konsepsiyalar) ijrosini taʼminlashda respublika va mahalliy ijro hokimiyati organlarining samarali hamkorligini tashkil etadi;

hududlarni ijtimoiy-iqtisodiy rivojlantirish boʻyicha amaliy tashriflarga tayyorgarlik koʻrish jarayonlarini puxta tashkillashtiradi.

13. Agentlik filiallarining inson resurslarini rivojlantirish hamda hududlardagi davlat organlari va tashkilotlari xodimlarini boshqarishga yoʻnaltirilgan asosiy vazifalari va funksiyalari Agentlik direktori tomonidan belgilanadi.

14. Agentlik oʻz zimmasiga yuklatilgan vazifa va funksiyalarni amalga oshirish uchun quyidagi huquqlarga ega:

davlat fuqarolik xizmati toʻgʻrisidagi qonunchilik hujjatlarining soʻzsiz bajarilishini, shu jumladan davlat fuqarolik xizmatchilarining huquqlari va qonuniy manfaatlariga rioya etilishini zarur hollarda huquqni muhofaza qiluvchi va nazorat organlari xodimlarini jalb qilgan holda oʻrganish;

davlat organlari va tashkilotlariga davlat fuqarolik xizmati sohasida ishlarni takomillashtirish boʻyicha koʻrib chiqilishi majburiy boʻlgan koʻrsatmalarni belgilangan tartibda kiritish;

davlat organlari va tashkilotlari mansabdor shaxslariga davlat fuqarolik xizmati toʻgʻrisidagi qonun hujjatlari, davlat fuqarolik xizmatchilarining huquq va qonuniy manfaatlarining buzilishiga yoʻl qoʻymaslik toʻgʻrisida yozma ogohlantirish eʼlon qilish;

davlat organlari va tashkilotlari rahbarlariga davlat fuqarolik xizmati toʻgʻrisidagi qonun hujjatlari buzilishi, ularni keltirib chiqaruvchi sabab va sharoitlarni bartaraf etish boʻyicha koʻrib chiqilishi majburiy boʻlgan taqdimnomalar kiritish;

oʻz vakolatiga kiruvchi masalalar yuzasidan davlat organlari va tashkilotlaridan statistik, tahliliy materiallar, xulosalar va boshqa maʼlumotlarni soʻrash va olish;

davlat organlari va tashkilotlarining davlat fuqarolik xizmati masalalarini koʻrib chiqish bilan bogʻliq majlislari, yigʻilishlari va hayʼat majlislarida ishtirok etish;

oʻziga yuklatilgan vazifalarni amalga oshirish uchun, zarur hollarda, davlat organlari, nodavlat notijorat tashkilotlar, yetakchi loyiha institutlari, ilmiy muassasalar va boshqa tashkilotlar, shuningdek, xalqaro tashkilotlar, chet el kompaniyalarining rahbarlari va mutaxassislarini jalb qilish, ishchi guruhlar tuzish, shu jumladan, Agentlik huzurida tashkil etilgan loyiha ofislariga mutaxassislarni shartnoma asosida jalb etish;

davlat organlari, shu jumladan mahalliy davlat hokimiyati organlarining davlat fuqarolik xizmati sohasidagi qonunchilikka zid hujjatlarini toʻxtatish yoki bekor qilish toʻgʻrisida Oʻzbekiston Respublikasi Prezidenti Administratsiyasi va Vazirlar Mahkamasiga takliflar kiritish;

oʻz vakolatiga tegishli boʻlgan masalalar boʻyicha xalqaro darajada Oʻzbekiston Respublikasi manfaatlarini qonunchilik hujjatlarida belgilangan tartibda ifodalash;

oʻziga yuklatilgan vazifalarni bajarishda davlat organlari, nodavlat notijorat tashkilotlari, yetakchi loyiha institutlari, ilmiy muassasalari va boshqa tashkilotlar, tadbirkorlik subyektlari, shuningdek, xorijiy davlatlarning Oʻzbekiston Respublikasidagi diplomatik vakolatxonalari va konsullik muassasalari, xalqaro tashkilotlar, chet el kompaniyalari hamda mutaxassislari bilan ish yozishmalarini olib borish, tadbirlarni tashkil etish va hadli kelishuvlarni tuzish orqali oʻzaro hamkorlik qilish hamda toʻgʻridan-toʻgʻri aloqalar oʻrnatish va saqlash;

