Vazirlar Mahkamasi qaror qiladi:

1. Oʻzbekiston Respublikasi hududida ov qilish va ovchilik-baliq ovlash xoʻjaligini yuritish toʻgʻrisidagi ilova qilinayotgan Nizom tasdiqlansin.

2. Quyidagilar oʻz kuchini yoʻqotgan deb hisoblansin:

SSSR Ministrlar Sovetining “SSSRning ichki suv havzalarida baliq zapaslarini koʻpaytirish va qoʻriqlash toʻgʻrisida” 1958-yil 15-sentabrdagi 1045-son qarori yuzasidan Oʻzbekiston SSR Ministrlar Sovetining 1958-yil 31-oktabrdagi 716-son qarori (OʻzSSR QT, 1960-yil, I tom, 190-modda);

Oʻzbekiston SSR Ministrlar Sovetining “Oʻzbekiston SSR Ministrlar Soveti huzuridagi baliq zapaslarini qoʻriqlash va baliq ovlashni tartibga solish boʻyicha Oʻzbekiston Respublika davlat inspeksiyasi toʻgʻrisidagi Nizomni va Oʻzbekiston SSR baliqchilikni qoʻriqlash xizmati organlarining Ustavini tasdiqlash haqida 1959-yil 10-avgustdagi 594-son qarori” (OʻzSSR QT, 1959-y., 10-son, 42-modda);

Oʻzbekiston SSR Ministrlar Sovetining “Oʻzbekiston SSRning baliqchilik xoʻjaligi suv havzalarida baliq ovlash qoidalari toʻgʻrisida” 1969-yil 29-maydagi 253-son qarori (OʻzSSR QT, 1969-y., 5-son, 42-modda; 1980-y., 12-son, 45-modda);

SSSR Ministrlar Sovetining “SSSR suv havzalarida baliq zapaslarini qoʻriqlashni kuchaytirish chora-tadbirlari toʻgʻrisida” 1969-yil 10-dekabrdagi 940-son qarori yuzasidan Oʻzbekiston SSR Ministrlar Sovetining 1970-yil 19-martdagi 126-son qarori (OʻzSSR QT, 1970-y., 4-son, 23-modda);

SSSR Ministrlar Sovetining “SSSR baliqchilik xoʻjaligi suv havzalarida nodir baliqlar, dengiz sutemizuvchilari va suv umurtqasizlari boyligini himoya qilishni kuchaytirish toʻgʻrisida” 1974-yil 25-oktabrdagi 833-son qarori yuzasidan Oʻzbekiston SSR Ministrlar Sovetining 1974-yil 27-noyabrdagi 536-son qarori (OʻzSSR QT, 1974-y., 11-son, 62-modda);

Oʻzbekiston SSR Ministrlar Sovetining “Oʻzbekiston SSR territoriyasida ov qilish va ovchilik xoʻjaligini yuritish toʻgʻrisidagi nizomlarni tasdiqlash va ovchilik xoʻjaligini yuritish huquqini berish tartibi toʻgʻrisida” 1985-yil 14-iyundagi 309-son qarori (OʻzSSR QT, 1985-y., 6-son, 29-modda).

1. Ovchilik-baliq ovlash xoʻjaligi xalq xoʻjaligining tarmogʻi boʻlib, yovvoyi hayvonlarni qoʻriqlash va koʻpaytirish, shuningdek, havaskorlik, sport, hunarmandchilik ovchiligi va baliq ovlash yoʻli bilan ulardan oqilona foydalanish uning vazifasi hisoblanadi.

2. Tabiiy erkinlik holatida yashovchi barcha yovvoyi hayvonlar, shuningdek, ularni koʻpaytirish maqsadida ovchilik va baliq ovlash joylariga qoʻyib yuborilgan hayvonlar davlat mulki hisoblanadi va yagona davlat ovchilik-baliq ovlash fondini tashkil etadi. Pitomniklarda, inkubatorlarda, hovuz xoʻjaliklarida yetishtirilgan va shu xoʻjaliklarning chegaralarida joylashgan yovvoyi hayvonlar bundan mustasnodir.

