Oʻzbekiston Respublikasi Iqtisodiyot vazirligi huzuridagi Tovar bozorlari konyunkturasini oʻrganish hamda investitsiya loyihalari va dasturlarini ekspertizadan oʻtkazish Respublika markazining samarali faoliyatini taʼminlash maqsadida Vazirlar Mahkamasi qaror qiladi:

1. Quyidagilar Oʻzbekiston Respublikasi Iqtisodiyot vazirligi huzuridagi Tovar bozorlari konyunkturasini oʻrganish hamda investitsiya loyihalari va dasturlarini ekspertizadan oʻtkazish Respublika markazining (keyingi oʻrinlarda Respublika markazi deb ataladi) asosiy vazifalari va faoliyati yoʻnalishlari etib belgilansin:

umuman respublika va hududlar boʻyicha tovarlar bozori konyunkturasini oʻrganish;

isteʼmol tovarlarining alohida turlari va nomenklaturasi bozorlari konyunkturasini oʻrganish;

umuman va asosiy tovarlar guruhlari boʻyicha isteʼmol bozorining holati toʻgʻrisida har oylik tahliliy maʼlumotlarni hamda har choraklik konyunktura obzorlarini tayyorlash;

isteʼmol bozorini aholi ehtiyoji yuqori boʻlgan tovarlar bilan toʻldirishga doir tavsiyalar va takliflar tayyorlash;

isteʼmol bozorining qisqa muddatli prognozlarini ishlab chiqish;

davlat va xoʻjalik boshqaruvi organlari va boshqa tashkilotlar, shu jumladan xorijiy sarmoyalar ishtirokidagi korxonalar buyurtmalari boʻyicha, shartnoma asosida marketing va konyunktura tadqiqotlari oʻtkazish;

kontraktlar tuzish bosqichida tashkilotlar uchun isteʼmol tovarlarini va ishlab chiqarish maqsadlaridagi mahsulotlarni import qilishning maqbul variantini tanlash yuzasidan, shu jumladan xarid qilishning maqsadga muvofiqligi toʻgʻrisida qarorlar qabul qilish uchun tavsiyalar ishlab chiqish;

tashkilotlarning buyurtmalari boʻyicha isteʼmol tovarlari va ishlab chiqarish maqsadlaridagi mahsulotlar importining, xarid qilish-sotishning maqbul variantini tanlash boʻyicha marketing va maslahat xizmatlari koʻrsatish;

loyihalarni Mahalliylashtirish dasturiga kiritish uchun tashabbuskor tashkilotlar tomonidan taqdim etiladigan hujjatlarni Oʻzbekiston Respublikasi Iqtisodiyot vazirligi topshirigʻiga binoan koʻrib chiqish;

davlat va xoʻjalik boshqaruvi organlari, boshqa tashkilotlar tomonidan taqdim etiladigan investitsiya (TIA/DTIA, TIA/DTIH) loyihalarini Oʻzbekiston Respublikasi Iqtisodiyot vazirligi topshirigʻiga binoan koʻrib chiqish.

2. Quyidagilar:

Oʻzbekiston Respublikasi Iqtisodiyot vazirligi huzuridagi Tovar bozorlari konyunkturasini oʻrganish hamda investitsiya loyihalari va dasturlarini ekspertizadan oʻtkazish Respublika markazi toʻgʻrisidagi nizom 1-ilovaga muvofiq;

Oʻzbekiston Respublikasi Iqtisodiyot vazirligi huzuridagi Tovar bozorlari konyunkturasini oʻrganish hamda investitsiya loyihalari va dasturlarini ekspertizadan oʻtkazish Respublika markazining boshqaruv xodimlarining cheklangan soni 19 nafardan iborat boʻlgan tuzilmasi 2-ilovaga muvofiq tasdiqlansin.

