Oʻzbekiston Respublikasi Prezidentining
Farmoni
Oʻzbekiston Respublikasida investitsiya muhitini tubdan yaxshilash chora-tadbirlari toʻgʻrisida
Taʼkidlash lozimki, mamlakatda toʻgʻridan-toʻgʻri investitsiyalarni jalb etish uchun eng qulay investitsiya muhitini shakllantirish maqsadida iqtisodiyotni liberallashtirish, davlat boshqaruvini isloh qilish, tadbirkorlik subyektlari faoliyatiga aralashuvni cheklash, litsenziyalash va ruxsat berish tartib-taomillarini qisqartirish va soddalashtirish, tovarlar (ishlar va xizmatlar)dan erkin foydalanishni taʼminlash, shuningdek, hududlarda zarur infratuzilmani yaratish borasida keng koʻlamli chora-tadbirlar amalga oshirildi.
Soliq yukini kamaytirish va investorlar uchun soliqqa tortish tizimini soddalashtirish, sogʻlom raqobat muhitini qoʻllab-quvvatlashga qaratilgan soliq siyosati va bojxona-tarif jihatdan tartibga solish islohotlari jadal surʼatlar bilan amalga oshirilmoqda.
Shu bilan birga, investorlar bilan ishlashda, ayniqsa joylarda, investorlarning tashabbuslari barcha darajadagi hokimliklar tomonidan lozim darajada qoʻllab-quvvatlanmasligi, bu borada vazirlik va idoralar faoliyati aniq muvofiqlashtirilmaganligi bilan bogʻliq byurokratik toʻsiq va gʻovlar hali ham mavjudligi qulay investitsiya muhitini shakllantirish boʻyicha davlat siyosatining izchilligiga boʻlgan ishonchning mustahkamlanishiga toʻsqinlik qilmoqda.
Mamlakatda investitsiya muhitini yanada yaxshilash, toʻgʻridan-toʻgʻri investitsiyalarni jalb etishni ragʻbatlantirish, investorlarning bu boradagi davlat siyosatining izchilligiga boʻlgan ishonchini mustahkamlash va investorlar bilan ishlashda davlat tuzilmalarining masʼuliyatini oshirish maqsadida:
1. 2018-yil 1-avgustdan shunday tartib oʻrnatilsinki, unga muvofiq:
insofli faoliyat yuritgan investor va tadbirkorlik subyektiga davlat organi (mansabdor shaxs) tomonidan ularga nisbatan qabul qilingan maʼmuriy hujjatning qonuniy kuchiga ishonishi sababli kelib chiqqan mulkiy zararning oʻrni qoplanadi, agarda ushbu hujjatning qonuniy kuchiga ishonib mol-mulkdan foydalangan, bitim tuzgan yoki taqdim etilgan afzallik va ustunliklardan boshqacha tarzda foydalangan hamda mazkur hujjat keyinchalik haqiqiy emas deb topilgan yoki bekor qilingan boʻlsa;
davlat organi (mansabdor shaxs)ning maʼmuriy hujjatini bekor qilish yoki oʻzgartirish masalasi, agar u insofli investor va tadbirkorlik subyektining qonuniy manfaatlariga daxldor boʻlsa, sud tartibida koʻrib chiqiladi, uning saqlab qolinishi jamoat manfaatlariga tahdid solayotgan hollar bundan mustasno.
Oldingi tahrirga qarang.
11. Belgilansinki:
Oldingi tahrirga qarang.
davlat organlari, ularning mansabdor shaxslari va xizmatchilarining qonunga xilof deb topilgan qarorlari, harakatlari (harakatsizligi) natijasida tadbirkorlik subyektiga yetkazilgan zararning oʻrni sud qarori asosida toʻla hajmda jismoniy va yuridik shaxslarga yetkazilgan mulkiy zararlarni kompensatsiya qilish boʻyicha maqsadli jamgʻarmalar mablagʻlari hisobidan qoplanishi, keyinchalik aybdor shaxslardan toʻliq miqdorda regress tartibida undirib olinishi lozim;
(11-bandning ikkinchi xatboshisi Oʻzbekiston Respublikasi Prezidentining 2023-yil 19-iyundagi PF-99-sonli Farmoni tahririda — Qonunchilik maʼlumotlari milliy bazasi, 20.06.2023-y., 06/23/99/0403-son)
tadbirkorlik subyektlari oʻrtasidagi iqtisodiy nizolar iqtisodiy sud yoki hakamlik sudi tomonidan koʻrib chiqiladi.
(11-band Oʻzbekiston Respublikasi Prezidentining 2021-yil 30-apreldagi PF-6218-sonli Farmoniga asosan kiritilgan — Qonunchilik maʼlumotlari milliy bazasi, 30.04.2021-y., 06/21/6218/0398-son)
Oldingi tahrirga qarang.
(2-band Oʻzbekiston Respublikasi Prezidentining 2023-yil 30-yanvardagi PF-15-sonli Farmoniga asosan oʻz kuchini yoʻqotgan)