3. Davlat ovchilik-baliq ovlash fondidan foydalanish, uni qoʻriqlash va koʻpaytirish tartibi SSJI qonunlari, SSJI Oliy Kengashining boshqa qarorlari, SSJI Prezidentining farmonlari, Oʻzbekiston Respublikasi qonunlari, Oʻzbekiston Respublikasi Oliy Kengashining boshqa qarorlari, Oʻzbekiston Respublikasi Prezidentining farmonlari va farmoyishlari bilan, bu hujjatlarda koʻzda tutilgan hollarda, shuningdek, SSJI Vazirlar Mahkamasining, Oʻzbekiston Respublikasi Prezidenti huzuridagi Vazirlar Mahkamasining qarorlari va farmoyishlari bilan, Oʻzbekiston Respublikasi Davlat tabiatni muhofaza qilish qoʻmitasi chiqargan yoʻriqnomalar, nizomlar bilan, mazkur Nizom hamda hayvonot olamini qoʻriqlash va undan foydalanish boʻyicha boshqa normativ hujjatlar bilan boshqariladi.

Oʻzbekiston Respublikasi Davlat tabiatni muhofaza qilish qoʻmitasi huzuridagi jumhuriyat hayvonot va oʻsimliklar olamini qoʻriqlash va undan oqilona foydalanish boʻyicha davlat inspeksiyasi (bundan keyin davlat biologiya nazorati deb ataladi) tasdiqlaydigan hayvonot va oʻsimliklar olamini qoʻriqlash va foydalanishni boshqarish boʻyicha yoʻriqnomalar, nizomlar va qoidalar, Oʻzbekiston Respublikasi Davlat tabiatni muhofaza qilish qoʻmitasi toʻgʻrisidagi nizomda belgilangan huquqlar doirasida barcha vazirliklar, davlat qoʻmitalari, idoralar, korxonalar, tashkilotlar va muassasalar, shuningdek, fuqarolar tomonidan bajarilishi majburiydir.

4. Oʻzbekiston Respublikasi hududida ovchilik va baliq ovlash xoʻjaligini yuritish huquqini berish tartibi Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazorati tomonidan belgilanadi.

5. Belgilangan tartibda hunarmandchilik, havaskorlik va sport ovchiligi va baliq ovlashga ruxsat berilgan yovvoyi hayvonlarning yashash va yurish joyi boʻlgan barcha yerlar, suvlar va oʻrmonlar ov qilinadigan va baliq tutiladigan joylar hisoblanadi.

Hunarmandchilik maqsadlarida suvda yashovchi hayvonlarni va oʻsimliklarni ovlash uchun foydalanilayotgan yoki foydalanishi mumkin boʻlgan yoxud baliqlarni koʻpaytirish uchun ahamiyatga ega boʻlgan barcha suv havzalari (dengiz, daryolar, koʻllar, suv omborlari va ularning qoʻshimcha suv havzalari) baliqchilik xoʻjaliklari hisoblanadi.

Oʻzbekiston Respublikasidagi barcha ovchilik-baliq ovlash joylari, ular joylashgan mazkur hudud kimning ixtiyorida ekanligidan qatʼi nazar, ular Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazorati tasarrufida boʻladi.

Quyidagilar ovchilik-baliq ovlash joylariga kirmaydi:

aholi istiqomat yerlari (shaharlar, shahar posyolkalari, qishloq aholi istiqomat yerlari);

tabiatni qoʻriqlash, sogʻlomlashtirish, rekreatsion va tarixiy madaniy vazifalarni bajaruvchi yerlar;

shaharlar, mehnatkashlarning istirohat joylari atroflaridagi yashil ihotazorlar, pioner va sport lagerlarining hududlari;

sanoat korxonalarining sanitariya-himoya zonalari;

suv olish inshootlarining himoya zonalari;

aerodromlar va aerodrom atrofi zonalari;

chegara polosalari;

qishloq xoʻjaligi maqsadlarida foydalaniladigan yerlar;

toʻgʻonlar, suv ayirgichlar, koʻpriklar, baliq pitomniklari, hovuz va boshqa madaniy baliqchilik xoʻjaliklari chegaralaridagi 500 metrli polosa;

koʻllarni oʻzaro va daryo bilan birlashtiruvchi irmoqlar va jilgʻalar, daryolar va kanallar quyiladigan joylardagi 100 metr masofadagi uchastkalar.

