O‘zbekiston Respublikasi Prezidentining “Transport sohasida davlat boshqaruvi tizimini tubdan takomillashtirish chora-tadbirlari to‘g‘risida” 2019-yil 1-fevraldagi PF-5647-son qarori ijrosini ta’minlash, shuningdek, O‘zbekiston Respublikasi Transport vazirligi huzuridagi Transport va logistikani rivojlantirish muammolarini o‘rganish markazi faoliyatini tashkil etish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Transport sohasida davlat boshqaruvi tizimini tubdan takomillashtirish chora-tadbirlari to‘g‘risida” 2019-yil 1-fevraldagi PF-5647-son qaroriga muvofiq O‘zbekiston Respublikasi Transport vazirligi huzuridagi Transport va logistikani rivojlantirish muammolarini o‘rganish markazi (keyingi o‘rinlarda Markaz deb ataladi) tashkil etilganligi ma’lumot uchun qabul qilinsin.

2. Quyidagilar Markazning asosiy vazifalari etib belgilansin:

transport va logistika tizimi muammolarini o‘rganish, ularni bartaraf etish hamda ilg‘or xorijiy tajriba asosida sohani rivojlantirish bo‘yicha takliflar ishlab chiqish;

xalqaro transport yo‘laklarida yuzaga kelayotgan muammolarni aniqlash va yechimlari bo‘yicha takliflar tayyorlash, istiqbolli transport yo‘laklarini shakllantirish;

logistika tizimini takomillashtirish, tadbirkorlik subyektlarining transport-logistika xizmatlaridan foydalanishdagi sarf-xarajatlarini kamaytirish bo‘yicha takliflar ishlab chiqish;

transport-logistika va transport-ekspeditorlik xizmatlari bozorini rivojlantirish, transport-logistika markazlari keng tarmoqlarini tashkil etish bo‘yicha takliflar ishlab chiqish;

logistika samaradorligi indeksida respublikaning o‘rnini yaxshilashga to‘sqinlik qilayotgan mavjud muammolarning tizimli tahlilini olib borish, ularni hal etish bo‘yicha takliflar ishlab chiqish;

transport sohasini innovatsion rivojlantirish bo‘yicha takliflar ishlab chiqish, ilmiy-tadqiqot grant loyihalarni shakllantirish va amalga oshirish;

atrof muhitga zararli ta’sirni kamaytirish, resurslarni tejash va transportda ekologiyani yaxshilash bo‘yicha muammolarni o‘rganish va takliflar tayyorlash;

tizimli ravishda ilmiy-tadqiqot muassasalari, davlat va xo‘jalik boshqaruvi organlari, shuningdek, transport va logistikani rivojlantirish muammolarini o‘rganish bo‘yicha boshqa tashkilotlar bilan hamkorlik qilish.

3. Quyidagilar:

O‘zbekiston Respublikasi Transport vazirligi huzuridagi Transport va logistikani rivojlantirish muammolarini o‘rganish markazining boshqaruv xodimlarining cheklangan soni 15 nafardan iborat bo‘lgan tuzilmasi 1-ilovaga muvofiq;

O‘zbekiston Respublikasi Transport vazirligi huzuridagi Transport va logistikani rivojlantirish muammolarini o‘rganish markazining Ustavi 2-ilovaga muvofiq tasdiqlansin.

4. Belgilab qo‘yilsinki:

Markaz davlat muassasasi shaklidagi yuridik shaxs hisoblanadi, O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga va blankalariga, mustaqil balansga, O‘zbekiston Respublikasi Moliya vazirligi G‘aznachiligida shaxsiy g‘azna hisobvaraqlariga egadir;

Markaz direktori O‘zbekiston Respublikasi transport vaziri tomonidan lavozimga tayinlanadi va lavozimdan ozod qilinadi;

Markazni 2019-yilda va keyingi yillarda saqlash uchun budjet mablag‘lari O‘zbekiston Respublikasi Transport vazirligi bilan kelishgan holda Markaz tomonidan taqdim qilinadigan asoslangan hisob-kitoblarga binoan O‘zbekiston Respublikasi Moliya vazirligi tomonidan ajratiladi.

