Oʻzbekiston Respublikasi Vazirlar Mahkamasining

qarori

Naslli mahsulotni (materialni) eksport va import qilish tartibi toʻgʻrisidagi Nizomni tasdiqlash haqida

“Naslchilik toʻgʻrisida”gi Oʻzbekiston Respublikasi Qonuniga muvofiq hamda Oʻzbekiston Respublikasi Prezidentining “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash toʻgʻrisida” 2013-yil 15-iyuldagi PQ-2003-son qarorini ijro etish yuzasidan Vazirlar Mahkamasi qaror qiladi:

1. Naslli mahsulotni (materialni) eksport va import qilish tartibi toʻgʻrisidagi nizom ilovaga muvofiq tasdiqlansin.

2. Vazirliklar va idoralar bir oy muddatda oʻzlari tomonidan qabul qilingan normativ-huquqiy hujjatlarni ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash hamda isteʼmol tovarlari masalalari axborot-tahlil departamentiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2014-yil 8-sentabr,

252-son

Vazirlar Mahkamasining 2014-yil 8-sentabrdagi 252-son qaroriga
ILOVA

Naslli mahsulotni (materialni) eksport va import qilish tartibi toʻgʻrisida

NIZOM

I. Umumiy qoidalar

1. Ushbu Nizom chorvachilikda naslchilikni yanada rivojlantirish va samaradorligini oshirish maqsadida ishlab chiqilgan hamda naslchilik subyektlari tomonidan naslli mahsulotni (materialni) eksport va import qilish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

naslchilik subyektlari — naslchilik ishi bilan shugʻullanuvchi ilmiy-tadqiqot muassasalari, korxonalar va xoʻjaliklar, seleksiya markazlari, ippodromlar, immunogenetik nazorat laboratoriyalari, nazorat-sinov stansiyalari, embrionlarni koʻchirib oʻtkazish (transplantatsiya) markazlari hamda boshqa yuridik va jismoniy shaxslar — naslli mahsulot egalari;

nasldor hayvon — kelib chiqishi hujjatlar bilan tasdiqlangan, muayyan zotni takror koʻpaytirish uchun foydalaniladigan va belgilangan tartibda roʻyxatga olingan hayvon;

naslli mahsulot (material) — nasldor hayvon, uning urugʻi va embrionlari, nasldor tuxum, ipak qurti urugʻi;

sertifikat — nasldor hayvonning kelib chiqishi, mahsuldorligi va boshqa sifatlarini, shuningdek urugʻ yoki embrionning sifatini tasdiqlovchi hujjat;

krosslar — turli liniyalarga mansub hayvonlarni juftlash natijasida olingan nasl;

liniyalar — tipi va mahsuldorligiga koʻra oʻxshash boʻlgan, oʻz nasli orqali poda va zotga yaxshi taʼsir koʻrsatishning yuqori imkoniyatlariga ega boʻlgan hayvonlar;

eksport qiluvchi — naslli mahsulotni (materialni) chetga olib chiquvchi naslchilik subyektlari;

import qiluvchi — naslli mahsulotni (materialni) chetdan olib kiruvchi naslchilik subyektlari.

II. Naslli mahsulotni (materialni) eksport va import qilishning asosiy shartlari

3. Naslli mahsulotni (materialni) eksport va import qilish:

2-ilovaga muvofiq chetga olib chiqiladigan naslli mahsulot (material);

3-ilovaga muvofiq chetdan olib kiriladigan naslli mahsulot (material) roʻyxatlariga muvofiq ushbu Nizomga 1-ilovaga binoan sxema boʻyicha amalga oshiriladi.

Oldingi tahrirga qarang.

Qonunchilikka muvofiq chetga olib chiqish yoki chetdan olib kirish taqiqlangan naslli mahsulotni (materialni) eksport yoki import qilishga yoʻl qoʻyilmaydi.

(3-bandning toʻrtinchi xatboshisi Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)

LexUZ sharhi

Qarang: mazkur Nizomga 2, 3-ilovalar.

4. Naslli mahsulotni (materialni) tashqi savdo kontraktlari boʻyicha eksport yoki import qiluvchi naslchilik subyektlari tomonidan naslli mahsulot (material) toʻgʻrisidagi maʼlumotlar elektron raqamli imzodan foydalangan holda Interaktiv davlat xizmatlari yagona portali orqali Tashqi savdo operatsiyalari yagona elektron axborot tizimiga elektron shaklda kiritiladi.