6. Ovchilik-baliq ovlash xoʻjaligini yuritish huquqi berilgan korxonalar, muassasalar va tashkilotlar oʻzlariga birkitilgan ovchilik-baliq ovlash joylarida hayvonlarni koʻpaytirish va ularning yashash muhitini qoʻriqlash boʻyicha chora-tadbirlarni amalga oshirishga majburdirlar.

7. Oʻzbekiston Respublikasining jumhuriyat ovchilar va baliq ovlovchilar jamiyatlaridan birining aʼzosi boʻlgan, 18 yoshga yetgan, joriy yil uchun belgilangan miqdorda aʼzolik badallarini va davlat poshlinasini toʻlagan barcha fuqarolari oʻq otish va boshqa ovchilik qurollari, ruxsat etilgan boshqa ovchilik qurol-yarogʻlari bilan ov qilish huquqiga egadirlar. Boshqa jumhuriyatlarning shu jumhuriyat ovchilar jamiyatlari bergan ovchilik bileti boʻlgan ovchilari tegishli ov qilish joylarining foydalanuvchisi ruxsati bilangina ov qilishi mumkin.

8. Barcha suv havzalarida barcha fuqarolarga sport va havaskorlik maqsadida shaxsiy isteʼmol uchun belgilangan qoidalarga rioya qilgan holda bepul baliq ovlashga ruxsat etiladi, qoʻriqxonalar, baliq pitomniklari, hovuz va boshqa madaniy baliqchilik xoʻjaliklari bundan mustasnodir.

9. Istisno hollarda SSJI fuqarolari boʻlmagan shaxslarga yoʻllanmalar, belgilangan tartibda berilgan litsenziyalar (ruxsatnomalar) boʻyicha ov qilish huquqi berilishi mumkin.

10. Aʼzolik badallarini va davlat poshlinasini toʻlaganlik toʻgʻrisida belgi qoʻyilgan ovchilik bileti, belgilangan tartibda berilgan litsenziya, ruxsatnoma va yoʻllanma sport-havaskorlik maqsadida ov qilish huquqini beruvchi guvohnoma hisoblanadi.

Yovvoyi hayvonlarni sanoat miqyosida ovlash tayyorlov tashkilotlari bilan shartnomalar mavjud boʻlganda, shuningdek, Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazoratining ruxsati boʻyicha amalga oshiriladi.

11. Oʻzbekiston Respublikasi hududida ovchilik aʼzolik biletlari Oʻzbekiston Respublikasi ovchilar va baliq ovlovchilar sport jamiyatlari uyushmasi — “Oʻzbekoxotribolovsoyuz”, Turkiston harbiy okrugining harbiy-ovchilik jamiyati kengashi va ularning joylardagi organlari tomonidan beriladi.

12. Silliq stvolli va qirqma miltiqlarni, ularga oʻq-dorilarni fuqarolar, korxonalar, muassasalar va tashkilotlar tomonidan xarid qilish, shuningdek, ularni saqlash va olib yurish SSJI Ichki ishlar vazirligi tasdiqlagan oʻq otish qurollarini va ularga oʻq-dorilarni sotib olish, tashish, saqlash, hisobga olish, olib yurish va foydalanish tartibi toʻgʻrisidagi yoʻriqnomaga muvofiq amalga oshiriladi.

13. Qoidabuzarlardan tortib olingan silliq stvolli ovchilik qurollari va ularga oʻq-dorilar, ov qilish va baliq ovlash asbob-anjomlari, shuningdek, ovchilarning miltiqlari Oʻzbekiston Respublikasi Ichki ishlar vazirligining organlari ruxsatnomalari asosida Oʻzbekiston Respublikasi ovchilar va baliq ovlovchilar sport jamiyatlari uyushmasining hamda Turkiston harbiy okrugi harbiy-ovchilik jamiyatlari kengashining doʻkonlarida sotiladi.

14. Tabiiy erkinlikda yurgan yovvoyi hayvonlarni ovlash maqsadida iziga tushish, taʼqib etish va ovlash (otib olish, baliqlarni tutish) ov qilish (tutish) deb eʼtirof etiladi.

