O‘zbekiston Respublikasi Prezidentining
Qarori
Prezident maktablarini tashkil etish chora-tadbirlari to‘g‘risida
Yoshlarning intellektual va ijodiy salohiyatini rivojlantirish, iqtidorli bolalarni qo‘llab-quvvatlash va rag‘batlantirish uchun zarur shart-sharoitlarni yaratish, ularning huquqiy ong va huquqiy madaniyati darajasini yuksaltirish xalq ta’limi sohasidagi davlat siyosatining eng muhim yo‘nalishlaridan biri hisoblanadi.
Mamlakatning kelgusidagi jadal taraqqiyoti yosh iste’dodlarni aniqlash, iqtidorli bolalarni tanlab olish va o‘qitish tizimini tashkil qilish, o‘sib kelayotgan avlodning intellektual imkoniyatlarini namoyon etishga yordam beruvchi ko‘p tarmoqli ta’lim muhitini yaratish bo‘yicha ishlar sifatini oshirish zaruratini taqozo etmoqda.
Iqtidorli bolalarni aniqlash, ta’lim jarayonida ilg‘or texnologiyalarni qo‘llagan holda ularni o‘qitish va tarbiyalash bo‘yicha yaxlit tizim yaratish, iste’dodli yoshlarni yanada qo‘llab-quvvatlash va rag‘batlantirish, ma’nan yetuk va intellektual jihatdan barkamol avlodni shakllantirish, shuningdek 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturiga muvofiq:
1. Qoraqalpog‘iston Respublikasida, viloyatlar va Toshkent shahrida ixtisoslashtirilgan davlat umumta’lim muassasasi shaklidagi Prezident maktablari tashkil etilsin.
2. Quyidagilar Prezident maktablarining asosiy vazifalari etib belgilansin:
iqtidorli bolalarni aniqlash, tanlash va o‘qitish, ularning har tomonlama rivojlanishi uchun shart-sharoitlar yaratish, shuningdek o‘quvchilarning intellektual, ilmiy va ijodiy salohiyatini ochib berish;
tabiiy va aniq fanlarni chuqur o‘rganish, xorijiy tillar, muhandislik va axborot texnologiyalarini o‘zlashtirishni tashkil qilish, o‘quvchilarning innovatsion g‘oyalari va ishlanmalarini rivojlantirish uchun zarur shart-sharoitlar yaratish;
o‘quvchilarni o‘qitish va ular bilimini baholashning zamonaviy uslublarini, shuningdek ta’lim dasturlarining integratsiyalashuviga asoslangan o‘qitishning fanlararo yondashuvini joriy qilish va keyinchalik ijobiy tajribani respublika xalq ta’limi tizimiga tatbiq etish;
o‘quvchilarni kasb-hunarga yo‘naltirish, ularda yetakchilik ko‘nikmalari va notiqlik san’atini rivojlantirish, tanqidiy fikrlash, axborotni izlash, tahlil qilish va qayta ishlash, olingan bilimlarni amaliyotda qo‘llash malakasini oshirish;
o‘quvchilarning umumta’lim fanlari bo‘yicha xalqaro olimpiadalar, tanlovlar va musobaqalarda munosib ishtirokini ta’minlash;
o‘quvchilarda vatanparvarlik va Vatanga muhabbat tuyg‘usini, bag‘rikenglik, qonunlar, milliy va umuminsoniy qadriyatlarga hurmat bilan munosabatni, hayotga qat’iy ishonch va qarashlarni shakllantirish;
o‘quv dasturlarining uzluksizligini ta’minlash masalalarida xuddi shu yo‘nalishdagi milliy va xorijiy umumiy o‘rta va oliy ta’lim muassasalari bilan hamkorlikni yo‘lga qo‘yish, bitiruvchilarning ilg‘or xorijiy oliy o‘quv yurtlarida va ularning respublikamizdagi filiallarida o‘qishini davom ettirish.
3. Belgilansinki:
Prezident maktablariga qabul qilish respublika umumta’lim muassasalarining 4-sinf bitiruvchilari orasidan O‘zbekiston Respublikasi Xalq ta’limi vazirligi (keyingi o‘rinlarda — Vazirlik) tomonidan belgilangan tartibda o‘tkaziladigan mantiqiy fikrlash testlari, yozma imtihon va suhbatlar natijalariga ko‘ra amalga oshiriladi;
 LexUZ sharhi
