Oʻzbekiston Respublikasi Prezidentining “Suv taʼminoti va suv chiqarish xizmati koʻrsatish sohasida toʻlov intizomini tubdan takomillashtirish chora-tadbirlari toʻgʻrisida” 2017-yil 16-noyabrdagi PF-5241-son Farmoni ijrosini taʼminlash yuzasidan Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining “Oʻzbekiston Respublikasi Bosh prokuraturasi huzuridagi Majburiy ijro byurosining elektr energiyasi va tabiiy gaz yetkazib beruvchilar bilan oʻzaro hamkorlik qilish tartibi toʻgʻrisidagi hamda Isteʼmolchilarni elektr va gaz tarmoqlaridan uzib qoʻyish tartibi toʻgʻrisidagi nizomlarni tasdiqlash haqida” 2017-yil 10-iyuldagi 484-son qaroriga (Oʻzbekiston Respublikasi QT, 2017-y., 7-son, 141-modda) ilovaga muvofiq qoʻshimchalar va oʻzgartirishlar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari ― “Oʻzbekiston temir yoʻllari” AJ boshqaruvi raisi A.J. Ramatov va Oʻzbekiston Respublikasi uy-joy kommunal xizmat koʻrsatish vaziri M.X. Saliyev zimmasiga yuklansin.

1. Qarorning nomlanishi quyidagi tahrirda bayon etilsin:

“Oʻzbekiston Respublikasi Bosh prokuraturasi huzuridagi Majburiy ijro byurosining elektr energiyasi va tabiiy gaz yetkazib beruvchilar, shuningdek, ichimlik suv-kanalizatsiya xoʻjaliklari tashkilotlari bilan oʻzaro hamkorlik qilish hamda isteʼmolchilarni elektr energiyasi, gaz, ichimlik suv, kanalizatsiya tarmoqlari va suv quvurlaridan uzib qoʻyish tartibi toʻgʻrisidagi nizomlarni tasdiqlash haqida”.

2. 1-bandning ikkinchi va uchinchi xatboshilari quyidagi tahrirda bayon etilsin:

“Oʻzbekiston Respublikasi Bosh prokuraturasi huzuridagi Majburiy ijro byurosining elektr energiyasi va tabiiy gaz yetkazib beruvchilar, shuningdek, ichimlik suv-kanalizatsiya xoʻjaliklari tashkilotlari bilan oʻzaro hamkorlik qilish tartibi toʻgʻrisidagi nizom 1-ilovaga muvofiq;

Isteʼmolchilarni elektr energiyasi, gaz, ichimlik suv, kanalizatsiya tarmoqlari va suv quvurlaridan uzib qoʻyish tartibi toʻgʻrisidagi nizom 2-ilovaga muvofiq tasdiqlansin”.

3. Qarorga 1-ilovada:

a) ilovaning nomlanishi quyidagi tahrirda bayon etilsin:

“Oʻzbekiston Respublikasi Bosh prokuraturasi huzuridagi Majburiy ijro byurosining elektr energiyasi va tabiiy gaz yetkazib beruvchilar, shuningdek, ichimlik suv-kanalizatsiya xoʻjaliklari tashkilotlari bilan oʻzaro hamkorlik qilish tartibi toʻgʻrisida nizom”;

b) 1-banddagi “va “Oʻztransgaz” AK” soʻzlari ““Oʻztransgaz” AK va Oʻzbekiston Respublikasi Uy-joy kommunal xizmat koʻrsatish vazirligi” soʻzlari bilan almashtirilsin;

v) 2 va 3-bandlar quyidagi tahrirda bayon etilsin:

“2. Ushbu Nizom yetkazib berilgan elektr energiyasi, tabiiy gaz, suv taʼminoti va suv chiqarish xizmatlari uchun qarzdorligi mavjud boʻlgan isteʼmolchilarni elektr, gaz, ichimlik suv, kanalizatsiya tarmoqlari va suv quvurlaridan uzib qoʻyish sohasida oʻzaro hamkorlik qilish tartibiga tatbiq etilmaydi.

