O‘zbekistonning 1970-yil 1-iyulda Jeneva shahrida imzolangan avtomobilda xalqaro yuk tashiydigan transport vositalari ekipajlari ishiga tegishli Yevropa bitimidagi ishtiroki bilan bog‘liq O‘zbekiston Respublikasi majburiyatlarini bajarish maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi 1998-yilda avtomobilda xalqaro yuk tashiydigan transport vositalari ekipajlari ishiga tegishli Yevropa bitimiga qo‘shilganligi;

Yevropa bitimi talablariga muvofiq 2010-yil 16-iyundan keyin Yevropa bitimi qatnashchilari bo‘lgan mamlakatlarga avtomobilda xalqaro yuk tashiydigan avtotransport vositalari raqamli nazorat qurilmalari bilan ta’minlanishi zarurligi ma’lumot uchun qabul qilinsin.

2. O‘zbekiston Respublikasi Transport vazirligi O‘zbekistonning Yevropa bitimida qatnashishi bilan bog‘liq O‘zbekiston Respublikasi majburiyatlarini bajarish bo‘yicha vakolatli organ etib belgilansin.

2¹. Belgilansinki, xalqaro avtomobil qatnovida hamda M₃ va N₃ toifaga kiruvchi avtotransport vositalarida yo‘lovchi va yuklarni shaharlararo (masofasi 400 km va undan yuqori) yo‘nalishlar bo‘yicha tashishda haydovchilarning mehnat va dam olish rejimi raqamli nazorat qurilmasi (taxograf) yordamida nazorat qilinadi.

Bunda haydovchi faqat raqamli nazorat qurilmasida o‘zining haydovchi kartochkasidan foydalanishi lozim bo‘ladi.

3. O‘zbekiston Respublikasi Transport vazirligi.

Yevropa bitimi talablariga muvofiq avtomobilda xalqaro yuk tashishda haydovchilarning mehnat va dam olish rejimlarini nazorat qilish uchun foydalaniladigan raqamli nazorat qurilmasi kartochkalari to‘g‘risidagi nizom, shuningdek Raqamli nazorat qurilmalaridan foydalanish to‘g‘risidagi yo‘riqnoma bir oy muddatda ishlab chiqilishi va belgilangan tartibda tasdiqlanishini;

Yevropa bitimi talablariga muvofiq raqamli nazorat qurilmalarini bosqichma-bosqich joriy etish va ulardan foydalanish ishlari muvofiqlashtirilishini;

O‘zbekiston Respublikasining avtomobilda xalqaro yuk tashishni bajaradigan avtotransport vositalarida raqamli nazorat qurilmalari tizimi joriy etilishi bo‘yicha chora-tadbirlar amalga oshirilishini ta’minlasin.

4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.I. Zokirov zimmasiga yuklansin.