Oʻzbekiston Respublikasi Prezidentining “Mahalliy eksport qiluvchi tashkilotlarni yanada qoʻllab-quvvatlash va tashqi iqtisodiy faoliyatni takomillashtirish chora-tadbirlari toʻgʻrisida” 2017-yil 21-iyundagi PQ-3077-son, “Tashqi savdo faoliyatini yanada erkinlashtirish va tadbirkorlik subyektlarini qoʻllab-quvvatlash chora-tadbirlari toʻgʻrisida” 2017-yil 3-noyabrdagi PQ-3351-son va “Meva-sabzavot mahsulotlari, uzum, poliz, dukkakli ekinlar, shuningdek, quritilgan sabzavot va mevalarni mahalliy eksport qiluvchilarni qoʻllab-quvvatlash boʻyicha qoʻshimcha chora-tadbirlar toʻgʻrisida” 2017-yil 6-noyabrdagi PQ-3377-son qarorlari ijrosini taʼminlash maqsadida Vazirlar Mahkamasi qaror qiladi:

1. Yangi uzilgan, quritilgan va qayta ishlangan meva-sabzavot mahsulotlarini eksport qilish tartibi toʻgʻrisidagi nizom 1-ilovaga muvofiq tasdiqlansin.

2. Oʻzbekiston Respublikasi Hukumatining ayrim qarorlariga 2-ilovaga muvofiq oʻzgartirish va qoʻshimchalar kiritilsin.

3. Oʻzbekiston Respublikasi Hukumatining ayrim qarorlari 3-ilovaga muvofiq oʻz kuchini yoʻqotgan deb hisoblansin.

4. Vazirliklar va idoralar bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — “Oʻzagrotexsanoatxolding” AJ boshqaruvi raisi N.S. Otajonov zimmasiga yuklansin.

1. Ushbu qaror Oʻzbekiston Respublikasi Prezidentining “Meva-sabzavot, uzum va poliz mahsulotlarini eksport qilishni ragʻbatlantirishga doir qoʻshimcha chora-tadbirlar toʻgʻrisida” 2016-yil 19-sentabrdagi PQ-2603-son, “Mahalliy eksport qiluvchi tashkilotlarni yanada qoʻllab-quvvatlash va tashqi iqtisodiy faoliyatni takomillashtirish chora-tadbirlari toʻgʻrisida” 2017-yil 21-iyundagi PQ-3077-son va “Meva-sabzavot mahsulotlari, uzum, poliz, dukkakli ekinlar, shuningdek, quritilgan sabzavot va mevalarni mahalliy eksport qiluvchilarni qoʻllab-quvvatlash boʻyicha qoʻshimcha chora-tadbirlar toʻgʻrisida” 2017-yil 6-noyabrdagi PQ-3377-son qarorlariga muvofiq yangi, quritilgan hamda qayta ishlangan meva-sabzavot mahsulotlarini eksport qilish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

meva-sabzavot mahsulotlari — sabzavotlar, mevalar, dukkakli, uzum va poliz ekinlari, quritilgan sabzavot va mevalar (TIF TN boʻyicha tovar kodi 07,08,1202);

yangi uzilgan meva-sabzavot mahsulotlari — sabzavotlar, mevalar, dukkakli, uzum va poliz ekinlari, quritilgan sabzavot va mevalar ushbu Nizomga 1-ilovaga* muvofiq roʻyxat boʻyicha;

quritilgan va qayta ishlangan meva-sabzavot mahsulotlari — ushbu Nizomga 1-ilovaga* muvofiq yangi uzilgan meva-sabzavot mahsulotlari roʻyxatiga kiritilmagan sabzavotlar, mevalar, dukkakli, uzum va poliz ekinlari;

eksport qiluvchilar — Oʻzbekiston Respublikasi norezidentlari bilan eksport kontraktlari (shartnomalari) tuzgan yoki eksport kontraktisiz (shartnomasisiz) invoys asosida eksport qiluvchi tadbirkorlik subyektlari — Oʻzbekiston Respublikasi rezidentlari;

invoys — meva-sabzavot mahsulotlarini eksport qilish uchun hisob-faktura;

eksport kontrakti — eksport qiluvchi va Oʻzbekiston Respublikasi norezidenti oʻrtasida meva-sabzavot mahsulotlarini eksport qilish uchun tuzilgan xoʻjalik shartnomasi.

