Oʻzbekiston Respublikasi Vazirlar Mahkamasining “Maʼlumotlar uzatish milliy tarmogʻini tashkil etish va jahon axborot tarmoqlaridan foydalanishni tartibga solish toʻgʻrisida” 1999-yil 5-fevraldagi 52-son qarorining 13-bandini bajarish maqsadida Vazirlar Mahkamasi qaror qiladi:

Oʻzbekiston Respublikasi Vazirlar Mahkamasining quyidagi qarorlariga oʻzgartirishlar va qoʻshimchalar kiritilsin:

1. Oʻzbekiston Respublikasi Vazirlar Mahkamasining 1992-yil 21-apreldagi 202-son qarori (Oʻzbekiston Respublikasi QT, 1992-y., 4-son, 12-modda) bilan tasdiqlangan “Oʻzbekiston Milliy axborot agentligi (OʻzA) toʻgʻrisida Nizom”ning 4-bandi toʻrtinchi xatboshidan soʻng quyidagi mazmundagi yangi xatboshi bilan toʻldirilsin:

“Davlat matbuot qoʻmitasi, Tashqi ishlar vazirligi va “UzRAK” maʼlumotlarni uzatish davlat tarmogʻini rivojlantirish va undan foydalanish korxonasi bilan birgalikda Oʻzbekistonning ijtimoiy-siyosiy va iqtisodiy hayoti toʻgʻrisidagi axborotning “Internet” tarmogʻida tarqatilishini muvofiqlashtiradi”.

2. Oʻzbekiston Respublikasi Vazirlar Mahkamasining 1994-yil 16-martdagi 140-son qarori (Oʻzbekiston Respublikasi QT, 1994-y., 3-son, 16-modda) bilan tasdiqlangan “Oʻzbekiston Respublikasi Tashqi ishlar vazirligi toʻgʻrisidagi Nizom”ning 4-bandi oʻn sakkizinchi xatboshidan soʻng quyidagi mazmundagi yangi xatboshi bilan toʻldirilsin:

“Oʻzbekiston Milliy axborot agentligi (OʻzA), Davlat matbuot qoʻmitasi va “UzRAK” maʼlumotlarni uzatish davlat tarmogʻini rivojlantirish va undan foydalanish korxonasi bilan birgalikda Oʻzbekistonning ijtimoiy-siyosiy va iqtisodiy hayoti toʻgʻrisidagi axborotning Internet tarmogʻida tarqatilishini muvofiqlashtiradi”.