Oʻzbekiston Respublikasi Iqtisodiyot vazirligiga, zarurat boʻlganda, Respublika markazi tuzilmasiga boshqaruv xodimlarining belgilangan soni doirasida oʻzgartirishlar kiritish huquqi berilsin.

3. Oʻzbekiston Respublikasi Iqtisodiyot vazirligi va Moliya vazirligining Respublika markazi huzurida Axborot taʼminotini tashkil etish va tovar bozorlarida marketing tadqiqotlarini oʻtkazish hamda moddiy ragʻbatlantirish budjetdan tashqari jamgʻarmasini (keyingi oʻrinlarda Budjetdan tashqari jamgʻarma deb ataladi) tashkil etish toʻgʻrisidagi taklifiga rozilik berilsin.

4. Quyidagilar Respublika markazini mablagʻ bilan taʼminlash manbalari etib belgilansin:

Oʻzbekiston Respublikasi Davlat budjeti — Respublika markazi xodimlari mehnatiga qonunchilikda belgilangan miqdorda haq toʻlash xarajatlari boʻyicha;

Budjetdan tashqari jamgʻarma — boshqa xarajatlar boʻyicha.

5. Oʻzbekiston Respublikasi Iqtisodiyot vazirligi Moliya vazirligi bilan birgalikda bir oy muddatda Budjetdan tashqari jamgʻarma mablagʻlarini shakllantirish va ulardan foydalanish tartibi toʻgʻrisidagi nizomni ishlab chiqsin va tasdiqlasin.

6. Respublika markazi direktori lavozim maoshi boʻyicha Oʻzbekiston Respublikasi Iqtisodiyot vazirligining boʻlim boshligʻiga tenglashtirilsin.

7. Respublika markazi Oʻzbekiston Respublikasi Iqtisodiyot vazirligining Toshkent sh., Oʻzbekiston koʻchasi, 45a-uy manzilidagi binosiga joylashtirilsin.

8. Quyidagilar:

Vazirlar Mahkamasining “Oʻzbekiston Respublikasi Vazirlar Mahkamasining Istiqbolni belgilash va statistika davlat qoʻmitasi huzurida Tovar bozorlari konyunkturasini oʻrganish markazini tashkil etish toʻgʻrisida” 1996-yil 23-yanvardagi 35-son qarori;

Vazirlar Mahkamasining “Tovar bozorlari konyunkturasini oʻrganish markazini Oʻzbekiston Respublikasi Vazirlar Mahkamasining Istiqbolni belgilash va statistika davlat qoʻmitasi huzuridagi Tovar bozorlari konyunkturasini oʻrganish respublika markaziga aylantirish toʻgʻrisida” 1996-yil 14-avgustdagi 286-son qarori oʻz kuchini yoʻqotgan deb hisoblansin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Oʻzbekiston Respublikasi Iqtisodiyot vazirligi huzuridagi Tovar bozorlari konyunkturasini oʻrganish hamda investitsiya loyihalari va dasturlarini ekspertizadan oʻtkazish Respublika markazi (keyingi oʻrinlarda Respublika markazi deb ataladi) tovar bozorlarini tizimli oʻrganish, isteʼmol bozorining qisqa muddatli prognozlarini ishlab chiqish, uni toʻldirish chora-tadbirlarini belgilash, isteʼmol va ishlab chiqarish maqsadlaridagi import mahsulotlarni xarid qilishda maqbul variantni tanlashga oid xizmatlar koʻrsatish maqsadida tashkil etilgan.

2. Respublika markazi davlat muassasasi shaklidagi yuridik shaxs hisoblanadi, alohida mol-mulkka, mustaqil balansga, banklarda hisob-kitob va valyuta hisobiga, oʻz nomi yozilgan dumaloq muhrga, ish qogʻozlari va shtampga ega boʻladi.