3. Yangi uzilgan meva-sabzavot mahsulotlari joʻnatiladigan mahsulot qiymatining oldindan xorijiy valyutadagi 100 foiz toʻlovi eksport qiluvchilar tomonidan olinganda toʻgʻridan toʻgʻri shartnomalar boʻyicha eksport qilinadi.

Bunda “Oʻzagroeksport” AJga yangi uzilgan meva-sabzavot mahsulotlarini quyidagi shartlarda eksport qilishga ruxsat etiladi:

joʻnatiladigan meva-sabzavot mahsulotlari qiymatining oldindan kamida 30 foizi toʻlanganda, qolgan qismi uchun esa tasdiqlangan bank akkreditivi ochilganda yoki birinchi toifali xorijiy bank kafolati rasmiylashtirilganda;

“Oʻzagroeksport” AJning xorijda ochilgan savdo uylari, shuningdek, ishonchli va uzoq muddatli sheriklar hisoblangan yetakchi xorijiy import qiluvchi tashkilotlarga Oʻzbekiston Respublikasi Vazirlar Mahkamasi qarori bilan tasdiqlanadigan roʻyxat boʻyicha oldindan toʻlovsiz, tasdiqlangan bank akkreditivini ochmasdan yoki birinchi toifali xorijiy bank kafolatini rasmiylashtirmasdan.

Eksport qiluvchilar tashqi bozorlarga yangi uzilgan meva-sabzavot mahsulotlarini komissiyaning “Oʻzagroeksport” AJ bilan tuziladigan shartnomasi asosida ushbu bandning uchinchi va toʻrtinchi xatboshilarida qayd etilgan shartlar boʻyicha yetkazib berishi mumkin.

4. Eksport qiluvchilar, shu jumladan “Oʻzagroeksport” AJ quritilgan va qayta ishlangan meva-sabzavot mahsulotlarini oldindan toʻlovsiz, tasdiqlangan bank akkreditivini ochmasdan, bank kafolatini rasmiylashtirmasdan va eksport kontraktlarini siyosiy hamda tijorat tavakkalchiliklaridan sugʻurtalash polisisiz xorijiy valyutada eksport qilishi mumkin.

5. Eksport qiluvchining ilgari eksportga yetkazib berish boʻyicha muddati oʻtgan debitorlik qarzdorligi boʻlsa, tovarlarni faqat muddati oʻtgan debitorlik qarzdorligi mavjud boʻlgan xorijiy xaridor uchun olib chiqishiga ruxsat etilmaydi.

Tashqi savdo operatsiyalari boʻyicha muddati oʻtgan debitorlik qarzdorlik paydo boʻlishi uchun bevosita tadbirkorlik subyektlari javobgar boʻladi.

6. Eksport qiluvchilar eksport kontrakti (shartnomasi) tuzmasdan quyidagi shartlarga rioya qilgan holda invoys asosida meva-sabzavot mahsulotlarini eksport qilish huquqiga ega:

yetkazib berish summasi eksport bojxona yuk deklaratsiyasini rasmiylashtirish kunida Oʻzbekiston Respublikasi Markaziy banki kursi boʻyicha 20 ming AQSh dollari ekvivalentidan oshmasligi;

Oʻzbekiston Respublikasining vakolatli tijorat banklaridagi hisobvaraqlarga Oʻzbekiston Respublikasi norezidentlaridan xorijiy valyutada, shu jumladan bank oʻtkazmalari, xalqaro bank kartalari orqali toʻlovlar, shuningdek, tijorat banklarining ayirboshlash shoxobchalarida sotib olingan milliy valyutadagi naqd pul mablagʻlarini kiritish shaklida 100 foiz oldindan toʻlov olish.

7. Yuridik shaxslar meva-sabzavot mahsulotlarini keyinchalik eksport qilish uchun jismoniy shaxslardan sotib olganda, jismoniy shaxslardan olinadigan daromad soligʻi boʻyicha imtiyozlar jismoniy shaxslar tomonidan sotilgan mahsulotlar ularga yoki ularning oila aʼzolariga ajratilgan yer uchastkalarida yetishtirilganini tasdiqlovchi hujjatni taqdim etilmasdan qoʻllaniladi.