Oldingi tahrirga qarang.

5. Naslli mahsulotni (materialni) bojxonada rasmiylashtirishda eksport qiluvchi (import qiluvchi) qonunchilikda belgilangan hujjatlarga qoʻshimcha ravishda chetga olib chiqiladigan (chetdan olib kiriladigan) naslli mahsulotga (materialga) sertifikatni hamda naslli mahsulot (material) veterinariya talablariga muvofiqligini tasdiqlovchi hujjatlarni taqdim etgan holda davlat bojxona xizmati organlariga murojaat qiladi.

(5-band Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)

6. Eksport qiluvchi (import qiluvchi) naslli mahsulotni (materialni) xalqaro talablarga muvofiq maxsus transport vositasida va uning hayotiyligini taʼminlash uchun barcha zarur vositalar bilan jihozlangan maxsus tarada tashishni taʼminlashi kerak.

Oldingi tahrirga qarang.

7. Naslli mahsulotni (materialni) chetga olib chiqish va chetdan olib kirishda yerdagi hayvonlar sogʻligʻi Xalqaro kodeksining veterinariya talablari bajarilishini nazorat qilish Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi tomonidan amalga oshiriladi.

(7-bandning birinchi xatboshisi Oʻzbekiston Respublikasi Vazirlar Mahkamasining 2023-yil 28-dekabrdagi 686-sonli qarori tahririda — Qonunchilik maʼlumotlari milliy bazasi, 29.12.2023-y., 09/23/686/1003-son)

Oldingi tahrirga qarang.

Naslli mahsulotni (materialni) chetga olib chiqish va chetdan olib kirishda veterinariya hujjatlari Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi tomonidan tasdiqlanadigan qoidalarga muvofiq rasmiylashtiriladi.

(7-bandning ikkinchi xatboshisi Oʻzbekiston Respublikasi Vazirlar Mahkamasining 2023-yil 28-dekabrdagi 686-sonli qarori tahririda — Qonunchilik maʼlumotlari milliy bazasi, 29.12.2023-y., 09/23/686/1003-son)

8. Import qiluvchi import qilinadigan naslli mahsulot (material) quyidagi talablarga muvofiq boʻlishini taʼminlaydi:

Oldingi tahrirga qarang.

a) goʻsht va sut qoramolchiligida — yoshi eng koʻpi bilan 18 oygacha boʻlgan zotdor urgʻochi buzoqlar, boʻgʻoz boʻlgan va kutilayotgan tugʻish vaqtidagi yoshi 36 oydan koʻp boʻlmaydigan, homilaning otasi toʻgʻrisidagi qoʻshimcha maʼlumotlar boʻlgan gʻunajinlar tanlanadi:

(8-band “a” kichik bandining birinchi xatboshisi Oʻzbekiston Respublikasi Vazirlar Mahkamasining 2021-yil 12-iyuldagi 434-sonli qarori tahririda — Qonunchilik maʼlumotlari milliy bazasi, 12.07.2021-y., 09/21/434/0659-son)

Oldingi tahrirga qarang.

(8-band “a” kichik bandining ikkinchi xatboshisi Oʻzbekiston Respublikasi Vazirlar Mahkamasining 2021-yil 12-iyuldagi 434-sonli qaroriga asosan chiqarilgan — Qonunchilik maʼlumotlari milliy bazasi, 12.07.2021-y., 09/21/434/0659-son)

nasldor buqalar: sof zotli, buqalar onasining 305 kunlik (laktatsiya davomidagi) sut mahsuldorligi 10 000 kilogrammdan kam boʻlmasligi va uning tarkibidagi yogʻ miqdori 3,6 foizni, oqsil miqdori 3,2 foizni tashkil qilishi zarur;

podani toʻldiruvchi naslli yosh buqalar: sof zotli, buqalar onasining 305 kunlik (laktatsiya davomidagi) sut mahsuldorligi 11 000 kilogrammdan kam boʻlmasligi va uning tarkibidagi yogʻ miqdori 3,6 foizni, oqsil miqdori 3,2 foizni tashkil qilishi zarur;

Oldingi tahrirga qarang.