5. Markaz direktoriga quyidagi huquqlar berilsin:

zarurat bo‘lganda O‘zbekiston Respublikasi Transport vazirligi bilan kelishgan holda boshqaruv xodimlarining belgilangan cheklangan umumiy soni va mehnatga haq to‘lash fondi doirasida Markaz tuzilmasiga o‘zgartirishlar kiritish;

O‘zbekiston Respublikasi Transport vazirligi bilan kelishgan holda O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasi mablag‘lari hisobiga davlat organlari va boshqa tashkilotlar, yetakchi loyiha institutlari, ilmiy va ta’lim muassasalari, shuningdek, xalqaro tashkilotlar, xorijiy kompaniyalarning yuqori malakali mutaxassislarini va ekspertlarni maslahatchilar sifatida shartnoma asosida jalb qilish;

ilmiy-tadqiqot va oliy ta’lim tashkilotlari, shu jumladan, xalqaro va xorijiy tashkilotlar bilan qo‘shma tadqiqotlar o‘tkazish bo‘yicha shartnomalar tuzish;

6. Quyidagilar Markaz faoliyatini moliyalashtirish manbalari etib belgilansin:

O‘zbekiston Respublikasi Davlat budjeti mablag‘lari;

O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasi mablag‘lari;

jismoniy va yuridik shaxslarning xayriya ehsonlari;

xalqaro moliya tashkilotlarining grantlari;

qonun hujjatlarida taqiqlanmagan boshqa manbalar.

7. O‘zbekiston Respublikasi Transport vazirligi:

Markaz faoliyatini samarali tashkil etish choralarini ko‘rsin;

bir oy muddatda Markazni yuqori malakali mutaxassislar bilan to‘ldirsin.

8. O‘zbekiston Respublikasi Moliya vazirligi:

har yili O‘zbekiston Respublikasi Davlat budjeti parametrlarida Markazni saqlash uchun zarur mablag‘larni nazarda tutsin;

Markazning asoslangan hisob-kitoblariga binoan Markazni zarur mebellar, inventar, kompyuter va boshqa tashkiliy texnika bilan jihozlash bo‘yicha xarajatlar uchun budjet mablag‘lari ajratilishini ta’minlasin;

Markazga xizmat ko‘rsatish uchun bitta biriktirilgan va bitta navbatchi avtotransport vositasini saqlash uchun zarur limitlar ajratsin.

9. Markaz:

O‘zbekiston Respublikasi Davlat statistika qo‘mitasining statistik axboroti;

O‘zbekiston Respublikasi Moliya vazirligi huzuridagi Budjet-soliq tadqiqotlari instituti va O‘zbekiston Respublikasi Iqtisodiyot va sanoat vazirligi huzuridagi Prognozlashtirish va makroiqtisodiy tadqiqotlar institutining tahliliy materiallari majburiy jo‘natiladigan reyestrga kiritilsin.

10. Markaz Toshkent shahar, Yunusobod tumani, Amir Temur 1-tor ko‘chasi, 6-uy manzilidagi binoga bepul foydalanish huquqi asosida joylashtirilsin.

11. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — transport vaziri A.J. Ramatov zimmasiga yuklansin.

1. Ushbu Ustav O‘zbekiston Respublikasi Transport vazirligi huzuridagi Transport va logistikani rivojlantirish muammolarini o‘rganish markazining (keyingi o‘rinlarda Markaz deb ataladi) asosiy vazifalari, funksiyalari, huquqlari, javobgarligi, faoliyatini tashkil etish va hisobot berish tartibini belgilaydi.

2. Markaz davlat muassasasi shaklidagi yuridik shaxs hisoblanadi, O‘zbekiston Respublikasining Davlat gerbi tasviri tushirilgan va o‘z nomi davlat tilida yozilgan muhrga va blankalarga, mustaqil balansga, O‘zbekiston Respublikasi Moliya vazirligi G‘aznachiligida shaxsiy g‘azna hisobvaraqlariga egadir.

3. Markaz o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, O‘zbekiston Respublikasi Transport vazirligining qarorlari va buyruqlariga, ushbu Ustavga va boshqa qonun hujjatlariga amal qiladi.

