2000-yil paxta hosilini yigʻishtirib olishni uyushqoqlik bilan oʻtkazish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq va suv xoʻjaligi vazirligi (Xoltoyev), “Oʻzdavpaxtasanoatsotish” uyushmasi (Zikriyoyev), “Oʻzqishloqxoʻjaliktaʼminottuzatish” davlat-kooperativ qoʻmitasi (Yusupov), boshqa vazirliklar va idoralar, Qoraqalpogʻiston Respublikasi Vazirlar Kengashi, viloyatlar va tumanlar hokimliklari, qishloq xoʻjaligi korxonalari rahbarlari paxta terish mashinalari, transport traktorlari, paxta tashish uchun maxsus jihozlangan yuk avtomobillari, paxta tozalash zavodlari, paxta tayyorlash punktlari hamda quritish-tozalash sexlari shu yil 1-sentabrgacha hozirlab qoʻyilishini, shuningdek, xoʻjaliklarga talab qilingan miqdorda fartuklar, brezentlar va yigʻim-terimni qisqa muddatlarda hamda nobudgarchiliksiz oʻtkazish uchun zarur boʻlgan boshqa moddiy-texnika resurslari yetkazib berilishini taʼminlasinlar.

2. Oʻzbekiston Respublikasi Qishloq va suv xoʻjaligi vazirligi (Xoltoyev), “Oʻzqishloqxoʻjaliktaʼminottuzatish” davlat-kooperativ qoʻmitasi (Yusupov), Qoraqalpogʻiston Respublikasi Vazirlar Kengashi, viloyatlar hokimliklari:

gʻoʻza bargini toʻkish 2000-yil 20-sentabrdan kechiktirmasdan, Qoraqalpogʻiston Respublikasi va Xorazm viloyatida esa shu yil 25-sentabrdan kechiktirmay tugallangan holda eng qulay muddatlarda sifatli oʻtkazilishini taʼminlasinlar. Gʻoʻza bargini toʻkishni yerda olib borish usuli bilan oʻtkazish uchun texnika vositalari va apparatlar tayyorlab qoʻyilishiga birinchi darajali ahamiyat bersinlar;

hosil paxta terish mashinalari bilan 1-ilovada nazarda tutilgandan kam boʻlmagan hajmda yigʻishtirib olinishini taʼminlasinlar;

dalalarni “Keys” gorizontal shpindelli mashinalarning ishlashi uchun tayyorlashga alohida eʼtibor bersinlar, har bir ana shunday mashina uchun kamida 140 gektar paxta maydoni ajratilishini taʼminlasinlar. Gorizontal shpindelli mashinalardan unumli foydalanilishi uchun shaxsiy javobgarlik Qoraqalpogʻiston Respublikasi Vazirlar Kengashi Raisi, viloyatlar va tumanlar hokimlari va “Oʻzqishloqxoʻjaliktaʼminottuzatish” davlat-kooperativ qoʻmitasi hamda uning hududiy boʻlinmalari rahbarlari zimmasiga yuklansin.

3. “Oʻzqishloqxoʻjaliktaʼminottuzatish” davlat-kooperativ qoʻmitasi (Yusupov), “Oʻzqishloqxoʻjalikmash-xolding” xolding kompaniyasi (Matchonov) paxta terish mashinalari, shuningdek, paxta yigʻim-terimi va tayyorlashda band boʻlgan boshqa texnika uchun dvigatellar, uzellar, agregatlar va boshqa materiallarning almashtirish fondlarini tashkil etsinlar, ularning belgilangan joylarga zudlik bilan yetkazib berilishini taʼminlasinlar.

4. “Oʻzbekiston havo yoʻllari” milliy aviakompaniyasi (Roʻzmetov), Oʻsimliklarni himoya qilish va agrokimyoviy-tadqiqotlar respublika markazi (Muhamadaliyev) Oʻzbekiston Respublikasi Qishloq va suv xoʻjaligi vazirligi hamda “Oʻzagrokimyotaʼminot” birlashmasining buyurtmanomalari boʻyicha gʻoʻza bargini toʻkish uchun zarur boʻlgan miqdorda samolyotlar va maxsus motodeltoplanlar ajratsinlar.

5. Paxta yigʻim-terimi qatnashchilarini moddiy ragʻbatlantirishni kuchaytirish maqsadida xoʻjaliklarga paxta terimi uchun dalalardagi mavjud hosilga qarab tabaqalashtirilgan haq toʻlash tavsiya qilinsin.

Qoʻl terimida:

terilgan 1 kilogramm oʻrta tolali nav paxta uchun kamida 14 soʻm, ingichka tolali paxta uchun 16 soʻm;

terilgan 1 kilogramm oʻrta tolali urugʻlik paxta uchun kamida 16 soʻm, ingichka tolali paxta uchun 18 soʻm haq toʻlansin.

Mashina-traktor parklari va xoʻjaliklar mexanik-haydovchilarga ikki qatorli vertikal shpindelli paxta terish mashinasida terilgan bir tonna paxta uchun kamida 300 soʻm, toʻrt qatorli mashinada terilgan paxta uchun kamida 200 soʻm, ikki qatorli gorizontal shpindelli mashinada terilgan paxta uchun kamida 150 soʻm miqdorida haq toʻlaydilar.

Terimchilar va paxta terish mashinalarining mexanik-haydovchilari bilan har besh kunda hisob-kitob qilinsin.