Oldingi tahrirga qarang.
(3-band Oʻzbekiston Respublikasi Prezidentining 2023-yil 30-yanvardagi PF-15-sonli Farmoniga asosan oʻz kuchini yoʻqotgan)
Oldingi tahrirga qarang.
(4-band Oʻzbekiston Respublikasi Prezidentining 2023-yil 19-iyundagi PF-99-sonli Farmoniga asosan oʻz kuchini yoʻqotgan — Qonunchilik maʼlumotlari milliy bazasi, 20.06.2023-y., 06/23/99/0403-son)
5. Quyidagilarga:
Oldingi tahrirga qarang.
(5-bandning ikkinchi xatboshisi Oʻzbekiston Respublikasi Prezidentining 2019-yil 13-avgustdagi PF-5780-sonli Farmoniga asosan chiqarilgan — Qonun hujjatlari maʼlumotlari milliy bazasi, 14.08.2019-y., 06/19/5780/3559-son — 2019-yil 1-oktabrdan kuchga kiradi)
Oldingi tahrirga qarang.
Qoraqalpogʻiston Respublikasi Vazirlar Kengashi Raisiga, viloyatlar va Toshkent shahar hokimlariga qonun hujjatlarida belgilangan vakolatlar doirasida va tartibda 10 million AQSh dollaridan koʻp boʻlmagan ekvivalentda chet el investitsiyasi ulushi boʻlgan investitsiya loyihalarini amalga oshirishda chet el investorlari bilan investitsiya shartnomalarini tuzish huquqi berilsin.
(5-bandning ikkinchi xatboshisi Oʻzbekiston Respublikasi Prezidentining 2024-yil 19-apreldagi PF-67-sonli Farmoni tahririda — Qonunchilik maʼlumotlari milliy bazasi, 27.04.2024-y., 06/24/67/0307-son)
Oldingi tahrirga qarang.
(5-bandning uchinchi xatboshisi Oʻzbekiston Respublikasi Prezidentining 2024-yil 19-apreldagi PF-67-sonli Farmoniga asosan chiqarilgan — Qonunchilik maʼlumotlari milliy bazasi, 27.04.2024-y., 06/24/67/0307-son)
6. Oʻzbekiston Respublikasi Adliya vazirligi, Iqtisodiyot vazirligi hamda Xususiylashtirilgan korxonalarga koʻmaklashish va raqobatni rivojlantirish davlat qoʻmitasining:
chet el investitsiyalari ishtirokidagi korxonalar ustav fondidagi xorijiy investitsiyalar ulushining eng kam miqdorini 30 foizdan 15 foizgacha kamaytirish;
chet el investitsiyalari ishtirokidagi korxonaning ishtirokchisi sifatida xorijiy yuridik shaxs qatnashishi shartligi toʻgʻrisidagi talabni bekor qilish;
chet el investitsiyalari ishtirokidagi korxonalar ustav fondining eng kam miqdorini 600 million soʻmdan 400 million soʻmgacha kamaytirish;
chet el investitsiyalari ishtirokidagi korxonalarni davlat roʻyxatidan oʻtkazish uchun davlat boji miqdorini uch baravarga kamaytirish;
aksiyadorlik jamiyatlari ustav fondining eng kam miqdorini 400 million soʻm miqdorida belgilash;
meva-sabzavot mahsulotlariga eksport kontraktlarini “Oʻzagroeksport” AJ tomonidan eʼlon qilingan narxlardan past boʻlmagan narxlar boʻyicha tuzish, shuningdek, meva-sabzavot mahsulotlarini eksport kontraktini tuzmasdan, “Oʻzagroeksport” AJ rasmiy veb-saytida qayd etilgan narxlardan past boʻlmagan narxlar boʻyicha invoys asosida bojxona rasmiylashtiruvidan oʻtkazish tartibini bekor qilish haqidagi takliflari maʼqullansin.
Oldingi tahrirga qarang.
61. Belgilab qoʻyilsinki:
mazkur Farmonning 6-bandida belgilangan shartlarga muvofiq boʻlgan hamda xoʻjalik faoliyatidan tushadigan jami mablagʻning 60 foizdan koʻprogʻi ustav faoliyatida ularning oʻzlari ishlab chiqarayotgan mahsulot va (yoki) koʻrsatayotgan servis xizmati ulushiga toʻgʻri keladigan xorijiy, shuʼba va qoʻshma korxonalar chet el investitsiyalari ishtirokidagi korxonalar jumlasiga kiradi;
chet el investitsiyalari ishtirokidagi korxonalarning ustav fondlarini taʼsis hujjatlarida koʻzda tutilgan miqdorlarda shakllantirishning oxirgi muddati hukumatning ayrim qarorlarida boshqa qoida nazarda tutilmagan boʻlsa, korxona davlat roʻyxatidan oʻtgan paytdan boshlab bir yildan oshmasligi kerak;
ustav fondining miqdori kamida 200 mln soʻm boʻlgan hamda ustav fondidagi chet el investitsiyalari ulushi 15 foizni tashkil etuvchi korxonalar Qoraqalpogʻiston Respublikasi va Xorazm viloyati hududida yangi barpo etiladigan chet el investitsiyalari ishtirokidagi korxonalar deb hisoblanadi;
