Kichik va oʻrta tadbirkorlikni rivojlantirishni yanada ragʻbatlantirish, uni raqobatbardosh mahsulot ishlab chiqarishni koʻpaytirish imkonini beradigan zamonaviy xorijiy uskunalar va texnologiyalar bilan taʼminlash maqsadida, shuningdek jalb etilayotgan xorijiy kredit mablagʻlardan samarali foydalanish manfaatlarini koʻzlab:

1. Kichik va oʻrta tadbirkorlikni rivojlantirish boʻyicha loyihalarni moliyalash uchun xalqaro moliya tashkilotlarining kredit majburiyatlarini, shuningdek xorijiy sarmoyadorlarning mablagʻlarini respublikaning Tashqi iqtisodiy faoliyat milliy banki hamda boshqa tijorat banklari orqali jalb etish toʻgʻrisida Oʻzbekiston Respublikasi Moliya vazirligi bilan Davlat mulkini boshqarish va tadbirkorlikni qoʻllab-quvvatlash davlat qoʻmitasining taklifi ilovaga muvofiq qabul qilinsin.

2. Belgilab qoʻyilsinki, asosan xalq isteʼmol mollari ishlab chiqariladigan, qishloq xoʻjalik mahsulotlari chuqur qayta ishlanadigan mavjud kichik va oʻrta qoʻshma korxonalarni yanada rivojlantirish hamda shunday yangi korxonalarni barpo etish, shuningdek eng avvalo qishloq joylarda infrastrukturani rivojlantirish yoʻli bilan raqobatbardosh va eksportga moʻljallangan mahsulotlar ishlab chiqarish hamda xizmat koʻrsatishni koʻzda tutuvchi investitsiya loyihalari jalb etilayotgan xorijiy kredit mablagʻlari hisobiga birinchi navbatda pul bilan taʼminlanadi.

3. Davlat mulki qoʻmitasi, “Oʻzistiqbolstat” davlat qoʻmitasi Oʻzbekiston Respublikasining Tashqi iqtisodiy aloqalar vazirligi, Xorijiy sarmoyalar boʻyicha agentlik, “Oʻzinvestloyiha” kompaniyasi, Tovar ishlab chiqaruvchilar va tadbirkorlar palatasi hamda Biznes-fond, Qoraqalpogʻiston Respublikasi Vazirlap Kengashi, viloyatlar va Toshkent shahar hokimliklari, vazirliklar va idoralar bilan birgalikda bir oy muddatda xorijiy kreditlarni jalb etish hisobiga kichik va oʻrta tadbirkorlikni rivojlantirishning 1997-yilga moʻljallangan ustuvor yoʻnalishlarini ilovaga* muvofiq ishlab chiqsin.

4. “Oʻzbekinvest” milliy sugʻurta kompaniyasi xorijiy valyutada olinadigan kreditlarni taʼminlash uchun berilgan garovlarni belgilangan tartibda sugʻurta qilishni amalga oshirsin.

6. Oʻzbekiston Respublikasi Tashqi iqtisodiy aloqalar vazirligi “Oʻzinvestloyiha” kompaniyasi bilan birga kichik va oʻrta tadbirkorlik uchun xorijda ishlab chiqarilgan asbob-uskuna va texnologiyalar zamonaviy turlarining koʻrik-savdolarini muntazam suratda oʻtkazib tursin.

7. Oʻzbekiston Respublikasi Vazirlar Mahkamasi bir hafta muddatda ushbu Farmonni ijro etish yuzasidan qaror qabul qilib, bunda loyihalarni tanlab olish tizimini hamda xorijiy kredit majburiyatlarining mablagʻlari hisobidan olingan hamda kichik va oʻrta tadbirkorlikni rivojlantirishga yoʻnaltirilgan kreditlarning oʻz vaqtida qaytarilishi uchun qarz oluvchilarning huquqiy javobgarligi belgilanishini nazarda tutsin.

8. Mazkur Farmonning ijrosini nazorat qilish Oʻzbekiston Respublikasi Bosh vaziri Oʻ.T. Sultonov zimmasiga yuklansin.