Tashqi bozorlarda talab katta boʻlgan, yuqori qoʻshilgan qiymatli raqobatbardosh mahsulotlar ishlab chiqarishni taʼminlaydigan mineral-xomashyo va qishloq xoʻjaligi resurslarini chuqur qayta ishlash boʻyicha zamonaviy ishlab chiqarishlarni tashkil etishga xorijiy va mahalliy investitsiyalarni jalb etish uchun qulay sharoitlarni yaratish, shuningdek, Samarqand, Buxoro, Fargʻona va Xorazm viloyatlarining ishlab chiqarish hamda resurs salohiyatidan kompleks va samarali foydalanish, shu asosda yangi ish oʻrinlari tashkil etish hamda aholi daromadlarini oshirish maqsadida:

1. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Moliya vazirligining, Samarqand, Buxoro, Fargʻona va Xorazm viloyatlari hokimliklarining Samarqand viloyati Urgut tumanida — “Urgut”, Buxoro viloyati Gʻijduvon tumanida — “Gʻijduvon”, Fargʻona viloyati Qoʻqon shahrida — “Qoʻqon”, Xorazm viloyati Hazorasp tumanida — “Hazorasp” erkin iqtisodiy zonalarini (keyingi oʻrinlarda “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZ deb ataladi) tashkil etish toʻgʻrisidagi taklifi qabul qilinsin.

2. Samarqand, Buxoro, Fargʻona va Xorazm viloyatlari hokimliklari Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Davlat arxitektura va qurilish qoʻmitasi bilan birgalikda bir oy muddatda “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZ tarkibiga kiritish uchun yer uchastkalari chegaralarini oʻrnatsinlar va ularning belgilangan tartibda ajratilishini taʼminlasinlar.

3. Quyidagilar “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZning asosiy vazifalari va faoliyati yoʻnalishlari etib belgilansin:

tashqi bozorlarda talab katta boʻlgan va importning oʻrnini bosuvchi, yuqori qoʻshilgan qiymatli mahsulotlar ishlab chiqarish boʻyicha zamonaviy ishlab chiqarishlarni tashkil etish uchun xorijiy va mahalliy investorlarning toʻgʻridan-toʻgʻri investitsiyalarini jalb etish;

Samarqand, Buxoro, Fargʻona va Xorazm viloyatlarining ishlab chiqarish va resurs salohiyatlaridan kompleks hamda samarali foydalanishni taʼminlash;

meva-sabzavot va qishloq xoʻjaligi mahsulotlarini chuqur qayta ishlash, saqlash va qadoqlash, toʻqimachilik, gilam toʻqish, poyabzal va charm-galantereya, ekologik jihatdan xavfsiz kimyo, farmatsevtika, oziq-ovqat, elektrotexnika sanoati, mashinasozlik va avtomobilsozlik, qurilish materiallari ishlab chiqarish va boshqa yoʻnalishlarda yangi zamonaviy ishlab chiqarishlarni tashkil etish;

mahalliy xomashyo va materiallar negizida mustahkam kooperatsiya aloqalarini oʻrnatish hamda erkin iqtisodiy zonalar korxonalari oʻrtasida va umuman respublikada sanoat kooperatsiyasini rivojlantirish asosida yuqori texnologiyali mahsulotlar ishlab chiqarishni mahalliylashtirish jarayonlarini chuqurlashtirish;

ishlab chiqarilayotgan mahsulotlarni standartlashtirish, sertifikatlashtirish va markirovka qilish boʻyicha xalqaro standartlarga muvofiq ilmiy-ishlab chiqarish markazlari tashkil etish va ularning qarorlari xalqaro darajada eʼtirof etilishini taʼminlash chora-tadbirlarini koʻrish.

4. Belgilab qoʻyilsinki:

“Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZning faoliyat koʻrsatish muddati, keyinchalik uni uzaytirish imkoniyati bilan 30 yilni tashkil qiladi;

faoliyat koʻrsatish muddati mobaynida “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZ hududlarida alohida soliq, bojxona va valyuta rejimi amal qiladi.