davlat fuqarolik xizmati sohasida Oʻzbekiston Respublikasining xalqaro shartnomalarini tuzishda ishtirok etish;

oʻz vakolatiga kiruvchi masalalar boʻyicha idoralararo tusdagi xalqaro shartnomalarni belgilangan tartibda tuzish;

oʻz faoliyati bilan bogʻliq masalalar boʻyicha zarur tashkiliy-huquqiy shaklda yuridik shaxs maqomiga ega boʻlgan yoki yuridik shaxs maqomiga ega boʻlmagan loyiha ofislarini tashkil etish, ularning faoliyatini muvofiqlashtirish va moliyaviy taʼminlash (budjet, budjetdan tashqari mablagʻlar, davlat ishtirokidagi korxonalarning mablagʻlari, xorijiy davlatlar, xalqaro va xorijiy hukumat hamda nohukumat tashkilotlari, chet el kompaniyalari, tashkilotlari va jamgʻarmalarining grantlari, texnik koʻmagi va boshqa tashqi begʻaraz koʻmak mablagʻlari, qonunchilikda taqiqlanmagan boshqa mablagʻlar);

oʻz vakolatlari doirasida maslahat-kengash organlari va ekspert komissiyalarini tashkil etish;

davlat fuqarolik xizmati sohasini isloh qilishning muhim tizimli muammolarini hal etish boʻyicha chora-tadbirlarni ishlab chiqish maqsadida davlat organlari, xalqaro tashkilotlar, xorijiy kompaniyalar, tadbirkorlik subyektlari va boshqa manfaatdor tomonlarning samarali hamkorligi uchun ekspert maydonchalarini tashkil etish;

davlat fuqarolik xizmati sohasida ilmiy va amaliy tadqiqotlar hamda ishlanmalarni amalga oshirish boʻyicha loyihalarni saralab olish uchun tanlovlar eʼlon qilish va tanlov komissiyalarini tuzish;

davlat fuqarolik xizmati sohasidagi ilmiy va amaliy tadqiqotlarga yoʻnaltiriladigan budjet moliyaviy resurslarini taqsimlashda ishtirok etish;

davlat fuqarolik xizmati sohasidagi kadrlarni tayyorlash, shuningdek, davlat fuqarolik xizmatchilarini qayta tayyorlash va malakasini oshirish, yangi kompetensiyalarni oʻrgatish uchun belgilangan tartibda idoraviy ilmiy va oʻquv markazlarini tashkil etish;

belgilangan tartibda noshirlik faoliyatini amalga oshirish va davlat fuqarolik xizmatini rivojlantirish masalalarini yoritish uchun matbuot organlarini taʼsis etish;

oʻzining tashkiliy tuzilmasi doirasida Agentlik va uning idoraviy tuzilmalariga tegishli davlat mulkini belgilangan tartibda begʻaraz foydalanish huquqi bilan bir boʻlinmadan boshqa boʻlinmaga topshirish;

Agentlik, uning tarkibiy boʻlinmalari hamda Agentlik tizimiga kiruvchi tashkilotlarning moddiy-texnik bazasini yaxshilash choralarini koʻrish;

qonunchilik hujjatlariga muvofiq Agentlikning ijtimoiy infratuzilmasini barpo etish va takomillashtirish.

Agentlik qonunchilik hujjatlariga muvofiq boshqa huquqlarga ham ega boʻlishi mumkin.

15. Agentlik oʻz zimmasiga yuklatilgan vazifa va funksiyalarning samarali bajarilishi yuzasidan javobgar boʻladi.

16. Agentlik filiallari quyidagi huquqlarga ega:

davlat fuqarolik xizmati toʻgʻrisidagi qonunchilik hujjatlarining soʻzsiz ijro etilishini, shu jumladan davlat organlari va tashkilotlarining hududiy boʻlinmalarida davlat fuqarolik xizmatchilarining huquq va qonuniy manfaatlariga rioya etilishini oʻrganish;

davlat organlari va tashkilotlari mansabdor shaxslariga davlat fuqarolik xizmati toʻgʻrisidagi qonunchilik hujjatlari, davlat fuqarolik xizmatchilarining huquq va qonuniy manfaatlarining buzilishiga yoʻl qoʻymaslik toʻgʻrisida yozma ogohlantirishlar eʼlon qilish;

davlat organlari va tashkilotlari hududiy boʻlinmalari rahbarlariga davlat fuqarolik xizmati toʻgʻrisidagi qonunchilik hujjatlarining buzilishini, ularga imkon beruvchi sabablar va shart-sharoitlarni bartaraf etish boʻyicha belgilangan muddatlarda koʻrib chiqilishi majburiy boʻlgan taqdimnomalar kiritish;