mazkur bandning toʻrtinchi xatboshisida nazarda tutilgan imtiyoz belgilangan tartibda roʻyxatga olingan, Qoraqalpogʻiston Respublikasi va Xorazm viloyati hududida joylashgan va oʻz faoliyatini amalga oshirayotgan chet el investitsiyalari ishtirokida yangi tashkil etilgan korxonalargagina taalluqlidir.
(61-band Oʻzbekiston Respublikasi Prezidentining 2021-yil 30-apreldagi PF-6218-sonli Farmoniga asosan kiritilgan — Qonunchilik maʼlumotlari milliy bazasi, 30.04.2021-y., 06/21/6218/0398-son)
7. Oʻzbekiston Respublikasi Bosh vazirining oʻrinbosari — Oʻzbekiston Respublikasi Investitsiyalar boʻyicha davlat qoʻmitasi raisi S.R. Xolmurodov:
vakolatli organlardan har birining huquqlaridan kelib chiqqan holda ularning chet el investitsiyalarini jalb etish va har tomonlama qoʻllab-quvvatlash masalalari boʻyicha oʻzaro muvofiqlashtirilgan faoliyatini taʼminlasin;
vazirliklar, idoralar, xoʻjalik birlashmalari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, savdo-iqtisodiy masalalar boʻyicha maslahatchilarning ushbu sohadagi asosiy vazifalarning bajarilishini baholagan holda davlat investitsiya siyosatining amalga oshirilishi toʻgʻrisidagi oylik hisobotlarini eshitishlarni, shu jumladan axborot-kommunikatsiya texnologiyalari imkoniyatlarini qoʻllagan holda oʻtkazsin;
xorijiy investorlarni mamlakatimizning iqtisodiy salohiyati, biznes yuritish uchun yaratilgan qulay sharoitlar toʻgʻrisida keng xabardor qilish maqsadida xalqaro konferensiyalar, seminarlar, yirik investitsiya forumlarini tashkil etish orqali chet el investitsiyalarini jalb etishni kengaytirsin.
8. Quyidagilarga:
Oʻzbekiston Respublikasi Vazirlar Mahkamasi komplekslari, vazirliklar, idoralar va xoʻjalik birlashmalari rahbarlari zimmasiga — investitsiya muhitini rivojlantirish boʻyicha qabul qilingan qarorlarning samarali amalga oshirilishi, xorijiy investorlarga zarur koʻmak koʻrsatilishi, investitsiya buyurtmanomalari sifatli va tezkor koʻrib chiqilishi, investitsiya buyurtmanomalari boʻyicha kelishish tartib-taomillari oʻtkazilishi, shuningdek, ijtimoiy-iqtisodiy rivojlanish va investitsiya faoliyati sohasidagi muammoli masalalarning hal qilinishi;
Oldingi tahrirga qarang.
Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari zimmasiga — xorijiy investorlarga barcha zarur koʻmak koʻrsatilishi, investorlar bilan toʻgʻridan-toʻgʻri va ochiq muloqotni oʻrnatish orqali investitsiya buyurtmanomalarining tezkor koʻrib chiqilishi, investorlarning tizimli ravishda shaxsan qabul qilinishi, tegishli infratuzilmaning taʼminlanishi, yer uchastkalari elektron onlayn-auksionga chiqarilishi, ruxsat beruvchi hujjatlar berilishi, investitsiya buyurtmanomalari boʻyicha kelishish tartib-taomillarining oʻz vaqtida amalga oshirilishi, investitsiya loyihalarini amalga oshirishning tizimli monitoring qilinishi;
(8-bandning uchinchi xatboshisi Oʻzbekiston Respublikasi Prezidentining 2023-yil 19-iyundagi PF-99-sonli Farmoni tahririda — Qonunchilik maʼlumotlari milliy bazasi, 20.06.2023-y., 06/23/99/0403-son)
Oldingi tahrirga qarang.
(8-bandning toʻrtinchi xatboshisi Oʻzbekiston Respublikasi Prezidentining 2024-yil 16-oktabrdagi PF-159-sonli Farmoniga asosan chiqarilgan — Qonunchilik maʼlumotlari milliy bazasi, 17.10.2024-y., 06/24/159/0828-son)
“Oʻzbekenergo” AJ raisi, “Oʻztransgaz” AJ raisi, Oʻzbekiston Respublikasi uy-joy kommunal xizmat koʻrsatish vaziri, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari zimmasiga — investorlarning ishlab chiqarish obyektlari qurilishi va ularning tashqi infratuzilmaga ulanishi, investorlarning ishlab chiqarish ehtiyojlariga muvofiq elektr energiyasi, tabiiy gaz, suv bilan uzluksiz hamda tashqi kanalizatsiya tarmoqlari bilan taʼminlanishi;