3. Respublika markazi oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga va mazkur Nizomga amal qiladi.

4. Respublika markazi quyidagi firma nomiga ega boʻladi:

davlat tilida — Oʻzbekiston Respublikasi Iqtisodiyot vazirligi huzuridagi Tovar bozorlari konyunkturasini oʻrganish hamda investitsiya loyihalari va dasturlarini ekspertizadan oʻtkazish Respublika markazi (qisqacha — Iqtisodiyot vazirligi huzuridagi Respublika markazi);

rus tilida — Respublikanskiy tsentr po izucheniyu konʼyunkturi tovarnix rinkov i ekspertizi investitsionnix proyektov i programm pri Ministerstve ekonomiki Respubliki Uzbekistan (qisqacha — Respublikanskiy tsentr pri Ministerstve ekonomiki).

5. Respublika markazi oʻz faoliyatini Oʻzbekiston Respublikasi Iqtisodiyot vazirligining topshiriqlari va buyurtmalari, tashkilotlarning buyurtmanomalari, shuningdek ilmiy ishlar va xizmatlardan foydalanuvchilar bilan tuziladigan shartnomalar asosida amalga oshiradi.

6. Quyidagilar Respublika markazining asosiy vazifalari va faoliyati yoʻnalishlari hisoblanadi:

umuman respublika va hududlar boʻyicha tovarlar bozori konyunkturasini oʻrganish;

isteʼmol tovarlarining alohida turlari va nomenklaturasi bozorlari konyunkturasini oʻrganish;

umuman va asosiy tovarlar guruhlari boʻyicha isteʼmol bozorining holati toʻgʻrisida har oylik tahliliy maʼlumotlarni hamda har choraklik konyunktura obzorlarini tayyorlash;

isteʼmol bozorini aholi ehtiyoji yuqori boʻlgan tovarlar bilan toʻldirishga doir tavsiyalar va takliflar tayyorlash;

isteʼmol bozorining qisqa muddatli prognozlarini ishlab chiqish;

davlat va xoʻjalik boshqaruvi organlari va boshqa tashkilotlar, shu jumladan xorijiy sarmoyalar ishtirokidagi korxonalar buyurtmalari boʻyicha, shartnoma asosida marketing va konyunktura tadqiqotlari oʻtkazish;

kontraktlar tuzish bosqichida tashkilotlar uchun isteʼmol tovarlarini va ishlab chiqarish maqsadlaridagi mahsulotlarni import qilishning maqbul variantini tanlash yuzasidan, shu jumladan xarid qilishning maqsadga muvofiqligi toʻgʻrisida qarorlar qabul qilish uchun tavsiyalar ishlab chiqish;

tashkilotlarning buyurtmalari boʻyicha isteʼmol tovarlari va ishlab chiqarish maqsadlaridagi mahsulotlar importining, xarid qilish-sotishning maqbul variantini tanlash boʻyicha marketing va maslahat xizmatlari koʻrsatish;

loyihalarni Mahalliylashtirish dasturiga kiritish uchun tashabbuskor tashkilotlar tomonidan taqdim etiladigan hujjatlarni Oʻzbekiston Respublikasi Iqtisodiyot vazirligi topshirigʻiga binoan koʻrib chiqish;

davlat va xoʻjalik boshqaruvi organlari, boshqa tashkilotlar tomonidan taqdim etiladigan investitsiya (TIA/DTIA, TIA/DTIH) loyihalarini Oʻzbekiston Respublikasi Iqtisodiyot vazirligi topshirigʻiga binoan koʻrib chiqish.