oʻz vakolatiga kiruvchi masalalar yuzasidan davlat organlari va tashkilotlarining hududiy boʻlinmalaridan statistik, tahliliy materiallar, xulosalar va boshqa maʼlumotlarni soʻrash va olish;

davlat organlari va tashkilotlari hududiy boʻlinmalarining davlat fuqarolik xizmatini rivojlantirish, davlat fuqarolik xizmatchilarining huquq va qonuniy manfaatlarini himoya qilish masalalarini koʻrib chiqish bilan bogʻliq majlislari, yigʻilishlari, hayʼatlarida ishtirok etish.

17. Agentlik filiallari quyidagi majburiyatlarga ega:

davlat fuqarolik xizmati sohasidagi qonun hujjatlari, Agentlik direktori va uning oʻrinbosarlari topshiriqlari, shuningdek, zimmasiga yuklatilgan vazifa va funksiyalarning oʻz vaqtida va sifatli bajarilishi ustidan taʼsirchan nazoratni amalga oshirish;

tegishli hududda davlat fuqarolik xizmatining holati toʻgʻrisida Agentlikka haqqoniy tahliliy va boshqa axborotni taqdim etish.

18. Agentlik zimmasiga yuklatilgan vazifalarga muvofiq uning rahbarlari quyidagi funksional majburiyatlarni bajaradilar:

a) Agentlik direktori:

Agentlik faoliyatiga umumiy rahbarlikni amalga oshiradi, yuklatilgan vazifa va funksiyalarning bajarilishi yuzasidan shaxsan javobgar boʻladi;

oʻz oʻrinbosarlari hamda Agentlik, uning filiallari va idoraviy tashkilotlari boshqa mansabdor shaxslarining vakolatlarini hamda shaxsiy javobgarlik darajasini belgilaydi, shuningdek, vazifalarini taqsimlaydi;

oʻz vakolati doirasida Agentlik, uning filiallari va idoraviy tashkilotlarining xodimlari tomonidan ijro etilishi majburiy boʻlgan buyruqlar chiqaradi va boshqa qarorlar qabul qiladi;

Agentlik markaziy apparatining xarajatlar smetasini va belgilangan shtatlar soni doirasida shtatlar jadvalini tasdiqlaydi;

belgilangan shtatlar soni va mehnatga haq toʻlash fondi doirasida Agentlik markaziy apparati, filiallari hamda huzuridagi tashkilotlarning tuzilmasini tasdiqlaydi va oʻzgartirishlar kiritadi;

Agentlik markaziy apparati tarkibiy boʻlinmalari va uning filiallari toʻgʻrisidagi nizomlarni tasdiqlaydi;

ijro intizomiga, shuningdek, jismoniy va yuridik shaxslarning murojaatlarini qonunchilik hujjatlariga muvofiq koʻrib chiqish muddatlari va tartibiga qatʼiy rioya etilishini taʼminlaydi;

oʻz vakolati doirasida normativ-huquqiy hujjatlar qabul qiladi, zarur hollarda davlat boshqaruvining boshqa organlari bilan birgalikda qarorlar va boshqa hujjatlarni birgalikda qabul qiladi;

qonunchilik hujjatlariga muvofiq boshqa funksional majburiyatlarni bajaradi;

Agentlik direktori boʻlmagan vaqtda uning vakolatlari direktorning birinchi oʻrinbosari tomonidan, u boʻlmagan vaqtda esa Agentlik direktori farmoyishiga asosan direktorning boshqa oʻrinbosarlaridan biri tomonidan amalga oshiriladi;

b) Agentlik direktori oʻrinbosarlari:

boshqaruv samaradorligi va davlat fuqarolik xizmatini rivojlantirish, normativ-huquqiy hujjatlar va boshqa hujjatlarning loyihalarini ekspertizadan oʻtkazish va sifatli tayyorlashni tashkil etish masalalari boʻyicha Oʻzbekiston Respublikasi Prezidenti Administratsiyasi hamda Vazirlar Mahkamasining tegishli boʻlinmalari bilan oʻzaro hamkorlik qiladi;

Agentlik direktorining topshiriqlariga binoan Agentlik faoliyatiga oid dasturiy hujjatlarning bajarilishini muvofiqlashtiradi;

