Oʻzbekiston Respublikasining “Telekommunikatsiyalar toʻgʻrisida”gi Qonuni va Oʻzbekiston Respublikasi Prezidentining 2012-yil 17-apreldagi PQ-1741-sonli “Oʻzbekiston Respublikasida raqamli teleeshittirishga texnik va texnologik oʻtish davlat dasturi toʻgʻrisida”gi qaroriga muvofiq buyuraman:

1. Oʻzbekiston Respublikasida raqamli televideniye xizmatlarini koʻrsatish qoidalari ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran uch oy oʻtgach kuchga kiradi.

Mazkur Qoidalar Oʻzbekiston Respublikasining “Telekommunikatsiyalar toʻgʻrisida”gi Qonuni, Oʻzbekiston Respublikasi Prezidentining 2012-yil 17-apreldagi PQ-1741-sonli “Oʻzbekiston Respublikasida raqamli teleeshittirishga texnik va texnologik oʻtish davlat dasturi toʻgʻrisida”gi qaroriga muvofiq Oʻzbekiston Respublikasida yer usti (efir) raqamli televideniye (bundan buyon matnda raqamli televideniye deb yuritiladi) xizmatlarini koʻrsatish tartibini belgilaydi.

1. Mazkur Qoidalarda quyidagi tushunchalar qoʻllaniladi:

abonent — raqamli televideniye xizmatlari koʻrsatilishi uchun provayder bilan yoki uning dileri orqali shartnoma tuzgan yuridik yoki jismoniy shaxs;

diler — provayder bilan tuzilgan shartnoma asosida aholini provayder xizmatlariga ulash jarayonida ishtirok etuvchi tadbirkorlik subyekti;

operator — mulk huquqi yoki boshqa ashyoviy huquq asosida raqamli televideniye tarmogʻiga ega boʻlgan, uning ishlashi, rivojlanishini taʼminlovchi va raqamli televideniye xizmatlarini koʻrsatuvchi yuridik shaxs;

xizmat koʻrsatish zonasi — operator yoki provayder litsenziya bitimi asosida aloqa xizmatlarini koʻrsatish huquqiga ega boʻladigan va normativ-huquqiy hujjatlar bilan oʻrnatilgan shartlarga javob beradigan xizmatlar sifatini taʼminlash uchun texnik imkoniyatlarga ega boʻlgan hudud;

provayder— operatorning raqamli televideniye tarmogʻi orqali tijorat asosida raqamli televideniye xizmatlarini koʻrsatuvchi yuridik shaxs;

foydalanish uchun ochiq raqamli tele-, radiokanal (bundan buyon matnda ochiq tele-, radiokanal deb yuritiladi) — provayder bilan shartnoma tuzilmasdan va haq olinmasdan operator tomonidan foydalanuvchi va abonentlarga yetkaziladigan raqamli tele-, radiokanal;

foydalanuvchi — provayder bilan shartnoma tuzmagan, ochiq tele-, radiokanallarni qabul qiluvchi yuridik yoki jismoniy shaxs;

qoʻshimcha xizmatlar — abonentning soʻroviga koʻra provayder tomonidan raqamli televideniye xizmatlaridan alohida ravishda koʻrsatiladigan va litsenziya shartlari bilan tartibga solinmagan xizmatlar.

2. Operator va provayderning raqamli televideniye xizmatlarini koʻrsatish bilan bogʻliq boʻlgan faoliyati vakolatli davlat organi tomonidan berilgan litsenziya asosida hamda vakolatli davlat organi bilan tuzilgan litsenziya kelishuviga muvofiq amalga oshiriladi.

3. Raqamli televideniye xizmatlari faqat xizmat koʻrsatish zonasida koʻrsatiladi.

4. Raqamli televideniye xizmatlaridan foydalana olish uchun foydalanuvchi va abonent normativ-huquqiy hujjatlar hamda texnik jihatdan tartibga solish sohasidagi normativ hujjatlarda belgilangan talablarga javob beruvchi uskunalarga ega boʻlishi kerak.

5. Foydalanuvchi va abonentlar xizmat koʻrsatish zonasida ochiq tele-, radiokanallarni provayder bilan shartnoma tuzmasdan va haq toʻlamasdan qabul qilishlari mumkin.

6. Ochiq tele-, radiokanallardan tashqari boshqa raqamli tele-, radiokanallarni qabul qilish uchun provayder bilan shartnoma tuzilishi va haq toʻlanishi kerak.

7. Ochiq tele-, radiokanallardan tashqari boshqa raqamli tele-, radiokanallarni qabul qilish uchun yuridik yoki voyaga yetgan jismoniy shaxs provayder yoki dilerga bevosita (yuridik shaxslar oʻz vakili orqali) yoki elektron tarzda murojaat qilishi mumkin.

