Hozirgi vaqtda markaziy Qizilqumda qimmatbaho va nodir metallar, fosforitlar, kvars va kvars-polevoshpat qumlari, qurilish va pardozbop toshlarning yirik mineral-xomashyo bazasi yaratildi, qisqa muddat ichida volfram, vanadiy konlarini tayyorlashning geologik istiqbollari aniqlandi. Bu hol mavjud kon-qazish korxonalarini yanada kengaytirish va yangilarini qurish, bu mintaqada yashovchi aholining ijtimoiy sharoitini yaxshilash va farovonligini oshirish uchun real sharoit yaratadi. Lekin moddiy-texnika taʼminotidagi, materiallar, asbob-uskunalar, kimyoviy reagentlar yetkazib berishdagi uzilishlar Muruntov karyerini rivojlantirishni, 1992-yilda oltin chiqarish boʻyicha davlat buyurtmasini bajarishni, Uchquduq shahrida zavod qurilishidagi qurilish-montaj ishlarini va Zarafshon, Navoiy shaharlarida gidrometallurgiya korxonalarini qayta qurishni xavf ostiga solib qoʻydi. Ijtimoiy sohadagi obyektlarni rivojlantirish ham kechikmoqda.

Vazirlar Mahkamasi qaror qiladi:

1. Belgilansinki, Navoiy kon-metallurgiya kombinatiga davlat buyurtmasiga muvofiq u realizatsiya qilgan oltinning 40 foizi miqdorida va belgilangan topshiriqdan ortiq topshirgan oltin uchun tushgan foydaning 80 foizi miqdorida valyuta mablagʻlari oʻtkaziladi.

2. “Qizilqumkamyobmetalloltin” konserni ixtisoslashtirilgan loyihalash tashkilotlarini jalb etgan holda 1992-yilda Oqjetpes, Kosmanachi va Visokovoltnoye konlarining tarkibida kumush boʻlgan manbalarini qayta ishlash yoʻnaltirishning maqsadga muvofiqligini texnikaviy-iqtisodiy jihatdan asoslab bersin, kumushning sotiladigan narxini qayta koʻrib chiqsin.

3. Oʻzbekiston Respublikasi Davlat geologiya va mineral resurslar qoʻmitasi:

“Oʻzdavkimyo” konserni bilan birgalikda 1992-yilda Jeroy-Sardara fosforit maʼdanlarini sanoat jihatidan texnologiya sinovini oʻtkazib fosfat oʻgʻitlari olsin. Sinov ijobiy natija bersa “Oʻzdavkimyo” konserni Oʻzbekiston Respublikasining taraqqiyot istiqbolini belgilash qoʻmitasi bilan kelishgan holda manfaatdor tashkilotlarni jalb etib, 1992-yilning ikkinchi yarmida yiliga 300—350 ming tonna konsentrat ishlab chiqaradigan kon va boyitish fabrikasini loyihalashtirishga kirishsin.

1992-1993-yillarda Jeroy kvars qumlari konini razvedka qilib, uning zaxiralarini 4 mln. tonnadan 20 mln tonnaga yetkazsin.

4. Oʻzbekiston Respublikasi Hukumati hamda sobiq SSSR Atom energetikasi va sanoati vazirligi tomonidan 1991-yilning iyun oyida Markaziy Qizilqumning mineral resurslarini sanoat jihatidan oʻzlashtirishni jadallashtirishning birgalikda ishlab chiqilgan istiqbol Dasturi tasdiqlanganligi maʼlumot uchun qabul qilinsin.

5. “Sredazgazprom” ishlab chiqarish birlashmasi, “Sredazneftegazstroy” ishlab chiqarish-qurilish-montaj birlashmasi 1992-yilning dekabrida Zarafshon shahriga gaz yetkazib beruvchi tarmoq gaz quvurlarini yotqizishni taʼminlasin.

6. “Oʻzshartnomasavdo” “Sredazgazprom” ishlab chiqarish birlashmasi va “Oʻrtaosiyoneftgazqurilish” ishlab chiqarish qurilish-montaj birlashmasiga 1992-yilning birinchi yarmida, ilovaga* muvofiq, gaz yetkazib beruvchi tarmoq gaz quvurlari yotqizish uchun moddiy-texnika resurslarini ajratsin.

7. “Oʻrtaosiyoneftgazqurilish” ishlab chiqarish-qurilish-montaj birlashmasi, “Oʻzshartnomasavdo” 1992-yilga ajratilgan neft asortimentidagi quvurlarning 2,8 ming tonnasini Zarafshon shahriga gaz yetkazib beruvchi tarmoq gaz quvurlarini yotqizish uchun yetkazib berishni nazarda tutsin.

8. Mazkur qarorni bajarishni taʼminlash yuzasidan ilova* qilinayotgan tadbirlar tasdiqlansin.

9. Respublika vazirliklari, konsernlari, loyihalash va boshqa tashkilotlari har yilning may oyida mazkur qarorning qanday bajarilayotganligi haqida Oʻzbekiston Respublikasining taraqqiyot istiqbolini belgilash qoʻmitasiga umumlashtirish va Vazirlar Mahkamasiga maʼlum qilish uchun axborot bersin.