8. Eksport kontraktlari boʻyicha eksport qilingan meva-sabzavot mahsulotlarini belgilangan joygacha transportda tashish paytida ushbu Nizomga 2-ilovaga* muvofiq faktura qiymatiga tuzatishlar kiritish uchun qoʻllaniladigan Eksport qilingan yangi uzilgan meva-sabzavot mahsulotlari, uzum va poliz ekinlarining tabiiy yoʻqotishlari normativlari doirasida tabiiy yoʻqotishlar boʻlgan hollarda, eksport qiluvchi bu haqida Tashqi savdo operatsiyalarining yagona elektron axborot tizimiga (TSOYEA) axborot kiritadi.

Eksport qilingan meva-sabzavot mahsulotlarining tabiiy yoʻqotishlari mavjud boʻlganda, yoʻqotish summasi debitorlik qarzdorlik sifatida hisobga olinmaydi, balki eksport qiluvchi balansining xarajat qismida hisobga olinadi. Yoʻqotish summasi oldindan toʻlov sifatida eʼtirof etilganda, tabiiy yoʻqotishlar summasiga teng tovarlar eksport qiluvchi tomonidan TSOYEAga kiritilgan maʼlumotlar asosida yuklab joʻnatiladi.

Tabiiy yoʻqotishlar summasi yetkazib beriladigan mahsulot uchun faqat oldindan toʻlov sifatida olingan mablagʻlardan qaytarilishi mumkin. Tabiiy yoʻqotishlar summasi bank tomonidan eksport qiluvchi tabiiy yoʻqotishlar summasi toʻgʻrisida TSOYEAga kiritgan maʼlumotlar asosida qaytariladi.

Yangi uzilgan meva-sabzavot mahsulotlari oldindan toʻlov asosida eksport qilinganda, yetkazib berish natijasida yuzaga kelgan yoʻqotish summasi xorijiy sherikka qaytarilishi lozim yoki keyingi yetkazib berishlar uchun oldindan toʻlov deb hisoblanishi mumkin.

Bunda eksport bojxona yuk deklaratsiyasida qayd etilgan yangi uzilgan meva-sabzavot mahsulotlarining faktura qiymatiga tuzatishlar kiritilmaydi.

9. Eksport kontraktlari va ularni bajarishga nisbatan ushbu Nizomda nazarda tutilmagan talablar boʻyicha Oʻzbekiston Respublikasi Vazirlar Mahkamasining 2003-yil 30-sentabrdagi 416-son qarori bilan tasdiqlangan Tashqi savdo operatsiyalari ustidan monitoring olib borish tartibi toʻgʻrisidagi nizom va boshqa qonun hujjatlari talablari qoʻllaniladi.

10. Eksport kontraktlari Xalqaro meva-sabzavot yarmarkasining, muntazam faoliyat koʻrsatadigan meva-sabzavot maydoni yarmarka savdolari yakunlari boʻyicha yuzaga keladigan oʻrtacha narxlar hisobga olingan holda hamda jahon bozorlaridagi narxlar konyunkturasidan kelib chiqib, talab va takliflar asosida shakllanadigan bozor narxlari boʻyicha tuziladi.

11. “Oʻzagroeksport” AJ har hafta meva-sabzavot mahsulotlari uchun eksport narxlar darajasi toʻgʻrisidagi axborotni ommaviy axborot vositalari va oʻzining rasmiy veb-saytida eʼlon qiladi.

12. Eksport qilinadigan meva-sabzavot mahsulotlari bojxonada qonun hujjatlarida belgilangan tartibda eksport kontraktlarida qayd etilgan narxlardan past boʻlmagan narxlarda va ushbu Nizomning 3 — 5-bandlari talablariga muvofiq rasmiylashtiriladi.

Eksport bojxona yuk deklaratsiyasida tovarning faktura qiymati valyuta invoysida koʻrsatiladi. Tijorat banklari tomonidan TSOYEATga milliy valyutadagi naqd mablagʻlar toʻgʻrisida maʼlumotlar kiritilgan taqdirda, tovarlarning milliy valyuta ekvivalentidagi umumiy faktura qiymati bojxona yuk deklaratsiyasi qabul qilingan kunda Markaziy bank kursi boʻyicha TSOYEATda bojxona rasmiylashtiruvi uchun qayd etilgan summadan oshmasligi zarur.