4. Markaz o‘z faoliyatida O‘zbekiston Respublikasi Transport vazirligiga hisobot beradi.

5. Markazning rasmiy nomi:

a) davlat tilida:

to‘liq nomi — O‘zbekiston Respublikasi Transport vazirligi huzuridagi Transport va logistikani rivojlantirish muammolarini o‘rganish markazi;

qisqartirilgan nomi — Transport muammolarini o‘rganish markazi;

b) rus tilida:

to‘liq nomi — Sentr izucheniya problem razvitiya transporta i logistiki pri Ministerstve transporta Respubliki Uzbekistan;

qisqartirilgan nomi — Sentr izucheniya problem transporta;

v) ingliz tilida:

to‘liq nomi — Center for research of issues in development of transport and logistics under the Ministry of transport of the Republic of Uzbekistan;

qisqartirilgan nomi — Center for research transport issues.

6. Markaz budjet tashkiloti hisoblanadi va uni saqlash O‘zbekiston Respublikasi Davlat budjeti mablag‘lari hisobiga amalga oshiriladi.

7. Markaz joylashgan joy (pochta manzili): 100128, Toshkent shahri, Shayxontohur tumani, Zulfiyaxonim ko‘chasi, 3-uy.

8. Transport va logistikani rivojlantirish sohasida muammolarni tizimli asosda o‘rganishni ta’minlash va takliflarni ishlab chiqish Markaz faoliyatining maqsadlari hisoblanadi.

9. Quyidagilar Markazning asosiy vazifalari hisoblanadi:

transport va logistika tizimi muammolarini o‘rganish, ularni bartaraf etish hamda ilg‘or xorijiy tajriba asosida sohani rivojlantirish bo‘yicha takliflar ishlab chiqish;

xalqaro transport yo‘laklarida yuzaga kelayotgan muammolarni aniqlash va yechimlari bo‘yicha takliflar tayyorlash, istiqbolli transport yo‘laklarini shakllantirish;

logistika tizimini takomillashtirish, tadbirkorlik subyektlarining transport-logistika xizmatlaridan foydalanishdagi sarf-xarajatlarini kamaytirish bo‘yicha takliflar ishlab chiqish;

transport-logistika va transport-ekspeditorlik xizmatlari bozorini rivojlantirish, transport-logistika markazlari keng tarmoqlarini tashkil etish bo‘yicha takliflar ishlab chiqish;

logistika samaradorligi indeksida respublikaning o‘rnini yaxshilashga to‘sqinlik qilayotgan mavjud muammolarning tizimli tahlilini olib borish, ularni hal etish bo‘yicha takliflar ishlab chiqish;

transport sohasini innovatsion rivojlantirish bo‘yicha takliflar ishlab chiqish, ilmiy-tadqiqot grant loyihalarini shakllantirish va amalga oshirish;

atrof-muhitga zararli ta’sirni kamaytirish, resurslarni tejash va transportda ekologiyani yaxshilash bo‘yicha muammolarni o‘rganish va takliflar tayyorlash;

tizimli ravishda ilmiy-tadqiqot muassasalari, davlat va xo‘jalik boshqaruvi organlari, shuningdek, transport va logistikani rivojlantirish muammolarini o‘rganish bo‘yicha boshqa tashkilotlar bilan hamkorlik qilish.

10. Markaz o‘ziga yuklangan vazifalarga muvofiq quyidagi funksiyalarni amalga oshiradi:

a) transport va logistika tizimi muammolarini o‘rganish, ularni bartaraf etish hamda ilg‘or xorijiy tajriba asosida sohani rivojlantirish bo‘yicha takliflar ishlab chiqish sohasida:

transport va logistika tizimini takomillashtirish muammolarini o‘rganadi va ularni bartaraf etish bo‘yicha takliflar ishlab chiqadi;

respublikaning transport salohiyatidan samarali foydalanish imkoniyatlarini tadqiq etadi;

milliy transport tizimining jahon transport tizimiga integratsiyasini chuqurlashtirish va logistika tizimini takomillashtirish bo‘yicha takliflar ishlab chiqadi;