b) qoʻychilik va echkichilikda — mustahkam konstitutsiyali, Oʻzbekiston Respublikasining tuproq-iqlim sharoitlarida urchitish uchun mos keladigan yoshi 6 oylikdan qam boʻlmagan nasldor qoʻy va echkilar tanlanadi:

(8-band “b” kichik bandining birinchi xatboshisi Oʻzbekiston Respublikasi Vazirlar Mahkamasining 2021-yil 12-iyuldagi 434-sonli qarori tahririda — Qonunchilik maʼlumotlari milliy bazasi, 12.07.2021-y., 09/21/434/0659-son)

nasldor qoʻchqorlar va takalarning yoshi 18 oygacha boʻlishi, podani toʻldiruvchi yosh nasldor qoʻchqorlar va takalarning yoshi 6 oylikdan 12 oylikgacha boʻlishi hamda Oʻzbekiston Respublikasida urchitiladigan zotlarga mos kelishi zarur;

v) tuyachilikda — yosh naslli tuyalarning yoshi 1 — 3 yoshgacha boʻlishi, shuningdek nasldor tuyalarning yoshi 36 oylikdan kam boʻlmasligi zarur hamda ularning zoti Oʻzbekiston Respublikasining tuproq-iqlim sharoitlarida urchitishga muvofiq keladiganlari tanlanadi;

g) yilqichilikda — mustahkam konstitutsiyali, Oʻzbekiston Respublikasining tuproq-iqlim sharoitlarida urchitish uchun mos keladigan yosh va nasldor aygʻirlar tanlanadi:

yuqori ish unumdorligiga ega boʻlgan ogʻir yuk tortuvchi, salt miniladigan, aravaga qoʻshiladigan zotlar tanlanadi;

benuqson tashqi tuzilishga, yuqori chopqirlikdagi sof qonli salt miniluvchi zotlar xususiyatiga ega boʻlgan salt miniladigan otlar; sportchi otlar — ushbu zotdagi otlar uchun belgilangan talablar boʻyicha ippodromlarda tegishli sinovlardan oʻtkazilgandan soʻng tanlanadi;

d) choʻchqachilikda — yoshi 6 — 8 oylik, tirik vazni 100 kilogrammdan kam boʻlmagan va gavdasi uzun boʻlgan, Oʻzbekiston Respublikasining tuproq-iqlim sharoitlarida urchitish uchun zot standartlariga muvofiq boʻlgan nasldor choʻchqalar tanlanadi;

e) parrandachilikda:

yoshi 1 — 120 kunlik tuxum yoʻnalishidagi joʻjalar, yoshi 1 — 160 kunlik goʻsht yoʻnalishidagi joʻjalar, yoshi 1 — 210 kunlik kurkalar, yoshi 1 — 175 kunlik oʻrdaklar, yoshi 1 — 210 kunlik gʻozlar, yoshi 1 — 195 kunlik sesarkalar, yoshi 1 — 42 kunlik bedanalar, yoshi 1 — 240 kunlik fazanlar, yoshi bir kunlikdan 24 oylikkacha boʻlgan tuyaqushlar mazkur krossining normativ tirik vazniga muvofiq tanlanadi;

vazni 52 — 72 gramm doirasidagi tovuqlar, vazni 75 — 90 gramm boʻlgan yengil zotli kurkalar va vazni 20 — 100 gramm boʻlgan ogʻir zotli kurkalar, vazni 70 — 90 gramm boʻlgan yengil zotli oʻrdaklar va vazni 75 — 95 gramm boʻlgan ogʻir zotli oʻrdaklar, vazni 130 — 180 gramm boʻlgan yengil zotli gʻozlar va vazni 150 — 220 gramm boʻlgan ogʻir zotli gʻozlar, vazni 39 — 50 gramm boʻlgan sesarkalar, vazni 10 — 12 gramm boʻlgan bedanalar, vazni 30 — 35 gramm boʻlgan fazanlar, vazni 700 — 1900 gramm boʻlgan tuyaqushlarning tuxum va goʻsht yoʻnalishidagi krosslarining inkubatsiyaga qoʻyiladigan tuxumlari tanlanadi;

j) baliqchilikda — genetik markirovka qilingan zot va zot guruhlaridagi yuqori mahsuldor ota-onalardan olingan, yuqumli va invazion kasalliklarga chidamli nasldor zotli baliqlar (tirik baliqlar va otalantirilgan uvuldiriqlar) tanlanadi;

z) asalarichilikda — naslli asalarilarni tanlashda uyasiz paketlardagi asalari oilalari va maxsus paketlardagi mahsuldor ona asalarilar tanlanadi;

