Oʻzbekiston Respublikasi Prezidentining 2017-yil 16-fevraldagi PF-4958-son “Oliy oʻquv yurtidan keyingi taʼlim tizimini yanada takomillashtirish toʻgʻrisida”gi Farmoni hamda Oʻzbekiston Respublikasi Vazirlar Mahkamasining 2017-yil 22-maydagi 304-son “Oliy oʻquv yurtidan keyingi taʼlim tizimini yanada takomillashtirish chora-tadbirlari toʻgʻrisida”gi qaroriga asosan Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosati qaror qiladi:

1. Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosatining 2015-yil 20-martdagi 214/8-son “Doktorlik dissertatsiyasi va dissertatsiya avtoreferatini rasmiylashtirish qoidalarini tasdiqlash toʻgʻrisida”gi qaroriga (roʻyxat raqami 2665, 2015-yil 14-aprel) (Oʻzbekiston Respublikasi qonun hujjatlari toʻplami, 2015-y., 15-son, 185-modda) ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. Qarorning nomi va 1-bandidagi “Doktorlik dissertatsiyasi” degan soʻzlar “Dissertatsiya” degan soʻz bilan almashtirilsin.

2. Qoidalarda:

a) nomidagi, 2-bobning ikkinchi paragrafi nomidagi, 3-bobning nomidagi, 3-bobning birinchi paragrafi nomidagi hamda 3-bobning ikkinchi paragrafi nomidagi “Doktorlik dissertatsiyasi” degan soʻzlar “Dissertatsiya” degan soʻz bilan almashtirilsin.

b) muqaddima quyidagi tahrirda bayon etilsin:

“Mazkur Qoidalar Oʻzbekiston Respublikasi Prezidentining 2017-yil 16-fevraldagi PF–4958-son “Oliy oʻquv yurtidan keyingi taʼlim tizimini yanada takomillashtirish toʻgʻrisida”gi Farmoniga hamda Oʻzbekiston Respublikasi Vazirlar Mahkamasining 2012-yil 28-dekabrdagi 365-son “Oliy oʻquv yurtidan keyingi taʼlim hamda oliy malakali ilmiy va ilmiy-pedagog kadrlarni attestatsiyadan oʻtkazish tizimini takomillashtirish chora-tadbirlari toʻgʻrisida”gi va 2017-yil 22-maydagi 304-son “Oliy oʻquv yurtidan keyingi taʼlim tizimini yanada takomillashtirish chora-tadbirlari toʻgʻrisida”gi qarorlariga muvofiq falsafa doktori (Doctor of Philosophy) hamda fan doktori (Doctor of Science) dissertatsiyasi (bundan buyon matnda dissertatsiya deb yuritiladi) va dissertatsiya avtoreferatini rasmiylashtirish qoidalarini belgilaydi.”;

v) 1-bandda:

birinchi xatboshidagi “Doktorlik dissertatsiyani” degan soʻzlar “Dissertatsiyani” degan soʻz bilan almashtirilsin;

oltinchi xatboshidan “va dissertatsiyaga kiritilishi” degan soʻzlar chiqarib tashlansin;

g) 2-bandda:

“Doktorlik dissertatsiyasi” degan soʻzlar “Dissertatsiyani” degan soʻz bilan almashtirilsin;

“natijalari” degan soʻz chiqarib tashlansin;

d) 2-bobning nomida “Doktorlik dissertatsiyasini” degan soʻzlar “Dissertatsiyani” degan soʻz bilan almashtirilsin;

e) 2-bobning birinchi paragrafi nomidagi “Doktorlik dissertatsiyasiga” degan soʻzlar “Dissertatsiyaga” degan soʻz bilan almashtirilsin;

j) 3-banddagi “Dissertatsiyani rasmiylashtirish katta ilmiy xodim-izlanuvchi va mustaqil izlanuvchining tanlovi boʻyicha” degan soʻzlar “Dissertatsiyani rasmiylashtirish doktorant yoki mustaqil izlanuvchining xohishiga koʻra” degan soʻzlar bilan almashtirilsin;

z) 4-banddagi “1-ilovasiga” degan soʻzlar “1 va 1a-ilovalariga” degan soʻzlar bilan almashtirilsin;

i) 5-bandning uchinchi xatboshisidagi hamda 35-bandning ikkinchi xatboshisidagi “doktorlik dissertatsiyasi” degan soʻzlar “dissertatsiya” degan soʻz bilan almashtirilsin;

k) 8-band quyidagi tahrirda bayon etilsin:

“8. Dissertatsiyaning kirish qismida quyidagilar yoritib berilishi kerak:

dissertatsiya mavzusining dolzarbligi va zarurati;

tadqiqotning respublika fan va texnologiyalari rivojlanishining ustuvor yoʻnalishlariga mosligi;

dissertatsiya mavzusi boʻyicha xorijiy ilmiy tadqiqotlar sharhi (faqat fan doktori (Doctor of Science) dissertatsiyasi uchun);

muammoning oʻrganilganlik darajasi;

dissertatsiya tadqiqotining dissertatsiya bajarilgan oliy taʼlim yoki ilmiy-tadqiqot muassasasining ilmiy-tadqiqot ishlari rejalari bilan bogʻliqligi;

tadqiqotning maqsadi;

tadqiqotning vazifalari;

tadqiqotning obyekti;

tadqiqotning predmeti;

tadqiqotning usullari;

tadqiqotning ilmiy yangiligi;

tadqiqotning amaliy natijalari;

tadqiqot natijalarining ishonchliligi;

tadqiqot natijalarining ilmiy va amaliy ahamiyati;

tadqiqot natijalarining joriy qilinishi;

tadqiqot natijalarining aprobatsiyasi;

tadqiqot natijalarining eʼlon qilinganligi;

dissertatsiyaning tuzilishi va hajmi.”;

l) 10-band quyidagi tahrirda bayon etilsin:

