Aholining koʻp kvartirali uylarda yashashi uchun yanada qulay va xavfsiz shart-sharoitlar yaratish, lift uskunalarining avariya holatlarining oldini olish, shuningdek Toshkent shahar hokimligi huzuridagi Obodonlashtirish bosh boshqarmasining moddiy-texnika bazasini mustahkamlash maqsadida Vazirlar Mahkamasi qaror qiladi:

1. Quyidagilar:

2016 — 2021-yillarda Toshkent shahridagi koʻp kvartirali uylarda liftlarni almashtirish dasturi 1-ilovaga* muvofiq;

2016 — 2021-yillarda Toshkent shahar hokimligi huzuridagi Obodonlashtirish bosh boshqarmasini maxsus transport texnikasi va mexanizatsiya vositalari bilan jihozlash dasturi 2-ilovaga* muvofiq tasdiqlansin.

2. Toshkent shahar hokimligi:

har yili, 2016-yildan boshlab, koʻp kvartirali uylarni xatlovdan oʻtkazish natijalarini hisobga olgan holda, uylarning nuqsonli dalolatnomalarini tuzish va tumanlar boʻyicha koʻp kvartirali uylarning liftlarini almashtirishning manzilli dasturlarini belgilangan tartibda tasdiqlashni;

koʻp kvartirali uylardagi liftlarni almashtirish boʻyicha loyiha-smeta hujjatlarini ishlab chiqish va belgilangan tartibda tasdiqlash, keyinchalik ularni har yili tasdiqlanadigan manzilli roʻyxatlarga kiritishni;

manzilli roʻyxatlar va tasdiqlangan loyiha-smeta hujjatlariga muvofiq koʻp kvartirali uylardagi liftlarning almashtirilishini nazorat qilishni;

tasdiqlangan dasturlarning amalga oshirilishi toʻgʻrisida har chorakda Vazirlar Mahkamasiga tahliliy axborot taqdim etishni taʼminlasin.

3. Quyidagilar belgilansin:

2016 — 2021-yillarda koʻp kvartirali uylardagi liftlarni almashtirish va Toshkent shahar hokimligi huzuridagi Obodonlashtirish bosh boshqarmasini maxsus transport texnikasi va mexanizatsiya vositalari bilan jihozlashning tasdiqlangan dasturlarini amalga oshirish xarajatlarini moliyalashtirish manbalari etib — Toshkent shahar shahar budjeti parametrlarida nazarda tutilgan mablagʻlar;

Toshkent shahar uy-joy kommunal xizmat koʻrsatish bosh boshqarmasi — liftlarni yangilash ishlarining buyurtmachisi etib belgilansin.

4. Oʻzbekiston Respublikasi Moliya vazirligi 2016-yildan boshlab kelgusi yil uchun Oʻzbekiston Respublikasi Davlat budjeti parametrlarini shakllantirishda koʻp kvartirali uylardagi liftlarni almashtirish hamda Toshkent shahar hokimligi huzuridagi Obodonlashtirish bosh boshqarmasini maxsus transport texnikasi va mexanizatsiya vositalari bilan jihozlashning tasdiqlangan dasturlarini amalga oshirish uchun zarur mablagʻlarni nazarda tutsin, ajratiladigan budjet mablagʻlaridan maqsadli foydalanilishi ustidan taʼsirchan nazoratni amalga oshirsin.

5. Oʻzbekiston Respublikasi Davlat arxitektura va qurilish qoʻmitasi koʻp kvartirali uylarning liftlarini almashtirishni amalga oshirishda bajarilayotgan ishlarning sifati, shaharsozlik normalari va qoidalariga rioya etilishi ustidan qatʼiy nazorat oʻrnatsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov va Toshkent shahar hokimi R.J. Usmonov zimmasiga yuklansin.