3. Ushbu Nizomda quyidagi asosiy tushunchalar qoʻllaniladi:

isteʼmolchi ― elektr va gaz taʼminoti, shuningdek, suv taʼminoti va suv chiqarish shartnomasiga muvofiq elektr energiyasi va tabiiy gazdan, shuningdek, suv taʼminoti hamda suv chiqarish xizmatlaridan ishlab chiqarish va (yoki) maishiy ehtiyojlar uchun foydalanadigan yuridik yoki jismoniy shaxs;

energiya resurslari va suv yetkazib beruvchilar — “Oʻzbekenergo” AJ, “Oʻztransgaz” AK va ularning boʻlinmalari, shuningdek, “Suvoqova” DUK, “Suvsoz” DUK va hududlararo suv quvurlaridan foydalanish boshqarmalari (keyingi oʻrinlarda ichimlik suv-kanalizatsiya xoʻjaliklari tashkilotlari deb ataladi) va isteʼmolchilarga elektr energiyasi, tabiiy gazni yetkazib berishni taʼminlovchi hamda suv taʼminoti va suv chiqarish xizmatlarini koʻrsatuvchi, ishonchli boshqaruv toʻgʻrisidagi shartnoma asosida faoliyat yurituvchi boshqa tashkilotlar”;

g) 2-bobning nomlanishidagi “energiya resurslari yetkazib beruvchilarning” soʻzlaridan keyin “va ichimlik suv-kanalizatsiya xoʻjaliklari tashkilotlarining” soʻzlari qoʻshilsin;

d) 4 va 5-bandlar quyidagi tahrirda bayon etilsin:

“4. Byuro va uning hududiy boʻlinmalari elektr energiyasi, tabiiy gaz, ichimlik suvdan foydalanish qoidalarini buzish holatlarini aniqlash, bartaraf etish va ularning oldini olish, shu jumladan elektr, gaz, ichimlik suv va kanalizatsiya tarmoqlari hamda suv quvurlariga noqonuniy ulanish hamda ularni talon-toroj qilish yoʻllarini tez aniqlash maqsadida zarur mutaxassislarni jalb etish uchun energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlariga yozma soʻrovlar yuborishga haqli.

Aniqlangan holatlar boʻyicha zudlik bilan qaror qabul qilish talab etiladigan alohida holatlarda energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari xodimlari ogʻzaki soʻrov boʻyicha jalb qilinishi mumkin,

5. Soʻrov, qoida tariqasida, energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlarining hududiy joylashuv prinsipi boʻyicha yuboriladi. Soʻrovda energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari xodimlarining yetib kelish vaqti va joyi, shuningdek, ularni jalb etishning nazarda tutiladigan davri koʻrsatiladi”;

e) 6-banddagi “energiya resurslari yetkazib beruvchilarning” soʻzlaridan keyin “va ichimlik suv-kanalizatsiya xoʻjaliklari tashkilotlarining” soʻzlari koʻshilsin;

j) 7-banddagi “energiya resurslari yetkazib beruvchilarning” soʻzlaridan keyin “va ichimlik suv-kanalizatsiya xoʻjaliklari tashkilotining” soʻzlari qoʻshilsin;

z) 8 va 9-bandlar quyidagi tahrirda bayon etilsin:

“8. Energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari “Oʻzbekenergo” AJ va “Oʻztransgaz” AK billing tizimiga, shuningdek, ichimlik suv kanalizatsiya xoʻjaliklari tashkilotining maʼlumotlar bazasiga isteʼmolchilar amalga oshirgan toʻlovlar toʻgʻrisida kiritilgan maʼlumotlar asosida har bir isteʼmolchining shaxsiy hisob raqami boʻyicha yakuniy hisob-kitoblarni amalga oshiradi hamda natijasi boʻyicha foydalanilgan elektr energiyasi, tabiiy gaz, suv taʼminoti va suv chiqarish xizmatlari uchun qarzdorligi mavjud boʻlgan isteʼmolchilar reyestrini shakllantiradi, keyinchalik ushbu maʼlumotlarni Byuroga taqdim etadi.

9. Energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari har oyning oʻn birinchi sanasidan boshlab har kuni Byuroning tuman (shahar) boʻlimlariga foydalanilgan elektr energiyasi, tabiiy gaz, suv taʼminoti hamda koʻrsatilgan suv chiqarish xizmatlari uchun qarzdorligi mavjud boʻlgan isteʼmolchilarning elektron reyestrlarini yuboradi”;

i) 11-banddagi “Oʻzbekenergo” AJ va “Oʻztransgaz” AKning billing tizimlariga” soʻzlari “Oʻzbekenergo” AJ, “Oʻztransgaz” AKning billing tizimlariga, shuningdek, ichimlik suv-kanalizatsiya xoʻjaliklari tashkilotlarining maʼlumotlar bazasiga” soʻzlari bilan almashtirilsin;

k) 12-band quyidagi tahrirda bayon etilsin:

“12. Energiya resurslari yetkazib beruvchilar va ichimlik suv- kanalizatsiya xoʻjaliklari tashkilotlari Byuro bilan birgalikda har oyning oʻn beshinchi sanasiga qadar bevosita isteʼmolchilar tomonidan foydalanilgan elektr energiyasi, tabiiy gaz va ichimlik suv hajmi hamda tegishli uchastkalar chegaralaridagi tarmoqlarga yetkazib berilgan hajm oʻrtasidagi tafovutlar mavjudligini aniqlaydi”;

l) 13-banddagi “elektr energiyasi va tabiiy gaz” soʻzlari “elektr energiyasi, tabiiy gaz va ichimlik suv” soʻzlari bilan almashtirilsin;

m) 14 va 15-bandlari quyidagi tahrirda bayon etilsin:

“14. Byuro olingan maʼlumotlar asosida energiya resurslari yetkazib beruvchilar va ichimlik-kanalizatsiya xoʻjaliklari tashkilotlari bilan birgalikda tafovutning yuzaga kelish sabablarini, jumladan elektr va gaz tarmoqlariga noqonuniy ulanish, ularni talon-toroj qilishning mumkin boʻlgan yoʻllarini topish orqali, shuningdek, ichimlik suv hamda kanalizatsiya tarmoqlariga oʻzboshimchalik bilan ulanishni aniqlash boʻyicha belgilangan tartibda choralar koʻradi.

15. Har bir hisobot yili yakunlari boʻyicha “Oʻzbekenergo” AJ, “Oʻztransgaz” AK va ichimlik suv-kanalizatsiya xoʻjaliklari tashkilotlari elektr energiyasi, tabiiy gaz va ichimlik suv balansida yuzaga kelgan tafovutlar boʻyicha qonun hujjatlarida belgilangan tartibda tegishli qarorlar qabul qiladilar”;

n) 5-bobning nomlanishiga “tabiiy gaz” soʻzlaridan keyin “va ichimlik suv” soʻzlari qoʻshilsin;

o) 16 va 17-bandlar quyidagi tahrirda bayon etilsin:

“16. Elektr energiyasi, tabiiy gaz va ichimlik suv isteʼmolini hisobga olish priborlari energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari xodimlari tomonidan Byuro tuman (shahar) boʻlimlarining energiya resurslari va suvdan foydalanish tartibini nazorat qilish boʻyicha davlat inspektorlari ishtirokida oʻrnatiladi.

17. Elektr energiyasi, tabiiy gaz va ichimlik suv isteʼmolini hisobga olish priborlari tuman (shahar) Byuro xodimlari tomonidan energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlarining xodimlari bilan birgalikda tashqi taʼsirdan yuqori darajali himoya hamda farqlovchi belgi bilan plombalanadi”;

p) 18-banddagi “elektr energiyasi va tabiiy gaz” soʻzlari “elektr energiyasi, tabiiy gaz va ichimlik suv” soʻzlari bilan almashtirilsin;

r) 19 va 20-bandlar quyidagi tahrirda bayon etilsin:

“19. Elektr energiyasi, tabiiy gaz va ichimlik suv isteʼmolini hisobga olish priborlarini oʻrnatish va plombalash haqida uch nusxada dalolatnoma tuzilib, energiya resurslari yetkazib beruvchilar, ichimlik suv-kanalizatsiya xoʻjaliklari tashkilotlari va Byuroning masʼul xodimlari hamda isteʼmolchi tomonidan imzolanadi.