Qarang: Vazirlar Mahkamasining 2023-yil 27-maydagi 214-con qarori bilan tasdiqlangan O‘zbekiston Respublikasi Maktabgacha va maktab ta’limi vazirligi huzuridagi Ixtisoslashtirilgan ta’lim muassasalari agentligi tizimidagi Prezident maktablariga o‘quvchilarni saralab olish va qabul qilish tartibi to‘g‘risidagi nizom.
Prezident maktabining yillik qabul kvotasi 24 nafar o‘quvchidan iborat bo‘lib, ikkita sinfga bir xil — 12 nafardan o‘quvchi taqsimlanadi;
birinchi o‘quv yilida Prezident maktablarining har biriga 5 — 10-sinflarga 144 nafardan o‘quvchi o‘qishga qabul qilinadi;
Prezident maktablarida ta’lim jarayoni xorijiy ta’lim muassasalari bilan hamkorlikda ishlab chiqilgan o‘quv rejalari va dasturlari bo‘yicha ingliz tilida amalga oshiriladi;
Prezident maktablarida “STEAM — ta’lim” (Science — tabiiy fanlar, Technology — texnologiyalar, Engineering — texnik ijodkorlik, Art — san’at, Mathematics — matematika) dasturi joriy etiladi;
Prezident maktabining 9 — 11-sinflarida o‘qitish o‘quvchilarning qiziqishlari va xususiyatlarini inobatga olgan holda, ayrim fanlar va ularni o‘rganish darajasini tanlab olish orqali o‘quv jarayonini individuallashtirishni ko‘zda tutadi;
asosiy o‘quv dasturi bilan birgalikda Prezident maktablarida o‘quvchilarning qiziqishlaridan kelib chiqqan holda sinfdan tashqari amaliy mashg‘ulotlar o‘tkazish nazarda tutiladi;
Prezident maktablari bitiruvchilariga belgilangan tartibda davlat tomonidan tasdiqlangan ma’lumot to‘g‘risidagi hujjat (shahodatnoma, attestat) bilan bir qatorda, xorijiy mamlakatlarning yetakchi oliy ta’lim muassasalariga kirish imkonini taqdim etuvchi xalqaro darajadagi tegishli dastur diplomi (International Baccalaureate, Advanced Placement yoki International Advanced Levels) beriladi;
 LexUZ sharhi
Qarang: O‘zbekiston Respublikasi Vazirlar Mahkamasi 2023-yil 31-yanvardagi 44-son “Umumiy o‘rta ta’lim to‘g‘risidagi elektron shahodatnomaning davlat namunasini tasdiqlash haqida”gi qarori.
Prezident maktablari bevosita Vazirlikka bo‘ysunadi.
4. Vazirlik Vazirlar Mahkamasi huzuridagi Ta’lim sifatini nazorat qilish davlat inspeksiyasi va boshqa manfaatdor idoralar bilan birgalikda 2019-yil 1-mayga qadar quyidagi tartiblarni belgilab beruvchi Prezident maktabi haqidagi nizomni tasdiqlash bo‘yicha hukumat qarori loyihasini ishlab chiqsin va belgilangan tartibda kiritsin:
Prezident maktablarida o‘quv-tarbiya jarayonini tashkil etish;
kirish imtihonlarini o‘tkazish hamda o‘quvchilarning intellektual salohiyati va kreativ fikrlashini baholagan holda ularni qabul qilish;
Prezident maktablari xodimlarini, shu jumladan yuqori malakali xorijiy mutaxassislarni tanlab olish, yollash va ular mehnatiga haq to‘lash;
Prezident maktablari faoliyatini moliyalashtirish va namunaviy shtat jadvalini tasdiqlash.
5. Quyidagilar:
2019 — 2021-yillarda Prezident maktablarini qurish jadvali 1-ilovaga muvofiq;
Toshkent, Nukus va Xiva shaharlarida Prezident maktablari faoliyatini tashkil etishga oid qo‘shimcha chora-tadbirlar dasturi 2-ilovaga muvofiq tasdiqlansin.
6. Prezident maktablari faoliyatini tashkil etish bo‘yicha komissiya (keyingi o‘rinlarda — Komissiya) 3-ilovaga muvofiq tarkibda tuzilsin.
Prezident maktablariga quyidagi masalalarda ko‘maklashish Komissiyaning asosiy vazifalari etib belgilansin:
moddiy-texnik bazani mustahkamlash, ta’lim sifatini oshirishga qaratilgan chora-tadbirlarni moliyalashtirish va amalga oshirish;