transport va logistika tizimini rivojlantirishga to‘sqinlik qilayotgan omillarni aniqlaydi, tashish jarayonlarini maqbullashtirishni ta’minlaydigan logistika markazlari tashkil etish bo‘yicha takliflar tayyorlaydi;

transport-logistika sohasidagi ilg‘or xorijiy tajribalarni doimiy monitoring qiladi va ular asosida sohani rivojlantirish bo‘yicha takliflar ishlab chiqadi;

b) xalqaro transport yo‘laklarida yuzaga kelayotgan muammolarni aniqlash va yechimlari bo‘yicha takliflar tayyorlash, istiqbolli transport yo‘laklarini shakllantirish sohasida:

turli transport turlaridan foydalangan holda xalqaro transport yo‘laklarini rivojlantirish imkoniyatlarini o‘rganadi va ularni maqbullashtirish bo‘yicha takliflarni ishlab chiqadi;

Markaziy Osiyoda qo‘shimcha yuk oqimlarini jalb qilishni ta’minlaydigan yangi transport yo‘laklarini shakllantirish bo‘yicha takliflar tayyorlaydi;

Janubiy va Janubi-Sharqiy Osiyo, Yevropa, Yaqin va O‘rta Sharq mamlakatlari bilan yuk va yo‘lovchi tashish transporti oqimlarini maqbullashtirish bo‘yicha izlanishlar olib boradi;

milliy transport kommunikatsiyalari orqali xalqaro va mintaqaviy tranzitni rivojlantirish muammolarini tadqiq etadi;

transport va logistikani rivojlantirish sohasida hamkorlikdagi xalqaro loyihalarni ishlab chiqish va amalga oshirishni tashkil qilishda, xalqaro aloqalarni o‘rnatishda qatnashadi;

v) logistika tizimini takomillashtirish, tadbirkorlik subyektlarining transport-logistika xizmatlaridan foydalanishdagi sarf-xarajatlarini kamaytirish bo‘yicha takliflar ishlab chiqish sohasida:

logistik xizmatlar bozorini tahlil qilib boradi va logistika tizimini takomillashtirish yuzasidan takliflar tayyorlaydi;

tadbirkorlik subyektlarining transport va logistika xizmatlari uchun xarajatlarini minimallashtirish bo‘yicha takliflar ishlab chiqadi;

sohadagi tadbirkorlik subyektlari faoliyatini takomillashtirish bo‘yicha takliflar tayyorlaydi;

g) atrof-muhitga zararli ta’sirni kamaytirish, resurslarni tejash va transportda ekologiyani yaxshilash bo‘yicha muammolarni o‘rganish va takliflar tayyorlash sohasida:

atrof-muhitga va inson salomatligiga transportning zararli ta’sirini kamaytirish imkoniyatlarini tadqiq qiladi hamda ularni joriy etish bo‘yicha takliflarni ishlab chiqadi;

transportda resurslarni tejash va ekologiya muammolarini o‘rganadi, transport resurslaridan samarali foydalanish, atrof-muhitga texnogen yuklamani minimallashtirish masalalariga kompleks yondashgan holda takliflar ishlab chiqadi;

iqlim o‘zgarishi sohasidagi ilmiy-tadqiqotlarni transport sektoriga integratsiya qilishga ko‘maklashadi;

“yashil” transportni rivojlanish tendensiyalarini tahlil qiladi va takliflar ishlab chiqadi;

d) transport-logistika va transport-ekspeditorlik xizmatlari bozorini rivojlantirish, transport-logistika markazlari keng tarmoqlarini tashkil etish bo‘yicha takliflar ishlab chiqish sohasida:

transport-ekspeditorlik korxonalari faoliyatini baholash mezonlarini ishlab chiqadi va doimiy reytingini yuritadi;

transport-ekspeditorlik xizmatlarini rivojlantirish bo‘yicha takliflar ishlab chiqadi;

transport-logistika markazlari faoliyatini monitoring qiladi, baholaydi va reyestrini yuritadi;

transport-logistika markazlari keng tarmog‘ini rivojlantirish bo‘yicha takliflar ishlab chiqadi;

