Respublika mintaqalari iqtisodiyoti tarmoqlari va sohalarida talab yuqori boʻlgan oʻrta maxsus, kasb-hunar maʼlumotli kadrlarni maqsadli va sifatli tayyorlashni hamda umumtaʼlim maktablarining 9-sinflari bitiruvchilarini kasb-hunar kollejlari va akademik litseylarda oʻqish bilan yanada toʻliq qamrab olishni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi, Mehnat va aholini ijtimoiy muhofaza qilish vazirligi, Oliy va oʻrta maxsus taʼlim vazirligi, Xalq taʼlimi vazirligining Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda, iqtisodiyot tarmoqlari va sohalarida aniq kasblar boʻyicha kollejlar bitiruvchilariga amaldagi ehtiyojni tanqidiy tahlil qilish asosida ishlab chiqilgan, 2011/2012 oʻquv yilidan boshlab respublika mintaqalarida 1-ilovaga* muvofiq 59 ta kasb-hunar kollejini kasblar va mutaxassisliklarni kengaytirgan va unifikatsiya qilgan holda qayta ixtisoslashtirishga doir takliflari qabul qilinsin.

Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi manfaatdor vazirliklar va idoralar, mahalliy davlat hokimiyati organlari bilan birgalikda qayta ixtisoslashtirilgan kasb-hunar kollejlarining moddiy-texnika bazasini mustahkamlash, ularni zarur oʻquv-laboratoriya asbob-uskunalari, oʻquv va metodik adabiyotlar, shuningdek ulardagi mutaxassisliklarning oʻzgargan nomenklaturasiga muvofiq malakali pedagog kadrlar bilan taʼminlash chora-tadbirlarini koʻrsin.

2. Oʻzbekiston Respublikasi Iqtisodiyot vazirligi, Oliy va oʻrta maxsus taʼlim vazirligi tomonidan manfaatdor vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda iqtisodiyot tarmoqlarining oʻrta maxsus, kasb-hunar maʼlumotli mutaxassislarga boʻlgan real ehtiyojini hisobga olgan holda tayyorlangan 2011/2012 oʻquv yilida umumtaʼlim maktablarining 9-sinflari bitiruvchilarini respublikaning kasb-hunar kollejlariga va akademik litseylariga qabul qilishning umumiy parametrlari 2 va 2.1 — 2.13-ilovalarga* muvofiq tasdiqlansin.

3. Vazirlar Mahkamasi (Sh.M. Mirziyoyev) maxsus ishchi guruh tashkil etsin hamda bir oy muddatda joylarga borgan holda umumtaʼlim maktablarining oʻquvchilarini 10-11-sinflarda oʻqitish ishlarining ahvolini tanqidiy oʻrganib chiqsin va ularni oʻrta maxsus, kasb-hunar taʼlim muassasalarida oʻqitish bilan yanada toʻliq qamrab olish yuzasidan, shu jumladan kasb-hunar kollejlarini rekonstruksiya qilish, ular huzurida, maktablarning barcha 9-sinflari bitiruvchilari aniq mutaxassisliklarni egallashlari uchun zarur shart-sharoitlar yaratishni nazarda tutgan holda, yangi yotoqxonalar qurish va mavjud yotoqxonalarni rekonstruksiya qilish yuzasidan belgilangan tartibda takliflar kiritsin.

4. Oʻzbekiston Respublikasi taʼlim muassasalariga qabul qilish boʻyicha Davlat komissiyasi (A.N. Aripov), respublikaning kasb-hunar kollejlariga va akademik litseylariga qabul qilishning belgilangan umumiy parametrlaridan kelib chiqqan holda, Oʻzbekiston Respublikasi Iqtisodiyot vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining takliflari asosida bir hafta muddatda 2011/2012 oʻquv yilida viloyatlar, shaharlar va tumanlar boʻyicha har bir akademik litsey va kasb-hunar kollejiga umumtaʼlim maktablarining 9-sinflari bitiruvchilarini qabul qilish parametrlarini tasdiqlasin.

Bunda umumtaʼlim maktablarining 9-sinflari bitiruvchilarini, oʻquvchilar va ular ota-onalarining tanlangan, iqtisodiyot tarmoqlarida ehtiyoj mavjud boʻlgan mutaxassisliklar boʻyicha oʻqishga talabini, taʼlim muassasalarida zarur moddiy-texnika bazasi mavjudligini hisobga olgan holda, kasb-hunar kollejlari va akademik litseylarda oʻqitish bilan toʻliq qamrab olinishini taʼminlashga alohida eʼtibor berilsin.

5. Oʻzbekiston Respublikasi taʼlim muassasalariga qabul qilish boʻyicha Davlat komissiyasiga, zaruriyat boʻlganda, umumtaʼlim maktablarining 9-sinflari bitiruvchilarining oʻrta maxsus, kasb-hunar taʼlim muassasalarida oʻqitish bilan toʻliq qamrab olinishini taʼminlash maqsadida akademik litseylar va kasb-hunar kollejlariga qabul qilish koʻrsatkichlariga oʻzgartirishlar kiritish huquqi berilsin.

6. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Xalq taʼlimi vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari oʻz tasarrufida oʻrta maxsus, kasb-hunar taʼlim muassasalari boʻlgan vazirliklar va idoralar bilan birgalikda 2011/2012 oʻquv yilida umumtaʼlim maktablarining 9-sinflari bitiruvchilarini akademik litseylar va kasb-hunar kollejlariga qabul qilishning belgilangan umumiy parametrlari soʻzsiz bajarilishini taʼminlasinlar hamda shu yil 10-avgustgacha boʻlgan muddatda Vazirlar Mahkamasiga qamrab olish natijalari boʻyicha yakuniy axborot taqdim etsinlar.

7. Oʻzbekiston Respublikasi Moliya vazirligi kasb-hunar kollejlari va akademik litseylar taʼminoti uchun, 2011/2012 oʻquv yilida oʻrta maxsus, kasb-hunar taʼlimi muassasalariga qabul qilishning tasdiqlangan parametrlarini hisobga olgan holda, Oʻzbekiston Respublikasi Davlat budjetidan zarur mablagʻlar ajratilishini belgilangan tartibda taʼminlasin.

8. Oʻzbekiston Respublikasi Moliya vazirligi Iqtisodiyot vazirligi bilan birgalikda, 2011/2012 oʻquv yili uchun kasb-hunar kollejlariga va akademik litseylarga qabulning va ular toʻldirilishining aniq natijalarini hisobga olgan holda, 2011-yil 1-sentabrgacha boʻlgan muddatda Vazirlar Mahkamasiga oʻrta maxsus, kasb-hunar taʼlimi muassasalarini va ular huzuridagi yotoqxonalarning yangilarini qurish hamda mavjudlarini rekonstruksiya qilish loyihalarining asosiy parametrlari va moliyalashtirish manbalari, shuningdek kasb-hunar kollejlari va akademik litseylarni zarur oʻquv-laboratoriya asbob-uskunalari bilan jihozlash uchun mablagʻlar ajratish yuzasidan takliflar kiritsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.