Prezident maktablari faoliyatining jadal rivojlanishini ta’minlash uchun chet el investorlari mablag‘larini, texnik yordam (grantlar) va qonun bilan taqiqlanmagan boshqa manbalarni jalb qilish;
Prezident maktablari mablag‘larini samarali boshqarish va ulardan maqsadli foydalanish ustidan nazoratni ta’minlash;
Prezident maktablari faoliyatining sifati va samaradorligini oshirish, shu jumladan ta’lim jarayoniga o‘qitishning ilg‘or shakllari va uslublarini, pedagogik, kompyuter va axborot-kommunikatsiya texnologiyalarini joriy etish bo‘yicha takliflar tayyorlash.
Komissiyaga:
a) Prezident maktablarini zamonaviy uskunalar, mebel, kompyuter texnikasi bilan jihozlash, shuningdek ularni o‘quv adabiyotlari, metodik qo‘llanmalar va boshqa vositalar bilan ta’minlash bo‘yicha namunaviy loyihalar va me’yorlarni tasdiqlash;
b) istisno tariqasida, tanlov (tender) savdolarini tashkillashtirmasdan, eng yaxshi takliflarni tanlab olish yo‘li bilan:
loyiha-smeta hujjatlarini ishlab chiqish uchun — loyiha tashkilotlarini;
Prezident maktablarini qurish uchun — pudrat tashkilotlarini;
Prezident maktablarini zamonaviy uskunalar, mebel, kompyuter texnikasi bilan jihozlash, shuningdek ularni o‘quv adabiyotlari, metodik qo‘llanmalar va boshqa vositalar bilan ta’minlash uchun — ishlab chiqaruvchilar (yetkazib beruvchilar)ni;
Prezident maktablarida o‘quv-metodik rahbarlikni ta’minlash, o‘quv jarayonini tashkil etish va yuritish, shuningdek o‘quvchilarni qabul qilish va chet ellik yuqori malakali mutaxassislarni yollash uchun — ta’lim sohasida xizmatlar ko‘rsatuvchi ixtisoslashgan xorijiy tashkilotlarni belgilash huquqi berilsin.
7. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir oy muddatda Vazirlikka Prezident maktablari qurish uchun yer uchastkalarini ajratish bo‘yicha takliflar kiritsin.
Vazirlik O‘zbekiston Respublikasi Qurilish vazirligi bilan birgalikda Toshkent, Nukus va Xiva shaharlaridagi Prezident maktablari 2019-yil 20-avgustga qadar, respublikaning boshqa hududlarida esa tegishlicha 2020 va 2021-yil 20-avgustga qadar qurib bitkazilishi va ishga tushirilishini ta’minlasin.
8. Quyidagilar:
Vazirlik huzuridagi “Xalq ta’limi sohasida loyiha hujjatlariga texnik topshiriqlarni ishlab chiqish va qurilish obyektlari sifatini monitoring qilish bo‘yicha injiniring kompaniyasi” DUK — Prezident maktablarini qurish va ularni zamonaviy uskunalar, mebel, kompyuter texnikasi bilan jihozlash, o‘quv adabiyotlari, metodik qo‘llanmalar va boshqa vositalar bilan ta’minlash bo‘yicha buyurtmachi etib;
Vazirlik huzuridagi “Innovatsiya, texnologiya va strategiya markazi” davlat unitar korxonasi — Prezident maktablari faoliyatining metodik va axborot-tahliliy ta’minoti uchun mas’ul tashkilot etib belgilansin.
9. O‘zbekiston Respublikasida ishlab chiqarilmaydigan va belgilangan tartibda shakllantiriladigan ro‘yxatlar bo‘yicha Prezident maktablarini qurish, rekonstruksiya qilish, jihozlash va faoliyatini ta’minlash uchun olib kelinadigan uskunalar, kompyuter texnikasi, o‘qitishning texnik vositalari, adabiyotlar, multimedia mahsulotlari hamda qurilish materiallari, butlovchi buyumlar, ehtiyot qismlar 2022-yil 1-yanvargacha bojxona to‘lovlaridan (bojxona rasmiylashtiruvi uchun yig‘imlardan tashqari) ozod etilsin.
10. Belgilab qo‘yilsinki:
Prezident maktablarini qurish va zamonaviy asbob-uskunalar, mebel, kompyuter texnikasi bilan jihozlash, o‘quv adabiyotlari, metodik qo‘llanmalar va boshqa vositalar bilan ta’minlash O‘zbekiston Respublikasi Davlat budjeti mablag‘lari, xorijiy investitsiyalar, yuridik va jismoniy shaxslarning xayriya ehsonlari, Komissiya tomonidan jalb etiladigan qo‘shimcha mablag‘lar, Vazirlikning budjetdan tashqari mablag‘lari hamda qonunchilikda taqiqlanmagan boshqa manbalar hisobidan amalga oshiriladi;
Toshkent, Nukus va Xiva shaharlarida Prezident maktablarini qurish bo‘yicha namunaviy loyihalarni ishlab chiqish “Prime Tower Group” MCHJ (Toshkent shahri) tomonidan Vazirlik huzuridagi “Xalq ta’limi sohasida loyiha hujjatlariga texnik topshiriqlarni ishlab chiqish va qurilish obyektlari sifatini monitoring qilish bo‘yicha injiniring kompaniyasi” DUK bilan hamkorlikda amalga oshiriladi.
11. Loyiha va pudrat tashkilotlariga, istisno tariqasida, Prezident maktablari qurishni loyiha-smeta hujjatlari ishlab chiqish bilan bir vaqtda amalga oshirishga ruxsat berilsin.
12. O‘zbekiston Respublikasi Qurilish vazirligi Prezident maktablarini qurish bo‘yicha loyiha-smeta hujjatlarini kompleks ekspertizadan o‘tkazishni ta’minlasin va qurilish-montaj ishlarining sifatli bajarilishi ustidan davlat arxitektura-qurilish nazoratini o‘rnatsin.
13. O‘zbekiston Respublikasi Tashqi ishlar vazirligi Vazirlikning buyurtmanomalariga asosan mazkur qarorni amalga oshirish doirasida jalb qilinadigan Prezident maktablarining chet ellik xodimlari hamda ularning oila a’zolari uchun ko‘p martalik kirish vizalari konsullik va boshqa yig‘imlar undirilmasdan belgilangan tartibda rasmiylashtirilishini ta’minlasin.
 LexUZ sharhi
Qarang: O‘zbekiston Respublikasi Prezidentining 2018-yil 4-iyuldagi PQ-3836-son “O‘zbekiston Respublikasiga xorijiy fuqarolarning kirishi tartibini optimallashtirishga doir qo‘shimcha chora-tadbirlar to‘g‘risida”gi qarori.
14. Belgilab qo‘yilsinki, Prezident maktablarining joriy faoliyatini moliyalashtirish O‘zbekiston Respublikasi Davlat budjeti mablag‘lari hisobidan amalga oshiriladi, bunda jumladan quyidagi xarajatlar ham qoplanadi:
Prezident maktablarining, shu jumladan shartnoma asosida xizmat ko‘rsatuvchi xodimlariga ish haqi, ustamalar, qo‘shimcha haqlar, mukofotlar va boshqa rag‘batlantiruvchi to‘lovlar;
ta’lim sohasida xizmatlar ko‘rsatuvchi ixtisoslashgan xorijiy tashkilotlarning Prezident maktablarida o‘quv-metodik rahbarlikni ta’minlash, ta’lim jarayonini yuritish hamda o‘quvchilarni qabul qilish va yuqori malakali xorijiy mutaxassislarni yollash bo‘yicha xizmatlari uchun to‘lovlar;
o‘quvchilarni bepul oziq-ovqat, maktab formasi va yashash joyi bilan ta’minlash;
O‘zbekiston Respublikasi Moliya vazirligi bilan kelishilgan holda, Prezident maktablari faoliyatini ta’minlash bilan bog‘liq boshqa tadbirlarni moliyalashtirish xarajatlari.
15. Vazirlik manfaatdor vazirliklar va idoralar bilan birgalikda uch oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin.
16. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari A.A. Abduhakimov va O‘zbekiston Respublikasi Prezidentining maslahatchisi A.A. Abduvaxitov zimmasiga yuklansin.
O‘zbekiston Respublikasi Prezidenti Sh. MIRZIYOYEV
Toshkent sh.,
2019-yil 20-fevral,
PQ-4199-son
O‘zbekiston Respublikasi Prezidentining 2019-yil 20-fevraldagi PQ-4199-son qaroriga
1-ILOVA
2019 — 2021-yillarda Prezident maktablarini qurish
jadvali