200 milligrammdan kam boʻlmagan, yirik va qanotlari yaxshi rivojlangan ona asalarilar tanlanadi;

tanlash belgilari: ona asalari yirik, dumaloq, dum qismiga qarab bir tekisda koʻrinishga ega va keng koʻkrakli boʻlishi kerak;

i) ipakchilikda — jonlanishi 95 foizdan kam boʻlmagan, xalqaro standartga koʻra bitta kassetaning ogʻirligi 14,5 yoki 29 grammga mos ravishda sellyulyar usulda olingan, zararlanmagan sogʻlom urugʻlarni tanlash;

k) moʻynachilikda — yuqori mahsuldor ota-onalardan olingan, nasldor moʻynali zotlar tanlanadi;

norkalar, nutrilar, ondatralar, tulkilar:

zotdorligi — sof zotli;

moʻyna qoplamining sifati va rangi — zotga xos;

quyonlar:

zotdorligi — sof zotli;

moʻyna qoplamining sifati va rangi — zotga xos;

oʻlchami — yirik, tana tuzilishi –mustahkam;

belgilarining majmui klassi — elita;

l) embrionlar va urugʻlik materiallarni tanlashda har bir zotning eng yuqori mahsuldorlikka ega boʻlgan barcha turdagi hayvonlarning embirionlari va urugʻlik materiallari tanlab olinadi.

Oldingi tahrirga qarang.

Bunda import qiluvchi Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasiga eksport qiluvchi mamlakatlarda karantin muddati tugagunga qadar chetdan olib kelinadigan zotdor hayvonlarning kamida uchta avlodining kelib chiqishini tasdiqlovchi hujjatini taqdim etishi shart.

(8-band “l” kichik bandining ikkinchi xatboshisi Oʻzbekiston Respublikasi Vazirlar Mahkamasining 2023-yil 11-dekabrdagi 653-sonli qarori tahririda — Qonunchilik maʼlumotlari milliy bazasi, 13.12.2023-y., 09/23/653/0931-son)

9. Chetdan olib kelingan nasldor hayvonlar veterinariya talablariga muvofiq belgilangan tartibda karantinga qoʻyiladi.

10. Karantin muddati tamom boʻlgandan soʻng naslli mahsulot (material) belgilangan tartibda davlat roʻyxatidan oʻtkaziladi.

III. Naslli mahsulotlar (material) eksporti va importini nazorat qilish

Oldingi tahrirga qarang.

11. Naslli mahsulot (material) eksporti va importini nazorat qilish Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi tomonidan belgilangan tartibda amalga oshiriladi.

(11-band Oʻzbekiston Respublikasi Vazirlar Mahkamasining 2023-yil 11-dekabrdagi 653-sonli qarori tahririda — Qonunchilik maʼlumotlari milliy bazasi, 13.12.2023-y., 09/23/653/0931-son)

IV. Yakunlovchi qoida

Oldingi tahrirga qarang.

12. Ushbu Nizom talablari buzilishida aybdor boʻlgan shaxslar qonunchilikda belgilangan tartibda javob beradilar.

(12-band Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)

Naslli mahsulotni (materialni) eksport va import qilish tartibi toʻgʻrisidagi nizomga
1-ILOVA

Naslli mahsulotni (materialni) eksport va import qilish

SXEMASI

Oldingi tahrirga qarang.

Bosqichlar	Tadbirlar	Masʼullar	Muddatlari

Eksport

I bosqich	Naslli materialni ssrtifikatlash uchun naslchilik ishlari boʻyicha hududiy veterinariya va chorvachilikni rivojlantirish boshqarmalariga zarur hujjatlarni taqdim etgan xolda murojaat qilish.	Naslchilik subyektlari	Naslli mahsulot (material) belgilangan muddatlarda bonitirovka qilingandan keyin

	Naslli mahsulot (material)ning kelib chiqishi, mahsuldorligi va boshqa sifatlarini tasdiqlaydigan tegishli sertifikatni berish.	Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi	3 kun mobaynida