e) logistika samaradorligi indeksida respublikaning o‘rnini yaxshilashga to‘sqinlik qilayotgan mavjud muammolarning tizimli tahlilini olib borish, ularni hal etish bo‘yicha takliflar ishlab chiqish sohasida:

logistika samaradorligi indeksida respublikaning o‘rnini yaxshilashga qaratilgan amaliy chora-tadbirlar dasturiga kiritish uchun takliflar ishlab chiqadi;

logistika samaradorligi indeksi bo‘yicha maqsadli ko‘rsatkichlarga erishishga qaratilgan amaliy chora-tadbirlarning ijrosi yuzasidan axborot, shuningdek, tegishli ma’lumotlar, statistika axborotlari va boshqa materiallarni tayyorlaydi;

xalqaro tashkilotlar, reyting agentliklari, mustaqil nashrlar va nodavlat notijorat tashkilotlari, xalqaro ekspert va konsultantlar bilan samarali xalqaro hamkorlikni yo‘lga qo‘yadi;

j) transport sohasini innovatsion rivojlantirish bo‘yicha takliflar ishlab chiqish, ilmiy-tadqiqot grant loyihalarini shakllantirish va amalga oshirish sohasida:

transport sohasidagi innovatsion loyihalar ro‘yxatini shakllantiradi va muvofiqlashtiradi;

transport sohasini rivojlangan davlatlar tajribasi asosida innovatsion rivojlantirish bo‘yicha takliflar tayyorlaydi;

sohada faoliyat yurituvchi kadrlar uchun innovatsion va texnologik faoliyatni boshqarish yo‘nalishida muntazam ilmiy-amaliy seminarlar tashkil qiladi;

z) tizimli ravishda ilmiy-tadqiqot muassasalari, davlat va xo‘jalik boshqaruvi organlari, shuningdek, transport va logistikani rivojlantirish muammolarini o‘rganish bo‘yicha boshqa tashkilotlar bilan hamkorlik qilish sohasida:

transport va logistikani rivojlantirish muammolarini o‘rganish natijalarini muhokama qilish maqsadida oliy ta’lim muassasalari va ilmiy-tadqiqot muassasalari, xo‘jalik boshqaruvi organlari, boshqa manfaatdor tashkilotlar va xususiy sektor bilan o‘zaro hamkorlik qiladi;

transport va logistikani rivojlantirish sohasida xalqaro va mintaqaviy tashkilotlar va tuzilmalar, xorijiy mamlakatlarning milliy institutlari bilan hamkorlik qiladi.

12. Markaz o‘ziga yuklangan vazifalar va funksiyalarni amalga oshirish uchun quyidagi huquqlarga ega:

Markazga yuklangan vazifalar va funksiyalarni bajarish bilan bog‘liq normativ-huquqiy hujjatlar, shuningdek, boshqa hujjatlar loyihalarini belgilangan tartibda O‘zbekiston Respublikasi Transport vazirligiga kiritish;

davlat va xo‘jalik boshqarish organlaridan, mahalliy ijro etuvchi hokimiyat organlaridan, hududiy transport boshqarmalaridan, yo‘lovchilar tashishni tashkil etish komissiyalaridan Markaz vakolatiga kiradigan masalalarni hal etishda zarur bo‘lgan ma’lumotlarni belgilangan tartibda so‘rash va bepul olish;

davlat organlari va boshqa tashkilotlar, yetakchi loyiha institutlari, ilmiy tashkilotlar va ta’lim muassasalari, shuningdek, xalqaro tashkilotlar, xorijiy kompaniyalarning yuqori malakali mutaxassislari va ekspertlarni O‘zbekiston Respublikasi Transport vazirligi huzuridagi Transport va logistikani rivojlantirish budjetdan tashqari jamg‘armasi mablag‘lari hisobiga O‘zbekiston Respublikasi Transport vazirligi bilan kelishgan holda shartnoma asosida maslahatchilar sifatida jalb qilish;

yuridik va jismoniy shaxslarga shartnoma asosida transport va logistika tizimida muammolarni tadqiq qilish bo‘yicha xizmatlar, tahliliy ishlarni bajarish bo‘yicha maslahat xizmatlari, shuningdek, o‘z vakolatlari doirasida xizmatlarning boshqa turlarini ko‘rsatish;