13. Eksport kontraktlariga tijorat banklari qonun hujjatlarida belgilangan tartibda xizmat koʻrsatadi.

Tijorat banki tomonidan 1 kun davomida:

eksport qiluvchi zarur hujjatlarni qonun hujjatlarida belgilangan tartibda taqdim etgan paytdan unga xorijiy valyutada talab qilib olinadigan depozit hisob-raqami ochiladi;

tegishli axborot olingan paytdan TSOYEAga oldindan toʻlov, tasdiqlangan akkreditiv ochilgani yoki birinchi toifali xorijiy bank kafolati toʻgʻrisida axborot kiritiladi.

Mablagʻlar kelib tushgani toʻgʻrisidagi maʼlumotlar tijorat banklari tomonidan toʻlov valyutasida kiritiladi.

14. Tadbirkorlik subyektlari yangi uzilgan, quritilgan va qayta ishlangan meva-sabzavot mahsulotlarini ushbu Nizomga 3-ilovaga* muvofiq eksport qiladi.

15. Eksport qiluvchilar, tijorat banklari va davlat bojxona xizmati organlari TSOYEAga tegishli axborotning oʻz vaqtida kiritilishi va ishonchliligi uchun javob beradi.

16. Ushbu Nizom qoidalari buzilishida aybdor shaxslar qonun hujjatlarida belgilangan tartibda javob beradi.

1. Vazirlar Mahkamasining “Birjadan tashqari valyuta bozorini yanada rivojlantirish va mustahkamlash chora-tadbirlari toʻgʻrisida” 2000-yil 29-iyundagi 245-son qarorining 4-bandi (Oʻzbekiston Respublikasi QT, 2000-y., 6-son, 33-modda) quyidagi tahrirda bayon qilinsin:

“4. Shunday tartib oʻrnatilsinki, unga muvofiq:

a) eksport operatsiyalari boʻyicha tushum tushishi yoki tovarlarni qayta olib kirish muddati:

muassislar — Oʻzbekiston Respublikasi rezidentlari tomonidan chet eldagi tashkilotlarga (savdo uylari, savdo vakolatxonalari, shuʼba korxonalar, firma doʻkonlar, dilerlik shoxobchalari va konsignatsiya omborlari), shuningdek — Oʻzbekiston Respublikasi Savdo-sanoat palatasi aʼzolari — xoʻjalik yurituvchi subyektlar tomonidan Palataning savdo-investitsiya uylari nomiga olib chiqilayotgan tovarlar amalda eksport qilingan kundan boshlab 180 kundan;

qolgan eksport qiluvchilar uchun tovarlar, ishlar va xizmatlar amalda eksport qilingan kundan boshlab 120 kundan oshib ketmasligi kerak;

b) yengib boʻlmaydigan kuch (fors-major) taʼsiri yuzaga kelgan holatda xorijiy valyutadagi tushumning tushishi muddati ushbu taʼsir yuz bergan davlatning vakolatli organi tomonidan tasdiqlangan, yengib boʻlmaydigan kuchning amal qilishi davriga uzaytiriladi;

v) chet eldan xorijiy valyutadagi tushum tushishi kechiktirilishiga yoʻl qoʻygan eksport qiluvchilar, shuningdek, “erkin muomala uchun chiqarish” rejimida tovarlarni respublikaga olib kirish va rasmiylashtirishni, ishlarni bajarish va xizmatlar koʻrsatishni 30 bank kunidan ortiq taʼminlamagan import qiluvchilar (kichik biznes va xususiy tadbirkorlik subyektlari uchun — 60 bank kuni) belgilangan muddatlar tamom boʻlgandan keyin:

belgilangan muddatlardan 180 kungacha kechikkanda — tushmagan valyuta mablagʻlari yoki “erkin muomala uchun chiqarish” rejimida rasmiylashtirilmagan tovarlar (bajarilmagan ishlar, koʻrsatilmagan xizmatlar) summasining 10 foiziga teng miqdorda;