II bosqich	Naslli mahsulotni (materialni) eksport qilish yuzasidan xorijiy sheriklar bilan shartnoma tuzish.	Naslchilik subyektlari	Zarurat boʻlganda

	Tashki savdo kontraktlari boʻyicha elektron shakldagi tegishli maʼlumotlarni Tashqi savdo operatsiyalarining yagona elektron axborot tizimiga kiritish.		Kontrakt tuzilgandan keyin

III bosqich	Xalqaro talablarga muvofiq naslli mahsulotni (materialni) karantin qilish va eksport qilish uchun veterinariya ruxsatnomalarini rasmiylashtirish, keyinchalik belgilangan tartibda veterinariya sertifikatlari berish.	Davlat veterinariya xizmati	belgilangan tartibda 4 soat mobaynida

IV bosqich	Keyinchalik eksport qilish uchun naslli mahsulotni (materialni) belgilangan tartibda bojxonada rasmiylashtirish.	Bojxona xizmati organlari	Bir ish kuni mobaynida

Bosqichlar	Tadbirlar	Masʼullar	Muddatlari

Import

I bosqich	Naslli mahsulotni (materialni) import qilish yuzasidan xorijiy sheriklar bilan shartnomalar tuzish.	Naslchilik subyektlari	Zarurat boʻlganda

	Tashqi savdo kontraktlari boʻyicha elektron shakldagi tegishli maʼlumotlarni Tashqi savdo operatsiyalarining yagona elektron axborot tizimiga kiritish.		Kontrakt tuzilgandan keyin

II bosqich	Oʻzbekiston Respublikasiga yetkazib berish maqsadida naslli mahsulotni (materialni) eksport qiluvchi mamlakatda tanlash va karantin qilish.	Naslchilik subyektlari, Davlat veterinariya xizmati	30 kun mobaynida

	Naslli mahsulotni (materialni) Oʻzbekiston Respublikasi va tranzit davlatlar hududiga olib kirish uchun veterinariya ruxsatnomalarini xalqaro talablarga muvofiq belgilangan tartibda rasmiylashtirish hamda zotdor hayvonlarning kamida uchta avlodining kelib chiqishini tasdiqlovchi hujjatini vakolatli organga taqdim etish.		Karantin muddati tugagungacha

III bosqich	Naslli mahsulotni (materialni) belgilangan tartibda bojxonada rasmiylashtirish.	Bojxona xizmati organlari	Uch ish kuni mobaynida

IV bosqich	Oʻzbekiston Respublikasi hududiga olib kirilgandan keyin naslli mahsulotni (materialni) veterinariya talablariga muvofiq karantin qilish va keyinchalik belgilangan tartibda veterinariya sertifikatlari berish.	Naslchilik subyektlari, Davlat veterinariya xizmati	belgilangan tartibda 4 soat mobaynida

V bosqich	Naslli mahsulotni (materialni) belgilangan tartibda davlat roʻyxatiga olish.	Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi	Karantin tugagan kundan keyin

(1-ilova Oʻzbekiston Respublikasi Vazirlar Mahkamasining 2023-yil 28-dekabrdagi 686-sonli qarori tahririda — Qonunchilik maʼlumotlari milliy bazasi, 29.12.2023-y., 09/23/686/1003-son)

Naslli mahsulotni (materialni) eksport va import qilish tartibi toʻgʻrisidagi nizomga
2-ILOVA

Chetga olib chiqiladigan naslli mahsulot (material)

ROʻYXATI

T/r	TIF TN kodi	Nomi	Oʻlchov birligi
1.	0301	Sof zotli nasldor baliqlar	ta
2.	0407	Zotdor tuxumlar	ta
3.	0511 10 000 0	Sof zotli nasldor buqa urugʻi	doza
4.	0511 91 901 1	Osyotr baliqlarining otalantirilgan uvuldirigʻi	kg
5.	0511 91 901 9	Boshqa baliqlarning otalantirilgan uvuldiriqlari	kg
6.	0511 91 902 0	Kriokonservalangan baliqlar urugʻi	mg
7.	0511 99 851 0	Tut ipak qurti urugʻi	gramm
8.		Embrionlar:
8.1.	0511 99 852 1	otlarning embironlari	ta
8.2.	0511 99 852 2	qoʻy yoki echkilarning emribonlari	ta
8.3.	0511 99 852 3	qoramollarning emribonlari	ta
8.4.	0511 99 852 9	boshqa hayvonlarning emribonlari	ta
9.		Quyidagilarning urugʻi:
9.1.	0511 99 853 1	aygʻirlarning urugʻi	doza
9.2.	0511 99 853 2	qoʻchqor va takalarning urugʻi	doza
9.3.	0511 99 853 9	boshqa hayvonlarning urugʻi	doza
10.	0511 99 859 1	Osyotr baliqlarining chavoqlari	kg