20. Foydalanilgan elektr energiyasi, tabiiy gaz, suv taʼminoti va suv chiqarish xizmatlari haqini oʻz vaqtida hamda toʻliq toʻlash madaniyatini oshirish maqsadida Byuro va uning boʻlinmalari energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari bilan birgalikda har chorakda isteʼmolchilar oʻrtasida tushuntirish ishlarini oʻtkazish rejalarini tuzadi”;

s) 21-bandning ikkinchi xatboshidagi “elektr energiyasi va tabiiy gaz” soʻzlari “elektr energiyasi, tabiiy gaz va ichimlik suv” soʻzlari bilan almashtirilsin;

t) 22-banddagi “energiya resurslari yetkazib beruvchilar” soʻzlaridan keyin “va ichimlik suv-kanalizatsiya xoʻjaliklari tashkilotlari” soʻzlari qoʻshilsin.

4. 2-ilovada:

a) nomlanishi quyidagi tahrirda bayon etilsin:

“Isteʼmolchilarni elektr energiyasi, tabiiy gaz, ichimlik suv va kanalizatsiya tarmoqlari hamda suv quvurlaridan uzib qoʻyish tartibi toʻgʻrisida nizom”;

b) 1-banddagi “elektr va gaz tarmoqlaridan” soʻzlari “elektr, gaz, ichimlik suv va kanalizatsiya tarmoqlari hamda suv quvurlaridan” soʻzlari bilan almashtirilsin;

v) 2 ― 7-bandlar quyidagi tahrirda bayon etilsin:

“2. Ushbu Nizomda quyidagi asosiy tushunchalardan qoʻllaniladi:

isteʼmolchi ― elektr va gaz taʼminoti, shuningdek, suv taʼminoti va suv chiqarish shartnomasiga muvofiq elektr energiyasi va tabiiy gazdan, shuningdek, suv taʼminoti hamda suv chiqarish xizmatlaridan ishlab chiqarish va (yoki) maishiy ehtiyojlar uchun foydalanadigan yuridik yoki jismoniy shaxs;

energiya resurslari va suv yetkazib beruvchilar ― “Oʻzbekenergo” AJ, “Oʻztransgaz” AK va ularning boʻlinmalari, shuningdek, “Suvoqova” DUK, “Suvsoz” DUK va hududlararo suv quvurlaridan foydalanish boshqarmalari (keyingi oʻrinlarda ichimlik suv-kanalizatsiya xoʻjaliklari tashkilotlari deb ataladi) va isteʼmolchilarga elektr energiyasi, tabiiy gazni yetkazib berishni taʼminlovchi hamda suv taʼminoti va suv chiqarish xizmatlarini koʻrsatuvchi, ishonchli boshqaruv toʻgʻrisidagi shartnoma asosida faoliyat yurituvchi boshqa tashkilotlar”;

3. Isteʼmolchilarni elektr, gaz, ichimlik suv va kanalizatsiya tarmoqlari hamda suv quvurlaridan uzib qoʻyish quyidagi holatlarda amalga oshiriladi:

shartnoma majburiyatlari bajarilmaganda, shu jumladan hisob-kitoblar oʻz vaqtida amalga oshirilmaganligi oqibatida foydalanilgan elektr energiyasi, tabiiy gaz, shuningdek, suv taʼminoti va suv chiqarish xizmatlari uchun karzdorlik mavjud boʻlganda;

Byuro talabnomalari bajarilmaganda, shu jumladan uning vakillariga elektr energiyasi, tabiiy gaz va ichimlik suv isteʼmolini hisobga olish priborlaridan koʻrsatkichlarni olish uchun ruxsat etilmaganda;

elektr va gaz tarmoqlariga noqonuniy ulanish, ularni talon-toroj qilish, shuningdek, ichimlik suv va kanalizatsiya tarmoqlariga oʻzboshimchalik bilan ulanish yoki ulardan foydalanish qoidalarini buzishning boshqa holatlari aniqlanganda;

elektr energiyasi, tabiiy gaz va ichimlik suv isteʼmolini hisobga olish priborlari qasddan buzilganda, koʻrsatkichlarni oʻzgartirish maqsadida ularga tashqaridan aralashilganda.

4. Isteʼmolchilarni elektr va gaz tarmoqlaridan uzib qoʻyish hamda ularni qayta ulash Byuro tomonidan amalga oshiriladi, ushbu Nizomning 5 ― 7-bandlarida nazarda tutilgan holatlar bundan mustasno.

