Oliy taʼlimning ikki boʻgʻinli tizimini yanada takomillashtirish asosida respublika iqtisodiyoti sohalari va tarmoqlarida talab etiladigan ixtisosliklar boʻyicha yuqori malakali mutaxassislarni sifatli tayyorlashni taʼminlash, kirish test sinovlari mexanizmini tubdan yaxshilash hisobiga tanlangan ixtisosliklar boʻyicha bakalavriatga kirayotgan abituriyentlarning bilim darajasini baholash sifati va xolisligini oshirish, oliy malakali ilmiy-pedagogik kadrlarni tayyorlashning boshlangʻich davri sifatida magistratura rolini kuchaytirish maqsadida:

1. Maʼlumot uchun qabul qilinsinki, Oʻzbekiston Respublikasi Iqtisodiyot vazirligi Oliy va oʻrta maxsus taʼlim vazirligi, Xalq taʼlimi vazirligi, Mehnat va aholini ijtimoiy muhofaza qilish vazirligi, Moliya vazirligi boshqa manfaatdor vazirliklar, idoralar, uyushma va kompaniyalar, mahalliy davlat hokimiyati organlari bilan birgalikda:

iqtisodiy rivojlanish, iqtisodiyotni modernizatsiya qilish va tarkibiy oʻzgartirish istiqbollarini hisobga olgan holda, taʼlim yoʻnalishlari va aniq mutaxassisliklar boʻyicha real iqtisodiyot tarmoqlari va sohalarining amalda oliy maʼlumotli mutaxassislar bilan taʼminlanganligi tanqidiy oʻrganib chiqildi;

Oʻzbekiston Respublikasi Prezidentining 2011-yil 20-maydagi PQ-1533-sonli qarori bilan tasdiqlangan 2011 — 2016-yillarda oliy taʼlim muassasalarining moddiy-texnika bazasini modernizatsiya qilish va mutaxassislar tayyorlash sifatini tubdan yaxshilash Dasturi amalga oshirilishini hisobga olgan holda, tarmoqlar va mintaqalar doirasida bakalavriat yoʻnalishlari hamda magistratura mutaxassisliklarini tayyorlash boʻyicha respublikaning oliy taʼlim muassasalariga iqtisodiyot tarmoqlari va sohalarida talab etilayotgan yoʻnalishlar boʻyicha 2014/2015 oʻquv yilida qabul kvotalariga oid takliflar ishlab chiqildi.

2. 2014/2015 oʻquv yili uchun:

bakalavrlarni 57 907 nafar, shu jumladan davlat grantlari boʻyicha — 19 120 va toʻlov-kontrakt asosida — 38 787 nafar miqdorida, 1-ilovaga* muvofiq;

magistrlarni 5 000 nafar, shu jumladan davlat grantlari boʻyicha — 1 548 va toʻlov-kontrakt asosida — 3 452 nafar miqdorida, 2-ilovaga* muvofiq;

Toshkent kimyo-texnologiya instituti (Qoʻngʻirot boʻlimi)ning maxsus sirtqi boʻlimida bakalavrlarni tayyorlash davlat grantlari boʻyicha 65 nafar va Toshkent axborot texnologiyalari universitetining maxsus sirtqi boʻlimida — 50 nafar, shu jumladan davlat grantlari boʻyicha — 15 nafar va toʻlov-kontrakt asosida — 35 nafar qabul qilish umumiy kvotalari 3-ilovaga* muvofiq belgilansin.

3. Oʻzbekiston Respublikasi Prezidentining 2014-yil 30-apreldagi PP-2170-sonli qarori bilan tashkil etilgan 2014/2015 oʻquv yilida Oʻzbekiston Respublikasi taʼlim muassasalariga qabul qilish boʻyicha Davlat komissiyasiga oliy taʼlim muassasalariga kirish chogʻida bakalavriat yoʻnalishlari va magistratura mutaxassisliklari boʻyicha abituriyentlar toʻplagan ballarning reyting baholanishini hisobga olgan holda bakalavriat va magistraturaga belgilangan umumiy qabul kvotalari doirasida oliy taʼlim muassasalarining qabul parametrlariga oʻzgartirishlar kiritish huquqi berilsin.

4. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, tasarrufida oliy taʼlim muassasalari boʻlgan vazirliklar va idoralar Oʻzbekiston Respublikasi Vazirlar Mahkamasi huzuridagi Davlat test markazi bilan birgalikda bir hafta muddatda oʻzlariga qarashli oliy taʼlim muassasalari doirasida bakalavriat va magistratura boʻyicha davlat granti hamda toʻlov-kontrakt asosida oʻrinlar kvotasini taʼlim tillariga qarab taqsimlashga oid takliflarni Davlat komissiyasiga tasdiqlash uchun kiritsin.

5. Oʻzbekiston Respublikasi Oliy va oʻrta maxsus taʼlim vazirligi Xalq taʼlimi vazirligi, Oʻzbekiston Respublikasi Vazirlar Mahkamasi huzuridagi Davlat test markazi bilan birgalikda:

bir hafta muddatda Oliy taʼlim yoʻnalishlari va mutaxassisliklar klassifikatoriga yangi kiritilayotgan bakalavriat yoʻnalishlari va magistratura mutaxassisliklari boʻyicha oʻzgartish va qoʻshimchalar kiritsin;

bir oy muddatda yangi kiritilayotgan bakalavriat yoʻnalishlari va magistratura mutaxassisliklari boʻyicha dasturlar va oʻquv rejalarini ishlab chiqib, belgilangan tartibda tasdiqlasin.

6. Oʻzbekiston Respublikasi Moliya vazirligi 2014/2015 oʻquv yilida davlat grantlari asosida bakalavriat va magistraturaga qabul qilish boʻyicha belgilangan kvotalarni hisobga olgan holda, Oʻzbekiston Respublikasi Davlat budjetidan zarur mablagʻlar ajratilishini taʼminlasin.

7. Oʻzbekiston Respublikasi Iqtisodiyot vazirligi, Oliy va oʻrta maxsus taʼlim vazirligi oʻz tasarrufida oliy taʼlim muassasalari boʻlgan vazirliklar va idoralar, Mehnat va aholini ijtimoiy muhofaza qilish vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, ish beruvchilar bilan birgalikda oliy taʼlim muassasalari bitiruvchilarining oʻzlari olgan bilim yoʻnalishiga muvofiq ishga joylashganliklari ustidan tizimli monitoring oʻtkazib tursin.

8. Oʻzbekiston Respublikasi Oliy va oʻrta maxsus taʼlim vazirligi oʻz tasarrufida oliy taʼlim muassasalari boʻlgan boshqa vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar bersin, shuningdek idoraviy meʼyoriy hujjatlarga tegishli oʻzgartishlar kiritsin.

9. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.