7. Respublika markazi oʻziga yuklangan vazifalarni bajarish uchun:

davlat va xoʻjalik boshqaruvi organlari, shuningdek boshqa tashkilotlar buyurtmalari boʻyicha tahliliy obzorlarni, shuningdek tovar bozorlari konyunkturasiga oid maʼlumotnomalarni tayyorlaydi;

shakllanayotgan konyunkturadan kelib chiqqan holda, aniq turlardagi tovarlarni respublikaga olib kirishning maqsadga muvofiqligini baholash boʻyicha tahliliy ishlarni amalga oshiradi va tegishli tavsiyalar tayyorlaydi;

loyihalarni Mahalliylashtirish dasturiga kiritish uchun tashabbuskor tashkilotlar tomonidan taqdim etilgan hujjatlarni Oʻzbekiston Respublikasi Iqtisodiyot vazirligi topshirigʻiga binoan koʻrib chiqadi;

davlat va xoʻjalik boshqaruvi organlari, shuningdek boshqa tashkilotlar tomonidan taqdim etiladigan investitsiya (TIA/DTIA, TIA/DTIH) loyihalarini Oʻzbekiston Respublikasi Iqtisodiyot vazirligi topshirigʻiga binoan koʻrib chiqadi.

8. Respublika markazi oʻziga yuklangan vazifalar va funksiyalarni bajarish uchun quyidagi huquqlarga ega:

tovar bozorlari konyunkturasini oʻrganish sohasida ilmiy-tadqiqot ishlarini bajarish, shuningdek tarmoq loyihalarida va xalqaro loyihalarda qatnashish;

qoʻshma seminarlar, simpoziumlar tashkil etish va oʻtkazish, shuningdek xalqaro tashkilotlar bilan birgalikda marketing va konyunktura tadqiqotlari sohasida tadqiqot dasturlarini amalga oshirish;

marketing va konyunktura tadqiqotlari boʻyicha uslubiy tavsiyalarni ishlab chiqish;

tovar bozori konyunkturasini, talab va taklifni oʻrganish maqsadida tashkilotlar va aholi oʻrtasida savol-javoblarni va boshqa sotsiologik soʻrovlarni tashkil etish va amalga oshirish, Oʻzbekiston Respublikasi Iqtisodiyot vazirligining hududiy organlari xodimlarini, shuningdek intervyu beruvchilar va respondentlarni shartnoma asosida jalb etish;

Oʻzbekiston Respublikasi Iqtisodiyot vazirligi, respublika ilmiy-tadqiqot tashkilotlari bilan hamkorlikda, yirik ijtimoiy-iqtisodiy muammolarni hal etish uchun prognoz hujjatlarini, kompleks va maqsadli dasturlarni ishlab chiqishda qatnashish;

tovar bozorlari konyunkturasini oʻrganish sohasidagi xorijiy tajribani oʻrganish va umumlashtirish;

tovar bozorlarining muhim muammolarini hal etish maqsadida respublika va xorijiy mamlakatlar ilmiy-tadqiqot tashkilotlari bilan ilmiy hamkorlik qilish;

tovar bozorlari konyunkturasini oʻrganish muammolari yuzasidan kengashlar, oʻquv kurslari va konsultatsiyalar berishni tashkil etish va oʻtkazish;

Respublika markazining ish sohasi boʻyicha noshirlik faoliyatini amalga oshirish, maʼlumotnomalar, konyunktura obzorlari va boshqa zarur axborot materiallarini nashr etish va tarqatish;

Respublika markazi faoliyati xususiyatidan kelib chiquvchi konsultatsiya, axborot xizmatlari va boshqa xizmatlar koʻrsatish;

investitsiya loyihalari va dasturlarini, shuningdek tashkilotlarning biznes-rejalarini ishlab chiqish va ekspertizaga qabul qilish;

Respublika markazi faoliyatini yaxshilashga yordam beradigan filiallarni tashkil etish;

Respublika markazining asosiy faoliyati bilan bogʻliq muammolarni yanada chuqur tahlil etish uchun, asosiy vazifalarga zarar yetkazmagan holda, tanlov grantlari, tashkilotlar buyurtmalari tomonidan moliyalashtiriladigan ilmiy-tadqiqot ishlarini bajarish;

bozorni isteʼmol tovarlari va ishlab chiqarish maqsadlaridagi mahsulotlar bilan toʻldirishga yordam beradigan kontraktlar tuzishga shartnoma asosida koʻmaklashish;

