Hujjat kuchini yo‘qotgan " " 22.02.2021

Oʻzbekiston Respublikasi Vazirlar Mahkamasining

qarori

OʻZBEKISTON RESPUBLIKASI PREZIDENTINING FARGʻONA VILOYATIDA BOʻLGAN VAQTDAGI TOPShIRIQLARINI AMALGA OShIRIShGA DOIR TADBIRLAR REJASINI TASDIQLASh TOʻGʻRISIDA

LexUZ sharhi

Mazkur qaror Oʻzbekiston Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.

Fargʻona viloyatining sanoat salohiyatini va ijtimoiy infratuzilmasini yanada rivojlantirish, aholi punktlarining arxitekturaviy qiyofasini yaxshilash va obodonlashtirishni taʼminlash, shuningdek viloyat aholisining turmush darajasini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2011-yil 11-oktabrda Fargʻona viloyatida boʻlgan vaqtdagi topshiriqlarini amalga oshirishga doir Tadbirlar rejasi (keyingi oʻrinlarda Tadbirlar rejasi deb ataladi) ilovaga muvofiq tasdiqlansin.

2. Oʻzbekiston Respublikasi Iqtisodiyot vazirligi, Moliya vazirligi, Fargʻona viloyati hokimligi manfaatdor vazirliklar, idoralar va xoʻjalik birlashmalari bilan birgalikda:

tasdiqlangan Tadbirlar rejasining oʻz vaqtida va sifatli bajarilishini tashkil etsinlar;

Tadbirlar rejasini amalga oshirishni moliyalashtirish manbalari va hajmlarini aniqlasinlar;

Tadbirlar rejasining bajarilishi yuzasidan doimiy monitoring oʻrnatsinlar hamda muammoli masalalarni har oyda koʻrib chiqsinlar, ularni hal etish yuzasidan zarur tezkor va amaliy chora-tadbirlar koʻrsinlar.

3. Fargʻona viloyati hokimligi (Neʼmatov):

bir hafta muddatda ushbu qarorni bajarish yuzasidan tegishli qaror qabul qilsin, unda bajarish muddatlari va bajarish uchun masʼullarni koʻrsatgan holda qarorni bajarishning kalendar jadvalini tasdiqlashni nazarda tutsin;

har oyda tadbirlarning bajarilishi muhokamasini tashkil qilsin, Oʻzbekiston Respublikasi Vazirlar Mahkamasiga tegishli axborot taqdim etsin.

4. Belgilab qoʻyilsinki, tegishli vazirliklar, davlat qoʻmitalari, idoralar va Fargʻona viloyati hokimligi rahbarlari Tadbirlar rejasining bajarilishi yuzasidan shaxsan javob beradilar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2011-yil 1-noyabr,

293-son

Vazirlar Mahkamasining 2011-yil 1-noyabrdagi 293-son qaroriga
ILOVA

Oʻzbekiston Respublikasi Prezidentining 2011-yil 11-oktabrda Fargʻona viloyatida boʻlgan vaqtdagi topshiriqlarini amalga oshirishga doir