belgilangan muddatlardan 180 kundan 365 kungacha kechikkanda — tushmagan valyuta mablagʻlari summasining yoki “erkin muomala uchun chiqarish” rejimida rasmiylashtirilmagan tovarlar (bajarilmagan ishlar, koʻrsatilmagan xizmatlar) summasining 20 foiziga teng miqdorda qoʻshimcha;

belgilangan muddatlardan 365 kundan ortiq kechikkanda — tushmagan valyuta mablagʻlari summasining yoki “erkin muomala uchun chiqarish” rejimida rasmiylashtirilmagan tovarlar (bajarilmagan ishlar, koʻrsatilmagan xizmatlar) summasining 70 foiziga teng miqdorda respublika budjeti daromadiga qoʻshimcha jarima toʻlaydilar.

Ushbu qarorda belgilangan jarimalar qoʻllanilgan taqdirda, tashqi savdo operatsiyalari boʻyicha muddati oʻtkazib yuborilgan debitor qarzdorlik undirilishi muddatlaridan qatʼi nazar, ayni bir predmet boʻyicha qarzdorlik va tovarlar (ishlar, xizmatlar)ning amaldagi eksporti hajmi boʻyicha tadbirkorlik subyektlariga takroriy sanksiyalar qoʻllanilmaydi;

g) tashqi savdo kontraktining sugʻurta polisi boʻyicha sugʻurta qoplamasi summasi (milliy va (yoki) xorijiy valyutalarda) tadbirkorlik subyektlari hisob raqamiga tushganda ushbu tashqi savdo kontrakti boʻyicha debitor qarzdorlik summasi moliyaviy sanksiyalarni qoʻllash maqsadlari uchun tushgan sugʻurta qoplamasi summasiga kamaytiriladi”.

2. Vazirlar Mahkamasining 2003-yil 30-sentabrdagi 416-son qarori (Oʻzbekiston Respublikasi QT, 2003-y., 9-son, 92-modda) bilan tasdiqlangan Tashqi savdo operatsiyalari ustidan monitoring olib borish tartibi toʻgʻrisidagi Nizomda:

a) 2-bandga quyidagi mazmundagi xatboshi qoʻshilsin:

“invoys — tovarlar (ishlar va xizmatlar) eksportiga schyot-faktura;

b) II bobning nomiga “Tashqi savdo kontraktlariga” soʻzlaridan keyin “va invoys” soʻzlari qoʻshilsin;

v) quyidagi mazmundagi 4¹ band qoʻshilsin:

“4¹. Bojxona rasmiylashtiruvi maqsadlari uchun invoyslarda quyidagi asosiy maʼlumotlar boʻlishi kerak:

eksport qiluvchining (import qiluvchining) nomi va uning rekvizitlari;

invoys summasi;

eksport qiluvchining identifikatsiya raqami (STIR);

tovarlar (ishlar, xizmatlar) nomi;

tovarlar (ishlar, xizmatlar)ning oʻlchov birligi;

tovarlar (ishlar, xizmatlar) miqdori;

tovarlar (ishlar, xizmatlar) narxi;

tovarlar (ishlar, xizmatlar)ni yetkazib berish qiymati;

INKOTERMS boʻyicha yetkazib berish shartlari;

tashish turi.

Invoyslar eksport qiluvchining (mavjud boʻlganda) imzosi va muhri bilan tasdiqlanishi kerak;

g) 8-bandning uchinchi xatboshiga quyidagi mazmundagi jumla qoʻshilsin:

“Bunda maʼlumotnoma faqat Oʻzbekiston Respublikasi Prezidentining “Tashqi savdo faoliyatini yanada erkinlashtirish va tadbirkorlik subyektlarini qoʻllab-quvvatlash chora-tadbirlari toʻgʻrisida” 2017-yil 3-noyabrdagi PQ-3351-son qaroriga ilovada koʻrsatilgan yangi uzilgan meva-sabzavot mahsulotlari va xomashyo tovarlarini eksport qilishda (keyingi oʻrinlarda xomashyo tovarlari deb ataladi) va invoys asosida eksport qilishda rasmiylashtiriladi”;

d) 10-bandga quyidagi mazmundagi xatboshi qoʻshilsin:

“Bunda eksportga bojxona rasmiylashtiruvi, invoys asosida eksport qilinadigan xomashyo tovarlari va tovarlardan tashqari, TSOYEAga hisob-kitoblar toʻgʻrisidagi maʼlumotnomalarsiz amalga oshiriladi”;

e) quyidagi mazmundagi 12²-band qoʻshilsin:

“Eksport qiluvchilar tovarlar (xomashyo tovarlari bundan mustasno), ishlar va xizmatlar) eksportini toʻliq toʻlov ularning Oʻzbekiston Respublikasi tijorat banklaridagi hisob raqamiga tushgandan va ushbu axborot TSOYEATga kiritilgandan keyin eksport kontraktisiz invoys asosida amalga oshirish huquqiga ega boʻladilar.

Bunda yangi uzilgan meva-sabzavot mahsulotlari, uzum, poliz mahsulotlari, dukkakliklar, shuningdek, quritilgan sabzavotlar va mevalarni eksport qilish eksport bojxona deklaratsiyasi rasmiylashtirilgan kunda Oʻzbekiston Respublikasi Markaziy bankining kursi boʻyicha 20 ming AQSh dollariga teng boʻlgan miqdordan ortiq boʻlmagan summaga amalga oshiriladi”;

j) 14-band quyidagi tahrirda bayon qilinsin:

“14.Eksport operatsiyalari boʻyicha tushum tushishi yoki tovarlarni qayta olib kirish muddati:

muassislar — Oʻzbekiston Respublikasi rezidentlari tomonidan chet eldagi tashkilotlarga (savdo uylari, savdo vakolatxonalari, shuʼba korxonalar, firma doʻkonlar, dilerlik shoxobchalari va konsignatsiya omborlari), shuningdek — Oʻzbekiston Respublikasi Savdo-sanoat palatasi aʼzolari — xoʻjalik yurituvchi subyektlar tomonidan Palataning savdo-investitsiya uylari nomiga olib chiqilayotgan tovarlar amalda eksport qilingan kundan boshlab 180 kundan;

qolgan eksport qiluvchilar uchun tovarlar, ishlar va xizmatlar amalda eksport qilingan kundan boshlab 120 kundan oshib ketmasligi kerak.

Bunda yengib boʻlmaydigan kuch (fors-major) taʼsiri yuzaga kelgan holatda xorijiy valyutadagi tushumning tushishi muddati ushbu taʼsir yuz bergan davlatning vakolatli organi tomonidan tasdiqlangan, yengib boʻlmaydigan kuchning amal qilishi davriga uzaytiriladi”.

z) 17-band quyidagi tahrirda bayon qilinsin:

“17. Chet eldan xorijiy valyutadagi tushum tushishi kechiktirilishiga yoʻl qoʻygan eksport qiluvchilar, shuningdek, “erkin muomala uchun chiqarish” rejimida tovarlarni respublikaga olib kirish va rasmiylashtirishni, ishlarni bajarish va xizmatlar koʻrsatishni 30 bank kunidan ortiq taʼminlamagan import qiluvchilar (kichik biznes va xususiy tadbirkorlik subyektlari uchun — 60 bank kuni) belgilangan muddatlar tamom boʻlgandan keyin:

belgilangan muddatlardan 180 kungacha kechikkanda — tushmagan valyuta mablagʻlari yoki “erkin muomala uchun chiqarish” rejimida rasmiylashtirilmagan tovarlar (bajarilmagan ishlar, koʻrsatilmagan xizmatlar) summasining 10 foiziga teng miqdorda;

belgilangan muddatlardan 180 kundan 365 kungacha kechikkanda — tushmagan valyuta mablagʻlari yoki “erkin muomala uchun chiqarish” rejimida rasmiylashtirilmagan tovarlar (bajarilmagan ishlar, koʻrsatilmagan xizmatlar) summasining 20 foiziga teng miqdorda qoʻshimcha;

belgilangan muddatlardan 365 kundan ortiq kechikkanda — tushmagan valyuta mablagʻlari yoki “erkin muomala uchun chiqarish” rejimida rasmiylashtirilmagan tovarlar (bajarilmagan ishlar, koʻrsatilmagan xizmatlar) summasining 70 foiziga teng miqdorda respublika budjeti daromadiga qoʻshimcha jarima toʻlaydilar.