Oʻzbekiston Respublikasi Savdo-sanoat palatasi raisi zimmasiga — investorlarga respublika hududlarida investitsiya loyihalarini amalga oshirishda maslahat koʻmagining koʻrsatilishi yuzasidan shaxsiy javobgarlik yuklansin.
Oldingi tahrirga qarang.
9. Investitsiya kiritish vaqtida Oʻzbekiston Respublikasida oʻrnatilgan bazaviy hisoblash miqdorining 8500 baravaridan kam boʻlmagan miqdorda xoʻjalik jamiyatlarining aksiyalari va ulushlarini sotib olish, shuningdek, xorijiy korxona tashkil etish shaklida Oʻzbekiston Respublikasiga investitsiya kiritgan chet el fuqarolari va fuqaroligi boʻlmagan shaxslarga koʻp martalik uch yillik viza olish va uning amal qilish muddatini Oʻzbekiston Respublikasi hududidan chiqish zaruratisiz cheklanmagan miqdorda uzaytirish huquqi berilsin.
(9-bandning birinchi xatboshisi Oʻzbekiston Respublikasi Prezidentining 2019-yil 13-dekabrdagi PF-5894-sonli Farmoni tahririda — Qonun hujjatlari maʼlumotlari milliy bazasi, 14.12.2019-y., 06/19/5894/4161-son)
Oʻzbekiston Respublikasi Ichki ishlar vazirligi mamlakat iqtisodiyotining ustuvor sohalariga katta miqdorda investitsiya kiritgan chet el fuqarolariga “Faxriy fuqaro” maqomini berish tartibini joriy etish boʻyicha takliflar kiritsin.
10. Mamlakatning investitsiyaviy jozibadorligini oshirish boʻyicha chora-tadbirlar dasturi ilovaga muvofiq tasdiqlansin.
Vazirlik va idoralar rahbarlari zimmasiga Chora-tadbirlar dasturida nazarda tutilgan tadbirlarning oʻz vaqtida va sifatli amalga oshirilishi yuzasidan shaxsiy javobgarlik yuklansin.
11. Oʻzbekiston Respublikasi Investitsiyalar boʻyicha davlat qoʻmitasi Oʻzbekiston Respublikasi Prezidenti huzuridagi Loyiha boshqaruvi milliy agentligi bilan birgalikda 2019-yil 1-yanvarga qadar muddatda investitsiya kiritish uchun eng qulay sharoitlar yaratishga qaratilgan, investitsiya faoliyati sohasidagi unifikatsiya qilingan qonun hujjati loyihasini ishlab chiqsin va belgilangan tartibda kiritsin.
 LexUZ sharhi
Qarang: Oʻzbekiston Respublikasining “Investitsiyalar va investitsiya faoliyati toʻgʻrisida”gi Qonuni.
12. Oʻzbekiston Respublikasi Bosh prokuraturasi, boʻysunuvidan qatʼi nazar, barcha darajadagi davlat boshqaruvi organlari va boshqa tashkilotlar tomonidan investorlarning huquq va kafolatlarini himoya qilish boʻyicha amaldagi qonun hujjatlariga soʻzsiz rioya etilishi ustidan qatʼiy nazorat oʻrnatsin hamda qonun hujjatlari buzilishining oldini olish va aybdor mansabdor shaxslarni javobgarlikka tortish yuzasidan taʼsirchan choralar koʻrsin.
13. Oʻzbekiston Respublikasi Adliya vazirligi ikki oy muddatda:
Investitsiyalar boʻyicha davlat qoʻmitasi, Yer resurslari, geodeziya, kartografiya va davlat kadastri davlat qoʻmitasi, Iqtisodiyot vazirligi hamda boshqa manfaatdor idoralar bilan birgalikda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin;
idoraviy normativ-huquqiy hujjatlarni investitsiya faoliyatini amalga oshirishga toʻsqinlik qilayotgan yoki uni murakkablashtirayotgan norma va qoidalarni aniqlash nuqtai nazaridan toʻliq xatlovdan oʻtkazib, ularni bartaraf etish choralarini koʻrsin.
14. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Bosh vazirining oʻrinbosari — Oʻzbekiston Respublikasi Investitsiyalar boʻyicha davlat qoʻmitasi raisi S.R. Xolmurodov, Oʻzbekiston Respublikasining Bosh prokurori O.B. Murodov va Oʻzbekiston Respublikasi Prezidenti Davlat maslahatchisining birinchi oʻrinbosari B.M. Mavlonov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2018-yil 1-avgust,
PF-5495-son
Oʻzbekiston Respublikasi Prezidentining 2018-yil 1-avgustdagi PF-5495-son Farmoniga
ILOVA
Mamlakatning investitsiyaviy jozibadorligini oshirish boʻyicha
CHORA-TADBIRLAR DASTURI