“10. Falsafa doktori (Doctor of Philosophy) dissertatsiyasining asosiy qismi kamida uchta bobdan, fan doktori (Doctor of Science) dissertatsiyasining asosiy qismi esa, kamida toʻrtta bobdan iborat boʻlishi lozim.”;

m) 17-band quyidagi tahrirda bayon etilsin:

“17. Falsafa doktori (Doctor of Philosophy) dissertatsiyasining hajmi 60 varaqdan, fan doktori (Doctor of Science) dissertatsiyasining hajmi esa, 100 varaqdan oshmasligi kerak (matn varaqning old va orqa tomoniga yoziladi). Ijtimoiy-gumanitar fanlar yoʻnalishidagi dissertatsiya hajmi koʻpi bilan 30 foizga oshirilishi mumkin. Mundarija, foydalanilgan adabiyotlar roʻyxati, shartli belgilar va atamalar roʻyxati hamda ilovalar koʻrsatilgan hajmga kiritilmaydi.”;

n) 18-bandning birinchi xatboshisi quyidagi tahrirda bayon etilsin:

“Dissertatsiya matni A4 formatdagi standart qogʻoz varagʻining ikki tomonida joylashishi va qoida tariqasida, 1,5 qator oraligʻida (“polutorniy”) yozilishi lozim. Har bir bet: yuqoridan va pastdan 2 sm; chapdan 3 sm; oʻngdan 1,5 sm hoshiyaga ega; xatboshi 1,27 sm ga teng va bir xilda boʻlishi lozim.”;

o) 23-banddagi “havola qilinganda,” degan soʻzlar “havola satr osti eslatmalarda keltiriladi yoki” degan soʻzlar bilan almashtirilsin;

p) 26-banddagi “mumkin” degan soʻz “lozim” degan soʻz bilan almashtirilsin;

r) 32-banddagi “2-ilovasiga” degan soʻzlar “2 va 2a-ilovalariga” degan soʻzlar bilan almashtirilsin;

s) 34-banddagi “3-ilovasiga” degan soʻzlar “3 va 3a-ilovalariga” degan soʻzlar bilan almashtirilsin;

t) 40-banddagi “doktorlik dissertatsiyalarining” degan soʻzlar “dissertatsiyalarning” degan soʻz bilan almashtirilsin;

u) 42 va 43-bandlar quyidagi tahrirda bayon etilsin:

“42. Falsafa doktori (Doctor of Philosophy) dissertatsiyasi avtoreferati oʻzbek va rus yoki ingliz tillarida 2 bosma taboq, har bir tilda 1 bosma taboq hajmda tayyorlanib, uning uchinchi tildagi (rus yoki ingliz) qisqacha mazmuni ham beriladi.

Fan doktori (Doctor of Science) dissertatsiyasi avtoreferati oʻzbek va rus yoki ingliz tillarida 3 bosma taboq (har bir tilda 1,5 bosma taboq) hajmda tayyorlanib, uning uchinchi tildagi (rus yoki ingliz) qisqacha mazmuni ham beriladi.

Ijtimoiy-gumanitar fanlar sohasidagi dissertatsiya avtoreferatining hajmi koʻpi bilan 30 foizga oshirilishi mumkin.

43. Dissertatsiya avtoreferati quyidagi texnik talablarga muvofiq tayyorlanadi va risola shaklida chop etiladi:

matn A4 formatdagi standart qogʻoz varagʻining bir tomonida joylashtiriladi;

matn 1 qator oraligʻida (“odinarniy”) yozilishi lozim. Har bir bet: yuqoridan va pastdan 2 sm; chapdan 3 sm; oʻngdan 1,5 sm hoshiyaga ega; xatboshi 1 sm ga teng va bir xilda boʻladi;

risolaning oʻlchami 21 x 14,5 sm boʻladi.”;

f) 1-ilova mazkur oʻzgartirish va qoʻshimchalarning 1-ilovasiga muvofiq tahrirda bayon etilsin;

x) mazkur oʻzgartirish va qoʻshimchalarning 2-ilovasiga muvofiq tahrirda 1a-ilova bilan toʻldirilsin;

ch) 2-ilova mazkur oʻzgartirish va qoʻshimchalarning 3-ilovasiga muvofiq tahrirda bayon etilsin;

sh) mazkur oʻzgartirish va qoʻshimchalarning 4-ilovasiga muvofiq tahrirda 2a-ilova bilan toʻldirilsin;

e) 3-ilova mazkur oʻzgartirish va qoʻshimchalarning 5-ilovasiga muvofiq tahrirda bayon etilsin;

yu) mazkur oʻzgartirish va qoʻshimchalarning 6-ilovasiga muvofiq tahrirda 3a-ilova bilan toʻldirilsin.

3. Mazkur oʻzgartirish va qoʻshimchalar Oʻzbekiston Respublikasi Qishloq va suv xoʻjaligi vazirligi, Oliy va oʻrta maxsus taʼlim vazirligi, Xalq taʼlimi vazirligi, Tashqi ishlar vazirligi, Sogʻliqni saqlash vazirligi, Madaniyat vazirligi, Fanlar akademiyasi, Jismoniy tarbiya va sport davlat qoʻmitasi hamda Fan va texnologiyalar agentligi bilan kelishilgan.