Oʻzbekiston Respublikasi tashqi iqtisodiy faoliyatining Tovar nomenklaturasini jahon amaliyotida qoʻllanilayotgan Tovarlarni taʼriflash va kodlashning uygʻunlashtirilgan tizimi (2012-yilgi versiya) bilan unifikatsiya qilish maqsadida:

1. Maʼlumot uchun qabul qilinsinki, jahon savdosiga chiqarilgan tovarlarning xalqaro klassifikatsiyasini uygʻunlashtirish maqsadida Jahon bojxona tashkiloti tomonidan Tovarlarni taʼriflash va kodlashning uygʻunlashtirilgan tizimiga 2012-yilda kuchga kirgan oʻzgartish va qoʻshimchalar kiritildi.

2. 2012-yilning 1-oktabridan boshlab yangilangan taʼriflash va kodlashning uygʻunlashtirilgan tizimi negizida ishlab chiqilgan Oʻzbekiston Respublikasi tashqi iqtisodiy faoliyatining Tovar nomenklaturasi (2012-yilgi versiya) amalga kiritilsin.

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Davlat bojxona qoʻmitasi bilan birgalikda 2012-yilning 1-oktabrigacha boʻlgan muddatda Oʻzbekiston Respublikasi tashqi iqtisodiy faoliyatining Tovar nomenklaturasi (2012-yilgi versiya) chop etilishi hamda manfaatdor tashkilotlarga yetkazilishini taʼminlasin.

3. 2012-yilning 1-oktabridan Oʻzbekiston Respublikasi Prezidentining ayrim qarorlariga ilovaga* muvofiq oʻzgartishlar kiritilsin.

4. 2012-yilning 1-oktabridan boshlab Oʻzbekiston Respublikasi Prezidentining “Oʻzbekiston Respublikasining tashqi iqtisodiy faoliyatini yanada tartibga solish chora-tadbirlari toʻgʻrisida” 2008-yil 27-martdagi PQ–823-sonli qarori oʻz kuchini yoʻqotgan deb hisoblansin.

5. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Iqtisodiyot vazirligi, Adliya vazirligi, Davlat bojxona qoʻmitasi boshqa manfaatdor vazirliklar va idoralar bilan birgalikda ikki hafta muddatda qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

6. Ushbu qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.