|
Hujjat kuchini yo‘qotgan " " 24.03.2010
|
Oʻzbekiston Respublikasi Vazirlar Mahkamasining
qarori
BUDJETDAN TAShQARI PENSIYA JAMGʻARMASINI BOShQARIShNI YaNADA TAKOMILLAShTIRISh TOʻGʻRISIDA
LexUZ sharhiMazkur qaror Oʻzbekiston Respublikasi Vazirlar Mahkamasining 2010-yil 24-martdagi 52-sonli “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida” 2009-yil 30-dekabrdagi PF-4161-son Farmoni, Oʻzbekiston Respublikasi Prezidentining “Oʻzbekiston Respublikasi Mehnat va aholini ijtimoiy muhofaza qilish vazirligi tuzilmasini takomillashtirish chora-tadbirlari toʻgʻrisida” 2009-yil 30-dekabrdagi PQ—1251-son hamda Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tashkiliy tuzilmasini shakllantirish chora-tadbirlari toʻgʻrisida” 2009-yil 30-dekabrdagi PQ—1252-son qarorlari)”gi qaroriga asosan oʻz kuchini yoʻqotgan.
Ijtimoiy taʼminot tizimida davlat kafolatlarini amalga oshirish hamda pensiyalar, nafaqalar va kompensatsiyalarni toʻlashga yoʻnaltiriladigan mablagʻlarning maqsadli va aniq sarflanishi ustidan nazoratni kuchaytirish, shuningdek budjetdan tashqari Pensiya jamgʻarmasini samarali boshqarishni tashkil etish maqsadida Vazirlar Mahkamasi qaror qiladi:
1. 2005-yil 1-yanvardan boshlab Oʻzbekiston Respublikasining budjetdan tashqari Pensiya jamgʻarmasi Oʻzbekiston Respublikasi Moliya vazirligi huzuridagi Pensiya jamgʻarmasiga (keyingi oʻrinlarda Jamgʻarma deb ataladi) aylantirilsin.
2. Quyidagilar budjetdan tashqari Pensiya jamgʻarmasining asosiy vazifalari hisoblansin:
fuqarolarning davlat tomonidan kafolatlangan ijtimoiy taʼminot va ijtimoiy sugʻurtaga boʻlgan huquqlarini amalga oshirish;
majburiy ajratmalar, badallar va boshqa toʻlovlarni budjetdan tashqari Pensiya jamgʻarmasining yagona yigʻma hisob raqamida jamlash;
2005-yil 1-yanvardan boshlab pensiyalar, nafaqalar va kompensatsiyalarni toʻlash xarajatlarini moliyalashtirish;
budjetdan tashqari Pensiya jamgʻarmasiga mablagʻlarning toʻliq tushishi va oʻz vaqtida sarflanishi ustidan nazoratni taʼminlash.
Oldingi tahrirga qarang.
(3-band Oʻzbekiston Respublikasi Prezidentining 2009-yil 30-dekabrdagi PQ-1252-son qaroriga muvofiq oʻz kuchini yoʻqotgan — OʻR QHT, 2009-y., 52-son, 563-modda)
4. Belgilab qoʻyilsinki, quyidagilar budjetdan tashqari Pensiya jamgʻarmasini shakllantirishning asosiy manbalari hisoblanadi:
a) majburiy ajratmalar va badallar:
mulkchilik shakllaridan qatʼi nazar, yuridik shaxslar ish haqi fondidan yagona ijtimoiy toʻlovning belgilangan miqdori;
alohida yuridik shaxslardan ijtimoiy sugʻurtaga badallar;
yuridik shaxs boʻlmasdan tadbirkorlik faoliyati bilan shugʻullanuvchi jismoniy shaxslarning ijtimoiy sugʻurtaga badallari;
fuqarolarning ish haqidan sugʻurta badallari;
Oldingi tahrirga qarang.
yuridik shaxslarning tovar aylanmasi va sotilgan mahsulotlar (bajarilgan ishlar, koʻrsatilgan xizmatlar) hajmidan ajratmalari, qoʻshilgan qiymat soligʻi va aksiz soligʻi chiqarib tashlangan holda, shuningdek, kommunal xoʻjalik tizimi korxonalari uchun faoliyat xususiyatiga koʻra issiqlik energiyasi, suv va tabiiy gazning xarid qiymati hajmlari chiqarib tashlangan holda;
(4-band “a” kichik bandining oltinchi xatboshi Oʻzbekiston Respublikasi Vazirlar Mahkamasining 2005-yil 5-iyuldagi 155-son qarori tahririda — Oʻzbekiston Respublikasi Qonun hujjatlari toʻplami, 2005-y., 27-son, 190-modda)
b) boshqa toʻlovlar:
muddatidan oldin va imtiyozli pensiyalar tayinlanishi munosabati bilan qoplanadigan mablagʻlar, shuningdek “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq regress talablar (daʼvolar) boʻyicha ish beruvchilar va fuqarolardan undiriladigan mablagʻlar;
dehqon xoʻjaliklari aʼzolarining ixtiyoriy ravishda toʻlanadigan sugʻurta badallari;
majburiy ajratmalar, badallar va boshqa toʻlovlar oʻz vaqtida toʻlanmaganligi uchun belgilangan tartibda hisoblangan jarimalar va penya;
qonun hujjatlarida taqiqlanmagan boshqa manbalar.