T/r

Tadbirlar

Amalga oshirish shakli

Bajarish muddatlari

Masʼul ijrochilar

1.

Investitsiya faoliyatini tartibga soluvchi unifikatsiyalashgan qonun hujjatini ishlab chiqish.

Qonun loyihasi

2018-yil
31-dekabrgacha

Investitsiyalar boʻyicha davlat qoʻmitasi (Xolmurodov),
LBMA (Sodiqov),
Iqtisodiyot vazirligi (Xodjayev),
TSV (Xoʻjayev),
Adliya vazirligi (Davletov),
TIV (Kamilov),

Davlat raqobat qoʻmitasi (Gʻulomov),

MB (Nurmurotov)

2.

Aksiyadorlik jamiyati ustav jamgʻarmasining minimal miqdorini 400 mln.soʻmgacha kamaytirish.

Qonun loyihasi

2018-yil
15-sentabrgacha

Davlat raqobat qoʻmitasi (Gʻulomov),
LBMA (Sodiqov),
Iqtisodiyot vazirligi (Xodjayev),
Adliya vazirligi (Davletov)

3.

Chet ellik jismoniy shaxslarga xorijiy investitsiyalar ishtirokidagi korxona muassisi (qatnashchisi) sifatida bevosita harakat qilish huquqini berish.

Oʻzbekiston Respublikasi Prezidenti Farmoni loyihasi

2018-yil
30-sentabrgacha

Adliya vazirligi (Davletov),

Iqtisodiyot vazirligi (Xodjayev),
LBMA (Sodiqov)

4.

Xorijiy investitsiyalar ulushining minimal miqdorini 15 foizgacha pasaytirish.

5.

Oʻzbekiston Respublikasi hududida xorijiy tijorat tashkilotlari vakolatxonalarini akkreditatsiya qilish va ularning faoliyat yuritish tartibini takomillashtirish, shu jumladan akkreditatsiya muddatini 5 yilgacha uzaytirish va akkreditatsiya uchun toʻlov haqini uch baravar kamaytirish.

Normativ-huquqiy hujjat loyihasi

2018-yil
30-sentabrgacha

Investitsiyalar boʻyicha davlat qoʻmitasi (Xolmurodov),
Moliya vazirligi (Haydarov),
TSV (Xoʻjayev),
SSP (Ikromov)

6.

Respublika hududlarining brendini yaratish hamda reklama (roliklar)ni yetakchi telekanallarda joylashtirish, festivallar va anjumanlarda, ijtimoiy tarmoqlarda namoyish etish, original shiorlarni ishlab chiqish yoʻli bilan ularni targʻib etishga qaratilgan “Yoʻl xaritasi”ni ishlab chiqish.