statistika organlaridan Markaz vakolatiga kiradigan masalalar bo‘yicha zarur statistik axborotlarni bepul olish;

avtomobil, temir yo‘l, havo va daryo transporti sohasida ilmiy va ekspert ishlarini, maslahatlashuvlarni amalga oshirish, dolzarb masalalarni ishlab chiqish uchun olimlar, vazirliklar, idoralar, ta’lim tashkilotlari va boshqa muassasalarning yuqori malakali mutaxassislarini shartnoma asosida taklif qilish;

O‘zbekiston Respublikasi Transport vazirligi bilan kelishgan holda Markaz vakolatiga kiradigan masalalar bo‘yicha belgilangan tartibda idoralararo tusdagi bitimlar tuzish;

Markaz amaldagi qonun hujjatlariga muvofiq boshqa huquqlarga ham ega bo‘lishi mumkin.

13. Markaz:

Markazga yuklangan vazifalar va funksiyalar sifatli va o‘z vaqtida bajarilishini ta’minlash;

Markaz vakolatlari doirasida transport va logistikani rivojlantirish bo‘yicha dasturlar, chora-tadbirlar rejalari, “yo‘l xaritalari” va boshqa dasturiy hujjatlar amalga oshirilishi uchun javob beradi.

Markaz amaldagi qonun hujjatlariga muvofiq boshqa majburiyatlarni ham olishi mumkin.

14. Markazga O‘zbekiston Respublikasi transport vaziri tomonidan lavozimga tayinlanadigan va lavozimdan ozod qilinadigan direktor boshchilik qiladi.

Direktorning O‘zbekiston Respublikasi transport vaziri tomonidan lavozimga tayinlanadigan va lavozimdan ozod qilinadigan bir nafar o‘rinbosari bo‘ladi.

15. Direktor O‘zbekiston Respublikasi Transport vazirligi bilan kelishgan holda Markazning xarajatlari smetasini va shtat jadvalini tasdiqlaydi.

16. Direktor:

Markaz faoliyatiga umumiy rahbarlik qiladi;

Markaz vakolatiga kiradigan masalalar bo‘yicha qarorlar qabul qiladi, Markazga yuklangan vazifalar va funksiyalar bajarilishi uchun shaxsan javob beradi;

Markaz ishini tashkil etishga hamda ijro intizomining holatini nazorat qilishga bevosita rahbarlik qiladi;

o‘z o‘rinbosari va Markazning boshqa mansabdor shaxslari vakolatlarini, vazifalarini va shaxsiy javobgarligi darajasini belgilaydi;

Markaz bo‘limlari to‘g‘risidagi nizomlarni va Markaz xodimlarining lavozim vazifalarini belgilangan tartibda tasdiqlaydi;

Markaz xodimlarini belgilangan tartibda lavozimga tayinlaydi va lavozimdan ozod qiladi;

o‘z vakolatlari doirasida Markazning barcha xodimlari tomonidan bajarilishi majburiy bo‘lgan buyruqlar chiqaradi va ko‘rsatmalar beradi;

Markaz xodimlarini rag‘batlantirish va intizomiy jazo choralarini qo‘llash masalalarini hal etadi;

o‘z yuritishi sohasiga kiradigan masalalar bo‘yicha hay’at majlislarida, O‘zbekiston Respublikasi Transport vazirligi majlislarida belgilangan tartibda ishtirok etadi.

Direktor qonun hujjatlariga muvofiq boshqa vakolatlarni ham amalga oshirishi mumkin.

