Oʻzbekiston Respublikasi Vazirlar Mahkamasining “Doʻrmon” milliy bogʻini tashkil etish toʻgʻrisida” 2014-yil 5-iyundagi 144-son qaroriga muvofiq Vazirlar Mahkamasi qaror qiladi:

1. “Doʻrmon” milliy bogʻi toʻgʻrisidagi nizom ilovaga muvofiq tasdiqlansin.

2. “Doʻrmon” milliy bogʻi direksiyasi, Toshkent shahar hokimligi huzuridagi Obodonlashtirish bosh boshqarmasi, Toshkent shahar va Toshkent viloyati hokimliklari ushbu qaror bilan tasdiqlangan Nizom talablariga qatʼiy rioya etilishini taʼminlasinlar.

3. Oʻzbekiston Respublikasi Tabiatni muhofaza qilish davlat qoʻmitasi Oʻzbekiston Respublikasi Fanlar akademiyasi bilan birgalikda oʻsimlik dunyosi obyektlarini saqlashga va ulardan oqilona foydalanishga, ilmiy-tadqiqot faoliyatini samarali muvofiqlashtirishga va “Doʻrmon” milliy bogʻi hududida tabiiy muhit holati monitoringini olib borishga yoʻnaltirilgan tabiatni muhofaza qilish tadbirlari majmui amalga oshirilishini taʼminlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov, Toshkent shahar hokimi R.D. Usmonov va Oʻzbekiston Respublikasi Tabiatni muhofaza qilish davlat qoʻmitasi raisi B.X. Abdusamatov zimmasiga yuklansin.

1. “Doʻrmon” milliy bogʻi (keyingi oʻrinlarda Milliy bogʻ deb ataladi) Oʻzbekiston Respublikasi Vazirlar Mahkamasining “Doʻrmon” milliy bogʻini tashkil etish toʻgʻrisida” 2014-yil 5-iyundagi 144-son qaroriga muvofiq tabiiy-ekologik, ilmiy, madaniy va estetik qimmatga ega boʻlgan oʻsimliklarning noyob, qimmatli navlarini saqlash, koʻpaytirish va ulardan oqilona foydalanish maqsadida tashkil etilgan.

2. Milliy bogʻ muhofaza etiladigan tabiiy hudud toifasiga kiradi, alohida ilmiy, ekologik, madaniy va estetik qimmatga ega, davlat mulki hisoblanadi va uning tomonidan qoʻriqlanadi.

Milliy bogʻ Oʻzbekiston Respublikasining milliy boyligidir.

3. Milliy bogʻ hududida uning aniq vazifasiga zid boʻlgan hamda oʻsimlik obyektlarini saqlash, koʻpaytirish va tiklashga xavf soluvchi har qanday faoliyat taqiqlanadi.

Milliy bogʻ hududi Toshkent shahri va Toshkent viloyatini iqtisodiy va ijtimoiy rivojlantirishning istiqbolli rejalarini, hududlarni rejalashtirish va rivojlantirish, aholi punktlari hududlarini qurish, yer tuzish sxemalari toʻgʻrisidagi shaharsozlik hujjatlarini ishlab chiqishda hisobga olinadi.

4. Milliy bogʻ Toshkent viloyati Qibray tumanidagi Doʻrmon aholi punktida 32,4 gektar maydonga ega boʻlgan yer uchastkasida joylashtiriladi.

5. Milliy bogʻ band etgan yer uchastkasi xoʻjalik maqsadida foydalanishdan olib qoʻyiladi va Toshkent shahar hokimligi huzuridagi Obodonlashtirish bosh boshqarmasining Hukumat obyektlariga xizmat koʻrsatish boʻyicha Ixtisoslashtirilgan boshqarmasiga doimiy foydalanish uchun beriladi.

Milliy bogʻning yer uchastkalarini jamoat ehtiyojlari uchun olib qoʻyishga yoʻl qoʻyilmaydi.

Milliy bogʻning yer uchastkalariga yer soligʻi solinmaydi.

6. Milliy bogʻning taʼminoti va undan foydalanish, shuningdek uning hududida oʻsimlik dunyosi obyektlarini saqlash “Doʻrmon” milliy bogʻi direksiyasi (keyingi oʻrinlarda Direksiya deb ataladi) tomonidan amalga oshiriladi.

Direksiya Toshkent shahar hokimligi huzuridagi Obodonlashtirish bosh boshqarmasining Hukumat obyektlariga xizmat koʻrsatish boʻyicha Ixtisoslashtirilgan boshqarmasining tarkibiy boʻlinmasi hisoblanadi.

7. Tashqi yoritishga va Milliy bogʻ hududidagi favvoraga xizmat koʻrsatish Toshkent shahri hokimligining tegishli foydalanuvchi tashkilotlari tomonidan amalga oshiriladi.

