Xorijiy investitsiyalarni jalb etish jarayonlarini faollashtirish, investitsiya muhitini yaxshilash yuzasidan takliflar ishlab chiqish, shuningdek Hukumat tomonidan yoki uning kafolati ostida jalb qilingan kreditlar va investitsiyalarga xizmat koʻrsatish va ularni jalb etish mexanizmini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasi huzurida xorijiy investitsiyalar va kreditlar masalalari boʻyicha Idoralararo kengash 1-ilovaga* muvofiq tashkil etilsin.

2. Oʻzbekiston Respublikasi Vazirlar Mahkamasi huzuridagi xorijiy investitsiyalar va kreditlar masalalari boʻyicha Idoralararo kengash toʻgʻrisidagi Nizom 2-ilovaga muvofiq tasdiqlansin.

3. Quyidagilar Idoralararo kengashning asosiy vazifalari etib belgilansin:

investitsiya muhitini tizimli tahlil etish va uni yaxshilash yuzasidan takliflar ishlab chiqish hamda iqtisodiyotning ustuvor tarmoqlariga xorijiy investitsiyalarni jalb etishni faollashtirish;

vakolatli ekspertiza organlarining xulosalari asosida xorijiy investitsiyalar va Hukumat kafolati ostida kreditlar jalb etgan holda investitsiya loyihalarini amalga oshirishning maqsadga muvofiqligi haqidagi takliflarni ishlab chiqish;

oʻzaro qiziqish uygʻotuvchi muammolarni muhokama qilish uchun respublikada va chet ellarda xalqaro konferensiyalar, seminarlar va biznes-forumlar (“Oʻzbekistonda biznes qiling”, “Oʻzbekistonning investitsiya imkoniyatlari” va boshqalar) muntazam ravishda oʻtkazilishini nazarda tutgan holda potensial investorlar va donor mamlakatlar bilan doimiy aloqalar oʻrnatish va bunday aloqalarni qoʻllab-quvvatlash;

jalb etilayotgan investitsiyalarni iqtisodiyot tarmoqlari va respublika mintaqalari boʻyicha maqbul taqsimlash yuzasidan takliflar tayyorlash;

Hukumat tomonidan va uning kafolati ostida jalb etilgan kreditlarning tizimli monitoringini olib borish va ular boʻyicha majburiyatlarga oʻz vaqtida xizmat koʻrsatilishini taʼminlash yuzasidan takliflar ishlab chiqish;

xorijiy investitsiyalar va kreditlar sohasida normativ-huquqiy bazani takomillashtirishga doir takliflar tayyorlash;

6. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

1. Oʻzbekiston Respublikasi Vazirlar Mahkamasi huzuridagi xorijiy investitsiyalar va kreditlar masalalari boʻyicha Idoralararo kengash (keyingi oʻrinlarda “Idoralararo kengash” deb yuritiladi) xorijiy investitsiyalarni jalb etish jarayonlarini faollashtirish, investitsiya muhitini yaxshilash yuzasidan takliflar ishlab chiqish, shuningdek Hukumat tomonidan yoki uning kafolati ostida jalb qilingan kreditlar va investitsiyalarga xizmat koʻrsatish va ularni jalb etish mexanizmini takomillashtirish maqsadida tashkil etiladi.

2. Idoralararo kengash oʻz faoliyatida Oʻzbekiston Respublikasi qonun hujjatlariga, Oʻzbekiston Respublikasi Prezidentining farmonlari va farmoyishlariga, Vazirlar Mahkamasining qarorlari va farmoyishlariga, shuningdek mazkur Nizomga amal qiladi.

Idoralararo kengash Oʻzbekiston Respublikasi Vazirlar Mahkamasiga hisobot beradi.

3. Quyidagilar Idoralararo kengashning asosiy vazifalari hisoblanadi:

investitsiya muhitini tizimli tahlil etish va uni yaxshilash yuzasidan takliflar ishlab chiqish hamda iqtisodiyotning ustuvor tarmoqlariga xorijiy investitsiyalar jalb etilishini faollashtirish;

vakolatli ekspertiza organlarining xulosalari asosida xorijiy investitsiyalar va Hukumat kafolati ostida kreditlar jalb etgan holda investitsiya loyihalarini amalga oshirishning maqsadga muvofiqligi haqidagi takliflarni ishlab chiqish;

oʻzaro qiziqish uygʻotuvchi muammolarni muhokama qilish uchun respublikada va chet ellarda xalqaro konferensiyalar, seminarlar va biznes-forumlar (“Oʻzbekistonda biznes qiling”, “Oʻzbekistonning investitsiya imkoniyatlari” va boshqalar) muntazam ravishda oʻtkazilishini nazarda tutgan holda potensial investorlar va donor mamlakatlar bilan doimiy aloqalar oʻrnatish va bunday aloqalarni qoʻllab-quvvatlash;