T/r

Hudud nomi

Jami

Shu jumladan:

2019-yilda

2020-yilda

2021-yilda

Jami:

14

3

5

6

1.

Qoraqalpog‘iston Respublikasi

1

1

–

–

2.

Andijon viloyati

1

–

–

1

3.

Buxoro viloyati

1

–

1

–

4.

Jizzax viloyati

1

–

1

–

5.

Qashqadaryo viloyati

1

–

1

–

6.

Navoiy viloyati

1

–

–

1

7.

Namangan viloyati

1

–

–

1

8.

Samarqand viloyati

1

–

1

–

9.

Surxondaryo viloyati

1

–

–

1

10.

Sirdaryo viloyati

1

–

–

1

11.

Toshkent viloyati

1

–

–

1

12.

Farg‘ona viloyati

1

–

1

–

13.

Xorazm viloyati

1

1

–

–

14.

Toshkent shahri

1

1

–

–

O‘zbekiston Respublikasi Prezidentining 2019-yil 20-fevraldagi PQ-4199-son qaroriga
2-ILOVA
Toshkent, Nukus va Xiva shaharlarida Prezident maktablari faoliyatini tashkil etishga oid qo‘shimcha chora-tadbirlar
dasturi

T/r

Chora-tadbirlarning nomi

Amalga oshirish shakli

Amalga oshirish muddatlari

Mas’ul ijrochilar

I. Tayyorgarlik ishlari

1.

Toshkent, Nukus va Xiva shaharlarida Prezident maktablarini (keyingi o‘rinlarda — Prezident maktablari) qurish va zamonaviy uskunalar, mebel, kompyuter texnikasi va boshqa o‘quv-laboratoriya uskunalari bilan jihozlash, ularni o‘quv adabiyoti, metodik qo‘llanma va boshqa vositalar bilan ta’minlash bo‘yicha pudratchi tashkilotlarni aniqlash.

Prezident maktablari faoliyatini tashkil etish bo‘yicha komissiya qarori

2019-yil
1-aprelgacha

Xalq ta’limi vazirligi (Sh. Shermatov),
Qurilish vazirligi (A. To‘xtayev),
manfaatdor vazirliklar
va idoralar

2.