8. Quyidagilar Milliy bogʻning vazifalari hisoblanadi:

katta ilmiy, madaniy va estetik ahamiyatga ega boʻlgan oʻsimliklar kolleksiyasini (ayniqsa nodir va qimmatli navlarini) sunʼiy sharoitlarda yaratish va saqlash;

oʻsimlik resurslaridan va dov-daraxtlarning qimmatli navlari kolleksiyalaridan samarali va oqilona foydalanish uchun tabiiy va madaniy floraning oʻsimliklari xilma-xilligi saqlanishi va boyitilishini taʼminlaydigan rejimni saqlash;

tabiiy va madaniy flora oʻsimliklari genofondini saqlash va qoʻriqlashning zamonaviy usullarini keng joriy etish;

mahalliy tabiiy-iqlim shart-sharoitlarini hisobga olgan holda xoʻjalikni ilmiy asoslangan holda tashkil etish va yuritish yoʻli bilan oʻsimlik dunyosi obyektlaridan samarali, shuningdek ekologik-maʼrifiy va ilmiy-tadqiqot maqsadlarida foydalanish;

oʻsimliklarni zararkunandalar va kasalliklardan himoya qilish boʻyicha kompleks tadbirlarni amalga oshirish;

turli geografik zonalardan olingan urugʻliklar va koʻchatlarni ayirboshlashni tashkil etish;

oʻsimlikshunoslik, seleksiya va dekorativ bogʻdorchilik masalalari boʻyicha ilmiy-tadqiqot ishlarini tashkil etish;

hududlarni obodonlashtirish va koʻkalamzorlashtirish loyihalarini ishlab chiqish va amalga oshirish.

9. Milliy bogʻning hududi funksional zonalarga boʻlinishi mumkin.

10. Mahalliy davlat hokimiyati organlari sanoat, ijtimoiy, turar joy obyektlari va boshqa obyektlar qurish uchun Milliy bogʻga tutash hududlardan foydalanish toʻgʻrisida qaror qabul qilishda oʻsimliklarni salbiy taʼsirdan himoya qiluvchi muhofaza zonalari tashkil etilishi zarurligini hisobga olishlari shart. Zarur qoʻriqlash zonalari oʻlchamlari har bir aniq holatda Milliy bogʻ direksiyasi va Oʻzbekiston Respublikasi Vazirlar Mahkamasi bilan kelishiladi.

11. Milliy bogʻ foydalanish va koʻkalamzorlashtirish maqsadida introdutsirlashtirilgan oʻsimliklarni sinash va ularni koʻpaytirish uchun bazaga ega boʻlishi mumkin.

12. Milliy bogʻ hududida:

ushbu maqsadlar uchun moʻljallanmagan sanoat, xoʻjalik obyektlari, uy-joylar va boshqa obyektlar qurish (Milliy bogʻ ehtiyojlari uchun moʻljallanganlari bundan mustasno);

qidiruv ishlari va hududning gidrologik rejimi oʻzgarishiga olib keluvchi ishlarni bajarish;

dov-daraxtlar, koʻchatlarni kesish va/yoki kundakov qilish (sanitariya maqsadida kesish va parvarish qilish uchun kesish bundan mustasno);

oʻsimliklarni yoʻq qilish yoki ularga shikast yetkazish;

tuproq eroziyasiga va tuproq qoplami buzilishiga olib keluvchi xatti-harakatlar;

qushlarni va boshqa yovvoyi hayvonlarni ovlash (ilmiy va sanitariya maqsadlarida foydalanish uchun moʻljallangan ovlash bundan mustasno), uyalarni, hayvonlarning boshqa makonlarini buzib tashlash;

dorivor oʻsimliklar, gullar, mevalar, hoʻl mevalar, qoʻziqorinlar, urugʻliklar, barglarni toʻplash va tayyorlash (ilmiy maqsadlarda foydalanish uchun moʻljallanganlari bundan mustasno);

transport vositalarining yoʻllardan tashqari va buning uchun maxsus nazarda tutilgan joylardan tashqari harakatlanishi va toʻxtab turishi;

maxsus nazarda tutilgan joylardan tashqarida transport vositalarini yuvish;

begona shaxslarning tegishli ruxsatnomasiz harakatlanishi;

ishlab chiqarish va isteʼmol chiqindilarini joylashtirish;

Milliy bogʻning oʻsimliklariga zararli taʼsir koʻrsata oladigan faoliyatning boshqa turlari taqiqlanadi.

13. Milliy bogʻ hududiga ruxsat berilmagan kirishning oldini olish maqsadida uning chegaralari butun perimetri boʻylab toʻsiladi hamda ogohlantiruvchi va maʼlumot beruvchi belgilar oʻrnatiladi.