Vazirlar Mahkamasi qarori loyihasi

2018-yil
30-sentabrgacha

Investitsiyalar boʻyicha davlat qoʻmitasi (Xolmurodov),
Turizmni rivojlantirish davlat qoʻmitasi (Umarov),
LBMA (Sodiqov),
Iqtisodiyot vazirligi (Xodjayev),
TIV (Kamilov),
TSV (Xoʻjayev),
SSP (Ikromov)

7.

Hamkor mamlakatlarning biznes hamjamiyatlari ishtirokida mamlakatda amalga oshirilayotgan islohotlarning mohiyati va ahamiyatini yoritishga, shu jumladan investorlarni qonunchilikdagi oʻzgarishlar toʻgʻrisida xabardor qilishga qaratilgan jahon miqyosidagi anjumanlarni tashkil etish va oʻtkazish.

Tashkiliy

chora-tadbirlar

2018-yil
30-oktabrgacha

LBMA (Sodiqov), Investitsiyalar boʻyicha davlat qoʻmitasi (Xolmurodov),
TIV (Kamilov),
TSV (Xoʻjayev),
SSP (Ikromov)

8.

Hududlar boʻyicha alohida- alohida mahsulot eksportining prognoz koʻrsatkichlarini hisobga olish va uning statistikasini yuritish tartibini bekor qilish.

Mahsuloti eksport qilinayotgan hududlar:

eksport operatsiyalarining barcha qatnashchilarini, shu jumladan mahsulot ishlab chiqaruvchi va koʻmaklashuvchi organlarni;

jismoniy shaxslar tomonidan olib chiqib ketilayotgan mahsulot hajmlarini;

prognoz koʻrsatkichlari bajarilishi toʻgʻrisidagi hisobot bilan bogʻliq eksport operatsiyalariga salbiy taʼsir qiluvchi omillarni bartaraf etishni hisobga olgan holda eksport statistikasini yuritish tartibini tasdiqlash.

Normativ-huquqiy hujjat loyihasi

2018-yil
1-sentabrgacha

Davlat statistika qoʻmitasi (Begalov),
TSV (Xoʻjayev),
DBQ (Azimov)

9.

Intellektual mulk obyektiga boʻlgan huquqning ishonchli himoya qilinishini taʼminlash kafolatlarini kuchaytirish.

Normativ-huquqiy hujjat loyihasi

2018-yil
10-noyabrgacha

Adliya vazirligi (Davletov),
Intellektual mulk agentligi (Fayzullayev),
Bosh prokuratura (Saidkarimov)

10.

Konsessiya munosabatlarini rivojlantirish, shu jumladan konsessiyaviy bitim muddatini oshirish.

Qonun loyihasi

2018-yil
1-dekabrgacha

Iqtisodiyot vazirligi (Xodjayev),
LBMA (Sodiqov),

Davlat raqobat qoʻmitasi (Gʻulomov), Investitsiyalar boʻyicha davlat qoʻmitasi (Xolmurodov),
Moliya vazirligi (Haydarov)

11.

Xorijiy investorlar tomonidan mehnat faoliyatini amalga oshirish va xorijiy ishchi kuchini jalb etish sohasida ruxsatnomalar tartib-taomillaridan oʻtishni soddalashtirish.

Normativ-huquqiy hujjat loyihalari

2018-yil
30-sentabrgacha

Adliya vazirligi (Davletov),
Mehnat vazirligi (Qudbiyev),
IIV (Bobojonov),
DXX (Igamov),
Iqtisodiyot vazirligi (Xodjayev)

12.

Xususiy sektorda quyidagilarni nazarda tutuvchi mehnat qonunchiligini takomillashtirish:

muddatli mehnat shartnomalari tuzish asoslarini kengaytirish;

ishga qabul qilishning yangi shakllarini (bir martalik, soatbay), shuningdek, mehnatga soatbay haq toʻlash tartibini joriy etish;

ish beruvchining tashabbusi bilan mehnat shartnomasini, jumladan ogohlantirish muddatini qisqartirgan holda tugatish imkoniyatini kengaytirish.

Qonun loyihasi

2018-yil
15-noyabrgacha

Mehnat vazirligi (Kudbiyev),
Adliya vazirligi (Davletov),

Iqtisodiyot vazirligi (Xodjayev),
Moliya vazirligi (Haydarov)

13.