Prezident maktablarini qurish va zamonaviy uskunalar, mebel, kompyuter texnikasi va boshqa o‘quv-laboratoriya uskunalari bilan jihozlash, ularni o‘quv adabiyoti, metodik qo‘llanma va boshqa vositalar bilan ta’minlash bo‘yicha o‘z vaqtida moliyalashtirishni ta’minlash.

Tashkiliy
chora-tadbirlar

loyihalarni amalga oshirish davomida

Moliya vazirligi (A. Haydarov),
Xalq ta’limi vazirligi (Sh. Shermatov),

Investitsiyalar va tashqi savdo vazirligi

(S. Umurzoqov)

3.

Prezident maktablari ustavlarini ishlab chiqish va tasdiqlash hamda ularni belgilangan tartibda ro‘yxatdan o‘tkazishni ta’minlash.

Ustav

2019-yil
1-sentabrgacha

Xalq ta’limi vazirligi (Sh. Shermatov)

II. O‘quv-tarbiya jarayonini tashkillashtirish

4.

Xalqaro standartlar talablarini hisobga olgan holda Prezident maktablarining o‘quv reja va dasturlarini tasdiqlash.

Idoraviy hujjat

2019-yil

15-avgustgacha

Xalq ta’limi vazirligi (Sh. Shermatov),
Ta’lim sifatini nazorat qilish davlat inspeksiyasi (U. Tashkenboyev)

5.

Prezident maktablarining o‘quv-tarbiya jarayoniga “STEAM–ta’limi” dasturini (Science — tabiiy fanlar, Technology — texnologiya, Engineering — texnik ijodkorlik, Art — san’at, Mathematics — matematika) joriy qilish.

Tashkiliy
chora-tadbirlar

2019-yil
mart — avgust

Xalq ta’limi vazirligi (Sh. Shermatov),

Moliya vazirligi (A. Haydarov)

6.

Prezident maktablari bitiruvchilarga tomonidan xalqaro darajadagi tegishli dastur diplomlarini (International Baccalaureate, Advanced Placement yoki International Advanced Levels) taqdim etish mexanizmlarini joriy qilish.

Tashkiliy chora-tadbirlar kompleksi

2019-yil davomida

Xalq ta’limi vazirligi (Sh. Shermatov),

Ta’lim sifatini nazorat qilish davlat inspeksiyasi (U. Tashkenboyev),
Tashqi ishlar vazirligi (A. Komilov)

7.

Prezident maktablarini jihozlash uchun kerakli o‘quv-metodik adabiyotlar va ilmiy nashrlar ro‘yxatini aniqlash va ularni xarid qilish bo‘yicha chora-tadbirlarni amalga oshirish.

Tashkiliy
chora-tadbirlar

2019-yil
1-iyulgacha

Xalq ta’limi vazirligi (Sh. Shermatov),
Axborot va ommaviy kommunikatsiyalar

agentligi (K. Allamjonov),
Moliya vazirligi (A. Haydarov)

8.

Prezident maktablarida o‘quv jarayonini tashkil etish uchun xorijiy yuqori malakali mutaxassislarni tanlab olish.

Tashkiliy
chora-tadbirlar

2019-yil
15-iyungacha

Xalq ta’limi vazirligi (Sh. Shermatov),
Bandlik va mehnat munosabatlari vazirligi

(Sh. Kudbiyev),
Moliya vazirligi (A. Haydarov)

III. O‘quvchilarni tanlab olish va qabul qilish

9.

Prezident maktablariga o‘quvchilarni saralash boshlanishi va tartibi, o‘quvchilar uchun yaratilayotgan imkoniyatlar va boshqa afzalliklar haqida ma’lumotlarni keng jamoatchilikka yetkazish.

Tashkiliy
chora-tadbirlar

2019-yil aprel-may

Xalq ta’limi vazirligi (Sh. Shermatov),

MTRK (A. Xodjayev), O‘zA (A. Ko‘chimov)

10.

Nomzodlar hujjatlarini, shu jumladan elektron shaklda qabul qilishni tashkil etish.

