Shaxsning barkamol kamol topishiga, o‘sib kelayotgan avlodning ijodiy qobiliyatlarini aniqlash va rivojlantirishga, o‘quvchilarga mehnatsevarlikni singdirishga, shuningdek ularning bo‘sh vaqtdan oqilona foydalanishiga yo‘naltirilgan maktabdan tashqari ishlar tizimini tubdan takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Xalq ta’limi vazirligi, Iqtisodiyot vazirligi va Moliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining faoliyat ko‘rsatayotgan maktabdan tashqari ta’lim muassasalarining sonini va tuzilmasini takomillashtirish hamda uning asosida har bir tuman va shaharda bittadan “Barkamol avlod” bolalar markazini, shuningdek bittadan viloyat bolalar markazini, Qoraqalpog‘iston Respublikasida esa respublika bolalar markazini va Toshkent shahrida — texnik, badiiy ijodiyot, o‘lkashunoslik va ekologiya bo‘yicha uchta respublika bolalar markazlarini — ular tegishli ravishda tumanlar, shaharlar va viloyatlar hokimliklariga bo‘ysundirilgan holda — hammasi bo‘lib 215 ta bolalar markazini shakllantirish to‘g‘risidagi taklifi qabul qilinsin.

4. O‘zbekiston Respublikasi Prezidentining 2010-yil 13-oktabrdagi F-3509-son farmoyishi bilan tashkil etilgan ishchi guruh tomonidan ishlab chiqilgan, quyidagilarni o‘z ichiga oladigan 2011 — 2014-yillarda “Barkamol avlod” bolalar markazlarini shakllantirish dasturi tasdiqlansin:

2011 — 2014-yillarda “Barkamol avlod” bolalar markazlarini shakllantirish va ularning moddiy-texnika bazasini rivojlantirish bo‘yicha kompleks tadbirlar 4-ilovaga muvofiq;

2011 — 2014-yillarda “Barkamol avlod” bolalar markazlarini mukammal ta’mirlash va jihozlashning asosiy parametrlari 5-ilovaga muvofiq.

5. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

belgilangan jadvalga muvofiq muddatlarda umumta’lim maktablari binolarining alohida o‘quv bloklarida 78 ta “Barkamol avlod” bolalar markazi ochilishini ta’minlasinlar, alohida kirish joyi mavjud bo‘lishini hamda to‘rttadan oltitagacha to‘garak xonalarini o‘quv jarayoniga zarar yetkazmasdan zarur asbob-uskunalar va inventar bilan to‘liq jihozlashni nazarda tutsinlar;

to‘garak mashg‘ulotlarini o‘tkazishga asosan umumta’lim maktablari, akademik litseylar va kasb-hunar kollejlari o‘qituvchilari o‘tilgan mashg‘ulotlar hajmiga proporsional ravishda soatbay haq to‘lagan holda shartnoma asosida jalb etilishini tashkil etsinlar;

O‘zbekiston Respublikasi Mehnat va aholini ijtimoiy muhofaza qilish vazirligi bilan birgalikda maktabdan tashqari ta’lim muassasalarining bo‘shab qoladigan xodimlarini ishga joylashtirish chora-tadbirlarini ko‘rsinlar.

Belgilansinki, umumta’lim maktablari binolarining alohida o‘quv bloklarida tashkil etiladigan “Barkamol avlod” bolalar markazlarida elektr energiyasini hisobga olishning alohida priborlari o‘rnatiladi, qolgan kommunal xarajatlar esa ular tomonidan umumta’lim maktablariga moliya organlari bilan kelishuv bo‘yicha qoplanadi.

7. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari O‘zbekiston Respublikasi Davlat arxitektura va qurilish qo‘mitasi bilan birgalikda:

“Barkamol avlod” bolalar markazlari tashkil etiladigan binolar va inshootlarni mukammal ta’mirlash uchun loyiha-smeta hujjatlari o‘z vaqtida ishlab chiqilishini, ta’mirlash ishlarini to‘liq tugallash va obyektlarni belgilangan muddatlarda topshirish shartlari bilan tanlov (tender) savdolari o‘tkazilishini ta’minlasinlar;

buyurtmachi bilan pudratchilar o‘rtasidagi shartnoma majburiyatlari bajarilishi hamda qurilish normalari va qoidalariga muvofiq ta’mirlash ishlari amalga oshirilishi ustidan doimiy nazorat o‘rnatsinlar.

8. Barkamol avlod” bolalar maktablarida o‘qiganlik uchun ota-onalardan olinadigan to‘lovlar oyiga bazaviy hisoblash miqdoriga nisbatan quyidagi miqdorlarda belgilanadi:

Qoraqalpog‘iston Respublikasining Nukus va Xorazm viloyatining Urganch shaharlarida — 5 foiz, Qoraqalpog‘iston Respublikasi va Xorazm viloyatining qolgan tuman (shahar)larida — 2,5 foiz;

viloyatlar markazlari va Toshkent shahrida — 10 foiz;

respublikaning qolgan tuman (shahar)larida — 5 foiz.

Ijtimoiy himoyaga muhtoj oila farzandlari, Mehribonlik uylari va Bolalar shaharchasi tarbiyalanuvchilari, imkoniyati cheklangan bolalar uchun ixtisoslashtirilgan ta’lim muassasalari o‘quvchilari va ichki ishlar organlarining profilaktik hisobiga olingan o‘quvchilar “Barkamol avlod” bolalar maktablarida o‘qiganlik uchun ota-onalar to‘lovidan ozod qilinadi.

Texnik ijodkorlik yo‘nalishidagi to‘garaklar uchun ota-onalar to‘lovi Qoraqalpog‘iston Respublikasi, Toshkent shahar va viloyatlar maktablarida 25 foiz, tuman (shahar) maktablarida 20 foiz etib belgilanishi mumkin.

Agar maktabga oiladan bittadan ortiq bola borsa, ularning har biri uchun o‘qiganlik uchun ota-onalardan olinadigan to‘lovlar miqdorining 70 foizi, to‘garak a’zosi maktabda tashkil etilgan bittadan ortiq to‘garakka a’zo bo‘lgan taqdirda 60 foizi to‘lanadi.

Ota-onalar to‘lovidan tushgan mablag‘lar:

a) “Barkamol avlod” bolalar maktablari faoliyati uchun zarur bo‘lgan xom ashyo va materiallar, moddiy boyliklar (mebel, asbob-uskuna va jihozlar, kompyuter texnikasi va boshqalar) va transport vositalarini xarid qilishga;

b) madaniy-ommaviy tadbirlarni o‘tkazish va ularda qatnashish bilan bog‘liq xarajatlarga;

v) to‘garak rahbarlari va xodimlarni 50 foizgacha rag‘batlantirishga;

g) o‘quvchilari xalqaro miqyosida o‘tkaziladigan ko‘rik-tanlov va festivallarda g‘oliblikni qo‘lga kiritgan to‘garak rahbarlari bazaviy hisoblash miqdorining quyidagi miqdorlarida bir martalik pul mukofotlari bilan taqdirlanadi:

1-o‘rin uchun — 20 baravarigacha;

2-o‘rin uchun — 15 baravarigacha;

3-o‘rin uchun — 12 baravarigacha;

d) o‘quvchilari respublika miqyosida o‘tkaziladigan ko‘rik-tanlov va festivallarda g‘oliblikni qo‘lga kiritgan to‘garak rahbarlari bazaviy hisoblash miqdorining quyidagi miqdorlarida bir martalik pul mukofotlari bilan taqdirlanadi:

1-o‘rin uchun — 10 baravarigacha;

2-o‘rin uchun — 7 baravarigacha;

3-o‘rin uchun — 5 baravarigacha.

9. O‘zbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda Vazirlar Mahkamasiga qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida taklif kiritsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.N. Aripov zimmasiga yuklansin.