jalb etilayotgan investitsiyalarni iqtisodiyot tarmoqlari va respublika mintaqalari boʻyicha maqbul taqsimlash yuzasidan takliflar tayyorlash;

korxonalarning xususiy xorijiy investitsiyalar (xorijiy davlat fuqarolari boʻlgan jismoniy shaxslar, fuqaroligi boʻlmagan shaxslar va Oʻzbekiston Respublikasining chet elda doimiy yashaydigan fuqarolari, shuningdek xorijiy nodavlat yuridik shaxslar tomonidan amalga oshiriladigan investitsiyalar) jalb etiladigan korxonalar uchun qonun hujjatlarida nazarda tutilgan imtiyozlarni ularga tatbiq etish maqsadida iqtisodiyot tarmoqlariga muvofiqligini belgilash;

Hukumat tomonidan va uning kafolati ostida jalb etilgan kreditlarning tizimli monitoringini olib borish va ular boʻyicha majburiyatlarga oʻz vaqtida xizmat koʻrsatilishini taʼminlash yuzasidan takliflar ishlab chiqish;

xorijiy investitsiyalar va kreditlar sohasida normativ-huquqiy bazani takomillashtirishga doir takliflar tayyorlash;

4. Idoralararo kengashga yuklangan vazifalarni amalga oshirish uchun uning tarkibida quyidagi masalalar boʻyicha guruhlar tashkil etiladi:

xorijiy investitsiyalar va kreditlarni jalb etish;

investitsiya muhitini va xorijiy investorlarni huquqiy himoya qilish mexanizmlarini takomillashtirish;

investitsiya loyihalari samarali amalga oshirilishini va kreditlarga oʻz vaqtida xizmat koʻrsatilishining monitoringi va boshqa masalalar.

5. Ishchi guruhlar, Idoralararo kengashga yuklangan vazifalarga muvofiq, quyidagi funksiyalarni amalga oshiradilar:

vazirliklar, idoralar, tashkilotlar va ishchi guruh aʼzolarining takliflarini koʻrib chiqish;

tizimli muammolar aniqlangan taqdirda ularni hal etish uchun aniq takliflar ishlab chiqish;

Idoralararo kengashning koʻrib chiqishi uchun tegishli takliflar kiritish.

6. Idoralararo kengash va ishchi guruhlar zaruriyatga koʻra, biroq yil choragida kamida bir marta majlis oʻtkazadi.

7. Idoralararo kengash va ishchi guruhlar majlislari, basharti ularda ular aʼzolarining kamida uchdan ikki qismi hozir boʻlsa, huquqiy vakolatli hisoblanadi. Idoralararo kengash va ishchi guruhlar aʼzolari ularning majlislarida shaxsan hozir boʻlishi kerak. Idoralararo kengash va ishchi guruh aʼzosi xolisona sabablarga koʻra majlisda hozir boʻlmaganda uning vakolatli vakili ovoz berish huquqisiz majlisga yuborilishi mumkin.

8. Idoralararo kengashning navbatdagi majlisini oʻtkazish, majlisning kun tartibi toʻgʻrisidagi takliflar va barcha zarur hujjatlar tegishli ishchi guruhlarning rahbarlari tomonidan Idoralararo kengash aʼzolarining koʻrib chiqishi uchun Idoralararo kengash majlisi moʻljallanayotgan sanadan kamida besh kun oldin kiritiladi.

9. Idoralararo kengash va ishchi guruhlarning qarorlari, basharti ularning majlisda hozir boʻlgan aʼzolarining kamida 75 foizi ovoz bersa, qabul qilinadi hamda ikki ish kunida Idoralararo kengash va ishchi guruhlarning ovoz berishda qatnashgan barcha aʼzolari tomonidan imzolanadigan protokol bilan rasmiylashtiriladi. Idoralararo kengash va ishchi guruhlar aʼzolari protokolni imzolashda oʻz fikrlarini yozma shaklda ifodalashga haqlidir.

10. Xolisona sabablarga koʻra Idoralararo kengash majlisida ishtirok etmagan Idoralararo kengash va ishchi guruhlar aʼzolari Idoralararo kengashning har qanday qarori bilan tanishishga haqlidirlar, qabul qilingan qarorga rozi boʻlmagan taqdirda esa:

oʻz fikrini yozma shaklda ifodalashga;

qabul qilingan qarorni qayta koʻrib chiqish talabiga Idoralararo kengash barcha aʼzolarining kamida uchdan bir qismi qoʻshilishi sharti bilan qarorni qayta koʻrib chiqish maqsadida ushbu masala boʻyicha Idoralararo kengash majlisi takroran oʻtkazilishini talab qilishga haqlidir.

11. Ishchi guruhlar oʻz faoliyatini guruhlarning rahbarlari tomonidan tasdiqlanadigan ish rejasiga muvofiq tashkil etadilar.