8. Bevosita murojaat qilinganda provayder yoki dilerga quyidagi maʼlumotlar taqdim qilinishi kerak:

familiyasi, ismi va sharifi (jismoniy shaxslar uchun);

nomi, manzili, yuridik manzili, davlat roʻyxatidan oʻtkazilganligi toʻgʻrisidagi guvohnoma raqami, STIR (yuridik shaxslar uchun);

raqamli televideniye xizmatlaridan foydalanish koʻzlanayotgan manzil;

bogʻlanish maʼlumotlari (telefon raqami, elektron pochta manzili — agar mavjud boʻlsa).

9. Elektron tarzda murojaat qilinganda provayder yoki dilerga mazkur Qoidalarning 8-bandida koʻrsatilgan maʼlumotlar elektron shaklda taqdim qilinishi kerak.

Elektron tarzda murojaat qilinganda provayder yoki diler tomonidan murojaatchiga bir ish kuni ichida shartnoma tuzish imkoniyati mavjud boʻlganda shartnoma tuzish uchun aniq manzil va vaqt koʻrsatilgan javob yoki shartnoma tuzish imkoniyati mavjud boʻlmaganda buning sabablari koʻrsatilgan javob yuboriladi.

10. Shartnoma tuzish imkoniyati mavjud boʻlganda provayder yoki diler shartnomani tuzish vaqtida murojaatchi tomonidan elektron tarzda taqdim qilingan maʼlumotlarni ularning asl nusxalari bilan solishtiradi.

11. Provayder yoki diler raqamli televideniye xizmatlaridan foydalanish uchun bevosita murojaat qilingan kunning oʻzida yoki elektron tarzda murojaat qilinganda provayder yoki dilerning javobida koʻrsatilgan kunda shartnomani tuzadi yoki tuzishni rad etadi.

Jismoniy shaxsning talabi boʻyicha provayder yoki diler vakillari uning yashash joyiga borib raqamli televideniye xizmatlarini koʻrsatish shartnomasini tuzishi mumkin.

12. Shartnomani tuzish quyidagi hollarda rad etilishi mumkin:

murojaatchi voyaga yetmagan jismoniy shaxs boʻlganda;

raqamli televideniye xizmatlaridan foydalanish koʻzlanayotgan manzil xizmat koʻrsatish zonasiga kirmaganda;

mazkur Qoidalarning 8-bandida koʻrsatilgan maʼlumotlar toʻliq taqdim etilmaganda;

taqdim qilingan maʼlumotlarning soxtaligi yoki notoʻgʻriligi aniqlanganda.

13. Shartnomani rad etish asoslari mavjud boʻlmaganda provayder va murojaatchi tomonidan shartnoma tuziladi.

14. Abonentlarga koʻrsatiladigan raqamli televideniye xizmatlarining roʻyxati va turlari operatorga tegishli raqamli televideniye tarmoqlarining texnik imkoniyatlari va abonentlar ehtiyojlarini hisobga olgan holda provayder tomonidan belgilanadi va shartnomada koʻrsatiladi.

15. Raqamli televideniye xizmatlarini koʻrsatish uchun shartnoma operator va provayder litsenziyasining amal qilish muddatidan ortiq boʻlmagan muddatga rasmiylashtiriladi. Operator va provayder litsenziyasining amal qilish muddati uzaytirilganda shartnoma litsenziyaning yangidan belgilangan amal qilish muddatigacha uzaytirilgan deb hisoblanadi.

16. Raqamli televideniye xizmatlari bitta abonentga bir nechta uskunalar uchun bitta shartnoma asosida yoki bir nechta alohida shartnomalar asosida koʻrsatilishi mumkin.

17. Raqamli televideniye xizmatlari uchun toʻlovlar abonent tomonidan provayder bilan abonent oʻrtasida tuzilgan shartnomaga muvofiq Oʻzbekiston Respublikasining milliy valyutasida amalga oshiriladi.

18. Qoʻshimcha xizmatlar uchun toʻlovlar abonent va foydalanuvchi tomonidan ular bilan provayder oʻrtasidagi kelishuvga muvofiq amalga oshiriladi.

19. Raqamli televideniye xizmatlari uchun tariflar Oʻzbekiston Respublikasining milliy valyutasida provayder tomonidan belgilanadi.

20. Abonent oʻz xohishiga koʻra provayder tomonidan taklif qilingan tarif-rejasini tanlashi va oʻzgartirishi mumkin.

21. Provayder tomonidan tariflar oʻzgartirilganda u bu haqda abonentlarni kamida oʻn kun oldin xabardor qilishi kerak.

22. Provayder abonentning talabiga koʻra abonent hisobvaragʻida aks ettirilgan oʻzaro hisob-kitoblar holati toʻgʻrisidagi toʻliq maʼlumotni (kamida oxirgi oʻn ikki oy uchun) bepul berish imkoniyatini yaratishi shart.

