Oʻzbekiston Respublikasi Prezidentining “Angren — Pop” elektrlashtirilgan temir yoʻl qurilishini tashkil etish chora-tadbirlari toʻgʻrisida” 2013-yil 18-iyundagi PQ-1985-son qarorini bajarish yuzasidan, shuningdek “Angren — Pop” temir yoʻl qurilishi hududidagi turar joylar va yer uchastkalari egalariga kompensatsiya mablagʻlari oʻz vaqtida toʻlanishini taʼminlash maqsadida Vazirlar Mahkamasi qaror qiladi:

1. Namangan viloyati hokimligi tomonidan “Angren — Pop” elektrlashtirilgan temir yoʻl qurilishi hududida joylashgan turar joylar va yer uchastkalari egalariga 4,1 mlrd soʻm miqdoridagi kompensatsiya toʻlovlari belgilangan tartibda mahalliy budjet mablagʻlari hisobiga amalga oshirilayotganligi maʼlumot uchun qabul qilinsin.

2. Namangan viloyati hokimligi va Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasining “Angren — Pop” temir yoʻl qurilishi hududida joylashgan turar joylar va yer uchastkalari egalariga qishloq xoʻjaligi va oʻrmon xoʻjaligi ishlab chiqarishi nobudgarchiliklarining oʻrnini qoplash hisobiga Namangan viloyati Yer resurslari va davlat kadastri boshqarmasining maxsus hisob raqamiga tushgan mablagʻlardan 2,0 mlrd soʻm miqdorida kompensatsiya toʻlovlari toʻlash toʻgʻrisidagi taklifiga rozilik berilsin.

3. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi ushbu qarorning 2-bandida koʻrsatilgan mablagʻlar Namangan viloyati Yer resurslari va davlat kadastri boshqarmasining maxsus hisob raqamidan Namangan viloyati hokimligining maxsus hisob raqamiga oʻtkazilishini taʼminlasin.

4. Namangan viloyati hokimligi viloyat hokimligining maxsus hisob raqamiga oʻtkazilgan mablagʻlardan “Angren — Pop” elektrlashtirilgan temir yoʻl qurilishi hududida joylashgan turar joylar va yer uchastkalari egalariga kompensatsiya toʻlovlari toʻlash uchun maqsadli foydalanilishini taʼminlasin.

5. Vazirlar Mahkamasining 2011-yil 25-maydagi 146-son qarori (Oʻzbekiston Respublikasi QT, 2011-y., 5-son, 40-modda) bilan tasdiqlangan Yer uchastkalari egalari, foydalanuvchilari, ijarachilari va mulkdorlarining koʻrgan zararlarini, shuningdek qishloq xoʻjaligi va oʻrmon xoʻjaligi ishlab chiqarishi nobudgarchiliklarining oʻrnini qoplash tartibi toʻgʻrisidagi nizom 24-bandining oʻn ikkinchi xatboshi quyidagi tahrirda bayon qilinsin:

“Qishloq va oʻrmon xoʻjaligi ishlab chiqarishi nobudgarchiliklari oʻrnini qoplash hisobiga tushgan mablagʻlardan yer munosabatlari bilan bogʻliq boshqa maqsadlar uchun foydalanish Vazirlar Mahkamasining qaroriga koʻra amalga oshiriladi”.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov va Namangan viloyati hokimi B.T. Yusupov zimmasiga yuklansin.