Hujjat kuchini yo‘qotgan " " 11.12.2025

PDF-faylidagi rasmiy manba

Oʻzbekiston Respublikasi Vazirlar Mahkamasining

qarori

MAKTABDAN TASHQARI TAʼLIM TIZIMINI YANADA TAKOMILLASHTIRISH CHORA-TADBIRLARI TOʻGʻRISIDA

LexUZ sharhi

Mazkur qaror Oʻzbekistan Respublikasi Vazirlar Mahkamasining 2025-yil 10-dekabrdagi 776-sonli ““Kelajak” markazlari faoliyatini tartibga solishga qaratilgan ayrim normativ-huquqiy hujjatlarni tasdiqlash toʻgʻrisida”gi qaroriga asosan oʻz kuchini yoʻqotgan.

Shaxsning barkamol kamol topishiga, oʻsib kelayotgan avlodning ijodiy qobiliyatlarini aniqlash va rivojlantirishga, oʻquvchilarga mehnatsevarlikni singdirishga, shuningdek ularning boʻsh vaqtdan oqilona foydalanishiga yoʻnaltirilgan maktabdan tashqari ishlar tizimini tubdan takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Xalq taʼlimi vazirligi, Iqtisodiyot vazirligi va Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining faoliyat koʻrsatayotgan maktabdan tashqari taʼlim muassasalarining sonini va tuzilmasini takomillashtirish hamda uning asosida har bir tuman va shaharda bittadan “Barkamol avlod” bolalar markazini, shuningdek bittadan viloyat bolalar markazini, Qoraqalpogʻiston Respublikasida esa respublika bolalar markazini va Toshkent shahrida — texnik, badiiy ijodiyot, oʻlkashunoslik va ekologiya boʻyicha uchta respublika bolalar markazlarini — ular tegishli ravishda tumanlar, shaharlar va viloyatlar hokimliklariga boʻysundirilgan holda — hammasi boʻlib 215 ta bolalar markazini shakllantirish toʻgʻrisidagi taklifi qabul qilinsin.

Oldingi tahrirga qarang.

(2-band Oʻzbekiston Respublikasi Vazirlar Mahkamasining 2021-yil 27-maydagi 331-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 28.05.2021-y., 09/21/331/0501-son)

Oldingi tahrirga qarang.

(3-band Oʻzbekiston Respublikasi Vazirlar Mahkamasining 2021-yil 27-maydagi 331-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 28.05.2021-y., 09/21/331/0501-son)

4. Oʻzbekiston Respublikasi Prezidentining 2010-yil 13-oktabrdagi F-3509-son farmoyishi bilan tashkil etilgan ishchi guruh tomonidan ishlab chiqilgan, quyidagilarni oʻz ichiga oladigan 2011 — 2014-yillarda “Barkamol avlod” bolalar markazlarini shakllantirish dasturi tasdiqlansin:

2011 — 2014-yillarda “Barkamol avlod” bolalar markazlarini shakllantirish va ularning moddiy-texnika bazasini rivojlantirish boʻyicha kompleks tadbirlar 4-ilovaga muvofiq;

2011 — 2014-yillarda “Barkamol avlod” bolalar markazlarini mukammal taʼmirlash va jihozlashning asosiy parametrlari 5-ilovaga muvofiq.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

belgilangan jadvalga muvofiq muddatlarda umumtaʼlim maktablari binolarining alohida oʻquv bloklarida 78 ta “Barkamol avlod” bolalar markazi ochilishini taʼminlasinlar, alohida kirish joyi mavjud boʻlishini hamda toʻrttadan oltitagacha toʻgarak xonalarini oʻquv jarayoniga zarar yetkazmasdan zarur asbob-uskunalar va inventar bilan toʻliq jihozlashni nazarda tutsinlar;

toʻgarak mashgʻulotlarini oʻtkazishga asosan umumtaʼlim maktablari, akademik litseylar va kasb-hunar kollejlari oʻqituvchilari oʻtilgan mashgʻulotlar hajmiga proporsional ravishda soatbay haq toʻlagan holda shartnoma asosida jalb etilishini tashkil etsinlar;