17. Markaz direktori Markazga yuklangan vazifalar va funksiyalar bajarilishi uchun shaxsan javob beradi.

18. Markaz direktori bo‘lmagan davrda uning vakolatlarini uning o‘rinbosari amalga oshiradi.

19. Markaz direktorining o‘rinbosari:

Markazning mutasaddilik qilinadigan bo‘limlariga bevosita rahbarlik qiladi va Markazga yuklangan vazifalar va funksiyalar va unga biriktirilgan masalalar bajarilishi va mutasaddilik qilinadigan bo‘limlarda ijro intizomining holati uchun shaxsan javob beradi.

o‘ziga biriktirilgan masalalar bo‘yicha materiallar va hujjatlar loyihalari sifatli va o‘z vaqtida tayyorlanishini tashkil qiladi, topshiriqlar bajarilishi nazorat qilinishini ta’minlaydi;

Markazning ish rejalarida hamda xodimlarning shaxsiy ish rejalarida tegishli davrga nazarda tutilgan masalalar o‘rganilishi va chora-tadbirlar amalga oshirilishi muvofiqlashtirilishini ta’minlaydi, tanqidiy tahlil asosida Markaz direktorining ko‘rib chiqishi uchun takliflar kiritadi;

o‘zining vakolatiga taalluqli bo‘lgan masalalar bo‘yicha bo‘limlarning rahbarlari va mutaxassislar bilan O‘zbekiston Respublikasi Transport vazirligi hay’ati majlislarida ko‘rib chiqishga materiallarni tayyorlash uchun yig‘ilishlar o‘tkazadi;

Markaz direktorining topshirig‘i bo‘yicha chiquvchi xatlarni imzolaydi;

Markaz direktoriga tegishli mutaxassislar o‘rtasida vazifalarni taqsimlash bo‘yicha takliflar kiritadi;

Markaz direktoriga mutasaddilik qilinadigan bo‘limlar mutaxassislarini lavozimga tayinlash va lavozimdan ozod qilish, malaka oshirishga yuborish, rag‘batlantirish va ularga intizomiy jazo qo‘llash to‘g‘risida takliflar kiritadi;

vazifalar taqsimotiga muvofiq boshqa funksiyalarni amalga oshiradi.

20. Markaz direktorining o‘rinbosari Markazga yuklangan vazifalar va funksiyalar bajarilishi uchun shaxsan javob beradi.

21. Markaz xodimlarini moddiy rag‘batlantirish qonun hujjatlariga muvofiq amalga oshiriladi.

22. Markaz xodimlariga vazirlik markaziy apparati xodimlari uchun belgilangan mehnatga haq to‘lash, moddiy rag‘batlantirish, tibbiy xizmat, transport ta’minoti va ijtimoiy himoya shartlari tatbiq etiladi, shuningdek, ularga ko‘p yillik xizmatlari uchun davlat budjeti mablag‘lari hisobidan rag‘batlantirish koeffitsiyentini hisobga olgan holda, lavozim maoshiga belgilangan koeffitsiyentlarda quyidagi hajmlarda har oyda qo‘shimcha ustama to‘lovlari to‘lanadi:

2 yildan 5 yilgacha — 0,1;

5 yildan 10 yilgacha — 0,2;

10 yildan 15 yilgacha — 0,3;

15 yildan ortiq — 0,4.

23. Markaz xodimlarini qo‘shimcha moddiy rag‘batlantirish belgilangan tartibda O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasi mablag‘lari hisobidan amalga oshiriladi.

24. Quyidagilar Markaz faoliyatini moliyalashtirish manbalari hisoblanadi:

O‘zbekiston Respublikasi Davlat budjeti mablag‘lari;

O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasi mablag‘lari;

jismoniy va yuridik shaxslarning xayriya ehsonlari;

xalqaro moliya tashkilotlarining grantlari;

qonun hujjatlarida taqiqlanmagan boshqa manbalar.

25. Markaz belgilangan tartibda unga biriktirilgan mol-mulkka egalik qilish, undan foydalanish va uni boshqarish huquqini amalga oshiradi.

26. Xo‘jalik faoliyati daromadlari, shuningdek, beg‘araz tushumlar hisobiga xarid qilingan mol-mulk va olingan mablag‘lar Markazning mulki hisoblanadi.

27. Markaz tomonidan olingan foyda belgilangan tartibda ushbu Ustavda nazarda tutilgan vazifalar va funksiyalarni bajarishga yo‘naltiriladi.

28. Markazni qayta tashkil etish va tugatish qonun hujjatlarida belgilangan tartibda amalga oshiriladi.