23. Abonent raqamli televideniye xizmatlarini koʻrsatish shartnomasi tuzilgan va tanlangan tarif rejasiga muvofiq toʻlovni amalga oshirgan kundan boshlab ikki ish kuni mobaynida yoki abonentning xohishiga koʻra undan koʻproq muddatda provayder tomonidan aktivatsiya qilinadi va raqamli televideniye tarmogʻiga ulanadi.

24. Raqamli televideniye xizmatlari provayderning xizmatlar toʻgʻrisidagi axborotiga muvofiq boʻlishi kerak.

25. Operator va provayder raqamli televideniye xizmatlarini koʻrsatish jarayonida ularni shartnoma, normativ-huquqiy hujjatlar va texnik jihatdan tartibga solish sohasidagi normativ hujjatlarda belgilangan talablarga muvofiq hamda kechayu-kunduz va sifatli koʻrsatilishini taʼminlashi shart.

26. Provayder quyidagi xizmatlarni bepul koʻrsatadi:

koʻrsatiladigan raqamli televideniye xizmatlari va qoʻshimcha xizmatlar toʻgʻrisida axborot berish;

xizmat koʻrsatish zonasi toʻgʻrisida axborot berish;

raqamli televideniye xizmatlari va qoʻshimcha xizmatlar uchun tariflar va tarif-rejalari toʻgʻrisida axborot berish;

provayder va dilerning rekvizitlari va ishlash rejimi toʻgʻrisida axborot berish;

uskunalarning texnik nosozliklari, shartli foydalana olish tizimi bilan bogʻliq muammolar, smart-kartaning yoʻqolganligi, abonentning shaxsiy maʼlumotlari oʻzgarganligi toʻgʻrisidagi axborotlarni qabul qilish.

27. Provayder tomonidan koʻrsatiladigan bepul xizmatlar roʻyxati u tomonidan mustaqil kengaytirilishi mumkin.

28. Raqamli televideniye xizmatlarining sifati keskin tushib ketganligi yoki xizmat koʻrsatish toʻxtaganligi toʻgʻrisida abonentdan murojaat kelib tushganda provayder tomonidan tezkor choralar koʻrilishi va kamchiliklar bartaraf etilishi zarur.

29. Raqamli televideniye xizmatlarini koʻrsatish shartnomasiga oʻzgartirish va qoʻshimchalar kiritish provayder va abonentning oʻzaro kelishuviga asosan amalga oshiriladi.

30. Raqamli televideniye xizmatlarini koʻrsatish shartnomasi abonentning xohishiga koʻra provayderga murojaat qilish orqali bekor qilinishi mumkin.

31. Raqamli televideniye xizmatlarini koʻrsatish shartnomasi provayder tomonidan quyidagi holatlarda bekor qilinishi mumkin:

raqamli televideniye xizmatlari uchun toʻlovlar abonent tomonidan shartnomada belgilangan muddatlarda amalga oshirilmasa;

operator yoki provayderning litsenziyasi bekor qilinganda yoki uning amal qilishi tugatilganda;

operator yoki provayderning harakatlariga bogʻliq boʻlmagan holatlarning (fors-major holatlarning) natijasida raqamli televideniye xizmatlarini koʻrsatish imkoniyati mavjud boʻlmaganda.

32. Raqamli televideniye xizmatlarini koʻrsatish shartnomasi provayder tomonidan bekor qilinganda, provayder abonentni buning sabablarini koʻrsatgan holda xabardor qilishi kerak.

33. Raqamli televideniye xizmatlarini koʻrsatish shartnomasi bekor qilingan taqdirda koʻrsatilgan va koʻrsatilmagan xizmatlar uchun provayder va abonent oʻrtasida qayta hisob-kitob amalga oshiriladi.

34. Shartnomada koʻrsatilgan abonent haqidagi maʼlumotlar oʻzgarganda abonent provayderni bu haqda besh kun mobaynida xabardor qilishi kerak.

35. Operator va provayder rejali profilaktika yoki taʼmirlash ishlarining boshlanish vaqti toʻgʻrisida abonent va foydalanuvchilarni kamida bir sutka oldin xabardor qilishi kerak.

36. Provayder va diler oʻz faoliyatini amalga oshirish natijasida abonent va foydalanuvchi toʻgʻrisida olingan maʼlumotlarning sir saqlanishini taʼminlashi kerak.

37. Mazkur Qoidalar talablarining buzilishida aybdor boʻlgan shaxslar qonunchilik hujjatlarida belgilangan tartibda javobgarlikka tortiladi.

38. Mazkur Qoidalar Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi va Oʻzbekiston milliy teleradiokompaniyasi bilan kelishilgan.