6. “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZ qatnashchilariga Oʻzbekiston Respublikasi Prezidentining “Erkin iqtisodiy zonalar faoliyatini faollashtirish va kengaytirishga doir qoʻshimcha chora-tadbirlar toʻgʻrisida” 2016-yil 26-oktabrdagi PF-4853-sonli Farmonining 3-, 4- va 5-bandlari qoidalari tatbiq etilsin.

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi, Davlat bojxona qoʻmitasi va Davlat soliq qoʻmitasi Moliya vazirligi bilan birgalikda bir oy muddatda Oʻzbekiston Respublikasi Vazirlar Mahkamasiga Oʻzbekiston Respublikasi Prezidentining 2016-yil 26-oktabrdagi PF-4853-sonli Farmonining 3-, 4- va 5-bandlarida nazarda tutilgan bojxona toʻlovlari, soliqlar va majburiy toʻlovlar boʻyicha imtiyozlarni qoʻllashning soddalashtirilgan tartibini tasdiqlash uchun kiritsinlar.

7. Oʻzbekiston Respublikasi Vazirlar Mahkamasi bir oy muddatda “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZ direksiyalarini tashkil qilsin hamda “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZ direksiyalarining ustavlarini va Erkin iqtisodiy zonalar toʻgʻrisidagi yagona Nizomni tasdiqlagan holda, ular faoliyatini tashkil etish yuzasidan qaror qabul qilsin.

Belgilansinki, erkin iqtisodiy zonalar direksiyalari elektron onlayn-auksion savdolarida gʻolib boʻlgan investorlarning erkin iqtisodiy zonalarning tasdiqlangan bosh rejalariga muvofiq maʼqullangan investitsiya loyihalarini joylashtiradilar va erkin iqtisodiy zonalar ishtirokchilariga “yagona darcha” tamoyili boʻyicha muhandislik-kommunikatsiya infratuzilmasi tarmoqlariga ulanish uchun barcha zarur ruxsatnomalar berilishini tashkil qiladilar.

8. “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZ direksiyalari erkin iqtisodiy zonalarning butun faoliyat koʻrsatish davrida soliqlar va davlat maqsadli jamgʻarmalariga majburiy ajratmalar toʻlashdan ozod qilinsin.

9. Shunday tartib oʻrnatilsinki, unga muvofiq Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Uy-joy va kommunal xizmat koʻrsatish vazirligi, “Oʻzbekenergo” AJ, “Oʻztransgaz” AK, Oʻzbekiston Respublikasi Avtomobil yoʻllari davlat qoʻmitasi hamda respublika va hududiy darajadagi muhandislik-kommunikatsiya xizmatlari koʻrsatuvchilar erkin iqtisodiy zonalarning qatnashchilari — xoʻjalik yurituvchi subyektlarning kommunikatsiyalarga, ularni ishlab chiqarish maydonchalariga oʻz vaqtida tutashtirgan holda, kafolatli ulanishini taʼminlaydilar.

10. Oʻzbekiston Respublikasi Iqtisodiyot vazirligi, Moliya vazirligi hamda Davlat arxitektura va qurilish qoʻmitasi Axborot texnologiyalari va kommunikatsiyalarini rivojlantirish vazirligi, “Oʻzkommunxizmat” agentligi, “Oʻzbekenergo” AJ, “Oʻztransgaz” AK, “Oʻzavtoyoʻl” DAK, “Oʻzbekiston temir yoʻllari” AJ, Samarqand, Buxoro, Fargʻona va Xorazm viloyatlari hokimliklari bilan birgalikda “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZ hududlarida transport, ishlab chiqarish va muhandislik-kommunikatsiya infratuzilmasini jadal rivojlantirish dasturini tasdiqlash uchun uch oy muddatda Oʻzbekiston Respublikasi Vazirlar Mahkamasiga kiritsinlar.

Oʻzbekiston Respublikasi Investitsiyalar va tashqi savdo vazirligi va Moliya vazirligi har yili Oʻzbekiston Respublikasining Investitsiya dasturlarini shakllantirishda ularning parametrlarida erkin iqtisodiy zonalarning transport, ishlab chiqarish va muhandislik-kommunikatsiya infratuzilmasini rivojlantirish uchun, ularning ishlab chiqilgan bosh rejalari asosida kapital qoʻyilmalar limitlarini hamda zarur markazlashtirilgan investitsiyalar ajratilishini nazarda tutsinlar.