(5-bandning uchinchi xatboshisi Oʻzbekiston Respublikasi Vazirlar Mahkamasining 2017-yil 12-maydagi 275-sonli qarori tahririda — OʻR QHT, 2017-y., 20-son, 361-modda)

Oʻzbekiston Respublikasi Mehnat va aholini ijtimoiy muhofaza qilish vazirligi bilan birgalikda maktabdan tashqari taʼlim muassasalarining boʻshab qoladigan xodimlarini ishga joylashtirish chora-tadbirlarini koʻrsinlar.

Belgilansinki, umumtaʼlim maktablari binolarining alohida oʻquv bloklarida tashkil etiladigan “Barkamol avlod” bolalar markazlarida elektr energiyasini hisobga olishning alohida priborlari oʻrnatiladi, qolgan kommunal xarajatlar esa ular tomonidan umumtaʼlim maktablariga moliya organlari bilan kelishuv boʻyicha qoplanadi.

Oldingi tahrirga qarang.

(6-band Oʻzbekiston Respublikasi Vazirlar Mahkamasining 2021-yil 27-maydagi 331-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 28.05.2021-y., 09/21/331/0501-son)

7. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Davlat arxitektura va qurilish qoʻmitasi bilan birgalikda:

“Barkamol avlod” bolalar markazlari tashkil etiladigan binolar va inshootlarni mukammal taʼmirlash uchun loyiha-smeta hujjatlari oʻz vaqtida ishlab chiqilishini, taʼmirlash ishlarini toʻliq tugallash va obyektlarni belgilangan muddatlarda topshirish shartlari bilan tanlov (tender) savdolari oʻtkazilishini taʼminlasinlar;

buyurtmachi bilan pudratchilar oʻrtasidagi shartnoma majburiyatlari bajarilishi hamda qurilish normalari va qoidalariga muvofiq taʼmirlash ishlari amalga oshirilishi ustidan doimiy nazorat oʻrnatsinlar.

8. Barkamol avlod” bolalar maktablarida oʻqiganlik uchun ota-onalardan olinadigan toʻlovlar oyiga bazaviy hisoblash miqdoriga nisbatan quyidagi miqdorlarda belgilanadi:

Qoraqalpogʻiston Respublikasining Nukus va Xorazm viloyatining Urganch shaharlarida — 5 foiz, Qoraqalpogʻiston Respublikasi va Xorazm viloyatining qolgan tuman (shahar)larida — 2,5 foiz;

viloyatlar markazlari va Toshkent shahrida — 10 foiz;

respublikaning qolgan tuman (shahar)larida — 5 foiz.

Ijtimoiy himoyaga muhtoj oila farzandlari, Mehribonlik uylari va Bolalar shaharchasi tarbiyalanuvchilari, imkoniyati cheklangan bolalar uchun ixtisoslashtirilgan taʼlim muassasalari oʻquvchilari va ichki ishlar organlarining profilaktik hisobiga olingan oʻquvchilar “Barkamol avlod” bolalar maktablarida oʻqiganlik uchun ota-onalar toʻlovidan ozod qilinadi.

Texnik ijodkorlik yoʻnalishidagi toʻgaraklar uchun ota-onalar toʻlovi Qoraqalpogʻiston Respublikasi, Toshkent shahar va viloyatlar maktablarida 25 foiz, tuman (shahar) maktablarida 20 foiz etib belgilanishi mumkin.

Agar maktabga oiladan bittadan ortiq bola borsa, ularning har biri uchun oʻqiganlik uchun ota-onalardan olinadigan toʻlovlar miqdorining 70 foizi, toʻgarak aʼzosi maktabda tashkil etilgan bittadan ortiq toʻgarakka aʼzo boʻlgan taqdirda 60 foizi toʻlanadi.