Soliq krediti institutini joriy etishning maqsadga muvofiqligi toʻgʻrisidagi masalani ishlab chiqish.

Tahliliy axborot

2018-yil
30-sentabrgacha

DSQ (Musayev),
Moliya vazirligi (Haydarov),

Iqtisodiyot vazirligi (Xodjayev),
LBMA (Sodiqov),
Investitsiyalar boʻyicha davlat qoʻmitasi (Xolmurodov)

14.

Investitsiya shartnomalarini tuzish va amalga oshirish tartibini takomillashtirish, bunda, shu jumladan, investitsiya shartnomalarini tuzish huquqini mahalliy ijro etuvchi hokimiyat organlariga topshirish, tartib-taomillarni optimallashtirish nazarda tutilsin.

Normativ-huquqiy hujjat loyihasi

2018-yil
20-oktabrgacha

Investitsiyalar boʻyicha davlat qoʻmitasi (Xolmurodov),
LBMA (Sodiqov),
Iqtisodiyot vazirligi (Xodjayev),
Adliya vazirligi (Davletov)

15.

Qonunchilikning barqarorligi va prognoz qilinishini taʼminlashga, shuningdek, huquqiy boshqarishning haddan ortiq yukini bartaraf etishga qaratilgan qonun ijodkorligi faoliyatining zamonaviy usullarini joriy etish.

Chora-tadbirlar kompleksi

2018-yil
30-noyabrgacha

Adliya vazirligi (Davletov),
Bosh prokuratura (Saidkarimov), Iqtisodiyot vazirligi (Xodjayev)

16.

Investitsiya kiritish shart-sharoitlarini yomonlashtiruvchi omil sifatida eʼtirof etiladigan holatlar roʻyxatini kengaytirish, ushbu holatlarni qonun darajasida nazarda tutib, kafolatni qoʻllash boʻyicha xulosa taqdim etadigan vakolatli organni belgilash.

Normativ-huquqiy hujjat loyihasi

2018-yil
1-dekabrgacha

Investitsiyalar boʻyicha davlat qoʻmitasi (Xolmurodov),
LBMA (Sodiqov),

Adliya vazirligi (Davletov),
Bosh prokuratura (Saidkarimov),
Iqtisodiyot vazirligi (Xodjayev)

17.

Buxgalteriya hisobining milliy standartlarini moliyaviy hisobotining xalqaro standartlari bilan uygʻunlashtirish choralarini koʻrish.

Chora-tadbirlar kompleksi

2018-yil
1-noyabrgacha

Moliya vazirligi (Qoʻchqorov),
DSQ (Musayev),
LBMA (Sodiqov)

18.

Yer uchastkalarini ijaraga berish tartibini ishlab chiqish va kiritish.

Vazirlar Mahkamasi qarori loyihasi

2018-yil
1-noyabrgacha

“Yergeodezkadastr” davlat qoʻmitasi (Abdullayev), Qurilish vazirligi (Toʻxtayev),
Adliya vazirligi (Davletov)

19.

Qishloq xoʻjaligi ahamiyatiga ega boʻlmagan yer uchastkalariga (birinchi bosqichda – binolarni yer uchastkalari bilan birga sotishda va koʻchmas mulk qurilishida) xususiy mulk huquqini bosqichma-bosqich joriy etib, ularni fuqarolik aylanmasiga tatbiq etishning huquqiy mexanizmlarini ishlab chiqish.

Normativ-huquqiy hujjatlar loyihalari

2018-yil
1-noyabrgacha

Adliya vazirligi (Davletov), “Yergeodezkadastr” davlat qoʻmitasi (Abdullayev)

20.

Valyuta mablagʻlari tushishini kechiktirishga yoʻl qoʻyganligi uchun tadbirkorlik subyektiga nisbatan jarima sanksiyalari qoʻllanilishini bekor qilish (davlat ishtirokidagi korxonalar bundan mustasno).

Vazirlar Mahkamasi qarori loyihasi

2018-yil
30-noyabrgacha

DSQ (Musayev),
Moliya vazirligi (Haydarov),
Hisob palatasi (Ikromov),
Bosh prokuratura (Saidkarimov)

21.

“Xalqaro tijorat arbitraji toʻgʻrisida”gi Qonun loyihasini ishlab chiqish.

Qonun loyihasi

2018-yil
30-avgustgacha

Vazirlar Mahkamasi (Xolmurodov),
SSP (Ikromov),
Iqtisodiyot vazirligi (Xodjayev),
Oliy sud (Dehqonov)

22.