Naslli mahsulotni (materialni) eksport va import qilish tartibi toʻgʻrisidagi nizomga
3-ILOVA

Chetdan olib kiriladigan naslli mahsulot (material)

ROʻYXATI

T/r	TIF TN kodi	Nomi	Oʻlchov birligi
1.	0101 21 000 0	Sof zotli nasldor otlar, tirik	bosh
2.	0101 30 000 0	Sof zotli nasldor eshaklar, tirik	bosh
3.	0101 90 000 0	Sof zotli nasldor xachirlar, tirik	bosh
4.		Sof zotli nasldor uy qoramollari, tirik	bosh
4.1.	0102 21 100 0	Gʻunajinlar (birinchi bolalashgacha boʻlgan qoramolning urgʻochisi)	bosh
4.2.	0102 21 300 0	Sof zotli nasldor sigirlar	bosh
4.3.	0102 21 900 0	Boshqa sof zotli nasldor uy qoramollari	bosh
5.	0102 31 000 0	Sof zotli nasldor buyvollar	bosh
6.	0102 90 200 0	Boshqa sof zotli nasldor qoramollar	bosh
7.	0103 10 000 0	Sof zotli nasldor choʻchqalar	bosh
8.	0104 10 100 0	Sof zotli nasldor qoʻylar	bosh
9.	0104 20 100 0	Sof zotli nasldor echkilar	bosh
10.	0105	Sof zotli naslli tirik: uy parrandalari yaʼni, tovuqlar (Gallusdomestics), oʻrdaklar, gʻozlar, kurkalar va sesarkalar	bosh
11.	0106	Boshqa sof zotli nasldor tirik hayvonlar	bosh
12.	0301	Sof zotli nasldor baliqlar	ta
13.	0407	Zotdor tuxumlar	ta
14.	0511 10 000 0	Sof zotli nasldor buqa urugʻi	doza
15.	0511 91 901 1	Osyotr baliqlarining otalantirilgan uvuldirigʻi	kg
16.	0511 91 901 9	Boshqa baliqlarning otalantirilgan uvuldirigʻi	kg
17.	0511 91 902 0	Kriokonservalangan baliq urugʻi	mg
18.	0511 99 851 0	Tut ipak qurti urugʻlari	gramm
19.		Embrionlar:
19.1.	0511 99 852 1	otlarning embrionlari	dona
19.2.	0511 99 852 2	qoʻy va echkilarning embrionlari	dona
19.3.	0511 99 852 3	qoramollarning embrionlari	dona
19.4.	0511 99 852 9	boshqa hayvonlarning embrionlari	dona
20.		Quyidagilarning urugʻi:
20.1.	0511 99 853 1	aygʻirlarning urugʻi	doza
20.2.	0511 99 853 2	qoʻchqorlar va takalarning urugʻi	doza
20.3.	0511 99 853 9	boshqa hayvonlarning urugʻi	doza
21.	0511 99 859 1	osyotr baliqlarining chavoqlari	kg

(Oʻzbekiston Respublikasi qonun hujjatlari toʻplami, 2014-y., 37-son, 469-modda; 2017-y., 33-son, 857-modda; Qonun hujjatlari maʼlumotlari milliy bazasi, 25.09.2018-y., 09/18/759/2026-son; Qonun hujjatlari maʼlumotlari milliy bazasi, 28.06.2019-y., 09/19/532/3344-son, 13.07.2019-y., 09/19/575/3415-son; Qonunchilik maʼlumotlari milliy bazasi, 12.07.2021-y., 09/21/434/0659-son; 05.04.2022-y., 09/22/153/0266-son; 11.04.2023-y., 09/23/148/0205-son; 13.12.2023-y., 09/23/653/0931-son; 29.12.2023-y., 09/23/686/1003-son)