Ovchilik-baliq ovlash joylarida qurol-yarogʻ, itlar, ovchi qushlar, qopqonlar, toʻr materiallari va ov qiladigan hamda baliq tutadigan boshqa asbob-anjomlar bilan yoki ovlangan ov mahsuloti va tutilgan baliq bilan boʻlish, shuningdek, yigʻilgan qurol-yarogʻ bilan yoʻllarda boʻlish ov qilishga va baliq tutishga tenglashtiriladi.

15. Ilmiy, madaniy-maʼrifiy, xoʻjalik, shuningdek, sport-havaskorlik maqsadlari uchun yovvoyi hayvonlarni ovlash Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazorati belgilagan tartibda bepul yoki mazkur Nizomning 1-ilovasiga muvofiq pulli amalga oshiriladi.

16. Yovvoyi hayvonlarni boshqa yashash joylariga koʻchirish, Oʻzbekiston Respublikasi faunasi uchun yangi boʻlgan yovvoyi hayvon turlarini iqlimlashtirish, ularni jumhuriyat tashqarisiga olib ketish va jumhuriyatga olib kelish, shuningdek, yovvoyi hayvonlarni ilmiy-tadqiqot va xoʻjalik maqsadlarida chatishtirish boʻyicha tadbirlarni oʻtkazishga faqat Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazoratining ruxsati bilangina yoʻl qoʻyiladi.

17. Quyidagilar ov qilish va baliq tutish mahsulotlari hisoblanadi: moʻyna va terilar, shuningdek, ulardan boʻlgan buyumlar, shoxlar, hayot kechirish mahsulotlari (shu jumladan, ishlab chiqarilgani), yovvoyi hayvonlarning goʻshti, yovvoyi parrandalar va boshqa hayvonlarning tuxumi, baliq va uvildiriq, ov oʻljalari, shuningdek, tabiiy sharoitlarda ovlangan yoki maxsus pitomniklarda oʻstirilgan yovvoyi hayvonlarning oʻzi.

Taqiqlangan muddatlarda, taqiqlangan joylarda, tegishli ruxsatsiz ovlangan, man etilgan turlar yoki ruxsat berilmagan usullarda belgilangan normadan (limitlardan) ortiqcha ovlangan ov qilish va baliq tutish mahsulotlari noqonuniy ov qilish va baliq tutish mahsulotlari hisoblanadi.

Qoʻlga tushirilgan noqonuniy ov qilish va baliq tutish mahsuloti musodara qilinadi va ov qilish hamda baliq ovlash qoidalarining buzilganligini aniqlagan shaxslarda mukofot sifatida qoldirilishi mumkin (tuyoqli hayvonlarning goʻshti, lekin bir boshdan koʻp emas). Moʻyna, saygʻoqlarning goʻshti, shuningdek, 5 kilogrammdan ortiq baliq bundan mustasnodir, ular belgilangan tartibda tayyorlov, savdo tashkilotlariga yoki umumiy ovqatlanish tashkilotiga topshiriladi.

Noqonuniy ovlangan ovchilik mahsulotini yoki tutilgan baliqni musodara qilish imkoniyati boʻlmaganda (qoida buzuvchi tomonidan ishlatilgan yoki sotilgan, foydalanishga yaroqsiz boʻlib qolgan va boshqalar) qoida buzuvchidan xarid narxlari boʻyicha bu mahsulotning qiymati undirib olinadi.

18. Xalq xoʻjaligiga muayyan zarar yetkazuvchi yirtqichlarni otish (tutib olish) oʻz hududlarida ovchilik xoʻjaligini yuritish huquqi berilgan korxonalar, tashkilotlar va muassasalarning oʻrmonchilari tomonidan amalga oshiriladi. Boshqa hollarda yirtqichlarni otish (tutib olish)ni jamiyatlar tomonidan maxsus tuzilgan ovchilar brigadalari, shuningdek, Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazorati beradigan ruxsatnomalar boʻyicha fuqarolar amalga oshirishlari mumkin.

Xalq xoʻjaligiga zarar yetkazadigan yovvoyi hayvonlarni otganlik (tutganlik) uchun mazkur Nizomning 2-ilovasiga muvofiq miqdorlarda belgilangan tartibda matlubot kooperatsiyasi tomonidan mukofot toʻlanadi.