6. Moliya vazirligi huzuridagi Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi, Markaziy bank va boshqa tijorat banklari terimchilar va paxta terish mashinalarining mexanik-haydovchilari bilan, shuningdek, paxtani yuklash, tushirish, tayyorlash, transportda tashish, joylashtirish hamda ishlov berish, paxta terish texnikasiga texnika xizmati koʻrsatish va tuzatishda band boʻlgan xodimlar bilan oʻz vaqtida hisob-kitob qilish uchun xoʻjaliklarni, mashina-traktor parklarini, tayyorlov punktlarini, paxta tashuvchilarni, paxta tozalash zavodlarini mehnatga haq toʻlashning idoraviy ichki normativlari boʻyicha oʻz vaqtida mablagʻ va yetarli miqdorda naqd pul bilan taʼminlasinlar.

7. Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi, viloyatlar va tumanlar hokimliklari shirkat xoʻjaliklari va boshqa qishloq xoʻjaligi korxonalari har bir oila, ijara pudrati va boshqa ichki xoʻjalik boʻlinmalari bilan topshirilgan paxta xomashyosining amaldagi hajmi va sifati asosida hisob-kitob qilinishini taʼminlash ustidan doimiy nazorat oʻrnatsinlar.

Xoʻjalik ichki pudrati ayrim boʻlinmalari zararlari boshqa boʻlinmalar daromadlari hisobiga qoplanishi qatʼiy taqiqlansin.

8. Andijon, Namangan va Fargʻona viloyatlari hokimliklari Jizzax va Sirdaryo viloyatlari xoʻjaliklari bilan tuzilgan shartnomalarga koʻra 2-ilovaga muvofiq ortiqcha mehnat resurslari yuqorida koʻrsatib oʻtilgan viloyatlarga paxta terimiga safarbar qilinishini tashkil etsinlar.

“Oʻzbekiston temir yoʻllari” davlat-aksiyadorlik kompaniyasi, “Oʻzavtotrans” davlat korporatsiyasi paxta terimiga jalb qilingan odamlarning tayinlangan joylarga olib borilishini taʼminlasinlar.

9. “Oʻzavtotrans” davlat korporatsiyasi “Oʻzdavpaxtasanoatsotish” uyushmasi buyurtmanomalariga koʻra tuzilgan shartnomalar asosida respublika mintaqalari boʻyicha paxta tashish uchun zarur miqdorda yuk mashinalari ajratilishini taʼminlasin.

10. “Oʻzqishloqxoʻjalikmash-xolding” xolding kompaniyasi va “Oʻzqishloqxoʻjaliktaʼminottuzatish” davlat-kooperativ qoʻmitasi paxta yigʻim-terimi mavsumida qatnashuvchi paxta terish mashinalari va boshqa texnikaning uzluksiz ishlashini tashkil etishda paxta ekuvchi xoʻjaliklarga va mashina-traktor parklariga amaliy yordam koʻrsatish maqsadida viloyatlarga 3-ilovaga muvofiq sanoat korxonalarini biriktirib qoʻysinlar.

11. “Oʻzneftmahsulot” aksiyadorlik kompaniyasi (Ahmedov) yonilgʻi-moylash materiallari xoʻjaliklarga, fermyerlarga, mashina-traktor parklariga va paxta tozalash sanoati korxonalariga yigʻim-terim ishlarini bajarish uchun zarur boʻlgan miqdorda uzluksiz yetkazib berilishini taʼminlasin.

12. “Oʻzbekbirlashuv” (Bekchonov), “Oʻzbeksavdo” (Fayziyev) kompaniyalari, “Oʻzdonmahsulot” davlat korporatsiyasi (Najmiddinov) paxta yigʻim-terimi qatnashchilarini oziq-ovqat va boshqa xalq isteʼmol tovarlari bilan uzluksiz taʼminlash masalalarini oʻz vaqtida hal qilsinlar.

13. Oʻzbekiston Respublikasi Sogʻliqni saqlash vazirligi (Nazirov) paxta yigʻim-terimida band boʻlgan xodimlarga zarur tibbiy yordam koʻrsatilishini taʼminlasin.

14. Oʻzbekiston Respublikasi Madaniyat ishlari vazirligi (Joʻrayev), Pochta va telekommunikatsiyalar agentligi (Abdullayev) hosil yigʻim-terimi davrida terimchilarga madaniy xizmat koʻrsatishni tashkil etsinlar, sanʼat ustalari va adabiyot namoyandalarining xoʻjaliklarga borishlarini, gazeta va jurnallar oʻz vaqtida yetkazib berilishini nazarda tutsinlar.

15. “Oʻzteleradio” kompaniyasi (Koʻchimov) zamonaviy usullarni amaliyotda qoʻllagan holda paxta yetishtirish va uni terib olishda yuqori natijalarga erishgan ishlab chiqarish ilgʻorlari terimchilar, mexanik haydovchilar, ijarachilar, fermyerlar, xoʻjaliklar rahbarlariga alohida eʼtibor qaratgan holda 2000-yilgi paxta yigʻim-terimining borishini radio va televideniyeda muntazam ravishda yoritib borsin.

16. Mazkur qarorning bajarilishini nazorat qilish Bosh vazir oʻrinbosari T. Xoltoyev va Oʻzbekiston Respublikasi Prezidentining Davlat maslahatchisi I. Joʻrabekov zimmasiga yuklansin.