Isteʼmolchilarni ichimlik suv va kanalizatsiya tarmoqlari hamda suv quvurlaridan uzib qoʻyish hamda ularni qayta ulash Byuro yoki Byuroning majburiy talabnomasiga asosan ichimlik suv-kanalizatsiya xoʻjaliklari tashkilotlari tomonidan amalga oshiriladi, ushbu Nizomning 5-6-bandlarida nazarda tutilgan holatlar bundan mustasno.

5. Isteʼmolchilar avariya rejimida elektr, gaz, ichimlik suv va kanalizatsiya tarmoqlaridan energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari tomonidan Byuroni xabardor qilgan holda uzib qoʻyiladi.

6. Isteʼmolchini uning arizasiga (talabiga) binoan elektr, gaz, ichimlik suv va kanalizatsiya tarmoqlaridan energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari tomonidan uzib qoʻyiladi.

7. Alohida toifadagi isteʼmolchilarni elektr energiyasi kuchlanishi 5 ― 10 kV va undan yuqori boʻlgan tarmoqdan, shuningdek, magistral suv quvurlaridan uzib qoʻyish Byuroning majburiy taqdimnomalari boʻyicha elektr energiyasi yetkazib beruvchi va ichimlik suv-kanalizatsiya xoʻjaliklari tashkilotlari tomonidan ushbu Nizomda nazarda tutilgan tartibda amalga oshiriladi”;

g) 8-banddagi “elektr va gaz tarmoqlaridan” soʻzlari “elektr, gaz, ichimlik suv va kanalizatsiya tarmoqlari hamda suv quvurlaridan” soʻzlari bilan almashtirilsin;

d) 10-band quyidagi tahrirda bayon etilsin:

“10. Byuro isteʼmolchilarni elektr, gaz, ichimlik suv va kanalizatsiya tarmoqlari hamda suv quvurlaridan uzib qoʻyishda, ularni qayta ulashda, shuningdek, ular tomonidan elektr energiyasi, tabiiy gaz, ichimlik suvdan foydalanish qoidalariga rioya etilishini aniqlash maqsadida isteʼmolchilar binolarini koʻzdan kechirishda “Oʻzbekenergo” AJ, “Oʻztransgaz” AK, Oʻzbekiston Respublikasi Uy-joy kommunal xizmat koʻrsatish vazirligi va ularning boʻlinmalari mutaxassislarini belgilangan tartibda jalb etish huquqiga ega”;

e) 2-bobning nomlanishidagi “elektr va gaz tarmoqlaridan” soʻzlari “elektr, gaz, ichimlik suv va kanalizatsiya tarmoqlari hamda suv quvurlaridan” soʻzlari bilan almashtirilsin;

j) 11-12-bandlari quyidagi tahrirda bayon etilsin:

“11. Isteʼmol qilingan elektr energiyasi, tabiiy gaz, suv taʼminoti va koʻrsatilgan suv chiqarish xizmatlari uchun qarzi mavjud boʻlgan isteʼmolchilarning roʻyxati energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari tomonidan shakllantiriladi hamda har oyning oʻn birinchi sanasidan boshlab har kuni idoralararo yagona elektron axborot tizimi orqali Byuroga taqdim etiladi.

12. Byuro isteʼmol qilingan elektr energiyasi va tabiiy gaz, suv taʼminoti va koʻrsatilgan suv chiqarish xizmatlari uchun qarzlari mavjud boʻlgan isteʼmolchilarning energiya resurslari yetkazib beruvchilar va ichimlik suv-kanalizatsiya xoʻjaliklari tashkilotlari tomonidan shakllantirilgan va taqdim etilgan roʻyxatlari asosida isteʼmolchilarni qarzni besh kun muddatda toʻlash zarurligi toʻgʻrisida yozma xabardor qiladi”;

z) 13-banddagi “elektr va gaz tarmoqlaridan” soʻzlari “elektr, gaz, ichimlik suv va kanalizatsiya tarmoqlari hamda suv quvurlaridan” soʻzlari bilan almashtirilsin;

i) 14 ― 16-bandlari quyidagi tahrirda bayon etilsin:

“14. Elektr energiyasi, tabiiy gaz, ichimlik suvdan foydalanish qoidalarini buzish holatlari aniqlangan taqdirda, Byuroning tumanlar (shaharlar) elektr energiyasi, tabiiy gaz va suvdan foydalanish tartibini nazorat qilish guruhi (shuʼbasi)ning davlat inspektori ularni elektr, gaz, ichimlik suv, kanalizatsiya tarmoqlari va suv quvurlaridan darhol uzib qoʻyish hamda foydalanish qoidalarini buzgan shaxslarni qonun hujjatlarida belgilangan javobgarlikka tortish choralarini koʻradi.

15. Elektr energiyasi, tabiiy gaz, ichimlik suv isteʼmolchilari uzib qoʻyiladigan elektr, gaz, ichimlik suv va kanalizatsiya tarmoqlari hamda suv quvurlarining nuqtalari Byuro xodimlari tomonidan nazorat tartibida majburiy plombalanishi shart.

16. Byuroning tumanlar (shaharlar) elektr energiyasi, tabiiy gaz va suvdan foydalanish tartibini nazorat qilish guruhi (shuʼbasi)ning davlat inspektori tomonidan isteʼmolchi elektr va gaz tarmoqlaridan uzib qoʻyilganda, tarmoqdan uzib qoʻyish haqida ikki nusxada dalolatnoma rasmiylashtiriladi, uning bir nusxasi isteʼmolchiga beriladi.

Byuroning talabnomasiga asosan isteʼmolchi ichimlik suv va kanalizatsiya tarmoqlari hamda suv quvurlaridan uzib qoʻyilganda, uzib qoʻyish haqida uch nusxada dalolatnoma rasmiylashtiriladi, uning bir nusxasi isteʼmolchiga beriladi”;

k) 18-band quyidagi tahrirda bayon etilsin:

“18. Elektr, gaz, ichimlik suv va kanalizatsiya tarmoqlari hamda suv quvurlaridan uzib qoʻyilgan isteʼmolchilar haqidagi maʼlumotlar Byuroning tumanlar (shaharlar) elektr energiyasi, tabiiy gaz va suvdan foydalanish tartibini nazorat qilish guruhi (shuʼbasi)ning davlat inspektori tomonidan idoralararo yagona elektron maʼlumotlar tizimiga kiritiladi”;

l) 3-bobning nomlanishidagi “elektr va gaz tarmoqlaridan” soʻzlari “elektr, gaz, ichimlik suv va kanalizatsiya tarmoqlari hamda suv quvurlarida” soʻzlari bilan almashtirilsin;

m) 19 ― 21-bandlar quyidagi tahrirda bayon etilsin:

“19. Isteʼmolchilar quyidagi hollarda elektr, gaz, ichimlik suv va kanalizatsiya tarmoqlari hamda suv quvurlariga qayta ulanadi:

elektr energiyasi, tabiiy gaz, suv taʼminoti va koʻrsatilgan suv chiqarish xizmatlaridan foydalanishda yoʻl qoʻyilgan qoidabuzarliklar bartaraf etilganda;

isteʼmol qilingan elektr energiyasi, tabiiy gaz, suv taʼminoti va koʻrsatilgan suv chiqarish xizmatlari uchun qarzlar toʻlanganda;

elektr, gaz, ichimlik suv va kanalizatsiya tarmoqlari hamda suv quvurlariga qayta ulanish uchun ushbu Nizomning 23-bandida belgilangan miqdordagi summa toʻlanganda.

20. Isteʼmolchilar Byuroning tegishli hududiy boʻlinmasiga, jumladan, axborot-kommunikatsiya texnologiyalaridan foydalanish orqali murojaat qilganda elektr, gaz, ichimlik suv va kanalizatsiya tarmoqlari hamda suv quvurlariga qayta ulanadi.

Isteʼmolchilar elektr va gaz tarmoqlariga aniqlangan qoidabuzarliklar bartaraf etilgandan keyingi kundan kechiktirmay Byuro tomonidan qayta ulanadi.