Ota-onalar toʻlovidan tushgan mablagʻlar:

a) “Barkamol avlod” bolalar maktablari faoliyati uchun zarur boʻlgan xom ashyo va materiallar, moddiy boyliklar (mebel, asbob-uskuna va jihozlar, kompyuter texnikasi va boshqalar) va transport vositalarini xarid qilishga;

b) madaniy-ommaviy tadbirlarni oʻtkazish va ularda qatnashish bilan bogʻliq xarajatlarga;

v) toʻgarak rahbarlari va xodimlarni 50 foizgacha ragʻbatlantirishga;

g) oʻquvchilari xalqaro miqyosida oʻtkaziladigan koʻrik-tanlov va festivallarda gʻoliblikni qoʻlga kiritgan toʻgarak rahbarlari bazaviy hisoblash miqdorining quyidagi miqdorlarida bir martalik pul mukofotlari bilan taqdirlanadi:

1-oʻrin uchun — 20 baravarigacha;

2-oʻrin uchun — 15 baravarigacha;

3-oʻrin uchun — 12 baravarigacha;

d) oʻquvchilari respublika miqyosida oʻtkaziladigan koʻrik-tanlov va festivallarda gʻoliblikni qoʻlga kiritgan toʻgarak rahbarlari bazaviy hisoblash miqdorining quyidagi miqdorlarida bir martalik pul mukofotlari bilan taqdirlanadi:

1-oʻrin uchun — 10 baravarigacha;

2-oʻrin uchun — 7 baravarigacha;

3-oʻrin uchun — 5 baravarigacha.

(8-band Oʻzbekiston Respublikasi Vazirlar Mahkamasining 2021-yil 27-maydagi 331-sonli qaroritahririda — Qonunchilik maʼlumotlari milliy bazasi, 28.05.2021-y., 09/21/331/0501-son)

9. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida taklif kiritsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2011-yil 28-fevral,

50-son

Vazirlar Mahkamasining 2011-yil 28-fevraldagi 50-son qaroriga
1-ILOVA

“Barkamol avlod” tuman (shahar) bolalar markazlarining

NAMUNAVIY SHTAT TUZILMASI

* Toʻgaraklar rahbarlari soni toʻgarak mashgʻulotlari hajmiga qarab belgilanadi.

** Xizmat koʻrsatuvchi xodimlar soni normativ boʻyicha belgilanadi.

LexUZ sharhi

1-ilovaga Oʻzbekiston Respublikasi Prezidentining 2017-yil 30-dekabrdagi 1039-sonli qaroriga asosan oʻzgartirish kiritilgan. Rus tili matniga qarang.

Vazirlar Mahkamasining 2011-yil 28-fevraldagi 50-son qaroriga
2-ILOVA

“Barkamol avlod” viloyat, Qoraqalpogʻiston Respublikasida respublika va Toshkent shahar bolalar markazlarining

NAMUNAVIY SHTAT TUZILMASI

(2-ilovaning matni Oʻzbekiston Respublikasi Vazirlar Mahkamasining 2017-yil 12-maydagi 275-sonli qarori tahririda — OʻR QHT, 2017-y., 20-son, 361-modda)

Vazirlar Mahkamasining 2011-yil 28-fevraldagi 50-son qaroriga
3-ILOVA

Uch yoʻnalish — texnik ijodkorlik, badiiy ijodiyot, oʻlkashunoslik va ekologiya boʻyicha “Barkamol avlod” respublika bolalar markazlarining

NAMUNAVIY SHTAT TUZILMASI

(3-ilovaning matni Oʻzbekiston Respublikasi Vazirlar Mahkamasining 2017-yil 12-maydagi 275-sonli qarori tahririda — OʻR QHT, 2017-y., 20-son, 361-modda)