Litsenziyalash va ruxsatnoma berish tartib-taomillaridan oʻtish tizimini tubdan isloh qilish, bunda quyidagilarni nazarda tutish:

tadbirkorlik sohasidagi faoliyatning ayrim turlarini litsenziyalash va ruxsatnoma berish tartib-taomillaridan oʻtish toʻgʻrisidagi qonunchilikni unifikatsiyalash, jumladan litsenziyalash va ruxsatnoma berish tartib-taomillariga nisbatan “Maʼmuriy tartib-taomillar toʻgʻrisida”gi Qonun normalarini qoʻllash;

yangi tizim doirasida past toifadagi xavf-xatarga mos keladigan alohida faoliyat turlari va harakatlarini amalga oshirish uchun xabardor qilish tartibini joriy etgan holda xavf-xatarlar toifalari asosida litsenziyalash va ruxsatnoma berish tartib-taomillaridan oʻtish tizimining yangi tasnifini tasdiqlash;

litsenziyalash va ruxsatnoma berish tartib-taomillaridan oʻtish tizimining investitsiya muhitiga taʼsirini baholash metodikasini tadbirkorlik subyektlari sarf-xarajatlarini baholashning standart modeli asosida ishlab chiqish.

Normativ-huquqiy hujjatlar loyihalari

2018-yil
1-dekabrgacha

LBMA (Sodiqov),
Adliya vazirligi (Davletov),
SSP (Ikromov)

23.

Birinchi navbatda qurilish va moliya sohalarida, shu jumladan 2018-2019-yillarda 5 tadan kam boʻlmagan obyektlarda aksiyalarni aholiga birlamchi (IPO) va ikkilamchi (SPO) ommaviy joylashtirishni oʻtkazish orqali xususiylashtirish jarayonlarini hamda aksiyadorlik kompaniyalariga xususiy kapitalni jalb etishni jadallashtirish;

oʻrnatiladigan tartibga muvofiq savdo tashkilotchilari davlat mulki obyektlarining narxini qadamba-qadam pasaytirib borish mexanizmini sotuvchi bilan kelishmasdan mustaqil ravishda qoʻllaydilar.

Vazirlar Mahkamasi qarori loyihasi

2018-yil
20-sentabrgacha

Davlat raqobat qoʻmitasi

(Gʻulomov),

Moliya vazirligi (Haydarov),

Iqtisodiyot vazirligi (Xodjayev)

24.

Taʼlim sohasiga, shu jumladan chet ellarning yetakchi oliy taʼlim muassasalari filiallarini ochish va masofaviy oʻqitish mexanizmlarini tatbiq etish;

yetakchi xorijiy oliy oʻquv yurtlarini litsenziyalashni bekor qilib, ular tomonidan berilgan diplomlarni qoʻshimcha tartib-taomillarsiz, shu jumladan akkreditatsiya qilmasdan eʼtirof etish orqali investitsiyalarni jalb etishga qaratilgan qonun hujjatlarini takomillashtirish.

Oʻzbekiston Respublikasi Prezidenti qarori loyihasi

2018-yil
10-noyabrgacha

OOʻMTV (Madjidov),
LBMA (Sodiqov),

Adliya vazirligi (Davletov)

Izoh: Ushbu Dasturda nazarda tutilgan chora-tadbirlarni amalga oshirishda ishlab chiqilayotgan hujjat shakli oʻzgartirilishi yoki ishlab chiqilayotgan hujjat boshqa bandlarda koʻzda tutilgan oʻzga hujjatlar bilan birlashtirilishi mumkin. Ikki va undan koʻproq hujjatlar birlashtirilganda tegishli bandlarni bajarish uchun belgilangan eng kech koʻrsatilgan muddat ularni ishlab chiqish muddati hisoblanadi.
 LexUZ sharhi
Ilova norasmiy tarjima.
(Qonun hujjatlari maʼlumotlari milliy bazasi, 02.08.2018-y., 06/18/5495/1611-son, 14.08.2019-y., 06/19/5780/3559-son, 14.12.2019-y., 06/19/5894/4161-son; Qonunchilik maʼlumotlari milliy bazasi, 30.04.2021-y., 06/21/6218/0398-son, 09.06.2021-y., 06/21/6243/0540-son, 30.12.2021-y., 06/21/42/1224-son; 20.06.2023-y., 06/23/99/0403-son; 27.04.2024-y., 06/24/67/0307-son; 17.10.2024-y., 06/24/159/0828-son)