Hujjat kuchini yo‘qotgan " " 22.02.2021
Oʻzbekiston Respublikasi Vazirlar Mahkamasining
qarori
AYoLLAR VA OʻSIB KELAYOTGAN AVLOD SOGʻLIGʻINI MUSTAHKAMLAShGA DOIR QOʻShIMChA ChORA-TADBIRLAR TOʻGʻRISIDA
 LexUZ sharhi
Mazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Vazirlar Mahkamasi qayd etadiki, aholini ijtimoiy muhofaza qilishni kuchaytirish, oila manfaatlarini taʼminlash, ayollar mavqeyini oshirish, sogʻlom avlodni shakllantirish boʻyicha amalga oshirilgan umumdavlat chora-tadbirlari respublikadagi ijtimoiy-demografik vaziyatni sezilarli darajada yaxshilash imkonini berdi. Oila instituti mustahkamlanmoqda, chaqaloqlar oʻlimi kamaymoqda, tugʻruq yoshining tarkibi yaxshilanmoqda, aholining uzoq umr koʻrishi darajasi oʻsmoqda.
Shu bilan birga, respublika mintaqalari boʻyicha aholining reproduktiv salomatligi koʻrsatkichlarining tahlili koʻrilayotgan chora-tadbirlar hali yetarli emasligini koʻrsatmoqda. Qoraqalpogʻiston Respublikasi, Qashqadaryo, Surxondaryo, Samarqand va Xorazm viloyatlari, Bandixon, Baxmal, Chiroqchi, Qoʻshrabot tumanlari va boshqa tumanlar aholisining reproduktiv sogʻligʻi koʻrsatkichlari respublika oʻrtacha koʻrsatkichlaridan koʻproq orqada qolmoqda.
Oilalarning tibbiy madaniyati darajasini yanada oshirish, ayollarning sogʻligʻini mustahkamlash, sogʻlom avlod tugʻilishi va ularni tarbiyalash uchun sharoitlar yaratish maqsadida Vazirlar Mahkamasi qaror qiladi:
Oldingi tahrirga qarang.
(1-band Oʻzbekiston Respublikasi Vazirlar Mahkamasining 2019-yil 23-fevraldagi 161-sonli qaroriga asosan oʻz kuchini yoʻqotgan — Qonun hujjatlari maʼlumotlari milliy bazasi, 23.02.2019-y., 09/19/161/2600-son)
Oldingi tahrirga qarang.
(2-band Oʻzbekiston Respublikasi Vazirlar Mahkamasining 2019-yil 23-fevraldagi 161-sonli qaroriga asosan oʻz kuchini yoʻqotgan — Qonun hujjatlari maʼlumotlari milliy bazasi, 23.02.2019-y., 09/19/161/2600-son)
3. Oʻzbekiston Respublikasi Sogʻliqni saqlash vazirligi, “Sogʻlom avlod uchun” jamgʻarmasi, Moliya vazirligi, Xalq taʼlimi vazirligi, Oliy va oʻrta maxsus taʼlim vazirligi, Madaniyat ishlari vazirligi, Mehnat va aholini ijtimoiy muhofaza qilish vazirligi, Davlat sport qoʻmitasi, Davlat matbuot qoʻmitasi, “Oʻzteleradio” kompaniyasi va boshqa tuzilmalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda bir oy muddatda oilada tibbiy madaniyatni oshirish, ayollarning sogʻligʻini mustahkamlash, sogʻlom avlod tugʻilishi va ularni tarbiyalashning ustuvor yoʻnalishlarini amalga oshirish boʻyicha chora-tadbirlarning maqsadli dasturini ishlab chiqsinlar va tasdiqlash uchun Respublika komissiyasiga taqdim etsinlar.