Respublika markazining faoliyati yoʻnalishlari boʻyicha tashqi iqtisodiy faoliyatni, shu jumladan xorijiy tadqiqot tashkilotlari va eksport qiluvchilar bilan toʻgʻridan toʻgʻrialoqalar asosida, amalga oshirish;

Respublika markaziga yuklangan vazifalarni bajarish uchun zarur boʻlgan axborotlarni davlat va xoʻjalik boshqaruvi organlaridan, birja va tijorat banklaridan olish;

Respublika markazining asosiy vazifalarini bajarish doirasida, uning faoliyati uchun zarur boʻlgan texnik vositalar, asbob-uskunalar, nou-xau va boshqa mahsulotlarni sotib olish;

mamlakatimizdagi va xorijiy tashkilotlar bilan marketing va konyunktura tadqiqotlari oʻtkazish, xizmat koʻrsatish yuzasidan shartnomalar tuzish;

tashkilotlar buyurtmasiga asosan isteʼmol tovarlari va ishlab chiqarish maqsadlaridagi mahsulotlarni import qilishning, sotib olish-sotishning maqbul variantini tanlash boʻyicha tavsiyalarni ishlab chiqish va taqdim etish tartibini belgilash;

Respublika markazi sohasi boʻyicha oʻzaro bogʻliq reja va dasturlar yuzasidan muhim ijtimoiy-iqtisodiy muammolarni hal etish maqsadida respublika va xorijiy mamlakatlar ilmiy-tadqiqot tashkilotlari bilan ilmiy hamkorlikni amalga oshirish;

konyunktura obzorlarini va ilmiy-uslubiy adabiyotlarni ayirboshlash, faoliyat sohasi oʻxshash boshqa tashkilotlar bilan hamkorlik qilish;

ilmiy xodimlarni tayyorlashni, shuningdek stajirovkalar orqali, shuningdek mutaxassislarni xorijiy mamlakatlarga yuborib ularning malakasini oshirishni tashkil etish;

yuridik va jismoniy shaxslardan homiylik (begʻaraz) yordami olish;

mahalliylashtirish va investitsiya loyihalari boʻyicha hujjatlarni koʻrib chiqishda loyiha tashabbuskorlaridan qoʻshimcha maʼlumotlarni soʻrab olish, shuningdek, zarurat boʻlganda, ular bilan amaliy kengashlar oʻtkazish.

9. Respublika markazi:

isteʼmol bozorining ahvoli toʻgʻrisidagi konyunktura obzorlarini va tahliliy maʼlumotnomalarni oʻz vaqtida tayyorlashni;

ham Oʻzbekiston Respublikasi Iqtisodiyot vazirligi uchun, ham tashkilotlarning buyurtmalari boʻyicha bajariladigan tahliliy ishlanmalarning yuqori sifatli va ilmiy asoslangan boʻlishini;

tashkilotlarning buyurtmalari asosida isteʼmol tovarlarining aniq turlarini va ishlab chiqarish maqsadlaridagi mahsulotlarni import qilish yuzasidan maqbul variantni tanlash va uning maqsadga muvofiqligi toʻgʻrisidagi tavsiyalarning oʻz vaqtida tayyorlanishini;

isteʼmol bozori konyunkturasi qisqa muddatli prognozlarining iqtisodiy asoslanganligini;

isteʼmol tovarlari va ishlab chiqarish maqsadlaridagi mahsulotlar importining maqbul variantlarini tanlash yuzasidan buyurtmachilar oldidagi majburiyatlarning soʻzsiz bajarilishini;

mahalliylashtirish, investitsiya loyihalari va dasturlari hujjatlarining belgilangan muddatda koʻrib chiqilishini taʼminlashga majbur.

