Qurilayotgan obyektlarni kafolatli va o‘z vaqtida mablag‘ bilan ta’minlash, mablag‘ bilan ta’minlashning markazlashtirilgan manbalaridan samarali va maqsadli foydalanish, qurilish qiymatining asossiz ravishda oshib ketishiga yo‘l qo‘ymaslik maqsadida Vazirlar Mahkamasi qaror qiladi:

1. 2001-yil 1-apreldan boshlab quyidagi tartib belgilansin, unga muvofiq mablag‘ bilan ta’minlashning markazlashtirilgan manbalari hisobiga qurilayotgan obyektlar bo‘yicha:

obyektlar qurilishi yuzasidan pudrat shartnomalari (kontraktlar) keyinchalik o‘zgartirilmaydigan shartnomaviy narx bo‘yicha tanlov (tender) savdolari natijalari bo‘yicha tuziladi;

obyektlar qurilishida qatnashuvchi pudrat (bosh pudratchi va subpudratchi) tashkilotlariga avans berish uchun xizmat ko‘rsatuvchi bankda ularga belgilangan tartibda maxsus maqsadli hisob raqamlari ochiladi;

pudrat tashkilotlariga moddiy-texnika resurslariga bo‘lgan asosli ehtiyojlar hisobga olingan holda pudrat tashkilotining maxsus maqsadli hisob raqami orqali buyurtmachi tomonidan har oyda, bo‘lg‘usi chorakda kutilayotgan qurilish-montaj ishlari hajmining 20 foizidan ko‘p bo‘lmagan miqdorda, avans beriladi;

maxsus hisob raqamlariga tushuvchi mablag‘lar pudrat tashkilotlari tomonidan faqat yetkazib berilayotgan moddiy-texnika resurslari uchun haq to‘lashga va obyektlar qurilishida qatnashayotgan subpudrat tashkilotlariga avans berishga sarflanadi;

ichki bozordan qurilish materiallari, buyumlar, konstruksiyalar va asbob-uskunalar asosan haq to‘lashning akkreditiv shaklini qo‘llash orqali sotib olinadi;

bajarilgan ishlar uchun, ishlarning amalda bajarilgan bosqichlari va turlarining foiz nisbati hisobga olingan holda, qat’iy kontrakt narxlari asosida hisob-kitob qilinadi;

soliqlar bajarilgan ishlar hajmi uchun pudrat tashkilotlarining asosiy depozit (hisob-kitob) hisob raqamidan belgilangan tartibda to‘lanadi (maxsus hisob raqamlariga tushgan avans mablag‘lar hisobga olinmaydi);

budjet mablag‘lari va markazlashtirilgan kreditlar hisobiga qurilayotgan obyektlarda bajarilgan, biroq haq to‘lanmagan ishlar bo‘yicha soliqlar to‘lanmaganligi uchun hisoblangan penya va jarimalarni undirish O‘zbekiston Respublikasi Moliya vazirligi va Davlat soliq qo‘mitasi tomonidan belgilanadigan tartibda amalga oshiriladi;

buyurtmachi tashkilotlarning rahbarlari markazlashtirilgan kapital qo‘yilmalarni mablag‘ bilan ta’minlashga ajratilayotgan mablag‘lardan maqsadli va samarali foydalanilishi uchun shaxsan javob beradilar.

2. O‘zbekiston Respublikasi Moliya vazirligi, Makroiqtisodiyot va statistika vazirligi, Davlat arxitektura va qurilish qo‘mitasi, Davlat soliq qo‘mitasi, Markaziy bank bir oy muddatda:

davlat budjeti mablag‘lari va markazlashtirilgan kreditlar hisobiga respublika investitsiya dasturiga kiritilgan obyektlar qurilishiga avans berish va hisob-kitob qilish tartibini;

obyektlar qurilishining ikkinchi yili va keyingi yillariga shartnomaviy narxlarni aniqlash tartibini ishlab chiqsinlar va tasdiqlasinlar.

3. O‘zbekiston Respublikasi Davlat arxitektura va qurilish qo‘mitasi:

pudratchilarning tanlov (tender)da qatnashish to‘g‘risidagi buyurtmanomasida qurilish-montaj ishlari hajmining kamida 50 foizi albatta pudratchilarning o‘z kuchlari bilan bajarilishi, shuningdek buyurtmachi va pudratchining keyinchalik o‘zgartirilmaydigan shartnomaviy narxlar bo‘yicha o‘zaro hisob-kitob qilish to‘g‘risidagi majburiyatlari mavjud bo‘lishiga oid talabni joriy etsin;

buyurtmachilar pudrat shartnomalarini hamda qurilishlarning aniq ro‘yxatlarini tuzishda foydalanishlari uchun, ichki va tashqi bozorlarda qurilish materiallari narxini tahlil qilish asosida, obyektlar qurilishining joriy narxlarda hisoblangan qiymatini aniqlash bo‘yicha bir oy muddatda tavsiyalar tayyorlasin;

manfaatdor vazirliklar va idoralar bilan birgalikda ishga tushirilayotgan quvvatlar birligi qurilish qiymatining mintaqalarning o‘ziga xos shart-sharoitlariga qarab tabaqalashtirilgan normativlarini uch oy muddatda ishlab chiqsin va belgilangan tartibda tasdiqlasin.

O‘zbekiston Respublikasi Makroiqtisodiyot va statistika vazirligi, Moliya vazirligi qurilish qiymati normativlarini ishlab chiqishga doir ishlarni normativ hujjatlar ishlab chiqishga ajratiladigan budjet mablag‘lari hisobiga mablag‘ bilan ta’minlashni nazarda tutsinlar.

4. 2001-yil 1-apreldan boshlab, bir yil muddatga, mulkchilikning barcha shakllaridagi korxonalarning ilovaga muvofiq ro‘yxat bo‘yicha respublikada ishlab chiqarilayotgan qurilish materiallari, buyumlar, konstruksiyalar va asbob-uskunalarning asosiy turlariga narxlar oshishini O‘zbekiston Respublikasi Moliya vazirligi organlarida majburiy asoslashi joriy etilsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari R.S.Azimov va A.N.Isayev zimmasiga yuklansin.

1. Suv-gaz o‘tkazish quvurlari

2. Barcha turdagi g‘ishtlar, shlak bloklar

3. Keramik va plastmassa quvurlar

4. O‘quv mebeli va asbob-uskunalar

5. Transformator kichik stansiyalari, elektr ishga tushirish apparatlari, elektr shchitlar, elektr javonlar

6. Keramzit

7. Yig‘ma temir-beton buyumlar va konstruksiyalar

8. Tabiiy toshdan ishlangan qoplama plitkalar

9. Keramika bezak plitkalari

10. Plastmassa, alyuminiydan tayyorlangan deraza va eshik bloklari

11. Lok-bo‘yoq mahsulotlari

12. Santexnika buyumlari va asbob-uskunalari

13. Ohak

14. Alebastr