Oʻzbekiston Respublikasi Prezidentining
Qarori
Oldingi tahrirga qarang.
Oʻzbekiston davlat jismoniy tarbiya va sport universiteti faoliyatini yanada takomillashtirish chora-tadbirlari toʻgʻrisida
(qaror nomi Oʻzbekiston Respublikasi Prezidentining 2018-yil 5-iyundagi PF-5456-sonli Farmoni tahririda — Qonun hujjatlari maʼlumotlari milliy bazasi, 07.06.2018-y., 06/18/5456/1316-son)
Oʻzbekiston Respublikasi Prezidentining “Jismoniy tarbiya va ommaviy sportni yanada rivojlantirish chora-tadbirlari toʻgʻrisida” 2017-yil 3-iyundagi PQ-3031-son qarori ijrosini taʼminlash, respublikada jismoniy tarbiya va sport sohasida malakali kadrlar tayyorlash sifatini tubdan oshirish, Oʻzbekiston davlat jismoniy tarbiya instituti faoliyatini yanada takomillashtirish, oʻquv jarayonini zamonaviy talablar va xalqaro standartlarga muvofiq tashkil etish uchun zarur moddiy-texnik bazani yaratish maqsadida:
1. Oʻzbekiston Respublikasi Jismoniy tarbiya va sport davlat qoʻmitasi, Toshkent viloyati hokimligi, Oliy va oʻrta maxsus taʼlim vazirligi, Olmaliq konmetallurgiya kombinatining:
Oʻzbekiston davlat jismoniy tarbiya institutini Toshkent viloyati, Chirchiq shahri, Sportchilar koʻchasi, 19-uy va Chirchiq olimpiya zaxiralari kollejini Toshkent viloyati, Chirchiq shahri, Chirchiq 50 yillik koʻchasi, 14-uy manziliga joylashtirish;
Chirchiq shahar V. Xaydarov koʻchasi, 1-uyda joylashgan “Olmaliq konmetallurgiya kombinati” AJning bino va inshootlarini hamda istirohat bogʻini Oʻzbekiston davlat jismoniy tarbiya institutiga berish toʻgʻrisidagi takliflari maʼqullansin.
2. Oʻzbekiston davlat jismoniy tarbiya instituti hamda Chirchiq olimpiya zaxiralari kollejini qayta joylashtirish va faoliyatini tashkil etishni takomillashtirish bilan bogʻliq kompleks chora-tadbirlarni amalga oshirish boʻyicha komissiya tarkibi (keyingi oʻrinlarda Komissiya deb ataladi) ilovaga muvofiq tasdiqlansin.
Komissiya oʻn kun muddatda Oʻzbekiston davlat jismoniy tarbiya instituti hamda Chirchiq olimpiya zaxiralari kollejini qayta joylashtirish va faoliyatini tashkil etish boʻyicha kompleks chora-tadbirlar rejasini tasdiqlasin va amalga oshirilishini taʼminlasin.
Oldingi tahrirga qarang.
3. Oʻzbekiston davlat jismoniy tarbiya va sport universitetida 2017/2018 oʻquv yilidan boshlab taʼlimning sirtqi boʻlimi tashkil etilishiga rozilik berilsin.
(3-bandning birinchi xatboshisi Oʻzbekiston Respublikasi Prezidentining 2018-yil 5-iyundagi PF-5456-sonli Farmoni tahririda — Qonun hujjatlari maʼlumotlari milliy bazasi, 07.06.2018-y., 06/18/5456/1316-son)
Oʻzbekiston Respublikasi Oliy va oʻrta maxsus taʼlim vazirligi, Jismoniy tarbiya va sport davlat qoʻmitasi yangi oʻquv yili boshlangunga qadar Oʻzbekiston davlat jismoniy tarbiya institutida tashkil etiladigan taʼlimning sirtqi shakli boʻyicha oʻquv reja va dasturlarni ishlab chiqsin va amaliyotga joriy etsin.
4. Oʻzbekiston davlat jismoniy tarbiya institutida tahsil olayotgan sport turlari boʻyicha Oʻzbekiston milliy terma jamoasi aʼzolari, terma jamoa aʼzoligiga nomzodlarga ularning xohish-istaklariga koʻra oʻqish muddati hamda kursi saqlangan holda taʼlimning sirtqi shakliga oʻtkazishga ruxsat berilsin.
5. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Toshkent viloyati hokimligi, Jismoniy tarbiya va sport davlat qoʻmitasi oʻn kun muddatda:
Chirchiq olimpiya zaxiralari kollejiga tegishli Chirchiq shahar, Sportchilar koʻchasi, 19-uyda hamda Chirchiq shahar V. Xaydarov koʻchasi, 1-uyda joylashgan “Olmaliq kon-metallurgiya kombinati” AJning bino va inshootlarini hududlari bilan birgalikda hamda istirohat bogʻini bepul operativ boshqarish huquqi asosida Oʻzbekiston davlat jismoniy tarbiya institutiga;
Chirchiq sanoat-iqtisodiyot kasb-hunar kollejining Toshkent viloyati, Chirchiq shahri, Chirchiq 50 yillik koʻchasi, 14-uy manzilida joylashgan binolari va inshootlarini tegishli hududi bilan birgalikda bepul operativ boshqarish huquqi asosida Chirchiq olimpiya zaxiralari kollejiga berilishini taʼminlasin.
6. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Toshkent viloyati hokimligi Chirchiq sanoat-iqtisodiyot kasb-hunar kolleji faoliyati tugatilishini hamda kollej oʻquvchilari va pedagog kadrlarini Chirchiq shahridagi boshqa kasb-hunar kollejlariga yoʻnalishlari boʻyicha joylashtirilishini taʼminlasin.
Oldingi tahrirga qarang.
7. Oʻzbekiston Respublikasi Iqtisodiyot va moliya vazirligi Sport vazirligining asoslangan hisob-kitoblari asosida:
(7-bandning birinchi xatboshisi Oʻzbekiston Respublikasi Prezidentining 2024-yil 24-dekabrdagi PF-226-sonli Farmoni tahririda — Qonunchilik maʼlumotlari milliy bazasi, 25.12.2024-y., 06/24/226/1060-son)
Oʻzbekiston Respublikasi Moliya vazirligi huzuridagi budjetdan tashqari taʼlim va tibbiyot muassasalarining moddiy-texnika bazasini rivojlantirish jamgʻarmasi (keyingi oʻrinlarda Jamgʻarma deb ataladi) mablagʻlari hisobidan Oʻzbekiston davlat jismoniy tarbiya instituti hamda Chirchiq olimpiya zaxiralari kollejiga berilayotgan obyektlarni rekonstruksiya qilish va mukammal taʼmirlash maqsadida 2017-yilda loyiha-smeta hujjatlarini ishlab chiqish va qurilish-montaj ishlarini boshlash uchun zarur mablagʻlarni ajratsin;
Oldingi tahrirga qarang.
2018-yil va keyingi yillar Oʻzbekiston Respublikasi Investitsiya dasturini shakllantirishda Oʻzbekiston davlat jismoniy tarbiya va sport universiteti hamda Chirchiq ixtisoslashtirilgan olimpiya zaxiralari maktab-internati obyektlarini rekonstruksiya qilish, mukammal taʼmirlash, qoʻshimcha bino va inshootlar qurish hamda jihozlash uchun Jamgʻarmadan mablagʻlar ajratilishini nazarda tutsin.
(7-bandning uchinchi xatboshisi Oʻzbekiston Respublikasi Prezidentining 2018-yil 5-iyundagi PF-5456-sonli Farmoni tahririda — Qonun hujjatlari maʼlumotlari milliy bazasi, 07.06.2018-y., 06/18/5456/1316-son)
8. Oʻzbekiston davlat jismoniy tarbiya instituti hamda Chirchiq olimpiya zaxiralari kolleji uchun bino va inshootlarni qurish hamda ularga berilayotgan tegishli binolar va inshootlarni taʼmirlash va rekonstruksiya qilish boʻyicha:
Toshkent viloyati hokimligi huzuridagi “Yagona buyurtmachi xizmati” injiniring kompaniyasi — buyurtmachi etib;
“OʻzshaharsozlikLITI” AJ — bosh loyihachi tashkilot etib;
“Qurilishbirlashmasi” AJ — bosh pudratchi tashkilot etib belgilansin.