Ushbu Nizomda belgilangan jarima sanksiyalari qoʻllanilgan taqdirda, tashqi savdo operatsiyalari boʻyicha muddati oʻtkazib yuborilgan debitor qarzdorlik undirilishi muddatlaridan qatʼi nazar, ayni bir qarzdorlik predmeti va tovarlar (ishlar, xizmatlar)ning amaldagi eksporti hajmi boʻyicha eksport qiluvchiga takroriy sanksiyalar qoʻllanilmaydi.

Eksport kontraktining sugʻurta polisi boʻyicha sugʻurta qoplamasi summasi (milliy va (yoki) xorijiy valyutalarda) eksport qiluvchining hisob raqamiga tushganda, ushbu eksport kontrakti boʻyicha debitor qarzdorlik summasi moliyaviy sanksiyalarni qoʻllash maqsadlari uchun tushgan sugʻurta qoplamasi summasiga kamaytiriladi”;

i) 2-ilovaga quyidagi mazmundagi “g” band qoʻshilsin:

“g) invoys boʻyicha umumiy maʼlumot *:

eksport qiluvchining (import qiluvchining) nomi va uning rekvizitlari;

invoys summasi;

eksport qiluvchining identifikatsiya raqami (STIR);

tovarlar (ishlar, xizmatlar) nomi;

tovarlar (ishlar, xizmatlar)ning oʻlchov birligi;

tovarlar (ishlar, xizmatlar) miqdori;

tovarlar (ishlar, xizmatlar) narxi;

tovarlar (ishlar, xizmatlar)ni yetkazib berish qiymati;

INKOTERMS boʻyicha yetkazib berish shartlari;

tashish turi”.

3. Vazirlar Mahkamasining 2005-yil 9-avgustdagi 189-son qarori (Oʻzbekiston Respublikasi QT, 2005-y., 8-son, 40-modda) bilan tasdiqlangan Oʻzbekiston Respublikasining xoʻjalik yurituvchi subyektlari tomonidan xorijiy mamlakatlardagi ular tashkil etgan savdo uylari, vakolatxonalar, korxonalar orqali, shuningdek Oʻzbekiston Respublikasi savdo-sanoat palatasining xorijiy mamlakatlardagi savdo-investitsiya uylari orqali olib chiqilayotgan tovarlarni bojxonada rasmiylashtirish tartibi toʻgʻrisidagi Nizomning 5-bandi quyidagi tahrirda bayon qilinsin:

“5. Bojxona rasmiylashtiruvi kunidan boshlab 180 kun mobaynida eksport qiluvchi u tomonidan shartnomalar (kontraktlar) asosida chet eldagi korxonalar manziliga olib chiqib ketilgan tovarlar boʻyicha valyuta tushumi tushishini taʼminlashi, yoxud ushbu tovarlarni Oʻzbekiston Respublikasi hududiga qaytarishi kerak.

Bunda yengib boʻlmaydigan kuch (fors-major) taʼsiri yuzaga kelgan holatda xorijiy valyutadagi tushumning tushishi muddati ushbu taʼsir yuz bergan davlatning vakolatli organi tomonidan tasdiqlangan, yengib boʻlmaydigan kuchning amal qilishi davriga uzaytiriladi;

Chet eldan xorijiy valyutadagi tushum tushishi 30 bank kunidan ortiq (kichik biznes va xususiy tadbirkorlik subyektlari uchun — 60 bank kuni) kechiktirilishiga yoʻl qoʻygan eksport qiluvchiga belgilangan muddatlar tamom boʻlgandan keyin soliq organlari tomonidan:

valyuta tushumi tushishi belgilangan muddatlardan 180 kungacha kechikkanda — tushmagan valyuta mablagʻlari summasining 10 foiziga teng miqdorda;

valyuta tushumi tushishi belgilangan muddatlardan 180 kundan 365 kungacha kechikkanda — tushmagan valyuta mablagʻlari summasining 20 foiziga teng miqdorda qoʻshimcha;

valyuta tushumi tushishi belgilangan muddatlardan 365 kundan ortiq kechikkanda -tushmagan valyuta mablagʻlari summasining 70 foiziga teng miqdorda qoʻshimcha sanksiyalar qoʻllaniladi.