19. Baliqchilik ehtiyojlari va ovchilik xoʻjaligini yuritish (nevodlarni tortib kelish, baliq tutish asbob-uskunalarini quritish va tuzatish, kemalarni tuzatish, mexanizmlarni oʻrnatish, vaqtinchalik binolar tiklash va boshqalar) uchun baliq xoʻjaligi tashkilotlariga va ovchilikdan foydalanuvchilarga qirgʻoq polosalaridan foydalanish huquqi beriladi.

20. Quyidagilar taqiqlanadi:

Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazoratining ruxsatisiz SSJI va Oʻzbekiston Respublikasining Qizil kitobiga kiritilgan yovvoyi hayvonlarni, shuningdek, ovlanadigan moʻynali hayvonlar (suv kalamushi, qorakoʻzan, tulki va boshqalar)ni fuqarolar tomonidan tutqunlikda saqlash;

ovchilik va baliq ovlash mahsulotlarini sotish va sotib olish.

21. Yovvoyi hayvonlarni davlat tomonidan qoʻriqlashni va idoraviy qoʻriqlash ustidan davlat nazoratini Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazorati amalga oshiradi.

Idoraviy qoʻriqlashni oʻrmon xoʻjaliklari, davlat ovchilik xoʻjaliklari, davlat qoʻriqxonalari, davlat zakazniklari, milliy bogʻlar, ovchilik-baliq ovlash xoʻjaliklarining oʻrmonchilik va yollangan ovchilar xizmatlari amalga oshiradi. Ichki ishlar organlari, tabiatni qoʻriqlash jamoatchi inspektorlari, Oʻzbekiston Tabiatni muhofaza qilish jamiyati, baliq ovlash tashkilotlari va boshqa hayvonot olamidan foydalanuvchilar hayvonot olamini qoʻriqlashga koʻmaklashadilar.

22. Tabiatni qoʻriqlash boʻyicha davlat inspektorlari quyidagi huquqlarga egadirlar:

a) muassasalar, korxonalar, tashkilotlarning mansabdor shaxslaridan va ayrim fuqarolardan tabiatni muhofaza qilish qonunlari buzilganligi munosabati bilan tushuntirishlar berishni talab qilish;

b) ovchilik-baliqchilik bazalarini, turar-joy, omborxona va boshqa binolarni, shuningdek, ovchilik-baliq ovlash joylarida boʻlgan barcha transport turlarini tekshirishga;

v) barcha ovchilik-baliq ovlash joylariga, ularning idoraviy tobeligidan qatʼi nazar, hech bir qarshiliksiz borish, qurollarni, baliq ovlash asbob-anjomlarini tekshirish, tutish (otish) joylarida, suzish va transport vositalarida, omborxonalarda, qabul qilish joylarida va baliq zavodlarida ovchilik va tutilgan baliq mahsulotlarini tekshirishga, shuningdek, ovchilik qurollari, oʻq-dorilar hamda boshqa ov qilish va baliq tutish asbob-anjomlarini sotish boʻyicha belgilangan tartibga rioya qilinishini nazorat etish;

g) oʻrmon xoʻjaliklari, ovchilik xoʻjaliklari, baliq ovlash tashkilotlari, ovchilar va baliqchilar jamiyatlari hamda ovchilik va baliq ovlash joylarining boshqa foydalanuvchilari tomonidan hayvonot olamini qoʻriqlash, koʻpaytirish va ulardan foydalanish boʻyicha olib borilayotgan ishlarni nazorat qilish;

d) Oʻzbekiston Respublikasi qonunlarida koʻzda tutilgan tartibda moddiy, maʼmuriy javobgarlikka tortish, jinoiy ish qoʻzgʻash masalasini qoʻyish, hayvonot olamiga va ovchilik-baliqchilik xoʻjaliklariga yetkazilgan zararni undirib olish daʼvosini qoʻyish.

23. “Hayvonot olamini qoʻriqlash va undan foydalanish toʻgʻrisida”gi Oʻzbekiston Respublikasi Qonunini, mazkur Nizomni, ov qilish va baliq ovlash Qoidalarini buzishda aybdor boʻlgan shaxslar moddiy, maʼmuriy va jinoiy javobgarlikka tortiladilar.