9. Toshkent viloyati hokimligi huzuridagi “Yagona buyurtmachi xizmati” injiniring kompaniyasiga 2017-yil 15-oktabrga kadar qurilish va jihozlash ishlari tugallanishini taʼminlagan, belgilangan shaharsozlik normalari va qoidalariga rioya etgan holda qurilish montaj ishlarini loyihalashtirish bilan bir vaqtda amalga oshirishga istisno tariqasida ruxsat berilsin.
10. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Jismoniy tarbiya va sport davlat qoʻmitasi bilan birgalikda Oʻzbekiston davlat jismoniy tarbiya institutini elektron taʼlim milliy tarmogʻiga ulash choralarini koʻrsin.
Oldingi tahrirga qarang.
11. Oʻzbekiston Respublikasi Yoshlar siyosati va sport vazirligi, Iqtisodiyot va moliya vazirligi Oʻzbekiston davlat jismoniy tarbiya va sport universitetining Toshkent shahridan qatnab ishlovchi professor-oʻqituvchilari va xodimlari hamda talabalarni borish-kelishi uchun tegishli shart-sharoitlar yaratsin.
(11-band Oʻzbekiston Respublikasi Prezidentining 2023-yil 12-iyundagi PF-92-sonli Farmoni tahririda — Qonunchilik maʼlumotlari milliy bazasi, 13.06.2023-y., 06/23/92/0366-son)
12. Mazkur qarorning bajarilishini nazorat qilish Oʻzbekiston Respublikasi Bosh vaziri A.N. Aripov, Jismoniy tarbiya va sport davlat qoʻmitasi raisi R.D. Qurbonov, Oliy va oʻrta maxsus taʼlim vaziri I.U. Madjidov va Toshkent viloyati hokimi Sh.X. Babayev zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2017-yil 10-avgust,
PQ-3197-son
Oʻzbekiston Respublikasi Prezidentining 2017-yil 10-avgustdagi PQ-3197-son qaroriga
ILOVA
ILOVA
Oʻzbekiston davlat jismoniy tarbiya instituti hamda Chirchiq olimpiya zaxiralari kollejini qayta joylashtirish va faoliyatini tashkil etishni takomillashtirish bilan bogʻliq kompleks chora-tadbirlarni amalga oshirish boʻyicha komissiya
TARKIBI
| Aripov A.N. | — | Oʻzbekiston Respublikasi Bosh vaziri, komissiya raisi |
| Qurbonov R.D. | — | Jismoniy tarbiya va sport davlat qoʻmitasi raisi |
| Babayev Sh.X. | — | Toshkent viloyati hokimi |
| Madjidov I.U. | — | oliy va oʻrta maxsus taʼlim vaziri |
| Saidova G.K. | — | iqtisodiyot vaziri |
| Xoʻjayev B.A. | — | moliya vaziri |
| Gulyamov R.A. | — | Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi |
| Zakirov B.I. | — | Davlat arxitektura va qurilish qoʻmitasi raisi |
| Xolmuxamedov M.M. | — | Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi direktori |
| Turdiyev F.K. | — | Jismoniy tarbiya va sport davlat qoʻmitasi raisi oʻrinbosari |
| Israilov Sh.X. | — | Oʻzbekiston davlat jismoniy tarbiya instituti rektori |
| Rashitov Q.B. | — | Chirchiq shahar hokimi |
| Akramov I.E | — | Chirchiq olimpiya zaxiralari kolleji direktori |
| Bayazitov K.F. | — | Vazirlar Mahkamasi Sogʻliqni saqlash, ekologiya, atrof muhitni muhofaza qilish, jismoniy tarbiya va sport masalalari axborot-tahlil departamentining shuʼba mudiri, komissiya kotibi |
(Oʻzbekiston Respublikasi qonun hujjatlari toʻplami, 2017-y., 32-son, 807-modda; Qonun hujjatlari maʼlumotlari milliy bazasi, 07.06.2018-y., 06/18/5456/1316-son; Qonunchilik maʼlumotlari milliy bazasi, 15.01.2022-y., 06/22/52/0029-son; 13.06.2023-y., 06/23/92/0366-son; 25.12.2024-y., 06/24/226/1060-son)