Agentlik markaziy apparatining tasdiqlangan tuzilmasiga muvofiq Agentlikning tegishli boʻlinmalari faoliyatini muvofiqlashtiradi;

oʻzlari mutasaddilik qilayotgan Agentlik markaziy apparati tarkibiy boʻlinmalarida kadrlar zaxirasini shakllantirish boʻyicha ishlarni tizimli asosda tashkillashtiradi;

Agentlik direktori vaqtincha boʻlmaganida direktor farmoyishiga asosan uning vazifalarini bajaradi;

qonunchilik hujjatlari va Agentlik direktorining qarorlariga muvofiq boshqa funksional majburiyatlarni bajaradi;

v) Agentlik markaziy apparati tarkibiy boʻlinmalarining rahbarlari:

tarkibiy boʻlinma toʻgʻrisidagi nizomga muvofiq aniq yoʻnalishlar boʻyicha vazifalarning sifatli va oʻz vaqtida bajarilishini taʼminlaydi;

oʻzlari muvofiqlashtirayotgan sohalarning rivojlanish holatini baholaydi va amalga oshirishning samarali mexanizmlari bilan ularni yanada rivojlantirish boʻyicha aniq takliflarni Agentlik rahbariyatiga kiritadi;

Agentlik rahbariyatining buyruqlari, farmoyishlari va topshiriqlari oʻz vaqtida va sifatli ijro etilishini taʼminlaydi;

qonunchilik hujjatlari va Agentlik direktorining qarorlariga muvofiq boshqa funksional majburiyatlarni bajaradi;

g) Agentlik filiallarining rahbarlari:

yuklatilgan vazifalarga, shuningdek, Agentlik rahbariyatining topshiriqlariga muvofiq filiallarning faoliyatini tashkil etadi;

hududda davlat fuqarolik xizmatining rivojlanishi, davlat fuqarolik xizmatchilarining huquq va qonuniy manfaatlariga rioya etilishi holatiga baho beradi va zarur hollarda, Agentlik rahbariyatiga tegishli takliflarni kiritadi;

qonunchilik hujjatlari va Agentlik direktorining qarorlariga muvofiq boshqa funksional majburiyatlarni bajaradi.

19. Agentlik direktori:

mazkur Nizom va boshqa qonun hujjatlari bilan Agentlik zimmasiga yuklangan vazifalarning sifatli va oʻz vaqtida bajarilishi, shuningdek, Agentlik ishidagi kamchiliklarni bartaraf etish boʻyicha choralar koʻrilishi;

amalga oshirilayotgan dasturlar, strategiya va konsepsiyalarda koʻzlangan natijalarga erishilishi, ularning davlat fuqarolik xizmatini rivojlantirishga taʼsiri;

Agentlik tizimida ijro intizomiga rioya etilishi yuzasidan javobgar boʻladi.

20. Direktor oʻrinbosarlari:

ishonib topshirilgan yoʻnalishlar va sohalar boʻyicha vazifalar va funksiyalarning oʻz vaqtida bajarilishi hamda natijadorligi;

mutasaddilik qilinayotgan yoʻnalishlar boʻyicha sohalarning barqaror rivojlanishini taʼminlashga oid koʻrilayotgan chora-tadbirlarning samaradorligi va natijadorligi yuzasidan javobgar boʻladi.

21. Agentlik filiallarining boshliqlari:

yuklatilgan vazifa va funksiyalarning sifatli bajarilishini tashkil etish;

tegishli hududda davlat fuqarolik xizmati sohasidagi qonunchilik, Agentlik rahbarlarining topshiriqlari oʻz vaqtida va sifatli bajarilishi ustidan taʼsirchan nazoratni amalga oshirish;

tegishli hududda davlat fuqarolik xizmatining holati toʻgʻrisida Agentlikka haqqoniy tahliliy va boshqa axborotlarni oʻz vaqtida taqdim etish yuzasidan javobgar boʻladi.

22. Agentlikka Oʻzbekiston Respublikasi Prezidenti tomonidan lavozimga tayinlanadigan va lavozimidan ozod qilinadigan direktor rahbarlik qiladi.

Agentlik direktori Oʻzbekiston Respublikasi Prezidenti Administratsiyasi rahbari tomonidan lavozimga tayinlanadigan va lavozimidan ozod etiladigan uch nafar oʻrinbosarlarga, shu jumladan, bir nafar birinchi oʻrinbosarga ega.