4. Oʻzbekiston Respublikasi Sogʻliqni saqlash vazirligi:
ayniqsa qishloq joylardagi tibbiyot muassasalari, tibbiy-ijtimoiy yordam brigadalarining qizlarga, ayollarga va yosh oilalarga tibbiy xizmat koʻrsatish sifatini oshirish, oilalarda tibbiy madaniyatni oshirish, ona va bola sogʻligʻini muhofaza qilish masalalarida ayollarga tibbiy maslahatlar berish boʻyicha ishlarini kuchaytirsin;
Vazirlar Mahkamasining Tashqi iqtisodiy aloqalar va xorijiy investitsiyalar departamenti, Tashqi iqtisodiy aloqalar vazirligi, xayriya jamgʻarmalari va Hukumatga qarashli boʻlmagan xalqaro tashkilotlar bilan birgalikda ayollarning reproduktiv sogʻligʻini yaxshilash boʻyicha aholini zarur zamonaviy tibbiyot preparatlari va vositalari bilan taʼminlash yuzasidan 2-ilovaga muvofiq muruvvat va homiylik yordamlarini jalb etish ishlarini faollashtirsin;
ushbu vositalar va ularni qoʻllash boʻyicha kompleks maslahat xizmatlari tegishli tibbiyot muassasalari orqali hamda turgʻun davolash-profilaktika muassasalarida dori-darmonlar va tibbiy buyumlari berilishi, hisobga olinishi hamda ulardan foydalanilishini nazorat qilishning amaldagi tartibiga muvofiq bepul asosda berilishini tashkil etsin;
ayniqsa tugʻilish, onalar va chaqaloqlar oʻlimi darajasi yuqori boʻlgan tumanlarda akusher-ginekolog kadrlar tarkibini mustahkamlasin, ularni zarur tibbiy asbob-anjomlar, zamonaviy preparatlar va vositalar bilan taʼminlasin;
Oʻzbekiston Respublikasi Oliy va oʻrta maxsus taʼlim vazirligi bilan birgalikda bir oy muddatda akusher-ginekolog vrachlar malakasini, shu jumladan respublikaning yetakchi klinikalarida va chet ellarda tajriba orttirish asosida uzluksiz oshirish, tibbiyot xodimlarining axborot manbalaridan, shu jumladan “Internet”dan foydalanish imkoniyatlarini kengaytirishning maxsus dasturini qabul qilsin.
5. Belgilab qoʻyilsinki, ayollarning reproduktiv sogʻligʻini yaxshilash uchun vositalar va preparatlar Davlat budjetida sogʻliqni saqlash muassasalarini mablagʻ bilan taʼminlash uchun nazarda tutilgan har yilgi mablagʻlar doirasida ushbu maqsadlarga maxsus ajratilgan mablagʻlar, shuningdek 2-ilovaga muvofiq hajmlarda Hukumatga qarashli boʻlmagan xalqaro tashkilotlar grantlari hisobiga sotib olinadi hamda Oʻzbekiston Respublikasi Sogʻliqni saqlash vazirligi va uning joylardagi hududiy organlari tomonidan davolash, profilaktika va konsultatsiya muassasalari oʻrtasida taqsimlanadi.
6. Oʻzbekiston Respublikasi Adliya vazirligi, Sogʻliqni saqlash vazirligi, Mehnat va aholini ijtimoiy muhofaza qilish vazirligi, Xalq taʼlimi vazirligi, Oliy va oʻrta maxsus taʼlim vazirligi boshqa manfaatdor vazirliklar va idoralar bilan birgalikda Oʻzbekiston Respublikasi Vazirlar Mahkamasiga qizlarning balogʻatga toʻlmagan yoshda nikohdan oʻtishini istisno etuvchi zarur takliflar kiritsinlar, keyinchalik takliflar Oliy Majlisga kiritilsin.
7. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi 2002-2003-oʻquv yilidan boshlab umumtaʼlim maktablarining 10-11-sinflari oʻquvchilarining hamda akademik litseylar va kasb-hunar kollejlarida oʻqitishning 2-3 yillari oʻquv dasturlariga sogʻlom oila va nikoh, sogʻlom avlod tugʻilishi va uni tarbiyalash masalalari boʻyicha mutaxassis tibbiy xodimlar tomonidan oʻtkaziladigan maxsus fakultativ darslar kiritsinlar.
8. Oʻzbekiston Respublikasi Davlat matbuot qoʻmitasi, “Oʻzteleradio” kompaniyasi, Oʻzbekiston Milliy axborot agentligi, respublika ommaviy axborot vositalari ushbu qarorda nazarda tutilayotgan chora-tadbirlarning roli va ahamiyati keng tushuntirilishini taʼminlasinlar.
9. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2002-yil 25-yanvar,
32-son
Vazirlar Mahkamasining
2002-yil 25-yanvardagi 32-son qaroriga
2-ILOVA
2002—2005-yillarda ayollarning reproduktiv sogʻligʻini mustahkamlashga yaxshilash boʻyicha zamonaviy tibbiy preparatlar va vositalar xarid qilish hajmlari va mablagʻ bilan taʼminlash manbalari

(Oʻzbekiston Respublikasi Qonun hujjatlari toʻplami, 2002-y., 2-son, 21-modda; 2004-y., 30-son, 344-modda; Qonun hujjatlari maʼlumotlari milliy bazasi, 23.02.2019-y., 09/19/161/2600-son)