11. Oʻzbekiston Respublikasi Davlat arxitektura va qurilish qoʻmitasining “OʻzshaharsozlikLITI” davlat unitar korxonasini “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZning bosh rejalarini ishlab chiqish boʻyicha bosh loyihalash tashkiloti etib belgilash toʻgʻrisidagi taklifiga rozilik berilsin.

“OʻzshaharsozlikLITI” davlat unitar korxonasi uch oy muddatda “Urgut” EIZ, “Gʻijduvon” EIZ, “Qoʻqon” EIZ va “Hazorasp” EIZning bosh rejalarini ishlab chiqsin hamda erkin iqtisodiy zonalarning Maʼmuriy kengashi bilan kelishgan holda qonun hujjatlarida belgilangan tartibda tasdiqlash uchun kiritsin.

12. “Oʻzbekiston temir yoʻllari” AJ, Oʻzbekiston avtomobil va daryo transporti agentligi, Davlat bojxona qoʻmitasi “Urgut” EIZ, “Gʻijduvon” EIZ, “Qoʻqon” EIZ “Hazorasp” EIZ va “Jizzax” EIZ hududlarida logistika markazlari hamda bojxona postlari tashkil etish yuzasidan bir oy muddatda Oʻzbekiston Respublikasi Vazirlar Mahkamasiga takliflar kiritsinlar.

13. Oʻzbekiston Respublikasi Tashqi iqtisodiy faoliyat milliy bankiga va boshqa tijorat banklariga tashkil etilayotgan erkin iqtisodiy zonalar hududlarida amalga oshirish taklif etilayotgan investitsiya loyihalarini birgalikda moliyalashtirish uchun oʻz mablagʻlari hamda Oʻzbekiston Respublikasining davlat kafolati berilmagan holda jalb etilgan xorijiy kredit liniyalari hisobiga kreditlar ajratish tavsiya etilsin.

14. Oʻzbekiston Respublikasi Prezidentining “Erkin iqtisodiy zonalar faoliyatini faollashtirish va kengaytirishga doir qoʻshimcha chora-tadbirlar toʻgʻrisida” 2016-yil 26-oktabrdagi PF-4853-sonli Farmoni 6-bandining birinchi xatboshi va Farmon ilovasi oʻz kuchini yoʻqotgan deb hisoblansin.

Oʻzbekiston Respublikasi Prezidentining “Erkin iqtisodiy zonalar faoliyatini faollashtirish va kengaytirishga doir qoʻshimcha chora-tadbirlar toʻgʻrisida” 2016-yil 26-oktabrdagi PF-4853-sonli Farmoniga 2-ilovaga muvofiq oʻzgartishlar kiritilsin.

15. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Iqtisodiyot vazirligi, Moliya vazirligi, Adliya vazirligi hamda boshqa manfaatdor vazirliklar va idoralar bilan birgalikda qonun hujjatlariga ushbu Farmondan kelib chiquvchi oʻzgartish va qoʻshimchalar toʻgʻrisida ikki oy muddatda Oʻzbekiston Respublikasi Vazirlar Mahkamasiga takliflar kiritsin.

16. Mazkur Farmonning bajarilishini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

1. 3-bandda:

uchinchi xatboshi ikki xatboshi sifatida quyidagi tahrirda bayon qilinsin:

“mamlakatimizda ishlab chiqarilmaydigan va loyihalarni amalga oshirish doirasida Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha chetdan keltiriladigan qurilish materiallarini bojxona toʻlovlaridan (bojxonada rasmiylashtirish yigʻimlari bundan mustasno);

oʻzining ishlab chiqarish ehtiyojlari uchun chetdan keltiriladigan asbob-uskunalar, xomashyo, materiallar va butlovchi buyumlarni bojxona toʻlovlaridan ozod etish (bojxonada rasmiylashtirish yigʻimlari bundan mustasno) toʻgʻrisidagi taklifi qabul qilinsin;

toʻrtinchi xatboshi beshinchi xatboshi deb hisoblansin.

2. 5-bandning ikkinchi xatboshidagi “yoʻnaltirilgan” soʻzi “yoʻnaltiriladigan” soʻzi bilan almashtirilsin.