O‘zbekiston Respublikasi Oliy Majlisi Qonunchilik palatasining moddiy-texnika bazasini mustahkamlash va “Elektron parlament” tizimini yanada rivojlantirish doirasida norma ijodkorligi jarayonida zamonaviy axborot-kommunikatsiya texnologiyalarini joriy etish maqsadida Vazirlar Mahkamasi qaror qiladi:

1. O‘zbekiston Respublikasi Oliy Majlisining Qonunchilik palatasi, O‘zbekiston Respublikasi Axborot texnologiyalari va kommunikatsiyalarini rivojlantirish vazirligi hamda Moliya vazirligining O‘zbekiston Respublikasi Oliy Majlisi Qonunchilik palatasining axborot-kommunikatsiya infratuzilmasini modernizatsiya qilish to‘g‘risidagi taklifiga rozilik berilsin.

2. O‘zbekiston Respublikasi Oliy Majlisi Qonunchilik palatasining axborot-kommunikatsiya infratuzilmasini modernizatsiya qilish uchun kompyuter texnikasi, server va kommunikatsiya uskunalari, shuningdek, dasturiy ta’minlash ro‘yxati ilovaga* muvofiq tasdiqlansin.

Axborot texnologiyalari va kommunikatsiyalarini rivojlantirish vazirligiga O‘zbekiston Respublikasi Oliy Majlisining Qonunchilik palatasi bilan kelishgan holda, zarurat bo‘lganda, ushbu qaror bilan tasdiqlangan ro‘yxatga o‘zgartirish va qo‘shimchalar kiritish huquqi berilsin.

3. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi Moliya vazirligi bilan birgalikda:

O‘zbekiston Respublikasi Oliy Majlisining Qonunchilik palatasi bilan kelishgan holda bir oy muddatda O‘zbekiston Respublikasi Oliy Majlisi Qonunchilik palatasining axborot-kommunikatsiya infratuzilmasini modernizatsiya qilish uchun eng yaxshi takliflarini tanlash asosida ushbu qarorga ilovada ko‘rsatilgan kompyuter texnikasi, server va kommunikatsiya uskunalarini, dasturiy ta’minlashni yetkazib berishga yetkazib beruvchilar va pudrat tashkilotlarini aniqlasin;

ushbu qaror bilan tasdiqlangan ro‘yxatga muvofiq 2018-yil 25-dekabrgacha — kompyuter texnikasi, 2019-yil 1-fevralgacha — server va kommunikatsiya uskunalari, shuningdek, dasturiy ta’minlash —keyinchalik O‘zbekiston Respublikasi Oliy Majlisining Qonunchilik palatasi apparatiga bepul berilgan holda belgilangan tartibda yetkazib berilishi va o‘rnatilishini tashkil etsin.

4. Quyidagilar:

kompyuter texnikasini xarid qilish va o‘rnatishga — O‘zbekiston Respublikasi Vazirlar Mahkamasining zaxira jamg‘armasi mablag‘lari;

server va kommunikatsiya uskunalarini, dasturiy ta’minlashni xarid qilish va o‘rnatishga — O‘zbekiston Respublikasi Raqamli texnologiyalar vazirligi huzuridagi Raqamli texnologiyalarni rivojlantirish jamg‘armasi mablag‘lari moliyalashtirish manbalari etib belgilansin.

5. O‘zbekiston Respublikasi Oliy Majlisi Qonunchilik palatasining axborot-kommunikatsiya infratuzilmasini modernizatsiya qilish uchun ushbu qarorga ilovada ko‘rsatilgan kompyuter texnikasi, server va kommunikatsiya uskunalari, dasturiy ta’minlash, shuningdek, unga O‘zbekiston Respublikasida ishlab chiqarilmaydigan va yetkazib beruvchilar va/yoki pudratchilar tomonidan olib kiriladigan ehtiyot qismlar va butlovchi buyumlar 2019-yil 1-avgustgacha bo‘lgan muddatda bojxona to‘lovlaridan ozod qilinsin (bojxona yig‘imlari bundan mustasno).

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — moliya vaziri D.A. Kuchkarov va O‘zbekiston Respublikasi Axborot texnologiyalari va kommunikatsiyalarini rivojlantirish vaziri Sh.M. Sodiqov zimmasiga yuklansin.