23. Agentlikning xodimlari, shu jumladan, uning filiallari boshliqlari va xodimlari Agentlik direktori tomonidan lavozimga tayinlanadi va lavozimidan ozod etiladilar.

25. Agentlik huzurida direktorning birinchi oʻrinbosari, Agentlik alohida tarkibiy boʻlinmalarining rahbarlari va mutaxassislari, shuningdek, fuqarolik jamiyati institutlarining taniqli vakillaridan iborat tarkibda Boshqaruv samaradorligi va davlat fuqarolik xizmatini rivojlantirish boʻyicha jamoatchilik kengashi tashkil etiladi.

Jamoatchilik kengashining nizomi, aʼzolari soni, shuningdek, fuqarolik jamiyati institutlari vakillari orasidan shakllantiriladigan tarkibi va raisi Agentlik direktorining buyrugʻi bilan tasdiqlanadi.

Jamoatchilik kengashi majlisida qabul qilingan qaror asosida Kengash raisiga uning shaxsiy tarkibiga oʻzgartirish va qoʻshimchalar kiritish huquqi beriladi.

Quyidagilar Jamoatchilik kengashining asosiy vazifalari hisoblanadi:

boshqaruv samaradorligi va davlat fuqarolik xizmatini yanada rivojlantirishga, shuningdek, davlat fuqarolik xizmatchisining maqomi oshirishga toʻsqinlik qilayotgan muammoli masalalarni muhokama qilish;

boshqaruv samaradorligi va davlat fuqarolik xizmatini rivojlantirish, davlat fuqarolik xizmatchilarining huquq va qonuniy manfaatlarini himoya qilish boʻyicha qoʻshimcha kafolatlarni taʼminlash boʻyicha normativ-huquqiy hujjatlar va dasturiy hujjatlarning amaliy ijrosi mexanizmlarini tanqidiy koʻrib chiqish;

boshqaruv samaradorligi va davlat fuqarolik xizmatini rivojlantirishning qonunchilik bazasini takomillashtirishga oid takliflarni ishlab chiqishda, shu jumladan ishlab chiqilayotgan va Agentlikka koʻrib chiqish uchun kiritilayotgan normativ-huquqiy hujjatlarning loyihalarini muhokama qilish yoʻli bilan ishtirok etish.

26. Quyidagilar:

Agentlik direktori, direktorning birinchi oʻrinbosari, direktor oʻrinbosarlari faoliyati samaradorligi — Oʻzbekiston Respublikasi Prezidenti Administratsiyasi tomonidan belgilanadigan faoliyat samaradorligini baholashning integratsiyalashgan koʻrsatkichlari asosida baholanadi;

Agentlik markaziy apparati tarkibiy boʻlinmalarining boshliqlari, filiallari boshliqlari va xodimlarining faoliyati samaradorligi — Agentlik direktori tomonidan tasdiqlanadigan faoliyat samaradorligini baholash koʻrsatkichlari asosida baholanadi.

27. Agentlik xodimlariga Oʻzbekiston Respublikasi Prezidenti Administratsiyasining xodimlari uchun belgilangan moddiy ragʻbatlantirish va mehnatga haq toʻlash, tibbiy xizmat koʻrsatish shartlari tatbiq etiladi.

Agentlikning boshqaruv xodimlarining lavozim maoshini Yagona tarif setkasi boʻyicha tasdiqlangan mehnatga haq toʻlash razryadlari boʻyicha aniqlashda tarif koeffitsiyentlari ikki baravar oshirilgan miqdorda qoʻllaniladi. Bunda mehnatga haq toʻlash shartlari Agentlikka tenglashtirilgan tashkilotlar uchun amalda boʻlgan tarif koeffitsiyentlari saqlab qolinadi.

Agentlik xodimlariga ilgari ishlagan joyida berilgan harbiy va maxsus unvonlar (martaba va malaka darajalari, diplomatik darajalar va boshqalar) saqlanib qoladi hamda ularning Agentlikda ishlagan vaqti harbiy va maxsus unvonlarni (martaba va malaka darajalari, diplomatik darajalar va boshqalar) olish uchun zarur boʻlgan ish stajiga kiritiladi.

Agentlikka lavozimga tayinlangan (yuborilgan) huquqni muhofaza qiluvchi organlar xodimlari oʻz majburiyatlarini bajarish davrida pul taʼminoti saqlanmagan holda tegishli huquqni muhofaza qiluvchi organlar kadrlarining amaldagi zaxirasiga toʻgʻridan-toʻgʻri kiritiladi.