Chet eldan xorijiy valyutadagi tushum tushishi 30 bank kunidan ortiq (kichik biznes va xususiy tadbirkorlik subyektlari uchun — 60 bank kuni) kechiktirilishiga yoʻl qoʻygan eksport qiluvchiga belgilangan muddatlar tamom boʻlgandan keyin soliq organlari tomonidan:

Koʻrsatib oʻtilgan hujjatlar shartnomani (kontraktni) bojxona organida hisobdan chiqarish uchun asos hisoblanadi. Bunda eksport qiluvchiga moliyaviy sanksiyalar qoʻllanilmaydi.

Eksport kontraktining sugʻurta polisi boʻyicha sugʻurta qoplamasi summasi (milliy va (yoki) xorijiy valyutalarda) eksport qiluvchining hisob raqamiga tushganda ushbu eksport kontrakti boʻyicha debitor qarzdorlik summasi moliyaviy sanksiyalarni qoʻllash maqsadlari uchun tushgan sugʻurta qoplamasi summasiga kamaytiriladi”.

4. Vazirlar Mahkamasining “Oʻzbekiston Respublikasida tashqi savdo operatsiyalari monitoringini takomillashtirishga doir qoʻshimcha chora-tadbirlar toʻgʻrisida” 2014-yil 21-iyuldagi 199-son qarorining 2-bandi ikkinchi xatboshiga “tashqi savdo kontraktlari” soʻzlaridan keyin “va invoys” soʻzlari qoʻshilsin.

1. Vazirlar Mahkamasining “Tadbirkorlik subyektlari — importyorlar tomonidan Oʻzbekiston Respublikasining bojxona hududiga boj toʻlovlari boʻyicha imtiyozlar qoʻllangan holda olib kiriladigan tovarlarning bojxona qiymatini tasdiqlash tartibi toʻgʻrisidagi nizomni tasdiqlash haqida” 2013-yil 22-maydagi 139-son qarori (Oʻzbekiston Respublikasi QT, 2013-y., 5-son, 31-modda).

2. Vazirlar Mahkamasining 2015-yil 20-iyuldagi 197-son qarori (Oʻzbekiston Respublikasi QT, 2015-y., 7-son, 61-modda) bilan tasdiqlangan Eksport-import operatsiyalarini amalga oshirishda davlat bojxona xizmati organlariga taqdim etiladigan hujjatlar roʻyxati II boʻlimining 2-bandi.

3. Vazirlar Mahkamasining “Yangi va qayta ishlangan meva-sabzavot mahsulotlarini eksport qilish tartibi toʻgʻrisidagi nizomni tasdiqlash haqida” 2016-yil 15-iyundagi 207-son qarorining 1-moddasi (Oʻzbekiston Respublikasi QT, 2016-y., 6-son, 56-modda) va qarorga 1-ilova.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasining “Oʻzbekiston Respublikasining Bojxona kodeksini tasdiqlash toʻgʻrisida” 2016-yil 20-yanvardagi OʻRQ-400-son hamda “Oʻzbekiston Respublikasining Bojxona kodeksi qabul qilinishi munosabati bilan Oʻzbekiston Respublikasining ayrim qonun hujjatlariga oʻzgartishlar kiritish, shuningdek baʼzilarini oʻz kuchini yoʻqotgan deb topish toʻgʻrisida” 2016-yil 20-yanvardagi OʻRQ-401-son qonunlari)” 2016-yil 20-iyundagi 211-son qaroriga (Oʻzbekiston Respublikasi QT, 2016-y., 6-son, 59-modda) 1-ilovaning 20-bandi.

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Meva-sabzavot, uzum va poliz mahsulotlarini eksport qilishni ragʻbatlantirishga doir qoʻshimcha chora-tadbirlar toʻgʻrisida” 2016-yil 19-sentabrdagi PQ-2603-son qarori)” 2016-yil 14-noyabrdagi 385-son qaroriga (Oʻzbekiston Respublikasi QT, 2016-y., 11-son, 102-modda) ilovaning 3-bandi.