Oʻzbekiston Respublikasi hududida birdan-bir qonuniy toʻlov vositasi boʻlmish milliy valyutaning maqomini yanada mustahkamlash, naqd xorijiy valyutaning muomala doirasini tartibga solish, jinoiy faoliyatdan olingan daromadlarni legallashtirishga qarshi kurashish boʻyicha xalqaro standartlarni soʻzsiz bajarish, shuningdek valyuta almashtirish operatsiyalarini amalga oshirish mexanizmini takomillashtirish maqsadida:

1. Oʻzbekiston Respublikasi Markaziy banki va tijorat banklarining 2013-yil 1-fevraldan boshlab Oʻzbekiston Respublikasining rezidentlari — jismoniy shaxslarga vakolatli banklar tomonidan xorijiy valyutani xalqaro toʻlov kartalaridan foydalangan holda naqdsiz shaklda sotish mexanizmini joriy etish toʻgʻrisidagi taklifi qabul qilinsin.

2. Belgilab qoʻyilsinki, Oʻzbekiston Respublikasining rezidentlari — jismoniy shaxslarga naqdsiz xorijiy valyutani sotish vakolatli banklar va ularning filiallari binolarida quyidagi tartibda amalga oshiriladi:

Oʻzbekiston Respublikasining rezidenti — jismoniy shaxs vakolatli bankda oʻrnatilgan tartibda xalqaro toʻlov kartasini ochadi;

Oʻzbekiston Respublikasining rezidenti — jismoniy shaxs xorijiy valyutani sotib olish uchun vakolatli bankka shaxsni tasdiqlovchi hujjat (pasport, yashash guvohnomasi yoki harbiy xizmatchilar uchun harbiy bilet)ni, shuningdek valyuta ayirboshlash operatsiyasini amalga oshirish uchun depozit hisobida milliy valyutadagi zarur pul mablagʻlari mavjud boʻlgan shaxsiy plastik bank kartasini taqdim etadi;

vakolatli bank shaxsiy plastik bank kartasida milliy valyutadagi pul mablagʻlari yetarli ekanligini tekshiradi, xorijiy valyutani operatsiya amalga oshirilgan kuni belgilangan ayirboshlash kursi boʻyicha xalqaro toʻlov kartasiga oʻtkazadi hamda jismoniy shaxsga xorijiy valyutani sotib olganligini tasdiqlovchi belgilangan shakldagi maʼlumotnomani beradi.

Oʻzbekiston Respublikasining rezidentlari — jismoniy shaxslardan va norezidentlardan xorijiy valyutani sotib olish vakolatli banklar tomonidan, qoida tariqasida, vakolatli banklar va ularning filiallari binolarida, aeroportlarda, temir yoʻl vokzallarida, mehmonxonalarda, ichki ishlar organlarining kirish, chiqish va fuqarolikni belgilash boshqarmalari (boʻlimlari)da, shuningdek bojxona postlarida joylashgan ayirboshlash shoxobchalari orqali cheklanmagan miqdorda amalga oshiriladi.

3. Xorijiy valyutani jismoniy shaxslardan sotib olish va ularga sotish tartibi hamda ayirboshlash shoxobchalari toʻgʻrisidagi Nizom ilovaga* muvofiq tasdiqlansin.

Mazkur Nizom 2013-yil 1-fevraldan boshlab kuchga kiradi.

4. Oʻzbekiston Respublikasi Markaziy banki vakolatli banklar bilan birgalikda:

valyuta ayirboshlash operatsiyalari bilan shugʻullanuvchi banklarning tegishli boʻlinmalarida aholiga tezkor va sifatli xizmat koʻrsatish uchun lozim boʻlgan shart-sharoitlar yaratilishini taʼminlasin;

xalqaro toʻlov kartalaridan foydalangan holda jismoniy shaxslardan xorijiy valyutani sotib olish va ularga sotish tartibi hamda mexanizmi toʻgʻrisida aholini keng koʻlamda va toʻliq xabardor qilish choralarini koʻrsin.

5. Oʻzbekiston Respublikasi Markaziy banki, Adliya vazirligi Oʻzbekiston banklari uyushmasi hamda boshqa manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan oʻzgartish va qoʻshimchalar boʻyicha Oʻzbekiston Respublikasi Vazirlar Mahkamasiga takliflar kiritsin;

oʻzlarining idoraviy normativ-huquqiy hujjatlarini mazkur qarorga muvofiq holga keltirsin.

6. Ushbu qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Markaziy bankining raisi F.M. Mullajonov zimmasiga yuklansin.