Vazirlar Mahkamasining 2011-yil 28-fevraldagi 50-son qaroriga
4-ILOVA

2011 — 2014-yillarda “Barkamol avlod” respublika bolalar markazlarini shakllantirish boʻyicha

KOMPLEKS TADBIRLAR

T/r	Tadbirlar	Bajarish muddati	Masʼul bajaruvchilar
1.	“Barkamol avlod” bolalar markazlarini shakllantirish uchun 215 ta maktabdan tashqari muassasani aniqlash, shu jumladan 137 tasi faoliyat koʻrsatgan muassasalardan va 78 tasi umumtaʼlim maktablarining binolaridan foydalanilgan holda hamda ularning tuzilmalarini “Barkamol avlod” bolalar markazlarining namunaviy tuzilmalariga muvofiqlashtirish.	2011-yil 10-martgacha	Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Xalq taʼlimi vazirligi, Moliya vazirligi
2.	Faoliyat koʻrsatuvchi respublika maktabdan tashqari taʼlim muassasalari negizida texnik, badiiy ijodiyot, oʻlkashunoslik va ekologiya boʻyicha 3 ta respublika “Barkamol avlod” bolalar markazlarini shakllantirish.	2011-yil sentabr	Toshkent shahar hokimligi, Iqtisodiyot vazirligi, Moliya vazirligi, Davlat arxitektura va qurilish qoʻmitasi, Xalq taʼlimi vazirligi
3.	“Barkamol avlod” bolalar markazlari toʻgʻrisidagi nizomni ishlab chiqish va belgilangan tartibda tasdiqlash.	2011-yil I chorak	Xalq taʼlimi vazirligi, Moliya vazirligi, Mehnat va aholini ijtimoiy muhofaza qilish vazirligi, Adliya vazirligi, “Kamolot” YOIH Markaziy kengashi
4.	Maktabdan tashqari taʼlim uchun davlat talablarini ishlab chiqish va belgilangan tartibda tasdiqlash.	2011-yil I chorak	Xalq taʼlimi vazirligi, Iqtisodiyot vazirligi, Moliya vazirligi
5.	“Barkamol avlod” bolalar markazining namunaviy Ustavini ishlab chiqish va belgilangan tartibda tasdiqlash.	2011-yil I chorak	Adliya vazirligi, Xalq taʼlimi vazirligi
6.	Bolalar “Barkamol avlod” bolalar markazida oʻqiganligi uchun ota-ona toʻlovini undirish va undan foydalanish tartibini ishlab chiqish va tasdiqlash.	2011-yil mart	Moliya vazirligi
7.	“Barkamol avlod” bolalar markazlarini mukammal taʼmirlash va jihozlashning har yilgi aniq yoʻnaltirilgan dasturlarini shakllantirish va tasdiqlash.	Belgilangan muddatlarda har yili	Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Iqtisodiyot vazirligi, Moliya vazirligi
8.	“Barkamol avlod” bolalar markazlari obyektlarida mukammal taʼmirlash uchun loyiha-smeta hujjatlarini ishlab chiqish va tanlov (tender) savdolari oʻtkazish.	Yillik aniq yoʻnaltirilgan dasturlar tasdiqlangandan keyin ikki oy muddatda	Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Moliya vazirligi, Davlat arxitektura va qurilish qoʻmitasi
9.	“Barkamol avlod” bolalar markazlarida toʻgarak ishining har bir turi boʻyicha yangi, zamonaviy oʻquv dasturlarini ishlab chiqish va amaliyotga joriy etish.	2011-yil sentabr	Xalq taʼlimi vazirligi, Oʻrta maxsus, kasb-hunar taʼlimi markazi, Badiiy akademiya, Respublika “Hunarmand” birlashmasi, “Kamolot” YOIH Markaziy kengashi
10.	“Barkamol avlod” bolalar markazi faoliyatining asosiy yoʻnalishlari boʻyicha toʻgaraklarda mashgʻulotlar olib borish uchun umumtaʼlim maktablari, akademik litseylar va kasb-hunar kollejlari oʻqituvchilarini oʻrindoshlik boʻyicha kontrakt asosida jalb etish.	2011-yildan boshlab	Xalq taʼlimi vazirligi, Oʻrta maxsus, kasb-hunar taʼlimi markazi
11.	“Barkamol avlod” respublika va viloyat markazlarida seminarlar va qisqa muddatli trening-kurslar tashkil etish yoʻli bilan ham “Barkamol avlod” bolalar markazlarining, ham umumtaʼlim maktablarining metodistlari va rahbarlari malakasini oshirish dasturini tasdiqlash.	har yili 1-fevralgacha	Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Xalq taʼlimi vazirligi, Oliy va oʻrta maxsus taʼlim vazirligi, Badiiy akademiya, Respublika “Hunarmand” birlashmasi
12.	Dastur doirasida bajariladigan tadbirlarni ommaviy axborot vositalarida va Internet tarmogʻida muntazam yoritish, “Barkamol avlod” bolalar markazlari qatnashchilarining yutuqlari va muvaffaqiyatlari toʻgʻrisidagi materiallarni eʼlon qilish.	Doimo	Oʻzbekiston milliy teleradiokompaniyasi, Oʻzbekiston Milliy axborot agentligi, Xalq taʼlimi vazirligi

