Oʻzbekiston Respublikasining tashqi siyosatini samarali oʻtkazish, respublikaning siyosiy va ijtimoiy-iqtisodiy rivojlanishi uchun qulay tashqi sharoitni vujudga keltirish, xalqaro munosabatlarda uning manfaatlarini ifodalash va himoya qilish maqsadida Vazirlar Mahkamasi qaror qiladi:

1. Quyidagilar Oʻzbekiston Respublikasi Tashqi ishlar vazirligi faoliyatining asosiy vazifalari va yoʻnalishlari qilib belgilansin:

Oʻzbekiston Respublikasining chet mamlakatlar bilan har tomonlama va teng huquqli hamkorlikni oʻrnatish va chuqurlashtirishga qaratilgan tashqi siyosatini ishlab chiqishda va amalga oshirishda ishtirok etish;

Oʻzbekistonning, uning fuqarolari manfaatlarini xorijiy mamlakatlarda va xalqaro tashkilotlarda himoya qilish hamda ular nomidan vakillik qilish, respublikaning chet mamlakatlardagi diplomatiya va konsullik muassasalarini tuzish va ularning faoliyatiga rahbarlik qilish, diplomatiya xizmati uchun kadrlar tayyorlashni tashkil etish;

Oʻzbekiston Respublikasining xalqaro shartnomalarini tuzish, bajarish va bekor qilish toʻgʻrisida belgilangan tartibda takliflar kiritish, respublikaning davlat va jamoat tashkilotlari tomonidan ularning amalda bajarilishini umumlashtirish;

vazirlik vakolati doirasida chet mamlakatlar bilan aloqalarni oʻrnatishda va rivojlantirishda respublikaning davlat va jamoat tashkilotlariga, fuqarolariga yordam koʻrsatish;

Oʻzbekistonda xorijiy davlatlarning diplomatiya missiyalarini ochishga yordam berish, Oʻzbekiston Respublikasi hududida xorijiy vakolatxonalar va ular xodimlarining diplomatik va konsullik daxlsizligiga rioya qilish ustidan nazoratni amalga oshirish, xorijiy diplomatlarni, chet el ommaviy axborot vositalarining muxbirlarini roʻyxatga olish va akkreditatsiya qilish;

respublikada faoliyat koʻrsatuvchi xorijiy elchixonalar va konsullik muassasalari bilan diplomatiya, protokol masalalari va boshqa masalalar boʻyicha aloqa qilish, ular faoliyatining Oʻzbekiston Respublikasi qonunlariga muvofiq boʻlishini taʼminlash;

xorijiy davlat, parlament va hukumat delegatsiyalarini qabul qilishni, shuningdek, Oʻzbekiston Respublikasining davlat, parlament va hukumat delegatsiyalarining chet mamlakatlarga tashriflarini tayyorlashni tashkil etish;

belgilangan tartibda pasport-viza hujjatlarini ishlab chiqish va rasmiylashtirish, hujjatlarni oshkor qilish va fuqarolik holatlari hujjatlarini roʻyxatga olish boʻyicha konsullik masalalarini hal etish, chet eldagi respublika fuqarolari uchun notarial ishlarni bajarish;

Oʻzbekiston Respublikasining tashqi siyosati masalalarini yoritishda ommaviy axborot vositalariga yordam berish, respublikada akkreditatsiya qilingan xorijiy jurnalistlar bilan brifinglar, matbuot konferensiyalari va uchrashuvlar oʻtkazish.

2. Belgilab qoʻyilsinki, Oʻzbekiston Respublikasi Tashqi ishlar vazirligining oʻz vakolati doirasida qabul qilgan qarorlarini bajarish respublikaning vazirliklari va idoralari, mahalliy boshqaruv organlari, mansabdor shaxslari va fuqarolari uchun majburiydir.

3. Oʻzbekiston Respublikasi Tashqi ishlar vazirligi markaziy apparatining tuzilishi ilovaga muvofiq tasdiqlansin.

Toshkent diplomatiya korpusiga xizmat koʻrsatish boshqarmasi Oʻzbekiston Respublikasi Tashqi ishlar vazirligi huzuridagi yuridik shaxs huquqlari bilan harakat qiluvchi xoʻjalik hisobidagi diplomatiya xizmati koʻrsatish xizmatiga aylantirilsin.