Tashkiliy
chora-tadbirlar

2019-yil
iyun-iyul

Xalq ta’limi vazirligi (Sh. Shermatov),
Adliya vazirligi
(R. Davletov),
LBMA (D. Li)

11.

Kirish imtihonlarini o‘tkazish.

Tashkiliy
chora-tadbirlar

2019-yil
10-avgustgacha

Xalq ta’limi vazirligi (Sh. Shermatov)

12.

Prezident maktablariga o‘quvchilarni qabul qilish.

Buyruq

2019-yil
20-avgustgacha

Xalq ta’limi vazirligi (Sh. Shermatov)

IV. Moddiy-texnik bazani shakllantirish

13.

Prezident maktablarini zamonaviy uskunalar, mebel, kompyuter texnikasi va boshqa o‘quv-laboratoriya uskunalari bilan jihozlash, ularni o‘quv adabiyoti, metodik qo‘llanma va boshqa vositalar bilan ta’minlash.

Tashkiliy
chora-tadbirlar

2019-yil
15-avgustgacha

Xalq ta’limi vazirligi (Sh. Shermatov),
Moliya vazirligi (A. Haydarov)

14.

Prezident maktablarini ishga tushirish va o‘quv jarayonini boshlash.

Tashkiliy
chora-tadbirlar

2019-yil

20-avgustgacha

Xalq ta’limi vazirligi (Sh. Shermatov),

Qurilish vazirligi (A. To‘xtayev),

Qoraqalpog‘iston Respublikasi Vazirlar Kengashi (K. Sariyev), Toshkent shahar hokimligi (J. Ortiqxodjayev)

Izohlar:
1. Huquqiy munosabatlarni tartibga solish predmeti va sohasidan kelib chiqib, chora-tadbirlarni amalga oshirish shakli o‘zgarishi, ishlab chiqilayotgan hujjatlar esa birlashtirilishi mumkin;
2. Ikki yoki undan ortiq bandlar birlashtirilganda, qo‘shilayotgan bandlar uchun o‘rnatilgan eng kech muddat ijro muddati etib belgilanadi.
O‘zbekiston Respublikasi Prezidentining 2019-yil 20-fevraldagi PQ-4199-son qaroriga
3-ILOVA
Prezident maktablari faoliyatini tashkil etish bo‘yicha komissiya
TARKIBI

A.N. Aripov

—

O‘zbekiston Respublikasining Bosh vaziri, Komissiya raisi

A.A. Abduvaxitov

—

O‘zbekiston Respublikasi Prezidentining maslahatchisi, Komissiya raisi o‘rinbosari

A.A. Abduxakimov

—

O‘zbekiston Respublikasi Bosh vazirining o‘rinbosari, Komissiya raisi o‘rinbosari

J.A. Qo‘chqorov

—

O‘zbekiston Respublikasi Bosh vazirining o‘rinbosari — moliya vaziri

E.M. G‘aniyev

—

O‘zbekiston Respublikasi Bosh vazirining o‘rinbosari

Sh.X. Shermatov

—

O‘zbekiston Respublikasi xalq ta’limi vaziri

lavozimi bo‘yicha

—

Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimlari

A.X. To‘xtayev

—

O‘zbekiston Respublikasi qurilish vaziri

A.X. Abdullayev

—

O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi raisi

U.U. Sharifxodjayev

—

O‘zbekiston Respublikasi Prezidenti Administratsiyasi shu’ba mudiri

R.O. Karimjonov

—

O‘zbekiston Respublikasi Xalq ta’limi vazirligi huzuridagi “Innovatsiya, texnologiya va strategiya markazi” DUK direktori, Komissiya kotibi

Izoh: Komissiya a’zolari boshqa ishga o‘tgan taqdirda, uning tarkibiga ushbu lavozimga yangidan tayinlangan yoki zimmasiga tegishli funksiyalarni bajarish yuklangan shaxslar kiritiladi.
(Qonun hujjatlari ma’lumotlari milliy bazasi, 21.02.2019-y., 07/19/4199/2642-son)