Vazirlar Mahkamasining 2011-yil 28-fevraldagi 50-son qaroriga
5-ILOVA

2011 — 2014-yillarda “Barkamol avlod” bolalar markazlarini mukammal taʼmirlash va jihozlashning asosiy

PARAMETRLARI

						obyektlar soni
	Mintaqalar	Hammasi	shu jumladan yillar boʻyicha:
	Mintaqalar	Hammasi	2011	2012	2013	2014
	Respublika boʻyicha hammasi	215	30	51	64	70
1.	Qoraqalpogʻiston Respublikasi	17	2	4	5	6
2.	Andijon viloyati	18	3	4	6	5
3.	Buxoro viloyati	14	2	3	4	5
4.	Jizzax viloyati	14	1	4	4	5
5.	Qashqadaryo viloyati	15	3	3	4	5
6.	Navoiy viloyati	11	2	3	3	3
7.	Namangan viloyati	13	3	4	3	3
8.	Samarqand viloyati*	17	3	4	4	6
9.	Surxondaryo viloyati	16	1	3	6	6
10.	Sirdaryo viloyati	12	1	3	4	4
11.	Toshkent viloyati	21	3	6	5	7
12.	Fargʻona viloyati*	19	3	4	6	6
13.	Xorazm viloyati	13	1	4	4	4
14.	Toshkent shahri	12	2	2	4	4
15.	Respublika muassasalari	3	0	0	2	1

Izoh:

* Samarqand viloyatining Oqdaryo tumanidagi 20-maktab va Fargʻona viloyatining Bagʻdod tumanidagi 2-maktab Taʼlim muassasalarini rekonstruksiya qilish, mukammal taʼmirlash va jihozlash jamgʻarmasi mablagʻlari hisobiga 2011-yilning mukammal taʼmirlash dasturiga kiritilgan. “Barkamol avlod” bolalar markazlarini mukammal taʼmirlash boʻyicha ishlar hajmi binolarning texnik holati boʻyicha nuqsonli dalolatnomalar asosida belgilanadi.

(Oʻzbekiston Respublikasi qonun hujjatlari toʻplami, 2011-y., 9-son, 89-modda; 2017-y., 20-son, 361-modda; Qonun hujjatlari maʼlumotlari milliy bazasi, 29.12.2019-y., 09/19/1046/4242-son; Qonunchilik maʼlumotlari milliy bazasi, 28.05.2021-y., 09/21/331/0501-son)