14. Milliy bogʻga kirish Toshkent shahar hokimligi tomonidan tegishli organlar bilan birgalikda ishlab chiqiladigan va tasdiqlanadigan Milliy bogʻ hududiga kirish rejimi toʻgʻrisidagi nizomga muvofiq vakolatli davlat organlarining ruxsati bilan amalga oshiriladi.

15. Milliy bogʻ hududini qoʻriqlash va uning rejimi Milliy gvardiya boʻlinmalari va boshqa vakolatli organlar tomonidan taʼminlanadi.

16. Milliy bogʻ rejimi buzilishida aybdor boʻlgan shaxslar qonunchilikka muvofiq javobgarlikka tortiladi.

17. Milliy bogʻ direksiyasi Direktordan, agrotexnika xizmati va ishlab chiqarish-yordamchi xodimlardan iborat boʻladi.

18. Quyidagilar Milliy bogʻ direksiyasining asosiy vazifalari hisoblanadi:

Milliy bogʻni taʼmirlash, undan foydalanish va uni saqlash, shuningdek bogʻni qoʻriqlash ishlarining oʻz vaqtida va sifatli bajarilishini tashkil etish;

rekreatsion, madaniy-maʼrifiy, estetik va ilmiy maqsadlarda foydalanish uchun Milliy bogʻning tabiiy kompleksini saqlash va rivojlantirish;

dov-daraxtlarni saqlash (parvarish qilish), zararkunandalar va kasalliklarga qarshi kurashish, Milliy bogʻ hududini qimmatli oʻsimliklar navlari bilan yanada koʻkalamzorlashtirish chora-tadbirlarini bajarish boʻyicha kompleks agrotexnika tadbirlarini amalga oshirish;

obodonlashtirish obyektlarini sanitariya jihatidan tozalashni, sunʼiy sugʻorish tizimlari, nasos stansiyalari, quduqlarning hamda Milliy bogʻdagi boshqa muhandislik tarmoqlari sanitariya va texnikaviy holatining zarur darajada boʻlishini taʼminlash.

19. Direksiya oʻz faoliyati toʻgʻrisida Toshkent shahar hokimligi huzuridagi Obodonlashtirish bosh boshqarmasining Hukumat obyektlariga xizmat koʻrsatish boʻyicha Ixtisoslashtirilgan boshqarmasi boshligʻiga hisobot beradi.

20. Direksiyaga belgilangan tartibda Toshkent shahar hokimi bilan kelishgan holda Toshkent shahar hokimligi huzuridagi Obodonlashtirish bosh boshqarmasining Hukumat obyektlariga xizmat koʻrsatish boʻyicha Ixtisoslashtirilgan boshqarmasi boshligʻi tomonidan lavozimga tayinlanadigan direktor boshchilik qiladi.

Direktor Toshkent shahar hokimligi huzuridagi Obodonlashtirish bosh boshqarmasining Hukumat obyektlariga xizmat koʻrsatish boʻyicha Ixtisoslashtirilgan boshqarmasi boshligʻining oʻrinbosari hisoblanadi.

Direktor Milliy bogʻni saqlash va undan foydalanish, shuningdek Milliy bogʻ hududida oʻsimlik dunyosi obyektlarini saqlash uchun toʻliq javob beradi.

21. Milliy bogʻ direktori zimmasiga quyidagilar yuklanadi:

Milliy bogʻ xodimlarining lavozim yoʻriqnomalarini tasdiqlash;

Milliy bogʻ xodimlarini lavozimga tayinlash va lavozimdan ozod etish toʻgʻrisida takliflar kiritish;

Milliy bogʻni saqlash, undan foydalanish va uni muhofaza qilish, shuningdek uning hududida oʻsimlik dunyosi obyektlarini saqlash boʻyicha ishlarning oʻz vaqtida va sifatli bajarish tashkil etilishini nazorat qilish;

mol-mulk, asbob-uskunalar va boshqa moddiy boyliklar saqlanishini taʼminlash;

Milliy bogʻda kompleks agrotexnika ishlarini, oʻsimliklar hisobi yuritilishini tashkil etish va amalga oshirish;

texnika xavfsizligi qoidalariga rioya etilishini va mexanizmlardan zarur darajada foydalanilishini taʼminlash;

davlat organlari va boshqa tashkilotlarda Milliy bogʻning manfaatlarini ifodalash.

22. Milliy bogʻni va Direksiyani moliyalashtirish:

har yili obodonlashtirishga ajratiladigan mablagʻlar doirasida Toshkent shahrining mahalliy budjeti mablagʻlari;

xayriya ehsonlari va qonunchilikda taqiqlanmagan boshqa manbalar hisobiga amalga oshiriladi.

23. Ushbu Nizomning talablari bajarilishi uchun masʼuliyat Direksiyaga, Toshkent shahar hokimligi huzuridagi Obodonlashtirish bosh boshqarmasi boshligʻi va Toshkent shahar hokimi zimmasiga yuklanadi.