Sunʼiy yoʻldosh geodeziya tarmogʻi, davlat kadastri va koʻchmas mulkni roʻyxatga olishning yagona kompyuterlashtirilgan tizimini yaratishni nazarda tutgan holda Oʻzbekiston Respublikasining Milliy geografik axborot tizimini “Elektron hukumat” tizimining tarkibiy qismi sifatida shakllantirish hamda shu asosda tabiiy resurslardan oqilona foydalanish va uni muhofaza qilish, respublika hududlarini kompleks rivojlantirish uchun zarur axborot-resurs bazasini taʼminlash maqsadida:

1. Quyidagilar:

Koreya eksport-import banki bilan Oʻzbekiston Respublikasi Hukumatiga “Oʻzbekiston Respublikasi Milliy geografik axborot tizimini tashkil etish” loyihasini amalga oshirish uchun Iqtisodiy rivojlanish va hamkorlik jamgʻarmasining (YEDCF) 40 yil muddatga, 10 yil imtiyozli davrni oʻz ichiga olgan holda, 15,0 million AQSH dollari ekvivalentidagi koreys voni miqdorida imtiyozli qarz berish toʻgʻrisida qarz bitimi imzolanganligi;

ushbu loyihani amalga oshirish doirasida respublika va uning alohida hududlari tabiiy-iqtisodiy salohiyatini yagona umumdavlat kompleks hisobga olishni va baholashni, davlat hokimiyati va boshqaruvi organlari, yuridik va jismoniy shaxslarni faoliyatlari uchun zarur boʻlgan kadastr maʼlumotlari bilan tezkor taʼminlash uchun koʻp maqsadli axborot tizimi yaratilishi maʼlumot uchun qabul qilinsin.

2. Belgilab qoʻyilsinki:

loyihani amalga oshirish uchun Oʻzbekiston Respublikasining ulushi ekvivalentda 15,87 mln AQSH dollarini, shundan soliqlar va bojxona toʻlovlarini toʻlashdan ozod qilish shaklida 6,05 mln AQSH dollarini tashkil etadi;

loyihani amalga oshirish muddati — toʻrt yil (2013 — 2017-yillar);

Iqtisodiy rivojlanish boʻyicha hamkorlik jamgʻarmasining (YEDCF) asosiy qarzini uzish va qarz boʻyicha foizlarni toʻlash bilan bogʻliq sarf-xarajatlar Oʻzbekiston Respublikasi Davlat budjeti hisobidan qoplanadi;

3. Belgilansinki:

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi YEDCF qarz mablagʻlarining maqsadli sarflanishi va loyiha samarali amalga oshirilishi uchun masʼul boʻlgan ijro etuvchi organ hisoblanadi;

Oʻzbekiston Respublikasi Tashqi iqtisodiy faoliyat milliy banki YEDCFning qarziga xizmat koʻrsatuvchi moliyaviy agent hisoblanadi.

4. Quyidagilar:

“Oʻzbekiston Respublikasi Milliy geografik axborot tizimini tashkil etish” loyihasining texnik-iqtisodiy asoslanishi asosiy texnik-iqtisodiy parametrlari bilan birga 1-ilovaga* muvofiq;

“Oʻzbekiston Respublikasi Milliy geografik axborot tizimini tashkil etish” loyihasini amalga oshirish uchun taqdim etilayotgan YEDCF asosiy qarzini soʻndirish va qarz boʻyicha foizlarni toʻlashning prognoz jadvali 2 va 3-ilovalarga* muvofiq tasdiqlansin.

5. Oʻzbekiston Respublikasi Tashqi iqtisodiy faoliyat milliy banki Koreyaning Koreya almashinuv banki bilan YEDCF qarz mablagʻlarini qaytarish mexanizmini belgilaydigan banklararo bitim tuzsin.

6. Oʻzbekiston Respublikasi moliya vaziriga Oʻzbekiston Respublikasi Tashqi iqtisodiy faoliyat milliy banki va Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi bilan YEDCF qarzidan foydalanish va qaytarish tartibi toʻgʻrisidagi agentlik bitimini Oʻzbekiston Respublikasi Hukumati nomidan imzolash vakolati berilsin.

Oʻzbekiston Respublikasi Adliya vazirligi Oʻzbekiston Respublikasi Hukumati bilan Koreya eksport-import banki oʻrtasidagi qarz bitimi boʻyicha belgilangan tartibda huquqiy xulosa bersin.

7. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi:

har yillik budjetdan moliyalashtirishning mavjud hajmi doirasida loyihani bajarish xarajatlarini amalga oshirsin;

“Oʻzbekiston Respublikasi Milliy geografik axborot tizimini tashkil etish” loyihasini amalga oshirish boʻyicha qilingan ishlarning borishi toʻgʻrisida batafsil hisobotlarni har chorakda Oʻzbekiston Respublikasi Vazirlar Mahkamasiga taqdim etsin.

8. Oʻzbekiston Respublikasi Iqtisodiyot vazirligi Moliya vazirligi va Investitsiyalar boʻyicha davlat qoʻmitasi bilan birgalikda har yili Oʻzbekiston Respublikasining Investitsiya dasturini shakllantirishda unga “Oʻzbekiston Respublikasi Milliy geografik axborot tizimini tashkil etish” loyihasining belgilangan tartibda kiritilishini nazarda tutsin.

9. “Oʻzbekiston Respublikasi Milliy geografik axborot tizimini tashkil etish” loyihasini amalga oshirish doirasida YEDCF qarz mablagʻlari hisobidan xarid qilinadigan va respublika hududiga olib kiriladigan tovarlar (ishlar, xizmatlar) Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha bojxona toʻlovlaridan (bojxona yigʻimlaridan tashqari), qoʻshilgan qiymat soligʻi, shu jumladan davlatning maqsadli jamgʻarmalariga toʻlanadigan majburiy ajratmalar va toʻlovlardan ozod etilsin.

10. Oʻzbekiston Respublikasi Tashqi ishlar vazirligi Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi buyurtmanomalariga koʻra ushbu loyihani amalga oshirishda ishtirok etuvchi xorijiy mutaxassislarga kirish vizalarini konsullik yigʻimlari undirilmasdan rasmiylashtirilishini taʼminlasin.

11. Oʻzbekiston Respublikasi Ichki ishlar vazirligi Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi buyurtmanomalari boʻyicha ushbu loyihani amalga oshirishda ishtirok etadigan xorijiy mutaxassislarga koʻp martalik vizalar davlat boji undirilmasdan belgilangan tartibda berilishi va muddati uzaytirilishini, shuningdek, vaqtincha propiska qilinishi va vaqtincha propiska muddati uzaytirilishini taʼminlasin.

12. Mazkur qarorning bajarilishini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.