Oʻzbekiston Respublikasi Prezidentining “Oliy taʼlim tizimini yanada rivojlantirish chora-tadbirlari toʻgʻrisida” 2017-yil 20-apreldagi PQ-2909-son qarorini ijro etish hamda mamlakatimizda kadrlar tayyorlash tizimini yanada takomillashtirish, iqtisodiyot va ijtimoiy soha tarmoqlarini yuqori malakali mutaxassislar bilan taʼminlash, bakalavr va magistrlarni tayyorlashda ish beruvchilarning joriy va istiqboldagi extiyojlarini inobatga olgan holda son va taʼlim yoʻnalishlari uygʻunligiga erishish, oliy taʼlim muassasalari bitiruvchilari mehnatidan foydalanishni yaxshilash, shuningdek, iqtisodiyotda tarkibiy oʻzgartirishlarni amalga oshirishning oʻrtacha muddatga moʻljallangan maqsadli dasturlarini joriy etish, tarmoqlarni modernizatsiya qilish, texnik va texnologik qayta jihozlash va diversifikatsiyalash, hududlarni kompleks ijtimoiy-iqtisodiy rivojlantirish maqsadida Oʻzbekiston Respublikasi Prezidentining “2017/2018 oʻquv yilida Oʻzbekiston Respublikasining oliy taʼlim muassasalariga oʻqishga qabul qilish toʻgʻrisida”gi qarori qabul qilindi.

Ushbu qarorga binoan hamda mamlakatimizda yangi qurilayotgan korxonalarning hududiy joylashuvi, iqtisodiyotdagi tarkibiy oʻzgartirishlar boʻyicha dasturiy chora-tadbirlarni amalga oshirish, ishlab chiqarishni modernizatsiyalash, texnik qayta jihozlash va diversifikatsiyalashning investitsiyaviy loyihalari, yoʻl-transport hamda kommunikatsiya infratuzilmasi tahliliga muvofiq, 2017/2018 oʻquv yili uchun oliy taʼlim muassasalariga oʻqishga qabul boʻyicha umumiy kvota bakalavrlar uchun 66316 nafar, shu jumladan, davlat grantlari boʻyicha 18194 ta va toʻlov-kontrakt asosida 48122 ta, magistrlar uchun 5000 nafar, shu jumladan, davlat grantlari boʻyicha 1556 ta va toʻlov-kontrakt asosida 3444 ta etib belgilandi.

Shuningdek, ushbu hujjatda maxsus sirtqi boʻlim negizida ishlab chiqarishdan ajralmagan holda bilim olishni taʼminlash maqsadida Toshkent axborot texnologiyalari universitetining maxsus sirtqi boʻlimida 100 nafar, shu jumladan, davlat grantlari boʻ�icha 15 ta va toʻlov-kontrakt asosida 85 ta, Navoiy davlat konchilik institutida toʻlov-kontrakt asosida 90 nafar va Toshkent temir yoʻl muhandislari institutida toʻlov-kontrakt asosida 80 nafar bakalavrni tayyorlash nazarda tutilgan.

Bundan tashqari, ushbu qaror bilan 2017/2018 oʻquv yilidan boshlab Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari buyurtmalariga binoan yuqori malakali tibbiyot kadrlariga ehtiyoj katta boʻlgan hududlar uchun Oʻzbekiston Respublikasining tibbiyot oliy taʼlim muassasalariga davlat grantlari asosida bakalavriat yoʻnalishi boʻyicha mutaxassislarni tayyorlashning maqsadli qabul kvotalari tasdiqlandi.

Qaror bilan Oʻzbekiston Respublikasining taʼlim muassasalariga oʻqishga qabul qilish boʻyicha Davlat komissiyasining yangi tarkibi tasdiqlandi va unga quyidagi huquqlar berildi:

bakalavriat yoʻnalishlari va magistratura mutaxassisliklari boʻyicha oliy taʼlim muassasalariga oʻqishga kirish chogʻida abituriyentlar toʻplagan ballarning reyting bahosini hisobga olgan holda oliy taʼlim muassasalarining bakalavriat va magistratura boʻlimlari qabul parametrlariga oʻzgartishlar kiritish;

yangi yoʻnalishlar va mutaxassisliklarni kiritish uchun bakalavriat va magistraturaning qabul kvotalariga oʻzgartishlar kiritish;

iqtisodiyot tarmoqlari, jumladan, respublikaning olis va borish qiyin boʻlgan hududlari uchun mutaxassislarga boʻlgan oʻrinli ehtiyojlarni qondirish maqsadida oliy taʼlim muassasalarining bakalavriat va magistraturasiga tegishli tarmoqlar va hududlar boʻyicha maqsadli qabul koʻrsatkichlarini belgilash.

Shuningdek, 2017/2018 oʻquv yilidan boshlab oliy taʼlim muassasalariga toʻlov-kontrakt pulining oshirilgan stavkasi boʻyicha qoʻshimcha qabulni amalga oshirish joriy etilmoqda. Bunda:

oliy taʼlim muassasalariga toʻlov-kontrakt pulining oshirilgan stavkasi boʻyicha qoʻshimcha qabulni amalga oshirish uchun kvota miqdori taʼlim muassasasining mavjud imkoniyatlari va taʼlim yoʻnalishlaridan kelib chiqib Davlat komissiyasi tomonidan belgilanishi;

qoʻshimcha qabul boʻyicha toʻlov-kontrakt pulining oshirilgan stavkasi abituriyentlar toʻplagan ballarga qarab Davlat komissiyasi tomonidan differensiyalashgan tartibda belgilanishi;

toʻlov-kontrakt pulining oshirilgan stavkasi boʻyicha qoʻshimcha qabul oʻtish ballini toʻplay olmagan abituriyentlarga toʻplagan balliga muvofiq (68 balldan kam boʻlmagan) ketma-ketlik tartibi qatʼiy saqlangan holda, ularning oshirilgan kontrakt pulini toʻlay olish imkoniyatidan kelib chiqib amalga oshirilishi belgilab qoʻyildi.

Qarorning yana bir muhim jihati shundaki, kadrlarni maqsadli tayyorlashning asosiy buyurtmachilari hisoblangan Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, vazirlik va idoralarga oliy taʼlim muassasalari bitiruvchilarining ular oʻqib egallagan kasbiga va tuzgan shartnomalariga muvofiq ish bilan bandligini taʼminlash, jumladan, respublikaning olis va borish qiyin boʻlgan hududlariga ishga yoʻllanma olgan oliy taʼlim muassasalari bitiruvchilari uchun munosib mehnat va ijtimoiy-maishiy shart-sharoitlar yaratish yuzasidan javobgarlik yuklangan.

Qisqacha aytganda, ushbu qarorda belgilab berilgan maqsad va vazifalar yuqori malakali mutaxassislarni tayyorlashga xizmat qiladi, 2017 — 2021-yillarga moʻljallangan Oʻzbekiston Respublikasining strategik rivojlanishining beshta ustuvor yoʻnalishi doirasida olib borilayotgan islohotlarni izchil amalga oshirishga zamin yaratadi.