TADBIRLAR REJASI

T/r‎	Oʻzbekiston Respublikasi Prezidentining topshiriqlari‎	Masʼul bajaruvchilar‎	Bajarish muddatlari‎
1.	Oʻzbekiston Respublikasi Prezidentining “2012 — 2015-yillar davrida Fargʻona shahrining 2030-yilgacha boʻlgan bosh rejasini amalga oshirish, ijtimoiy va transport-kommunal infratuzilma obyektlarini rekonstruksiya qilish hamda modernizatsiyalashga doir birinchi navbatdagi chora-tadbirlar toʻgʻrisida” qarori loyihasini tayyorlash.	R.S. Azimov, Iqtisodiyot vazirligi (Saidova), Moliya vazirligi (Guskova), Davlat arxitektura va qurilish qoʻmitasi (Toxtayev), Fargʻona viloyati hokimligi (Neʼmatov) ‎	2011-yil 28-oktabr ‎
2.‎	Qayta ishlash korxonalarini, birinchi navbatda, qishloq xoʻjaligi mahsulotlarini chuqur qayta ishlash korxonalarini rivojlantirish hisobiga sanoatning yalpi mintaqaviy mahsulotdagi ulushini oshirish dasturini ishlab chiqish.	Iqtisodiyot vazirligi (Saidova), Qishloq va suv xoʻjaligi vazirligi (Roʻziyev), Fargʻona viloyati hokimligi (Neʼmatov)	2011-yil 1-dekabr
3.‎	Xizmatlar koʻrsatish sohasini rivojlantirish va uning koʻrsatkichlarini oʻrtacha respublika koʻrsatkichlarigacha yetkazish chora-tadbirlari kompleksini ishlab chiqish.	Iqtisodiyot vazirligi (Saidova), Fargʻona viloyati hokimligi (Neʼmatov)	2011-yil 1-dekabr
4.‎	Ish bilan bandlik masalalarini, ayniqsa qishloq mintaqalarida tubdan hal qiluvchi yangi ish oʻrinlari tashkil etish dasturini ishlab chiqish.	Mehnat va aholini ijtimoiy muhofaza qilish vazirligi (Xaitov), Fargʻona viloyati hokimligi (Neʼmatov)	2011-yil 1-dekabr
5.‎	Qishloq xoʻjaligi mahsulotlari yetishtirish hajmlarini puxta tahlil qilish hamda qoʻshilgan qiymatni oʻstirish maqsadida ularni chuqur qayta ishlash dasturini ishlab chiqish va paxta, meva-sabzavot, poliz mahsulotlari, uzum va shu kabilarning qayta ishlangan mahsulotlarini eksportga yetkazib berishni kengaytirish boʻyicha takliflar kiritish.	Iqtisodiyot vazirligi (Saidova), Qishloq va suv xoʻjaligi vazirligi (Roʻziyev), Tashqi iqtisodiy aloqalar, investitsiyalar va savdo vazirligi (Gʻulomov), Fargʻona viloyati hokimligi (Neʼmatov)	2011-yil 1-dekabr
6.‎	“Indorama-Qoʻqon-Tekstil” qoʻshma korxonasi bilan Qoʻqon shahridagi sohaga oid kollejlar oʻrtasida mustahkam aloqalar oʻrnatish, kollej oʻquvchilarini oʻqitishni va korxonalarda tajriba orttirishini tashkil etish, bevosita kollejlarda korxonaning texnik xodimlari tomonidan oʻquv-seminarlari oʻtkazish. ‎Korxonaning ishlab chiqarish sexlaridagi havoni ishlab chiqarish changlaridan tozalashning zamonaviy ventilatsiya tizimini, ishlovchilar uchun qulay mikroiqlim yaratgan holda, belgilangan standartlargacha yetkazish.	A.N. Aripov “Oʻzbekyengilsanoat” (Haydarov), Oʻrta maxsus, kasb-hunar taʼlimi markazi (Ismoilov), Fargʻona viloyati hokimligi (Neʼmatov), “Indorama-Qoʻqon-Tekstil” QK	2011-yil 15-noyabr
7.‎	Qoʻqon shahridagi “Oʻrda”ning tutash maydonini landshaft arxitekturasi qoidalari asosida obodonlashtirish, maydon hududini sugʻorish tizimini ishlab chiqish. ‎Qish davrida shaharning iqlim sharoitlariga muvofiq boʻlgan koʻp yillik daraxtlar (kashtan, eman va shu kabilarni) va gul koʻchatlari oʻtqazishni tashkil etish.	Bosh vazir oʻrinbosari, Kommunal soha, transport, kapital qurilish va qurilish industriyasi masalalari ATD (Xanov), Davlat arxitektura va qurilish qoʻmitasi (Toxtayev), Qishloq va suv xoʻjaligi vazirligi (Roʻziyev), Fargʻona viloyati hokimligi (Neʼmatov)	2012-yil 1-martgacha
8.‎	Qoʻqon shahridagi “Oʻrda” maydoni hududida landshaft arxitekturasi asosida yangi “Ezgu niyat” xiyobonini tashkil etish hamda oila qurgan yoshlarning oilaviy rishtalarini mustahkamlash maqsadida ushbu xiyobonni “Yangi hayot” deb nomlash.	Bosh vazir oʻrinbosari, Kommunal soha, transport, kapital qurilish va qurilish industriyasi masalalari ATD (Xanov), Davlat arxitektura va qurilish qoʻmitasi (Toxtayev), Madaniyat va sport ishlari vazirligi (Qoʻziyev), Fargʻona viloyati hokimligi (Neʼmatov)	2011-yil 1-dekabr
9.‎	Qoʻqonlik hunarmandlarning yutuqlari va eng yaxshi anʼanalarini namoyish etish maqsadida Qoʻqon shahridagi “Oʻrda” muzeyi ekspozitsiyalarini tubdan yangilash hamda xarakterli boʻlmagan eksponatlarni (aravalar va shu kabilarni) olib tashlash.‎	A.N. Aripov, Madaniyat va sport ishlari vazirligi (Qoʻziyev), Fargʻona viloyati hokimligi (Neʼmatov) ‎	2012-yil 1-mart ‎
10.‎	Qoʻqon shahridagi “Jome” kompleksidan maʼnaviyat va maʼrifat markazi sifatida foydalanish konsepsiyasini ishlab chiqish.‎	A.N. Aripov, “Respublika maʼnaviyat va targʻibot markazi” (Mirzayev), Fargʻona viloyati hokimligi (Neʼmatov) ‎	2011-yil 1-noyabr ‎
11.‎	Prezidium uchun sahna balandligini pasaytirish va zaldagi oʻrindiqlarni yanada oqilona joylashtirish maqsadida Fargʻona viloyati hokimligi majlislar zali dizaynini qayta ishlash.‎	Bosh vazir oʻrinbosari, Kommunal soha, transport, kapital qurilish va qurilish industriyasi masalalari ATD (Xanov), Davlat arxitektura va qurilish qoʻmitasi (Toxtayev), Fargʻona viloyati hokimligi (Neʼmatov) ‎	2012-yil 1-iyul ‎

(Oʻzbekiston Respublikasi qonun hujjatlari toʻplami, 2011-y., 43-44-son, 469-modda)