24. Noqonuniy ov qilishni, baliq ovlashni yoki hayvonot olamidan foydalanishning boshqa turini sodir etgan shaxs ushlanganda undan miltiq yoki hayvonlarni ovlaydigan boshqa asbob-anjomlar tortib olinadi, bunda foydalaniladigan transport vositalari ushlab qolinadi va tegishli organlarga beriladi.

25. Hayvonot olamini qoʻriqlash va undan foydalanish toʻgʻrisidagi qonunlarni, ov qilish va baliq ovlash Qoidalarini buzgan fuqarolar va mansabdor shaxslar, moddiy, maʼmuriy yoki jinoiy javobgarlikka tortilishidan qatʼi nazar, shuningdek, korxonalar, muassasalar va tashkilotlar davlat ovchilik-baliqchilik fondiga yetkazilgan moddiy zararni mazkur Nizomning 3-ilovasiga muvofiq miqdorlarda qoplashga majburdirlar.

26. 1-ilovaga muvofiq ov qilish huquqini beruvchi litsenziyalarni sotishdan olingan mablagʻlar respublika budjetiga oʻtkaziladi, jarohatlanishlar va tabiiy ofatlar natijasida nobud boʻlgan hayvonlarning mahsulotlarini sotishdan olingan, shuningdek, fuqarolik daʼvolari boʻyicha zararni qoplashdan tushgan mablagʻlar (3-ilovaga muvofiq) Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazoratining maxsus mablagʻlari joriy hisobiga oʻtkaziladi.

27. Yovvoyi hayvonlarni boshqa joyga koʻchirish yoki ular bilan kolleksiyalarni toʻldirish uchun ularni ovlashga litsenziya (ruxsatnoma)larni sotishdan olingan mablagʻlar respublika budjetiga oʻtkaziladi.

28. Ovchilik-baliqchilik fondiga yetkazilgan zararni undirishdan olingan mablagʻlarning:

a) davlat qoʻriqxonalariga va milliy tabiiy bogʻlarga zarar yetkazilgan taqdirda barcha summa (mazkur Nizomning 31-bandida nazarda tutilgan pul mukofotlarini chegirib tashlash bilan) davlat qoʻriqxonalari va milliy tabiiy bogʻlarning hisob-kitob schyotiga;

b) davlat ovchilik fondiga, shuningdek, baliq ovlash xoʻjaligining suv havzalariga zarar yetkazilgan taqdirda — hammasi Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazoratining maxsus mablagʻlar joriy hisobiga;

v) jamoat tashkilotlarining birkitilgan ovchilik-baliq ovlash xoʻjaliklariga zarar yetkazilgan taqdirda — agar qoidani buzish mazkur jamiyat xodimlari tomonidan aniqlansa, 70 foizi ularning hisob-kitob schyotiga, 30 foizi esa Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazoratining maxsus mablagʻlar joriy hisobiga oʻtkaziladi. Qoidabuzishlar tabiatni qoʻriqlash boʻyicha inspektorlar tomonidan aniqlanganda — 100 foiz Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazoratining maxsus mablagʻlar joriy hisobiga tushadi.

29. Jarimalarni toʻlashdan tushgan barcha pullar Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazoratining maxsus mablagʻlar joriy hisobiga yoziladi, uning 50 foizi davlat biologiya nazorati tomonidan jumhuriyat budjetining daromadiga oʻtkaziladi. Agar huquqbuzarlik davlat qoʻriqxonasi va milliy tabiiy bogʻ hududida sodir etilgan taqdirda jarima toʻlashdan tushadigan barcha summa (mazkur Nizomning 31-bandida nazarda tutilgan pul mukofotlarini chegirib tashlash bilan) davlat qoʻriqxonasi va milliy tabiiy bogʻning hisob-kitob schyotiga oʻtkaziladi.