10. Respublika markazi direktori Oʻzbekiston Respublikasi Iqtisodiyot vaziri tomonidan lavozimga tayinlanadi.

11. Respublika markazi direktori qonunchilikka, mazkur Nizomga va Oʻzbekiston Respublikasi Iqtisodiyot vazirligining buyruqlariga hamda vazirlik hayʼati qarorlariga muvofiq Respublika markazi faoliyatiga rahbarlik qiladi va uning natijalari uchun shaxsan javob beradi.

12. Direktor:

Respublika markazi tomonidan amalga oshiriladigan ishlanmalarning yuksak ilmiy-uslubiy darajasi va sifatini;

tovar bozori konyunkturasini tahlil etish va prognoz qilish uchun Respublika markazi mutaxassislari malaka va kasbiy darajasining doimiy oshib borishini;

Respublika markazi mutaxassislariga nisbatan qoʻyiladigan malaka talablari ishlab chiqilishi va tasdiqlanishini, ularning vakolatlari va funksional vazifalarini belgilashni;

Respublika markazi ijtimoiy rivojlanish masalalarining hal etilishini, xodimlarining mehnat va turmush sharoitlarini yaxshilashni taʼminlashga majbur.

13. Respublika markazi direktori quyidagi huquqlarga ega:

Respublika markazi faoliyatiga rahbarlikni oʻzi ishlab chiqqan va Oʻzbekiston Respublikasi Iqtisodiyot vazirligi hayʼati tasdiqlagan joriy va istiqbol rejalari hamda dasturlar asosida mustaqil ravishda belgilash va amalga oshirish;

Respublika markazi xodimlari bilan mehnat shartnomalari tuzish;

Respublika markazi xodimlarining lavozim maoshiga shaxsiy ustamalarni belgilash va olib tashlash;

Respublika markazi sohasiga muvofiq boʻlgan tashabbuskorlik va izlanishlar boʻyicha tadqiqotlar mavzuini ishlab chiqish;

mamlakatimizdagi va xorijiy tashkilotlarda Respublika markazi manfaatlarini ifodalash;

Respublika markazi mol-mulki va mablagʻlarini belgilangan tartibda tasarruf etish;

yuridik va jismoniy, shuningdek xorijiy shaxslar bilan shartnomalar tuzish;

tarkibiy boʻlinmalar rahbarlarining shaxsiy javobgarlik darajasini belgilash;

Respublika markazi faoliyatini taʼminlash uchun boshqa xoʻjalik masalalarini hal etish.

14. Respublika markazining taʼminoti quyidagi mablagʻlar hisobiga amalga oshiriladi:

Oʻzbekiston Respublikasi Davlat budjeti — qonunchilikda nazarda tutilgan miqdorda Respublika markazi xodimlari mehnatiga haq toʻlash xarajatlari boʻyicha;

Budjetdan tashqari jamgʻarma — boshqa xarajatlar boʻyicha.

Respublika markazi xodimlari mehnatiga haq toʻlash, shu jumladan lavozim maoshlari, lavozim maoshiga 20 foiz ustamalar (ragʻbatlantirish koeffitsiyenti), shuningdek mukofotlash va moddiy yordam koʻrsatish xarajatlari qonunchilikda nazarda tutilgan shartlar asosida Oʻzbekiston Respublikasi Davlat budjeti mablagʻlari hisobidan qoplanadi.

15. Oʻzbekiston Respublikasi Davlat budjeti mablagʻlari, shuningdek shartnoma asosida bajariladigan ishlar va koʻrsatilgan xizmatlar uchun olingan daromadlar va qonunchilikda taqiqlanmagan boshqa manbalar Respublika markazi mol-mulkini shakllantirish manbalari hisoblanadi.

16. Respublika markazi belgilangan tartibda buxgalteriya, statistika hisobi va hisobotini yuritadi.

17. Respublika markazini qayta tashkil etish va tugatish qonun hujjatlarida belgilangan tartibda amalga oshiriladi.