4. Oʻzbekiston Respublikasi Tashqi ishlar vazirligi apparati xodimlarining eng koʻp soni, tegishli ish haqi fondi bilan, 160 kishidan (binoni qoʻriqlovchi va unga xizmat koʻrsatuvchi xodimlardan tashqari) iborat qilib belgilansin.

Oʻzbekiston Respublikasi Tashqi ishlar vazirligiga vazirning toʻrt nafar oʻrinbosari, shu jumladan, ikki nafar birinchi oʻrinbosari, oʻn bir kishidan iborat hayʼati boʻlishiga ruxsat etilsin, hayʼatning shaxsiy tarkibi Vazirlar Mahkamasi tomonidan tasdiqlanadi.

5. Oʻzbekiston Respublikasi Tashqi ishlar vazirligi bir oy muddat ichida Vazirlar Mahkamasining koʻrib chiqishi uchun quyidagilarni kiritsin:

keyinchalik Oʻzbekiston Respublikasi Oliy Kengashining tasdigʻiga taqdim etgan holda diplomatiya va konsullik ustavlari loyihalarini;

vazirlik toʻgʻrisidagi, Oʻzbekiston Respublikasi hududida xorijiy davlatlarning diplomatiya va konsullik vakolatxonalari toʻgʻrisidagi, Oʻzbekiston Respublikasi davlat muassasalari va boshqa muassasalarining hamda ularning mansabdor shaxslarining xorijiy davlatlarning muassasalari va mansabdor shaxslari bilan aloqalari tartibi toʻgʻrisidagi nizomlar loyihalarini;

Oʻzbekiston Respublikasining Davlat protokoli hujjatlarini;

Oʻzbekiston Respublikasi hududida xorijiy muxbirlar faoliyatining asosiy qoidalarini;

Oʻzbekiston Respublikasi Tashqi iqtisodiy aloqalar vazirligi hamda Oliy va oʻrta maxsus taʼlim vazirligi bilan birgalikda respublikada diplomatiya va tashqi iqtisodiy xizmatlar uchun kadrlar tayyorlash boʻyicha oliy oʻquv yurtini tashkil etish toʻgʻrisida takliflarni.

6. Oʻzbekiston Respublikasi Moliya vazirligi Oʻzbekistonning taraqqiyot istiqbolini belgilash qoʻmitasi va Oʻzbekiston Respublikasi Tashqi ishlar vazirligi bilan birgalikda ikki hafta muddat ichida Tashqi ishlar vazirligining faoliyatini taʼminlovchi budjetdan ajratmalarning talab qilinadigan limitlarini soʻm va valyutada qoplash hisob-kitoblarini amalga oshirsin hamda Vazirlar Mahkamasiga koʻrib chiqish uchun kiritsin.

7. Oʻzbekiston shartnomalar va savdo boʻyicha davlat-aksionerlik uyushmasi Oʻzbekiston Respublikasi Tashqi ishlar vazirligi obyektlarini hamda Oʻzbekistondagi xorijiy davlatlarning diplomatiya va konsullik muassasalarini qurish va taʼmirlash uchun moddiy-texnika resurslari ajratishni nazarda tutsin.

8. Oʻzbekiston Respublikasi Aloqa vazirligi Oʻzbekiston Respublikasi Tashqi ishlar vazirligining talabnomalari boʻyicha vazirlik apparati uchun zarur miqdorda aloqa vositalarini ajratsin.

9. Oʻzbekiston Respublikasi Tashqi ishlar vazirligiga uning apparatiga va xorijiy delegatsiyalarga xizmat koʻrsatish uchun xizmat garajini tashkil etishga ruxsat berilsin.

10. Oʻzbekiston SSR Ministrlar Sovetining “Oʻzbekiston SSR Tashqi ishlar vazirligi toʻgʻrisidagi Nizomni tasdiqlash haqida” 1988-yil 23-iyuldagi 253-son qarori va Oʻzbekiston Respublikasi Prezidenti huzuridagi Vazirlar Mahkamasining “Oʻzbekiston Respublikasi Tashqi ishlar vazirligining faoliyatini yaxshilash chora-tadbirlari toʻgʻrisida” 1991-yil 20-sentabrdagi 239-son qarori oʻz kuchini yoʻqotgan deb hisoblansin.