Tortib olingan ovchilik va baliq ovlash asbob-anjomlarini, shuningdek, noqonuniy ov mahsulotlarini sotishdan tushgan hamma pul davlat biologiya nazoratining maxsus mablagʻlar joriy hisobiga yoziladi, uning 50 foizi jumhuriyat budjetining daromadiga oʻtkaziladi. Ovlash va baliq ovi qurollarini, shuningdek, qonunga xilof ov mahsulotlarini musodara qilishdan tushadigan barcha summa, agar huquqbuzarlik davlat qoʻriqxonalari va milliy tabiiy bogʻlar hududida sodir etilgan boʻlsa, Davlat qoʻriqxonalari va milliy tabiiy bogʻlarning hisob-kitob schyotlariga oʻtkaziladi.

Noqonuniy sotib olganligi, sotganligi, qayta ishlaganligi uchun tortib olingan moʻynali hayvonlarning terisini sotishdan tushgan pullar, shuningdek, davlat tamgʻasiga ega boʻlmagan va davlatga topshirilishi majburiy boʻlgan, qayta ishlash va boʻyash uchun qabul qilgan maishiy xizmat koʻrsatish kombinatlari va atelyelardan tortib olingan moʻynali hayvonlar terisini sotishdan olingan pullar terilarni sotish uchun qabul qilgan tashkilotlar tomonidan bevosita jumhuriyat budjetining daromadiga oʻtkaziladi.

30. Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologiya nazoratining maxsus mablagʻlari Oʻzbekiston Respublikasi Moliya vazirligi bilan kelishilgan smeta boʻyicha sarflanadi.

31. “Hayvonot olamini qoʻriqlash va undan foydalanish toʻgʻrisida”gi Oʻzbekiston Respublikasi Qonunini hamda ov qilish va baliq ovlash Qoidalarining buzilishini aniqlagan barcha shaxslarga zararni qoplashdan va pul jarimasidan tushgan pullarning 30 foizgachasi miqdorida mukofot beriladi.

32. Maxsus mablagʻlarning yil oxiridagi ishlatilmagan qoldigʻi SSJI Davlat banki muassasalari tomonidan yopilmaydi va keyingi yilga oʻtuvchi qoldiq hisoblanadi.

Odamlarda va hayvonlarda uchraydigan xavfli kasalliklarni tarqatuvchi hayvonlar — qishloq, oʻrmon va ovchilik xoʻjaligi zararkunandalari haq toʻlanmasdan ovlanadi (tegishli tashkilotlar beradigan roʻyxatga muvofiq).

Oʻrganish yoki iqlimlashtirish maqsadida Qizil kitobga kiritilgan hayvonlarni; ovlashga beriladigan litsenziyalar (ruxsatnomalarning qiymati dastlabki qiymatidan 5 baravar kam boʻladi.

Hayvonlarni, ularning qismlarini yoki hayoti faoliyati mahsulotlarini eksportga yetkazib berish maqsadida yovvoyi hayvonlarni ovlashga ruxsatnoma bepul beriladi, Davlat tabiatni muhofaza qilish qoʻmitasi huzuridagi davlat biologik nazorati bilan yetkazib beruvchi oʻrtasida tuzilgan shartnomaga muvofiq keyinchalik valyutada hisob-kitob qilinadi.

Hayvonlarning ovlanadigan turlarini ovlash uchun ruxsatnomalar (litsenziyalar) yovvoyi hayvonlar sonini, ovchilik xoʻjaligining yovvoyi hayvonlarni koʻpaytirishdagi va qoʻriqlashdagi ishtirokini hisobga olgan holda shartnoma narxlarida berilishi mumkin.

Yovvoyi hayvonlar hayot faoliyati mahsulotlari (zaharlar va boshqalar), shoxlar, moʻynali hayvonlarning terilari respublika tashqarisida Davlat tabiatni muhofaza qilish qoʻmitasi huzuridagi davlat biologik nazoratning ruxsatnomalari bilangina sotiladi.

Pitomniklarda oʻstirilgan hayvonlarni ovlash uchun ruxsatnomalar qiymati ishlab chiqaruvchilar bilan kelishuv boʻyicha belgilanadi.

Yovvoyi hayvonlarning maqomi oʻzgargan taqdirda Oʻzbekiston Respublikasi Davlat tabiatni muhofaza qilish qoʻmitasi huzuridagi davlat biologik nazoratga yovvoyi hayvonlarni noqonuniy ovlaganlik uchun undiriladigan pulning miqdorini aniqlash huquqi beriladi.