28. Agentlik va uning filiallari xodimlarini moddiy ragʻbatlantirish va ijtimoiy qoʻllab-quvvatlashning asosiy turlari quyidagilardan iborat:

oylik, choraklik, yarim yillik, yillik ish yakunlari boʻyicha prognoz koʻrsatkichlarni bajarganlik va oshirib bajarganlik uchun, shuningdek, bayram kunlari mukofotlash;

alohida muhim topshiriqlarni bajarganlik uchun yakka tartibda mukofotlash va boshqa ragʻbatlantirish toʻlovlari;

biriktirilgan ish sohasining murakkabligi va muhimligi hamda mehnatda erishgan yuqori natijalari uchun xodimning lavozim maoshiga ustamalar toʻlash;

xizmat majburiyatlarini bajarishdagi alohida xizmatlari uchun, yubiley sanalari va pensiyaga chiqishi munosabati bilan qimmatbaho sovgʻalar bilan mukofotlash;

Agentlik va uning filiallari xodimlarining lavozim maoshlariga har oylik shaxsiy ustamalar;

oʻz turar joyiga ega boʻlmagan Agentlik va uning filiallari xodimlariga qonunchilik hujjatlarida Hisob palatasi xodimlari uchun belgilangan tartib va miqdorlarda uy-joyni ijaraga olish shartnomalari boʻyicha xarajatlarni Agentlik tomonidan qoplash.

29. Agentlik va uning filiallari xodimlariga Agentlik qoshidagi Davlat xizmatini rivojlantirishni qoʻllab-quvvatlash jamgʻarmasi mablagʻlari hisobidan:

yil davomidagi ish yakunlari boʻyicha lavozim maoshining besh baravarigacha miqdorda mukofot puli;

boshqa ustamalar va toʻlovlardan qatʼi nazar lavozim maoshlariga har oy ustamalar va boshqa ragʻbatlantiruvchi toʻlovlar toʻlanadi.

Agentlik qoshidagi Davlat xizmatini rivojlantirishni qoʻllab-quvvatlash jamgʻarmasi toʻgʻrisidagi nizom Oʻzbekiston Respublikasi Prezidenti Administratsiyasi rahbari tomonidan tasdiqlanadi.

31. Agentlik xodimlari mehnat faoliyatini toʻxtatganlaridan soʻng ularga avvalgi ish joyi boʻyicha egallagan yoki unga teng boʻlgan lavozim berish kafolatlari taʼminlanadi, xodimning malakasi yetarli emasligi yoki sogʻligʻi tufayli yoxud oʻz funksional majburiyatlarini buzganligi oqibatida bajariladigan ishga nomuvofiqligi uchun mehnat faoliyati toʻxtatilgan hollar bundan mustasno.

32. Agentlik:

Oʻzbekiston Respublikasi Prezidenti Administratsiyasiga belgilangan tartibda yuklatilgan vazifa va funksiyalarni bajarish bilan bogʻliq normativ-huquqiy hujjatlar va boshqa hujjatlarning loyihalarini kiritadi;

davlat organlari va tashkilotlari bilan birgalikda Oʻzbekiston Respublikasi Prezidenti Administratsiyasiga kiritish uchun davlat fuqarolik xizmatini rivojlantirish boʻyicha takliflar va tavsiyalar tayyorlanishini taʼminlaydi;

belgilangan tartibda boshqa funksiyalarni amalga oshiradi.

33. Agentlik filiallari har chorakda chuqur tahlillar asosida qoʻyilgan vazifalarning bajarilishi toʻgʻrisida umumlashtirilgan tahliliy axborotni, shuningdek, aniqlangan muammolar va ularni bartaraf etish boʻyicha asoslantirilgan takliflarni Agentlikka kiritadi.

34. Agentlik har chorakda respublikada davlat fuqarolik xizmatini rivojlantirish holati toʻgʻrisidagi tahliliy materiallarni, shuningdek, mavjud muammolarni bartaraf etish boʻyicha takliflarni Oʻzbekiston Respublikasi Prezidenti Administratsiyasiga kiritadi.

35. Agentlik oʻz veb-saytida har chorak yakunlariga koʻra tegishli hisobot davrida respublikada davlat fuqarolik xizmatining rivojlanish holati toʻgʻrisida press-reliz eʼlon qilib boradi.

36. Agentlikni qayta tashkil etish va tugatish qonun hujjatlarida belgilangan tartibda amalga oshiriladi.