Isteʼmolchilar ichimlik suv va kanalizatsiya tarmoqlari hamda suv quvurlariga aniqlangan qoidabuzarliklar bartaraf etilgandan soʻng 3 kundan kechiktirmay Byuro yoki Byuroning majburiy talabnomasiga asosan ichimlik suv-kanalizatsiya xoʻjaliklari tashkilotlari tomonidan qayta ulanadi.

21. Elektr energiyasi, tabiiy gaz, suv taʼminoti va suv chiqarish xizmatlaridan foydalanish qoidalari buzilganligi uchun isteʼmolchilar tarmokdan uzilganda, ularni tarmoqqa qayta ulash Byuro tomonidan elektr energiyasi, tabiiy gaz, suv taʼminoti va suv chiqarish xizmatlaridan foydalanish qoidalarini buzish sabablari hamda sharoitlari bartaraf etilganligi nuqtai nazaridan isteʼmolchilarning binolari koʻzdan kechirilgandan keyin amalga oshiriladi”;

n) 4-bobning nomlanishidagi “elektr va gaz tarmoqlariga” soʻzlari “elektr, gaz, ichimlik suv va kanalizatsiya tarmoqlari hamda suv quvurlariga” soʻzlari bilan almashtirilsin;

o) 23-24-bandlar quyida tahrirda bayon etilsin:

“23. Elektr va gaz tarmoqlaridan ilgari uzib qoʻyilgan shaxslarni qayta ulashda isteʼmolchi-jismoniy shaxslardan eng kam oylik ish haqining ikki baravari mikdorida, isteʼmolchi-yuridik shaxslardan eng kam oylik ish haqining oʻn baravari miqdorida toʻlov undiriladi, ushbu mablagʻlar qayta ulashni amalga oshirgan Byuro boʻlinmasi hisob raqamiga oʻtkaziladi.

Ichimlik suv, kanalizatsiya tarmoqlari va suv quvurlaridan ilgari uzib qoʻyilgan shaxslarni qayta ulashda isteʼmolchi-jismoniy shaxslardan (I guruh) eng kam oylik ish haqining ikki baravari miqdorida, isteʼmolchi-yuridik shaxslardan (II va III guruh) eng kam oylik ish haqining oʻn baravari miqdorida toʻlov undiriladi, ushbu mablagʻlar qayta ulashni amalga oshirgan tashkilot hisob raqamiga oʻtkaziladi.

24. Ushbu Nizomning 5 va 6-bandlariga muvofiq elektr energiyasi, gaz, ichimlik suvi va kanalizatsiya tarmoqlaridan uzib qoʻyilgan, shuningdek, elektr energiyasi, tabiiy gaz hamda ichimlik suv isteʼmolini nazorat qilish va hisobga olishning avtomatlashtirilgan tizimlariga ulangan isteʼmolchilarni elektr, gaz, ichimlik suv va kanalizatsiya tarmoqlariga qayta ulash uchun toʻlov undirilmaydi”;

p) quyidagi mazmundagi 24¹-band qoʻshilsin:

“24¹. Isteʼmolchilarni elektr, gaz, ichimlik suv, kanalizatsiya tarmoqlari va suv quvurlariga kayta ulashdan tushgan hamda Byuroning tumanlar (shaharlar) boʻlimlari hisobraqamlarida toʻplangan mablagʻlar quyidagicha taqsimlanadi:

25 foizi ― Byuro markaziy apparatining hisobraqamiga oʻtkaziladi;

25 foizi ― Byuroning tegishli hududiy boshqarmasi hisobraqamiga oʻtkaziladi;

50 foizi ― Byuroning tumanlar (shaharlar) boʻlimlari ixtiyorida qoladi va undan Vazirlar Mahkamasining “Budjet tashkilotlarini mablagʻ bilan taʼminlash tartibini takomillashtirish toʻgʻrisida” 1999-yil 3-sentabrdagi 414-son qarori bilan belgilangan tartibda foydalaniladi.

Isteʼmolchilarni elektr, gaz, ichimlik suv va kanalizatsiya tarmoqlariga qayta ulashdan tushadigan, shuningdek, Byuroning yuqori organlariga oʻtkaziladigan mablagʻlarni toʻplash hamda ulardan foydalanish tartibi Byuro tomonidan Oʻzbekiston Respublikasi Moliya vazirligi bilan kelishilgan holda belgilanadi”.