Belgilab qoʻyilsinki, budjetdan tashqari Pensiya jamgʻarmasining vaqtincha boʻsh mablagʻlarini moliya bozorlarida joylashtirishdan foiz sifatida olinadigan daromadlarga soliq solinmaydi.
5. Belgilansinki:
budjetdan tashqari Pensiya jamgʻarmasiga majburiy ajratmalar, badallar va boshqa toʻlovlar miqdori hamda ularni toʻlash tartibi qonun hujjatlariga muvofiq belgilanadi;
budjetdan tashqari Pensiya jamgʻarmasiga majburiy ajratmalar, badallar va toʻlovlar davlat soliqlari va yigʻimlariga tenglashtiriladi;
budjetdan tashqari Pensiya jamgʻarmasining daromadlari va xarajatlari Oʻzbekiston Respublikasining yigʻma budjeti tarkibiga kiritiladi;
Oʻzbekiston Respublikasi Davlat soliq qoʻmitasi budjetdan tashqari Pensiya jamgʻarmasiga majburiy ajratmalar, badallar va toʻlovlarni yigʻish va ularning toʻliq tushishini nazorat qilish funksiyalarini amalga oshiradi;
Oʻzbekiston Respublikasi Mehnat va aholini ijtimoiy muhofaza qilish vazirligi pensiyalar, nafaqalar va kompensatsiyalarning oʻz vaqtida tayinlanishi va toʻlanishi, shuningdek korxonalar, tashkilotlar va muassasalarning davlat ijtimoiy sugʻurta boʻyicha xarajatlari belgilangan tartibda moliyalashtirilishi ustidan nazoratni taʼminlaydi.
6. Oʻzbekiston Respublikasi Mehnat va aholini ijtimoiy muhofaza qilish vazirligi:
Oʻzbekiston Respublikasi budjetdan tashqari Pensiya jamgʻarmasining barcha darajalardagi hisob raqamlaridagi 2004-yil 31-dekabrdagi holatiga koʻra qoldiq mablagʻlarning Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi hisob raqamiga oʻtkazilishini taʼminlasin;
Oʻzbekiston Respublikasi Moliya vazirligi va Markaziy banki bilan birgalikda pensiyalar va ijtimoiy nafaqalarni yetkazib berish mexanizmini takomillashtirish yuzasidan takliflarni bir oy muddatda ishlab chiqsin va joriy etsin.
7. Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.
Oʻzbekiston Respublikasi Adliya vazirligi, vazirliklar va idoralar bir oy muddatda amaldagi normativ hujjatlarga mazkur qarordan kelib chiqadigan oʻzgartirish va qoʻshimchalar kiritsinlar.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2004-yil 21-oktabr,
490-son
Oldingi tahrirga qarang.
(2-ilova Oʻzbekiston Respublikasi Prezidentining 2009-yil 30-dekabrdagi PQ-1252-son qaroriga muvofiq oʻz kuchini yoʻqotgan — OʻR QHT, 2009-y., 52-son, 563-modda)
Oldingi tahrirga qarang.
(3-ilova Oʻzbekiston Respublikasi Prezidentining 2009-yil 30-dekabrdagi PQ-1252-son qaroriga muvofiq oʻz kuchini yoʻqotgan — OʻR QHT, 2009-y., 52-son, 563-modda)
Oʻzbekiston Respublikasi Hukumatining oʻz kuchini yoʻqotgan qarorlari
1. Vazirlar Mahkamasining “Oʻzbekiston Respublikasi pensiya taʼminoti tizimini takomillashtirish chora-tadbirlari toʻgʻrisida” 2000-yil 15-noyabrdagi 444-son qarori (Oʻzbekiston Respublikasi QT, 2000-y., 11-son, 71-modda).
2. Vazirlar Mahkamasining “Budjetdan tashqari Pensiya jamgʻarmasi mablagʻlarini shakllantirish va sarflash tartibi toʻgʻrisidagi nizomni tasdiqlash haqida” 2000-yil 23-dekabrdagi 498-son qarori (Oʻzbekiston Respublikasi QT, 2000-y., 12-son, 80-modda).
3. Vazirlar Mahkamasining “Oʻzbekiston Respublikasi Mehnat va aholini ijtimoiy muhofaza qilish vazirligi hamda Tashqi mehnat migratsiyasi masalalari agentligi toʻgʻrisidagi nizomlarni tasdiqlash haqida” 2001-yil 6-apreldagi 162-son qaroriga 3-ilovaning 34 va 36-bandlari (Oʻzbekiston Respublikasi QT, 2001-y., 4-son, 21-modda).
(Oʻzbekiston Respublikasi qonun hujjatlari toʻplami 2004-y., 42-son, 447-modda; 2005-y., 5-6-son, 35-modda; 21-son, 154-modda; 27-son, 190-modda; 2006-y., 51-52-son, 507-modda; 2007-y., 52-son, 534-modda; 2009-y., 7-son, 69-modda, 52-son, 563-modda)
